كـرسـي الـنـجـوم ... مع عنكوليب

[بت أم درمان]

http://i39.tinypic.com/29xunlu.gif



أعضاء منتدانا الغالي الغاليين

http://i39.tinypic.com/2vjzvde.jpghttp://i39.tinypic.com/2vjzvde.jpg


ها نحن من جديد على بساط من الأخوهـ لصادقـه



نلـتـقـۑ لنـجـدد عهد الوفاء


http://i39.tinypic.com/2vjzvde.jpghttp://i39.tinypic.com/2vjzvde.jpg



نعود ونحن نحمل معنا أزهار لم تـزل تنشر العبير الـفواح



لـكل زاويـه من زوايا منتدانا


http://i39.tinypic.com/2vjzvde.jpghttp://i39.tinypic.com/2vjzvde.jpg



نعود عودة مميزة بتميز ضيفتنا



مميزة بأخلاقـها الرفيعـه وٺعاملـها الحسن والطيبة مع الجميع


http://i39.tinypic.com/2vjzvde.jpghttp://i39.tinypic.com/2vjzvde.jpg



قدمت الڪثير والڪثير للمنٺدى في وقت قليل

بدايتها كانت من النفاج

ونالت نجومية عن بوست رائع

وهو ( رأي أنثى )


http://i39.tinypic.com/2vjzvde.jpghttp://i39.tinypic.com/2vjzvde.jpg



نسعد اليوم باسـٺضافٺـها في ڪرسۑ النجوم


بكل الحب نستقبلها



كلمات المدح والثناء تقف بكل وَجلٍ امامها



فاهلا ومرحبا بك ضيفة عزيزة على قلوبنا

http://i39.tinypic.com/2vjzvde.jpghttp://i39.tinypic.com/2vjzvde.jpg


نجمتنا هي

( عنكوليب )


http://i43.tinypic.com/208d1c1.gif

[بت أم درمان]

http://wadmadani.com/vb/showthread.php?t=44134

[ahmed algam]

اهلا بنجمة

النجوم


عنكوليب

[محمد الجزولى]

اهلا بالنجمه في وطن النجوم
عنكوليب منوره الكرسي

[ريمون]

حباب عنكوليب ..
كرسي طاعم وسكروا كتير ..

[عنكوليب]

لكل الأحباب ،، وهنا أعني كل المنتدى ،،،
سعيدة جدا بوجودي في هذا الكرسي والذي أتمنى ان
أكون عند حسن ظنكم بي ،،،
سعيدة بكم كلكم لما وجدته بينكم من حب واحترام
من كل فرد بالمنتدي في كافة الأختصاصات ، والمناصب الأداريه ، وكل المتداخلين
من الأعضاء الذين أجد نفسي بينهم ، وأسعد كثيرا بالتداخل معهم ،
ومناكفتهم ، وأن أجد منهم ما أسعدني كثيرا ،،، ونقاشات وردود لم تخلوا من
الحب والتقدير ،،،

بت أم درمان لك مني تحية حب وتقدير ،، واشكرك كتير على كلماتك الراقية ،،
والتي اخجلتم بها تواضعنا ،،

وأحيي من هنا كل ابنائي وبناتي بالمناصب الجديدة وانتم أهل لذلك
واتمنى أن يجد المنتدى تحت اشرافكم ورعايتكم ما هو جدير به .

النفاجه ،، أحلى ناس ، وجدت بينكم كل جميل ورفيع ،، النفاج هو باب
دلفت منه لمنتدى ودمدني ،،، وما أوسعه من باب ،،

أتمنى أن أروق لكم وأن أكون ضيفا خفيف الظل ، محبوبا لا ممقوتا ،،


أتمنى السودان المستقر الآمن ،،،
دامت ودمدني بدوام حبكم لها ودوام حبكم لبعضكم ،،،

[عنكوليب]

اهلا بالنجمه في وطن النجوم
عنكوليب منوره الكرسي

محمد الجزولي ،، أين انا
من الشموس الساطعة تلك ،، ؟

[عنكوليب]

اهلا بنجمة

النجوم


عنكوليب



أحمد علقم ،،
وجدتك دائما رقيق الكلمات ،،
ونجما ،، حتى قبل أن يعلن عن ذلك ،، أشكرك ،،

[مايسة]

منورة عنكوليب كتيييير

وأكيد معاك وجايين

[صلاح ودالطاهر]

الخبر الاكيد قالو البطانه اترشت وعنكوليب في مكان النجوم اتعشت اها يا عشائي عائزين البطاقه الشخصيه وسؤال لماذا اختيار اسم عنكوليب لك الود وحبابك الف يا بت عزاز الناس

[ريمون]

من الواضح انو نشأتك الأولي بصماته قوية علي شخصيتك عشان كده اسهبي لينا شويه في الحتة دي ..

[عنكوليب]

ميوسا بقيتي لي ذي مقدمي برامج الطبيخ ،،

ما تروحوش بعيد وما نحولوش القناة راجعين لكم ،،

منتظراك ،،

[عنكوليب]

الخبر الاكيد قالو البطانه اترشت وعنكوليب في مكان النجوم اتعشت اها يا عشائي عائزين البطاقه الشخصيه وسؤال لماذا اختيار اسم عنكوليب لك الود وحبابك الف يا بت عزاز الناس


ود الطاهر ،،،

وجدتك كثيرا متداخلا معي ، محاورا بارعا ،
تأتي بما قل ودل ، اسمك المهني يخيفني ،
الناطق الرسمي باسم القوات ال ...... !!!
احببت العنكوليب منذ صغري ،،، لذلك أردت به تذكيري بأيام
الشباب لكي أجاريكم أيها الشباب ،،، وطعم العنكوليب ليس سكريا بحتا
فانه مزيج بين السكر والملح ،، وان أردت أن تعرف الطعم الحقيقي لأي حلو
أضف اليه قليل من الملح ( حتى الشاي باللبن عندما تضيف له ذرات من الملح
يصبح شاي بصحيح مش أي كلام - جربو بكرة الصباح أو في المغرب اليوم ) ،،
واتعشى بيه بدل ما تتعشى بي ، وأدرك تماما معنى أن تكني انسانا ب عشاي ،،

ود الطاهر ،،، أشكرك كثيييير والله ،،،
وياربي هل العنكوليب يكفي لأن يجاري عمالقة أمثالكم ،،،

دمت يا بٌني ،،، نعن بٌني ،،،

[عنكوليب]

من الواضح انو نشأتك الأولي بصماته قوية علي شخصيتك عشان كده اسهبي لينا شويه في الحتة دي ..

ريمون العزيز ياخ ،،

ياخ بالله وضح لي بالضبط كدة ،،،انت عاز شنو ؟
اتحدث عن شخصي ؟ ده كلام كتير خلاس ياخ ،

عن نشأتي ؟

وضح ، ابن ، أفصح ؟

[مايسة]

ميوسا بقيتي لي ذي مقدمي برامج الطبيخ ،،

ما تروحوش بعيد وما نحولوش القناة راجعين لكم ،،

منتظراك ،،


تيب اهو رجعنالك

بعد سؤال ود التاهر ليك (اي السيرة الذاتية)
تعرفي السيرة الذاتية دي مهمة - لأنو الاسئلة بتكون معتمدة عليها
يعني تقدري تقولي ركيزة الاسئلة
------------------------

ما هو أكثر شئ تكرهه عنكوليب
والعكس طبعا أكثر شئ تحبينه

في ماذا تقضي عنكوليب وقت فراغها

ومعاك ومتابعين

[بت أم درمان]

مرحب عنكوليب

عارفة اهم شي في السيرة الذاتية الاسم
لان كثيرين بيعتبروا عنكوليب مذكر

[عنكوليب]

يا ودالطاهر قبيل لخموني بالفطور ونسيت في سؤالك شيء
مهم ، السيرة الذاتيه :
الأسم : آمنه عبد القادر حربي .
ولدت بمدينة ودمدني بحي بانت حيث منزل الأسرة العتيق دار المرحوم
والدنا طيب الذكر / ابراهيـــــــم حربـــــــي ، عليه رحمة الله .
ولكننا كنا نسكن آنذاك مدينة مارنجان - بيوت لموظفين - حيث كان والدي
عبد القادر حربي - عليه رحمة الله - مهندسا بورش ادارة مشروع الجزيرة - ميكانيكا-
كانت حياتنا الأولى كلها بمارنجان .

