مشاهدة النسخة كاملة : مجادعه
الشمشار
27-11-2011, 01:21 AM
سلامات
صديقي بشري ابراهيم الشاعر شاعر البطانه المعروف ومن قصائده المشهوره قصيده ام شوايل وقصيده عيد ميلاد وقصيده بوش الخزين كتب لي رساله عبر الجوال قال لي فيها
ان وقفت عديله وان مشت مبرومه
وان قدلت معجنه من وسط مقسومه
وان قعدت موهطه
وااااااااااااا قساوه القومه
مبرومه حشاء وعجوه محس قدومه
فكتبت له ردا
سمحه زولتي من دون البنات معلومه
آه من ضميره في القعده ولا القومه
ياريتني في بحر هواها اغرق من فد عومه
بهواها وبدوره وبي شعري اكبر كومه
ياست الحسان شوقك بسوي الكومه
فكتب لي
اوعك من حلاتا تعشرق بيك ماتباري الجمال ينقطع طاريك
كان خايف علي عميرك وداير الفرح لي وشيك
اتقدم عديييل افرح وابشر ليك وسير ياعريس الفرح جاييك
بت ناسا عزاز اصيله وبت كرم لو رميتها مابترميك
بس خايف يا الحبيب الكومه تقضي عليك
قلت لي
يابشري الخزين بهواها غالبني النضم
قدامه بسكت واندهش بجماله بيجيني البكم
كان ماني عارف اني صاحي كت بقول اسمح حلم
بحسب واعدد لي النجوم بي وراها مافطيت نجم
الكومه كان جات التجي راجيك ياكومه السجم
مادام حبيبي معاي رفيق مابخاف حتي من السقم
المجادعات متواصله بس خليكم قراب هسي كمان في مجادعات
بس رجاءا ساعدونا بالردود
الشمشار
27-11-2011, 01:24 AM
قال لي
اركز يا وليد لاتبقي لعبه في ايده
باكر تشتكي وماتلقي ليك قصيده
يكويك الغياب جروحك باينه عديده
بتكورك تقول بهواها والله بريده؟؟؟
قلت لي
مالكه قليبي من زمن هي طفيله
تضحك وتنتشي عارفه القليب هيله
تتاتي وتهدهد امها ومن الحنان تديله
سماحتها في التمور زي شتله القنديله
لومالت شمال قلبي بيميل زي ميله
وان مالت يمين قلبي تب بمشيله
قال لي
ماتباري قلبك وين مشي وتبراهو
والسبب البوجع ارجوك لاتسعاهو
كان قلبك حجر اوعاك تتوطاهو
وكان ريقك نشف كوس اليشيل يملاهو
قلت لي
ست الناس رقيقه وعفيفه اخلاقها
ان رمت الجمال تلقاها هي الطاقه
مابترجع تفوت تنساها تتخطاها
آه من ديسها آه ومن جمال محياها
ماها البينسو اوصافا مهما الخلوق تنساها
طاريها الوحيد قسم ناره بتوطاها
قال لي
شن داير تكوس بي بيعه خاسره وكاسده
مالك بالبكاء ما تشمت ناسا حاسده
مالك منفزر والنار حواليك واقده
داير تنشوي بالشوق تعدم الفايده
قلت له
شوقها مابيفتر وحاتك فيي زي نار المجوس
خليني بس افرد هواي واديك منو عظه ودروس
النار ملهلبي في جواي ماحيلتي في بعدك يئوس
اشعلتي في جواي حرب زي حرب داحس والبسوس
وبزرتي في جواي عشم نتساقي من الريد كؤؤس
نواصل
الشمشار
27-11-2011, 01:25 AM
سلامات نواصل المجادعات واهو رجعنا
لي صديق جميل يدعي علي
كتب لي
البشري بيقول اخترت لي نار المجوس وبقيت تحب
وجع العشق ما بينكوي وساكت تعذب لي القلب
