المساعد الشخصي الرقمي

مشاهدة النسخة كاملة : سعاد سيطره ... مسلسل فى حلقات ..



ود المطامير
30-10-2011, 05:03 PM
http://up1.neilshare.com/2011-11/beq26561.jpg (http://www.p99p.com/)

ود المطامير
30-10-2011, 05:04 PM
قبل غروب شمس القريه الوديعه التى توسدت بخجل الضفه الشرقيه للنيل الأزرق
تجمعت فى الأفق الغيوم والسحُب الداكنه التى كانت تتشكل بأشكال مفزعه كأنها رؤس الشياطين
مما جعل أهل القريه ينشطون كخلية نحل فى ترميم وشد كل ما يحتاج شد من أجل مواجهة الخطر القادم
فبخبرتهم الطويله يعلمون بأن أمطاراً غزيره مصحوبه برياح عاتيه على وشك الوصل لقريتهم الوديعه

على مشارف القريه أطلق الراعى صيحته المعهوده التى تعنى لقطيع الغنم أن تفرقوا إلى بيتكم
فسار القطيع فى صفوف كثيره طويله محدثاً جلبه وغوغاء وغبار فى الأزقه الضيقه
وسرعان ما كانت النساء فى الزرائب يحلبن الماعز لإعداد شاى لليله يحسبها الجميع سوف تكون طويله

كان الجميع يتراكضون فى كل الإتجاهات ويسابقون الزمن من أجل سد كل الثغرات
تراهم على رؤس البيوت يردمونها بالتراب وفى الزرائيب يشدون الحبال ويفتحون مجارى مياه الأمطار
التى هطلت على رؤسهم بغزاره منقطعة النظير مصحوبه برياح عاتيه وبرق يخطف الأنظار
وسرعان ما كان الجميع داخل المنازل مجتمعين حول أكواب الشاى والزلابيه ويدعون الله أن تكون أمطار خير وبركه
وبينما كانت الرياح تتلاعب بالأشجار والرواكيب وصوت الرعد يصم الاذان وفى غمرة إنشغالهم بأحوالهم
تصل لمسامعهم صرخات شقت طريها إلى عنان السماء الماطره بقوه وعنف

_ الله ليييييييييييييييييييي ... يا الله لييييييييييييييييييي

خبطت دار السلام على صرها وهى تهتف فى فزع

_ كرررررررر على أكان التايه عاوزه تلد لينا فى الجو دا !!!

خرج الرجال والنساء من المنازل وإتجهو صوب منزل ود الفكى مصدر الصوت وزوجته التى على وشك الولاده
تزحلق جاد الرب وسقط على وجهه فى الوحل فساعده بله الخدرى على النهوض ونهض وهو يشتم فى المره التى لا بتعرف
الوقت المناسب
كانوا يقدمون رجلاً والرياح العاتيه ترجعهم إلى الخلف وبعد معاناه شديده وصلوا لباب ود الفكى الذى خرج لهم
وهو يضع مصلاته على رأسه وأخبرهم إنو التايه على وشك الولاده

_ إتا يا ود الفكى ؟ مرتك دى ما لقت إلا اليوم دا شان تلد فوقو ؟
_ نان يا الخدر بيدها يعنى ولأ بيدها ؟
_ ها ناس هووووى خلو كلامكم الشين دا كدى واحد فيكم يمشى يجيب علويه الدايه
_ نان يا أبوضراع علويه دى فى ظلط مدنى بتوحل ، هسى تجى كيف ؟
_ يا زول إن شاء الله تشيلوها شيل ولأ يعنى عاوزين التايه أختى تلد براها ذى النعجه ؟

ذهب ود نمر وإصطحب معه ود حجيلان ووصلوا منزل علويه الدايه وهم يرجفون من البرد القارص
طرق ود حجيلان الباب وهو يصيح

_ علويه هووووووووووووى جهزى الشنيطه وأبقى مارقه ، التايه خلاص ختت نمره 3

أتاهم صوت علويه من الداخل وهى تلوك الزلابيا

_ أجى ؟ وحات أمى أكان ولدت براها ما بمشى ليها فى الشهفوفه دى
_ ها مره أنجرى لا برا وخلى المكوضما دى

خرجت إليهم وهى تتدثر بقطعة برش وناولت ود حجيلان شنطة أدواتها وقالت لهم

_ عاد يا ود حجيلان جنا التايه دا إلا بدور يكسر لى مخروقتى

أمسك ود نمر وود حجيلان بيديها وساعداها على المشى فى الطين وهم يقاومون المطر والرياح
العاتيه ، كانت علويه الدايه قد إقتربت من الخامسه والخمسين من عمرها وبحكم عامل سنها
فهى فى الظروف العاديه لا تقوى على المشى بسرعه وعليه كانت تتلمس خطواتها بحذر
وكانت تغمض عينهيها كثيرا لدخول قطرات المياه فيهما
نظر ود نمر لود حجيلان نظره فهمها صديقه على الطائر فما كان منهما إلا وقد أمسكا بها
من تحت إبطيها وسحبوها سحباً

_ أجى يا ولايداتى ؟ دا كلام شنو دا ؟
_ عاد إنتى تقعدى تتكى لينا كدا لما التايه تفطس ؟
_ هى نان هادك تراهو شبشبى إتملص
_ والله البسمع شبشبى يقول حق نانسى عجرم ، عليك الله يا حاجه هو دا شبشب ؟
_ هى لكن ما إتملص من كراعى أقيفو جيبوهو لى
_ ها مره نقيف نجيب شنو ؟ على الطلاق يستناك للحول وفِرد زول ما ح يدنقر عليهو

بهذا المشهد ، سار الثلاثه إلى أن وصلوا بيت التيايه ووقفت علويه الدايه تتنفض وهى تشتم فى ود حميدان
وود نمر وحملت شنطتها ودخلت على التايه وهى تصيح بها من على البعد

_ ها مره إنتى جنيتى وعاوزه تلدى لينا فى المطره دى ؟ بالله البسمع يا الله ليييييييي يقول خلاص جايبه لينا ليلى علوى
_ أجئ يا علويه ؟ دا كلام شنو دا ؟
_ هوووووى يا البخيته إنتى أسكتى ، عاد كان ناس ود نمر وود حجيلان جروك زىّ ذى شوال العيش ما كنتى قلتى كدا
كدى أمشى سخنى المويه

فى البيت المجاور كان معظم رجال القريه يحتسون الشاى ويتسامرون ويدعون الله أن يحل التايه بالسلامه

_ إتا يا ود الفكى ؟
_ أيّا يا أبضريس ؟
_ على النعمه جناك دا جايى منحوس تب
_ ها زووول فال الله ولا فالك
_ عليك النبى من بدور يمرق كبست علينا المطره والشعفوفه رقدت نص البيوت صلطه
_ أستغفرو الله يا ناس وأدعو للوليه ربنا يحلها بالسلامه
_ امييين
_ امييين
_ امييين

قريه وديعه توسدت بخجل الضفه الشرقيه للنيل الأزرق
ها هى الآن تحت رحمة الله وتتلاعب بها الرياح كما تتلاعب بخُصلات صبيه فى عمر الزهور
ومعظم مبانيها قد إستسلمت وسقطت أجزاء منها

فى بيت كانت التايه تولول وتدعو ربها ثم عم الصمت ولحظات خرجت البتول وتوجهت للمنزل الذى به رجال القريه

_ يا ود الفكى ، هووووووووى يا ود الفكى
_ حباب البتول ، بشرى
_ مبررررروك البنيه

وإسدل ستار تلك الليله و ( سعاد سيطره ) تطلق أول صرخه لها فى الحياه

mohd saeed magazoub
30-10-2011, 06:47 PM
سيطرة

إسلوب جميل في السرد وبيئة المسلسل جميلة

من المتابعين ...

تخريمة : المسلسل بجي الساعة كم :D

شكله على قناة الشروق صح :p

ود المطامير
30-10-2011, 07:33 PM
سيطرة

إسلوب جميل في السرد وبيئة المسلسل جميلة

من المتابعين ...

تخريمة : المسلسل بجي الساعة كم :D

شكله على قناة الشروق صح :p




الحبيب
سلامى وأشواقى
وتسلم لى يا رب

والمسلس بجى فى أى وقت علشان القناه دى لسه فى البث التجريبى ;)

نزار احمد كوارتي
30-10-2011, 07:54 PM
نِحن مَتَفَنين في الواطه ومِغزغِزين كِيعانا من المُغرِب

بس قول إنشالله الكهربا ما تقطَع

ود المطامير
30-10-2011, 10:48 PM
نِحن مَتَفَنين في الواطه ومِغزغِزين كِيعانا من المُغرِب

بس قول إنشالله الكهربا ما تقطَع
;);););););)

بس قول إن شاء الله بنات أفكارى ما يمشن للعيد ;)

محمد الجزولى
30-10-2011, 11:09 PM
تمام يا ود المطامير
عجبني ( اللوكيشن ) جدا .. حلوة اللوكشين دي مش
براعة في تصوير الاحداث وبيئة القصة
ومشاهد واقعية عشناها جميعا
متابعين مع ( سعاد سيطرة )

ريمون
30-10-2011, 11:10 PM
لا بالله اقبضن بناتك ديل قوي ..
متابعين ..
بالمناسبه المشاط الفي الصورة دي بشبه مشاط هناية الجننت الجماعة يوم الاحتفال ..

بت أم درمان
30-10-2011, 11:15 PM
سعاد سيطرة الجات في عز المطر الا نشوف اخرتا

اسلوب ممتع وشيق
بس علييييييك الله ما تشرنا زي الجماعة الشرارين

ود المطامير
30-10-2011, 11:16 PM
تمام يا ود المطامير
عجبني ( اللوكيشن ) جدا .. حلوة اللوكشين دي مش
براعة في تصوير الاحداث وبيئة القصة
ومشاهد واقعية عشناها جميعا
متابعين مع ( سعاد سيطرة )
حبيبنا
والله الحق مشتااااقين ومقصرين معاك

تسلم يا زول يا سمح فى كل شئ

ود المطامير
30-10-2011, 11:17 PM
لا بالله اقبضن بناتك ديل قوي ..
متابعين ..
بالمناسبه المشاط الفي الصورة دي بشبه مشاط هناية الجننت الجماعة يوم الاحتفال ..
;););););););)

ياخ ما تضحكينى
أنا هنى جاد جدا جدا ;)

ود المطامير
30-10-2011, 11:21 PM
سعاد سيطرة الجات في عز المطر الا نشوف اخرتا

اسلوب ممتع وشيق
بس علييييييك الله ما تشرنا زي الجماعة الشرارين
تسلمى والله يا بت أم در

وإن شاء الله نبث لكم الحلقات يومياً
ما عدا الخميس والجمعه وإحتمال السبت

أنا قلت لنفسى ما دام أنا قاعد براى فى جزيرتى دى ذى طرزان
أحسن انجر للحبايب ديل مسلسل هع هع هع هع هع

انور النور محمد
31-10-2011, 12:40 AM
سعاد سيطره خطيرة اول يوم ليها في الدنيا وقفة الحلة على فرد كراع وجابت المطرة ام شعفوفة

متابعين السيطرة الجد

تسلم الحبيب

أبوريتاج
31-10-2011, 02:31 AM
ود المطامير .. يديك العافية والله قمة في الروعة والسرد القصصي ..
وانا بقرأ يتخيل في القصة كأنها أمامي في تلفاز واكثر شئ تخيلته علوية الداية دي براها قصة ههههههه ..
تسلم يا عجيب .. اها منتظرين نشوف البنية دي حكايتها شنو ..

الجندي المجهول
31-10-2011, 02:44 AM
والله انا منتظر بقية هذا المسلسل


حق مشروووووووع عديل كدا

ود المطامير
31-10-2011, 05:26 AM
سعاد سيطره خطيرة اول يوم ليها في الدنيا وقفة الحلة على فرد كراع وجابت المطرة ام شعفوفة

متابعين السيطرة الجد

تسلم الحبيب
حبيبنا الزول الجميل انور
شوق ليك ما بتوصف

تسلم ومع سعاد سيطره مش هتقدر ترمش ;)

ود المطامير
31-10-2011, 05:28 AM
ود المطامير .. يديك العافية والله قمة في الروعة والسرد القصصي ..
وانا بقرأ يتخيل في القصة كأنها أمامي في تلفاز واكثر شئ تخيلته علوية الداية دي براها قصة ههههههه ..
تسلم يا عجيب .. اها منتظرين نشوف البنية دي حكايتها شنو ..

