حــــاجــه ســتــوتــه

[الشمشار]

سلامات
سألتني احدي الصديقات في احدي المنتديات سؤال مهم
لماذا لاتكتب هذه الايام بطعم الشمشار البنعرفو ؟
ماقدرت اجاوب عليها
لكن
الليله عندي الرغبه اني ارجع الشمشار بتاع زمان
وعشان كده داير احكي ليكم عن حاجه ستوته
بس قبل احكي

البوست اهداء خاااص
لاختين في احدي المنتديات ارجو منكم جميعآ ان تدعو لهم بالشفاء العاجل
ربي يعافيكن ويشفيكن يارب وماتشوفن شر
وبرضو اهداء خاص لاخ جميل في هذا المنتدي اسمه خالد علوني
وصديقه عرفتها من خلال كتاباتها الساخره وردودها التي تضحكني كثيرآ اختنا عنكوليب واعتذر لهما للمناكفه في النفاج في البوستين العملتهم عنهم
وارحكم نشوف حاجه ستوته

[الشمشار]

حاجه ستوته زوله جنها كلف (بضم الكاف )
والكلف تعني انها تكلفك بي شئ تعملو او مشوار تقضي وكان كسرت رقبتك مابتمرق من كلفها ولامن لسانها
ولسانها ده اس البلاوي
مرات تمدحك كده لامن انت تتشهق (ماتفرح بعد المدح ده اكيد في مشوار ولامصلحه تقضيها لي حاجه ستوته او حاجه كلفه كما اطلق عليها احد خبثاء الحله)
ولا
تهاجمك بي لسانها ده التقول بتآ لي ساكواها
(المابعرفو ساكواها ده هداف الدوري السوداني ومهاجم خطيييييير )
خلونا من الكوره البتتور النفس وارحكم كلنا
في سياحه جميله مع حاجه ستوته
الصبررررررررر
انا جاااااااااي

[الشمشار]

اجتمعن نسوان القريه في منزل مبروكه التي انجبت للتو مولوده جميله بعد ان انجابها لاربعه ذكور
الكل كان سعيد ببت مبروكه التي كانت مبروكه تتوق لانجابها لكي تسميها ست النفر علي اسم والدتها التي توفت قبل ان تراها
سعديه بت المبارك كانت تكوضم في صحن زلابيه كبييير
اتت به بت المنا جارتها لمبروكه
سعديه مخاطبه مبروكه
اقيفي يادي بتك دايره تسميها منو ؟
مبروكه
دايره اسميها ست النفر
سعديه
شايله اسمها ان شاء الله
بت المنا
يا مبروكه وكان دايره تدلعيها حتقولي ليها يامنو؟
مبروكه
بقول ليها ياستوته
كانت هذه لمحه تاريخيه صغيرونه عن يوم ولاده ذاك الكائن المنجض الناس بالمراسيل هسي الذي يدعي ستوته
ستوته طبعا
اتربت دلوعه
البت الوحيده وسط 4 اولاد
كان دايره تشرب مويه عادي ترسل امها وابوها يجيبو ليها مويه
وبقت اي زول ترسلو
لامن المراسيل دي بقت ليها هوايه
انا جااااااي الصبر

[الشمشار]

ذات صباح شتوي وقفت حاجه ستوته امام منزلها في انتظار ضحيه
وماتقلعو عيونكم بعد القصه دي تنتهي بتعرفو ليه انا كتبت ضحيه

تغامزت سعاد ونجاه في مابينهم
سعاد
اجي المره دي جنت ولاشنو واقفه بي فستانه في الشارع
نجاه
ارحكي سريع قبل تشوفنا وترسلنا يابت المحاضره ذاتها زمنها قرب
ستوته
نجاه هوووووووي يانجاه تعالي يا المبروكه
نجاه في سرها
يبركو فيك خنق ثم تطنطن ارتحتي ياسعاد
اها شافتنا
ثم تصيح بصوت عالي
ايوه ياحاجه ستوته
حاجه ستوته
هاك يابتي كريعاتي واجعاتني جيبي ليك لبن بدره وحب شاي من الدكان الفي آخر الحله دااااك
سعاد
وليه الدكان الفي آخر الحله؟
حاجه ستوته
بري دكان الجيلي ده مابشتري منو الا الصابون الفيران حايمات في دكانو متل الركشات
(نسيت اقول ليكم انو حاجه ستوته دي عوااااافه شديد)
عوافه يعني بتااااااااااااعه
ثم واصلت كلامها ياسعاد يابتي تعالي قشي لي الحوش ده لحدي ما اخيتك نجاه تجيب الشاي واللبن
وصل ضغط سعاد اقصي الدرجات خصوصا انها كانت لابسه هدومها الجديده وماشه الجامعه عشان تلاقي مؤيد حبيبها بعد اجازه نص السنه
لكن لابد من ما لابد منه
وكسر رقبه لازم تقش الحوش كان ماقشتو
حاجه ستوته بتنقي شعيرها وماتخلي ليها فرضآ ناقص
نواصل

