يمـكن ألقـى وصفــة تنفــع ..

[ود الضو]

ولاَّ يمكن ألقى حاجة تخفف الجرح الأليم
حاجة تشفع ..
..............................

[ود الضو]

رســِّلي لـــي عفـــوك .. يـُـمـّه ..


يايمه ساعة يوصلوا ويقولوا ليك شفناهـ في بلد الأمان عايش ورايق في امان يايمه رسلي لي عفوك ينجيني من جور الزمان ... ( عفـــوك يمـِّي ) ..
والله لا أدري من اين ابدأ .. كل الحروف لو لصّقتها ولملمتها مابتعكس ( شوقي ) وانهياري وبالواضح ( جرستي ) لأمي الله يديها الصحة والعافية والعمر الطويل العامر بالايمان .. لو وصلني رد وقال لي ( إنت جيت متين ) ؟ بقول ليه وبفِت كل الجُّواي من الشوق والحنين والوجد .. وحات الله ياحاجة لو تعرفي البي ماتخليني افارقكم ( شِبِرْ ) واحد .. كيف لا وانا مازلت أراني طفلاً يافعاً لديك .. فكيف يكون الفطام بـ ( الغربه ) .. لو تدري كم انا مشتاق لكي امارس كل تلك الطقوس الجميلة التي ظللت امارسها طيلة الشهور الفائته من صباح الرحمن لا عند الليل .. بدور اخش عليك يايمّه الصباحية في ( التـُّكُل ) وريحة اللبن ( المِقـَننْ ) وابادرك ( أصبحتِ عافيه ) وتسمعيني ( حبابك ) وكيف أصبحت .. وتناوليني كباية الشاي ومعاها بسمة عريضه تريح النفس وفي دواخلك اقرأ ( عافية منك ) وتفضلي تونسيني وتحكي لي عن خالي وهو في قرية اخري وعن احواله .. تحدثيني عن اخوي الكبير في غربته وشغله ومتين قال حيرجع ليك .. وانا مصنقر في عنقريبك الوسيع وعليه بقايا الصُّحانه والصواني وكبابي الشاي .. تقولي لي مشيت صبَّحت علي ابوك اقوليك آآآي يمّه .. ولما تستفزني شارات غربتي ( الغبيّه ) امسك الهبّابه واقعد اهبهب فيني واقوليك انتي ياحاجة ماتعملي ليك مروحة في ( التـُّكُل ) دا عشان الحَرْ .. تردي علي الدَّرَت الماشي علينا دا أكان حيينا في الزايله دي بسو لي مروحة .. امرق من التـُّكُل .. أمش احوم واجيك تاني يمَّه الفطور ماقضي لسه .. وكضب اقول في يوم جيت لقيت فطورك ماقاضي وذاهب .. تقولي لي ( عشان ) انت طوَّلت من ملاح ( الويكاب ) الليلة سوِّيت ليك ملاح ويكاب طاعم .. اشيل الفطور وامرق علي الديوان تعال يافلان ونادي معاك فلان للفطور نقعد سوا في ضل الضحي الكبير نفطر ونتونس .. اجيب الصُّحانه واجي صادِّي تاني للتـُّكُل .. اها ياحاجة كباية جَبَنه من ( البركه ) .. واسمع منك , هسي هناك بتشربها .. لا مابشربها لكن منك انتِ بشربها وحاة عينيك بشربها لو مرتين في اليوم .. مشتاق يايمّه اسمع صوتك وانتِ بتنادي علي بي اسمي الذي لاينطقه الكثيرين الا أنت