درست الابتدائية بمدرسة التمرين الأبتدائية للبنات - كلية المعلمات - سابقا
الثانوي العام بمدرسة المؤتمر الثانوية العامة بنات
الثانوي العالي بمدرسة عبدالستار الثانوية العليا بنات

عملت بشهادة الثانوية ردحا من الزمان بالخرطوم وكانت بدايتي بوكالات السفر
حيث قضيت بين التذاكر والسفر قرابة الخمس سنوات وبهذا المجال برزت حيث نلت
عدة شهادات من عدد من خطوط الطيران في مجال السفر والتذاكر والشحن الجوي والمعاملات
الجوية ،،، . وسافرت لعديد من الدول من خلال عملي .
بعد ذلك ذكيت للعمل بأحدى الشركات العريقة في مجال الزيوت والأستيراد والتصدير
_بدروسيم العالمية المحدودة - حيث كانت الوكيل الوحيد لزيوت بترومين آنذاك وكذلك كانت
تعمل في تصدير الفواكه والبهارات الجاهزة ، وعملت بها لمدة ثلاث سنوات ، وأنا بها امتحنت
للشهادة السودانية ثانية من مدرسة ودمدني الثانوية ، وانتقلت للخرطوم لدراسة الأدارة حيث
قبلت بمعهد الكليات التكنولوجية - وقد كانت السنة الأخيرة له كمعهد وصار بعد ذلك جامعة
السودان للعلوم والتكنولوجيا- حيث درست الأدارة وتخرجت بها ،، وعدت ثانية لشركة بدروسيم
ومنها امتحنت لنيل وظيفة بالهيئة العربية لأستثمار والأنماء الزراعي ، حيث وفقت وعملت بها
ثلاث سنوات .وتزوجت وانجبت ولم أمارس عملا بعد انجابي والحمدلله ،

الأن أنا أم ل محمد ويقين ، محمد في السنة الأولى - كلية الهندسة - علوم الأتصال - جامعة
التقانة . يقين في السنة الثانية الثانوية بمدرسة علوية عبدالرافع (كرري قديما) ،
أبو أولادي السيد/ كمال النضيف - ماستر محاسبة - رجل اعمال - مجال الأطارات

[ساريه]

مرحب بعنكوليب فى كرسى النجوم .. وكثيراً ما أبحث عن مشاركاتك فهى بطعم الالفه والطيبه والنقاء ... وتواجدك المستمر بالمنتدى دليل على إيمانك وحبك لهذا البيت ...

سؤالى ..... عمل المرأه فى رائك ضروره ولا حاجه ؟ وبما انك كنت مرأه عامله فى يوم هل تواجد المرأه خارج البيت طول ساعات العمل له تأثير على دورا داخل البيت ؟








ويا هنايه وهنايه ... ما تعاينو لى كدا ....

[آلاء عبد الرحمن]

اهلين عونكوليبة
قلنا نسلم
بث
^_^

[عنكوليب]

اهلين عونكوليبة
قلنا نسلم
بث
^_^


اهلا يا الوية ،،

لكن ليه تسلمي بث ؟

ان شاء الله خير يا بنية ،،،

[عنكوليب]

ما هو أكثر شئ تكرهه عنكوليب
والعكس طبعا أكثر شئ تحبينه

في ماذا تقضي عنكوليب وقت فراغها

ومعاك ومتابعين



يا ميوسا ،،، كيف أنك ،،،

انا بحب حاجات كتيرة ،،، وبكره حاجات شوية ،،

أنا عاشقة القصص المكتوبة سينمائيا ،، يعني أحب ان أشاهد القصص الرومانسية والبطولات القديمة
والاجتماعية المصورة سينمائيا ،،، احب مشاهدة العتيق من الرسوم والمنحوتات والاواني المنزليه ،،
أحب سوق خان الخليلي بالقاهرة وقهوة الفيشاوي ،، أحب الأعمال الخيرية خاصة في المدارس - مجالس الأباء-
أحب أعمال المطبخ جدا ،، أحب الأنترنت ،، وكثير يا ميوسا ،،،،

أكره قعدات النسوان- قهوة الاسبوع وما شابه ذلك - أكره النقد المستفذ ال غير بناء ، اكره الناس ال شايفة
روحها احسن من غيرهم والتعالي ، أكره غسيل العدة والملابس ،وأكره مشي الكداري ،،،


هناك أشياء حبها بديهي ،،، وهناك أخر كرهها بديهي ،،،

[بنت الرفاعي]

:):):)

لك أنقى التحايا عزيزتنا عنكوليب:).

بداية:
تحدثي لنا عن نشأتك لو سمحتِ.

:):):)

[mahagoub]

سجمه الرجل فى غسيل العده
ولا ريح نفسه وجاب شغاله
بحبك للروايات يكون ارتبط عشقنا للشمشار
كيف بتقضى يومك العادى

[أم سماح]

آمنة حربى
حبابك عشرة بلا كشرة .. وشرفتى ياست
شككتينى .. يخيل لى اننا دفعة دراسة

[عنكوليب]

:):):)

لك أنقى التحايا عزيزتنا عنكوليب:).

بداية:
تحدثي لنا عن نشأتك لو سمحتِ.

:):):)




بت الرفاعي ،،، مرام مالها ،،،؟


نحياتي وتقديري وأشكرك كتيرا على وجودك هنا
نشأتي :
أنا الكبرى في اخواني واخواتي ،،،
لم أعرف الدلال ،،، لكن كان والدي يدللني كثيرا ،، البكر وكدة ،، ومسميني
على والدته المرحومة / آمنه سعيد أحمد صالح ،،،
نحن من قبيلة الكنوز وعقابنا لسة في دراو في جنوب قنا ،،،
أمي بت عم أبوي ( في زول عندو اعتراض) ؟ ،، ههها ،،
كنا نسكن في مارنجان بيوت الموظفين كما ذكرت ،،، ولنا من الجيران كثر ،،
علاقاتنا الأجتماعية التي نشأنا عليها كانت قمة في الروعة وطعم الأهل في
الجيران الذين لم نحسبهم غير أنهم أهل لنا ،،،
كانت حياتنا منظمة جدا ،،،
القيام من النوم عند صلاة الصبح ،،، صلاة وتجهيزات المدرسة ،،،
أمي تعد الساندوتشات والزمزميات وشاي الصباح الذي لا يخلو من
اللقيمات أو الكيك ،،، وأمي انسان رائع جدا في اعداد الحاجات الحلوة
والطبيخ وقد كانت مرجعا في كتير من الأشياء والى اليوم ( متعها الله بالصحة والعافية )
نطلع من المنزل فمنا من يتجه الى ودمدني عشان المدارس هناك ومنا يذهب الى حلة حسن
برضو عشان مدارسهم هناك ونحن أربعة بنات وولدين ( ماشاء الله) ،،

تقلنا بصات ادارة مشروع الجزيرة لمدارسنا بمدني ،، ونقطع المسافة بين البيت وشارع
الظلط القادم من بركات وهي مسافة ليست بالبعيدة ولكنها كانت ممتعة جدا ،،،
شوالات القطن ،،، وعمال المحالج ،، والفريزين ( موظفين مهنتهم فرز نوع القطن وصلاحيته ) ،،
والترعة ،،، واحدةوقريبة من البيت والتانية جنب الظلط ،،،
ننطط في الشوالات نحنا ماشين المدرسة ولما نرجع منها ،،،

حفظنا كلمات كتير من الأجناس المختلفة التي تشارك في عملية حلج القطن وغيره من الأعمال
فكانوا ناس الشرق وجبال النوبة ،، والفلاته ،،،

وهناك كثير من الشخصيات ذات الأثر في نفس الأنسان لما لها من ميزات خاصة وافعال
وملابس ،،،
فكان الشاويش ( شخص يتخيل انه شاويش انجليزي ) يلبس أي نوع ربنا خلقو من النيشانات ،،
والصوف الأحمر والأخضر وغيرو ،،، زفة ألوان وما تنسوا الصفارة أهم شيء ،، والريشة
في أعلى البرنيطة ،،،

اسياد العيش واللبن ( لعند الباب ) والشحاتين عندهم مسميات ،،،

المهم كان المجتمع حلو جمع في داخلو كثير من ألوان الطيف السوداني
كان الخلق الكريم والتربية النظيفة والأخوة الصادقة ،،،
وكان هناك أيضا أغاريق يسكنون معنا يعملون في مجال الفرز بالمشروع ،،

تنظيم الحياة يستمر بأن الفطور الساعة 9 صباحا والغداء 3 عصرا والعشاء
8 مساء ،،، وذلك للأعتماد على مواعيد خروج الموظفين والعمال للفطور وأخر اليوم

