فـي صـف الأحـــلام ( ننتـظـر ) ,,

[ود الضو]

أهُـو الواحد يقيف ليه في صف من صفوف الأحلام ( الكتيرة ) و ( يكابِسْ ) يمكن يطلع ليه بي حِلِم ترْيان وما( مغشوش ) ..
مشاققة :
ياخ أنا بقيت ماقاعد أحَلَم نوهائياً ..

[ود الضو]

صفوف من البيوتات ( المبتسمة ) , ذات حِلِم بعيد كنت أراها وهي تفتح أحضانها للعائدين بعد غربة , كنت واحد منهم أولئك العائدين بعد أن بادلتها الإحتضان أخدت لي ( قدْلة في تلك الأذقة ) التي تغطيها رائحة شجر النيم وأصوات ( القمري والبلوم والشُّفَع ) , وبقيت اتاوق مابين حيشانها وحِسانها واقفات علي بُعد ( نظرة ) شعرت بهنَّ ( يتحرَّشن بتلك النظرات مني ) وبديت أرسم لي في مشروع غرامي , بس فجأةً جاني صاحبي ( الكُجْ ) صَحَّاني من النوم قائلاً ( قوم خلاص وقت الدَّوام كَبَسْ) ..
مشاققة :
الدّوام لله ياخ ..

[ود الضو]

حِلِم طعمه يظل باقي في الحلِق وجوة الجوة مع الحياة , حِلِم بي وطن حدّادي مدّادي , يبقي مليان ( أمان ) , حِلِم بي قادة وسادة يملكون ( ضمير ) حي ومستـَّفين ( وطنية ) يزرعون كل تلك المليون ميل مربع بـ ( الحب , السلام , الخير , الأمن ) , شان أمجد ود الطريفي والخير ود الباقر وحافظ ود الشيخ يرجعوا ( زي ماكانوا أوّل ) أصحّاء ونصحاء بعد أن أخذت اصوات البندقية والدّانة وظلام الخنادق ( عقولهم ونصاحتهم ) وأضحوا في حساب ( المجانين ) الذين يُخيِّطون الطرقات دُوَاحةً ليل نهار ..
مشاققة :
حِلِـم بي وطــن خالي من كل هؤلاء الذين ( أخذوا حتي أحــــلامِنا ) ..

[ود الضو]

حِلِــم بوقفة في الصّف الاول من صفوف صلاة العيــد ( الكبير أو الصغير ) المهم أيِّ واحد فيهم , مع أولئك الذين هم كالحمائـم في بياض نيّاتهم وصفاء قلوبهـم , ومن الخلف أصوات أطفال تطلع من أفواههـم كلمة ( عَيَّدَت ) ..
مشاققة :
لا أدري كيف أجيب ( لو ) تمّ سؤالي عن : آخر عيد عيَّدتو في حِلتنا كان سنة كم ؟ علي الجزيمة ماعارفو كان سنة كم ..

[ود الضو]

حِلِــم بي زغرودة كاااربة تعلن زفـَّة ( حبيب ) صديق وقريب , هاتفني قبل سنتين والتلج قد غطي تلك الأوروبا ( ياحبيبنا ) أخوك قد ذاب شوقاً اليك وأولئك السمر الميامين , ماحدَّثتك أخيراً بقيت أعاين لي رويحتي في المراية ولقيتني قد ( اشتعل رأسي شيباً ) , وكل تلك الوجاهات قد بهتت فقد وجدت أني املك ( مجموعه من حِبوب الحب ) وزَي الكأنّو وشِّي قايم فيها مُش هي القايمة في وشِّي ( كتيرة شديد ) , بالله عليك الخوة البيننا أمشي لي مخصوص زيارة لبيت الله الحرام وأدعو لي دعوة صادقة ( مازي دعواتك القديمة ديك ) دعوة ترجّعني سالم بس , الغنومية دي خليناها للغانمين وأهم حاجة ( أعرِّس ياخ ) , وكأنّ تلك الدعوة التي دعوتها له مخصوصاً قد أتتني أنا , تأسَّفت كثيراً حين نسيت أن أكمل تلك الدعــوة ( بعدما أعرِّس ) تاني ما أجي راجع وأتوهّط فيك ياغربة ( برااااي ) ,,
مشاققة :
وهو لم يزل يُناتل في غربته : اللهم يسِّر له سبل الأوبة والزواج ..

[ود الضو]

حِلِم اشوف فيه اني عملت لي شرك كبير يكفي لاصطياد سرية من اولئك الغجر ودوريات الكجر
واضعه في احدي طرقات أم در .. ليمسك لي وزياًر لكذا وآخر لكذا ومعهم ثلة من
ذوي الرتب والكروش المدورة والفــِــقــر السمينة .. شرك لايفرز
بين رئيس او وزير او غفير , كل من اتي نحوه يصطادهـ وبقوة ..