[الشمشار]

ووووووواي انا من الغبار المره دي اتخلقت لي ازانا اووووف

طنطنت سعاد بهذه العباره قبل ان تأتيها حاجه ستوته وتخاطبها
الله يديك العافيه يابتي ويطرح فيك البركه
وربنا يعرس ليك الليله قبل باكر قلت ليك ياسعاد
سعاد
ايوه ياحاجه ستوته
امك صرفت الصندوق ولا لسه؟
سعاد
لسع
حاجه ستوته
عشان قالت لامن تصرف الصندوق حتمشي مصر وانا كنت دايره ارسلها تجيب لي حاجات من هناك
سعاد تطنطن
امي ماشه تتعالج وانتي ما دايره تخليها ترتاح منك بس
اتت نجاه تلهث بعد المشوار الاخدتو وخاطبت حاجه ستوته
ياحاجه ده اللبن والشاي
حاجه ستوته
لبن الجرتق يا يمه التبخي في وش عريسك الضكران ود ست النسوان ويبخروكي بالتيمان قولي آمين
نجاه تسلمي ياحاجه ستوته
حاجه ستوته
كملي جميلك واعملي لي الشاي يانجاه يابتي مسافه اخيتك سعاد تمشي تجيب لي زلابيه من الرضيه
كشلوووووووووووووووووووو
ده صوت وقوع سعاد ونجاه غمرانات
انا جاااي الصبر بس

[الشمشار]

ووووووب علي سجمي سجمي البنات وقعن
فؤاد ياولدي اجري الدكان جيب ليك بصله نفوق بيها البنات ديل
يامني اجري لي خالتك ام سعاد قولي ليها بتك غمرت
يانسوان ارفعو البنات ديل في السراير
كررررر علي
واحد يمشي يجيب الدكتور
سجمي سجمي سجمي
(هههههههه ما تتخلعو سلامات وجمعه مباركه الليله داير اتم ليكم قصه حاجه ستوته )
اتي الدكتور مسرعآ في زفه من شباب الحله الباكين في نجاه والبقيه الباكين في سعاد
الجميع بدون فرز في الحله اليوم داك كان في بيت حاجه ستوته
الدكتور
الحاصل شنو ياجماعه زحو منهن الكتمه بتاعه النفس دي ماكويسه
يكتموك يايابا في الكرنتينه (ده صوت التايه الدعايه ودي بحكي ليكم قصتها بعد نخلص من حاجه ستوته دي ومحنها )
تجاهل الدكتور التايه الدعايه وجوطه ناس هنايه
(هنايه منو؟؟؟؟)
تجاهلهم الدكتور وبدأ في مباشره عمله
وبعد ربع ساعه بالتمام والكمال خرج من الغرفه ليبشرهم ان البنات بخير
الحله كلها فرحت
وبالذات الناس الباكين في سعاد
انا ذاتي فرحت
بيني وبينكم سعاد.........



(ده الكلام البجيب الرقيب)

وقال ليهم صدمه بسيطه
وسألهم البنات ديل حصل ليهم شنو؟
حاجه ستوته
بررررررررررري ماعارفه
(هههههههههه سبحان الله )

[الشمشار]

انفض سامر ناس الحله اي واحد واي واحده شاف لي طريقه مخارجه سريع قبل حاجه كلفه تكلفو بي مشوار
(ماتقولو لي حاجه كلفه منو براي داير سبب )
الناس كلها فاتت فضلو تلاته
حاجه ستوته
والتايه الدعايه
والدكتور (طبعآ راجي قريشاتو)
وللامانه حاجه ستوته امرأه كريمه جدآ
ومابتقصر معاه
لكن تعالو شوفو سوت شنو ؟
حاجه ستوته
الله يبارك فيك والله كرعي بردن لامن البنات وقعن
الدكتور
سلامتك ياخاله
حاجه ستوته
تسلم ياولدي عليك الله دايراك في مشيوير صغير انا وخالتك التايه دي مابنقدر علي
الدكتور
جدآ انتي زي امي (ماتتفنجر ساي والله الفنجره بتوديك القنطره)
القنطره يعني البتععه
وتتفنجر يعني تتبتع
امرقونا من البتوعات هسي وخلونا في البتاع والبتاعه