حبيبنا أبوريتاج

يديك العافيه وتسلم والله على الدرر اللى أتحفتنى بها

وإن شاء الله كلنا نمشى مع البنيه خطوه خطوه

ود المطامير
31-10-2011, 05:34 AM
والله انا منتظر بقية هذا المسلسل


حق مشروووووووع عديل كدا
;););););););)

والله يا حبيب قلبى دا شرف لى

ود المطامير
31-10-2011, 07:47 AM
أشرقت شمس صباح اليوم التالي على القرية بأشعة ذهبيه فاترة
فأصبحت لوحه طبيعيه جميلة المنظر ، وخرج الجميع عن بكرة أبيهم
يرممون ما تهدم ويصلحون ما أفسدته الأمطار
كان الجو عليل والفراشات الملونة تداعب فم الأزهار وطيور الجنة تزقزق بحبور
والجميع منهمك في الترميم بينما كانت النسوة يعدّن الإفطار

جلست التايه وهى تتأمل أبنتها التي كانت تحرك يديها ورجليها ببراءة
تأملتها ورأت فيها تقاطيع دقيقه تنبئ عن جمال خلاب ، كيف لا وهى أبنتها
هي التي هزّ جمالها قرى شريط النيل وتزوجت أبن عمها فارس فرسان القرية حمد الفكي
صاحب أكبر بقاله بالقريه والقرى المجاوره
ضمت وليدتها على صدرها بحنان بالغ ثم وضعتها بجوارها وإلتفتت على زوجها ود الفكي متسائله
_ إتا يا ود عمّى ؟
_ أيّا يا أم سعاد
_ أجئ ؟ وحات إسم الله جاوبتنى على سعالى قبال أقولو
_ هع هع هع هع ، شن كان سعالك ؟
_ كت بدور أسعلك نسمى البنيه شنو ؟
_ إيييييييييييه يا بت عمى ، سميتها على الوالده الما شفتها تب
_ الله يرحمها وعلى بركة الله

بعد إسبوع وفى الصباح الباكر كانت سكين الماحى تفعل فعلها على عنق خروف سمين
وهو يهمس بسم الله بسم الله ويطلق إسم سعاد على صاحبة المناسبه التى إجتمع لها أهل
القرية عن بكرة أبيهم ، فهم قوم بسطاء مترابطين متحابين تربطهم ببعضهم صلات الرحم القويه
ولذا تجدهم في كل المناسبات كأفراد البيت الواحد النساء لوحدهن والرجال كذلك

كان الرجال متلمين في بيت أبوضراع وسرعان ما فتكوا بصوانى الطعام ثم إتكأ كل منهم على طريقته
ودارت بينهم أحاديث شتى ، وكعادتهم كانت أحاديثهم تبدأ من محيط القرية وكل ما يهم الزرع والضرع
إلا أن يأخذهم عم حسن وهو من القلائل الذين يمتلكون راديو في القرية كان يأخذهم
خارج نطاق القرية بجملته الشهيره ( على الطلاق أمس لندن قالت )

_ على الطلاق أمس لندن قالت مشروع الجزيره حقنا دا يكفى العرب جت
_ والله يا عم حسين إلا يكون راديك دا حجارو نازله ، هو مشروع الجزيره نحنا ما مشبعنا
_ هوووى يا الحسين أسكت ، إنت شن خبرك بالسياسه خليك في شاهيك دا
_ والله يا عم حسن راديك دا أكان سمح فيهو المديح بس
_ ااى عاد ما حارقك ، وتانى تعال قول لى أفتحو لى النسمع عشه الفلاتيه
_ هع هع هع هع
_ هع هع هع
_ هع هع هع هع

في الطرف الآخر غاصت حجرة التايه عن آخرها بالنسوه ، وكانت أصواتهن متداخله ومتشربكه وعاليه
إتكأت عواطف ودع على صاحبتها الرساله مشاط وهمست لها

_ أجئ ؟ شوفى دار السلام دى بتكوضم كيفنها
_ برى ، وحات مسايرى ديل البشوفها تكوضم يقول يوم الولاده جات خايضه معانا الطين
_ وإنتى الصادقه ، دى جات تانى يوم مع الفطور
_ هييي يا نسوان جهزن لى قفتى أنا متراوحه
_ أجئ ؟ ماشه وين يا خاله علويه ؟ كملى الجبنه
_ لااا لا بدور أتراوح بدر بدرى ، كدى شوفى لى ود الفكى جهز لى راس الخروف ؟
_ هييي يا خاله حتى راس الخروف لحقتيهو ؟ ما كفاك السكر والبن والسجاير قفتك
يعلم الله بقت ليها كليوات
_ هيييي يا يمه يكيلوك كوم كوم ، شوفن الشافعه دى ، مالك ؟ جروك ناس ود حمدان متلى في الطين ؟
الله يعلم ليوم الليله كتفى واجعنى ، وبعدين يا البخيته تانى شوفى ليك دايه تولدك
الله يعلم يوم ولّدتك بالعوض ما طلعت منك بالترابه
_ أجئ ؟ وحات شيخى كاوشتى منى الشى والشويات
_ يشويك يا يمه في منقد
_ كدى يا عمتى علويه تعالى لى جاى ، بدورك في كلام خاص
_ أيّا يا التايه جيتك تب ، أهاا قولى يا حبيبة قساى
_ شبشبك الشالتو موية المطره يوم جيتينى للولاده
_ مالو ؟ يمين الله تلقيهو هسى وصل المقرن
_ هه هه هه ، خلاص يا عمتى أفتحى السحاره وتلقى ليك كيس فيهو شبشب جديد شيليهو
_ هيييى لكن ......
_ يمين الله ما تقولى شئ يا عمه
_ إنتى يا بتى تلقى السمح محل ما تقبلى

وطبعت قُله على وجنة ( سعاد ) وغادرت محمّله بالهدايا

أبوريتاج
31-10-2011, 07:59 AM
صدقني ياودالمطامير جيتك جاري جري والحمد لله حصلنا السماية .. اقصد حصلت الجزء الثاني ..
وتسلم يا غالي..

همسة .. الحلقة الجاية متين عشان نجي بدري !

ود المطامير
31-10-2011, 08:23 AM
صدقني ياودالمطامير جيتك جاري جري والحمد لله حصلنا السماية .. اقصد حصلت الجزء الثاني ..
وتسلم يا غالي..

همسة .. الحلقة الجاية متين عشان نجي بدري !
هع هع هع هع هع هع

يديك العافيه يا الحبيب

والحلقه التانيه غدا المساء إن شاء الله

وعلى فكره ، الحلقه تذاع على الهواء مباشره

يعنى ( نجر أخدر ) ;)

ساريه
31-10-2011, 09:08 AM
قاااعدييييييييييييييييييين ومتابعين من يوم المطره يا ود المطامير ووحضرنا السمايه كمان ....
(وشايلا اسما سعاد سيطره ) ....


وسرد فى منتهى الروعه والدقه .....واصل ...

ود المطامير
31-10-2011, 09:16 AM
قاااعدييييييييييييييييييين ومتابعين من يوم المطره يا ود المطامير ووحضرنا السمايه كمان ....
(وشايلا اسما سعاد سيطره ) ....


وسرد فى منتهى الروعه والدقه .....واصل ...
أهلين أختنا ساريه

ويديك العافيه والله

وبإذن الله معكم نتابع سعاد يوم بيوم

تسلمى والله

ود المطامير
08-11-2011, 06:02 AM
مرت الأيام وها هى سعاد بين أترابها كالورده
طفله آيه فى الجمال ، شعرها أسود منسدل ولونها كسنابل القمح
وعينيها واسعتين ، بياضهما كالحليب وسوادهما كرشفة قهوه فى فنجان
طفله ذات جمال لافت وحُسن ينبئ ببراكين خامده يحتويها الجسد الصغير

أينما تحل سعاد تجد من ينحنى عليها ويمسك بها ويرفعها ويقبل الوجنات الورديه
وهى فى وداعة الصوص تستكين تحت الجناح ، باسمه وضاحكه
وكثير ما تنال بعد كل قُبلة قطعة حلوى ، فهى محبوبه للجميع بجمالها الرائع وطبعها الأروع

فى روضة الأطفال ها هى زهرة الروض ، أنيقة الملابس وجدائلها جميله
بالشرائط الملونه ، وكل من يستمع لنشيد طيور الجنّه فى الصباح
يصل لمسامعه زقزقة صوتها العذب

ما بين سنابل الذره والزراعه المطريه والزرزور والسمبر والغيوم شرق القريه
والنيل والجناين والجروف والعصافير الملونه والخُضره غرب القريه ، عاشت طفلتنا
أجمل ما تكون الطفوله ،
ورده وسط الورود والفراشات الملونه ، نشطه ومرحه وذات شقاوه محببه
ولذا فقد كسبت محبّة الجميع

وكما تنمو الشتله نمت ( سعاد ) وبدأت الورده تفرهد على فريع البان على أقل من مهل
معلنه للجميع بداية أولى خطواتها إلى عرش الجمال الآسر عند ما خطت أولى
خطواتها داخل فناء مدرسة البنات الإبتدائيه

فى ذلك اليوم إستيقظت فى الصباح الباكر وأتمت أمها تجهيزها وعند ما
أختها إلى المدرسه كانت تتلألأ حيويه ونضاره
نهضت المديره عند ما دخلت عليها بصحبة أمها

_ ما شاء الله تبارك الله ، قمر يا سعاد

تبسمت الصبيه فى خجل ورّد وجنتيها وشكرتها أمها وتمت إجراءات تسجيلها سريعا
وسرعان ما كانت تجلس داخل الفصل وهى فى قمّة السعاده

فى شرق الله البارد ، وفى قريه توسدت بخجل الضفه الشرقيه للنيل الأزرق
وداخل مدرسه متواضعه كانت ( سعاد ) داخل فصلها تتلألأ كالجوهره

ساريه
08-11-2011, 08:35 PM
ما بين سنابل الذره والزراعه المطريه والزرزور والسمبر والغيوم شرق القريه
والنيل والجناين والجروف والعصافير الملونه والخُضره غرب القريه ، عاشت طفلتنا
أجمل ما تكون الطفوله ،


ما عارفه لكن لمن قريت الفقرة دى رحل بى الخيال الى بلدى الحلوه (كرمه ) قريه صغيرة ترقد على ضفاف النيل وصوت البابور وجداول الموية وهى تتسارع فى توصيل المياه للجروف وأشجار النخيل وهى تتمايل فى كسل ودلال واصوات الطيور ..واحسست بتلك البرودة وانا اقف على ضفاف النيل فى ساعة صباحية اغازلة ...


تقبل مرورى وكل سنة وانت طيب اخونا ود المطامير ...
وما تتطول علينا ....

محمد الجزولى
08-11-2011, 09:05 PM
مرت الأيام وها هى سعاد بين أترابها كالورده
طفله آيه فى الجمال ، شعرها أسود منسدل ولونها كسنابل القمح
وعينيها واسعتين ، بياضهما كالحليب وسوادهما كرشفة قهوه فى فنجان
طفله ذات جمال لافت وحُسن ينبئ ببراكين خامده يحتويها الجسد الصغير


عارف يا ود المطامير سعاد دي باين عليها ح توقف الحلة دي على رجل واحده
صراحة شدتني هذه الصور غاية في الجمال في وصف هذه الطفلة الصغيره
اصعب حاجة يا ود المطامير لما يكون ( النجر ) اخدر ومن الدماغ للكيبورد
هنا تظهر براعة الكاتب وقدرته في الامساك ( بلجام ) الفكرة ولب الموضوع
كل الروعة أنت يا عروه
وسير ونحن وراك ...
وعيدك مبارك ياخ

ود المطامير
09-11-2011, 09:54 AM
ما عارفه لكن لمن قريت الفقرة دى رحل بى الخيال الى بلدى الحلوه (كرمه ) قريه صغيرة ترقد على ضفاف النيل وصوت البابور وجداول الموية وهى تتسارع فى توصيل المياه للجروف وأشجار النخيل وهى تتمايل فى كسل ودلال واصوات الطيور ..واحسست بتلك البرودة وانا اقف على ضفاف النيل فى ساعة صباحية اغازلة ...


تقبل مرورى وكل سنة وانت طيب اخونا ود المطامير ...
وما تتطول علينا ....
تسلمى أختى ساريه
وبالفعل الريف السودانى جميل جدا
وخاصة القرى الواقعه على ضفاف النيل
وسبحان الله نحن لا نحس بالجمال إلا بعد أن نفقد مشاهدته

تسلمى والله ومرورك عطّر القصه

ود المطامير
09-11-2011, 10:01 AM
عارف يا ود المطامير سعاد دي باين عليها ح توقف الحلة دي على رجل واحده
صراحة شدتني هذه الصور غاية في الجمال في وصف هذه الطفلة الصغيره
اصعب حاجة يا ود المطامير لما يكون ( النجر ) اخدر ومن الدماغ للكيبورد
هنا تظهر براعة الكاتب وقدرته في الامساك ( بلجام ) الفكرة ولب الموضوع
كل الروعة أنت يا عروه
وسير ونحن وراك ...
وعيدك مبارك ياخ
أديبنا المُفوّه ود الجزولى
يديك العافيه والله كلامك وسام على صدرى

وتعرف يا الحبيب ؟
كما قلت هو نجر أخدر وفورى ومن غير أفكار مرتبه
لأننا كلنا بنحتفظ فى دواخلنا بلوحات خلابه مدفونه فى أعماق العقل الباطنى
وعند ما يحن وقت ما نجدها تهدر من أجل الظهور على السطح

يديك العافيه يا الحبيب

mohd saeed magazoub
09-11-2011, 11:11 AM
_ هييي يا نسوان جهزن لى قفتى أنا متراوحه
_ أجئ ؟ ماشه وين يا خاله علويه ؟ كملى الجبنه
_ لااا لا بدور أتراوح بدر بدرى ، كدى شوفى لى ود الفكى جهز لى راس الخروف ؟
_ هييي يا خاله حتى راس الخروف لحقتيهو ؟ ما كفاك السكر والبن والسجاير قفتك
يعلم الله بقت ليها كليوات
_ هيييي يا يمه يكيلوك كوم كوم ، شوفن الشافعه دى ، مالك ؟ جروك ناس ود حمدان متلى في الطين ؟





من العادات القديمة الجميلة التى إندثرت حالياً

ود المطامير السماية فاتتنا إلا نشوف خالتك علوية

يمكن نحصل رأس الخروف ;)

متابعيييين...

عثمان جلالة
09-11-2011, 11:25 AM
حبيب القسا مطاميرو ... مهما نغيب نجي نلقى ابداعك زايد .. زي حنية أهلنا كل ما تغيب منهم تلقاها يا ها حنيتهم ويا ها طيبتهم يكرموك بالفي والمافي .. وحمد الله في لسانهم في كل وقت شكرا لهذه اللوحة الجميله التي لم تخرج أبدا من القرية وأهلها ترابطها وألقها .. وما بين السطور يا صديقي ... ألوان لن تستطيع أن تحسها وتدركها بكل أبعادها إلا إذا عايشتها وخبرتها.

