شــــيخـــه الـــــزار

[الشمشار]

سلام
في بوست شيله سنيه وبوست دحن مسحاخوم وبوست الفكي محيان تعرضت للدجالين و مايفعلونه في مجتمعنا نواصل في فتح ملفات الدجالين وهذا ايضا بوست من ارشيفي
وهو عن الزار او الظهر
اثناء دراستي الجامعيه طلب منا ان نقوم بعمل برنامج كمشروع للتخرج بالمناسبه المشروع ده كان في تالته لانو في رابعه في مشروعين تانيات علي حسب قوانين اكاديميه السودان لعلوم الاتصال والتدريب الاعلامي محل دراستنا
بيني وبينكم كنت بفكر في موضوع يكسر الدنيا والمنافسه بين المجموعات في الجامعه كانت علي اشدها هههههه عارف في واحد حيجي ناطي لي ويقول لي هسي ده دخلو في الموضوع شنو ؟؟؟
اقول ليكم
علي حسب ماكان جاري في الجامعه انو كل قروب بحاول يطلع احسن ماعندو وكان في منافسه والشغلانه فيها جوائز
(هههههههه لكن ما ادو اي زول حاجه )
القروب بتاعي كان
انا
اسراء
مولانا ام سلمه
(الزوله دي ماقاضي ولا وكيل نيابه بس ملتزمه شويه بنقول ليها مولانا )
اعود للموضوع شكلي خرمت كتير انتظرو شويه

[الشمشار]

اها ياشباب جيتكم راجع
فكرت في الزار
طبعا في ناس صدق يامؤمن الزار ده علاج
في البدايه ناقشت ام سلمه واسراء رفضو في الاول وقالو الاستاذ المشرف ما حيقبل
معلومه الاستاذ المشرف كان استاذ علي الريح الصديق
المهم انا ما حناك بعد تعب كده خليتن ليك وافقن واكتر من كده انو في واحده فيهن بتعرف شيخه زار في حلتهم وفعلا بعد اقنعنا الاستاذ ذهبنا الي شيخه الزار
دقينا الباب فتحت لينا واحده من مساعدات شيخه الزار
(الله اعلم لكن شكلها كده عقلها ماتمام )
سلمت علينا وقالت لينا اتفضلو
اول حاجه لاحظتها زير مقطوع بالطول ومركب في الحيطه ومدهون بي بوهيه بيضاء وكاتبين فيهو سوره الملك بالدم
انا لما جسمي اقشعر
قالت لينا المساعده اتفضلو ودخلنا اوضه
في الحيط سبع لوحات كلها لي كدايس
ايواااه صور كدايس
طبعا الغرفه جميله ومنظمه ويفوح منها رائحه البخور المسبع
نسيت اقول ليكم انو الملايات كان لونها احمر حتي حفاظه المويه والكبابي البلاستيك كان لونها احمر (استاد المريخ بس )
انا مريخابي مافي زول يجيني ناطي يقول لي بتستهر بي استادنا
جلسنا وعاينت للبنات المعاي لقيتن دايرات يطيرن من الخوف
بيني وبينكم انا ذاتي لاوذت وفي عز ملاوذتي ديك باب الاوضه انفتح و.....
انتظرو بعدين بتم ليكم
جاااااااااااي

[الشمشار]

الباب فتح
وخشت .....
امراه في الخمسين من عمرها تقريبا
مكشكشه بالفضه
ختم فضه وحجول فضه وغوايش فضه ويييييييييك
يعني مره بالفضه ههههههه
تفرست ملامحنا
سلمت بجفاء غريب
عيونها فيها ميه سؤال وسؤال
الغريبه اننا كلمناها من بدري وقلنا ليها دايرين نعمل بحث في الجامعه
في البدايه كانت توجه حديثها الي زميلاتي الكانو معاي واتجاهلتني تماما
انا ما شليق طوالي خشيت ليك فيها بالعرض
انا
نحن طبعا جايين من الجامعه وقلنا نعمل بحث عن الزار طبعا الزار عالج كتير من الناس
هي
ايوه ياولدي الكلام ده صاح وانا والحمدلله عالجت ناس كتار
انا
اول حاجه داير اعرفه ياخاله كيف بقيتي شيخه
يعني ممكن اي زول يبقي شيخ زار او كوديا زار ؟؟؟
هي
كوديا دي كلمه كبيره ياولدي
انا بقيت شيخه بعد الاسياد طلبو مني اني ابقي شيخه
انا
كيف يعني ؟؟؟
هي
انا كنت بدرس في مدرسه الراهبات ام درمان وبعدين يوم من الايام وانا طالعه من المدرسه عميت
انا
العمي الواحد ده ؟؟؟
هي
ايوه العمي الواحد ده وودوني لي كم دكتور وما اتعالجت لحدي ما ودوني للسناهير وعالجوني والحمد لله فتحت
انا
وبعد داك
هي
كدي ياولدي اشرب المويه دي ماتسخن وانا بتم ليك