من أميز الناس الذين عاشرناهم في مارنجان اللي ممكن الناس يعرفوهم يعني ،،
في مجال الكرة ،،، الديبة الأخوان ،، وأمين يعقوب ،، وعمر النقي ،،،( هولاء ما أذكرهم الأن )
الفن : صديق سرحان ،
الطب : د/ بشير قسم السيد - اختصاصي ياطنية وصدر
د/ السر ابو الحسن - اختصاصي نساء وتوليد
د/ ابتهاج يوسف محمود -
وكثيرين ،،،

وجاية أصبري ،،،

[عنكوليب]

[quote=ساريه;659583][center][size=5]مرحب بعنكوليب فى كرسى النجوم .. وكثيراً ما أبحث عن مشاركاتك فهى بطعم الالفه والطيبه والنقاء ... وتواجدك المستمر بالمنتدى دليل على إيمانك وحبك لهذا البيت ...
[color="#0000cd"]
سؤالى ..... عمل المرأه فى رائك ضروره ولا حاجه ؟ وبما انك كنت مرأه عامله فى يوم هل تواجد المرأه خارج البيت طول ساعات العمل له تأثير على دورا داخل البيت ؟ [color="#ff0000"][u][size=4]




[color="#ff0000"]
[COLOR="#FF0000"]
يا سارية الجبل ،،،

ناس هنايات حا يخلوك ويقبلوا علي انا ،،،


يا ستي العمل بالنسبة لي انا كان فاعل جدا في حياتي كلها والى الآن ،
فلقد عملت في مجالات مختلفة حسب ما شايفة في السيرة ،،،
من خلال عملي تعرفت على كميات هائلة من الناس ،، أشكال وأنواع
العمل نفسه كان عالم كبير جد لما يجده الانسان من قيمة عند نفسه اولا
وممن ينتفعون من عمله هذا ثانيا ،،،

ولكن التزامن بين العمل والبيت ده موضوع يعتمد على الأنسان نفسه
فقد يكون لك القدرة في ان تعملي ولا يتأثر الأبناء أو البيت من عملك
وذلك يعتمد على القدرة على ذلك ،،
ولكنني لما أعرفه من أسباب كثيرة عن كيفية معاملة الأبناء الرضع
وصغار السن من كثير دور الحضانة والرياض فانني ضد أن أترك طفلي
لي مع أي انسان غيري أنا ،،، وكيف يكون البيت من غير أم وبه أطفال هي المسئول الشرعي عنهم ؟
حتى بوجود الحبوبات ، أعتقد أن أمي ليست المسئولة عن أبنائي ،،
والبيت نفسه يحتاج لست البيت المتواجدة به لكي يدار بنغم واضح ومنظم ، ولكنني لا اريد أن أظلم
المرأة من ممارسة حقها العملي ،،، ولكني أجد فيه مشقة لها ،،، وايضا ضياع لأطفال لا ذنب لهم ،،
ووالله لو تسمعوا الأطفال في الحضانة ببكوا كيف ؟ ول كم من الزمن ؟ واذا - لا مؤاخذه - عمل ليه
عملة في ملابسو كيف الحاجة الكبيرة دي بتنضفوا وكيف بيدها دي اللي هي بتنظف بيها أي محل في
الدار ، بتنضفوا هو برضو ،،والأبزاز ونظافتها وغيرو كتيـــــــــــــــــــر !!!!

عشان أولادي وبيتي انا آثرت أن أترك العمل ،، لأنهم لا يعوضوا بمال الدنيا كلها ،،،

[عنكوليب]

وهذا الزمان الأباء يرجعون من أعمالهم بعد المغرب
وان كان هناك سبب آخر للتأخير ، يتأخرون حتى الليل
فالأسرة اليوم اعتمادها الأكبر على الأم في كل شيء ،
ومصائب الزمان متفاقمة ،،،
لازم تكون عينك على ابنائك ،، وبناتك ،،

واننا نرى اليوم ما يكفينا من ان نترك ابنائنا
لمربيات أو خادمات أو حتي حضانات

والله المستعان

[عنكوليب]

كان مستواي الأكاديمي ممتاز في السنين الأولي ،،
وبعد كدة نزلت شوية كدة وبقيت جيد ،،
أذكر من استاذاتي : بنت خالتي / احسان مساعد، احسان موسى ،
وفتحية رياضيات ، واسماء الأزيرق ، وأمينه زوجة د. عثمان ،
وعاجبة دابش ،
كانوا صاحباتي حلوات في الأبتدائي ،،
منهم من أعرف عنهم الأن ومنهم من لا أعرف عنه شيء البته
مي الكردفاني ،،، ونوال الهادي ،،، وسلمى علي رجب ،،
وناديه أحمد ادريس ،، وسمية الفرنساوي(رحمها الله) ،،
ونوال حسن بابوري،، وآمال عزت ،،وبنت خالتي سلمي الطيب ،،
وبلقيس احمد ابوزيد ،،

الثانوي العام ،، مرحلة الشخصية والصحبة ال جد جد ،،
والقراية أم دق ،،، وبداية الشباب والنضارة ،،

قضيناه سريع جدا كانت المديرة / نفيسة البطري
واستاذه / اسيا سربل ، واستاذ / حمدو ، وأستاذ/
عبدالكريم ابوسالمة ،
وصديقاتي : حنان فضل (ناس مشروب الحريه ) ، سامية العجوة
امال منير ، سلوى عباس ، مها بت اليمانيه ، عواطف الهادي ،
واحسان ابوالقاسم ( ناس دكان همزة) والتومة يوسف ،،

( برجع بس بكرة )
تصبحوا على خير ،،،،

[عاشق الترحال]

الاخت العزيزه ,,,,عنكل ,,,
ابحرت في سردك الجميل ,,,,حتي جرفني تيار الصمت فوقفت علي الفور وحييت بتحية العسكري المعروفه ,,,,,,إجلالاً وإكراماً لما وضعته
انالمك الرقيقه واحاسيسك المرهفه .
وفقك الله ومتعك بنعمة الصحه والعافيه .

ماذا تقولين
,,,,,,,,,في
المشردين من الاطفال دون مأوي .
ماذا تقولين ,,,,في
الذين
يركلون (إن لم يخونني التعبير) أبائهم بدار العجزه .

وماذا تقولين ,,,,في
جيل اليوم ,,وفوارق الامس ,,,,وتنبؤات المستقبل .

ولي عوده
انشاء الله

[محمد الجزولى]

تقلنا بصات ادارة مشروع الجزيرة لمدارسنا بمدني ،، ونقطع المسافة بين البيت وشارع
الظلط القادم من بركات وهي مسافة ليست بالبعيدة ولكنها كانت ممتعة جدا ،،،
شوالات القطن ،،، وعمال المحالج ،، والفريزين ( موظفين مهنتهم فرز نوع القطن وصلاحيته ) ،،
والترعة ،،، واحدةوقريبة من البيت والتانية جنب الظلط ،،،
ننطط في الشوالات نحنا ماشين المدرسة ولما نرجع منها ،،،

حفظنا كلمات كتير من الأجناس المختلفة التي تشارك في عملية حلج القطن وغيره من الأعمال
فكانوا ناس الشرق وجبال النوبة ،، والفلاته ،،،

وهناك كثير من الشخصيات ذات الأثر في نفس الأنسان لما لها من ميزات خاصة وافعال
وملابس ،،،
فكان الشاويش ( شخص يتخيل انه شاويش انجليزي ) يلبس أي نوع ربنا خلقو من النيشانات ،،
والصوف الأحمر والأخضر وغيرو ،،، زفة ألوان وما تنسوا الصفارة أهم شيء ،، والريشة
في أعلى البرنيطة ،،،

اسياد العيش واللبن ( لعند الباب ) والشحاتين عندهم مسميات ،،،

المهم كان المجتمع حلو جمع في داخلو كثير من ألوان الطيف السوداني
كان الخلق الكريم والتربية النظيفة والأخوة الصادقة ،،،
وكان هناك أيضا أغاريق يسكنون معنا يعملون في مجال الفرز بالمشروع ،،

تنظيم الحياة يستمر بأن الفطور الساعة 9 صباحا والغداء 3 عصرا والعشاء
8 مساء ،،، وذلك للأعتماد على مواعيد خروج الموظفين والعمال للفطور وأخر اليوم

وجاية أصبري ،،،


يا سلااااااام يا عنكوليب ياخ
اثارت هذه التداعيات الكثير من ذكريات الزمن الجميل
صفارة الورشة الشهيرة في اوقات معلومه تماما
رحلة الصباح والمساء لللحاق ببصات المدرسة وما تخلقه من علاقات صداقة قويه ومفارقات الطريق
الكثير الكثير اختي عنكوليب
ومتابعين ياخ

[عنكوليب]

ماذا تقولين
,,,,,,,,,في
المشردين من الاطفال دون مأوي .