ملحوظه:

شكلها الجزيره مخرفه ههههههههههههههه، يعلم الله عامل لي شريوت عجيب خلاس أريتك كان قريب كان ناولتك بى فوق الحيطه جك عشان تبدع كمان وكمان هع هع هع

ود المطامير
09-11-2011, 11:27 AM
شباب الحى

مع مرور الأيام أحسّت ( سعاد ) بأنها أينما كانت وأينما حلّت وتحركت وسكنت فهى محل
إهتمام الجميع ، ففى المنزل لا يرفض لها طلب ، وفى الحى هى نوارته
وفى القريه هى بدر سمائها وفى مدرستها هى السندريلا الصغيره

وسرعان ما تبين مدى ذكائها فى تلقى الدروس وحفظها مما دعى معلماتها
يتنبأن لها بمستقبل علمى باهر وأكد ذلك بأنها كانت الأولى فى نهاية العام الدراسى
والأعوام التاليه فوطأت بقدميها فناء المدرسه الثانويه وهى الأولى على كل زميلاتها
مجموعا وجمالا وذكاء

ومع بداية دخولها المرحله الثانويه كانت الورده اليانعه قد تفتحت كل وريقاتها
وتفجرت مكامن إنوثتها براكين تشتعل فجلست على عرش الجمال أميرة زمانها
رائعه روعه لا يصفها خيال شاعر ، جميله جمال يجعلك عند مشاهدتها تتوقف ثم
تبدأ .. ماااا شاء الله ، تباااارك الله ، الله يحفظه .. الله يغطيها

ومع هذا الجمال الآسر والذكاء المُتقد فهى على خلق وأدب جم
ففى طريقها إلى مدرستها ومن أول خطواتها على الدرب الطويل ، كانت
تحسُّ بأشعة عيون الشباب تتكسر ساخنه على جسدها بينما هى لا ترفع عينيها
الجميلتين الواسعتين من على مسارب خطواتها ، وكانت تبتسم فى دواخلها
حينما يصل إلى مسامعها همس الشباب .. قمر والله .. أقدلى وسكتى بنات الفريق جت
كان شباب القريه ينتظرونها يوميا فى نقاط عديده على طول خط مسيرتها لمدرستها
مرتين فى اليوم ، صباح ونهاية اليوم المدرسى

كانت نقاط التجمع تبدأ من مصطبة دكان والدها مرورا بقيفة الخور وعلى إمتداد أشجار النيم
وكان شباب القريه من يفوته رؤيتها بالصباح يحرص على رؤيتها بعد الظهر
وكل منهم يكون فى أجمل هندام ، ملابس حلاقه وعطور
لقد فعلت بهم ( سعاد ) فعل السحر ، جعلتهم يهتمون بأنفسهم فقد كانوا يتبارون للفوز بقلبها

_ والله يا ود النبارك ؟
_ أيّا يا حمدين ؟
_ البركه فى سعاد خلتك تستحمى ، وحات الله ريحتك كانت ترمى الصقر
_ هههههههههههههههههههههه
_ هههههههههههههههههههههههههههه
_ ههههههههههههههههههههههه
_ هووووى ها ، وكمان بتضحكو ؟ إتا يا ود الزين كدوبتك ما كانت لى نص جبهتك
_ والعجب ود الرساله دا ؟ الصباب كان مالى شعرو ذى غنمايتنا ، هسى بقى يرقش ، قادر الله
_ هههههههههههههههههههههههه
_ههههههههههههههههههههههههههههههه
_ههههههههههههههههههههه
_ أسكتو أسكتو هديييك تراها جات
_ أحييييييي أنا ، البت دى وحات شيخ البنيه ما فيها عضم
_ صدقت والله ، العضام خلتها للحرم المبارياها دى
_ عليكم النبى شوفو التِتنى دا كيف ؟
_ هييييييييع ياااى ، يااااااااااااااااى يعلم الله
_ هازول قول ما شاء الله ، والله عينك الحاره دى هسى ترميها لينا على خشيمها
_ غايتو أكان بزقت ، أنا بحفظ محل البزاق والله بطعم بيهو تمباكى
_ ها جنا هى قالولك بتبزق ؟ البزاق عند الحرم المبارياها دى
_ هههههههههههههههههههه
_ هههههههههههههههههههههههههههه
_ ههههههههههههههههههههههههه
_ عليك النبى شوف الكريعات ديل بسون شنو على التراب ؟ يعزفن عزف
_ صدقت والله ، عاد ما مشى الحمامه عاد
_ لكن يا ود البلوله ؟
_ أها يا ود جادين
_ البنيه دى يا كافى البلا لا بتعاين لينا ولا نظره لشنو ؟
_ أنا غايتو يوم داك كنت فى المالوفه دى براى وهى ملت فينى عويناتها الكبار ديل قووووى
_ يا الكضوووووووووب
_ عشم إبليس
_ حلم الجيعان عيش
وعندما مرّت بمحازاتهم نزلت عليها عبارات الغزل كالمطر ، وما أجمل كلمات غزل الريف

_ أمووووت أنا وأكون شنطة مدرستك
_ يا أبوعيون بتبلع جم جم
_ أتجدعى ما هو الزيك منو ؟
_ الغزال النافر من مراحو

_ هووووى يا أولاد أحسن ليكم
_ هوووى ها يا الحرم إنتى القاصدك منو ؟ قادر الله
_ يقص رقبتك ، أصبر بكلم ليك أبوك
_ هى السمحه بتبارى البعشوم دا لشنو ما عارف ؟
_ إت ماك عارف آلخزين ؟
_ لاالا
_ ما عشان تعاديها بالسماحه
_ هههههههههههههههههههههههه
_ ههههههههههههههههههههههههه
_ هههههههههههههههههههههههههههههههه

بينما بطلتنا كانت لا تلتفت ولا ترد ولكنها تشعر فى أعماقها بالغبطه

ود المطامير
09-11-2011, 11:35 AM
من العادات القديمة الجميلة التى إندثرت حالياً

ود المطامير السماية فاتتنا إلا نشوف خالتك علوية

يمكن نحصل رأس الخروف ;)

متابعيييين...




هع هع هع هع
الحبيب
مشتااااقين يعلم الله
يديك العافيه

ود المطامير
09-11-2011, 11:41 AM
حبيب القسا مطاميرو ... مهما نغيب نجي نلقى ابداعك زايد .. زي حنية أهلنا كل ما تغيب منهم تلقاها يا ها حنيتهم ويا ها طيبتهم يكرموك بالفي والمافي .. وحمد الله في لسانهم في كل وقت شكرا لهذه اللوحة الجميله التي لم تخرج أبدا من القرية وأهلها ترابطها وألقها .. وما بين السطور يا صديقي ... ألوان لن تستطيع أن تحسها وتدركها بكل أبعادها إلا إذا عايشتها وخبرتها.

ملحوظه:

شكلها الجزيره مخرفه ههههههههههههههه، يعلم الله عامل لي شريوت عجيب خلاس أريتك كان قريب كان ناولتك بى فوق الحيطه جك عشان تبدع كمان وكمان هع هع هع
أووووووووووووووه
الهمباتى النبيل الأصيل والزول السمح فى كل شئ
يعلم الله شوق ما بتوصف

والله الحق صدقت ، الجزيره من كم يوم مطر للركب وغيوم وجو روعه والله
وياريتنى لو كنت قريب منك وناولتنى الجك حق الشربوت كنت قلبتها ليكم دوبيت

على فكره يا غالى

فى العيد مشيت أبارك العيد لجماعه أصحابنا وأدونى كباية شربوت
وشربتها وهو كان شربوت بالطريقه الصاح
يا زول لما طلعت حسيت بكرعينى ما إياهم وقفت كدا وقلت لنفسى

_ أمانه ما كتل راجل ، أكان ما كنت بصنقع بالأصلى
هع هع هع هع هع

محمد الجزولى
09-11-2011, 09:06 PM
_ والله يا ود النبارك ؟
_ أيّا يا حمدين ؟
_ البركه فى سعاد خلتك تستحمى ، وحات الله ريحتك كانت ترمى الصقر
_ هههههههههههههههههههههه
_ هههههههههههههههههههههههههههه
_ ههههههههههههههههههههههه
_ هووووى ها ، وكمان بتضحكو ؟ إتا يا ود الزين كدوبتك ما كانت لى نص جبهتك
_ والعجب ود الرساله دا ؟ الصباب كان مالى شعرو ذى غنمايتنا ، هسى بقى يرقش ، قادر الله
_ هههههههههههههههههههههههه
_ههههههههههههههههههههههههههههههه
_ههههههههههههههههههههه

ههههههههههههههه
والله يا ود المطامير دي بالغت فيها
مش قلت ليك سعاد دي ح توقف البلد بي حالها
متابعين هذه المتعة ...
بس خلي شغل القطاعي ده وادينا جمله ياخ ...

ساريه
09-11-2011, 09:35 PM
متابعيييييين يا ود المطامير ..

انور النور محمد
10-11-2011, 12:59 AM
وسيطرت سعاد على فنتازيا الحروف
واخرجت لنا طيف الخيال يسرج فينا الحنين الى سيطرة الزمان والمكان في بقعة الضؤ المتوهج بين سطور
الولادة
والسماية
والطفولة
والصبابة
سيطرة لذيدة
وفي انتظار سيطرة الانوثة التي تهب الجميع الجموح الى مراقي سطوتها

الحبيب ود المطامير
عيدك اجمل عيد

ريمون
10-11-2011, 05:14 AM
أديبنا المُفوّه ود الجزولى
يديك العافيه والله كلامك وسام على صدرى
وتعرف يا الحبيب ؟
كما قلت هو نجر أخدر وفورى ومن غير أفكار مرتبه
لأننا كلنا بنحتفظ فى دواخلنا بلوحات خلابه مدفونه فى أعماق العقل الباطنى
وعند ما يحن وقت ما نجدها تهدر من أجل الظهور على السطح

يديك العافيه يا الحبيب
يا ولللللللد !!!!!

مصطفى هاتريك
10-11-2011, 06:39 AM
ولازال جمال سردك يسيطر علينا

عجبني التدرج في صناعة الدافع

ومنتظر معاك تدريج صناعة الشخصية

لغاية هسع عشرة على عشرة يا مبدع

ود المطامير
10-11-2011, 09:45 PM
ههههههههههههههه
والله يا ود المطامير دي بالغت فيها
مش قلت ليك سعاد دي ح توقف البلد بي حالها
متابعين هذه المتعة ...
بس خلي شغل القطاعي ده وادينا جمله ياخ ...
هع هع هع هع هع

تسلم يا راقى

ود المطامير
10-11-2011, 09:47 PM
متابعيييييين يا ود المطامير ..
ميه ميه يا ساريه

ود المطامير
10-11-2011, 09:50 PM
وسيطرت سعاد على فنتازيا الحروف
واخرجت لنا طيف الخيال يسرج فينا الحنين الى سيطرة الزمان والمكان في بقعة الضؤ المتوهج بين سطور
الولادة
والسماية
والطفولة
والصبابة
سيطرة لذيدة
وفي انتظار سيطرة الانوثة التي تهب الجميع الجموح الى مراقي سطوتها

الحبيب ود المطامير
عيدك اجمل عيد
حبيبنا انور الزول السمح فى كل شئ

عيدك سعيد يا غالى

والسيطره اللى جايه دى سيطره بالطريقه الصاح ;)

ود المطامير
10-11-2011, 09:52 PM
يا ولللللللد !!!!!
هيييييييييييييييييييييييع
شنو ليك يا أخ ريمون ؟ ;)

ود المطامير
10-11-2011, 09:55 PM
ولازال جمال سردك يسيطر علينا

عجبني التدرج في صناعة الدافع

ومنتظر معاك تدريج صناعة الشخصية

لغاية هسع عشرة على عشرة يا مبدع
الحبيب
يعلم الله مشتاااااقين

والشخصيه وصلت أصعب مرحله

علشان عاوز أبقيها نار منقد ;)

آلاء عبد الرحمن
11-11-2011, 11:08 PM
ماعرفتك والله


متابعين

ود المطامير
11-11-2011, 11:22 PM
ماعرفتك والله


متابعين

;););););););)

عشان تاااااامنووووو ;)

بدر الدين محمد
12-11-2011, 02:50 AM
اخترقنا هذا السيناريو وبقينا اجزاء من الشخوص بسبب السرد التلقائي
والصور الحية

لك التحية ود المطامير

ود المطامير
12-11-2011, 04:48 AM
اخترقنا هذا السيناريو وبقينا اجزاء من الشخوص بسبب السرد التلقائي
والصور الحية

لك التحية ود المطامير
حبيبنا بدر الدين
والله دى شهاده أعتز بها
ومنكم نتعلم فأنتم مدرسه ننهل منها كل ما هو جميل

بدر الدين محمد
13-11-2011, 01:09 AM
حبيبنا بدر الدين
والله دى شهاده أعتز بها
ومنكم نتعلم فأنتم مدرسه ننهل منها كل ما هو جميل

ولك الود وحقا كل شئ في البوست جميل

نداء الى مشرف الثقافي ود الجزولي
امسكو في ود المطامير قوي قبال ما يجو يسوقوه النفاجة*

محمد الجزولى
13-11-2011, 03:53 AM
ولك الود وحقا كل شئ في البوست جميل

نداء الى مشرف الثقافي ود الجزولي
امسكو في ود المطامير قوي قبال ما يجو يسوقوه النفاجة*

تعرف يا بدرالدين ود المطامير ده مبدع حقيقي
وماديني كلمة من زمان مستنيهو ينفذها
وانا راجيهو للحول ما بقنع منو

ود المطامير
14-11-2011, 08:07 PM
تعرف يا بدرالدين ود المطامير ده مبدع حقيقي
وماديني كلمة من زمان مستنيهو ينفذها
وانا راجيهو للحول ما بقنع منو
;););););)

إنتا تأمر يا غالى

ود المطامير
14-11-2011, 09:12 PM
نقطة تحول

ذات مساء وبينما أشعة البدر تتكسر على محياها الملائكى
وهى مستلقيه على ( عنقريب ) فى فناء الداروعينيها الواسعتان تنظران
بين النجوم إلى اللا شئ ، أطلقت لخيالها العنان

إييييييييييه يا بت يا ( سعاد ) أمانه ماك موقفه الحِلّه لااااحدها على فِرد كراع
وحات ضفايرى ديل ، العمده ذاتو أكان إبتسمت ليهو بطريف خشميى إلا أجيبو واقع من حمارو
على خشيمو ؟ ما شفتى آبت جنيات الفريق جت من يشوفوك كيفن بقهو ؟

وصاحباتى يتسابقن على راحتى متل قصة فاطنه الدهب اللحمر ، والعجب معلماتى
يا ( سعاد ) إنتى عليك طابور الصباح وعاد لامن أقيف على خشبة مسرح الطابور
البنات لااااحدهن يسمعن كلامى أكتر من كلام أبله نفيسه

إيييييييييييه يا ( سعاد ) ، بكره ناس الحِلّه ديل أكان ما سمعونى بنضم فوق رادى عمى حسنين
ما أكون ( سعاد ) السمحه ، هه هه هه هه ه....