[الشمشار]

انا
وبعد داك ياخاله
هي
بعد بقيت كويسه شفت رؤيه في المنام
انا
ممكن تحكيها لينا لانها بتساعدنا في البحث
هي
جدا
شفت راجل لابس ابيض وشايل مراويد وقال لي يا..... انا اديتك المراويد ديل عالجي بيهم الناس
انا
بس
هي
اي والله ياولدي
(الزوله دي كانت بتكتر في الحليفه )
وقمت من النوم مهجومه وبعد داك نسيت الموضوع
انا
اها وبقيتي شيخه كيف ؟؟؟يعني هسي انتي قبل شويه قلتي انو نسيتي الموضوع علي كده الرؤيه دي ما اتكررت ؟؟؟
هي
طبعا اتكررت ونفس الرؤيه شافتها امي الله يرحمها وقالو ليها نحن ادينا ...... الاذن
انا
هم منو؟؟؟ واذن شنو ؟؟؟؟
هي
ما الاسياد ياولدي والاذن بي اني اعالج
وفعلا مشينا للسناهير وعملو لي سبعه دقات وبقيت شيخه
انا
اها واول زول عالجتي منو ؟؟؟وكان عندو شنو ؟؟؟
هي
حتستغرب ياولدي لو قلت ليك انو حضره اللواء .......
وكان محبوس في انقلاب والاسياد جوني وقالو لي اللواء ......لازم يطلع من السجن
انا
وانتي بتعرفي اللواء ده قبل يجوك الاسياد
هي
سجمي كيفن مابعرفو نحن ماكنا ساكنين جيران في الاشلاق ومرتو صاحبتي
انا
اها عملتي شنو ؟؟؟؟؟

[الشمشار]

انا
وعملتي شنو ؟؟؟
هي
مشيت بيت سيده اللواء وبخرتو بالبخور المسبع مشيت سبعه مرات وبخرتو سبعه مرات
انا
الرقم سبعه ده عندو سر
هي
ايوه لكن مابقدر اقولو ليك
وبعد السبعه ايام دي مرق من المعتقل
انا
وادوك شنو ؟؟؟حلاوه الخروج يعني
هي
بري ولاشي ادو الاسياد
انا
والاسياد ديل صحي طلباتهم كتيره وصعبه
هي
لالالالالا القال كده منو ؟؟؟طلباتهم بسيطه واي زول ممكن يجيبها
انا
زي شنو مثلا ؟؟؟؟؟؟

هي
الديك الرومي مثلا ومره اللواء دي ذاته ماكانت مابتلد وانا بعد طلعت راجلها من المعتقل عالجتها لكن ما ادت الاسياد حقهم وجابت لي علبه حلاوه قبل تصلني الاسياد كلموني وقالو لي فلانه جايبه لينا علبه حلاوه ونحن ما دايرنها كان ماجابت لينا طلباتنا وكان من ضمنها الديك الرومي ماحنخليها وجاتني وانا قلت ليها ارجعي بالحلاوه دي انا مادايره اعوق اولادي



انا
كيف يعني تعوقي اولادك ؟؟؟؟
هي
لو اي واحد اكل من الحلاوه بمرض وبموت لانو الاسياد ماراضين وفعلا انا استلمت الحلاوه لكن دسيتها في الدولاب ولفيتها بي طرح الزار وجات بتي فتحت الدولاب وانا كنت بره البيت الاسياد طوالي كلموني قالو لي العلبه اتفتحت
بتي اكلت من الحلاوه وبقت ليها سبب مرضت وماتت

[الشمشار]