الموضوع ده يا عاشق الترحال عندو ابعاد كثيرة تؤثر فيه
أو هي موضوع وجوده اصلا ،،
طبعا ما أقوله هو وجهة نظري أنا ،،، فأنا بعتقد أن البيت هو الأساس
في الأخلاق والدين والتعامل والمسئولية وان اردنا كلمة واحدة شموليه
هي "الدين" ،،،،
تحت لوائه ينضم البيت والأخلق والمسئوليه والتعامل ،،، والزول اللي أصلو متين
بحب الله ودينه ، صدقني لا تشوبه شائبة ،،،
الخطأ متشارك فيه الأثنان المرأة والرجل والذي ينجم عنه ما نسميهم بأبناء الشوارع
والملاجيء ،،، ولأسف كثير ممن يولدوا بدون مسئول يضيعون اما بالموت ساعة ولادتهم
عندما يرمونهم على الشوارع ويتعرضون للكلاب وما شابه ،، والأخرون يحيون حياة الموت
لا فائدة منها ،،، الا من يجد من يتبناه ويحييه على ملة الأسلام ،،،
والكثيرون ينتشرون متشردين ، يمارسون كل انواع الجريمة وبكل الأساليب ،،
وضاعت الطفولة ،، وشباب يرجى منه الكثير ،،،
ولا نستطيع له تمييزا او كيفية وقف الممارسة الغير شرعية وما ينجم عنها من مأسي ،،،
فقط نقول :
ما تعتقدوا المدرسة كفاية يا ناس ،،، البيت ،،، البيت ،،، الأم ،، الأم ،، الأم ،،،

والله المستعان ،،،

[نزار احمد كوارتي]

عنكبه كيفِنِك؟؟؟ لعَلِك طيبه؟؟؟

تعرفي من أول يوم لقيتك فيه في المنتدي, وعلي ما أذكر رديت ليك بي إنو طعم كلام عونكوليب بطعم قصب السكر, داك اليوم انا كنت في المكتب, ورجعت في كرسيني لي ورا ورجعت لي ورااااااااا
قصب العونكوليب, وكيفية عزلو والرِقيقه الما بتكون فَخَّه, أو كما كُنا نسميها الرُقابه, ويا سلااااااام علي القندول البِكون بدا يبقي أحمر لما تديهُ النار وريحتو تطلع,
شكل ودمدني زمان, الزريبه لما كانت محل السوق الشعبي وجنبها علي طول سوق القصب من سُكر وعونكوليب, الحواشات في المنطقه الواقعه ما بين مواصلات الجزيره والكريبه, الشبكات وإصطياد الطير, الولفه التي هي عباره عن شجره إصطناعيه من صنعنا لنوهم بها الطيور فتقع في شر شباكنا, قدوم أحمر وعشوشه وود أبرق, وكيف يتم تجنيحهم الذي إذا فشلت فيه فقدت الطيره التي كانت قيمتها بالنسبه لنا أغلي من المزاكره ودرس العصُر الذي نتهرب منه أحياناً, يا سلاااااااااااااام يا عونكوليب ياخ مالك علينا ياخ

تعرفي انا ما حابي أسألك انا دايرك تحكي براك, أحكي وأحكي وأحكي, لأنو لو سألتك بكون ضيعت علي نفسي بعضاً مما لم أسأل.

سؤال خارج النًص أو بالزقاق:-

المرحومه سُعاد حربي, دكتور شوقي, أبراهيم, أنور, وجدان, المرحومه أفكار, ماهي علاقتك بالناس المن الزمن الجميل ديل, فإني أشتم فيك رائحة جمال نفوسهم؟؟؟

[عبدالرحمن مدثر]

كحال صديقى نزار

استمتع جدا بهذه العفويه وتداعيات الذكريات الجميله

عنكوليب

ياسلام على هذا البوست الذى كان له الطعم الجميل .. كجمال طفولتنا التى نتمنى دوما ان لانفارق احساسها

بنفس احساس قبانى لما قال

وانا ارجو ان اظل كما انا

طفلا يخربش فوق حيطااان

النجوم

كما يشااااء

تحيه نديه




ولى عوده اكيد

فقط دعينى احسن القدح حتى اخره

زمان اثناء وجبه معينه ومن المحبب جدا ان تكون عصيده بملاح نعيميه كااارب

وملاح النعيميه على حسب تداعيات الذكريات اسهل شىء واصعب شىء (فى التسبيكه )

وبعد اللمه حول القدح والصينيه .. عندما يكون الطعم محفزا لك لان تكون آآخر المغادرين

فيحلف عليك عمك ولا خالك ..

ياجنا احسن الصحن ....!!

واحسااان الصحن متعه لاتضاهيها متعه .. عزف على اوتار الاصابع ودندنه يكون للسان دوره المهم

****

او حين تاخذك قليه بن الى البعيد .. وانت ممنوع وقتها من الاستمتاع بفنجاان كامل

تجلس بالقرب من دفء الاحساس هنا .. الى ان تنتهى البركهزالبكر والتنى ويعطوك ماتبقى

من فنجاان ... عشان (تحسنه ) كذلك .. ياسلااااام لما تقعد كدا وباصبع واااحد لاغير

وهاااك (يااالحس )

[بت مارنجان]

والله دا بوست مليان لمن بهناك ...
وحقيقة المنتدي فعلا جمعنا بأناس نفخر بيهم ...
نفتخر بعنكوليبة
ونقول ليك ياخالتو ياخ:o;)

واصلي ومتابعين معاك حرف حرف وسطر سطر مستمتعين بسرد الزكريات الجميلة
وربنا يحفظ اسرتك ويحميهم من شرور الدنيا ...

[ام ساره]

عنكوليبة نورتينا والله ورفعت راسنا وراس النفاج واصلي علي كدا وربنا مايحرمنا منك يارب.

[عنكوليب]

ماذا تقولين ,,,,في
الذين
يركلون (إن لم يخونني التعبير) أبائهم بدار العجزه .


هل تستطيع أن تقول لهما أف ؟

والله لا استطيع أن أملي عيوني في وجهيهما ،، خوفا من حسابه وحبا فيهما ،،،
شوف بالدارجي كده ،،، أي زول يعمل في والداه أي شيء ( سمح ولا كعب) ،،
مردود في الدنيا قبل الآخرة ،، وكل حساب العمل تحاسب به في اآخرة الا عقوق
الوالدين ،، تتحاسب بيهم هني ده وتشوف بعيونك ،،،، اللهم لا تجعلنا ممن يعيقون والديهم يالله ،،

بس برجو من أي انسان عندو باقي هدوم ،، باقي أكل ،،، باقي أي شيء سمح ،، يمشي على
الناس ديل ،،، والله حالهم لا يسر العدو ،،،والمراكز كتيرة ،، أحسنوا اليهم ،،،

[عنكوليب]

نزار العريس ،،،، أنا طيبة طالما حولي هذه الكوكبه من ابنائي وبناتي ،،،

فخورة جدا بكل حرف سطرت ،،، وكل حرف بمثابة الهدية والله ،،
العنكوليب كما قلت سلفا جمع بين اثنين السكر والملح ،،،
يرجعني الى الأرض التي نحن منها واليها ،،
راسخ في دواخلي من زمن الصغرة والجهل ،،،

ففي مارنجان ونحن صغارا كان يباع - لا مؤاخذه على الحمير -
ويقول ليك سيدو : العونكولييييييييييييييييييييييييييييييييييب يا ،،، ونحنا نجري ،،
يابا أديني القروش ،،، يما أديني اشتري عنكوليب ،،
وكانت خالتي المرحومة عزيزة حربي ، زوجة المرحوم عبد المحسن الهادي الطيب
- وكان مفتش بمشروع الجزيرة - تسكن في بيوت المفتشين متنقلين بين اركان الجزيرة
الواسعة ، فكانوا عندما يأتون في اجازة الخميس والجمعة ، أهم حاجة معاهم العنكوليب
اللاندروفر مليان،، ( عنكوليب ،، جرول ،، عيش ريف ،،حبار ،، متعة ،، زمن ،،

عشان كدة العنكوليب ده ، خليه ساكت بس ،

المرحوم الشاعر النقابي المعروف / عثمان حربي خالي اخو أمي ، وعمي ود عم أبوي
زوجته المرحومة سعاد دفع الله شيخ الجاك ، بنت خالي ود خالة أمي،،،
ابراهيم عثمان ابنه ، ود/شوقي ، ووجدان ، والمرحومة أفكار ، وأنور ،،،،،
حي ودكنان والثورة ما جيران !!!!!