_ قطعت ضحكتها الخافته عند ما سمعت أمها تنادى لها

_ ( سعاد ) يا بت
_ أيّا يمه
_ قومى دخلى الغنم الزريبه ، الوكت إتراوح
_ لالا يمه مانى قايمه ، أنا من يوم الليله ما بهوب ناحية الزرايب
_ أجئ ؟ لشنو ؟
_ عشان بدور أبقى الدهبايه يمه
_ يا بت الدهب أمك ما لبستو ، قومى
_ بكره يمه بإذن الله ألبسك الدهب لاعند كوعك
_ أجئ ؟ صلاة النبى عليك ، لكن دحين هسى قومى دخلى الغنيمات
_ لالا يمه ، أنا من يوم الليله لا بعوس ولا بحلب ولا برد المويه
_ بسم الله ، الشافعه ركبها جن
_ هه هه هه
_ السلام عليكم
_ وعليكم السلام
_ وعليكم السلام
_ تعال يا ود عمى شوف بتك إتجننت
_ ها وليه فال الله ولا فالك
_ أسمعها عاد شن قالت ؟
_ شن قالت ؟
_ قالت تانى لا بتعوس ولا بتحلب ولا حتى ما بترد المويه من البير

ضم ود الفكى إبنته عليه بحنان بالغ وقال وهو يزفر بشده

_ إييييييييييه ، يوم ولادتها إتمنيتها لو كانت ولد ، لكن الحمد ليك يا الله هى بعشره أولاد
_ تسلم لى يابا
_ تسلمى آلمبروكه ، أمشى حضرى لى المصلايه لصلاة العشا ، بله طاحونه
فِرد نقّه لامن فوتها علينا
_ حاضر يابا

أسره جميله صغيره متحابه حب الريف الفطرى الأخاذ ، نفوس صافيه وقلوب راضيه
فحياتهم البسيطه تجعلهم بعيدين كل البعد عن ضغط الحياه عكس أهل المدن وضجيجها الصاخب

وبدأت ( سعاد ) تغير نهج حياتها رويدا رويدا ، لم تعد كما كانت تلعب الكار مع صديقاتها
تحت أشجار النيم ، وبدأت بالإهتمام بأناقتها ومظهرها ، وأوصت حاج عمر سواق البص
بأن يجلب لها الكتب والمجلات من المدينه وأصبحت معتكفه تقرأ الرويايات والمجلات والصحف
لم تكن كصاحبتها تهتم بمجلات كسمر والصبيان وغيرها ، كانت تهتم بالمجلات التى تهتم
بشئون المرأه ولكنها كانت تفرح غاية الفرح حينما تجد روايه رومانسيه لإحسان عبدالقدوس
فى بيتنا رجل .. خذ قلبى ودعنى .. كانت ترى نفسها بطلة كل روايه تقرأها

حقاً ... إنها إن وجدت كاتب لأمتلأت رفوف المكتبات بروايات تحمل إسمها
صبيه .. ذات جمال أخاذ وآسر ، تراها وسط زهور البساتين تطارد بدلال الفراشات الملونه
وضفائرها الجميله تتطاير فى مرح ، وعلى شفتيها الجميلتين إبتسامه ساحره
وضحكاتها الرائعه تجعل العصافير تبادلها الزقزقه

صبيه فى عمر الزهور إكتشفت بذكائها المُتقد إن فى إمكانها السيطره على كل القريه
_

محمد الجزولى
14-11-2011, 09:25 PM
;););););)

إنتا تأمر يا غالى

تسلم يا الغالي
خلاص كان كده بضرب ليك بعدين عشان اذكرك بالفكرة الجميله التي طرحتها لي في وقت سابق ...

أبوريتاج
16-11-2011, 02:48 AM
يديك العافية ود المطامير وعيدك سعيد ،، وجيتك جاري بعد غياب نسبة لبعض الظروف ،، وقلت امكن اشبع بكم حلقةلكن صدق يا دوب الشحتفة بدت ..
قمة في المتعة ،،إبداع و تفرد في الطرح اللذيذ المشوق ذو النكهة الخاصة
هي ليست قصه بل لوحه صورتها في أجمل صورة عبرت الأفق بجمال المعاني وحلاوة السرد ..
فهنيئا لنا بقلمك المميز المبدع ..

ود المطامير
16-11-2011, 08:29 AM
تسلم يا الغالي
خلاص كان كده بضرب ليك بعدين عشان اذكرك بالفكرة الجميله التي طرحتها لي في وقت سابق ...
أيوااااا
الفكره بتاعة يكون عندنا يوم مفتوح هنى لناس النفاج
وأهل العوض جت يجو يدقو كاروشه بالطريقه الصاح مُش ؟;)

ود المطامير
16-11-2011, 08:31 AM
يديك العافية ود المطامير وعيدك سعيد ،، وجيتك جاري بعد غياب نسبة لبعض الظروف ،، وقلت امكن اشبع بكم حلقةلكن صدق يا دوب الشحتفة بدت ..
قمة في المتعة ،،إبداع و تفرد في الطرح اللذيذ المشوق ذو النكهة الخاصة
هي ليست قصه بل لوحه صورتها في أجمل صورة عبرت الأفق بجمال المعاني وحلاوة السرد ..
فهنيئا لنا بقلمك المميز المبدع ..
الحبيب
مشتااااقين يعلم الله

وحمد لله على السلامه وشوفتك بتفرحنا والله

وتسلم يا غالى على الشعور النبيل
وهنيئا لى أنا بشهادتك الفاخره التى أتحفتنى بها

يديك العافيه ومعكم نواصل إن شاء الله

انور النور محمد
16-11-2011, 08:47 AM
متابعين

حضور

مستمتعين

اكثر ما ميز هذا الجزء لغة ( الحلة )
ومفرداتها الجميلة

شكرا
كتير
الحبيب ود المطامير

ود المطامير
16-11-2011, 09:59 AM
متابعين

حضور

مستمتعين

اكثر ما ميز هذا الجزء لغة ( الحلة )
ومفرداتها الجميلة

شكرا
كتير
الحبيب ود المطامير
يديك العافيه يا الحبيب
ومنكم نتعلم كل يوم كل جديد

ود المطامير
16-11-2011, 11:39 AM
عمدة القريه

عمدة القريه .. رجل تخطى الستين بسنتين ، رجل متسلط يحب المال كحبه للنساء
فتزوج من النساء خمس مرات ، ماتت الثانيه وطلق آخرهن ومن المستحيل أن يمر عام
ولديه خانه فاضيه إذ لابد أن يسدها بعروس تكون فى عمر أصغر بناته
فهو صاحب أملاك وأراضى ، على النيل لديه بستان رائع
ويمتلك مساحات شاسعه فى المزارع المطريه ولديه زرايب مدّ البصر
ممتلئه بالأبقار والماعز والضان

_ هاااا جنا هووووووى تعال هنى تجيك الطاويه حبالها
_ أيّا يابا العمده
_ أجر بسراع لعمك ود الفكى قولو أبوى العمده جايى يشرب معاك قهوة الفطور
_ سمح يابا العمده
_ أجئ ، دا كلام شنو آلعمده ؟ ما هدى تراها القهوه بتغلى فوق المنقد
_ لا ، أنا بشربها مع ود الفكى عندى معاهو غرض
_ غرض شنو دا كمان الخلاك تلبس الجلابيه والعمه والشال وتمرق مركوب النمر
الما مرقتو لعرس بتك ؟
_ يمرقوك فى عنقريب بركة سيدى لحاق بعيد
_ تمرق يا يابا وغرضك الماشى ليهو دا تلقاهو مكوجن
_ إتى آلسره ؟ غرضى المعا ود الفكى شن خابراهو هو شنو ؟
_ كيفن مانى خابراهو ؟ يمين الله مركوبك حق النمر دا أنا متشاومه بيهو
كلما تمرق بيهو بتجيب لينا مره جديده فى حبالك
_ هع هع هع هع والله يا البقيتى ذى لورى التراب أتاريك ما هينه تب هع هع هع


وسرعان ما كان تحت راكوبة دكان ود الفكى ، جلس معه يحتسيان فناجين القهوه
مر بهما بله صاحب الطاحونه وجلس يشاركهم إحتساء القهوه ثم إنضم لهم المبارك الجزار
وعبدالرحمن معلم المدرسه الإبتدائيه
كان العمده يتململ فى قعدته لوجود بله والجزار والمعلم لأنه أراد الإنفراد بود الفكى
ولما طال إنتظاره لمغادرتهم بدأ يستعمل معهما تكتيك التطفيش وخاصه وهو مشهور
بأنه ذو لسان لازع وجارح ومتسلّط

_ إتا آلمبارك ؟
_ أيّا يا العمده
_ ماك مشيت لاعند ناس ود محجوب ؟
_ خير ؟ مالو ؟
_ قالو عندو تور بسل فى الروح أمش كاوشو منو بكم جنيه وجر فوقو سكينك
_ دا كلام شنو يا العمده ؟
_ مالو كلامى ؟ قلت أكلمك كان تستفيد
_ المعنى أنا قاعد بضبح المرضانات يعنى ؟
_ أُمال نحنا المارضنا شنو غير فطايسك ؟
_ والله يا العمده إت بدورلك معاى سبب ساااى
_ سبب شنو عاد ؟ حرّم ما شفنا لينا خروف ضبحتو قعد يفرفر ، بتجيبهن جاهزاااات
_ عاد آعمده الله يكفينا شر لسانك المتل سوط العنج

ونهض وهو يطنطن وذهب فى سبيل حالو ، ثم إلتفت على بله صاحب الطاحونه

_ إتا آبله ؟
_ أها يا العمده
_ إتا طاحونتك دى ماله بقت تدقق حصحاص حصحاص ؟
_ خلاص يا العمده ، طفشت المبارك من القهوه وبقلت على أنا ؟ ما تقول حاجه يا ود الفكى
_ النصيحه لله ، كلام العمده صُح
_ صُح ؟ والله البسمع تعيدك ليهو تقول داير يناسبك
_ تأييد ، تأييد يا ما موثقف
_ الثقافه خليناها ليك إتا وصاحبك دا والبركه فى راديهو البشخشخ
_ العيب ما فى رادى العمده العيب فيك إتا ما بتفهم كلام الرادى
_ حرّم آود الفكى البسمعك تدافع ليهو يقول داير يناسبك

رقص قلب العمده بين أضلعه لسماع كلام بله ، وبدأت الهواجس تساوره
يا ربى بله دا قرا أفكارى ؟ وإنتظر رد ود الفكى لبله لكن ود الفكى إكتفى بضحكته الكبيره المشهوره
و أراد العمده أن يستفيد من كلام بله وقال لود الفكى

_ عليك الله يا ود الفكى قولّو ، حرّم نسب العمده نفتخر بيهو تب

نظر إليه ود الفكى و قد شعر بأن العمده قد أحاك له شرك لعلمه بأن العمده فى قمة الذكاء
والدهاء والمُكر وفكر بأن يرد له بطريقه يفهمها خاصه وقلبه قد حدثه بأن العمده ومرساله وجيته لكى يشرب
معه قهوة الفطور وراها ما وراها من الأكِمّه

_ نسبك بنفتخر بيهو تب آعمده ودا ما داير كلام ، عِلا يوسف ولدك متلكم فوق بت الطاهر

بلع العمده ريقه وقال لبله
_ عليك الله هسى إتا بتشرب فى الجبنه بمزاج كيف والدقيق ماليك لرموشك وبقيت ذى حلاوه لكوم
_ آلعمده خصمتك بالنبى قول ما شاء الله
_ هع هع هع هع
_ هع هع هع هع
_ وكمان بتضحك معاهو يا ود الفكى ؟ أها أنا الغلطان القلت أشرب معاكم القهوه فتكم بعافيه

نهض بله وذهب فى حاله وهو يقرأ فى سره سورة الإخلاص لعلمه التام بأن عين العمده ترمى الصقر من الجو ، سرح العمده وهو يحدث نفسه ، أهاا إتخارجنا من ناس بله
لكن المدرس دا يحلنا منو الحلا بله ، الجنا دا موثقفاتى درجه أولى عاد أكاوشو كيفن دا ؟

_ إتا يا أستاذ عبدالرحمن ؟
_ هو الدور وصلنى ؟ أكان كدا النقوم بكرامتى ودعتكم الله
_ هع هع هع هع
_ هع هع هع هع

وعندها إنفرد العمده بود الفكى ، برم شنبه وتنحنح وقال له

_ إتا يا ود الفكى ؟
_ أيّا يا عمده
_ أنا والله لما رسلت ليك وقلت ليك جايى أشرب معاك القهوه عشان راقد لى فوق راى
_ قول يا العمده ، شنو الراى ؟
_ بتقدر عليه تب إن شاء الله
_ أها قول ، أنا كنت حاسى تطفشك لناس بله ما ساااى
_ هع هع هع ، إتا عارف نسوانى التلاته راقدات صلطه
_ الله يديهن العافيه
_ ياخ قول الله ياخدهن
_ هع هع هع هع وبعدين ؟
_ وبعدين قلت بدل ما شبابى ومالى يضيع ساااى النقاسمو مع ود الفكى أخوى وحبيبى دا
_ كيفن يعنى ؟ ما فهمت
_ سعاد
_ ماله ؟
_ بدورها على سنة الله ورسوله ، شن قولك ؟
_ عليك الله يا العمده ، إتا الله قاعد تصلى ليهو ؟
_ ود الفكى
_ والله أكان أضيع شبابى ما عارف ؟ دا إنتا بتقوم من قعدتك ذى طيارة الرش
لما تصل هناااك عشان الضهر ينعدل
_ يا ود الفكى ما تغلط
_ أغلط أنا ولأ إتا الجايى تشترى منى سعاد بتى ؟
_ طيب يا ود الفكى يا أنا يا إتا فى الحله دى
_ حرّم إياكا المفارقها إتا يا عمده

نهض العمده وهو يلملم أطراف توبه وركب حماره وهو يسب ويلعن ويتوعد
بينما كان ود الفكى يشيعه بنظرات قويه وهو يقول فى نفسه

_ حرّم إلا على جثتى

ساريه
16-11-2011, 10:10 PM
عمدة القريه

عمدة القريه .. رجل تخطى الستين بسنتين ، رجل متسلط يحب المال كحبه للنساء
فتزوج من النساء خمس مرات ، ماتت الثانيه وطلق آخرهن ومن المستحيل أن يمر عام
ولديه خانه فاضيه إذ لابد أن يسدها بعروس تكون فى عمر أصغر بناته
فهو صاحب أملاك وأراضى ، على النيل لديه بستان رائع
ويمتلك مساحات شاسعه فى المزارع المطريه ولديه زرايب مدّ البصر
ممتلئه بالأبقار والماعز والضان

_ هاااا جنا هووووووى تعال هنى تجيك الطاويه حبالها
_ أيّا يابا العمده
_ أجر بسراع لعمك ود الفكى قولو أبوى العمده جايى يشرب معاك قهوة الفطور
_ سمح يابا العمده
_ أجئ ، دا كلام شنو آلعمده ؟ ما هدى تراها القهوه بتغلى فوق المنقد
_ لا ، أنا بشربها مع ود الفكى عندى معاهو غرض
_ غرض شنو دا كمان الخلاك تلبس الجلابيه والعمه والشال وتمرق مركوب النمر
الما مرقتو لعرس بتك ؟
_ يمرقوك فى عنقريب بركة سيدى لحاق بعيد
_ تمرق يا يابا وغرضك الماشى ليهو دا تلقاهو مكوجن
_ إتى آلسره ؟ غرضى المعا ود الفكى شن خابراهو هو شنو ؟
_ كيفن مانى خابراهو ؟ يمين الله مركوبك حق النمر دا أنا متشاومه بيهو
كلما تمرق بيهو بتجيب لينا مره جديده فى حبالك
_ هع هع هع هع والله يا البقيتى ذى لورى التراب أتاريك ما هينه تب هع هع هع