حاجه بتاعه اقصد حاجه ستوته
عليك الله امشي لي محمد صالح بتاع القش جيب لي برسيم لي غنمي ديل
وبعد داك اغشي السوق جيب لي فتريته لي حمامي ده
وتمشي لللبطري جيب لي دواء السعر للكلب
وتعال غاشي البقاله يا المبروك جيب لينا بن باقي البن العندنا خلص
وجيب لي معاك حجار للرادي بتاعي
واغشي محل التمباك جيب لي خالتك التايه دي كيس تمباك
و.............و................و.................
كميه مراسيل لامن الدكتور بالمشي والجيه بقي زي حبل الغسيل ووقع كاااضم من قبييييييييييييل
جاااااااااي الصبر

[الشمشار]

اصبح الشارع الذي تسكن فيه حاجه ستوته ممنوعآ بأمر المراسيل
ماتقولو لي كيف ؟
اي زول ماشي اي مشوار بيجيبو جنب بيت حاجه ستوته بشوف اي شارع الا شارع بيتها ده خوفآمن مراسيله
ياخ حتي الشفع اللعب في شارع بيتها خلوهو
الا بشير
وبشير ده ناس الحله بيقولو علي عوير
ومسمنو بشير العوير
لسبب واحد
انو اي زول برسلو بيمشي طوالي مهما كان المشوار بعيد ومرهق
لكن بشير بيتمتع بصبر ماعادي
ههههههههههه ناس الحله قالو حاجه ستوته وبشير زي اللاعبين رأس في الكوتشينه منو اليغلب
مراسيل حاجه ستوته الكتيره ولاصبر بشير العوير
هوووووي جاااااااااااااي

[الشمشار]

بشير ياجماعه زي ماقلنا بقي متعهد مشاوير حاجه ستوته
الارتاحو منها شباب الحله
وبقي بشير ملازم حاجه ستوته بيخدمها الاربعه وعشرين ساعه ووقت ماتدوره في مشوار
بشير بمشي وبدون كلل او ملل
ناس الحله بطلو شغلتهم وبقو مبارين بشير وحاجه ستوته
منو الحيفوز في الاخر
طوله البال
ولا كتره المراسيل والكلف ؟
نقطه سطر مهم
لماذا عندما يخدمك شخص تستغل خدمته ليك اسواء استغلال ؟
نقطه سطر اهم
ليه الناس مرات بتحملك فوق طاقتك؟
نقطه سطر مكمل الاهميه
حبيبك كان عسل ماتطلع عينو
نقطه ودي من اهم النقاط
بشير ماعوير بشير امييير لانو بشوف خدمه الناس اهم شئ واهم شئ خدمه الكبار وبشير نموذج للشاب القلبو حار
نقطه سطر مشااااااااااتر
لكن اي زول بستاهل يخدمو؟
نقاط تانيه
الدلع ماكويس وحاجه ستوته مدلعه وما اتعودت تعمل شئ بي يدها
العيب فيها ولافي تربيتها
حكمه نختم بيها
ماحك جلدك مثل ظفرك
مع السلامه

[mahagoub]

انت تربية حبوبات ؟؟؟ ( اكيد نعم )
نماذج حيه من شرائح المجتمع السودانى
يديك العافيه

[الشمشار]

انت تربية حبوبات ؟؟؟ ( اكيد نعم )
نماذج حيه من شرائح المجتمع السودانى
يديك العافيه

هههههههههههه والله لاتربيه حبوبات لاشئ
انا حبوباتي الاتنين ماشفتهم ربي يرحمهم
لكن ياعم محجوب شغلنا ورانا الكتير
تسلم يارائع

[zahid]

أخخخخخخخخخخ حاجة ستوتة دي ذكرتني بي واحده قريبتنا ...الله يسامحها تعبتني زمان جنس تعب.