وانت يامسكين مكتف بي هواك مابيشفيك طب
كيفن تقول برجاها لامن شمسو تشرق من غرب ؟؟؟
********************************
فكتبت له
برجاها لو كان لحظه بس برجاها ارجوك اسمع ياعلي
قول لي بشري بالفم الملان ساحراني بس آثراني هي
ماقبلي البشري بعشق في المراح والتايه تشهد بي كدي
برجاها لامن يكتب في الكتاب ان كان سعيد وان كان شقي
******************************************
فكتب لي البشري
التايه كانت معجزه خصاها الله بكل شئ
ماتقرن الابيات تقول تهواها ابعد ياشقي
انا بقولها ليك ومابدس ومنها تب ما بختشي
سكه هواك قاسيه واكيد ليها بيغلبك المشي
***********************
فرددت عليه
سكه هواي بوصلها ومابقتنع بي شئ محال
كان اتم مشوار هواي ازحف متل زحف الجهال
لازم اكون في دنيتها وهي في بيتي الحلال
يوم داك اسعد وانتشي واتهني بي ست الدلال
**************************
قال لي علي
تتهني في بيت الحلال بس خوفي ما تقدر تصل
وتتألم انت من البعاد وما تبقي قدر البيك حصل
خايف تكون سكين بعادك قاسيه في حد النصل
والبيحصل مايسر ويوم داك دابو الخط فصل
**********************
قلت له
جنا مايداويه الفقير جن عشقي ماها جنونك
بالله اكتب في الغزل بتطربني والله فنونك
بس ارجوك بي كل الكلام العداك والدونك
ماتقرب حبيبي امرقنا من ماعونك *
********************
بشري قال
ماعون السجم جبتو في اشعارك
خلي النار تشب بكره تملا ديارك
ماتلقي اليطفي وتسمع ازيه جارك
وام ديسا ردوم تجيبو لينا شمارك
*******************
علي كتب
كيفن يابشري تكوس ازيه جارو
الولد العشق والعشق بي نارو
خلاهو بيدوبي ويجيب اشعارو
في ست القلب الشرايين فارو
وسطور مخيخو وراها طفرو طارو
*****************************
فكتبت ردا لبشري وعلي
نار البعد ابرد من جحيم اسيادها
وماعون السجم ياهو طبز مروادها
ام ديسا ردوم عارفه سر اندادها
القلب العشق ببراها زي العاده
*********************************
نواصل
الشمشار
27-11-2011, 01:28 AM
كتب لي بشري
بتبراها انت وقلبك الراقيه ست السبحه
ماحصل شفتها لكن عرفت انها سمحه
من ابيات قصيدك ونفسك المنشرحه
من فرح عيونك وكتين اشوفها في لمحه
عرفتك يا الحبيب ممكون وكاتم الوحه
فكتب له علي
لازم تكون في البنات مكمله للسماحه
ماشايف ود قمر رويحتو كيف نباحه
وقت ينطق بحبك في صوتو تحس بالراحه
بقوله ليك يابشري اخوي وبكل صراحه
ود قمر عاشق ومع العشق ما فيش راحه
فكتبت لهما
ياتو راحه دي يا ابو حلمي الاكوس هي طريقه
يابشري الخزين جروح الشوق كتيره وجواي غريقه
ياعلي حلف يمين عيوني في غيابها اصبحت سريقه
تسرق النظره من ست الحسان والفرقه مابي اطيقه
برجاهاالوحيده مادام لسه هي حبها جواي اسمي حقيقه
الشمشار
27-11-2011, 01:33 AM
جاااااي في مجادعه تانيه بيني وبين ود مسيخ