وقليل من الناس .. مشتاق يايمّه اجي خاش نـُصَّت نهار والقاك ( منبطحه ) في عنقريبك وماسكه طرف توبك و ( تتهبهبي ) اقول ليك ياحاجة الضـُّل البرّاني بااارد امرقي برّه انا زاتي بدور اقعد معاك .. نقعد سوا لامن الواطه تبقي عصُرْ .. ويجوا باقي ( الحِبَّان ) ونتلم كلنا حولك .. مشتاق اجيك بعد المغرب لي كباية شاي المغربية بعد ماتحلبي اللِّبينه من غنمايتك الويحيده وتقولي لي ( لبن العَرَب ) بزيدوهو مويه شان كدا انا بحلب غنمايتي دي .. اشرب كباية اللبن لي آخرها وافضل ( أتكرّف ) في ريحة ( القـُنـَّانه ) الطَّاقه من حلَّتلك .. مشتاق يايمَّه امرق معاك علي ناس خالتي ونمسِّي عليهم .. ومشتاق امش معاك للفريق الورّاني لي ناس اختي الكبيرة .. مشتاق والله يمَّه مشتاق .. مشتاق لي دخلتك علي عند الصباح الاول واسمع منك ( كيف اصبحت ) .. مشتاق يايمَّه لي قعدتك معاي في التلفزيون والفنان بيغني في غنوة حقيبة .. مشتاق يايمَّه لي سماع صوتك وانتِ بتنادي في حسن ود ولدك عشان ترسليه الدكان .. مشتاق يايمَّه للمشاوير البعيدة وانت تأتيني طالبه ان اوصلِّك لي ناس خالي البعيد تقولي لي بدورك تمش معاي لي خالك سلام ساي وتطمينه عليه وعلي اولاده وبناته .. نتشارك المشوار وبصحبتك كل الدروب مليانه طيبة ومحَنه وجمال .. مشتاق يايمَّه للقعدة ديك بعد مالليل يتالت والكُراع تنقطع وانتِ بتحكي لي حكاوي سنين مضت وهي لم تنتهي بعد بل هي الايام العجاف قد باعدت الخطي .. مشتاق يايمَّه اونِّسِك عن غربتي وعن حكاوينا البقت تذكار وتردي علي بتلك الضحكة التي تستنكر كل مارويته اليك من شلهته وبشتنه .. مشتاق يايمَّه انا شوق ماليهو حد لأي شيئ منك .. ومشتاق يايمَّه لي ناس الفريق .. لي كل البيوت الواقفه في نص الحوش الكبير .. لكل الوجوهـ البتشرق ابتسامات رضيه وصادقه .. مشتاق انادي علي الشـُّفـَّع الصغار عشان ارسلهم الدكّان .. مشتاق يايمَّه لاحتضان شويفع واقعد بيه في الضـُّل لامن ينوم في كرعي .. مشتاق يايمَّه للجيران كلهم بيت بيت وزول زول .. مشتاق اسمع صوت الغنيمات وهن مارقات للسَّرْحة الصباح وراجعات مع العِصِير .. مشتاق امرق واشق الحله من فريقنا لا عند الفريق الورَّاني واقعد قصاد الجامع في الشـّدَره الوسطانيه .. مشتاق يايمَّه للقعدة الوسطكم انتِ وابوي واخواني واخواتي وبقية الناس الطيبين .. شوقي بلا حدود او متراس اليك وكل الهناك .. قاتل الله الغربه وفصولها .. وبــــرضو يايمَّه .. رسِّلــــي لـــي عفـــوك ينجيني من جور الزمـــــــــــان ..