[بدر الدين محمد]

يا ودالطاهر قبيل لخموني بالفطور ونسيت في سؤالك شيء
مهم ، السيرة الذاتيه :
الأسم : آمنه عبد القادر حربي .
ولدت بمدينة ودمدني بحي بانت حيث منزل الأسرة العتيق دار المرحوم
والدنا طيب الذكر / ابراهيـــــــم حربـــــــي ، عليه رحمة الله .
ولكننا كنا نسكن آنذاك مدينة مارنجان - بيوت لموظفين - حيث كان والدي
عبد القادر حربي - عليه رحمة الله - مهندسا بورش ادارة مشروع الجزيرة - ميكانيكا-
كانت حياتنا الأولى كلها بمارنجان .

درست الابتدائية بمدرسة التمرين الأبتدائية للبنات - كلية المعلمات - سابقا
الثانوي العام بمدرسة المؤتمر الثانوية العامة بنات
الثانوي العالي بمدرسة عبدالستار الثانوية العليا بنات

عملت بشهادة الثانوية ردحا من الزمان بالخرطوم وكانت بدايتي بوكالات السفر
حيث قضيت بين التذاكر والسفر قرابة الخمس سنوات وبهذا المجال برزت حيث نلت
عدة شهادات من عدد من خطوط الطيران في مجال السفر والتذاكر والشحن الجوي والمعاملات
الجوية ،،، . وسافرت لعديد من الدول من خلال عملي .
بعد ذلك ذكيت للعمل بأحدى الشركات العريقة في مجال الزيوت والأستيراد والتصدير
_بدروسيم العالمية المحدودة - حيث كانت الوكيل الوحيد لزيوت بترومين آنذاك وكذلك كانت
تعمل في تصدير الفواكه والبهارات الجاهزة ، وعملت بها لمدة ثلاث سنوات ، وأنا بها امتحنت
للشهادة السودانية ثانية من مدرسة ودمدني الثانوية ، وانتقلت للخرطوم لدراسة الأدارة حيث
قبلت بمعهد الكليات التكنولوجية - وقد كانت السنة الأخيرة له كمعهد وصار بعد ذلك جامعة
السودان للعلوم والتكنولوجيا- حيث درست الأدارة وتخرجت بها ،، وعدت ثانية لشركة بدروسيم
ومنها امتحنت لنيل وظيفة بالهيئة العربية لأستثمار والأنماء الزراعي ، حيث وفقت وعملت بها
ثلاث سنوات .وتزوجت وانجبت ولم أمارس عملا بعد انجابي والحمدلله ،

الأن أنا أم ل محمد ويقين ، محمد في السنة الأولى - كلية الهندسة - علوم الأتصال - جامعة
التقانة . يقين في السنة الثانية الثانوية بمدرسة علوية عبدالرافع (كرري قديما) ،
أبو أولادي السيد/ كمال النضيف - ماستر محاسبة - رجل اعمال - مجال الأطارات

ك سعدنا بك بنتنا (عنكوليب) آمنة لاحقا وظني انني رأيت ابراهيم حربي وقد تكون الصورة التي رسمتها لداره العامر (حقيقة) كنت عند عودتي من المنطقة الصناعية في ركن بانت الجنوبي الشرقي يطالعني باب أنيق عليه لافتة مكتوبة (ابراهيم حربي) ولاحقا رأيته بمعية اخوالي تاج الدين عوض قدورة ومصطفى عوض قدورة وعبده عوض قدورة

تحياتنا للاسرة الكريمة

[عنكوليب]

عبدالرحمن مدثر ،،، الزول العجيب ،،،

يا اخوانا ،،أنا عايزة أشوف الناس ديل كلهم ،،، أعمل كيف ؟ حيران أنا !!!
ياخي ما تعقدنا ياخي ،، انت صاحب مفردات ،، أقول ليك شنو ،، شفت ،،،
ذيييييييييييييييييييييييييييييي طعم الدعاش !!!

ملاح النعيمية ده ، زمان كنت بجن فيه جن ،،، لكن ،،، أتسممت بيه مره
وداني الآخرة ورجعت تاني ، بس من ديك وعييييييييييييييك ،، الطيرة ال بت أمها ،،

أنا بحب ملاح الشرموط الأخضر ،، بالسمن البلدي ،،، وكسرة بيضاء ورهيفة ،،،
وشطة خضارء ،،، بالله تدنقر في الصحن ، تاني ما ترفع رأسك الا للزيادة ،،،

تسلم يا حريف بالحروف ،،،

[عنكوليب]

ك سعدنا بك بنتنا (عنكوليب) آمنة لاحقا وظني انني رأيت ابراهيم حربي وقد تكون الصورة التي رسمتها لداره العامر (حقيقة) كنت عند عودتي من المنطقة الصناعية في ركن بانت الجنوبي الشرقي يطالعني باب أنيق عليه لافتة مكتوبة (ابراهيم حربي) ولاحقا رأيته بمعية اخوالي تاج الدين عوض قدورة ومصطفى عوض قدورة وعبده عوض قدورة

تحياتنا للاسرة الكريمة



استاذ/ بدرالدين ،،،أكاد أطير فرحا بتواجدك الأنيق هنا ،،،
نعم هذا منزل والدنا المرحوم / ابراهيم حربي ،،، رجل لا استطيع
أن أوفيه حقه هنا ولا أدري ماذا أقول عن هذا الرجل ، الرجل ، الرجل ،،
قمة أهل ودمدني ،،، كانت داره الأولى في ودأزرق - نادي علم الوطن - بيت الحجر -
نادي علم الوطن كان دارهم الذي عاشوا به طفولتهم وصباهم ( ليرحم الله : ابوي / ابراهيم حربي -
الحاجة الحلوة القوية حبوبه/زينب بت متولي - الخاله الحنون / خديجة ابراهيم حربي - الخال الشاعر/ عثمان ابراهيم حربي-
الخال الرياضي القوي / عبدالرحمن ابراهيم حربي - الخاله الحنونة / عزيزة ابراهيم حربي ) وربنا يمد في ايام :
الخاله المناضله / آمنه ابراهيم حربي - الوالده أمي (ولا كلمة بعد كلمة أمي ) / فاطمة ابراهيم حربي - الخالة الأستاذة
ممحاة الأمية لأغلب نساء ودمدني / سكينة ابراهيم حربي .
وتعظيـــــــــــــــــــــــــ ســــــــــــــــــــــــــــــــــــــــــــلام لأحلــــــــــــــــــــــى وأجمل أســــــــــــــرة ـــــــــــــــــــــــــــم

[عنكوليب]

والله دا بوست مليان لمن بهناك ...
وحقيقة المنتدي فعلا جمعنا بأناس نفخر بيهم ...
نفتخر بعنكوليبة
ونقول ليك ياخالتو ياخ:o;)

واصلي ومتابعين معاك حرف حرف وسطر سطر مستمتعين بسرد الزكريات الجميلة
وربنا يحفظ اسرتك ويحميهم من شرور الدنيا ...

تسلمي يا بت مارنجان ،،،
لكن حقو تكلميني عن اسمك ده شوية ،،
وأهلك منو ؟


لك عاطر الشكر ،،

[عنكوليب]

عنكوليبة نورتينا والله ورفعت راسنا وراس النفاج واصلي علي كدا وربنا مايحرمنا منك يارب.

أم سارة الحبيبة ،،، كلك ذوق يا أميرة ،،
وخلاص أنا خطبت سرورة ل حمودي ،،،،


شنو يا اخوانا زغروتة مافي ؟

تسلمي يا حبيبة ،،،

[عنكوليب]

سجمه الرجل فى غسيل العده
ولا ريح نفسه وجاب شغاله
بحبك للروايات يكون ارتبط عشقنا للشمشار
كيف بتقضى يومك العادى

انا بت أبوي عشرة ،، ما عندي راجل بغسل العدة ،،
أنا عندي راجلا يكيل العين لااااااااامن تفضل ،،،
شن كتر الله بلا الحبش الرخااااااااااااااس ديل !!!