بنكتها هسي واجيبها هنا
الشمشار
27-11-2011, 01:34 AM
سلامات دي مجادعه في فيس بوك بيني وبين اخي الشاعر ود مسيخ والشاعره مشاطك زينه يابت بلدي
ود مسيخ كتب
نوحي وقل منامي وكل اسآي السارد
بركز ليهو دابن سيد هواي متمارد
وكت حبل الوصال بيناتنا مو متجارد
أن هاجر ديارك وإن نسيتك وارد
انا رديت
كيف تنساها الجميله الفي قليبك ساكنه
ماتبرا الخيوط الشينه سوداء وداكنه
ان بقت فجيعتك فيها مره ومصيبتك ماكنه
الزم للصبر في قلوبنا سر هلاكنا
فرد علي ود مسيخ
مو بي الهينة أنساها الغرامه إتعته
بقيت بين الصحاب ناصع دلقن وجته
الريدة القبيل في زيف همومه نسته
ببكي عليها كان عدمت رويحتي الحته
وكتب لي
وقعلك آمعاوية ولا اذيدك؟
فرددت عليه
هدت قلبك بي محن والله تب هي عديده
تكتب في الحروف تنكسر في ريده
بتنظم في هواها ابيات في شكل قصيده
تتاوه براك وماها داريه الصيده
فكتب ود مسيخ
نده ساعي الفراق والرجعة لينا أتقست
حروف ريدتنا راح ليها الطريق وإتمست
الصفحاته لي غير اللحاف ماامست
طالق فوقها دماعي ودموعه أتحست
فرددت عليه
تاتيتها اود مسيخ ريدتي ليها سنين
ماكان حيلتي غير جرسه وحيل مسكين
شارطني شوقها ودوام بسب البين
مكتول هواها في عيونها والله سجين
فكتبت مشاطك زينه يابت بلدي
يا انت يا سيد الاسم ...
خليني اشرح ليك واقول ..
شوق السنين ..حرق الدروب ..سرق الفرح ..طمس الافق
وخلى ليلي بدون صباح..
وجع البعاد ..صمت المسافات الطويلة البيني بينك...
خلى طيفك في الخيال وفي اي شئ ..
حاولت اهرب مني فيك...
حاولت اوفي بوعدي ليك ..
حاولت اكون ما اي شئ ..
بس كيف اكون ما اي شئ ...
وهم الوجع عندي البعاد..
وكتب ود مسيخ
شخاليبأ كوون قلبي وبلن عضامي
صرت أن قرقرونى النيل ببيت ظآمي
البلعني بي لهفة وقسالو هضامي
نسي ماضيهو في زخم النجاح وغرامي
فكتبت له
اريتو كان يسمع نداك يحن ليك ويفقدك
واريتو كان يسمع قليبك يقرب ليك ويسعدك
كان ربي اراد يكون سيد الاسم في قسمتك
افرح وابشر ليك براي اقاسمك فرحك وبهجتك
فكتب ود مسيخ
طول المسافات بينا كم؟
ماتشوف جموع آهاتي واطنان الالم
فد خطوة تكفيني النواح
كل الوطن نختصرو في لحن العلم
فكتبت له
ماتستاهل ينسو الغرام الجواك مستور
وماتستاهل العطش الملزم جور
كان هضمت حقوقك عند ربك ات مأجور
والسمحه التسيبك اولابا والله الخور
نواصل
الشمشار
27-11-2011, 01:35 AM
كتبت مشاطك زينه يابت بلدي
لما غبت ..غابت شمسي وكنت براي ..
قعدت استنى رحيل الليل الطال ...
وبقيت اتمنى شروقك فيني ...
وأنا في رجاك ...
نضمت الصبر سبحة أعد حباتها ليك ونهار ..
اتمتم بيك بعد الله ورسول الله ...
وانادي باسمك المحفور وشم جواي ...
وأنا في رجاك ...
غنيت الحزن مسدار ..ولبست الحنين طرحة...
لوكت المر ..صباح ومسا ..
