عروس كل المدائن

[طارق التوم]

جاى ليك يا مدنى راجع
شايل اشواقى وحنينى
جاى ليك فينى المواجع
من بعاد ضيع سنينى
جاى لعينيك اسامر
واحكى لنيلك همومى
واغسل احزانى فى ترابك
واملاء من شوفتك عيونى
وقدر ما اكتب واقول
عن جمالك ما بوفى
كل معانى الريد وحاتك
فى غرامك ما بتكفى
يا عروس كل المائن
يا وطن كل الفنون
يا الجبينك ديمه شامخ
صدرك المفتوح حنون
كيف بدون عينيك وحاتك
دونك السودان يكون
لبعادك مانى راجع
ولترابك ما بخون
جاى باقى العمر جنبك
وحضنك اصبح لى سكون

[ياسر فقيري]

جاى لعينيك اسامر
واحكى لنيلك همومى
واغسل احزانى فى ترابك
واملاء من شوفتك عيونى
http://www.wadmadani.com/up/pic/candel.jpg
والله يا طارق الواحد ما عارف يقول ليك شنو على هذه الكلمات الرائعة المعبرة تماماً عما في نفس كل واحد منا .. والله لولا الملامة كان فعلاً الواحد رجع وحكى للنيل الهموم وغسل أحزانه وآلامه في ترابها وملأ من عينيه بشوفتها ..
لك كل ودي وتقديري ولا تحرمنا من روائعك التي تعيدنا إلى ألق الماضي الجميل بين أحضان معشوقتنا الفاتنة مدني

[aborawan]

ياسر كلماتك ما محتاجة اى تعليق وجد ابدعت ويديك الف عافية اخوي

[saleh farah]

بالجد ابداع مابعده ابداع ياطارق وربنا اخليك وازيد ايامك عشان تتحفنا اكتر واكتر
وقدر ما اكتب واقول
عن جمالك ما بوفى


وقدر ما اكتب واقول
عن جمالك مانى بوفى

رايك شنو كده مش احلى

[طارق التوم]

الاخ العزيز ود فقيرى اشكرك كتير على تعليقك الرائع واتمنى ان اكون قدر الكلام
اخى ابو روان لك الشكر والتقدير على الاهتماموربنا يقدرنا

عزيزى ابو سراقه شكرا كتير على الشهاده الرائعة ومنكم نستفيدونحن فى انتظار الجديد

[ابراهيم]

وقدر ما اكتب واقول
عن جمالك ما بوفى
كل معانى الريد وحاتك
فى غرامك ما بتكفى

أخى طارق عندما تكون الكلمات منمقة منسقة وجميلة
وعندما نحس في صدق الاحساس ورقة الذوق

ليس أمامنا سوى نصمت فالصمت كثيراً ما يكون ابلغ
هؤلاء هم ابناء مدني دوماً يتدفقون بالكلم الجميل
ودمت اخاً ولك المودة ولا تحرمنا من هذه الاحاسيس

[أبوبكرحامد]

الرائع طارق التوم......................سلامات

جاى باقى العمر جنبك
وحضنك اصبح لى سكون

هذا البيت أصابنى بهاء السكت فسكتُ !!!!!!!!

[ابوفيصل]

ود التوم ...
روعة كلماتك بروعة ايقاعك داخل المستطيل الاخضر ايام الصبا
لك ودي واحترامي

[الزمن المريح]

قد ابدعت شعرا طارق و اسقيت ورود اللب الشائكة بحب عزرى لمدينتا الحالمة ود مدنى فلك التحية و لك الشكر على ما اتحفتنا به من كلمات لاقت فى النفسى متنفسا و فى القلب هوى لك ودى بلا حدود