[عنكوليب]

انت رائـــــــــــــــــــــــــــع جد والله ،،،

لما أبدأ اقرأ ليك ،، لازم اتم للنهاية وبشغف ،،،


ربنا يخليك ،،،

وانا يسعدني جدا أن أكون من صداقاتك يا شماشيرو ،،


وأكتب ذي ما عايز ،،، لك احتراماتي يا ود ستوتة ،،،

[مدنيّة]

ربنا يشفي صديقاتك ياشمشار

------
بوست خفيف الظل
امتعتنا والله

-------
تسلم يارب

[تغريدا]

انت رائـــــــــــــــــــــــــــع جد والله ،،،

لما أبدأ اقرأ ليك ،، لازم اتم للنهاية وبشغف ،،،


ربنا يخليك ،،،

،،،


دى حقيقة والله كما اسلفت الأخ عنكوليب تسلم على هذا السرد الممتع وتصوير نموذج من واقع حياتنا

[الشمشار]

أخخخخخخخخخخ حاجة ستوتة دي ذكرتني بي واحده قريبتنا ...الله يسامحها تعبتني زمان جنس تعب.

زاهد ههههههههههههههه اتلحوك مراسيل انت برضو
في ميزان حسناتك
بس ماوريتنا المراسيل بعد تخلص بدوك دعوه كاربه ولاساي

[الشمشار]

انت رائـــــــــــــــــــــــــــع جد والله ،،،

لما أبدأ اقرأ ليك ،، لازم اتم للنهاية وبشغف ،،،


ربنا يخليك ،،،

وانا يسعدني جدا أن أكون من صداقاتك يا شماشيرو ،،


وأكتب ذي ما عايز ،،، لك احتراماتي يا ود ستوتة ،،،

تسلمي ياصديقه واشكر لك مرورك ع البوست
انتي وود المطامير من الناس البقرأ ليهم كتيير ومن اشوف اساميكم قبل اقرأ الكاتبنو ببتسم
ههههههههههههه
يديك العافيه ياعنكوليب
تدويره
اها خسيتي ولالسه ؟؟؟؟

[الشمشار]

ربنا يشفي صديقاتك ياشمشار

------
بوست خفيف الظل
امتعتنا والله

-------
تسلم يارب

اللهم آمين يارب العالمين
الله يمتعك دنيا وآخره اختي مدنيه
شكرى وتقديري

[الشمشار]

دى حقيقة والله كما اسلفت الأخ عنكوليب تسلم على هذا السرد الممتع وتصوير نموذج من واقع حياتنا


تسلمي اختي تغريدا بس مايكون عندكم زي حاجه ستوته دي في حلتكم؟
سعاااااال
كلمه الاخ المظلله بالاحمر دي بتعود لي منو اوعه يكون لي عنكوليب ؟؟؟؟؟؟؟؟؟؟؟هههههههههههههههه

[عنكوليب]

تسلمي اختي تغريدا بس مايكون عندكم زي حاجه ستوته دي في حلتكم؟
سعاااااال
كلمه الاخ المظلله بالاحمر دي بتعود لي منو اوعه يكون لي عنكوليب ؟؟؟؟؟؟؟؟؟؟؟هههههههههههههههه

ارد عنك يا تغريدا بعد اذنك ،،

يا شماشيرو ، عنكوليب دي أصلها كانت الاخ / عنكوليب زمان ،،،

وفي الشمعة التاسعة للمنتدى ،، اديتهم الحقيقة،،

وصرت الاخت / عنكوليب ،،،


وقع ليــــــــــــــك ؟

[عنكوليب]

دى حقيقة والله كما اسلفت الأخ عنكوليب تسلم على هذا السرد الممتع وتصوير نموذج من واقع حياتنا


يا تغريدا عليك الله امشي اقرائي
عنكوليب والتخسيس للشمشار في النفاج ،،،


مع تحياتي ،،،

[الشمشار]

ارد عنك يا تغريدا بعد اذنك ،،

يا شماشيرو ، عنكوليب دي أصلها كانت الاخ / عنكوليب زمان ،،،

وفي الشمعة التاسعة للمنتدى ،، اديتهم الحقيقة،،

وصرت الاخت / عنكوليب ،،،


وقع ليــــــــــــــك ؟

هههههههههههههههه وقع

[تغريدا]

تسلمي اختي تغريدا بس مايكون عندكم زي حاجه ستوته دي في حلتكم؟

عندنا بالكوم زى كلاب عمك التوم:):rolleyes:

سعاااااال
كلمه الاخ المظلله بالاحمر دي بتعود لي منو اوعه يكون لي عنكوليب ؟؟؟؟؟؟؟؟؟؟؟هههههههههههههههه[/
quote]