انتو مخليني اعمل لي حاجة ،،،
النهار كلو نقنقنقنقنقنقنقنقنقنق ،،،

[بدر الدين محمد]

استاذ/ بدرالدين ،،،أكاد أطير فرحا بتواجدك الأنيق هنا ،،،
نعم هذا منزل والدنا المرحوم / ابراهيم حربي ،،، رجل لا استطيع
أن أوفيه حقه هنا ولا أدري ماذا أقول عن هذا الرجل ، الرجل ، الرجل ،،
قمة أهل ودمدني ،،، كانت داره الأولى في ودأزرق - نادي علم الوطن - بيت الحجر -
نادي علم الوطن كان دارهم الذي عاشوا به طفولتهم وصباهم ( ليرحم الله : ابوي / ابراهيم حربي -
الحاجة الحلوة القوية حبوبه/زينب بت متولي - الخاله الحنون / خديجة ابراهيم حربي - الخال الشاعر/ عثمان ابراهيم حربي-
الخال الرياضي القوي / عبدالرحمن ابراهيم حربي - الخاله الحنونة / عزيزة ابراهيم حربي ) وربنا يمد في ايام :
الخاله المناضله / آمنه ابراهيم حربي - الوالده أمي (ولا كلمة بعد كلمة أمي ) / فاطمة ابراهيم حربي - الخالة الأستاذة
ممحاة الأمية لأغلب نساء ودمدني / سكينة ابراهيم حربي .
وتعظيـــــــــــــــــــــــــ ســــــــــــــــــــــــــــــــــــــــــــلام لأحلــــــــــــــــــــــى وأجمل أســــــــــــــرة ـــــــــــــــــــــــــــم

وصورة ابراهيم حربي في مخيليتي وأظنه يشبه كثيرا الراحل الفنان الخير عثمان

اما في مارنجان فلنا ونحن اطفال ذكريات يكاد يمحوها تراكم الازمان كنا نحضر بمعية والدتنا وجدتنا ونحن اطفال الى منزل خالتا لينا (امونة عبد النبي) وزوجها الريح لنلعب ونرتع مع اندادنا أنذاك التوأم أمين ومأمون واخوانهم لا انسى شجرة النخل في قلب الدار والتي تساقط كل عام رطبا جنيا .. وتلك كانت مارنجان في مخيلتنا ومنذ الستينات لم أر مارنجان .. كيف تكون الآن

[عنكوليب]

في الأبتدائي شاركت في مهرجان الشباب ،،،
كنت في الفقرة الرابعة ،،،

كان الريس نميري وهيلاسلاسي حاضرين الأفتتاح ،،،

نقوم من الصباح نمشي المدرسة ،، ومن المدرسة يرحلونا ببصات لميدان
البحوث الزراعية الزماااااان داك ،، ونتدرب على فقراتنا ،،،
كان مدربنا كوتش اسمو / رابح ،،،
كانوا بيعملوا لينا وجباتنا في كلية المعلمات ،،، طباخات الكلية ،،،
أيام عز والله ،، بيرسلوه لينا في الميدان ،، ناكل لما نشبع ،،
ساندوتشات التونة بالطماطم والجبنه بالمربة والفول بالجبنه ،،،
وصرفوا لينا اللبس بتاع الرياضة وبتاع العرض ،،،

كنا الأطفال الصغار ال بجوا جاريين ويصرخوا شديييييييييد ،،
لما علق زول مرة وقال : تقوموا تصرخوا في الراجل ده
-هيلاسلاسي - كدة يقوم يموت كمان ،،
قدمنا أروع الفقرات ، وما بنسى الأولاد كانوا عندهم فقرة
العلم ،، والعصي ،،،واللوحات الخلفية ،، وعروض الزهور ،،


كانت ايام والله ،،

[تغريدا]

حقيقة والله بوست مرجع من دسامه حروفة ومن روعتك أنسانك الرائعة عنكوليب
وعايز منك طلب لوسمحت لى ثلاثة نصائح غاليات خاصات لبنات ونساء اليوم وتسلمى وديمه منورة

[عنكوليب]

تزامن وجود الرئيس نميري وهيلاسلاسي مع افتتاح
المحلج الأتوماتيكي بمارنجان ،،،

وجاء نميري لمارنجان وزاروا الورشة الكبيرة التي كان
يعمل بها والدي مهندسا ، وقام والدي - ذو معرفة قديمة بالريس -
بعمل وتصنيع صينية دائرية الشكل من المغناطيس ، نعم من المغناطيس
تفتح وتقفل ،، تفتح للداخل ،، وكانت حدثا تناقلته في ذاك الزمان ، وقدمها
محافظ المشروع هدية للرئيس الأثيوبي ،، وحيوا صانعها والدي القدير جدا
وحفز حافزا ضخما ،،،،
وكان والدي يعمل في الخرطوم بحري - قبل ان يأتي لمشروع الجزيرة-
في سلاح الأسلحة ،، فكان له باع طويل في الأسلحة المختلفة ،،،
وتعديلها وصيانتها ،،،وكذلك الخزن ،،، كانت تأتيه الخزن من الخرطوم
ليقوم بفتحها بكل السهولة والمهنية ،،،
الا رحم الله والدي ،،،وطيب ثراه ،،

[عنكوليب]

حقيقة والله بوست مرجع من دسامه حروفة ومن روعتك أنسانك الرائعة عنكوليب
وعايز منك طلب لوسمحت لى ثلاثة نصائح غاليات خاصات لبنات ونساء اليوم وتسلمى وديمه منورة



عندما تتحدثين تغردين ،،،
وعندما تبرحين ، يتردد تغريدك ،،،

جميلة نفسك يا تغريد ،،،

وسوف ألبي طلبك ان شاء الله ،،،

لبناتي : تجملي بالحجاب ، وحافظي على الصلوات ،، وخافي الله ،،

وللأمهات : مثل بلدي مصري ( أكفي القله على فمها ، البت تطلع لأمها ) ،،
حافظي على دينك ، وبيتك ، وسيد بيتك ، وفلذات كبدك ،،
اذا قمت بما قلت ، علينا أن نضمن الشارع ، والمدرسة ، وكل شيء ،،،

[عنكوليب]

وصورة ابراهيم حربي في مخيليتي وأظنه يشبه كثيرا الراحل الفنان الخير عثمان

اما في مارنجان فلنا ونحن اطفال ذكريات يكاد يمحوها تراكم الازمان كنا نحضر بمعية والدتنا وجدتنا ونحن اطفال الى منزل خالتا لينا (امونة عبد النبي) وزوجها الريح لنلعب ونرتع مع اندادنا أنذاك التوأم أمين ومأمون واخوانهم لا انسى شجرة النخل في قلب الدار والتي تساقط كل عام رطبا جنيا .. وتلك كانت مارنجان في مخيلتنا ومنذ الستينات لم أر مارنجان .. كيف تكون الآن

ابراهيم حربي ، رجل فارع الطول ، ممتليء الهيكل ، وسيم المحيا ، مبتسم السريرة ، ذو شاربان
(يكتفوا الخيل ) ، تلاسن معه أحدهم مرة ، فطاح عليه بظهر يده ، فرماه أرضا ، وحمل الرجل
للمستشفى ليخلعوا من بين اضراسه ياقوتة كانت بالخاتم الفضي الذي كان بيد ابوي / ابراهيم حربي .

[صلاح ودالطاهر]

عنكبه الفرق بين البنات زمان والبنات هسع في العلاقات الاجتماعيه

سؤال بره الخط حضرتي زمن ست الروب

[صلاح ودالطاهر]

وحقيقة المنتدي فعلا جمعنا بأناس نفخر بيهم ...
.

معليش يا عنكوليبو بس الشمار ده حرقني شويه قلتي شنو يا مرنجانو جمعكم بمنو اها احمد سرو في بطنو مبروك...... عقبال الحبس

[عنكوليب]

معليش يا عنكوليبو بس الشمار ده حرقني شويه قلتي شنو يا مرنجانو جمعكم بمنو اها احمد سرو في بطنو مبروك...... عقبال الحبس

ده شنو ده ؟

هووووووي يا الناطق الرسمي باسم ال ..........؟؟؟؟؟؟؟!!!

أوعة الناس ديل ضيوفي ،،،

خليهم يمرقوا من هنا وشرك ليهم !!