وسرعان ما كان تحت راكوبة دكان ود الفكى ، جلس معه يحتسيان فناجين القهوه
مر بهما بله صاحب الطاحونه وجلس يشاركهم إحتساء القهوه ثم إنضم لهم المبارك الجزار
وعبدالرحمن معلم المدرسه الإبتدائيه
كان العمده يتململ فى قعدته لوجود بله والجزار والمعلم لأنه أراد الإنفراد بود الفكى
ولما طال إنتظاره لمغادرتهم بدأ يستعمل معهما تكتيك التطفيش وخاصه وهو مشهور
بأنه ذو لسان لازع وجارح ومتسلّط

_ إتا آلمبارك ؟
_ أيّا يا العمده
_ ماك مشيت لاعند ناس ود محجوب ؟
_ خير ؟ مالو ؟
_ قالو عندو تور بسل فى الروح أمش كاوشو منو بكم جنيه وجر فوقو سكينك
_ دا كلام شنو يا العمده ؟
_ مالو كلامى ؟ قلت أكلمك كان تستفيد
_ المعنى أنا قاعد بضبح المرضانات يعنى ؟
_ أُمال نحنا المارضنا شنو غير فطايسك ؟
_ والله يا العمده إت بدورلك معاى سبب ساااى
_ سبب شنو عاد ؟ حرّم ما شفنا لينا خروف ضبحتو قعد يفرفر ، بتجيبهن جاهزاااات
_ عاد آعمده الله يكفينا شر لسانك المتل سوط العنج

ونهض وهو يطنطن وذهب فى سبيل حالو ، ثم إلتفت على بله صاحب الطاحونه

_ إتا آبله ؟
_ أها يا العمده
_ إتا طاحونتك دى ماله بقت تدقق حصحاص حصحاص ؟
_ خلاص يا العمده ، طفشت المبارك من القهوه وبقلت على أنا ؟ ما تقول حاجه يا ود الفكى
_ النصيحه لله ، كلام العمده صُح
_ صُح ؟ والله البسمع تعيدك ليهو تقول داير يناسبك
_ تأييد ، تأييد يا ما موثقف
_ الثقافه خليناها ليك إتا وصاحبك دا والبركه فى راديهو البشخشخ
_ العيب ما فى رادى العمده العيب فيك إتا ما بتفهم كلام الرادى
_ حرّم آود الفكى البسمعك تدافع ليهو يقول داير يناسبك

رقص قلب العمده بين أضلعه لسماع كلام بله ، وبدأت الهواجس تساوره
يا ربى بله دا قرا أفكارى ؟ وإنتظر رد ود الفكى لبله لكن ود الفكى إكتفى بضحكته الكبيره المشهوره
و أراد العمده أن يستفيد من كلام بله وقال لود الفكى

_ عليك الله يا ود الفكى قولّو ، حرّم نسب العمده نفتخر بيهو تب

نظر إليه ود الفكى و قد شعر بأن العمده قد أحاك له شرك لعلمه بأن العمده فى قمة الذكاء
والدهاء والمُكر وفكر بأن يرد له بطريقه يفهمها خاصه وقلبه قد حدثه بأن العمده ومرساله وجيته لكى يشرب
معه قهوة الفطور وراها ما وراها من الأكِمّه

_ نسبك بنفتخر بيهو تب آعمده ودا ما داير كلام ، عِلا يوسف ولدك متلكم فوق بت الطاهر

بلع العمده ريقه وقال لبله
_ عليك الله هسى إتا بتشرب فى الجبنه بمزاج كيف والدقيق ماليك لرموشك وبقيت ذى حلاوه لكوم
_ آلعمده خصمتك بالنبى قول ما شاء الله
_ هع هع هع هع
_ هع هع هع هع
_ وكمان بتضحك معاهو يا ود الفكى ؟ أها أنا الغلطان القلت أشرب معاكم القهوه فتكم بعافيه

نهض بله وذهب فى حاله وهو يقرأ فى سره سورة الإخلاص لعلمه التام بأن عين العمده ترمى الصقر من الجو ، سرح العمده وهو يحدث نفسه ، أهاا إتخارجنا من ناس بله
لكن المدرس دا يحلنا منو الحلا بله ، الجنا دا موثقفاتى درجه أولى عاد أكاوشو كيفن دا ؟

_ إتا يا أستاذ عبدالرحمن ؟
_ هو الدور وصلنى ؟ أكان كدا النقوم بكرامتى ودعتكم الله
_ هع هع هع هع
_ هع هع هع هع

وعندها إنفرد العمده بود الفكى ، برم شنبه وتنحنح وقال له

_ إتا يا ود الفكى ؟
_ أيّا يا عمده
_ أنا والله لما رسلت ليك وقلت ليك جايى أشرب معاك القهوه عشان راقد لى فوق راى
_ قول يا العمده ، شنو الراى ؟
_ بتقدر عليه تب إن شاء الله
_ أها قول ، أنا كنت حاسى تطفشك لناس بله ما ساااى
_ هع هع هع ، إتا عارف نسوانى التلاته راقدات صلطه
_ الله يديهن العافيه
_ ياخ قول الله ياخدهن
_ هع هع هع هع وبعدين ؟
_ وبعدين قلت بدل ما شبابى ومالى يضيع ساااى النقاسمو مع ود الفكى أخوى وحبيبى دا
_ كيفن يعنى ؟ ما فهمت
_ سعاد
_ ماله ؟
_ بدورها على سنة الله ورسوله ، شن قولك ؟
_ عليك الله يا العمده ، إتا الله قاعد تصلى ليهو ؟
_ ود الفكى
_ والله أكان أضيع شبابى ما عارف ؟ دا إنتا بتقوم من قعدتك ذى طيارة الرش
لما تصل هناااك عشان الضهر ينعدل
_ يا ود الفكى ما تغلط
_ أغلط أنا ولأ إتا الجايى تشترى منى سعاد بتى ؟
_ طيب يا ود الفكى يا أنا يا إتا فى الحله دى
_ حرّم إياكا المفارقها إتا يا عمده

نهض العمده وهو يلملم أطراف توبه وركب حماره وهو يسب ويلعن ويتوعد
بينما كان ود الفكى يشيعه بنظرات قويه وهو يقول فى نفسه

_ حرّم إلا على جثتى


وظهرت العقدة ...... مع حبكه دراميه موفقة ...
ود المطامير سيناريست من الدرجه الاولى ... نقلتنا الى موقع الحدث وعشنا فيه ..... فى انتظار ربط ( العقدة ) جيداً وحلها .......
متابعين ....

محمد الجزولى
16-11-2011, 10:17 PM
أيوااااا
الفكره بتاعة يكون عندنا يوم مفتوح هنى لناس النفاج
وأهل العوض جت يجو يدقو كاروشه بالطريقه الصاح مُش ؟;)

اسم الله عليـــــــــــــــــــــــك ياها زاته

أبوريتاج
17-11-2011, 01:42 AM
ود المطامير يا حبيبنا ،، يا صاحب البوح الشجي ،، بالجد لقد جعلت من الأحرف والكلمات شيء آخر ،، روعة ،، جمال ،، إبداع .. تشويق ..
والله مروري على أحرفك يجعلني أصل إلى قمة الاستمتاع ،، سلمت أناملك الذهبية ،، ويدك العافية ..
ومنتظريييييييييييين الحلقة القادمة .......

مصطفى هاتريك
17-11-2011, 02:23 AM
يا حلاوة الوصف في الحوار





_ ود الفكى
_ والله أكان أضيع شبابى ما عارف ؟ دا إنتا بتقوم من قعدتك ذى طيارة الرش
لما تصل هناااك عشان الضهر ينعدل



ود المطامير والله أبطالك ديل وصافينن

بلع العمده ريقه وقال لبله
_ عليك الله هسى إتا بتشرب فى الجبنه بمزاج كيف والدقيق ماليك لرموشك وبقيت ذى حلاوه لكوم

الشمشار
18-11-2011, 05:03 AM
ود المطامير
لك من الاسلوب مايجبر قارئك ان يتنسم المسك الذي يفوح من بين ثنايا احرفك
لك موفور التقدير واديييييييي قعده من بوستك ده مامارق الاتتم لينا المسلسل
معاك للحلقه البعد الاخيره ذاتوووووووووووو

ود المطامير
19-11-2011, 09:53 PM
وظهرت العقدة ...... مع حبكه دراميه موفقة ...
ود المطامير سيناريست من الدرجه الاولى ... نقلتنا الى موقع الحدث وعشنا فيه ..... فى انتظار ربط ( العقدة ) جيداً وحلها .......
متابعين ....
أختنا ساريه

تسلمى والله

وإن شاء الله الأحداث ح تتسارع

وح تظهر عقد وتتحل عقد ;)

ود المطامير
19-11-2011, 09:55 PM
اسم الله عليـــــــــــــــــــــــك ياها زاته
;););););););)

ود المطامير
19-11-2011, 09:56 PM
ود المطامير يا حبيبنا ،، يا صاحب البوح الشجي ،، بالجد لقد جعلت من الأحرف والكلمات شيء آخر ،، روعة ،، جمال ،، إبداع .. تشويق ..
والله مروري على أحرفك يجعلني أصل إلى قمة الاستمتاع ،، سلمت أناملك الذهبية ،، ويدك العافية ..
ومنتظريييييييييييين الحلقة القادمة .......
حبيبنا
مشتاااااقين يعلم الله
ويديك العافيه على الكلام الطيب

والحلقه التاليه تحت الطبع

ود المطامير
19-11-2011, 09:58 PM
يا حلاوة الوصف في الحوار


_ ود الفكى
_ والله أكان أضيع شبابى ما عارف ؟ دا إنتا بتقوم من قعدتك ذى طيارة الرش
لما تصل هناااك عشان الضهر ينعدل



ود المطامير والله أبطالك ديل وصافينن

بلع العمده ريقه وقال لبله
_ عليك الله هسى إتا بتشرب فى الجبنه بمزاج كيف والدقيق ماليك لرموشك وبقيت ذى حلاوه لكوم




;);););););););)

الجماعه ديل يا ما ح تشوف منهم بلااااااااااااوى ;)

ود المطامير
19-11-2011, 10:09 PM
ود المطامير
لك من الاسلوب مايجبر قارئك ان يتنسم المسك الذي يفوح من بين ثنايا احرفك
لك موفور التقدير واديييييييي قعده من بوستك ده مامارق الاتتم لينا المسلسل
معاك للحلقه البعد الاخيره ذاتوووووووووووو
أوووووووووووه

شهاده من زول قطع شك فنان

أفتخر وأعتز بها وبأن تكون صديقى

ومعا ان شاء الله نصل للحلقه الأخير بدعمكم المُقدّر دا

بالمناسبه ... العريس رجع من شهر العسل ولأ لسه ؟ بلغه تحياى

مايسة
20-11-2011, 12:27 AM
دا كلو من النفاج الخلاك مبدع ورائع بالشكل دا

من المتابعين بصمت

isamzaki1978
20-11-2011, 08:47 AM
كانت تهتم بالمجلات التى تهتم
بشئون المرأه ولكنها كانت تفرح غاية الفرح حينما تجد روايه رومانسيه لإحسان عبدالقدوس
فى بيتنا رجل .. خذ قلبى ودعنى .. كانت ترى نفسها بطلة كل روايه تقرأها

حقاً ... إنها إن وجدت كاتب لأمتلأت رفوف المكتبات بروايات تحمل إسمها
صبيه ..
_

انا من ما جيت من غوانتونامو ما قادر اخش الشبكة ، واقول ما فى داعى لى الدعيات البتخرب المسلسل الثمح دا ( السمح بتاعت هناى)، وانا ما عارف الحاصل شنو افتش ليك مع النفاجه ما عارف فى لاب توب جديد و سعاد سيطرة
ومهترش قال لى يقول لى ود المطاريش دا
احسان عبد القدوس بتاع شنو قال ( فى بيتنا رجل)قال هو بيتم بتاع ايجار شوف كمان قال:(خذ قلبى ودعنى )هو بى قلبو ما يساوى هع هع هع من شلاقة
دا وهم ولا شنو دا ما قرا سعاد سيطره
لو كان قرأ سعاد سيطرة كان عرف السهل الممتنع
تخريمة : والله سعاد سيطرة لقت ليها كاتب املى البوستات كلها خلى المكتبات
وبرضو بمشى افتح فيك بلاغ فى النفاج

ود المطامير
20-11-2011, 09:51 AM
دا كلو من النفاج الخلاك مبدع ورائع بالشكل دا

من المتابعين بصمت
تسلمى يا خالتو
والنفاج وطنى وقلت كدى النغترب شويه ;)

ود المطامير
20-11-2011, 09:52 AM
انا من ما جيت من غوانتونامو ما قادر اخش الشبكة ، واقول ما فى داعى لى الدعيات البتخرب المسلسل الثمح دا ( السمح بتاعت هناى)، وانا ما عارف الحاصل شنو افتش ليك مع النفاجه ما عارف فى لاب توب جديد و سعاد سيطرة
ومهترش قال لى يقول لى ود المطاريش دا
احسان عبد القدوس بتاع شنو قال ( فى بيتنا رجل)قال هو بيتم بتاع ايجار شوف كمان قال:(خذ قلبى ودعنى )هو بى قلبو ما يساوى هع هع هع من شلاقة
دا وهم ولا شنو دا ما قرا سعاد سيطره
لو كان قرأ سعاد سيطرة كان عرف السهل الممتنع
تخريمة : والله سعاد سيطرة لقت ليها كاتب املى البوستات كلها خلى المكتبات
وبرضو بمشى افتح فيك بلاغ فى النفاج
يا سلاااااام يا فردتى
الله يخليك لى ويديك العافيه والله

والبلاغ أجلو شويه ، عشان اليومين ديل شايف أبوعبدالرحمن موجود ;)

ود المطامير
20-11-2011, 11:20 AM
محاسن لندن

دخل ود الفكى على زوجته وإبنته وأخبرهما بما دار بينه وبين العمده
جحظت عيون زوجته وخبطت صدرها وهى تهتف

_ أجئ ؟ الراجل المكعكع دا قايل بتنا للبيع ولأ شنو ؟
_ تقولى شنو عاد يا (التايه ) ؟ نحنا بتنا نديها لزول ما عندو تعريفه لكن يكون زولا ضواى قبيله
_ أيّا ، وأنا فخوره بردك للعمده آود عمى
_ الله يديك العافيه آبت عمى

