التايه الدعايه

[الشمشار]

سلام من الله عليكم

عذرآ للغياب واعتذر لكل زول رد لي في بوست او كتب عني كلام جميل زيو وانا مارجعت عقبت علي
وشكرآلي اي زول رشح واحد من بوستاتي في احسن بوست اذا كان هنا واذا كان في النفاج
واعتذر ان كانت مواضيعي خلقت زحمه في المنتدي لدرجه انو في عدد من الاعضاء قالو لي خف عننا شويه
وجات غيبتي في الايام الفاتت رغم انها قصريه الا انها كانت راحه وادت بعض الاعضاء مجال يقرو ويطالعو المواضيع التي كتبتها سابقآ
في حاجه مهمه انو انا بكتب الموضوع علي شكل قصه لكن بكون بقصد من وراهو معالجه شئ التصق بمجتمعنا ونحن دايرين نزيلو
هسع انا كده بقيت زي الزول الداير يسافر لي مدني من الخرطوم يقوم يمشي بورتسودان بي شارع عطبره هههههههههه عاااااارف خرمت كتير الليله موضوعنا او قصتنا عن
التايه الدعايه
تمبوشه:-

دعايه ما اعلان دعايه بتشديد العين يعني جنها تدعي الناس
جاااااااااااااااااااااااااااااي

[الشمشار]

نواصل
حاجه التايه امرأه في الستين من عمرها
(ده العمر المعترفه بي هي المدسوس ماعندي خبرو)
ورغم انها خطوتين والقبر
الله يدينا ويديها ويديكم طوله العمر
لكن عندها عاده سيئه جدآ
بتدعي اي زول
مهما كان ودعاء شيييييييييين
مره من المرات
سمعت بكسي الخضار بكورك
الباميه الجزر الفلفيه
الليمون والشطه والسلطه
الفجل الرجله الطماطم الحمراء والملوخيه
خرجت حاجه التايه واتجهت صوب بتاع الخضار
اقيف يادا عندك قرع
بتاع الخضار
لا والله ماعندي لكن شيلي البامبي ده ولا اخدي اسود
التايه
تتسود عيشتك يا المصيوب
(المصيوب دي ما ادونا ليها عشان اترجمها ليكم)
بتاع الخضار
هسي انا قلت شنو؟
التايه
شنينه ام قرينات
(دي ود ام بعلو وود ام بعلو يعني بتوعه كده بتخوف)
بتاع الخضار
ياحاااجه
التايه
تحج يايمه بي جمل اعور
بتاع الخضار
خلاص سكت
التايه
يسكوك الرواعيه
ثم استدركت
الطماطم بي كم الكيلو؟
بتاع الخضار
الكيلو بي سته جنيه
التايه
ست سنه في كوبر
(كوبر ده البتوع البودو فيهو البتاعين لما يعملو بتاعه )
بتاع الخضار
خليهو لو مابنفع معاك
التايه
يخلخل يايابا ضروسك وتتودر فلوسك
(دي دعوه خاطف لونين مصري علي سوداني التايه جنها مسلسلات )
بتاع الخضار بزهج
ياحاجه متين اصبحت ؟
التايه
تصبح في العقبه ياسنيح يالديح انا قدر امك النجماه التقدد عيونك ديل
(الليله الرقيب ماشايف شغلو)
بتاع الخضار
ياحاجه باختصار ياتشتري ياتمشي
التايه
تمشي الاستباليه بي تحبيس
(الاستباليه دي يعني المستشفي ولحدي هنا كده حلوين الباقي اي زول يفهمو بي طريقتو تقومو تصحو لينا الرقيب ده وانا برااااااي ماناقص )
نواصل هسي

[الشمشار]

