مانفرن تقول سابق الكلام إلفه ...

[ود الضو]

ياسايق الفيات عج بى وخد سنده بالدرب التحت تجاه ربوع هنده
أوصيك قبل تبدا سيرك داك طريقك سابق الربده
منك بعيد جبده حى هندهالمراد عج بى ربوع عبده
اطوى الارض واضرع من افكارنا سيرك يالفيات اسرع
ميل على المشرع لا تريع القطيع بتجفل الادرع
شقا حشا الطريق وأتيمم الحلال زفنو الكلاب مانالن إلا علال
فاضلات ثواني قلال بينك والغروب داك مشرع الشلال
شوف سايق الفيات الليله كيفن هاش والشجر الكبار بقى شوفنا لينا طشاش
قولي دح وين ماش فارقت الطريق أتيا من الرماش
يازين الشباب ياطيب الأخلاق يا أمين الصديق والناس على الإطلاق
من ايدى الصناعة يبعد المعلاق انظر للطبيعة ومجد الخلاق
شوف النهر مار بخشوع تقول هجسان أو مر المنام بى مقلة النعسان
جلت قدرته ما اكفر الانسان كم ينسى الجميل ويجحد الاحسان
انزل ياصديق وشوف يد القدرة شوف حسن البداوه الما لمس بدره
وراد النهر اردونى ما بدرى الكاتل الصفار أم نضرة الخضره
مانفرن تقول سابق الكلام الفه عطشان قلت ليهن وصحت البلفه
مافيش كاس قريب قالن دون كلفه تشرب بكفوفنا لما تتكفى

----------------------

[ود الضو]

بالله إيدكم معانا ياخ خلونا نشاقق في ( كوم الجمال ) دا
---
العبــادي
و
ســـرور
---------

[ود الضو]

قوم بي اخد سندة بالدرب التحت ..
تجاه ربوووع هنداااااااااا يا السايق الفياااات
شوف سايق الفيات الليلة كيفن هاش
والشجر الكبار .. بقى شوفنا ليهو طشااااااااااااااش يا
السايق الفيات ..
-----
(الشجر الكبار فوقو الصمغ ) أو كما قالوا ,,
انا مالي بجيب في المواجع لي روحي كان ماساي ( الفيها مكفيها وزياده )؟؟
باقيلكم الليلة من العصريه لقيت نفسي شاعر لي بي شوية ( صقط )
رغم انّ الفصل صيف هنا ولكن أظن دي ذكريات متوهطه جوة الواحد
وبدأت تتفاعل ولا تنفعل ماعارف ,,
المهـــــم :
داير اتحكر في الهمبريبة الحلوة دي ( رغم انه مافي ولا حبة همبريبه )
لكن بدور احكي ليكم يا مظاليم الهوى ( ماتزعلاو ياخ من مظاليم الهوي دي )
لكن الاغنية دي بالحيل عاجباني نعم هي قديمة لكن سمحه ..
اغنية ولدت في الزمن الحلو .. زمن الطرب البجيب الحمى في العضام ..
------
أها لو في طريقه :
واحد يجدع لي الغنوة دي ( فيديوهياً ) ..

[ود الضو]

بوصيك قبل تبدا سيرك .. داك طريقك سابق الربدة
منك بعيد جبده حى (هندة) المراد .. ميل بى ربوع (عبدة)
اطوى الارض واضرع .. ومن افكارنا سيرك يالفيات اسرع
ميل على المشرع .. لا تريع القطيع وتجفل الأدرع
شقا حشا الطريق وأتيمم الحلال زفنو الكلاب مانالن إلا علال
فاضلات ثواني قلال بينك والغروب .. داك مشرع الشلال
شوف سايق الفيات الليله كيفن هاش والشجر الكبار بقى شوفنا لينا طشاش
قولي دحين وين ماش فارقت الطريق وأتيامن الرماش
-------
عليكم النبي يا جماعة شوفوا قوة الرجاء دة (اطوي الارض واضرع )!!
ومن افكارنا سيرك يا الفيات اسرع !!!جنس شفقة هي ,,
ميّل على المشرع .. لا تريع القطيع ..(اي سرب قد تهادى تحت افياء الظلال )؟ ,,
قال : ميّل على المشرع لا تريع القطيع وتجفِّل الادرع ..
شاف البنوت ديل زي قطيع الغزلان .. ودايما في القطيع بيربطوا (يدرعوا) للمفردة الصحتها سمحة
منه حاجة في رقبتها تحث القطيع على المشي ..
سرب من العذارى يتقدم سايق الفيات المنفعل الهاش الشقَّ حشا الطريق
وهردو هرد وجرن الكلاب وراه ماشفن منه غير الغبار ..
ودة كله بحساب الثواني القلال المفترض فيهن يحصِّل المشرع ..
ومن شفقته فارق الطريق وترك ديار الرماش على يمينه .
كدي نقيف هنا حبة معاهم لمن ينزلوا في منطقة الرماش دي جنب المشرع.