وفى زاوية الغرفه كانت بطلتنا الجميله تبتسم ، إبتسامه جعلت شفتيها الورديتين
كجناحي فراشه على وشك الهبوط على زهره ، بينما كان قلبها يدق بقوه وعنف كيف لا وعمدة القريه المُهاب
هو أول من طرق بابهم طالباً يدها ، وسرحت بخيالها إلى عوالم بعيده .. بعيده ، إذا كان دا العمده
أنا كاسره فيهو كم ضلعه ، إبقى وحات ضفايرى ديل دربى ح يكون مفروش بالورود

قطع حبل تفكيرها صوت والدتها تطلب منها الذهاب لجارتهم ( محاسن لندن ) وتخبرها بأن تأتيها
ولُغِّبت بلندن لأنها شهيره بنقل الأخبار
وأى شخص لديه خبر ما يود إنتشاره فما عليه إلا وأن يذهب إليها ويقول لها عندى ليك سر ولكن لا تخبرى أى أحد
ويخبرها ولا يكاد يفارقها إلا ويتنشر سره فى القريه إنتشار النار فى الهشيم
أتت ( محاسن لندن ) وجلست وسرعان ما كانت تحتسى كوب الشاى مع جارتها
التى كانت فى قمّة الذكاء إذ بعد المطايبه والسلام ، زمّت ( التايه ) بوزها وحركته شمال يمين ويمين شمال
بسرعة البرق فلاحظت ( محاسن لندن ) فسألتها
_ أجئ ؟ مالك بتلولحى فى خشيمك آلتايه إخيتى ؟
_ أصبرى .. أصبرى عاد بعد نشرب الشاى ، أحييييي أنا عاد بس
_ ووووب على لكن مالك
_ العمده
_ مالو ؟
_ جا إتحكر فى راكوبة الدكان ويشرب فى قهوتى
_ أها
_ وقال لود عمى شنو ؟
_ شنو عاد ؟
_ إنتى آمحاسن أختى وجارتى وحبيبتى
_ أيّا صُح
_ عشان كدا بكلمك لكن ما تكلمى زول أها
_ هى سرك فى بير
_ قال لود عمى ود الفكى بدور سعاد
_ ووووووب على ووووب على ، الراجل الكراع فى القبر وكراع فى الدنيا بدور سعاد ؟
_ أيّا
_ ود الفكى شن قالو ؟
_ قالو إن بقيت قطعتها ما بديك منها كوم
_ يمن الله راجل وزايد فوق الرجال ، آلتايه معليش ملاحى فوق النار بجيك بعدين

خرجت ( محاسن لندن ) وهى تلملم بقايا توبها الذى كان يجر بالأرض بينما كانت ( التايه )
تنظر إليها مبتسمه لعلمها التام أن الحكايه ليسة طبيخ على النار ولكنها وهبت ( محاسن لندن ) سبق صحفى خطييير
وعندها أمرت سعاد أن تنظف البيت وتضع براد الشاى على النار وسألتها إبنتها

_ لشنو يمه الشاى ما هسى شربتيهو مع خالتى ( محاسن لندن ) ؟
_ عشان نسوان الحِلّه هسى بجن منكسرات علينا ؟
_ يجن منكسرات ؟ لشنو ؟ وعرفتيهن كيف ؟
_ يابت أسمعى كلام أمك وبلاش سعالات كتيره

دقائق قليله وإذا ( صفيه ) تدخل وتوبها يلحق بها و بلا إستئذان وقبل السلام وبلا رتوش

_ صحى يا ( التايه ) الخبر السمعناهو دا ؟
_ أجئ ؟ سمعتن شنو ؟
_ وحات إسم الله كنا بنشرب فى القهوه حدا ضل نمية ( رقيه ) الساعه الجاتنا ( محاسن لندن )
ذى العُصار ونفسها قايم وقالت لينا العمده قال بدور ( سعاد )

نظرت لبنتها وقالت لها

_ يابت ما قلت ليك ختى براد الشاى فوق النار ؟
_ سمح يمه
_ الرسول يا ( التايه ) الكلام دا صُح ؟
_ صُح
_ وود الفكى شن قالو ؟
_ قالو والله لو قطعتها ما بديك منو كوم
_ أجئ ؟ وحات أمى ( محاسن لندن ) إذاعتها ميه الميه

وتوافدن نساء الحى كما توقعت ( التايه ) وكل منهن تدلو بدلوها وكانت قعده حافله
تفرقن بعدها وإنتشر الخبر إلى أن وصل إلى نساء العمده الثلاث اللاتى إجتمعن عليه فى منزل كبيرتهن السره
وأغلقن عليه الباب ونتفن ريش الرجل العجوز الذى كاد يروح فيها من شدة إرهابهن له

_ النبى آدار السلام أهجريهو على السرير يهجرو الجن اللحمر
_ هووووى يا السره أى شئ ولا دار السلام القدر البقره دى ، وهسى إنتن مالكن فايرات كدا ؟
_ بقره تنطحك ، إنتا على حيلك ما قادر تقيف كمان بدور تعرس زينة البنات ؟
_ يا حولااااااااا ، حرّم تكون دى (محاسن لندن ) ركبت حجار بطاريه
_ لندن ولأ باريس ، الكلام دا صُح ؟
_ صُح ، أنا عندى خانه فاضيه وخايف من حساب ربنا
_ إنتا بتعرف ربنا ؟ يا دار السلام ما قلت ليك أهجريهو لى ويا حليمه أمسكى لى كريعاتو ديل
_ هووووى يا السره أنا عمدة البلد أهز بلد
_ دا لناس الحله بس هنى كدى هز يدك دى لو تقدر
_ ح تعملو لى شنو يعنى
_ نخنقك ونفطسك ونقول صدمة ( سعاد ) كتلتو
_ هييييييع ... أنا العمده

خرج العمده من منزل زوجته ( السره ) وهو كالديك الممعوط وهو يسب ويلعن
ويقول فى سره .. أصبر لى يا ود الفكى .. لا لقيت منك ( سعاد ) وإنفضحت فى الحله
ونسوانى الله يعلم ما فكنى إلا بعد ما مثلت عليهن إنو أنا خلاص بسل فى الروح
طيب يا ( ود الفكى ) طييييب

isamzaki1978
20-11-2011, 11:51 AM
سعاد لندن [/U]) ركبت حجار بطاريه
_ لندن ولأ باريس ، الكلام دا صُح ؟

قلت لى سعاد ماشة لندن بتين
محاسن لندن دى انا بعرفه كانت بتجى تشرب الجبنة مع عشة شمارات

ود المطامير
20-11-2011, 07:13 PM
قلت لى سعاد ماشة لندن بتين
محاسن لندن دى انا بعرفه كانت بتجى تشرب الجبنة مع عشة شمارات
هع هع هع هع

ما لكن الحلقه مباشره ونتوقع أخطأ يا الحبيب

شكرا على التنبيه يا غالى

ود المطامير
20-11-2011, 07:15 PM
قلت لى سعاد ماشة لندن بتين
محاسن لندن دى انا بعرفه كانت بتجى تشرب الجبنة مع عشة شمارات
وبعدين البنيه نار منقد وإسمها دائما على اللسان هع هع هع

mohd saeed magazoub
20-11-2011, 11:52 PM
نقطة تحول

_ لالا يمه ، أنا من يوم الليله لا بعوس ولا بحلب ولا برد المويه





13939

متابعين ومستمتعين

وعايزين نشوف اخر تحولات سعاد سيطرة

ود المطامير
21-11-2011, 12:06 AM
13939

متابعين ومستمتعين

وعايزين نشوف اخر تحولات سعاد سيطرة




يا سلاااااااااااااااام يا حبيبنا
والله عز الطلب
ويا ريت تدعم القصه بصور متل دى على الطول

الله يديك العافيه

Isam Hussien H
21-11-2011, 01:37 AM
متعك الله بالصحة والعافية .. ونسمع عنك كما سمعنا عن قامات سودانية في هذا الدرب ..

بنت الرفاعي
21-11-2011, 04:50 AM
:):):)


ما شاء الله.:)

من المتابعين بصمت أيضاً.:)


:):):)

ود المطامير
21-11-2011, 08:25 AM
متعك الله بالصحة والعافية .. ونسمع عنك كما سمعنا عن قامات سودانية في هذا الدرب ..
تسلم يا الحبيب

ربنا يديك العافيه

ود المطامير
21-11-2011, 08:27 AM
:):):)


ما شاء الله.:)

من المتابعين بصمت أيضاً.:)


:):):)




دكتورتنا

تسلمى والله

تسعدنا وتشرفنا متابعتك والله

isamzaki1978
21-11-2011, 09:47 AM
جنو:ها زميل ما سمعت خبر عن سعادة سيطرة
زميل : لا يا جنو يا ربى يسر ، ان شاء الله المانع خير
تكون فى مطرة فى الجزيرة وهواء
ان من اصبحت طالع فى راس البيت ازبط فى الاريل
ما عاوز يجيب لى سعادة سيطرة
مهترش : راس بيت شنو يا زميل انا من صباح الرحمن مشيت المدينة جبت الجاز لى بابور وجبت لى بطارتين بابور الحلة دا ما مضمون قلت لى الضمان كدا
لكن الظاهر فى هواء كتاحه فى الجزيرة المانعنا من سعاد سيطرة الليلة

الشمشار
26-11-2011, 06:05 AM
ود المطامير حضور باندهاش ومتابعه بشغف
تسلم ايدك

محمد الجزولى
29-11-2011, 10:54 PM
لكن الظاهر فى هواء كتاحه فى الجزيرة المانعنا من سعاد سيطرة الليلة
الظاهر عليها أمطار غزيره دي يا isamzaki
اين سعاد سيطرة يا حبيبنا ود المطامير...

ود المطامير
04-12-2011, 09:44 PM
على خشبة مسرح مدرسة القريه كانت ( سعاد ) كالورده وسط زميلاتها وهن يمثلن مسرحية
الأميره النائمه ، كن يتحركن على خشبة المسرح كالفراشات الملوّنه وجميع أهل القريه
يتابعون بشغف شديد ، وسعاد .. تتجول على خشبة المسرح بخفه ورشاقه وأشعة
القمر الفضيه تتكسر على محياها بدلال فزادته جمال على جمال بينما صوتها الملائكى
يتسرب إلى الدواخل كرنّة وتر ، مسرحيه رائعه لكاتب رائع وبطولة ريحانة القريه

كانت صيحات الإعجاب تنطلق والتصفيق الحاد يصم الأذن إذ كل ما يدور على خشبة المسرح
يثير الإعجاب ، أخرج حمدان الترزى حُقته الكبيره من جيبه وضربها بكوعه وراحة يده
وفتحها وملأ يده الشمال بالتمباك وألقى به فى فمه دفعة واحده وبلسانه كوّر سفته تحت مكان الأسنان
المتساقطه وميّل على جادين الجناينى وهمس له

_ حرّم أميره
_ هع هع هع ، كيفن ما أميره ؟ ماك شفت العمده جابتلو الهوا مع نسوانو ؟
_ هع هع هع هع ، حرّم قال لى الساعه الدار السلام ختّ ضراعها فوق صدرو خلتو يكابس للنفس
_ هع هع هع هع ، أسكت آزول خلنا نسمع

علا تصفيق حاد لإنتهاء المسرحيه وتقدمت ( سعاد ) على حافة المسرح وقالت بصوت جميل وقوى

_ آبائ وأمهاتى وأخوانى وأخواتى السلام عليكم ورحمة الله وبركاته
يسرنى ونيابةً عن معلماتى وأخواتى الطالبات أن أرحب بكم فى ليلتنا الثقافيه هذه والتى أقمناها
من أجل خدمة قريتنا ومناقشة مشاكلها وإحتياجاتها من خدمات وغيرها والآن ندعوكم لنستمع
لمديرتنا الجليله فى كلمه عن أحوال القريه

صفق الجميع وصعدت المديره على المسرح وتكلمت وأسهبت عن إحتياجات المدرسه بصفه خاصه
والقريه بصفه عامه ، ثم تلتها عدد من المعلمات وتحدثن فى شتى المجالات
ثم صعدت ( سعاد ) وقالت بصوتها الملائكى .. أن على أهلها الطيبين مواكبة العصر من أجل تطوير قريتهم
ويجب تكوين لجنه منتخبه من الجميع لأن زمن العمده والعموديه قد ولّى وأن عمدتهم لا هم له غير جمع المال
لنفسه والزواج كل عام

عندها صاح الجميع ، أيّا صدقتى ، حرّم كلامك صُح ، هييييييييييييييع عفيت منك آبت الفكى حرّم كلام الرجال ما قالوهو
كان كلامها قد مسّ شئ من حتى فى النفوس الشايله شيل من عمدتهم ففجرت كلماتها براكين خامده فى النفوس
فتصايح الجميع مؤيدين لها ولم يعارض إلا ود عوض الله اليد اليمنى للعمده فى القريه والذى أرسل صبى لتبليغ العمده
الذى حضر ووقف فى منتصف المصرح وصاح بالجميع

_ آخرتها والله بقيتو تسمعو كلام النسوان والبنيات ؟ حرّم العموديه ورثتها أب عن جد
وبعدين أنا مالى ؟ قصرت فى شنو ؟ ما جبت ليكم المويه
_ موية شنو يا عمده ؟ حرّم يوم جات إنتا ذاتك ماك كنت عارف
_ هووووى يا ود البلوله صم خشمك دا ، أنا العمده
_ خلاص آلقذافى
_ وبعدين تعالو هنى ؟ ما كلكم شغالين فى خيرى ؟
_ خيرك ؟ على الطلاق مكاوشو سااااااااااااى
_ هوووووى يا بله ، يعنى بقيت فى صف النسوان ؟ أصبر لى
_ يا عمده عليك الله أنزل خلينا نسمع الكلام المنو الفايده
_ الفايده بقت عند البنوت ؟
_ البنوت عاد ما بسببهن دار السلام قربت تفطسك
_ ها ها ها

ضج الحاضرين بالضحك وحصل هرج ومرج ونزل العمده وهو يسب ويلعن وصعدت ( سعاد ) المسرح
وبلغه سليمه وبسيطه وجميله شرحت لهم ما عليه فعله وبينت لهم الفوائد التى سوف تحل على القريه
فسعدوا جميعا وإتفقوا على أن يقام لقاء جامع يوم الخميس من أجل بداية الشروع فى إقصاء العمده
وإنشاء لجنه تكون مهمتها تنمية القريه