بتاع الخضار
هسي ياحاجه سيره المستشفيات دي شنو الجايباها لينا من اصبحت؟
التايه
تصبح مكفن ياعوير ياعوقه ياتلوقه
(عوقه وتلوقه دي بتوعات بتعني بتوع)
بتاع الخضار
استغفر الله العظيم
التايه
الله يطوطرك
(يطوطرك دي لو شرحتها هنا باخد زمن وبتمرقونا كيت ساي كيت اسألو منها ود المطامير )
بتاع الخضار
اللهم طولك ياروح
التايه
ها يابا روحك تنسل
بتاع الخضار باستهجان
تتسل روحي انا
التايه
آي تتسل روحك المسله التخش ليك في عيونك المتل جوز الجلي المصدي
(المسله دي بتوعه كده ايواااااه ابره بس علي اكبر شويه بخيطو بيها الشوالات والجلي ده البتاعه بتاعه البتاع البيلعبو بيها بتاع اقصد البليه بتاعه الحديد البيلعبو بيها بلي )
فغر بتاع الخضار فاه والنوم في اللحظه ديك ذاتو جافاهو
فهو امام قنبله موقوته مليانه دعوات الله لاسمعكم ليها
ومن لطف الله عليه تركته التايه واتجهت صوب منزلها
كدي اشرب مويه واجيكم
جااااااااااااااااااااي

[الشمشار]

اتجهت التايه صوب دكان عمك ادريس
وعم ادريس ده ياجماعه زول خواف خوف ماطبيعي وعنده وسواس انو الناس مابتدورو وانو في ناس عاملين لي عمل عند الدجالين عشان الزباين يطيرو منو
التايه
ادريس عندك توم
عم ادريس
بسم الله الرحمن الرحيم خلعتيني
الناس بتسلم بعد داك تسأل
التايه
يسلموك البوليس دايره شنو انا بي سلامك
كمان تسلم بعد داك تسأل
يسألك نكير شاحده ربي عليك
عم ادريس
ياوليه ...........
التايه
يتلولو فيك الثعبان
عم ادريس
قهرتك بالقاهر والنبي الطاهر انتي جنك دعاء كده مالك ؟
التايه
كدكوده ان شاء الله تحميك النوم

(الكدكوده والصحيح كتكوته مرض من امراض الطفوله السته قبل يبقن امراض الطفوله الماعندهن عدد معين ده الكلام البخلي الرقيب يجينا طاير بعد خلاص ارتحنا منو)
عم ادريس

تنومي بالتايفود

(عم ادريس ده ذاتواصابتو العدوي بقي دعاي خلاص )

التايه
تنوم يايابا جنب امي

(امها ميته وينوم جنب امها كنايه عن ا نو يموت وقبره يبقي جنب قبر امها ماتسرحو بي خيالكم ساي الدنيامغارب )
عم ادريس
التايه هووووووي
توم مافي
وبيع مافي
وانا دكاني ده ذاتو داير اقفلو
غوري من وشي
التايه
وشك بي مويه النار التلحقك سناء

(سناء دي احدي ضحايا مويه النار ربي يكون في عونه )

عليكم الله شوفو جنس عواره الراجل ده
هسي انا سالتو ولاجيت جنبو

(هههههههههههه حاشاك لاسألتي لاجيتي جنبو غايتو انتي يحلنا منك الحلا بله ماتقوم تسمعني كدي انا جااااااااااااااي )

[الشمشار]

اتجهت التايه في ذلك الصباح بعد ان تركت عم ادريس الي محل الجزاره
دلفت للجزاره لتجد جادين الجزار فبادرته بالتحيه
التايه
جادين ازيك اهاالضان الليله بي كم ؟
جادين
ياحاجه التايه انتي دائمآ تسألي من الضان وتجي في النهايه تشتري ربع كيلو عجالي دايره بي شنو الضان بي كم
التايه
كمامه اوكسجين ونهشه مرفعين ياجادين الشين
جادين
التااااااااااااااااااااايه
التايه
يتور نفسك يايابا يا ..............