رد السعاااااااال: اى الضميرة راجعة لعنكوليب

[quote=عنكوليب;651082]ارد عنك يا تغريدا بعد اذنك ،،

تتفضلى ياستى طوالى


يا شماشيرو ، عنكوليب دي أصلها كانت الاخ / عنكوليب زمان ،،،

وفي الشمعة التاسعة للمنتدى ،، اديتهم الحقيقة،،

وصرت الاخت / عنكوليب ،،،

ماقصرتى تب ياعنكوليبة


وقع ليــــــــــــــك ؟


يا تغريدا عليك الله امشي اقرائي
عنكوليب والتخسيس للشمشار في النفاج ،،،

خلاص حقة الرقشة عليك




مع تحياتي ،،،

تلسمى ياعنكوليبة على العزومة دى

[خالد علونى]

نقطه ودي من اهم النقاط
بشير ماعوير بشير امييير لانو بشوف خدمه الناس اهم شئ واهم شئ خدمه الكبار وبشير نموذج للشاب القلبو حار
[/COLOR]



ما اظن المجتمع شايل همتو بي الفهم دا لانو لو كانو خاتين النقطة دي ما كان قالوا عليهو عوير




نقطه سطر مشااااااااااتر
لكن اي زول بستاهل يخدمو؟
[/COLOR]


الجواب في البوست يتاعك دا زااتو والدليل حاجة مراسيل دي







نقاط تانيه
الدلع ماكويس وحاجه ستوته مدلعه وما اتعودت تعمل شئ بي يدها
العيب فيها ولافي تربيتها
[/COLOR]



في تربيتا طبعاً

[zahid]

حاجة ستوتة ...حاج جدعة ...حاجة علوية الحشرية...عوض جبجبة .....الخ !

ياحاج شمشار ....يا خي ماعندك حاجة لي واحد سوداني ظريف مثلاً عثمان الطيب ..سليمان الانسان ...زكية الذكية ..أي حاجة كدة حلوة عن السودانيين

[الشمشار]

[quote=الشمشار;651024]تسلمي اختي تغريدا بس مايكون عندكم زي حاجه ستوته دي في حلتكم؟

عندنا بالكوم زى كلاب عمك التوم:):rolleyes:

ههههههههههههههههه الله يستر عليكم
سعاااااال
كلمه الاخ المظلله بالاحمر دي بتعود لي منو اوعه يكون لي عنكوليب ؟؟؟؟؟؟؟؟؟؟؟هههههههههههههههه[/
quote]

رد السعاااااااال: اى الضميرة راجعة لعنكوليب

سجمممممممممممممممممممممممممممممك


تلسمى ياعنكوليبة على العزومة دى


انتي تنورينا بي غادي عقبال بوستك قولي آمييييييييييين

[الشمشار]

ما اظن المجتمع شايل همتو بي الفهم دا لانو لو كانو خاتين النقطة دي ما كان قالوا عليهو عوير




الناس بتقول كده ياعلوني وللاسف المكرفس بقولو علي عوير

الجواب في البوست يتاعك دا زااتو والدليل حاجة مراسيل دي

ههههههههههههه كدي اقرأ البوست تاني






في تربيتا طبعاً

عشان كده قدمو التربيه علي التعليم وللاسف المعفص (ده ودعم الاسف المكرفس ) ماشغالين بالحته دي

[الشمشار]

حاجة ستوتة ...حاج جدعة ...حاجة علوية الحشرية...عوض جبجبة .....الخ !

ياحاج شمشار ....يا خي ماعندك حاجة لي واحد سوداني ظريف مثلاً عثمان الطيب ..سليمان الانسان ...زكية الذكية ..أي حاجة كدة حلوة عن السودانيين

معالجه السالب اهم من ايراد الموجب في مجتمع يعج بالسلبيات
ويا يازاهد يا اخوي لما نحن نتعرض للسلبيات بنكون اكدنا علي الايجابيات ضمنيآ ولاشنو ولو تابعت كويس حتلقي اي شخصيه من ديل فيها سمات برضو كويسه

[ودالعمدة]

الجميل شمشار
سعدنا معك كثيرا وانت تحلق بنا
فى سياحة جميلة مع حاجة ستوتة
وماأجمل القصة عندما تكون
من واقعنا الذى نعيشه فى مجتمعنا السودانى
متعك الله بالصحة والعافية

[الشمشار]

الجميل شمشار
سعدنا معك كثيرا وانت تحلق بنا
فى سياحة جميلة مع حاجة ستوتة
وماأجمل القصة عندما تكون
من واقعنا الذى نعيشه فى مجتمعنا السودانى
متعك الله بالصحة والعافية

تسلم ود العمده ومنور والله
الحمد لله القصه عجبتك
وانتظر المزيد في نقبل الايام ان شاء الله