وتفرق الحضور وإسم ( سعاد ) يتردد على ألسنة الجميع

ريمون
04-12-2011, 09:50 PM
على خشبة مسرح مدرسة القريه كانت ( سعاد ) كالورده وسط زميلاتها وهن يمثلن مسرحية الأميره النائمه ، كن يتحركن على خشبة المسرح كالفراشات الملوّنه وجميع أهل القريه يتابعون بشغف شديد ، وسعاد .. تتجول على خشبة المسرح بخفه ورشاقه وأشعة القمر الفضيه تتكسر على محياها بدلال فزادته جمال على جمال بينما صوتها الملائكى يتسرب إلى الدواخل كرنّة وتر ، مسرحيه رائعه لكاتب رائع وبطولة ريحانة القريه كانت صيحات الإعجاب تنطلق والتصفيق الحاد يصم الأذن إذ كل ما يدور على خشبة المسرح يثير الإعجاب ، أخرج حمدان الترزى حُقته الكبيره من جيبه وضربها بكوعه وراحة يده وفتحها وملأ يده الشمال بالتمباك وألقى به فى فمه دفعة واحده وبلسانه كوّر سفته تحت مكان الأسنان المتساقطه وميّل على جادين الجناينى وهمس له _ حرّم أميره _ هع هع هع ، كيفن ما أميره ؟ ماك شفت العمده جابتلو الهوا مع نسوانو ؟ _ هع هع هع هع ، حرّم قال لى الساعه الدار السلام ختّ ضراعها فوق صدرو خلتو يكابس للنفس _ هع هع هع هع ، أسكت آزول خلنا نسمع علا تصفيق حاد لإنتهاء المسرحيه وتقدمت ( سعاد ) على حافة المسرح وقالت بصوت جميل وقوى _ آبائ وأمهاتى وأخوانى وأخواتى السلام عليكم ورحمة الله وبركاته يسرنى ونيابةً عن معلماتى وأخواتى الطالبات أن أرحب بكم فى ليلتنا الثقافيه هذه والتى أقمناها من أجل خدمة قريتنا ومناقشة مشاكلها وإحتياجاتها من خدمات وغيرها والآن ندعوكم لنستمع لمديرتنا الجليله فى كلمه عن أحوال القريه صفق الجميع وصعدت المديره على المسرح وتكلمت وأسهبت عن إحتياجات المدرسه بصفه خاصه والقريه بصفه عامه ، ثم تلتها عدد من المعلمات وتحدثن فى شتى المجالات ثم صعدت ( سعاد ) وقالت بصوتها الملائكى .. أن على أهلها الطيبين مواكبة العصر من أجل تطوير قريتهم ويجب تكوين لجنه منتخبه من الجميع لأن زمن العمده والعموديه قد ولّى وأن عمدتهم لا هم له غير جمع المال لنفسه والزواج كل عام عندها صاح الجميع ، أيّا صدقتى ، حرّم كلامك صُح ، هييييييييييييييع عفيت منك آبت الفكى حرّم كلام الرجال ما قالوهو كان كلامها قد مسّ شئ من حتى فى النفوس الشايله شيل من عمدتهم ففجرت كلماتها براكين خامده فى النفوس فتصايح الجميع مؤيدين لها ولم يعارض إلا ود عوض الله اليد اليمنى للعمده فى القريه والذى أرسل صبى لتبليغ العمده الذى حضر ووقف فى منتصف المصرح وصاح بالجميع _ آخرتها والله بقيتو تسمعو كلام النسوان والبنيات ؟ حرّم العموديه ورثتها أب عن جد وبعدين أنا مالى ؟ قصرت فى شنو ؟ ما جبت ليكم المويه _ موية شنو يا عمده ؟ حرّم يوم جات إنتا ذاتك ماك كنت عارف _ هووووى يا ود البلوله صم خشمك دا ، أنا العمده _ خلاص آلقذافى _ وبعدين تعالو هنى ؟ ما كلكم شغالين فى خيرى ؟ _ خيرك ؟ على الطلاق مكاوشو سااااااااااااى _ هوووووى يا بله ، يعنى بقيت فى صف النسوان ؟ أصبر لى _ يا عمده عليك الله أنزل خلينا نسمع الكلام المنو الفايده _ الفايده بقت عند البنوت ؟ _ البنوت عاد ما بسببهن دار السلام قربت تفطسك _ ها ها ها ضج الحاضرين بالضحك وحصل هرج ومرج ونزل العمده وهو يسب ويلعن وصعدت ( سعاد ) المسرح وبلغه سليمه وبسيطه وجميله شرحت لهم ما عليه فعله وبينت لهم الفوائد التى سوف تحل على القريه فسعدوا جميعا وإتفقوا على أن يقام لقاء جامع يوم الخميس من أجل بداية الشروع فى إقصاء العمده وإنشاء لجنه تكون مهمتها تنمية القريه وتفرق الحضور وإسم ( سعاد ) يتردد على ألسنة الجميع
حمد الله علي السلامه ..
وتحيه خاصه لي سعاد وقول ليها مشتاقين ..

isamzaki1978
05-12-2011, 03:24 AM
مسرحيه رائعه لكاتب رائع وبطولة ريحانة القريه

كانت صيحات الإعجاب تنطلق والتصفيق الحاد يصم الأذن
_ هع هع هع هع ،

وإتفقوا على أن يقام لقاء جامع يوم الخميس من أجل بداية الشروع فى إقصاء العمده
وإنشاء لجنه تكون مهمتها تنمية القريه

وتفرق الحضور وإسم ( سعاد ) يتردد على ألسنة الجميع

عاوزين سعاد سيطرة
عاوزين سعاد سيطرة
عاوزين سعاد سيطرة

يا اللخو عليك الله ما تتأخر
نحن يوم الخميس من العصر قاعدين فى البنابر
راجيين انشاء اللجنة بتاعت تنمية القرية

عنكوليب
05-12-2011, 03:51 AM
لا بالله اقبضن بناتك ديل قوي ..
متابعين ..
بالمناسبه المشاط الفي الصورة دي بشبه مشاط هناية الجننت الجماعة يوم الاحتفال ..

اقــــــــــــــــــــــول ؟؟؟؟؟

تغريدا
07-12-2011, 08:56 AM
حضور وأن كان متأخراً رووووووعة حد الدهشة وأمتاع بلاحدود فهلا سمحت لى بأخذ مقعدى واللحاق بركب روعة الحضور هنا
كن بود وسعادة غامرة دوماً ود المطامير

ود المطامير
10-12-2011, 09:52 AM
حمد الله علي السلامه ..
وتحيه خاصه لي سعاد وقول ليها مشتاقين ..
أهلييين ريمون
وسعاد كمان مشتاقه ليكم

ود المطامير
10-12-2011, 09:53 AM
عاوزين سعاد سيطرة
عاوزين سعاد سيطرة
عاوزين سعاد سيطرة

يا اللخو عليك الله ما تتأخر
نحن يوم الخميس من العصر قاعدين فى البنابر
راجيين انشاء اللجنة بتاعت تنمية القرية
أنا قاعد يا اللخو
لكن بنات أفكارى هن المافى
هع هع هع

ود المطامير
10-12-2011, 09:53 AM
اقــــــــــــــــــــــول ؟؟؟؟؟
هع هع هع هع

ود المطامير
10-12-2011, 09:55 AM
حضور وأن كان متأخراً رووووووعة حد الدهشة وأمتاع بلاحدود فهلا سمحت لى بأخذ مقعدى واللحاق بركب روعة الحضور هنا
كن بود وسعادة غامرة دوماً ود المطامير

أختنا تغريدا
حضورك فى أى وقت شرف لينا
ويشرفنا إنك حضور

تسلمى والله

isamzaki1978
10-12-2011, 09:57 AM
أنا قاعد يا اللخو
لكن بنات أفكارى هن المافى
هع هع هع

انت ابدأ اكتب يا اللخو وبعدين البنات بجو براهم

ود المطامير
10-01-2012, 07:39 PM
فى صباح اليوم التالى ليوم الإحتفال الباهر
كان العمده لا يثبت فى مكان واحد ، كثير الحركه والتوتر والغضب بادى عليه
كان يزجر نسائه وأولاده بسبب وبدون سبب وأحيانا يطنطن ، والله دى آخرتها
العموديه وارثنها أب عن جد تجى البنيه أم عوينات دى تقلب على ناس الحِله ؟
ثم توقف فجأه لدقائق وبعدها صاح
فى أحد أبنائه وأمره بأن يذهب الزريبه ويختار خروف سمين ويأتى به وقد كان
وأمر نسائه بعمل وليمه فاخره هو يقول لهن

_ الخروف دا عاوزكن تعملنو لى فطور عريس عدييييل كدا
_ أجئ ؟ المناسبه شنو آلعمده ؟
_ المناسبه السكرى الجاك دا يا دار السلام ، عاوز أحتفل بيهو أكان يقرضك سرييييع ، مالك ومال المناسبه حمريهو وبس
_ ما تتكلمن ، مالكن ؟ صبت فيكن مطره ، بس خاتاتنى للهجر بس
_ هووووى يا دار السلام لمى لسانك والخروف دا جت تختنو فى فد صينيه ولا زول ما يكد منو عضم

بعد فتره كان الخروف عباره عن صحون مليئه بالطبيخ والمشاوى والمراره على بكسى العمده الذى
يشق الجناين ، وتحت أكبر شجره ذات ظل وارف إستدعى العمده عماله الأربعه وهم قد وفدوا من خارج القريه
للعمل فى بستان العمده ، دعاهم وجلسوا حول الصنيه العامره وهم فى غاية الدهشه ، لعلمهم التام ببخل العمده الشديد

_ إتا آحسب الرسول ؟
_ أيّا
_ العمده دا الليله خبارو ؟
_ علمى علمك
_ باقيلى العمده ناويلو على شيتنا كبييير
_ كيفن ؟
_ دا يضبح جنا من جنياتو ولا يضبح خروف من خرفانو ، باقيلك بدور يكلنا ليهو لله ساااى كدا ؟
_ والله خوفتنى ، يعنى ما ناكلو ؟
_ لا لا ، ألهط ، ألهط وبالطريقه الصاح ونشوف آخرتا ، علا حرّم ورا الشيه دى سر
_ هااا ناس قولو بسم الله ورحكاكم اللكل ما يبرد

هجمو على الطعام بعد أن سمعوا العمده يأمرهم بالأكل ولم تمر فتره طويله إلا وكانت الصحون بيضاء تتلألأ
وفى الإتكاءه مع أكواب الشاى قال لهم العمده

_ إنتو ناسى وحبايبى وواقفين معاى أكتر من أهلى وأهل قريتى وأنا أحببتكم لله ساااى بدليل إنى شغّلتكم معاى
_ تسلم
_ تسلم
_ تسلم
_ تسلم
_ أهااا .. قلت لنفسى والله أنا مقصر معاكم وقلت أشوفكم أكان محتاجين لشئ ؟
_ تسلم يا عمده خيرك مغرقنا
_ أهاا .. أنا بدوركم فى خدمه

نظر حسب الرسول إلى أبوسيخه وكأنه يقول له .. ما قلت ليك
_ أيّا يا العمده قرضك مقضى تب ، شن عاوز ؟
_ العاوزو أقولو ليكم عاوزكم تحلفو كلكم طلاق هسى دى قبلما تسمعوهو إنو يكون سر بيناتنا
_ على الطلاق سرك فى بير
_ على الطلاق ذى الكأنو ما قلت لينا شئ
_ على الطلاق سرك مدفون
_ حرّم .. سرك فى فير
_ لا لا يا حسب الرسول أحلف بالطلاق ذيهم ، حرّم دى ضعيفه ياخ
_ على الطلاق يا العمده سرك حدو الضل دا بس
_ عفيت منكم والله ... أهااا ... بدوركم تكتلو لى سعاد وكل واحد بديهو بقره ونعجه وغنمايه
_ أااع ؟
_ منو ؟
_ ورررووووك
_ سعاد السمحه ؟
_ أيّا سعاد السمحه ، تختفوها وتجيبوها الجنينه دى وتكتمو نفسها وتدفنوها تحت غابة الكترولا من شاف ولا من درى
_ سعاد ؟
_ أم عيون ؟
_ القمره ؟
_ سعاد السمحه ؟
_ اااى سعاد ، مالكم بقيتو تفنقلو فى عيونكم ؟
_ حرّم آلعمده دى أكان لمستها سااااى بتكهربنى
_ أكتم نفسها ؟ إن شاء الله يتكتم نفسى أنا
_ يا عمده ، دى نشيل ونديها من عمرنا
_ إنتا يا العمده قلتا لينا أكتلو سعاد وبتدى كل واحد فينا بقره ونعجه وغنمايه صُح ؟
_ أيّا
_ والله يا العمده أكتل جناى ولا أكتل بت ود الفكى علا أكان هى قالت لى أكتل العمده حرّم سكينى دى إلا تاباك
_ ها ناس دا كلام شنو دا ؟
_ كلام شنو كيفن ؟ جيت شايل لينا ضبيحه وعاوزنا نكتل ليك زينة البنات
وبت الراجل الكلس ، حرّم لما إنتا بتجوعنا نحنا بناكل من دكان أبوها حساب مفتوح وأصلو ما حصل
طالبنا بالقروش لامن نديهو برانا ، سعاد السمحه ؟ نكتلها نحنا ؟
_ خلاص أكتلو أبوها
_ هووووى يا العمده ، الظاهر إنتا البدور الكتل
_ قلتو كدى ؟ خلاص من يوم الليله شوفو ليكم شغل فى مكان تانى
_ أحسن وهدا دربنا نكلم ناس الحله بكلامك
_ لكن إنتو ما حلفتو طلاق
_ طلاق ؟ حرّم دا سبب جابو لى الله من السما ، أصلو أنا .. نفيسه .. دى زهجان منها للطيش
_ لا لا يا أبسيخه ، أنا حلفت ليهو وقلت ليهو على الطلاق سرك حدو الضل دا بس
يعنى نلم ناس الحله جوووه ضل الشدره دى وأكلمهم وطلاقى ما بقع
_ هااا ناس هووووى بخليهن ليكم بقرتين بقرتين
_ ونكتل سعاد ولأ أبوها ؟
_ سعاد
_ سعاد السمحه ؟
_ أم عيون بتبلع جم ؟
_ زينة البنات ؟
_ القمره ؟
_ أيّا ، أيّا
_ ها ناس قمو نقع بالعمده دا البحر

وركب العمده عربته البكسى يقودها بسرعه جنونيه وهو يسب ويلعن فى نفسه وسعاد ونسائه وجميع أهل القريه