واتجرعت الغياب حنضل
فرددت عليها
من حنضل القيزان شربتي المر ولسع راجيه سيد اسمك
اظنو هناك بقيف مبهور مع صورتك وجميل رسمك
واظنو من مافارقك مغبون يفتش لي دريب وصلك
وما تهتمي للايام بعد المراكيد جاياك ايام عسلك
الله يجيب ايام عسلكم كلكم فتكم بي عافيه
الشمشار
27-11-2011, 01:36 AM
سلامات ونواصل في المجادعات
قال ود مسيخ
سمح السمحو الخلاق وهيبه كساهو
وسمح الهادى فى طبعو وملك جلساهو
سمح الجنبو عديت يوم ولا بنساهو
ئبعثلو حروفي لو أقبل حياتي عساهو
فردت عليه الشاعره هنادي
سمح السمح خلقة وجميل محياهو
وسمح المن صغير لاذمة لا عيبا براهو
سمح الفي العقول زاكي وكريم أداهو
وسمح الفي الخلق طيبة ريح ذكراهو
فرددت عليهما
سمحه الهاريه كبدي وزايده في هجراني
وسمحه الباقيه في قليبي شعور ومعاني
سمحه المن شوفتها حارماني متجاهلاني
ضاربه سهامها فيي ومن الوريد ضابحاني
فكتب محمد التمانيات
سمح ود مسيخ من صغير ماعابوه تب بي شينه
وسمحه اخلاقو وفي المكارم زينه
حالف بالتقطعو الا يجينا
فكتب الشاعر عبده
سمح السمحو الخلاق وتب هناهو
سمح وشو زادو جمال وطيبه أداهو
سمح الهادي في طبعو القليب خشاهو
ومننا فات نسانا ونحن ما نسيناهو
ورد الشاعر مسلمي
سمح المن قام رزين في كلامو **
وسمح الما شافو الخلوق ابهامو **
شمس الضحي البيها العباد اتنامو **
تجبر للكسير وتنسي العليل الامو**
فقلت للمسلمي
المي البي ياخلاني مابتداويه الشمس
متجرع الآهات براي اكتم حرور الشوق وادس
مرات اهضرب انوح براي زي التقول ضاربني مس
واضوق غيابها اسي ودموع وطعم العنب يصبح تبس
لكني ساعه اطري زولتي قلبي يطرب ويدق جرس
الشمشار
27-11-2011, 01:37 AM
ودي مجادعه بيني وبين الشاعرمحمد الرفاعي الذي كتب
في عرف البنات الواحده تعشق خمسه
في الكف والضمان زولاً بجيد الهمسه
وواحد في الرزيف في إيده زي الكمشه
والتالت ثمين ، شان منو تلقى الخمشه
والرابع وجيه تتباهى بيهو في الممشه
والخامس خطير .. في الفرصه زي الرمشه
فكتبت له
يارفاعي البنيه والله جد معذوره
وليها الحق تلعب بالوليدات كوره
مادام الريد بقي تجاره فيها جروره
قبل ما تجن وتمرق كمان من طوره
اخيرلها تفرز الراجل من الماسوره
فرد علي
ويا هدر الوِلاد .. أكبر دواهي وريبه
في كل الفجاج .. ساويين بلاوي عجيبه
( السيستم ) نصل زاد لي قلوبنا نحيبه
دي ولادة شنو ؟ الدايره ليها حبيبه ؟
فكتبت له
وبنات الزمن يا اخوي سوو فعايل
العيب ما منهن من زمنا المايل
زمن الريد هو فيس ورساله في الموبايل
زمن الراجل عوير وللبنيه هو شايل
يصرف في القروش ماساهي عندو فوايل
والعرفي الكتر منو دوووم متسائل
زمن الحب بقي بعملولو عمايل
زمن الريد رخيص وحبيبي لي العايل
فكتب لي
ويا قمر الشريف مالك دميعك سايل ؟
دي مآسي الزمن غامرانا حاضر وسافل
البت والولد الكل صائل وجائل
