هابي لاند

[الشمشار]

سلامات
محمد او هابي لاند
شاب في مقتبل العمر لكن درويش وزي مابقولو الشباب معااااااااااااااااااااااااط
ومعااااااااااااااااط يعني بتاااااااااااااااااااااع اقصد يعني براااااااااااي
وسبب تسميته بهابي لاند انو اهبل مابعرف يتصرف
ودائما خاتي نفسو

في مأزق
ومأزق كبير
قصه هابي لاند هسي بعد الفاصل

[الشمشار]

يعتبر هابي لاند آخر خيارات حسناوات الحله وشيناته ذاتو والبت كان بقت كبيره جقروته ما بتفكر في هابي لاند
(جقروته دي يعني بتاعوته )
قلنا مابتفكر في هابي لاند لانو ببساطه اهبل والسبب التاني المهم انو ود امو يعني عووووووقه وتلوووووووووووو وقه وشارب مويه السبلوقه
((عوقه يعني بتوعه وتلوقه برضو بتوعه السبلوقه دي بتاعه العرش ماالشلال ياحبيبين ياقدام ههههههه ))
اها
من سوء حظ نازك انو هابي لاند باكي بكاء شديد بي لغه الشباب في بتها رهف
ماتسمعو الاسم (رهف)
وتقولو القبه تحتها فكي والله من شناته الدايه الولدت نازك بيها من اليوم داك ولي تاريخ اللحظه دي تتوع وتعمل ال............ خلوها ساي

( الرقيب مرات حاسد مابخليني اكتب الدايرو)
المهم
نازك ليها كم يوم مرقده في المستشفي والسبب هابي لاند لانو رهف ذاتها قليبه رف وبي تحت تحت كده دايراهوووووووو
البووووووووره حااااااره
نواصل بعدشويه

[الشمشار]

بلي بلي بلي

(دي بري بري بري ماتفضحونا مع نازك دي اصله لجناء )

انا بت ابوي اعرس ليهو بتي
((انا فترت من الترجمه اخير اكتب مترجم بدل اكتب كلامه واترجمو والكيبورد ذاتو فتررررررر ))
بتي المربياها بالكولا ولبان بولا
((لبان بولا دي اسالو منهاتغريدا))
بتي المربياها بالبرتكان واللحمه الضان
((ابو 30 جنيه للكيلو ))
انا بتي بت العز واكل الوز
انا غايتو بكتب ((زننننننننننننننننننن))
اعرسها ليهو
القبيح السنيح
((في دي صدقت ))
العوقه اب رياله
((يخس عليها قرف يقرفها الغداء قرب ))
انا اعرس ليهو بتي الصغيره وجاهله
((صغيره دي ما ممكن لكن جاهله دي احتمال كبير ))

الصبي اب رقبه اب تفه

((تفه دي يعني بتاعه ))
غادي غادي والجدري بيعادي
انا بعد العمر ده اناسب جواهر
ام عيونا مجحرات
ام طوالات
كان شفتها جايه من بعيد
الزرافه ام رقبه جاااااااات
بري ياسيدي الحسن هابي لاند ده ما يلقي روحو ال..........

((الرقيب هنا لازم يتدخل خلوهو مالكم انتو ))

نواصل بعد شويه
هسي النشوف هابي لاند الحاصل علي شنو بعد الفاصل

((فاصل الردح ياجماعه ))

[الشمشار]

انا بت ابوي امش ليها
وحات النبي ما بتحصل

دي جواهر ام هابي لاند
مخاطبه ابنها الذي طلب منها الذهاب الي نازك ام رهف
عشان تخطب ليهو رهف
هووووووي بسم الله الرحمن الرحيم
((ده انا ماتتخلعو))
انا نسيت اسلم عليكم بقيت جني سلام زي عبدالله ابو سلام وده قصتو بحكيها ليكم مره تانيه
كيفكم ان شاء الله طيبين ومن الفواصل ما معانين

اها
جواهر
قالت ما بتمش
وقدر ما هابي لاند سج ولج مع امو وقفت دوت
(هسي اشرح ليكم دوت ولا سج ولج؟؟؟؟ )
اها
دوت زي مابقولو اهلنا الغرابه معناها وقفت نهائي او وقفت الف احمر زي مابقولو اهلنا في الشمال
وسج ولج معناها كرر المحاولات باستماته

تقاطرت جموع المحنسين
(من حناسه وحناسه دي ما حا اقول ليكم يعني بتاعه لانو البتاعه دي مفروض تعرفوها براكم )

تقاطرت جموع المحنسين لمنزلي نازك وجواهر
لانهم حسو انو رهف دي زول بياخده غير هابي لاند مافي
وهابي لاند ذاتوووووووو كان ختي رهف دي الايقضي باقي حياتو عازب
اها تدخل الاجاويد واقنعو الامين
(جواهر ونازك )

وان كانتا ماراضينات ميه ميه لكن غايتو يسون شنو ؟
وجاء يوم العرس والناس مبسوطه
رهف من فرحتها بتغني ياللهناء ياللمني يا للسعاده الفيها انا
وهابي لاند يرقص بي رقبتو الطويله ديك ويكورك بي صوتو الزي الرعده دااااااااك
ابشروووووووووووو
ابشرووووووووووووو
وفجأه صحيت من نومي لقيت الشمس دي مولعه نار اتاريني كنت بحلم لي هابي لاند اللي الليله دي ما اتزوج الله يديهو الزوجه الصالحه قولو آمييييين

