المساعد الشخصي الرقمي

مشاهدة النسخة كاملة : زمـــــــــــــــــــــــــــــــــــــن


ضياء الدين احمد
01-02-2005, 05:18 PM
آثرت ان انزل هذه القصيدة في منتدى ودمدنيات بدلا عن المنتدى الثقافي وذلك لما فيها نفحة من انسان ودمدني وقد كتبت هذه القصيدة بعد لمة اصحاب وونسه ظريفه اجتررنا فيها ذكريات ذاك الزمان الجميل وقد كتبت القصيدة بلغة بسيطة كبساطة اهلنا وهي مجرد ونسه اصابني الحاحها حتى كتبتها قصيدة ارجو ان تنال رضائكم وتسوقكم نحو ذاك الزمان ‘ ودمتم
ياحليل ايامنا الفاتت
زمن العاشقين والعفه
وزمن الخيرات الكانت
اتنين بيشيلو القفه
وحبوبه تحجي الشفع
حتى الموجود في اللفه
بأيدي حنونه تلولي
والنوم في عينو مخبأ
واضحك اتبسم ليها
مبسوط والله بالعرفه
وبهناك الأكل اتجهز
ولو جاك الضيف بالصدفه
القى القدامو مدنكل
وياكل أمّان اتكفى
وكبابي الشاي بالمستك
والشاي جواهو القرفه
وتقعد تتونس ونسه
لمان ايدينك تدفأ
من الحنيه الفيهم
لو كنت مريض حتشفى
اتكلموا عن احلامهم
مافيش يناتم كلفه
وسيجاير اولع بينهم
وسيجار بهناك اطفى
والحقه كبيره تكفي
لكل زول داير سفه
والناس رضيانا بحالا
ولمان ارواحهم تصفا
بتعايشوا في حنيه
ممكن عشرين في غرفه
من دون ما تزعّل زولك
او تحسدو او تتشفى
ولو جات الشينه ووقعت
الناس بوراك تصطفى
كل واحد همو اساعدك
وفي عيونو تبين اللهفه
اسرع واديك العندو
مازول معروف بالوقفه

مع حبي
امير عبدالباقي
01-02-2005, 10:12 PM
يديك العافيه ضياء حاجه روعه

ولو جات الشينه ووقعت
الناس بوراك تصطفى
كل واحد همو اساعدك
وفي عيونو تبين اللهفه
اسرع واديك العندو
مازول معروف بالوقفه
أبوبكرحامد
02-02-2005, 12:53 AM
المبدع ضياء ياسلااااااااااااااااااااااااااااااام

القصيدة تمثل شوق صادق لتلكم الحقبة ، وتمثل السهل الممتنع وقد جاءت

الألفاظ بسيطةً دونما ابتذال للمفردة أو اعتباط للفكرة ، فيما جاء البناء الفنى

متماسكاً بفعل روعة التوصيف واحتشاد المشاهد وحميميتها .

لك التحية يارائع

ود الماذون
ضياء الدين احمد
02-02-2005, 01:09 PM
مشكور اخي امير كثيرا علي مرورك الطيب واديك العافيه
ضياء الدين احمد
02-02-2005, 01:15 PM
مشكور الاخ العزيز جدا ابوبكر ود المأذون علي هذا الاطراء الجميل وعلي نقدك وتحليلك الشفيف ودائما ما تشجعني كلماتك علي الكتابه سواء كانت سلبا او ايجابا في ما اكتب لأنه في الحالين انا المستفيد الأول لان كتاباتك ومن خلال متابعتي لك دائما ما تكون موضوعيه وصادقه لا تعرف المجامله ومرة اخرى لك الشكر
خالد هاشم علي
06-02-2005, 01:15 AM
أولاً أهنيك شديد واشد علي يدك.وماغريبة عليك كتابة القصيدة.فمن خلال معرفتي الشخصية بالأخ ضياء فهو مبدع من العيار الثقيل وكثيراً ماقرأت قصايدة عندما كان في المرحلة الجامعية وله قصائد طريفة اتمني أن يتحفنا ببعضها عبر صفحة ودمدنيات.
ضياء الدين احمد
06-02-2005, 01:25 PM
مشكور يا حبيبنا ابو هاشم ويا حليل ايام الجامعه وناس الجامعه
واوعدك انشاء الله ان انزل ديواني كاملا عله يجد القبول
ودمت ابوهاشم
خالد هاشم علي
07-02-2005, 08:58 AM
ياريت والله ياضياء تتحفنا بروايعك علي طول. وأصالة عن نفسي وإنابة عن أسرة المنتدي أستميحك عذراً وأطلب منك قصيدة ناس الصيدلة( بتاعت الشاكوش الحار) عشان الأعضاء يشوفو القصيدة وروعتها.
ودمت لمدني...
ضياء الدين احمد
07-02-2005, 11:15 AM
هههههههههههها والله انت بتاع مشاكل يا ابوهاشم
rasheed
17-02-2005, 02:38 AM
يأأأأأأأأأأأأأأأأخ ده ما معقول يا ضياء أصلو ما معقول ،، أصلو ما معقول

ياحليل ايامنا الفاتت **** اتنين بيشيلو القفه

اضحك اتبسم ليها **** مبسوط والله بالعرفه

القى القدامو مدنكل **** وياكل أمّان اتكفى

وكبابي الشاي بالمستك **** والشاي جواهو القرفه

وتقعد تتونس ونسه **** لو كنت مريض حتشفى

والناس رضيانا بحالا **** بتعايشوا في حنيه

ولو جات الشينه ووقعت **** الناس بوراك تصطفى
كل واحد همو اســاعدك **** وفي عيونو تبين اللهفه
اســـــرع ويديك العنــدو **** مازول معروف بالوقفــه
إن شاء الله يا ضياء مئة ألف قعدة زي دي وسط الحبان والشاي بالهبهان
ضياء الدين احمد
17-02-2005, 01:07 PM
اولا مشكور كتير يا حبيبنا رشيد وشكلك كده القصيده المتك وذكرتك الماضي الجميل وانشاء الله تتلم مع الحبان وكمان تشرب الحلبه باللبن او الحرجل باللبن وشاي بعد الفطور الاحمر بالفول المدمس
اها رايك شنو في الكلام ده؟