قايلين مهنّد ونــور هم في المحبه أوائل
فكتبت له
يامحمد اخوي خلينا من ناس نور
الراجل بقي حميل بعد كان تور
يوم طرفت بي عينها وزادت عليها امور
واصبح اسير الريد باريها زي مسحور
وكتبت له ايضا
ماها غلطانه البنيه ان كان خدعتو
وماها غلطانه لو شالت قليبو ونكرتو
وماها غلطانه ان كان بالرخيص جات باعتو
غلطان هو البشتن رويحتو وراها والناس عرفتو
غلطان يوم بقي ليها سيجاره تمت بو كيفها بي كراعها اتوطتو
فكتب لي
يا اخويا غلطانين سوا .. كان حقّها أو حقّتو
ما كلهم لاعبين لعب .. والكل حريف في لعبتو
تتوطا لو يئست خلاص .. وتدوسهاعمداً جزمتو
تلقاهو اتنكّر جفا وتنكر عدييل في يوم هي اصلا حبّتو
الشمشار
27-11-2011, 01:39 AM
كتب الرفاعي
يا قمر الشريف صار الولد طرطور
ما بيزرع ارض .. خاليها كلها بور
ساويهو الكريم .. والقدله قدلة نور
وبي السيستم يمين زولك وطا المحظور
فكتبت له
الريده ان بقت بي ها الطريقه تفوت
قسم بالله افضل من اريد هو اموت
كان بقت المشاعر بي قرش مختوت
حلفت يمين ما ابراها كان اصبح عديل هبوت
وكتبت له
كلمني بصراحه الريده وصلت وين
ويالرفاعي قول لي تراني زول مسكين
انا من زمن قيس الفي قبرو سجين
ومن زمن المحلق وعنتره اب سكين
الريده البقت شفتنه وحنك هو سنين
اتبريت منها وعودي فيها عوين
محمد الجزولى
27-11-2011, 11:26 PM
وكتبت له
كلمني بصراحه الريده وصلت وين
ويالرفاعي قول لي تراني زول مسكين
انا من زمن قيس الفي قبرو سجين
ومن زمن المحلق وعنتره اب سكين
الريده البقت شفتنه وحنك هو سنين
اتبريت منها وعودي فيها عوين
يا ود الشريف يا اخوي اصيل وخاتي القول
لو عاوز اقول في الريد.. يمكن اقول للحول
اديك بس سطرين ... ووهم الحقيقة يزول
قام الحبيب ولهان اداها بس مس كول
تلقاهم سراع اتلاقو جوه المول
تشوف الولد تقول ده البت .. نعومه مش معقول
الريده صبحت فن .. احداثه شرحو يطول
شفته الفرق يا اخوي بين ( قنبله) و( قائد الاسطول )
مصطفى هاتريك
28-11-2011, 08:26 AM
يا ود يا هدر الليلة جبت كلام
طريتنا المضى , دمت يود بسلام
بشرى و الرفاعي والمسيخ نضام
مابغنو ياخ (ورا) برمو بس قدام
الشمشار
29-11-2011, 02:47 AM
نواصل في المجادعات
ود مسيخ كتب
دعجة وفيها من جييد المحاسن ستة
شارفة وتابرة الا ضميرة عادم الحتة
الجننى غير ضل السطوح الختة
كفلأ جال وديسأ بى المشط ما انحتة
رد عليه سراقه التجاني
ضامرة مخصرة وفوقا القليب اتبتة
في غارق الفؤاد انا ليها حبي نحتة
قاطع شايك الليل اب هوايلا كتة
مطلوق الرسن فوقي الغرام بالنتة
وكتبت له ستهم الحاج
آود مسيخ
سلام وكلامك حلو وموزون
وفي ست الحسن والله تب معلوم
يسعد ربي وماتغشاك هموم
وبي قربها تتهنى وتسعد دوم
واتي محمد حسن ابنعوف صاحب مسدار القشاش وكتب
وأنا فى وصف البريدا آلشلبى حيلى أنبته...
محاسنن فيها كضاب البقول عددتا...