(الرقيب هرش من سكين جادين دي وحذف دي احييييي انا تعرف الخوف ماقلتو نوبه)

امسك جادين بالسكين وهرول خلف التايه التي اطلقت ساقيها للريح

نقطه سطر وزن كيلو لحمه كده
الدعاء بالشئ البطال ماكويس وفي ناس بيدعو روحهم وعيالهم وكده غلط
نقطه سطر ممحوق زي لحمه اليومين ديل
التايه ماعندها في لسانها غير كلمه الله يضرك وضاره بيها الناس
نقطه سطر في الدين
المسلم من سلم المسلمون من لسانه ويده او كما قال عليه الصلاه والسلام
نقطه اهم سطر
صلو علي النبي
نقطه آخر سطر
دعواتكم الصالحه الله يهدي التايه
مع السلامه

[بت أم درمان]

هههههههه
غايتو التاية ربنا اهديييييك

هم كتار والله زي التاية
بس ما لدرجة الدعاء الكتير دا
دي ضربت الرقم القياسي
وانا برشحها تشترك في مجموعة قينس للدعايين

شكرا الشمشار

[isamzaki1978]

ان شاء الله يا شمشار ربنا يديك راحة البال
ويبعد عنك كل زول جبار
ويكتر بوستاتك وما يبقو قصار
واى رقيب عاوز معاك جنجال
نرسله حاجة التايه فى وضح النهار

نقطة سطر اخير
تسلللللللللللللللللللللم يا امير

[ودالعمدة]

سلام من الله عليكم
واعتذر ان كانت مواضيعي خلقت زحمه في المنتدي لدرجه انو في عدد من الاعضاء قالو لي خف عننا شويه

في حاجه مهمه انو انا بكتب الموضوع علي شكل قصه لكن بكون بقصد من وراهو معالجه شئ التصق بمجتمعنا ونحن دايرين نزيلو

التايه الدعايه
تمبوشه:-
دعايه ما اعلان دعايه بتشديد العين يعني جنها تدعي الناس
جاااااااااااااااااااااااااااااي

مرحبا بمجيئك ايها الكاتب الفنان شمشار
والجمال فيما تكتب هذا النقد البناء
والذى يدعو لمعالجة السلبيات فى مجتمعنا
لذلك نأمل فى المزيد والمزيد لنسمو ونرقى
بل نحن الذين نعتذر لك لعدم المداخلة بسبب المشاغل
بل نرى فيك نبوغا فى القصة والرواية الواقعية
أوصيك بجمعها لحفظ الحقوق بل وطباعتها فى مؤلف
مع أمنياتى لك بالتوفيق والنجاح

[فراس]

سلام اخي شمشار٠
كتاباتك جميلة جدا وتدل علي انك كاتب مميز وسيكون لك شأن كبير
باذن الله
ملاحظات عن مجموعة القصص التي رايتها وانا ليس بكاتب ولاناقد ولكن من ناحية قاري يهمه ان
يراك بين مصاف الكتاب
اخي شمشار قصصك تمتلك جميع المقومات فكتاباتك من واقع حياتنا وظروفنا الاجتماعية وغيرها وايضا بها ترابط وتسلسل جميل
لايفسدة الا الحواشي التي تخرجك من الجو العام للقصة واثارتها فلو كان التعريف بمعني اي كلمة غير مفهومة في نهاية القصة سيكون افضل ٠
ثانيا محاولة ادخال نوع من الطرافة لاتدور في فلك القصة الاصلا هي طريفة! وانا كقاري اشعر بانها مصطنعة.
وهذه وجهه نظري الشخصية واتمني ان تجعلها في خانة النقد البنا
تسلم

[عنكوليب]

شماشيـــرو ،،العجيب ،،

ان شاء الله يا يما التاية ،،،،

سوق الخضار أم درمان ،، حدث ولا حرج ،،
لا يخلو مكان بالسوق الا وتجد من يدعي ويشتم ،، ويسب ،، ويلعن ،،
مافي أخلاااااااااااق نهائي ،،
لكن ده من شنو ياربي ؟

اللهم أجعلنا ممن يعف لسانهم عن النطق بالسوء يا كريم ،،

تسلــــم شماشيــــرو ،،،

[الشمشار]

هههههههه
غايتو التاية ربنا اهديييييك

هم كتار والله زي التاية
بس ما لدرجة الدعاء الكتير دا
دي ضربت الرقم القياسي
وانا برشحها تشترك في مجموعة قينس للدعايين