[عنكوليب]

اما في مارنجان فلنا ونحن اطفال ذكريات يكاد يمحوها تراكم الازمان كنا نحضر بمعية والدتنا وجدتنا ونحن اطفال الى منزل خالتا لينا (امونة عبد النبي) وزوجها الريح لنلعب ونرتع مع اندادنا أنذاك التوأم أمين ومأمون واخوانهم لا انسى شجرة النخل في قلب الدار والتي تساقط كل عام رطبا جنيا .. وتلك كانت مارنجان في مخيلتنا ومنذ الستينات لم أر مارنجان .. كيف تكون الآن


كانوا جيراننا هم أهلنا وأهلنا هم جيراننا ،،،انا دفعة اقبال الريح ،،،( سوف اذكر اسم رب الأسره )
وجيراننا : الريح احمد الهادي - احمد ابوجمال - سليمان قمر الأنبياء - احمد عبدالله - يوسف محمود خويطر -
الرشيد عبدالرحمن علي طه - محمد عمر - تاكي ( يوناني) - ادريس محمد ادريس - علي حمد علي -
السر محمد قسم الله - السر الرفاعي - ابوالحسن(الشكابه)-محمد خميس - الحسين - شنان -مصطفى عطا السيد-
عبدالرحمن الفيل - استاذ/مبيوع -عبدالرحمن البرنس-ود المنفوخ - المجمراب - محي الدين الحضري -
سناده - سعدالطيب - احمدحسن(اللبن)-الأمين ميرغني-

الناس الذين سقطوا هنا ما يزعلوا مني ،،، كلكم أهلي وجيران وحبان يعلم الله ،،

مارنجان اليوم ،،، حدث ولا حرج ،،، لم أرها ولكن كان وصفها كافيا ،، حزينة تبكي الأطلال ،،

[Isam Hussien H]

يا بت يا أمونة ..

سلام كبير لناس عظام ترعرعنا في بيتهم الكبير .. الإنضباط .. إحترام الآخر .. الكرة الطائرة .. الخوة الصادقة .. وتشرفت بأن أُنسب لهذه الأسرة في فترة كنا صغار إلا أننا نمتلئ بحاجات الكبار ... مقبول حربي ذلك المدرسة التي نهلنا منها أنا وصديقي صديق عبدالمحسن ود بت أبراهيم حربي .. أجمل الأيام كانت تلك التي لم يرهقنا فيها شئ على الإطلاق .. واصلي وسنتواصل بإذن الله ..

[ود المطامير]

أم النفاج

والله قمة المتعه فى السلاسه وروعة مشاهد الزمن الجميل

ومعك نقضى أجمل الأوقات

والله فعلا كرسى نجوم تضئ ليالينا

تسلمى والله على كل هذا الجمال

[عنكوليب]

يا بت يا أمونة ..

سلام كبير لناس عظام ترعرعنا في بيتهم الكبير .. الإنضباط .. إحترام الآخر .. الكرة الطائرة .. الخوة الصادقة .. وتشرفت بأن أُنسب لهذه الأسرة في فترة كنا صغار إلا أننا نمتلئ بحاجات الكبار ... مقبول حربي ذلك المدرسة التي نهلنا منها أنا وصديقي صديق عبدالمحسن ود بت أبراهيم حربي .. أجمل الأيام كانت تلك التي لم يرهقنا فيها شئ على الإطلاق .. واصلي وسنتواصل بإذن الله ..


عصام حسين ،، رفيق الدرب ،، اخي الذي لم تلده أمي ،،
الرجل الذي اذا احتجته ، وجدته دون أن أسأله ، لك مواقف لا ولن انساها
البته ،، دوما معنا ،، سيد شورتنا ،، وتمامة هقيتنا ،،،
لم نحس انك صديق لشخص واحد ،،، بل لنا كلنا ،، كنا نتخاطفك ، لحبنا لك ،،
لا فرق هناك بين صداقتك لمقبول أو لسكينه أو لفاطمة أو لصديق أو لآمنه أو لمحمد أو
لسلمى أو لهدى ،،، كنا لك وكنت لنا جميعا ،،،، وسوف تظل ،،،،

[عنكوليب]

أم النفاج

والله قمة المتعه فى السلاسه وروعة مشاهد الزمن الجميل

ومعك نقضى أجمل الأوقات

والله فعلا كرسى نجوم تضئ ليالينا

تسلمى والله على كل هذا الجمال

ياخي والله زعلانه منك ،، أدييييييييييييل كدة ،،
مطرطر ،،، حالتك وعدتني ،،،،

أجيبهم ليك جت عليهن ،،،

انت في روحك ،،، مالك ،،

ان شاء الله المانع خير بس ؟

[عنكوليب]

الثانوي العالي ،،، وواحدين بيقولوا : عرس طوالي ،،
دخلت مدرسة عبد الستار الأكاديمية ،،،
احلى بنات مدني ، درسوا في عبدالستار آنذاك ،،،
استاتذتنا كانوا : عبدالرحمن عامر - بخيت عبدالقادر - منصور - نوالدين-
الأساتذه المصريين ايميل وابراهيم -

كانت مدرسة عبدالستار متميزة في الدورات المدرسيه في المسرح والكرة الطائرة -
كانت ممثلاتنا عظيمات جد والله ،،، واستاذ،بخيت عبدالقادر مخرج متخرج من الحياة
ممثلاتنا : سوسن دفع الله - الممثلة المعروفه- انصاف عبدالرازق- حنان الشافعي -سلوى محمد علي

تميزت في الكرة الطائرة : حنان حسن عطية - حنان الشافعي - المرحومة/ كوثر مؤمن -
تاني في حنان واختها بس نسيت اسم والدهم - وآمنه حربي

كنت على علاقة حلوة ببنات كتار والله ،،،،
نوال آدم محمد نور - الهام التجاني سنجر -وصال عبدالله يعقوب -المرحومة / كوثر محمد عبد المؤمن -
خلود ابونورة - سوسن دفع الله - سمية كمبال - فائزة عيسى - عواطف وسهام ابو سنون -
أحلام الخواض -

وبالمدرسة كانت قدامنا اقبال جعفر - امينة المرأة - حنان دبورة - وحياة كيلا -

شاركت في عروض افتتاح الدورة المدرسية - والكرة الطائرة -
وكان في الغناء د. الفاتح حسين بيعزف بالجيتار للبنات في بروفات الأداء

وكانت المدرسة دوما متفوقة ،،،

وكان المدرب طبعا عصام حسين ومحمد صديق بحيري ،،،

وكانت أروع أيام حياتي ،،، وفي امتحان الشهادة ، قاموا أولاد النيل الأزرق
وزعت لهم أوراق الرياضيات قبل الأمتحان بتاع الرياضيات بيوم ،،،
وجونا جاريين ناس الرشيد كيلا وجمال طه سليم شايليين الورق المكشوف

والشرطة والجري ،،، واستاذ / قدورة ،،، غايتو يعني ايام جد حلوة ،،

[صلاح ودالطاهر]

ده شنو ده ؟

هووووووي يا الناطق الرسمي باسم ال ..........؟؟؟؟؟؟؟!!!

أوعة الناس ديل ضيوفي ،،،

خليهم يمرقوا من هنا وشرك ليهم !!


عنكبه الفرق بين البنات زمان والبنات هسع في العلاقات الاجتماعيه

سؤال بره الخط حضرتي زمن ست الروب

غايتو اقول شنو فطيتي كلامي الفوق ورديتي علي التحت ناس تبحت للمشاكل بث المهم ردي على سؤالي وامشي عوسي الكسر وملاح بني كربو بمناسبه ماهي مكونات ملاح بني كربو وام تكشو وام بقبق والمرس و الويكاب والملوحه بمعنى التركين بمشي وبجيك صاد يا بت امي وكمان عليك نظافة التكل والكنيف

[سوباوي]

الراقية كما تعني هذه المفردة .. آمنة أو عنكوليب كما يحلو لنا ولأهل النفاج ..

وعزت الذي دسى فيك كل هذا الجمال .. أنني قرأت كامل هذا البوست بمتعة لا تضاهي ..

وتفاصيل لها طعم الخصوص ..

وزمن تفوح منه روائح الأصالة والمحبة والطيبة الجد جد .. ليس معي الآن سوى طعوم متعة

متداخلة لاجترارك لذكريات زمن كان أجمل بناسه .. ليست بحوزتي أية استفهامات وإن كان ثمة

طلب حدثينا عن وعي وتطلعات بنات جيلك وعن وعي وتطلعات بنات هذا الجيل ..