الكمل سماحته فى الطبع والجته...
قال لخلافها (كن) يامك وفيها ال (سته)...
واتيت انا فكتبت لو مسيخ
صايداني من وسط الولاد جابتني
آود مسيخ بي ريدها هي بلتني
بي سهام عينيها فجأه رمتني
بي حلاوتها حرم عدييييل شرقتني
الشمشار
30-11-2011, 01:39 AM
يا ود الشريف يا اخوي اصيل وخاتي القول
لو عاوز اقول في الريد.. يمكن اقول للحول
اديك بس سطرين ... ووهم الحقيقة يزول
قام الحبيب ولهان اداها بس مس كول
تلقاهم سراع اتلاقو جوه المول
تشوف الولد تقول ده البت .. نعومه مش معقول
الريده صبحت فن .. احداثه شرحو يطول
شفته الفرق يا اخوي بين ( قنبله) و( قائد الاسطول )
يامحمد اخوي نورت البوست وحباب النور
زي اهل السباته حضورك جميل ومعطر
القلم القبيل هجا المدام والمستر
بيرحب بك انت قمرآ جميل ومدور
الشمشار
30-11-2011, 01:44 AM
يا ود يا هدر الليلة جبت كلام
طريتنا المضى , دمت يود بسلام
بشرى و الرفاعي والمسيخ نضام
مابغنو ياخ (ورا) برمو بس قدام
مرحب حباب الجاني بي ابياتو
ومرحب حباب الفات الصغار والفاتو
ياهاتريك قسم قلبي في اناتو
من ناس ورا والسي سي واخواتو
الشمشار
03-12-2011, 05:23 AM
ود مسيخ كتب
سقاف قلبى فى السنيورة داب واتهاوة
من الجملو المولي وملاهو شقاوة
القمر الحسب دورين معاك مااتساوه
عينيك صرة النضمى بتذيدة حلاوة
فردت عليه ستهم الحاج
آ ود مسيخ
جواي حروف بتضج وأشواقي ما سايباني
وفي درب الحبيب والله ياخ جايباني
السبب القبيل خلاني ديمه أعاني
ما عارف ده حظ ولا الظروف قاصداني
فكتبت لهم
ياود مسيخ مسخت علي الدنيا واتبرجلت
بقيف قدامه مشدوه مابقدر ازح البته
قمر دورين هو ذاتو واقف وكاتله السكته
ما اصلو عارف ومقتنع قدامها هو مابيسوي الحته
فكتب الشاعر ود الباديه
الحال العلى للفقره عاصى أتقاوه
قدر ما جرو فى السبح الطوال و تلاوه
حالى اللهيج قنديله مو ود جاوه
كان شفتك بطيب والمرض بداوه
فرددت عليه
الحاله العليك مابتكون زي حالي
امضغ في اللبان واكتح معاهو تسالي
اعاين في الارض زي التقول رايحالي
يامعشوق متين ترجع تحن ترتالي
وكتب الشاعر ود الباديه
قلبى مع النبيح وسهر الليالى أتخاوه
يزابن جميع أعضاى بالوحيح تتكاوه
كان قلنا البريدو مع القمر بساوه
فايت فوقو فى تيهو البزيدو حلاوه
فرددت عليه
آه من ضميرها وديسها وقت يتلاوه
وآه من ريله جميله وملانه شقاوه
وآه من نظرتها اللي القلوب شوشاوه
وآه من خدودها تفاح عدييل ونقاوه
فكتبت ستهم الحاج
كيفن تقولوا أسيبو بعد دخل العروق وانجم
واسمو هداك إستوطن في مجاري الدم
هو ما ببقى بلاي وحياتي بعدو عدم
ولو ربك يريد ويسهل لينا المراد ينتم
فرددت عليها
داعيهو الكريم يتم لي مرادك
افرح وانشرح وتديني من شبالك
تبقيلو العروس وهو العريس يبقالك
يارب ياكريم باكر نضوق لي فالك
يوسف كيكل
08-12-2011, 10:36 PM
سلام يا ناس اهل النميم
بطراك والمواجع يوت معاي مي غابه
بسأل عنك الطير والهبوب الهابه
رغم الفرقه والشوق والدموع الصابه
تبقى البينا عامره والقلوب متحابه
الشمشار
20-12-2011, 10:55 PM
سلام يا ناس اهل النميم
بطراك والمواجع يوت معاي مي غابه
بسأل عنك الطير والهبوب الهابه
رغم الفرقه والشوق والدموع الصابه
تبقى البينا عامره والقلوب متحابه
سلام آيوسف اخوي وليك برحب
مرحب حباب الجانا بي ابياتو نطرب
خش لي جوه حبابك الف
سوباوي
21-12-2011, 09:49 PM
الجميل .. الشمشمار ..
