المساعد الشخصي الرقمي

مشاهدة النسخة كاملة : لو سوينا ربع البسوه الانجليز



ام ساره
25-05-2011, 12:13 AM
اتخيلو معاي لو سوينا ربع البعملوه الانجليز هسة سودانا كان حايكون وين.. الناس ديل لو اسلمو بضيعونا صحي صحي.. ناس عندهم ذمة واخلاص في العمل واحترام الانسان والحيوان... وانا حاتكلم عن تجربتي الشخصية الخلتني اكتب الموضوع دا وكل مااشوف موقف حلو اقول في نفسي لو عملنا ذيو في السودانا مالنا مابنفهم والله بنفهم ومسقفيين احسن منهم لكن نقول شنو؟ تدخل المستشفي تنسي روحك انك مريض من الاستقبال لحدي ماتوصل الدكتور احترام ومعاملة ماشفتها زيها في الدنيا مع انو نحنا اجانب بالنسبة لهم.. تمشي المؤسسات الحكومية نظام وكل زول ياخد حقو بي ابسط طريقة لافي موظف زهجان ولا في واسطة وفي سودانا لو ماعندك واسطة اقنع من موضوعك..في الشوارع ممنوع عربية تسبق التانية واي مخالفة تدفع علي الفور لو رئيس الوزراء زاتو عمل مخالفة يدفع رائكم شنو في دي غريبة صاح؟ بعد دا كلو التعليم والعلاج مجاني للمواطنيين والاجانب والبلد بي خيرا...في حاجة عجبتني عندهم واتمني انو نطبقها في السودان في حكاية العزائم اي نعم نحنا شعب بحب الكرم دي مابتغالطو فيها اتنيين فلاحظو معاي بعد العزومة تخلص كمية الاكل البتتكب في الزبالة قدر شنو في حين انو ممكن يكون في زول في نفس الحي الانتو ساكنيين فيه مالاقي ياكل وتقولو رحمة بقت مافي؟ عندهم بتطبخي علي قدر الافراد الجايين وكل زول بياكل نصيبه والله الزبالة مابتشوف الا الفضلات مع المعزره.. رائكم بي كل صراحة ولو ما عجبكم اعتبروها صفحة فاضية... واتمني من رب العالميين السودانيين يتقدمو وبي اسرع وقت لانو بقينا في الوقت بدل الضائع والله المستعان.

آلاء عبد الرحمن
25-05-2011, 12:52 AM
والله ياريت الناس تكون كده
علي الاقل الحال يتصلح
ماتكون عايز تنتهي ليك من ورقة ودوك ويجيبوك شهرين وهي ممكن تطلع ف دقايق
والله الناس لو رجعت شوية لي دينا كان الامور دي كلها اتصلحت وزيادة
ربنا يصلح الحال

مايسة
25-05-2011, 12:54 AM
ناس التاكا سلامات

انت قصدك السودان حقنا ولا سودان واحد تاني

نسيتي إنو إحنا مصنفين ضمن دول العالم الثالث ولا شنو -

وعلى العموم عشان ما أحبطك وكدا -

إذا أي حد عالج نفسو أكيد المجتمع بيتصلح وأكيد الوطن

ود المطامير
25-05-2011, 09:18 AM
والله كلام عجبنا تب

زمان كنت شغال فى منطقة سباق الهجن

يوم السباق بنكون مشرفين على المنصه والمنصه تتكون من تلاته أقسام

الشيوخ فى الوسط والخواجات بالشمال والتعابه الغلابه باليمين

بعد إنتهاء السباق قسم التعابه الغلابا تحلفى تقولى سوق البصل

ومنصة الخواجات تحلفى تقولى مافى زول جا قعد فيها

نضيفه والكراسى يرتبوها كما كانت فى دقه متناهيه

بالجد .. البون شاسع بيننا وبينهم

ام ساره
25-05-2011, 12:15 PM
شكرا ليك يالاء علي مرورك لكن والله صدقتي وكل زول شغال بي رايو عشان كدا مافي تقدم وذي ماقلتي ربنا يصلح الحال.

ام ساره
25-05-2011, 12:19 PM
يديك العافية يامايسة وحاقدم ليك دعوة علشان تزوري كسلا.والله قصدي سودانا الواحد دا والله بتمنا الكلام دا يصبح حقيقة ونبدا بي محاسبة انفسنا اولا وانشالله البلد حاتتقدم.

ام ساره
25-05-2011, 12:20 PM
شيخ ود المطامير تسلم علي المرور والمثال الانت كتبتو خيرا دليل وببرهن الفرق بينا وبينهم عشان كدا هم متقدميين ونحنا راجعيين لي ورا وهمنا كلو حب السلطة.

ودسمير
31-05-2011, 11:15 AM
يا جماعة الخير ( كوركنا لمان ريقنا نشف ) السودان دوله افريقيه .... مافى فائده !

والله كون عندنا كهرباء والناس (لابسين هدومهم ) دى سلامه كبيييييييييييييييييييييييييييييييييره !


وتقلى شنو وتقلى منو !!!

mahagoub
01-06-2011, 08:20 PM
مع العلم انو الاشياء دى ما عاوزه جهد
شويه ضمير وتعود
السودانى فى الغربه بيبذل جهد فى العمل
لو بذل نصه فى السودان كان سودانا فوق