نقطه سطر فوقاني

الي متي ينظر الي الجمال والمال وتنسي الاخلاق الكريمه ؟

نقطه سطر تحته طوالي

لماذا يتزوج البعض ارضاء لاهاليهم ؟؟؟؟

نقطه وسطر بتاعاني اقصد آخراني

ليتهم يعرفو ان كل شئ زائل والحب هو الباقي

علي سيره الباقي البوست ده كمل بالمناسبه ومافيهو باقي والباقي الله
ودعتكم الله

[عنكوليب]

الحياة نفسها بنيت على الحب ،، وأساسها كذلك ،،
يتزوج البعض نظام شوفونا ،، ومجاملات أهل ،، (جدوالله) ،،
حرم البت ل ود عمها ،، يا تعرسو ،، يا امها محرمة ،،
وقالو واحدين كدة القروش بتقع في القروش !!!
يعرسوا ناس القروش عشان القرش xالقرش = قرشين ،، وزيادة ل عربية الشيلة ،،
وخرفان وفواكه الجرتق ،، وموية رمضان ،، وكسوة العيد ،، ال بتفرجوا فيها الناس ،،
وفطور العريس ال ب الثلاجات المتحركة ،، وموسيقا البوليس تظمبـــر لاااااامن تصل ناس العريس !!!
والبيوت ال ما خمج ،،، والدهب ال بالسحـــارات ،، أجي يا ولدي ،، ده كلوا ،، ويعرسوا الفقراء ليـــه ؟

سنه والتانية والريحة تفوح ،، معرس قبلها وأولادوا قدرها ،، والشكله تقع ،،، ورورررروووووك ،، في شنو ؟

طلقــــوها ،، أديتو الخلا والهبوب تشيلوا ،، العرووووووس ؟

والجمال منفـــوس ،،، يعني وذي ما قالوا : كل الناس بتعاين للزول الجمييييل ده ،،،
وبكرة .. عاين ليك ليــه ؟ انت بتعرفيه من وين ؟ من البيت ده تاني ما تمرقي ؟

يا ناس الحـــــب من أجمل نعم الله على العباد ،،،

[zahid]

الله يزيدك ابداع على ابداعك يا أخي الشمشاااااااااار.

نقطة سطر جديد ..

كثرة الشرح وترجمة المفردات أضاعت علينا المتعة ...خليها كدة ساكت .

("ساكت" يعني خليها مفتوحة وليس معناها "صامت" ...أخخخخخخخخ أنا ذاتي بديت أشرح).

[mahagoub]

ود حبوبتى كيفنك
الشمش دى ما لقت تطلع الا فى الوكت ده

[الشمشار]

الحياة نفسها بنيت على الحب ،، وأساسها كذلك ،،
يتزوج البعض نظام شوفونا ،، ومجاملات أهل ،، (جدوالله) ،،
حرم البت ل ود عمها ،، يا تعرسو ،، يا امها محرمة ،،
وقالو واحدين كدة القروش بتقع في القروش !!!
يعرسوا ناس القروش عشان القرش xالقرش = قرشين ،، وزيادة ل عربية الشيلة ،،
وخرفان وفواكه الجرتق ،، وموية رمضان ،، وكسوة العيد ،، ال بتفرجوا فيها الناس ،،
وفطور العريس ال ب الثلاجات المتحركة ،، وموسيقا البوليس تظمبـــر لاااااامن تصل ناس العريس !!!
والبيوت ال ما خمج ،،، والدهب ال بالسحـــارات ،، أجي يا ولدي ،، ده كلوا ،، ويعرسوا الفقراء ليـــه ؟

سنه والتانية والريحة تفوح ،، معرس قبلها وأولادوا قدرها ،، والشكله تقع ،،، ورورررروووووك ،، في شنو ؟

طلقــــوها ،، أديتو الخلا والهبوب تشيلوا ،، العرووووووس ؟

والجمال منفـــوس ،،، يعني وذي ما قالوا : كل الناس بتعاين للزول الجمييييل ده ،،،
وبكرة .. عاين ليك ليــه ؟ انت بتعرفيه من وين ؟ من البيت ده تاني ما تمرقي ؟

يا ناس الحـــــب من أجمل نعم الله على العباد ،،،

والله ناس شوفونا ديل انا واجعني خلاص وناس القروش في القروش وربو الكروش ديل كمان محنهم كتيره
شكرآ عنكوليب ع الاضافه الثره مانعدمك اختي

[الشمشار]

الله يزيدك ابداع على ابداعك يا أخي الشمشاااااااااار.

نقطة سطر جديد ..

كثرة الشرح وترجمة المفردات أضاعت علينا المتعة ...خليها كدة ساكت .

("ساكت" يعني خليها مفتوحة وليس معناها "صامت" ...أخخخخخخخخ أنا ذاتي بديت أشرح).

زاهد تسلم
لو لاحظت لي اي موضوع لي حتلقي اني ناقله من منتدي تاني اكون كتبتو فيهو ولو طالعت بوست من وين ليك يا الشمشار ؟؟؟ حتلقي اني عضو في كام وستين منتدي وفي بعض المنتديات الكلام البكتبو بحتاج ترجمه وتخريمات هههههههه استحملهم او استحملني انا بجيب الموضوع هنا بي ضبانتو
خالص تقديري لك

[الشمشار]

ود حبوبتى كيفنك
الشمش دى ما لقت تطلع الا فى الوكت ده

ههههههههههههه تصور انها طلعت سخنه نااااار كمان هههههههههههههه

[telecom]

ياخ انت مبالغة ابداع الف انا لى كم ساعة بقرا فى بوستاتك ندمتى على الفترة الانقطعتا فيها بالجد مبالغة وكان باريت بوستاتك دى يانى الطردونى من البيت والشغل اليوم كله متنحة فيها الله يستر