سيدة شباب الكون

[منذر مصطفي]

سيدة شباب الكون ومدينة احلامي انا بالغرام ممكون
ياروحي راعي روحي زاد وجدي طال هيامي
هاك شعوري ترجميه قبال تتم ايامي
مر يا نسيم الليل ما لي سواك دليل
شيل حبي وسلامي وسيب العزول مركون
فيك املي فيك حياتي وفيك التهاب غرامي
ليك في عذابي حكمه ولي في هواك مرامي
سهران حزين ووجيع والحب غذا الارواح
كل جيل بسلمو جيل
وبعد انتها الاجيال في قبري ليها سكون
عاودني يانسام في عودتك مرامي
تشفيني اخبارك اصبحت قلبي دامي
سهران وجسمي عليل وليك السياده براك
اسرني بي التدليل ومهما اقاسي معاك
برضى ليك اكون
انا برضي ليك اكون

[خالد علونى]

حبيبنا منذر مصطفي

لك التحية وانت تأتي بالدرر للقسم الثقافي لتشجينا وتحرك فينا سواكن الحروف بأجمل ما خطه يراع الاستاذ الجاغريو
هذا الانسان المبدع صاحب المفردة المتميزة والبسيطة والتي تحملك فوق سموات من الإبداع اللا متناهي
ولمن لا يعرف الجاغريو أقول أنه هو أحمد محمد الشيخ محمد عبد الرحمن محمد بركات محمد مضوي بركات حمد الشيخ ادريس محمد الارباب..من مواليد قرية الدبيبه شرق النيل 1916م ..نشأ بمدينه العيلفون حي السلام (حي السوق)..عاصر شعراء الحقيبه أمثال ..ود الرضي ..أبو صلاح..عبيد عبد الرحمن ..سيد عبد العزيز..وابراهيم العبادي..وله مساجلات مع الكثيرين منهم .
كان صدبق شخصي للزعيم الراحل اسماعيل الأزهري وشاعر الحزب الأول وقائد حملاته الانتخابيه
ونال تكريم الازهري في كثير من المحافل الأدبيه والفنيه
أصدر ديوانه الأول بجمهورية مصر (ليالي الجاغريو) في العام 1964م ..ثم أعيدت كتابتة الديوان وزيادته وتنقيحه في ثوب بهئي بعنوان (عندليب الجاغريو ) بجهد خالص للأستاذ علي محمد عثمان الفكي في العام 2003م.
تغني للجاغريو كثيرا من الفنانين في مقدمتهم عميد الفن أحمد محمد بركات (أحمد المصطفي)..ودرة الحقيبه مبارك حسن بركات ..من أغانيه الخالده ..( حبيبي انا فرحان) .. (طار قلبي).. (يارائع ).. ( وين سميري ؟ ) .. (الساده ألميني )
من كلماته الخالده

نحن أولاد أبو فركه نقعد نقوم علي كيفنا
في شقا او لقا دايما مخرف صيفنا
@@
الانكسر السلم بعد ما طلعنا
والزارعنا غير الله اللجي يقلعنا

توفي عليه رحمة الله في الأول من يناير 1968م وهو يتأهب لالقاء قصيده وطنيه بمناسبه عيد الاستقلال ..وليس له ذريه .. بل أنه لم يتزوج بعد أن تزوجت محبوبته وظل هائما في بحور الشعر والهيام متمسكا بعهوده وحبه لها .
واخيرا..
نفخر بيك يا جدنا الجاغريو
مفتاح الشعر الديمه فاتح بيو
في لمح البرق بتكتبو وتغنيو
حيرت القصيد من الكلام الفيو
***
يا توب المحس يا فركة الأرباب
يا سفن العواصف الما بتنكسر لي عباب
الجاغريو لقب في قمه الألقاب
مكتوب بالشعر في مهجه الأحباب





تخريمة:
ولمعلومات أوفي أسالوا أستاذي بدر الدين محمد النور