الحاجات دي إختفت ليه

[خالد هاشم علي]

سلام كتير لأحبتي في منتدي ودمدنيات وقبل أن أدخل في الموضوع أود أن أسجل صوت عتاب خفيف للمشاركين في صفحة ودمدنيات وذلك لقلة المشاركات والمواضيع في الأونة الأخيرة (إنشاء الله المانع خير، مشغوليات ولا شنو الحكاية) أتمني أن نشاهد مشاركات ومواضيع مكثفة في موقعنا الحبيب علي نفسي ( ودمدنيات) وكل صفحات المنتدي.
ندخل في الموضوع ، وهو إني لاحظت إختفاء ظواهر وعادات كنا نقوم بها أيام شبابنا وإختفت هذة الأيام وبقيت أتساءل ياربي الظواهر دي كانت غلط ولا شنو؟ولا الغلط في الزمن ده ولا الحاصل شنو؟؟؟.
أنا حاأتناول بعض الظواهر وياريت تشاركوني بظواهر أخري إختفت سلبية كانت أم إيجابية فقط دعونا نتذكر مامضي.
1/ الرحلات:
وين الرحلات ياجماعة ؟؟؟ لأنها كانت حاجة أساسية ومابنصدق تجي مناسبة ( رأس السنة ، الإستقلال،العيدين،مناسبات النجاح، التخرج ،........ألخ).وكان في كل حي في ناس مسؤلين من تنظيم الرحلات دي ، ناس للترحيل وناس للعضة وناس للطرب( يعني كرنفال فرح رسمي) وكل اسرة في الفريق بتعمل حاجة يعني ناس يعملوا سلطة أسود وناس ....، وده بالإضافة طبعاً للخروف لأنه كان متوفر والحصول عليهو أسهل حاجة.
ياربي الحاجة إختفت ليه. الناس مافاضية ، ولا ده كلام فاضي وعدم شغلة ولا شنو؟؟؟؟
2/ الدافوري
ياسلام علي الدافوري في الفريق والمنافسة والندية ، يعني من عصراً بدري تتجهز وتجري الفسحة عشان تضمن إنك تلقي طريقة تلعب مع الجماعة، وطبعاً زمنا كان أكتر حاجة متوفرة هي الساحات دأخل الأحياء لكن الله يجازي ناس الحكومة عملوها لينا كلها منتزهات ورياض أطفال ولجان شعبية.وزي ماقال لاعب المريخ السابق الدولي كمال سينا ( هسه لو في زول شاكلك ماتقدر تقول ليهو طالعني، يطالعك وين؟؟؟ مافي أي فسحة يطالعك فيها.
أكتفي حالياً بالظاهرتين ديل وأترك الموضوع مفتوح للتداول والنقاش ولمزيد من الظواهر التي إختفت. ونلتقي....
ودمتم....

[ابو المهتــدي]

بسم الله الرحمن الرحيم
الحبيب الغالي خالد لك التحية
المتغيرات في هذا الزمان شملت الكثير في كل مناحي الحياة 0 ومن اهمها
بداية بنهج الطفولة 0 ولعابها 0وتلك التربية التي 0انقلبت 180 درجة 0
حيث كان سابقا للعب يعتمد علي موروثنا 0وتصنيع العابنا مما يربي الفكر ولاعتماد علي النفس وتقوية الزهن والادراك 0 والتجمع في جماعات كل بما لدية من تلك 0 وبعدها خش علي تصنيع تلك الشراك للعصافير وشقاوة ايام الخريف 0 وما لها من تقوية البنية الجسمانية 0 والاقدام وعدم الخوف 0 وخش ايضا الالعاب المسائية بين ابناء الفريق 0 ومسمياتها 0 شليل 0 حرت 0 الرمة وحباسها 0 والكثير الكثير 0وما لها من تقوية البدن والتحمل 0
ونتمي التواصل في الحديث بالدرج 0 وكل بما يدرك في السرد 0 من تلك الحقب الي ايامنا هذه ولك التحية

[خالد هاشم علي]

شكرا أخي أبو المهتدي علي المرور والمداخلة وذكرتنا بي حاجات كتيرة زي شليل والرمة والحباسة وشدت وكمبلت وحاجات ممتعة ماكنا بنقدر نعيش من غيرها . لكن ياأبو المهتدي ليه تختفي حاجاتنا الحلوة دي وأنا أبصم بالعشرة إنو حتي لعباتنا زمان كانت إيجابية. وكل حاجة كنا بنعملها كان عندها قيمة وكان عندها فايدة. طيب ليه إختفت؟؟؟.

[امير عبدالباقي]

الاخ خالد
فعلا اشياء كثيره اختفت زمان كنا بنلعب البلي وكمبلت الجوع كتله وام الحفر صفرجت دي بزات بتفتح المخ وزيد الزكاءلانها عاوزه تركيز شديد والدافوري .هل اختفاء هذه الاشياء من اسبابها العولمه والتكنلوجيا الحديثه
اماعن الرحلات اعتقد الناس كلها اتخارجت من السودان والجيل الجديد ما لقي الناس الكانت بتعمل الحاجات دي كدي ياخالد اتزكر اصحابك الكانو معاك ويقومو بالرحل كم واحد موجود في مدني؟

[أبوريلان]