[ود الضو]

شوف سايق الفيات الليله كيفن هاش
والشجر الكبار بقى شوفنا لينا طشاش
قولي دح وين ماش
فارقت الطريق أتيا من الرماش
يازين الشباب ياطيب الأخلاق
يا أمين الصديق والناس على الإطلاق
---
اهااا سايق الفيات ينهر في الفيات ويضرع في الارض تحته ..
والمكنة معصورة تعوعي ..والعادم شرارو يلوى ..
يرمي في تعاشقيو ساااي .. وظنيت ابتسامته مربوطة طردياً مع حشرجة صوت المكنة ..
وتبديل التعاشيق بي سادية للحديد محببة ..عاصر عصر صاح ..
داير يلحق سرب الغزلان الواردات (يا السمحة يا الواردة عيني عليك باردة)
على المشرع والعبادي مبسوط منه .. كأنه لسان حاله بيقول : ( اديلو .. سوي ليو ..انهرو نهرو بلا ) ..
اها السوّاق مع هوشتو ديك سرح وفارق الطريق (واتيامن الرماش) اصبح الرماش على يمينهم ..
وبعدها رجعوا على المشرع والفيات هدأت انفاسه .. محازياً البحر ..
وخاطب العبادي اصحابه المعاه (يازين الشباب ) ولفت إنتباههم على حلاوة طبيعة منطقة الرماش ..
وخضرة الجنائن على الشاطئ .. وقدرة الخالق وتجليه فيها ..
ثم مال بنظره الى صفحة النهر .. وبتلك الروح الشاعرية في بديع الوصف ..
والنهر في تلك العصرية المشارفة المغرب ..
بعد ان هدأت امواجه واخذت حركته طابع الانسياب
(انت صاحي ..؟ ولا نايم ..؟؟ ولا طرفك من طبعه نعسان ؟؟؟) وقال :
شوف النهر مار بخشوع تقول هجسان ..
أو مر المنام بى مقلة النعسان ..
جلت قدرته ما اكفر الانسان
كم ينسى الجميل ويجحد الاحسان.
صدقت والله شاعرنا العبادي ..

[ود الضو]

