الشعب يريد إسقاط فاتورة المويه

[معز عوض]

سؤال يا شباب:
مُش السودان فيهو أطول نهر في العالم !!!
(يعني فيهو مويه)
ومُش عندنا ليهو فروع أكتر من فروع بنك الخرطوم!!!!
(يعني أي فرع فيهو مويه)
ومش عندنا مياه جوفيه تكفي الدنيا دي كلها !!!!!
(وبرضو فيها مويه)
ومش عندنا كمان بحر أحمر قدر كدى!!!
(يعني بي جاي وجاي ممكن نشرب منو مويه)
ومُش الواطه عيد ؟؟؟؟
ومُش في العيد الناس بتهدي الناس حاجات سمحه ؟؟؟؟؟؟؟؟؟؟؟؟؟

إتخيلو معاي:
بقت فاتورة المويه (موية الله والرسول - المويه الزرقا دي) بقت مربوطه بي فاتورة الكهرباء
يعني لو ما دفعت قروش المويه ، ما بتشيل كهرباء ...
بس لانو نحن في الجزيره مساكين ، يحاقرو بينا زي ما دايرين
عطشو مشروع الجزيره وجففوهو ، وشكلهم ناويين يعطشون نحن برضو ويجففو حلوقنا
النيل الأزرق ده يجي مار بينا .. بدل نشرب مجاني ويعتذرو لينا إنو ما قدرو يطعمو بينا ، يقولو ندفع مع الكهرباء فاتورة المويه
يا ناس الجزيرة:
(من يهن يسهل الهوان عليه)
كفايه بعد كدى نوم ..
يا ربي نهر النيل ده دايرنو شال يلبسو في العيد ؟؟؟؟
يا ناس والله نحن عندنا نيل قدر الضربه
ما قلنا ليكم طعموا لينا ، بس دايرين مويه ساده
صعبه دي !!!!!!!!

ليبيا (الراجله دي) مافيها ولا بلاعه (آسف للفظ) ، بس برضو مستمتعين بي المويه ، زمان وهسه وعملو نهر كامل صناعي ..
الواطه عيد ، بدل ما تخلونا علي أسعار الخرفان البقت أغلى من لعيبة الكوره دول ، تزيدو لينا المغس !!!!
(نحن ناقصين)
أحيييييييييييييييييييييييييييييييييييييييييييييييي يييييييييييييييييي ..

[الجندي المجهول]

تحياتي لك عزيزي واخي معز عوض

وبصراحة

ما يريد الشعب اسقاطه كثير

واولها

غلاء المعيشة



لقمة العيش اصبحت صعبة


وقلنا نصبر ونحلها مع (الحكومة) خطوة خطوة
لقينا الحكومة كل يوم بتبتعد الاف الخطوات

تخريمة : علم السنغال

[خالد أحمد الصول]

قمنا بإيراد الخبر الذي يقول أن المجلس التشريعي في ولاية الجزيرة يتداول الان ليجيز قانون دمج فاتورة المياة مع فاتورة الكهرباء ... ثم بعد فترة قلنا أنه قد تمت إجازة القانون و أصبح قيد التنفيذ ... ثم أوردنا رأينا و ما ستؤل عليه المسألة ... ولا حياة لمن تنادي ... و أخرها فقد نعتنا بالذين يهرون الناس بالكذب و الترهات ولايروا إلا الاشواك في الورود ...
- الان فإن تحصيل فاتورة المياه مع فاتورة الكهرباء قد اصبح قانونا نافذا لا مفر منه يجب علي الناس مراعاة الاتي:
() أولا: مسألة نواب الدوائر الذين تم ترشيحهم من قبل الناس عن لماذا لم يقفوا ضد هذا القرار أو أضعف الايمان كان عليهم الرجوع الي دوائرهم لاستشارة الناس في هذا الامر
() ثانيا: بما أن فاتورة المياه أصبحت تحصل من سكان القري فلابدا لهيئة المياه أن تقوم بصيانة كل التوصيلات بالقري و تحديثها و إكمال الناقص منها و إرجاع القيمة لمن قاموا بشراء التوصيلات علي حسابهم الشخصي
لابد أن تكون المياه في الريف و القري لمدة 24 ساعة كما في المدينة دون توقف
لابد من أن تكون الهيئة مسؤلة عن المياه و ما يترتب عليها من صيانة و إمداد حتي تدخل المنازل

ألا هل بلغت ... اللهم فأشهد

[معز عوض]

والله يا أستاذ في ناس كلمة (ماسوره) دي ما سمعو بيها إلا بعد ما جاء وارغو للمريخ - عذراً للمريخاب - ..
بمعنى إنو ماعندهم ولا ماسوره في البيت ، حتة لمبه ورادي بس
وفي قرى كتيره ما فيها ولا خرطوش مويه ..
وبي غادي تلقى النيل (يدشأ) من المويه الكتيره ، لكن النواب بتعاين الـ................. نعمل ليهم شنو !!!
ويعترضو كيف ، طالما عندهم موتور في البيت وكهربتم بدفعوها من حقنا .

[أبوربا]

سؤال للجميع:
تم ربط الموية بالكهرباء...خلاص عرفنا ونفذنا
ماذا عن البيت الفيلو عدادين او ثلاثة...
البيت أبو سايفن فاتورته 33 جنيه كيف يطبقون ذلك....والكمبيوتر مبرمج على 15جنية
ول هذه أخطاء يمكن السكوت عليها لان الداخل اكبر من المتوقع...
والغريب غلى الرغم من كذا نشوف زحمة في مكاتب الكهرباء وعناء وطوابير يؤؤؤ...

[عزيز فزع]

أحييك أخى معز عوض وأحب أن أعقب على فاتورة الموية بالقليل أنا شخصيا لاأمانع من ربط فاتورة الموية بالكهرباء
لكن وجهة نظرى فى فاتورة الموية الشهرية بدون عداد ماء يعنى البيت الصغير والكبير واحد وحتى البيت الصغير اذاكان لديه سايفون وضعت له ضوابط الفاتورةالشهرية درجة أولى يعنى 32000أى32جنيه مع العلم هنالك بيوت وكانها سفينة نوح بل والمواسير مكسرة والمياه فى الشارع لاحسيب ولا رقيب طالما الايجار شهرى10جنيه وهذا نحن فى القرن الواحد والعشرون واذا صرفت مليون لترمكعب ماء أوصرفت 1000 لتر مكعب ماء السعر واحد أتمنى من الجهات المسئولة أن تنظر لهذا الفارق فى الماء وأقول أنا فى السعودية بدفع للموية شهريا ريالين وفى المكى وعلى النيل بدفع 32جنية(32000)والله المستعان أخوكم/عبدالعزيز عبدالقادر السمانى فزع

[أبوربا]

قرأت اليوم بالجرائد أن ولاية الخرطوم ربطتت فاتورة المويه مع الكهرباء بس بشكل أفضل من ولاية الجزيرة حيث تركت حرية الدفع للمواطن منذ بادية الشهر وحتى نهايته بخلاف ولايتنا التي تصر على اخذ فاتورةالموية قبل الكهرباء...لله درك ياولاية الجزيرة...