التوقيع

[مدنيّة]

http://www.youtube.com/watch?v=R-dSyAtxBcE

[ود الضو]

لك التحية من خلف السنين يافيحــــاء :
ذات رحــلة وأنا استقل فيها القطار ( قصداً ) لأُمتع ناظري من تلك الطبيعة الممتدة في كردفان الغرّة والتي لاتجعل لك جفناً ينام ليلاً او نهاراً , وعند اول صافرةٍ أُطلقت كجرس الفطور او طابور الصباح في المدارس , نزلتُ كبقية القوم وذهبت بي خطاي وسط الرمال من غير ( وجهة ) , تبعتها وأسررت ( علّني أجد موقعاً أريح فيه قليلاً ) , وقفت عند أحدهم وطلبته ان يناولني عدداً من ( البرنجي ) فتلك المشاوير تجعلك تنفث الكثير , واتخذت لي ركناً في راكوبة تخص احدي ( ستات الاكل والشاي معاً ) واخذت استنشق وأزفر دخان تلك اللفافات , فأتتني طفلة سمراء تلبس الفستان الذي يحمل لون الارض وفي عينيها يمكنك قراءة( ايه ذنبي وماذا جنيت لاكون هكذا ؟ ) وخصلاتها تسبقها عندما تنحي لإلتقاط فارغ اكواب الشاي والصحون , فخاطبتني مبتسمه ( إنت سقطان ولا شنو ؟ ) , لم اجد الاجابة لحظتها وانا اتفحصها واقرأها , غير ان ابادلها تلك الابتسامة , وللدواعي الطفولية سألت ثانية ( إنت من وين ؟ ) , طلبت منها ان تقترب مني كثيراً لأُسمعها هل انا بسقطان ام لا ,, ومن اين انا ,, فأقتربت , مسحت علي رأسها قليلاً وخاطبتها : اسمك منو ؟ اجابت ( فيحاء ) لبراءتها وضحكة عيونها اردت ان أطيل معها الحوار الي ان ( تزهج مني ) , فواصلت معها , طيب يافيحاء الزولة ست ( البًكان) دا أمك مش ؟ والله لاأدري لماذا ضحكت عند ذاك السؤال أهي قاصدة الرد بسخريه ام لسان الحال عندها كان هو المجيب .. وليتني لم اسألها ( لما الضحك يافيحاء ) مش في المدرسة قالوا ليكم ( الضحك بلا عجب قلّة أدب ) , خرجت عن صمتها وردّت : (انا مامشيت مدرسة ياخ انت قايل شنو , انا بشتعل هنا ) , ادركت وقتها اني احييت فيها كثيراً من الالم وكأن جرحاً قد بدأ النزيف عند تلك الفيحاء وهي تسرد قصة حياتها كما ( ادباء القصص الطويلة ) وهي لم تزل ( بنت تسع سنين الا قليلا ) , فعلمت سر الضحكة عند سؤالي لها هل تلك الزولة أمك , فأم تلك الفيحاء وابوها ( لاتعلم من هم واين هم ) ولماذا أتوا بها الي هذه الدنيا بغلطة في ليلة كئيبة وظالمة وهربا , لماذا قد زرعوا بدل البسمة في شفاهـ فيحاء عبس وشقاء ؟ الا يجب ان تنعم مثل هذه الفيحاء بكامل البراءة الطفولية وتجد الدفء والاحتضان من والديها في مثل تلكم اوقات , خطاها لاتعرف غير تلك الراكوبه واتخذتها معاشا نهاراً وسكناً ليلا فصارت تحميها من حرارة الشمس وزمهرير الشتاء وفي دواخلها الف سؤال .. اني اعلم انها تسأل نفسها كل صباح واطفال المدارس يحملون الكراسات والاقلام وهي المسكينة تلتقط الاكواب والصحون وتسمع من ذام ومن تلك الف إساءة ولاتجد غير التخاطب السخيف المخيف القاتل للبراءة واليفاعة , وانها تسأل نفسها الف سؤال مساءاً واصوات الاطفال بالقرب منها يتحادثون بنغمة طلب الحليب والسنتهم لاتطلق غير ( ماما ) وهي المسكينة من تنادي ؟ وممن تطلب الحليب مع المغارب ؟ فقط هو صوت الرياح يغشاها متسللاً من بين القصب والقش , مثل تلك الفيحاء كل احلامها وآمالها مرهقة وتعبه حد الالم الذي باتت تفترشه , تمشي وتنام عليه ( فهل من مغيث ) , خرجت عن الموضوع ادرك ذلك ولكن امثال هذه ال فيحاء وغيرها تثير في الحزن والالم , اذكر المايقوما ولايقف امامي الا صراخ تلك البراءات ( مرضاً , جوعاً , وفقدا ) هم مفتقدون لكل شيئ , فإن كنا نحن كباراً ونبكي في غربتنا فاقدين الام والاب الاهل اجمعين , فكيف لفيحاء ومثيلاتها ان تكون من غير ام واب ( الي يوم يبعثون ) ؟ ماذنبها , ماذنب تلك المسكينة لتشب منذ نعومة اظافرها وقبل طلوع الشمس وهي ( تُوقد النار ) وتجلب لها الهواء للإتقاد وغيرها من الاطفال مازال في احلامه تحت البطاطين والملاءات المطرزة ؟ ماذنبها وهي ( تـُنتـَهـَر ) من اهل الدقون واصحاب الشعر المتهدل كشعر امها بلون تلك الليلة المشئومة الخبيثة التي أتت بفيحاء , لك الله يافيحاء وكل الذين يحملون اسماءهم بدون اب او جد او اسرة , لك الله وانت لم تعرفين طعم الطفولة والبراءة واللعب واللهو كبقية اطفال الدنيا في الملاهي والمتنزهات , لك الله بان ينعم عليك ويعوِّضك فقدك لطفولتك بحياة كريمة عندما تكبرين وتعرفين الطيب من الخبيث .. لك الله كلما طلعت شمس وغابت ودمعتك تسقط مبللة لحبات تلك الرمال لغسل الظلم والنجاسة التي كست الكثيرين علي وجه الارض .. لك الله بان يجعل لك عند كل نهرة ورفعة صوت من احدهم ( حسنة ) , لك الله بان يمنحك الامان المُفتقد والحضن الملاز ولاتري امامك غير النور الذي لايُهدي لعاصي ,, لك الله بان يزيقك حلاوة الدنيا بالعمل الصالح وحلاوة الآخرة للصبر والاحتساب .. كما قلت لك مودعاً اقولها اليوم ( بــكرة أحلي ) ...