[ود الضو]

تعالــــوا أحلمــوا يـــاخ ..

[مدناوية]

تعالــــوا أحلمــوا يـــاخ ..




ود الضو .. سلامااات يااااخ ..

عاين .. أنا ماشة أنوم .. وبجي الصباح أحكي ليكم حلم ..

مع إني حلمتو أمبارح .. لكن بحكي ليكم بكرة ..

بس عليكم الله مافي زول هنا يقوم يزعل مني ..

كدي لي باكر ..

أقعد عافية أبوي ..

[مدنيّة]

والله ياود الضو
يابختنا بيك
عندك قلم قمة في التمييز


------
انا ماقاعدة احلم
لكن متابعة للبوست بشغف

[ود الضو]

[QUOTE=مدناوية;613462][CENTER][B][COLOR=teal][SIZE=5][FONT=Tahoma]ود الضو .. سلامااات يااااخ ..

عاين .. أنا ماشة أنوم .. وبجي الصباح أحكي ليكم حلم ..

مع إني حلمتو أمبارح .. لكن بحكي ليكم بكرة ..

-----------------------------
اها يامدناوية اهو نحن في بكرة
تعالي احكي
لك التحية ..

[ود الضو]

[QUOTE=مدنيّة;613490][COLOR="red"]والله ياود الضو
يابختنا بيك
عندك قلم قمة في التمييز


-----------------
دا من اصلك يامدنية
انتم اهل للتميز والابداع
مشاققة :
هو في زول ماقاعد يحلم ؟؟؟

[ابوالنور]

ود الضو اخوي جمعه مباركة عليك
واكيد لي عودة
اكان فضل باقي في العمر

[ود الضو]

ود الضو اخوي جمعه مباركة عليك
واكيد لي عودة
اكان فضل باقي في العمر

---------------------
الزول السمح ابو النور
يسعد مساءاتك
وحبابك آآآالحبيب
اكيد منتظر جيتك ..

[mahagoub]

رياح ... عواصف ... امطار وسيول
براكين ... زلازل ... وحيوانات
كدى فسر لى الحلم ده

[ود الضو]

رياح ... عواصف ... امطار وسيول
براكين ... زلازل ... وحيوانات
كدى فسر لى الحلم ده
-----------------------
دا شنو يامحجوب ؟؟؟
انت متأكد دا حلم
مشاققة :
بجيك بالتفسير بعد يوم 9 / 7 / 2011 الماشي علينا دا اكان حيينا ..

[ابوالنور]

---------------------
الزول السمح ابو النور
يسعد مساءاتك
وحبابك آآآالحبيب
اكيد منتظر جيتك ..

يسمحوك وليداتك ان شاءالله يا يابا

كدي وريني يعني شنو الزول يحلم انو صايم؟

[mahagoub]

-----------------------
دا شنو يامحجوب ؟؟؟
انت متأكد دا حلم
مشاققة :
بجيك بالتفسير بعد يوم 9 / 7 / 2011 الماشي علينا دا اكان حيينا ..

ما دام ربطتها ب 7/9 الله يستر

[ود الضو]

يسمحوك وليداتك ان شاءالله يا يابا

كدي وريني يعني شنو الزول يحلم انو صايم؟
----------------------------
انت عارف يا ابا النور
زي ماحبوباتنا بفسِّرن اي حلم بـ ( تعكس الشغلانية )
فإنت حلمك دا آآآآالحبيب ( شبعااااان ) بس
وشبعان دي ليها مية طريق
شبعان قروووووش ( عيني باااردة )
شبعان غربة ( الله مايضوقك ليها كان ماكنت اصلا فيها )
شبعان حاجات كتار
مشاققة :
والله أعلــــم ..

[ود الضو]

ما دام ربطتها ب 7/9 الله يستر

--------------------------
لالالا
إستبشر خير ياحبيبنا
ويوم 9 /7 دا فيهو ميلاد دولة ( جااارة )
مشاققة :
واحد قالوا ليه ياخ خريطة السودان بقت ولا سمحة
قاليهم شيلوا منها شوية تاني عشان تتساوي
شفت كيف يامحجوب
اها اصبر لحدي ما اجيك بالتفسير القاطع ..