انزل يا سرور وشوف يد القدرة
وشوف حسن البداوة الما لمس بدرة
وُرَّاد النهر خلُّوني ما بَدْرَى
كاتِلنِي الصفار أم نضرة الخضرة
مانفرن تقول سابق الكلام عرفة ..
عطشان قلت ليهن ..وصَحَّتْ البَلْفَة
مافيش كاس قريب ..قالن بدون كُلفة
نسقيك بكفوفنا حتى تتكفى .
-----
قال ليهو : انزل يا سرور ..
والله انا خايفو يكون نزل معرِّج
والنزول ذااااتو انواع .. النزول من عالي ..
والنزول للبساطة .. والنزول لفكرة ..
وشاعرنا زي التكنو داير يقول لسرور خليك من جمال المدن وبنات المدن وزيف المدن ..
انزل يا سرور وامسح الفات في راسك دة كلو .. وشوف عظمة الخالق وقدرته ..
وشوف واتلمّس حسن البدو ديل .. وجمالهن الطبيعي غير المجلوط والمخلوط بالبُدر والديانا
والروز البخلي الوش كيف كيف .. والبهلي ال للبشرة يهري ويقلي ..
واغادير والبيوكلير .. والفيد آوت البجيب السرطان والقاوت.. والكارولايت والكارولين .. وكل مستودعات الكيماويات.
انزل آخوي شوف الجمال الطبيعي (جمال طبيعي لا لا ما مزور وقادر الله اللينا صوَّر).
البنوت الواردات البحر ديل هبشن حتة في نفسي وسلبن عقلي وخلَّن الفؤاد مقلي ..
ياربي اعاين للصفار ولا عاجبني الخضار ؟؟
كل هذه التساؤلات كانت تجول في دواخل شاعرنا امام سرب الغزلان الواردات
البحر الهايم في الميسان زي مرور النعاس في عين الزول الخلاااااص اتحكم فيهو النعاس ..
اها هنا شاعرنا إتمكن تب وقال يشوف ليهو حنك ومدخل ..
والشعراء ديل بالهم طويل وحنكهم سنين .. وراسهم حكيم ..
بيعرفوا من وين الدخول .. ديل بنات ريف وناس كرم واصالة ما زيف ..
قال يركب حبل العطش :
عطشان ؟؟ هاهاها
اها زولنا دة قال (يِبْلِف) البنوت ستات الجمال والكرم ديل بي حنك
انه عطشان وهن (متوقيات) قدورهِن فوق رؤوسهن ..
والقِدر طبعاً هو الصفيحة (اربعة جالون) ..
-------
بجي صاد أكان حييت ..

[ود الضو]

ما نفرن .. تقول سابق الكلام عرفة
عطشان قُتْ ليهن ..
وصحًّت البلفة
----
وكعادة بنات القرى .. مابنفرن من الضيف ..
( دا كان حاصل زمان غايتو لكن هسي مابعرفِن )
وبعرفنه (فراسة) من ملامحه ..
ويتجارن على كرمه في العلن .
شاعرنا العبادي افتكر انه غشاهن وحنكه ضرب ..
ما عارف انه حس الكرم جواهن خلاهن ينزِّلن قدورهن من راسهن
ويتناسن الحس اللمسي .. والحتة دي من قصيدتنا يا ناس سمينة المعنى ..
فيها (تغييب الحس المعنوي للحس اللمسي )
كانت نفوسهن نضيفة لما فتشوا لكاس او ماعون قريب يشربوا بيهو ..وما لقوا ..
هو كان حيتحسّر .. إلا ببراءة وتلقائية وكامل العفوية قالن ليهو :
نسقيك بكفوفنا حتى تتكفى ..؟؟؟
ابدا ما فكرن انه راجل غريب مفروض ما يمس كفوفهن ..
انحصر كل تفكيرهن في ارواؤه بالموية .. وقد كااان ..

[محمد الجزولى]

http://www.youtube.com/watch?v=7xLxHd8FUcE

[محمد الجزولى]

يا سلام يا ود الضو ياخ ...
الفيات كانت له صولات وجولات
( إنداح ) ياخ وخلينا نستمتع بهذا الجمال

[حاتم عمر]

بالله إيدكم معانا ياخ خلونا نشاقق في ( كوم الجمال ) دا
---
العبــادي
و
ســـرور
---------

معاك بايدينا وكرعينا اصلك انت الجمال وهبوه ليك ، ود الضو يا ريت لو تقدر تجيب لينا حاجة من عبد الرحمن الريح

[ود الضو]

يا سلام يا ود الضو ياخ ...
الفيات كانت له صولات وجولات
( إنداح ) ياخ وخلينا نستمتع بهذا الجمال
------------------

محمد الجزولي
هاك تحية المساء آآآآالحبيب
آآآه من تلك الازمان ياخ , الفيات
وناس العبادي وسرور , وبقية اولئك النفر الذين
تركوا لنا إرثاً غنائياً جميلاً وخالداً
لك التحية ..

[ود الضو]

معاك بايدينا وكرعينا اصلك انت الجمال وهبوه ليك ، ود الضو يا ريت لو تقدر تجيب لينا حاجة من عبد الرحمن الريح
----
حاتم عمر
مليون حبابك
هنا ,,,
حيث جمال الكلمه المغطيه بي لحن وصوت غاية في الجمال
----
خليني أنزل من الفيات دا
وان شاء الله سوف اعرج علي واحدة من كلمات عبد الرحمن الريح
دمت بخير ..