@ الوالدة العزيزة الغالية علوية عبد الرحمن بابكر نمر في مدينة جدة @

[moh_alnour]

وصلت بحمد الله و سلامته ظهر أمس الجمعة الوالدة العزيزة علوية عبد الرحمن بابكر نمر
إلى مدينة جدة لزيارة إبنتها ( رانيا ) و إبنها ( محمد ) و رؤية حفيدها ( ذي يزن )
و أداء مناسك العُمرة و زيارة مدينة المصطفى عليه أفضل الصلاة و السلام
متمنيا ً لها قضاء وقت طيب بين ظهرانينا

http://oi52.tinypic.com/6ixquh.jpg

http://oi54.tinypic.com/2lvg55x.jpg

ليت الشباب يعود يوما ً يا أغلى الناس
الصورة دي في ( سبتمبر 1978م ) البتعرف على ود النور في الصورة دي ليه جائزة عبارة عن
( برطمانية دكوة و برطمانية شطة و برطمانية ويكة و برطمانية كركدي و كيس عرديب و ملعقة فسيخ :p )

[الفارس البنفسجي]

ألف حمد لله على السلامة
وإن شاء الله دائماً عامرين باللامات الحلوة مع ست الحبايب

[أحمد عمر ( MOODY )]

ألف حمداً لله على سلامة الوالدة يا ود الجاك
و ربنا يدّيها الصحة والعافية وطولة العمر و العمل الصالح
تقبّل الله منّا و منها و منكم صالح الأعمال
و عُمرة مقبولة إن شاء الله










يعني الشافك شايل بِزَّتك مع ذي يزن
مااااااااااااااااااااا كضَّب
:p:p:p

[مدنيّة]

جدة نورت ياود الجاك


--------
انت "ح تعمل" لينا فيها الشايلنك دا
عشان تصغر روحك وكدا:cool:

-------
اها ترسل لي الهدية مع الحجة وهي راجعة باذن الله

[سروية]

الف الف حمداً لله علي سلامة الوالدة العزيزة

وربنا اخليها واحفظها واديها طول العمر

وعمرة مقبولة ان شاء الله

تخريمة ..متجدع وشايلنك ومتمحن كمان ياود النور اها ما نقشتك :confused:

خلاس الهدية ماعايزها شطة ولا فسيخ ولا بهارات عايزها عمرة ادييييييييييييييييل :rolleyes:

[همسة شوق]

الف حمد لله على السلامة
وجدة نورت والله بالوالدة ربنا يديها الصحة والعافية ويطول عمرها




الشارلستون بتاعك فى السلك

[mohd saeed magazoub]

الف حمد لله على السلامة

وعمرة مقبولة وربنا يتقبل منا ومنكم صالح الاعمال

12713

ود النور مالك بتفتش في الماضي زي يزن كبرك ولاشنو

[أبوريلان]

حمداً علي سلامتها يا ود الجاك وجدة نورت
أمنياتي لها ولكم بأجمل الأوقات بحضنها
وعُمرة وزيارة مقبولة .

[ابو لوزة]

يا حبيب الف الف حمداً لله علي سلامة الوالدة العزيزة

وربنا يخليها ويحفظها ويديها طول العمر

وتشوف عيال عيالك يا رب

وعمرة مقبولة ان شاء الله

وزيارة مبروكة

[عوض صقير]

ألف حمدلله على سلامة وصول الوالدة العزيزة

ربنا يتقبل منها

قريبة أب عاج دراج المحن



....................

بالنسبة للصورة طبعاً الوجيه الواقف ولابس شارلستون ..

[ياسر عمر الامين]

حمدا لله على سلامة الوالدة وأمنياتنا لها باقامة طيبة

[ahmed algam]

الف الف حمداً لله علي سلامة الوالدة العزيزة

وربنا اخليها واحفظها واديها طول العمر

وعمرة مقبولة ان شاء الله

[روبش]

الف الف حمداً لله علي سلامة الوالدة العزيزة

وربنا اخليها واحفظها واديها طول العمر

وعمرة مقبولة ان شاء الله

اقول :: لبستك في السلك
اقول :: الهدايا عندك لكن ياهو شبهكم يا ناس الجزيرة ... هاك الدكوة ده

[خالد أحمد الصول]

ربي اجعلها زيارة سعيدة مباركة و عمرة مقبولة و ربنا يقر أعينها بكم يا فلزتها ...
بس يا حاجة أوصيك بالدهب ... أهم حاجة ...أهم حاجة ما تبقي ذي ناس نزار أبو سفروق ...