[mahagoub]

هو لسه حيقطعوا
هسع ناس الجزيره بعد ما يتم تقسيم الكيمان
يمرقوا بى وين سفريه واحده والجواز يتملى تأشيرات

[ود الضو]

هو لسه حيقطعوا
هسع ناس الجزيره بعد ما يتم تقسيم الكيمان
يمرقوا بى وين سفريه واحده والجواز يتملى تأشيرات

-----------------------
والله يامحجوب اخوي وماطالبني حليفة
غير الجزيرة دي تاني ماعندهم جهة بقبِّلوا عليها
( ماتسمع )
تنقيب وبتاع ,,
حيرجعوا يعيدوا الماضي من اول وجديد
وستظل الجزيرة هي سلة غذاء العالم بما فيه الجنوب الذي قد انفصل
مشاققة :
بس لو يخلوا لينا حريتنا كمزارعين ؟؟؟؟

[mahagoub]

يخلوها وين ؟؟
ديل ما باعوها
واله يستر على الناس الفيها

[ود الضو]

يخلوها وين ؟؟
ديل ما باعوها
واله يستر على الناس الفيها
------------------------
ماعارف يامحجوب لكن لو قاموا ودخلوا لينا المصارنة ديل
في مشروعنا دا ( الرماد كالنا تب )
لكن يقيني يقول بأن هذا التليد هو من يكون الحل
لما تبقي من السودان
بس لو يلقي اولاد حلال يعاينوا لي حالنا وظروفنا

[mahagoub]

------------------------
ماعارف يامحجوب لكن لو قاموا ودخلوا لينا المصارنة ديل
في مشروعنا دا ( الرماد كالنا تب )
لكن يقيني يقول بأن هذا التليد هو من يكون الحل
لما تبقي من السودان
بس لو يلقي اولاد حلال يعاينوا لي حالنا وظروفنا
يدوا الناس شوية ديمقراطيه
ومجال للتعبير بغير خوف
والسماح للرأى الآخر
حنبقى فوق وحتى الجنوب حيجى راجع

[ود الضو]

[QUOTE=mahagoub;616671][B]يدوا الناس شوية ديمقراطيه

-----------------------
الـ بالاحمر دي ياها المحتاجنها نحن
ديمقراطية ولو بالتفسيط ياخ ..

[mahagoub]

انا حلمت بقيت رئيس
وتانى يوم اعدمونى
تفسيرك للرؤيا شنو؟

[ود الضو]

انا حلمت بقيت رئيس
وتانى يوم اعدمونى
تفسيرك للرؤيا شنو؟
------------------
يا اخي
دا انت سعيد جنس سعودية
بس بتكِف السعودية البتجيك
هسي مالك ماحلمت انك استمريت رئيس طوالي ؟
علي الاقل نقول حِضِرنا انقلاب الحيكومة دي
يعلم الله حتي هذه اللحظة ماقادر اصدق او اتوقع
ان الحكومة دي تنقلب زي ما الحكومات بتنقلب
مشاققة :
هاك التفسير آآآالحبيب
بقيت رئيس دي ( معناها انك ح تعرس ) لو معرس حتعرس ولو مامعرس حتعرس
والله اعلم
اما
اعدموك دي :
في تفاسير الاحلام ماها موجودة
ولا اقول ليك :
تكون نمت شبعااااااان
مشاققة خاااصة :
تبرأ وتستبرأ من تبقي رئيس
وكمان يعدموك
الشر برة وبعيد

[mahagoub]

------------------
يا اخي
دا انت سعيد جنس سعودية
بس بتكِف السعودية البتجيك
هسي مالك ماحلمت انك استمريت رئيس طوالي ؟
علي الاقل نقول حِضِرنا انقلاب الحيكومة دي
يعلم الله حتي هذه اللحظة ماقادر اصدق او اتوقع
ان الحكومة دي تنقلب زي ما الحكومات بتنقلب
مشاققة :
هاك التفسير آآآالحبيب
بقيت رئيس دي ( معناها انك ح تعرس ) لو معرس حتعرس ولو مامعرس حتعرس
والله اعلم
اما
اعدموك دي :
في تفاسير الاحلام ماها موجودة
ولا اقول ليك :
تكون نمت شبعااااااان
مشاققة خاااصة :
تبرأ وتستبرأ من تبقي رئيس
وكمان يعدموك
الشر برة وبعيد

ناديت الحاجه قلت ليها تعالى
شوفى تفسير الحلم ده
طلعت بام دلدوم

[مايسة]

ما اجمل الأحلام - وبالذات لمن تكون ببلاش -

ود الضو منور النفاج - وصراحة بوستاتك دائما تشير لأبعاد كثيرة

لك التحية

[ود الضو]

ناديت الحاجه قلت ليها تعالى
شوفى تفسير الحلم ده
طلعت بام دلدوم

--------------------------------
ماتنسي
مثل هذه التفاسير لازم تقراها سِرَّاً سرورية شديدة ..
مشاققة :
تاني مابفسر ليك ( طالما جابت ليها ام دلاديم )

[ود الضو]

ما اجمل الأحلام - وبالذات لمن تكون ببلاش -

ود الضو منور النفاج - وصراحة بوستاتك دائما تشير لأبعاد كثيرة

لك التحية

-----------------
لك التحية الاخت مايسة
النفاج منور بأهله وكل تلك الاقلام المليانة كل جميل
اقعدي عافية ..