علـي لسنـاتهـــم ..

[ود الضو]

قال له : يامولاّنا ممكن تفتينا في موضوع الشواكيش دي ؟
فقال له مولاّنا : الشواكيش من ناحية دينية ( إلاّ نشوف ليكم ديوان الإفتاء )
لكن من ناحية بتاعة ( مفتحين وكدا ) فالشاكوش دا موجود من عصور قديمة
فقصة ود بحر و حبيبته الرّتينة خير مثال للشاكوش من سنة 1902 ميلادية
حينما كانت بينهما قصة حب خرافية عديل كدا , فجأة قامت الرّتينة شوكشت
ود بحر بداعي انها كانت ( دايرة تمشي عرس البتولة بت حامد ) وود بحر قال ليها :
انا ماعندي خطيبة بتمشي اعراس خارج الحلة ..
عليه فإنّ هذا الشاكوش موجود فينا كما العادات والتقاليد التي بدأنا نخليها
بس باقيلك حنقدر نخلي الشاكوش كمان ؟؟
مشاققة :
قصة ود بحر والرّتينة موجودة , ومن ارادها فليذهب الي اهل التوثيقات
في هذا المجال , ولو ماعرف الطريق بي وين عليه بأن يبحث عن
موثقي اغاني الحقيبة يمكن يلقي القصة بتاعتهم في غنوة من غنوات
اعمامنا ناس الحقيبة من تلك التي يختمونها بـ :
ياليلي هووي هوووي هوووي ..
إنتهي ..

[ود الضو]

قالت له : إنت حتجي تخطبني من أبوي متين ياروحي ؟
قال لها : شوفي موضوع تخطبني متين دا خليهو للايام ياخ
قالت له : بري آيابا مابخليهو ولاشيئ , وبعدين شايفاك طوالي
بتزوغ من أجيب ليك الموضوع دا ( ممكن تديني سبب مقنع ياحياتي ؟ )
قال لها : سبب مقنع كيف يعني , ماإنت عارفة البير وغطاها ( لاشغل لا مشغلة )
في زول بمشي يخطب ليهو بت ( سمحة زيك كدا ) وهو عااااااطل ؟
قالت له : بس انت اديني موعد محدد ياروح ألبي ؟
قال لها : والله ناس كنانة قالوا عندهم فرص بتاعة عمل بفتحوها بعد 10 شهور
المهم لو الشغلانية دي ظبطت فتأكدي بأني خاطبك خاطبك ..
قالت له : ان شاء الله لو وظيفة واحدة تكون من نصيبك ياحبي ..
قال لها : بي تحت تحت وهو يهمس ( عاملة فيها بتدعو لي ) ياخ انا من عرفتك
بقيت عاطل اكتر من عطالتي الاولي , زمان الواحد كان بطلع يوميات , من ظهرتي
انتِ في حياتي اليوميات زاتها وقفت ..
قالت له : قلت حاجة آآآحبيبي ؟؟؟
قال لها : قلت ليك الزمي الصبر لحدي ماربنا يفرجها أو إتفكفكي شوفي ليك
حبيب تاني ( انا زول واضح ياخ ) عشان ماتقولي الزول دا خلاني بعد علاقة
إمتدت لـ 7 سنوات وبتاع , أهو انا بقولا ليك ونحن دابنا علاقتنا عمرها 4 سنة بس ..
قالت له : لالا ماتقول كدا ( بكرة أحلي )
قال لها : بعد ان إبتسم بسمة ماكرة :
لو معاك شرتيت , أدينا ركّابات عندي سفرية كدا لي كسلا ماشي ازور واحد صاحبي
قالوا كراعو إنكسرت أمس في التمرين ..
قالت له : وهي تفتح شنطتها ( حااااضر ) إنت تأمر بس وتناوله ورقة فئة الـ
50 جنية بالجديد وتتبعها بـ ( تاني ح أشوفك متين ؟ )
قال لها : بعد أن غمَت ال 50 جنيه ( يمكن اقعد اتونس معاهم شهر كدا )
مع السلامة
مع السلامة ياحبيبي ..
إنتهي ..

[ود الضو]

قالت له : هوووي طبعا انا ح امشي أوضع مع ناس أمي ..
قال لها : وليه تمشي توضعي عند ناس امك ( البيت دا مالو ؟ ) ..
قالت له : ياخوي دي حاجة معروفة عند الناس كلهم اصلو المرأة
اول وضوع ليها بكون في بيت ناس أمها ..
قال لها : القال ليك منو الناس كلها عارفة ( أنا ماناس ولا شنو ؟ ) ..
قالت له : أجي هسي في زول قال انت ماناس آآآآآفلان ؟
قال لها : كلامك بقول كدا , انا مابعرف لكن ح توضعي هنا في البيت دا ..
قالت له : حلفت بي الله ما اوضع هنا كان شنو وشنو زاتو ..
قال لها : خلاص امشي اوضعي هناك لكن انا مامسئول من اي حاجة ..
قالت له : كيف يعني مامسئول من اي حاجة ؟ ممكن افهم ..
قال لها : ايوة ممكن تفهمي , يعني لو ماوضعت هنا انا مامسئول
من سِماية ولا تجهيزات وضوع ولا حتي المولود ما ح اختار ليهو اسم ..
قالت له : أجــي آآآآود أمي ..
قال لها : دا آخر كلام عندي ماتقولي لي ود امي وبتاع ..
قالت له : أنا زعلانة منك شديد شديد ..
قال لها : الزعل في شنو امشي اوضعي عند ناس امك وخليهم
يجهزوا ليك ويأخدوا السماية وبالمرة يسمُّو المولود الجائي دا ..
قالت له : بعد أن حسبتها صاح ( طلقني ) آآآآفلان ..
قال لها : بس انت في الوضع دا الطلاق مابيقع عليك
لكن دا وعد مني اول ماتوضعي اعتبري نفسك ( طلقاااانة ) ..
قالت له : ماكان دا العشم ,, ياخساااارة ..
قال لها : بعد أن دردم له سفة كااربة :
تقول دايرة طلاق وفي النهاية تقول ياخسااااارة ,
هو لو ما الطلاق دا الواحد يتفكفك منكن كيف زاتو ..
انتهي ..

