ياجماعة شفتوا سهرة مدني

[خالد هاشم علي]

ياسلام علي تلفزيون السودان لمن يتجلي ويتكرم علينا ويرجع لينا اجمل ذكريات وأحب مناظر من مدني الغالية.
سهرة الخميس كانت من مدني مع أفراح مدني الرياضية وكانت حاجة رهيبة، شفنا (فيها ناس طيبين فراقهم كان مبكينا).شدا فيهل ثنائي الجزيرة بكل ماهو جميل.
خلوني أسرح وأسرح ... وأسرح ومشيت هناك في شارع النيل وشارع الحمهورية وقدام ميدان الملك.ولفيت بي شارع المستشفى وتاني مشيت بي شارع النيل وعديت علي جامع الحكومة ومدرسة الأميرية والقبة ودكنان ولفيت علي الدباغة وإشتريت لي أقشي حاااار.وطبعا شفت تاكسي مدني الأحمر (سيهانبيرد) والركشات والأتوس والبكاسي.يعني أخدت لي (قدلة فد يوم في ربوع مدني).
وصدقوني حسدت الناس القاعدين في السهرة (علي النعمة الماجيبين ليها خبر)نعمة كبيرة(هوا مدني وريحة مدني وناس مدني) وقلت ياربي لو كنت قاعد مع الناس ديل هل كنت ح أحس بالنعمة دي؟سؤال ليكم ياناس مدني.
أنا بقول لا والله ماكنت حسيت بالنعمة دي لأني لو كنت حاسي بيها ماكنت شلت أصبعي وطبزت بيهو عيني...
رجعت وسرحت تاني في مدني وإتخيلت نفسي راجع كداري من نادي الجزيرة لحدي حي مايو وبالليل وكمان فاتح زراير القميص والهمبريب ضاربني(وماشايل معاي إقامتي...).ووأسلم علي ده وعلي ده وأقيف شوية جنب كازبلانكا وأشرب من السبيل حق ناس الجيركي.وأمشي لحدي ماأوصل البيت وماتلاقيني (لا دورية ولا فين هويتك...).
لكن فجأة وأنا في عز المشوار (دق علي الكفيل وقال لي تعال فوراً أبغاك، )طبعاً قلت ليهو( حاضر طال عمرك..) شوف بالله الدنيا دي ..وقعدت أجعر جنس جعري...
ختاماً:
نصيحة ليكم ياحباني القاعدين في مدني ( أوع واحد يجيب ليكم فيزا...)وتبقوا في البقينا فيهو.
أخيراً:
أقول لمدني:
تبقي سيرتك هي الكلام...
وتبقي صورتك هي الرؤي الحلوة البعيشها في صحوتي او حتي في عز المنام.
ويبقي إسمك هو الغنا (مدني) * هو البخفف لي عذابات الضنا
مالشفتو منك يا(مدني) الروح ياأنا...
وصفو بصعب ياجميل.
وبعدت عنك ولما طال بي النوي ...بقي لي أسيبك مستحيل..
مستحيل بقي لي اسيبك..
مستحيل...
مستحيل...

[معتصم عيدروس]

اتخيل يا ابوهاشم
انا ادقست
اتصلت علي كمال حامد عشان يوريني السهرة متين قال لي يوم الاحد يعني بكرة
ومع الجري الكتير خشيت البيت لقيت صاحبي مرسل لي رسالة في الموبايل بتقول لي افتح تلفزيون السودان وكانت الدنيا اصبحت
بختك
ويا ريت لو تكتب لي عنها وترسل لي علي الايميل
aiddrous@hotmail.com

[خالد هاشم علي]

بزيارتك بيتنا نور والله نور كلو زينة...
عزيزي معتصم عيدروس...أولاً دعني أسجل شكري الجزيل علي هذة الزيارة الكريمة وأعجابي الشديد بكتاباتك وعمودك الرائع من قلب الجزيرة.
ربنا يوفقك وإنت تحمل هموم الرياضة بمدني وياريت ترجع أيام زمان( أيام كان تشكيلة الفريق القومي الاساسية تضم ثمانية لاعبين من مدني ) ودي معلومة عرفتها من السهرة علي لسان عمنا المبدع ( مهدي عابدين).وإنشاء الله ح أرسل ليك كل التفاصيل علي عنوانك وربنا يجمعنا دايما في حب مدني. ودمت

[أبوريلان]

شكرا خالد جار طارق التوم

والله فعلا أتحفونا بهذه السهرة الجميلة ، أصلوا الواحد كان ما عارف يمشى وين والدنيا خميس ، طبعا السعودية ما فيها أى برنامج غير الدبرسه والتلفزيون والحمدلله فى التلفزيون بعد كل فترة بفرحنا بشىء من الغالية مدنى ، وفعلا كانت سهرة تشد الإحساس بجمال تقديمها وجمال حاضريها وروعة متحدثيها وقفشات أهل المجنونة وذكرتنا بمدينتنا وأهلها الطيبين ، شكرا خالد وشكرا معتصم عيدروس ويا حبذا لو كنت أحد الحضور يا معتصم .ولكن الجايات أكتر من الرايحات وهارد لك .

[امير عبدالباقي]

المثل بقول تلاته ضربات في الراس بتوجع وانا اقول تلاته سهرات تقطع الحشا جد ماقصر التلفزيون السوداني واتحفنا باجمل السهرات وهي تبث من قلب مدني وجد الماصوره في شريط فيديو يرسل لي رسوم ال D H L انا ارسلها له كلها
لكم حبي

[ضياء الدين احمد]

ياسلام يا ابو هاشم علي وصفك الجميل الذي يثير كثيرا من الشجن والذكريات
وطبعا انت كنت رجل مجامل ولك معارف كثر عشان كده الغربه بتبقي ليك حاره
انشاءالله تكون بردا وسلاما عليك حبيبنا ابوهاشم

[ياسر فقيري]

آآآآآآآآآآآآآآآآآآآخ والله رجعتنا لي أيام .. ما بتتوصف .. خليتني اتقدل في ذكرياتي وأتكيء على الدواخل ساعة من ذكريات جميلة .. والله مدني في حدقات عيوني ..
لك التحية على هذا الإحساس المرهف بمعشوقة النيل الأزرق الجموح