[ود الضو]

http://www.youtube.com/watch?v=R-dSyAtxBcE
---------------------
آآه يامدنية وقوافل من الآآآهات
شوق عميم يامدنية يجتاح الواحد منا
ولانملك غير ان نجتر الذكريات
ونتكئ مع مثل هذه الاغنيات ..

[mahagoub]

متعك الله بالصحة والعافيه
فقد امتعتنا بالسرد الجميل

[ود الضو]

متعك الله بالصحة والعافيه
فقد امتعتنا بالسرد الجميل
--------------------
جمعاً يالحبيب
يسعدني مرورك الانيق دون شك يامحجوب
كوم من الود الجميل يافخيم ..

[mahagoub]

اها جبنا قهوتنا معانا
ودى قعده واصل

http://i52.tinypic.com/2vs0lty.jpg

[ود الضو]

اها جبنا قهوتنا معانا
ودى قعده واصل

http://i52.tinypic.com/2vs0lty.jpg
--------------------------
علي الجزيمة ماقصرت تب ياحبيبنا
قهـــوة كمان ؟؟
اها دي قعدة
ويمكن القي وصفة تنفع ..
ماتنسي أقعد عافية آآآالحبيب

[mahagoub]

--------------------------
علي الجزيمة ماقصرت تب ياحبيبنا
قهـــوة كمان ؟؟
اها دي قعدة
ويمكن القي وصفة تنفع ..
ماتنسي أقعد عافية آآآالحبيب

بس ما تطول
عشان مديرنا زول فقرى

[ود الضو]

بس ما تطول
عشان مديرنا زول فقرى
---------------------
والله يامحجوب أخوي
العبد لله حزين اشد الحزن
وانا اري ( دولة جديدة ) اسمها جمهورية جنوب السودان
وكبيرنا يخطب مهنئاً ومباركاً تلك الدولة
وااااوجعي .. ووا اسفاه