[ود الضو]

قالت له ( الشافعة ): يابا انت ليه ماعندك قروش زي ناس الخير ود جبارة ؟
قال لها : يابت بطلي قلة أدب واسئلة زي دي ..
قالت له : يابا انا ماقلت كلام قلة ادب لكن ..
قال لها : سؤالك دا قلة ادب , لانو سؤال مافي ليهو داعي ( برانا صايمين ) ..
قالت له : بكل لَدَاحة : عليك الله وريني يا ابوي ( ليه ماعندك قروش ؟ )..
قال لها : وهو قد وصل مرحلة بعيدة من الزهج :
يامنطوطة ناس الخير ود جبارة ديل ( حرامية ) وانا لو بعرف اسرق
كنت بقيت اغني منهم ومن ابواتهم زاتو ..
قالت له : حرامية كيف ؟ بسرقوا غنم الحلة ولا بسرقوا شنو ؟
قال لها : غنم الحلة في عينك , في سرقة غنم بتخلي الزول غنيان قدرهم كدا ؟
قالت له : أها بسرقوا شنو ؟
قال لها : ديل سرقوا حق الدولة كلو وماخلوا فيهو حاجة ..
قالت له : حق الدولة يعني شنو آآآابوي ؟
قال لها : حق الدولة دا حقي انا وانتِ وامك القاعدة تضحك في كلامك دا واخوانك وباقي خلق الله
القاعدين بدون اكل وشراب ديل كلهم ..
قالت له : لاحولا وسرقوهو كيف ؟
قال لها : قومي شوفي ليك صنعة قضيها , أو والله اشيل السوط دا
اخبتك بيهو لامن تجيبي الدم ( شوف الشافعة دي ) هسي تمشي
تكلم شفع الزول الاسمو الخير دا وتاني ربع رطل سكر ما يديِّنا ليه
قالت له : ولا شيئ سكتت وبقت تعاين ليهو
قال لها : قومي امشي دكان ناس الخير قولي ليهو :
عمي الخير ( اوعي تنسي تقولي ليهو عمي الخير ياشافعة ) قولي ليهو
ابوي قال ليك ادينا ربع رطل سكر ووقية ونص زيت وورقة شاي وربع وقية بن
( لامِن ) القي لي شغلانية واجي أدّيك حقهن ..
قال له : وحلاوة لبان ..
قال لها : حلاوة لبان ماهسي خليها الدّرت بعد نزرع ونحصد ..
قالت له : انت قاعد تغشّنا طوالي كل مرة تقول الدّرت الدّرت
ولابتشتري لينا اي حاجة ..
قال لها : مخاطباً زوجته ( أم الشافعة ) : امسكي شافعتك دي هووووي ..
لانو انتِ عارفة ح اعمل شنو لو مامسكتيها ..
انتهي ..

[ابوالنور]

ازيك يا رائع روعة القنيص ب كلب
وسفروق تحت شدر الطنضب وحمبك الطنضب الحلو
مداخله
تعالي انت بت حلوينه وبت اصول
وما ناقصك الا ود الحلال
جاد الله ده حكايتو شنو ؟
داخل ومارق في اكتر من تلاته
مرات في اليوم وبعدين الشي العارفو انو الزول متزوج حديث
وعندو طفله عمرها سهرين
بأبتسامه تخش توش القلب
ده صديق الاسره
نعم !
يعني بجي بيتنا وناس بابا عارفين
اها
طنطه داخليه
الصداقة بنحترمها يا اختي
لكن الستره والفضيحه متباريات
ونواصل

[ود الضو]

ازيك يا رائع روعة القنيص ب كلب
وسفروق تحت شدر الطنضب وحمبك الطنضب الحلو
مداخله
تعالي انت بت حلوينه وبت اصول
وما ناقصك الا ود الحلال
جاد الله ده حكايتو شنو ؟
داخل ومارق في اكتر من تلاته
مرات في اليوم وبعدين الشي العارفو انو الزول متزوج حديث
وعندو طفله عمرها سهرين
بأبتسامه تخش توش القلب
ده صديق الاسره
نعم !
يعني بجي بيتنا وناس بابا عارفين
اها
طنطه داخليه
الصداقة بنحترمها يا اختي
لكن الستره والفضيحه متباريات
ونواصل
---------------------
حباب ابو النور
الله يجبر بي خاطرك آآآآالحبيب
واصل ولا تلتفت ..