انا
ماتت ؟؟؟؟؟؟؟؟؟iiiiii
هي
اي ماتت ياولدي الله يرحمه
وبعد داك جاتني مره اللواء وقالت لي دايره تتعالج لانها مابتلد وفعلا عالجتها وجابت الحاجات الا الديك الرومي مالقتو لكن ادتني قروشو وانا جيتو
والديك الرومي طبعا بجي من جهه النيل الابيض وكوستي والمحلات دي
انا
اها وبعد داك
هي
ولدت ولدين وانا بعد الاولاد كبرو يوم مشيت زرتها والغريببه انو الاولاد ماشافوني لكن كبسوني في رقبتي وبقو يلعبو معاي
انا
والعلاج ده واحد لي كل الامراض يعني اي زول عيان ممكن تعالجي بي طريقه واحده ؟؟؟
هي
ايوه
انا
طيب انا زي ماشايفاني قدامك معوق ممكن اتعالج
(هنا البنات المعاي قربو يجرو هههههههه)
هي
اي بتتعالج
بعدين انا نسيت اقول ليكم انكم ما مااول ناس يجوني من الجامعه عشان يعملو معاي بحث جاتني بت واخدت بالبحث العملتو معاي الدكتوراه من بريطانيا
انا
والله ماشاء الله
حاجه .....في نهايه كلامي معاك لو قلت ليك داير احضر دقه زار بتوافقي ؟؟؟؟
هي
جدا ياولدي ماعندك مشكله بس ماتكون ظاهر للزول البنعمل لي الدقه وانا الدقه بعملها كل يوم احد واذكرك انو ماعندي تصوير
انا
جدا ياخاله
يلا سلام
انتهي الحوار واليكم ملاحظاتي عن الزياره الاولي
اولا
طبعا الشيخه دجاله درجه ون عشان كده بتكتر الحليفه
هي متعلمه لكن ما بالقدر الكبير داك
نسيت اني قول ليكم انو الزير المقطوع بالطول ومكتوب فيهو سوره الملك بالدم معلق في حيطه الحمام
كذب المنجمون ولو صدقو
كانت هذه هي الزياره الاولي لي الشيخه ..... شيخه الزار
ولم نكررالزياره لان الذي خرجنا به كان كافيا في نظر الاستاذ المشرف وحذرنا من ان نذهب اليها مره اخري وقال بالعاميه كده (الزوله دي كان البوليس عمل كبسه وانتو عندها واطتكم اصبحت )
كان هذا هو العالم الاحمر عالم الزار وللامانه اني نقلت لكم كل ماجري واترك لكم الفرصه للردود
ودعتكم الله

[نزار احمد كوارتي]

موضوع خطير جداً بالمناسبه
لكن يخيل لي بدا يندثر خلاص
أحيي فيك روح المغامره لإكتشاف مثل هذه الأشياء

بالزقاق:-
زول بِتاع شِبَك بس, هسي ده بحث ليك؟؟؟
مالها البِحوث كِملت؟؟؟

هسي كان البوليس كبس وخالد في الشماليه؟؟؟
كان يسووا ليك شنو؟؟؟

معتصم وللا وليد واحد فيهم كان لحق جاك إنت براك عارف البحصل ليك شنو!!!
أخير ليك السجن يا أخوي

[الشمشار]

موضوع خطير جداً بالمناسبه
لكن يخيل لي بدا يندثر خلاص
أحيي فيك روح المغامره لإكتشاف مثل هذه الأشياء

بالزقاق:-
زول بِتاع شِبَك بس, هسي ده بحث ليك؟؟؟
مالها البِحوث كِملت؟؟؟

هسي كان البوليس كبس وخالد في الشماليه؟؟؟
كان يسووا ليك شنو؟؟؟

معتصم وللا وليد واحد فيهم كان لحق جاك إنت براك عارف البحصل ليك شنو!!!
أخير ليك السجن يا أخوي



ههههههه لابد من روح المغامره يا اخوي نزار عارف زي ماقلت اخير السجن
بالزقاق التاني
ليك وحشه كبيييييييره والزار يا اخوي لا انقرض لاحاجه لو داير بوديك

[عنكوليب]

شماشيرو ،،

أنا فظيعة في حب الأستطلاع ،،
مره مشيت ل الناس أو الشيوخ ال بعالجوا بالقرآن !!
ومرة مشيت بيت زار وانا لابسة أسود !! جهل مني ( حسب رأيهم ) ،،
ومرة مشيت مكتب أمن جوة ضهرية عربية !!!
ومرة سكاني الكلب البوليسي وأنا بشمشر ،،،!!!


ليك تحية كبيرة يا أسلي ،،
ومازالت هذه الطقوس تمارس ،،
بل وعندهم تطورات كبيرة كمان !!!

[ود سعدابى]

الشمشااااااااار

ياااخ موضوعك شداااانى

بالجد كدا

انا بسمع سمع

لاكن بحب اشوووووووف ممكن

مااا تخاااف

بحب اغااامر

مره من زات المراير قامرتا
فى جزارة قديمة قالو مسكونة اها اتشجعتا ومشيت
بس فى كديس خت فينى خلعة لحدى الان مخلوع منو ؟
كنت قايلو من الجماعة

بين غوسين

انا داير اعرف الجماعة ديل جاااااااااااااااااادى معاااااااااك

يااااا ريت ياااخ تخدمنى فى الحتة دى
دستورى نزل انى اشوفهم ههههههههههههههه

تحاياى

[isamzaki1978]

المبارك (الشمشار) شيخ الظهر
يا العليك ساسقت وفتر
قولى جنيت ولا دستر
***
بمشى وبجيك راجع