أزيك يا شمشار وأريتك طيب ..
هذه الذي دلقته أسنة أقلامكم يا عزيزي أنت ورفاقك به الكثير من الترياق ومداوة
نسيج شوهته التهتكات .. واراكم ترممون في وجه زمن عله يعود لملاحته التي كانت ..
ياخ المربعات دي أنا بتعمل فيني عمايل عجيبة .. وده ضرب من ضروب الكتابة سكتو
عجيبة وممتعة وصعبة لكنها ناجعة ومعبرة وتجيبلك خلاصة الحكاية كاملة الدسم ..
إن ساعدني الزمن سأعود لهذا المكتوب بتأني ولي حوله كثير من الحكي عن مقاصده
طريقة الشوف من الطاقات المفتوحة فيه دي ..
ياخي شكراً لك أقصى ما تراه عيون .. وكن بخير بخير ما أمكن،،،
ياسر عمر الامين
22-12-2011, 11:26 AM
الشمشار يا اخوى سمعت بيك قبل اشوف بوستاتك
ومجادعاتك سمحه بالحيل صعب مجاراتك
ولى معاك رجعه بس دى تحية قدوم وفرحة بكلماتك
الشمشار
26-12-2011, 06:32 AM
الجميل .. الشمشمار ..
أزيك يا شمشار وأريتك طيب ..
هذه الذي دلقته أسنة أقلامكم يا عزيزي أنت ورفاقك به الكثير من الترياق ومداوة
نسيج شوهته التهتكات .. واراكم ترممون في وجه زمن عله يعود لملاحته التي كانت ..
ياخ المربعات دي أنا بتعمل فيني عمايل عجيبة .. وده ضرب من ضروب الكتابة سكتو
عجيبة وممتعة وصعبة لكنها ناجعة ومعبرة وتجيبلك خلاصة الحكاية كاملة الدسم ..
إن ساعدني الزمن سأعود لهذا المكتوب بتأني ولي حوله كثير من الحكي عن مقاصده
طريقة الشوف من الطاقات المفتوحة فيه دي ..
ياخي شكراً لك أقصى ما تراه عيون .. وكن بخير بخير ما أمكن،،،
سلام ياسوباوي عارفه انا المربعات دي اتأثرت بيها من برنامجي قهوتنا وبعدين اي مربوع في المجادعه الاولي عندو قصه
غايتو كان الله سهل بحكي ليكم قصصها
منوره اختي وتسلمي علي كلامك الجميل
الشمشار
26-12-2011, 06:35 AM
الشمشار يا اخوى سمعت بيك قبل اشوف بوستاتك
ومجادعاتك سمحه بالحيل صعب مجاراتك
ولى معاك رجعه بس دى تحية قدوم وفرحة بكلماتك
ياسر يا اخوي تسلم وان شاء الله سمعت عننا كل خير ههههههههه
يا اخوي حبابك ومنور والله
Powered by vBulletin® Version 4.2.5 Copyright © 2025 vBulletin Solutions, Inc. All rights reserved, TranZ by Almuhajir