نزار احمد كوارتي
10-01-2012, 10:19 PM
أرح أبقي مارق, بُكره الخميس

ود المطامير
10-03-2012, 01:20 AM
نواصل بعد إنقطاع

http://im27.gulfup.com/2012-03-10/1331374764211.jpg (http://www.gulfup.com/show/X4ggd76e8cn)

الباشا السوداني
10-03-2012, 01:34 AM
وحات الله كان عرسوها لي اكون ماقصروا تب

مشتاقين ياجنى

ود المطامير
10-03-2012, 02:04 AM
النيل الأزرق هو شريان الحياه لكل القرى التى نبتت على ضفافه
وهو ينساب متعرجا وسط الخضُره فى مشهد يأخذ بالألباب روعةً وجمال
والجمال كل الجمال على ضفته حيث البساتين الغناء وأشجار الليمون والتمر هندى الباسقه
والمانجو والمساحات الشاسعه التى تغطيها جداول الخضار فى شكل هندسى بديع
والقمارى والعصافير المغرده والفراشات الملونه تزيّن الأجواء بجمال باهر
قبل الغروب والشمس ترسل أشعتها الذهبيه ، كانت بطلتنا ( سعاد ) قد نزلت إلى النيل
فى خفة الغزال ، وكانت تمر مع صديقاتها فى الدروب الضيقه المتعرجه بين الأشجار
كن يحملن على رؤوسهن أوانى الماء ، وكن يسمعن صفير المعجبين ينطلق من بين الأشجار
أو يأتيهن من حيث لا يرن مصدره فينظرن لبعض ويتبادلن الإبتسامات
على شاطئ النيل كان المرح البرئ ، لعبن ردحا من الزمن ومن ثم ملأن أوانيهن وخطون فى درب العوده
كان قدومهن فى خفة الغزال ولكن عودتهن مع ثقل الماء على الرؤوس والدروب المتعرجه
التى تعلو وتنخفض جعل مشيتهن على أقل من مهل وهن يمسكن الإناء بيد واليد الأخرى تتجدع بدلال
والأجساد المرنه تتنّى وتتلوّى وتتقسم ، والمفاصل كلها فى حالة تشغيل كامل
و بطلتنا تسير فى منتصف الصف الجميل وهى أكثرهن تجدع وتلوى وتقسم وعند ما أصبحن
فى وسط احواض الخضار المنبسطه إنسند ود البلوله بخاصرته على مقبض طوريته
وقال لصاحبه حاج أبو زيد
_ أبو زيد آخوى ، خليك من قليع البصل أرفع راسك وشوف الغزال الوارد
إلتفت أبو زيد ونظر إلى حيث أشار صاحبه وقال له
_ هلا هلا ، حرّم قدله تحتاجلها نمّه كاااربه
_ نم ، دوبى
_ تنوم ما تقوم ، دحين ديك ما إياها السمحه أم عيون كبار؟
_ أيّا
_ باقيلك آود البلوله لو كلمت أبوها ود الفكى ما بدينى ليها ؟
_ هووووى يا حاج أبوزيد ، دنقر أقلع بصلك ولأ عاوز اللورى حقك يقلع عينيك ؟
_ هه هه هه هه
على مشارف القريه تفرقن الصبايا كلن منهن على بيتهن وعند ما إصبحت ( سعاد )
على مقربه من دارهم مرت بها عربه ليست من عربات القريه تحمل لوحة إفراج مؤقت وتجاوزتها بأمتار ثم توقفت
وعادت إلى الخلف وتوقفت بقربها وأطل شاب وسيم الطلعه برأسه من نافذتها وتمعنها
وتأملها ، كانت قطرات المياه التى تراشقت من جراء مشيتها تنساب علي عنقها وخديها
كالندى على الورده ، أشاحت بوجها وأرادت الدوران من خلف العربه ولكن الشاب الوسيم باغتها بقوله

_ وقفتى قلبى والله

إبتسمت فى حياء وأسرعت فى مشيتها ودخلت منزلهم وسكبت الماء فى الزير
ولكن لم تنتبه أن معظمه كان ينهمر خارجه

ود المطامير
10-03-2012, 02:10 AM
وحات الله كان عرسوها لي اكون ماقصروا تب

مشتاقين ياجنى
هع هع هع
العمده حالف كان عرسها زول غيرو بكتلو ;)
الباشا وحات الله قلبى قال فررررررررر لشوفتك

ياخ الشوق ما ليهو حد

isamzaki1978
10-03-2012, 09:22 AM
قلت لى نص الموية فى الواطه
،،،،
وفى انتظار الحلقات القادمه

ود المطامير
06-01-2013, 11:02 AM
الحبايب جت عليكم سلااام

بعد طول إنقطاع نعود ونواصل إن شاء الله

ياسر عمر الامين
06-01-2013, 11:11 AM
الف ومليون مرحب بالحبيب ود المطامير وفى انتظار الكثير من المسلسلات الممتعه بقلمك الرشيق...

ريمون
06-01-2013, 11:30 AM
ايوه بالله اشتقنا لي سعاد ..

ود المطامير
06-01-2013, 06:41 PM
الف ومليون مرحب بالحبيب ود المطامير وفى انتظار الكثير من المسلسلات الممتعه بقلمك الرشيق...
وأنا أخوك والله
وعشان كلامك السمح دا
ليك على أجيب ليكم صاحبى عاشق الطرح هنى دا
وهو ودينى بنجر قصايد وحات أمى نقار الخشب ما يلحقو ;)

ود المطامير
06-01-2013, 06:42 PM
ايوه بالله اشتقنا لي سعاد ..
ههههههههههههههههههههه

يديك العافيه والله

mahagoub
06-01-2013, 08:13 PM
سعاد وما ادرك ما سعاد

سعاد دى منو ؟؟

ود المطامير
06-01-2013, 09:06 PM
إهتز قلب الجميله وتحركت فيه تروس عميقه لم تحركها همسات شباب القريه
فهذا وافد جديد وشاب وسيم الطلعه لمحها بطرف عين فعاد أدراجه معلنا لها
بكل صراحه بأنها قد أوقفت دقات قلبه ، كانت لحظه خاطفه ولكن كان لها فعل السحر
وشعرت للحظه كأن خيط من وهج يمر أمام ناظريها
فى مساء اليوم التالى إجتمع أهل القريه عن بكرة أبيهم فى ساحة ميدان الكره من أجل
إختيار عمده جديد للقريه بديلا للعمده المزواج الجشع ، ودارت مناقشات حامية الوطيس
من أجل ترشيح من يرونه مناسبا لمنصب العمده ولأنهم بسطاء فى كل شئ كان نقاشهم
معظمه يبدأ ب على الطلاق فلان دا راجل كلس وحررررم فلان داك العموديه مفصله عليه
جلابيه عدييييل كدا .. كان النقاش متداخلا والأصوات مرتفعه وكم واحد يتكلمون فى وقت واحد
وكاد الموقف أن يتأزم عندما بدأ العمده وأقربائه يثيرون جلبه ويحاولون إفتعال خناقه ينتهى على إثرها
الإجتماع وكادت الإمور أن تفلت ولكن .. فى خطوات رشيقه توجهت سعاد تشق الصفوف
ووضعت كرسيا أمام الجميع وصعدت عليه ورفعت يدها تطلب من الجميع السكوت
وفى غمضة عين ران الصمت المطبق .. وكل العيون تلمع وهى تنظر لذات الحسن الطاغى
صمطت ( سعاد ) لحظات وهى ترى العيون التى يشع منها بريق مختلف الألوان
ثم قالت فى صوت ملائكى تسرب على أضواء النجوم إلى مسامعهم كالموسيقى

_ أهلى وأحبابى وفخرى وعزى السلام عليكم ورحمة الله
فردوا جميعا السلام كأنهم طلاب فصل يردون السلام على معلمهم ثم بدأت تحدثهم بلغه سهله
بسيطه وجميله تنم على مقدره فائقه على مخاطبة عقول خبرت خباياها ومقدرتها على التلقى
بدأت حديثها بأن لابد لهم من التنظيم .. أن يكون كل شيئا منظما وأن يكون الإجتماع بإدارة
عبدالرحمن المعلم ويوسف التمرجى ومن يريد الحديث فاليرفع يده وعلى الآخرين عدم مقاطعته
ودرا للمشاكل والفتن إقترحت عليهم أن يتم إختيار شخصا يتم ترشيحه منافس للعمده ومن يفوز
منهما يرضى به الجميع . ونزلت من على الكرسى وسط تصفيق حاد لم يحظ به أحد فى القريه قط
لحظتها أخرج والدها حقته وضربها بكوعه ورأس أصابعه وفتحها ووضع منها أكبر سفّه فى حياته
من شدة الغبطه والسرور وهو يرى ريحانته فى البدايه يصمت لها الجميع وفى النهايه تلتهب أكففهم
بالتصفيق لها .. وفى جانب النساء كانت والدتها تجلس وسط صاحباتها وقلت لهن بفخر شديد
_ ترباية يديا وحات عينيا
فى جانب الشباب كانت العيون تلمع .. تلمع وهى تلتهم من على البعد ريحانة القريه وعطرها الفواح
دقائق وهدأت الأصوات المؤيده على إقتراحها ونهض أستاذ عبدالرحمن ويوسف التمرجى لإدارة
الإجتماع وبمجرد ما أعلن أستاذ عبدالرحمن فتح باب الترشيح لمنافس العمده رفع بله طاحونه يده للحديث
فأمره يوسف التمرجى بالحديث وقال
_ أنا برشح ود الفكى عشا............
وقبل أن يكمل كلامه وقف الجميع وهم يهتفون فى وقت واحد مؤيدين له وموافقين على كلامه
وبدأ الجميع يصعد على الكرسى ويعدد فى حسنات ( أبوسعاد ) وإقرورقت العيون بالدموع عندما
تكلمت حاجه زينب أم اليتامى وقالت لهم .
_ أنا وحات الله الخلقنى ود الفكى دا أديهو نظرى مش صوتى وبس ، وحات الله الخلقنى
لو ما ود الفكى ودكانو وليداتى ديل كانو زمااان ماتو ، أجيييي يا يمه صلاة النبى على أبوالسمحه
أمانة الله بجيب لى الدقيق والسكر والحليب لاعندى ويحلف ما يشيل قرش أحمر
ونظرت للعمده وقالت لهم .. مش ذى الشين داك لاقيتو جمب الشفخانه شايله ولدى وحمتو
ذى قدرة الفول وماشه لاعند مدنى قلتيلو بدورلى كم جنيه لامن أجى صاده وحات الله الخلقنى
الساعه الحدر لى وقال لى .. وكت ماك قادره عليهم ولدتيهم لشنو ؟ لامن قلبى وقف
عاد لاكن أبوالسمحه أمانة الله بقيت أخجل لمن أشترى منو شان برفض يشيل منى القروش
وبقول لى ... عيب .. دا المرحوم الله يرحمو أخوى الما ولدتو أمى
ونزلت ونزلت قطرات الدموع من العيون فى الوقت الذى إنسحب فيهو العمده

وهو يسب ويلعن فى السمحه وأبوها ونسائه وأهل القريه أجمعين .

ود المطامير
06-01-2013, 09:09 PM
سعاد وما ادرك ما سعاد

سعاد دى منو ؟؟
هع هع هع

يا ريس ، سعاد دى هى رمز لكل جميلات ريفنا السودانى الجميل

ريمون
07-01-2013, 02:38 AM
عودة سعاد اعادت الجمال ..
متابعيييييييييييييييييييين ..

ود المطامير
13-01-2013, 08:16 AM
عودة سعاد اعادت الجمال ..
متابعيييييييييييييييييييين ..
يديك العافيه
النت حقى قطعوهو لى وهسى جارى خط مؤقت من البنغاله عمالى
وسعاد حلفت بالتقطعها ما تواصل تصوير الفلم حقها بالنت حق البنغاله
قالت ريحتو بصل بصل ;)

mahagoub
13-01-2013, 08:13 PM
يعنى سعاد طلعت
بمية راجل

ود المطامير
24-08-2014, 09:53 AM
غدا إن شاء الله نواصل

سعاد سيطره

الملكة اسماء ( ام محمد )
28-08-2014, 02:49 AM
ود المطامير


غدا دي كانت بتاريخ 24 اغسطس الجاري



غدا إن شاء الله نواصل

سعاد سيطره

http://www.wadmadani.com/vb/showthread.php?t=43407&page=3

ود الجعلي
28-08-2014, 09:51 AM
ود المطامير للعلم فقط

متابعين وبشغف

دمت بعافية

عاشق الترحال
28-08-2014, 11:47 AM
دائما كعهدي بك مبدع في كتاباتك وتصويرك المكاني
لقد عشت كل الادوار تارة تجدني استرق النظر من عند تلك المسطبة وتارة تجدني العمدة وتارة تجدني ذاك الشاب الذي
اتي بفارهتة افراج مؤقت ومابين كل تلك الادوار كان الجمال
وكنت انت..
واصل يا حبيب قلبي وصديق حرفي سردك البسيط الماتع فأنا انتظرك هنا حيث يتدفق مدادك ويشكل لنا لوحة سريالية يصعب علي بابلو بيكاسو رسمها. .

ود المطامير
03-09-2014, 07:38 AM
ود المطامير


غدا دي كانت بتاريخ 24 اغسطس الجاري




http://www.wadmadani.com/vb/showthread.php?t=43407&page=3
ههههههههههههههههههههه

حولااا ، يعنى بقت ذى حكاية بكره السفر مجان ؟ ;)

ود المطامير
03-09-2014, 07:40 AM
ود المطامير للعلم فقط

متابعين وبشغف

دمت بعافية
حبيبنا ود الجعلى

تسلم والله وربنا يديك لى كل الخير

ود المطامير
03-09-2014, 07:41 AM
دائما كعهدي بك مبدع في كتاباتك وتصويرك المكاني
لقد عشت كل الادوار تارة تجدني استرق النظر من عند تلك المسطبة وتارة تجدني العمدة وتارة تجدني ذاك الشاب الذي
اتي بفارهتة افراج مؤقت ومابين كل تلك الادوار كان الجمال
وكنت انت..
واصل يا حبيب قلبي وصديق حرفي سردك البسيط الماتع فأنا انتظرك هنا حيث يتدفق مدادك ويشكل لنا لوحة سريالية يصعب علي بابلو بيكاسو رسمها. .
حبيب قلبى والله

تسلم لى إنت يا راقى

ونواصل وطبعا ذى ما إنت عارف

التأليف نجر أخدر وعلى الهواء مباشره ;)