[mahagoub]

حمداً لله على السلامه
وربنا يتقبل ومنتظرين
ما تكمل الفسيخ

[Mubarak]

حمداً لله على سلامة الوصول ..وعمرة وزيارة مقبولة إنشاء الله

[تغريدا]

ألف ألف حمدالله على سلامتها وأن شاء الله عمرة مقبولة وربى يحفظها ويعطيها الصحة والعافية ويديمها تاج فوق رؤسكم أنا غايتو شاكه فى الزعلان أبو شارلستون دا أما موضوع الهدية دا بناقشه مع أمى علوية برااااااااى لكن ماشاء الله يابويذن بتتشابهوا شديد;)

[moh_alnour]

الأخوة الأعزاء
ضياء الدين محمد يوسف ( الفارس البنفسجي ) + المهندس أحمد مودي + أبو ريلان + هيثم الخواض ( أبو لوزة )
ياسر عمر + أحمد علقم + مبارك
لكم جميعا ً أسمى آيات الود و التقدير و عقبال ما نشاركم في مناسباتكم السعيدة
و الشكر للأخوة ( المميز + معتز الريح + مدنية + ناصر بشير إنجليز + عمنا محجوب ) للإتصال
و الشكر أيضا ً لكل من قابلني في الماسنجر



إنت " ح تعمل " لينا فيها الشايلنك دا عشان تصغر روحك وكدا:cool: أها ترسل لي الهدية مع الحجة وهي راجعة باذن الله

غايتو يا بتاعت الأهلية أمدرمان شكلك كدا باصيتي غرويدة عين ساااااااااااااااااااااااي :p
واحد مواليد ( أبريل 1975م ) و الصورة في ( سبتمبر 1978م ) كيف يكون الشايلنو ؟
مدنية لو أستمريتي كدا ح أطالب بحذف عضويتك من الصفوة :rolleyes:




تخريمة .. متجدع و شايلنك و متمحن كمان يا ود النور أها ما نقشتك :confused:
خلاس الهدية ما عايزها شطة ولا فسيخ ولا بهارات عايزها عمرة أدييييييييييييييييل :rolleyes:

من لا يشكر الناس لا يشكر الله ، سروية ياخ إن شاء الله يوم شُكرك ما يجي يا شايقية يا سيوبر :p
طبعا ً يا جماعة سروية ساهمت في إجراءات الوالدة منذ البداية عندما أرسلت لي صورة من جواز الوالدة عبر الإيميل بالإسكانر
و بعد صدور تأشيرة الزيارة قامت بطباعتها للوالدة ، و بعد ذلك أرسلت لها التذكرة عبر الإيميل فقامت بطباعتها أيضا ً
الواحد بقى شاكي إنك شايقية :p ( عام نمزح يا جماعة عشان الشوايقة ما يجوا ناطين لي في البوست دا )
أقول : ما تبقي طماعة عريس و عُمرة في سنة واحدة ؟ ربنا يتم ليك على خير يا سروية و يسعدك و يهنيك




الشارلستون بتاعك فى السلك

يا همسة شوق و طيب خاطر يا حلاوة الريدة في الأخر يا هلالابي يا راقي أجابتك دي ح نستبعدا لأنك عدلتا المشاركة :p
قلتا لي الجندي قال ليك زاملتا ( طارق تُكُل ) الحمد لله الما قال ليك زاملتا المرحوم ( جعفر نُوبة ) :p




ود النور مالك بتفتش في الماضي ذي يزن كبرك ولا شنو ؟

الماضي جميل يا ود مجذوب في كل مناحي الحياة ، في الرياضة و التعليم و الفن و الأخلاق و القيم الإجتماعية
لذلك نظل دوما ً نجتر ذكرياته و نهفو لتنسُم عبق أحداثه




ألف حمد لله على سلامة وصول الوالدة العزيزة ، ربنا يتقبل منها

قريبة أب عاج دراج المحن
بالنسبة للصورة طبعا ً الوجيه الواقف و لابس شارلستون

الله يسلمك يا ود صقير ، الواقف ولابس شارلستون مقبولة و أجابتك صحيحة لكن وجيه دي فيها قولان :p
الوالدة لديها قرابة بالوالد و هو الأقرب للرئيس ( أب عاج ) دراج المحن و أمه زينب بت صالح أرباب
أما الوالدة فأمها إبنة عم حاج المبارك والد الفنان ( عبد العزيز المبارك ) و هي من مواليد حي العشير العريق
و أبوها عبد الرحمن بابكر نمر الشهير بعبد الرحمن أركب من أشهر ضباط الشرطة في مدني حتى منتصف السبعينات



أقول :: لبستك في السلك

شدة ولا مِلك :rolleyes:



أقول :: الهدايا عندك لكن ياهو شبهكم يا ناس الجزيرة ... هاك الدكوة ده

يا روبش أسم الوالدة دا ما ذكر بي أسم زول كدا مريخابي أصيل تكسرت على قدميه هجمات مهاجمي الهلال قبل الرياضة الجماهيرية
الوالدة إبنة عم لاعب المريخ و المدافع الجسور الطاهر محمد بابكر نمر الشهير بـ ( الطاهر هواري )
و الذي زامل المرحوم ( سامي عز الدين ) في نهائي الدورة المدرسية الشهيرة أمام مدرسة ( بيت الأمانة ) بأمدرمان
ممثلين لمدرسة الهوارة الثانوية بمدني ذات التاريخ العريق في تفريخ اللاعبين و الموهوبين في كافة الرياضات
أقول : شكلك حضرت الزمن دا ما تتجهل سااااااااااي :p



بس يا حاجة أوصيك بالدهب ... أهم حاجة ...أهم حاجة ما تبقي ذي ناس نزار أبو سفروق

الدهب غااااااااااااالي يا ود الصول عشان كدا اليومين دي نزار حسن أبو سفروق ما قاعد يزعل الحكومة :p



حمداً لله على السلامة و ربنا يتقبل و منتظرين ما تكمل الفسيخ

و الله يا عمك برطمانية الفسيخ دي أول برطمانية إتفتحت عشان كدا فيها تحصل و فيها ما تحصل :rolleyes:

[روبش]

يا روبش أسم الوالدة دا ما ذكر بي أسم زول كدا مريخابي أصيل تكسرت على قدميه هجمات مهاجمي الهلال قبل الرياضة الجماهيرية
الوالدة إبنة عم لاعب المريخ و المدافع الجسور الطاهر محمد بابكر نمر الشهير بـ ( الطاهر هواري )
و الذي زامل المرحوم ( سامي عز الدين ) في نهائي الدورة المدرسية الشهيرة أمام مدرسة ( بيت الأمانة ) بأمدرمان
ممثلين لمدرسة الهوارة الثانوية بمدني ذات التاريخ العريق في تفريخ اللاعبين و الموهوبين في كافة الرياضات
أقول : شكلك حضرت الزمن دا ما تتجهل سااااااااااي

يا ود النور ...
اديك العافيه ...
حقيقة الطاهر هواري من اللاعبين الذين انجبتهم مدينة ودمدني في ذلك الزمن الجميل فيشهد له بالبسالة والقوة بالاضافة إلى الاخلاق الجميلة التي كان يحملها هذا اللاعب
اقول ::: طيب ما اخذت حاجة من هذه الاسرة العريقة
اقول تاني ::: احسن اسكت
اقول تالت ::: تحياتنا للوالده العزيزة

[ABUZAID]

الف حمدا لله على السلامة يا ابويزن

جدة نورت

اقامة طيبة وعمرة مقبولة

[محمد عبد الله عبدالقادر]

الف حمد الله على سلامه الوالده
وايامك ساكوبيس يا حبيب امك ومرتك وولدك

[abomazeen]

ألف ألف حمداً لله علي سلامة الوالدة العزيزة

وربنا يخليها ويحفظها واديها طول العمر

وعمرة مقبولة ان شاء الله

[moh_alnour]

شكرا ً أخواني الأعزاء محمد عبد الله عبد القادر و أبو مازن
و الشكر يمتد لأخواني الأعزاء محمد عبد الله أبو زيد و الجندي المجهول و تغريد عبد العظيم للإتصال

[الجندي المجهول]

الحبيب تكعيب صباح الخير ،،
وحمداً لله على سلامة الوالدة واسال الله ان يمتعها بالصحة والعافية وان يسهل لها العمرة وزيارة مدينة سيدي وحبيبي وشفيعي سيدنا محمد صلى الله عليه وسلم واسال الله ان يكتب لها حجة ،،،،

انت الوحيد الواقف في الصورة (يا برئ)

رسل ملعقة الفسيخ + الدكوة ( وانا عافيك من الباقي)

تخريمة : لكن عمك اناقة ما قصر معاك ( واكيد الصورة في استديو اناقة) زمن جميل وكلن الفي الصورة أجمل

[بنت الرفاعي]

ألف حمداً لله على سلامتها
ونتمنى لها إقامة طيبة إن شاء تعالى.:)

ما شاء الله
......................:rolleyes::)

[رضا حسن محمد]

ألف حمداً لله على سلامتها
ونتمنى لها إقامة طيبة إن شاء تعالى.:)

ما شاء الله
......................:rolleyes::)





يا ود النور
حمدا لله على سلامتها
وهذه الاشياء الجميلة التى توشح مجيئك والحضور
هو امتداد لجمال روحها
كيف لا وقد وهبت العالم ود النور
يا زول سمح والق البخور
لك كل الحضور فى مساحات البوح
ولكل كل ما تساقط من زمانى فى مكانك
وزى ما قال همسة شارلستونك فى السلك