شكرا الشمشار

هههههههههههه والله دي كان رقعتك دعوه بتجهجه افكارك
هههههههه
تسلمي بت ام درمان

[الشمشار]

ان شاء الله يا شمشار ربنا يديك راحة البال
ويبعد عنك كل زول جبار
ويكتر بوستاتك وما يبقو قصار
واى رقيب عاوز معاك جنجال
نرسله حاجة التايه فى وضح النهار

نقطة سطر اخير
تسلللللللللللللللللللللم يا امير

اللهم آميييين
تسلم ياعصام ده اسمو التأثير العكسي ههههههههههههه
ممنون لك ياصديقي

[الشمشار]

مرحبا بمجيئك ايها الكاتب الفنان شمشار
والجمال فيما تكتب هذا النقد البناء
والذى يدعو لمعالجة السلبيات فى مجتمعنا
لذلك نأمل فى المزيد والمزيد لنسمو ونرقى
بل نحن الذين نعتذر لك لعدم المداخلة بسبب المشاغل
بل نرى فيك نبوغا فى القصة والرواية الواقعية
أوصيك بجمعها لحفظ الحقوق بل وطباعتها فى مؤلف
مع أمنياتى لك بالتوفيق والنجاح

ان شاء الله يا ود العمده وشكرآ لكلماتك
ويازول ما مشكله حبابك
شمشره
كنت وين الزمن ده كلو اوعه تكون مع ناس اب تكو ههههههههههه

[الشمشار]

سلام اخي شمشار٠
كتاباتك جميلة جدا وتدل علي انك كاتب مميز وسيكون لك شأن كبير
باذن الله
ملاحظات عن مجموعة القصص التي رايتها وانا ليس بكاتب ولاناقد ولكن من ناحية قاري يهمه ان
يراك بين مصاف الكتاب
اخي شمشار قصصك تمتلك جميع المقومات فكتاباتك من واقع حياتنا وظروفنا الاجتماعية وغيرها وايضا بها ترابط وتسلسل جميل
لايفسدة الا الحواشي التي تخرجك من الجو العام للقصة واثارتها فلو كان التعريف بمعني اي كلمة غير مفهومة في نهاية القصة سيكون افضل ٠
ثانيا محاولة ادخال نوع من الطرافة لاتدور في فلك القصة الاصلا هي طريفة! وانا كقاري اشعر بانها مصطنعة.
وهذه وجهه نظري الشخصية واتمني ان تجعلها في خانة النقد البنا
تسلم

سلام اخي فراس شكرآ لكلماتك
عذرآ للترجمه والحواشي لكن في الاخراج هناك مدرسه تقوم علي الخروج من النص قليلآ
ههههههههههه عشان كده بطلع وبخرم لكن مابعيد من القصه وبيني وبينك التخريمات دي لو في الاخر مابيتسق صياغ القصه بعدين برضو لو لاحظت لي بوست علويه الحشريه حتلقي الحواشي دي بتقودك لمدخل جديد
او شخص جديد في القصه
بعدين غير الاسباب دي انا بكتب في كم منتدي وفي منتديات فيها شباب شهاده عربيه بعض المصطلحات السودانيه ما بتخش في راسهم كويس الا بالشرح
شكرآ لملاحظاتك واتمني ردي يكون برد بطنك

[الشمشار]

شماشيـــرو ،،العجيب ،،

ان شاء الله يا يما التاية ،،،،

سوق الخضار أم درمان ،، حدث ولا حرج ،،
لا يخلو مكان بالسوق الا وتجد من يدعي ويشتم ،، ويسب ،، ويلعن ،،
مافي أخلاااااااااااق نهائي ،،
لكن ده من شنو ياربي ؟

اللهم أجعلنا ممن يعف لسانهم عن النطق بالسوء يا كريم ،،

تسلــــم شماشيــــرو ،،،

اللهم اميييين
والله ما السوق بس في الحياه العامه وفي البيوت
غايتو ربك يعدل الحال