الأخ خالد

سلام

والله ذكرتنا بزمن جميل وزمن مستحيل يرجع تانى ، تعرف ياخالد زمان لو عندكم حيطة وقعت بتعمل نفير لأولاد الحى يوم الجمعة بجتمعوا كلهم وببنوا الحيطة فى يومها حتى لو كان سور كامل أو غرفة ، اليوم مافى حد ممكن تطلب منه هذا الشىء لازم تجيب بناء أو مقاول عشان يبنى الحيطه ، وزمان بعد بناء الحيطة يقولوا ليك بالمناسبة دى نعمل بارتى الليلة وتعمل بارتى ، أنا بقول دى من علامات الساعة لأن اليوم أصبح لا يكفى حتى للدردشة مع أبناء الحى وأصبح الأسبوع يوم واليوم ساعة والساعة دقيقة ، زى ماقلت الدافورى وين راح راح لأنو التكنولوجيا جابت لينا البلى إستيشن يعنى بدل تلعب وتتعب وتعرق وتوسخ ملابسك وتغبر الناس بالتراب تلعب وأنا تحت الكندشه ، كل هذه الأشياء التى إندثرت بسبب التقنية الحديثة وإيقاع الحياة السريع ( العولمة ) .

مشكور خالد هاشم على ويديك العافية

[أبوبكرحامد]

مشكور أبو هاشم لإثارتك موضوعات من شأنها تحفيزنا للتساؤل حول اختفاء

الكثير من الظواهر من حياتنا .

موضوع الدافورى اشتهرت به مدينة مدنى وكانت هنالك بعض المجموعات التى

تشكل فرق الدافورى فى كل الأحياء ، وأذكر ونحن أطفال كنا نذهب لمنزل

جدى الأمين حامد بفريق الجامع وكان هنالك دافورى أمام مدرسة الأميرية

ومدرسة النهر وكان دافورى فى قمة الروعة والشباب كلهم حماس وحيوية .

وكانت هنالك مجموعة تلعب فى المكان الكائن خلف المحكمة الشرعية.

ليتنا نستحضر كل فرق الدافورى فى كل الأحياء .

مع مودتى

ود الماذون

[خالد هاشم علي]

شكراً اخي أمير وزي ماقلت وين الناس البيعملوا الرحلات ( كلهم إتخارجوا ومنهم من ينتظر) لكن ياأمير برضو يظل السؤال قائم ، ليه الحاجات دي إختفت ؟؟؟؟ وليه الجيل الجديد ماواصل فيها؟؟؟. وليه تندثر مع جيلنا ؟؟؟ وخوفي يجي يوم لو قلت لواحد السلام عليكم مايرد عليك ويفتكر إنك داير منه حاجة.
عزيزي Myrelan :شكراً كتير علي المداخلة وإنت تناولت موضوعين مهمين شديد وكنت ناوي اتناولهم في الظواهر التي إختفت وهي ظاهرة النفير وظاهرة البارتيتة.
زمان من كترة الشباب المشاركين في النفير إحتمال كبير ماتلقي حاجة تعملها بس تقعد تونسهم.لكن شوف هسة.....
ياخي حالياً لو نط عليكم حرامي والله إلا تسكو براك...، وماتلقي زول يمسكو معاك ولا حتي زول يكورك ( ياهو ياهو ياهو ).
اما حكاية البارتي فدي كمان حكاية تانية والحاجة الطريفة إننا وبطريقة ما كنا بنفرق بين البارتي والحفلة، فالبارتي يعني ( حفلة بالمسجل) والحفلة يعني ( بالفنان) شوف البساطة الكنا فيها.وده ماجهل مننا لكن مصطلح عشان نفرق بيهو بين الحفلة والديسكو.
الحاجة الأخطر من كده ياأخوانا نحن زمان كنا بنشوف بنات الفريق زي أخواتنا وأكتر من كدة . ومافي واحد يقدر يتعرض ليهم لا من داخل الفريق ولا من خارجه.لكن الزمن ده بقي عادي تجكس بت الجيران وبت الفريق. ليه ياجماعة والحاصل شنو؟؟؟؟؟الدنيا إنتهت...، ولا بقي مافي فرق بين الصاح والغلط ولا شنو الحكاية؟؟؟؟
ياجيل ياجديييييييييييييييييييييييييييييييييييييييييييييي يييييييييييييييييييد.
أفيدونا......

[خالد هاشم علي]

الشكر موصول لك عزيزي أبوبكر وحكاية الدافوري دي حاجة ماساهلة لأنها كانت بتطلع مواهب كبيرة سجلت أسماءها في عالم الكورة.وحالياً ماتقدر تلعب كورة إلا تكون مسجل في أحد الفرق بالدرجات المختلفة( ولا عندك واسطة).
ودي من الحاجات الخلتني ماأستمتع بي إجازتي ، لأنو مافي ناس تتكلم معاهم والموجودين مافاضين ليك. وتستني متين يجي العصر عشان تمشي تشوف ليك دافوري وبرضو ماتلقي الدافوري. تستني الليل عسي أن يكون فيه الفرج ، يجي الليل ويمشي وإنت ماجايب خبر وتلقي الناس إتدمدمت من الساعة 8. وماتعرف تعمل شنو . تقوم إنت زاتك تدمدم مع الجماعة.
طيب ياخوانا العمل شنو؟؟؟؟ يعني لو مامدني وناسها والأهل والجيران الواحد فينا يفكر مليون مرة قبل ماينزل الإجازة.