[mahagoub]

والاسوأ شفت خريطة السودان الجديد
منظرا يقطع القلب
وبعد ده كله أن شاء نسلم
حنقعد للمناقره وهدم الاقتصاد المافى

[ود الضو]

والاسوأ شفت خريطة السودان الجديد
منظرا يقطع القلب
وبعد ده كله أن شاء نسلم
حنقعد للمناقره وهدم الاقتصاد المافى
---------------------
بيني وبينك المناقرة دي ماحتنتهي بي اخوي واخوك
وكل الدلائل تشير الي تلك اللعينة
تلك التي غيّبت عنا الاخ والصديق والحبيب
وهم مازالوا بكامل شحمهم ولحمهم
وكأنهم يرددوا ( هل من شباب جديد )
حتي يذهبوا به الي تلك الادغال التي تبتلع كيف تشاء ..
الله يستر ..

[mahagoub]

الى سوداننا الحبيب
انا ما جايك شايل الافراح
تملا الدنيا اجمل غنيه

[ود الضو]

الى سوداننا الحبيب
انا ما جايك شايل الافراح
تملا الدنيا اجمل غنيه

-----------------------
والله يا الحبيب
حلمنا وشبعنا حلم وحتي الان مافي شيئ إتحقق منه
ليتنا نعود اليه يوماً ونجد الفرح يتدفق من كل ميل فيه
مشاققة :
هو السودان بقي كم ميل بالمناسبة ؟
باقيلك اتعودنا علي المليون ميل مربع القديمة ديك ..
.....
كب فنجان قهوة ياخ ..
انت قهوتك داير ترجع بيها ولا شنو ؟

[mahagoub]

-----------------------
والله يا الحبيب
حلمنا وشبعنا حلم وحتي الان مافي شيئ إتحقق منه
ليتنا نعود اليه يوماً ونجد الفرح يتدفق من كل ميل فيه
مشاققة :
هو السودان بقي كم ميل بالمناسبة ؟
باقيلك اتعودنا علي المليون ميل مربع القديمة ديك ..
.....
كب فنجان قهوة ياخ ..
انت قهوتك داير ترجع بيها ولا شنو ؟

ويا خوفى من انشقاقات اخرى
ونواصل مسلس التنازلات
بقى تلتين مليون

ارجع بيها وين ؟
بعد التقسيم ده الواحد بعرف طريق البيت

[ود الضو]

[QUOTE=mahagoub;616670][B]ويا خوفى من انشقاقات اخرى
ونواصل مسلس التنازلات
----------------------------
ما اراه واسمعه من اولئك الذين يسمون انفسهم معارضة و( من اجل دارفور ) عارضنا
قطع شك كل ماهو امامهم الان ( الانفصال )
وهم يرون بأعينهم أن الجنوب قد انفصل
لماذا هم لاينفصلون بكل تلك الـ دارفور ؟؟؟ دا عشمهم اكيد
بس الله فــي ..

[mahagoub]

بعد ده كله ما لقيت حاجه تنفع
عليك بزيت الخروع

[ود الضو]

بعد ده كله ما لقيت حاجه تنفع
عليك بزيت الخروع
---------------------
ههههههههههه
دي وصفة حديثة ولابد من تجربتها
او كما قالت حبوبتي عليها الرحمة :
زيت السمسم دا ( الكمدة بالرّمدة ) لايِّ مرض حتي لو كان مرض حااامد شخصياً ..

[mahagoub]

---------------------
ههههههههههه
دي وصفة حديثة ولابد من تجربتها
او كما قالت حبوبتي عليها الرحمة :
زيت السمسم دا ( الكمدة بالرّمدة ) لايِّ مرض حتي لو كان مرض حااامد شخصياً ..

كان كدى خليك فى كلام حبوبتك ما بقع واطا