[مايسة]

حمد لله على سلامة الوالدة

وإقامة سعيدة بمدينة جده -
وعمره مقبولة ان شاء الله -

ومتعها الله بالصحة والعافية

---------

انت الشكة ماله نص كم - ومكشر كدا - غايتو :cool::p

[moh_alnour]

الأخوان الأعزاء
* جندينا الحبيب شكرا ً للإتصال و عهدنا بك دائم التواصل و الحضور
* دكتورتنا مُرام صاحبة الإبتسامات النقية و الروح الصافية لك أسمى آيات الود و التقدير
* رضا ود حسن الجدو كتل الأسد أعلم مشغولياتك هذه الأيام و إنشغالك بمرض الوالدة و لكن كان الوعد
أن نراك يوم الأربعاء الفائت أنت و الأسرة رفقة معتز الريح و أسرته الذي شرفنا بزيارة كريمة
تفحيطة : معتز الريح قال لي بت دبلوك مصادرة منك الجوال و مانعاك المرقة اليومين ديل :p
* مايسة بت البندر الديامية السيوبر :p شكرا ً للإتصال يا أم الحلوات ربنا يخليهم ليك و يخلي ليك جيمي
( حلوة جيمي دي ما تقولي لي بايخة ) :p

[ام محمد]

الف حمدا لله على سلامة الوالدة وربنا يسترنا معاها إن شاء الله
واعذرنا على التأخير المشغوليات وهموم العيال اخرتنا عنك
تحياتي للاسرة الكريمة .

[ام حلا]

الف حمدلله علي السلامه يا ودالنور علي الحاجة عليك الله رسل لي ملعقة فسيخ لانو انت عارف الشرقية كيف

[ود علوية]

الحمد الله علي سلامة الوالدة وربنا يخليها ليكم واديها الصحة والعافية وعمرة مقبولة زيارة مبروكة باذن الله
والظاهر نحن مشتركين في اسم الوالدة .....؟ ربنا يحفظ جميع الامهات ويرحم الله جميع من رحلوا عن هذه الدنيا الفانية
وما تنسانا من صالح الدعاء

[بت مارنجان]

الف حمدلله عالسلامة وصول الوالدة يامحمد النور
وان شاء الله اقامة طيبة مع الحفيد ..
وربنا يديها الصحة والعافية طولت العمر

[ودالعمدة]

الحبيب محمد النور
حمداً لله على سلامة الوالدة
وجدة نورت لحدى أبها بالجنوب
بس كان تعمل الجائزة لابتوب عشان نشترك ؟

[حنونة.]

الاخ / محمد النور الف حمد الله على سلامة الوالدة وعمرة مقبولة يارب
ويارب يديم عليكم السعادة والفرحة بتواجدكم مع بعض وربنا يحفظ حبيبنا ذى يزن

[moh_alnour]

* أم محمد رمز من رموز التواصل الأجتماعي الجميل في مدينة جدة هي و زوجها العم صلاح سري
و أبنائها الكِرام حفظهم الله جميعا ً
* أم حلا ، كل البنات ( أمونة ) يا خرطوم ، شكرا ً يا أم حلا ، ربنا يحفظا ليك و تخاويها إن شاء الله
* ود علوية عضو من أعضاء جدة آثر البُعد عن المنتدى و أعضائه لفترة ليست بالقليلة ليس حُبا ً في البُعد و لكن لمشغوليات الغربة
* بت مارنجان بعد أن كانت شُعلة من النشاط في أقسام المنتدى المتعددة أصبحت قليلة الحضور
ربنا يديك قدر ما يرضيك يا فطومة يا بت إبراهيم
* الباشمهندس ود العمدة حفيد ود مدني السني و المجاور للحبيب المصطفى عليه أفضل الصلاة و التسليم
يبدو أن مفارقته لطيبة الطيبة جعلته يُفارق المنتدى إلى حين
* حنونة يا نفحة من أرض المحنة الطيبة بأهلها لك مثل ما دعوتي لنا و زيادة
و لكم جميعا ً تنحني الهامة حُبا ً و تقديرا ً فلولاكم ما كان للأفراح معنى و لا عرفنا للفرح طعم فالناس بالناس و الكل برب العالمين

http://oi56.tinypic.com/ol6h.jpg

وصلت بحمد الله و سلامته ظهر الأمس الوالدة العزيزة إلى أرض المحنة بعد أن أمضت يوما ً بالخرطوم
للمشاركة في عزاء بن عمها الخال العزيز ( عبد المتعال عابدين بابكر نمر ) تغمده الله بواسع رحمته و ألهم أهله و ذويه الصبر و السلوان