مؤكد تحياتي يا سيدتي وكوني ناضرة الدهر ضاحكة سنينك،،،

[عنكوليب]

غايتو اقول شنو فطيتي كلامي الفوق ورديتي علي التحت ناس تبحت للمشاكل بث المهم ردي على سؤالي وامشي عوسي الكسر وملاح بني كربو بمناسبه ماهي مكونات ملاح بني كربو وام تكشو وام بقبق والمرس و الويكاب والملوحه بمعنى التركين بمشي وبجيك صاد يا بت امي وكمان عليك نظافة التكل والكنيف


ود الطاهر ،،، والله أحب أناكفك ،،، وأتونس معاك ،،، ما أصلوا انتو كلكم
يا أخواني الصغار يا أولادي ،،،
أهااااااااااا ،، نقوم نجي للبنيات ديل ،،،،

نحنا يا صلاح في صغرنا كان لعبنا بينحصر في بيوت صغيرة نصنعها لوحدنا ،،، كان كل واحدة مننا تعمل
ليها بيت بطريقتها وننضفوا ونعمل ليه سراير وعدة وبنات وأولاد ،،، يعني بنعمل تصوير لحياتنا العادية عن طريق
ايادينا وأفكارنا ،، وكان في ابداع ،، وبنطبخ ،، وعندنا حسن اختيار للملابس والأصحاب والنظام ،،،
تعلمنا نبني حياتنا لوحدنا ،،، كان جارنا هو والدنا ،،، وجارتنا هي أمنا ،،، وأصحابنا هم أخواننا ،،،
كنا نراعي لكل شيء ،،، ياخي أنا امتحنت الشهادة السودانية وأنا مسرحة شعري ضفيرتين بشرايط ،،،
ولابسة فسان مدرسة ماكس ،،، ولا مؤاخذة لابسة كبك باتــا أبيض ذي الفل ،،، الأستاذ كلمتو مسموعة
كل الناس الكبار كانوا مربييين ،،،، وكان الصغار كلهم ابناء يصغون ويعملون يالتوجيهات عن رضى .

اليوم جيل يعمل بناتوا بالكمبيوتر ويعمل ليهم اللبس والنظام ،،،،
ما عندهم روع الأبداع ،،، التجديد المنظم ،،، التعامل مع الأخرين ،، بنات في الجماعة ، لو قلت
ليها : السلام عليكم ،، تعاين ليك بعيونا ولا ترد عليك ،،، وكان ردت تقول ليك : Hi ،
بيدرسوا نعم ،، لكن عشان يشتغلوا ،،، ويطلعوا روحهم من البيوت دي لعوالم تاني مودياهم في
ستين الف داهية ،،،

نقصت اساليب التربية الأساسية وأصبحت معولمة ،،،
تمرق البت من قدام والديها لابسة بنطلون الا يسلخوهو منها سلخ ،،، وشعرها في الشارع ،،
لا بتعرف مسئوليه ولا عندها فكر ، الا الليله عرس ناس هناية ورقيص العروس ، والفنان
العلاني والأغنية العلانية ،،، والموضا كيف ؟ والجكس كيف ؟ الا من رحمها الله ،،،

[Isam Hussien H]

عصام حسين ،، رفيق الدرب ،، اخي الذي لم تلده أمي ،،
الرجل الذي اذا احتجته ، وجدته دون أن أسأله ، لك مواقف لا ولن انساها
البته ،، دوما معنا ،، سيد شورتنا ،، وتمامة هقيتنا ،،،
لم نحس انك صديق لشخص واحد ،،، بل لنا كلنا ،، كنا نتخاطفك ، لحبنا لك ،،
لا فرق هناك بين صداقتك لمقبول أو لسكينه أو لفاطمة أو لصديق أو لآمنه أو لمحمد أو
لسلمى أو لهدى ،،، كنا لك وكنت لنا جميعا ،،،، وسوف تظل ،،،،

تأكدي بأنه إنتماء لا مثيل لعمقه .. فكنتم نعم الأسرة ..
الكرة الطائرة وعبدالستار وذلك الزمن الجميل .. الكل شارك في تربية الآخر .. ونشأنا كأننا من أب وأم واحدة .. ومعلمي الثاني مجدي ميرغني سنجر الذي رعانا بأدبه وسمو أخلاقه .. كنا حينها نتنافس على كل ما هو مثالي .. يا ريت أن يمتد ذلك لأبنائنا ..

[عنكوليب]

غايتو اقول شنو فطيتي كلامي الفوق ورديتي علي التحت ناس تبحت للمشاكل بث المهم ردي على سؤالي وامشي عوسي الكسر وملاح بني كربو بمناسبه ماهي مكونات ملاح بني كربو وام تكشو وام بقبق والمرس و الويكاب والملوحه بمعنى التركين بمشي وبجيك صاد يا بت امي وكمان عليك نظافة التكل والكنيف


بأمانة شديدة يا ود الطاهر ،،،، الكسرة كلنا بنعرفه وبناكلها أكيد يعني ،،،بس بني كربو ده ، انا سمعت بيه
لكن هو شنو ، ما بكضب عليك ما بعرفو ،،،ولا أم تكشو ،، ولا أم بقبق وبرضو المرس ، لكن الويكاب
بياكلوه ناس الجزيرة كلهم ،،، وناس بيتنا برضو ، لكن أنا ، لا والله ،،، ما بحبو ،،والملوحة حقت ناس الشمالية
والتركين برضو ،،، دناقلة ساااااي ،،، وشوايقة ،،، وطبعا بعرفهم وبيعملوهم كيف لكن ما باكلهم أبدا ،،،

التكل حقنا كلنا ( المطبخ ) ،،، الكنيف (الحمام ) لا مؤاخذه يعني ،،،،

ان شاء تكون رضيت مني بس ؟؟؟

[عنكوليب]

تأكدي بأنه إنتماء لا مثيل لعمقه .. فكنتم نعم الأسرة ..
الكرة الطائرة وعبدالستار وذلك الزمن الجميل .. الكل شارك في تربية الآخر .. ونشأنا كأننا من أب وأم واحدة .. ومعلمي الثاني مجدي ميرغني سنجر الذي رعانا بأدبه وسمو أخلاقه .. كنا حينها نتنافس على كل ما هو مثالي .. يا ريت أن يمتد ذلك لأبنائنا ..

طالما نحن أحياء سوف ننقله لهم باذن الله ،،،
مجدي ميرغني سنجر واقبال وآمنه ،، لهم مني ألف تحية ،،
أخذت منكم الحب اللامتناه ،،، والأخوة الغير محدودة ،،
واحترام الكل والذات ،،

تسلـــــــــــــــ كباكسنجـــــــــــــــي ساكــــا ـــــــــــــــــــــــــــــــم

[بحيرى]

عونكوليبه ....
او كما قال نزار الصغيرونى .... عنكبه ....
والله بكل صراحه انا عشت معاك فى كتاباتك وانتى تحكى عن قصص زمان ايام عبد الستار ... ورغم انى كنت صغيراً ... لكننى حصلت باقيهو ....
حتى وانتى تحكى عن والدك عليه الرحمه .... عشت وكأننى موجد حينها بحكم انى قد زرت ورش مارنجان ... فقد كان والدى انا ايضاً يعمل هناك .... وربما تتلمذ على يد والدك ....
لكن ....
نفسى اعرف عونكوليب دى معناها شنو ... وما تقولى لى ذى القصب ....!!!

[عنكوليب]

نفسى اعرف عونكوليب دى معناها شنو ... وما تقولى لى ذى القصب ....!!!

نعم انه القصب ،،،

وقد أسهبت في شرح ذلك في مداخلة من نزار ،،،،

أشكر مرورك يا ايها الأنقلابي !!!

[بدر الدين محمد]

كانوا جيراننا هم أهلنا وأهلنا هم جيراننا ،،،انا دفعة اقبال الريح ،،،( سوف اذكر اسم رب الأسره )
وجيراننا : الريح احمد الهادي - احمد ابوجمال - سليمان قمر الأنبياء - احمد عبدالله - يوسف محمود خويطر -
الرشيد عبدالرحمن علي طه - محمد عمر - تاكي ( يوناني) - ادريس محمد ادريس - علي حمد علي -
السر محمد قسم الله - السر الرفاعي - ابوالحسن(الشكابه)-محمد خميس - الحسين - شنان -مصطفى عطا السيد-
عبدالرحمن الفيل - استاذ/مبيوع -عبدالرحمن البرنس-ود المنفوخ - المجمراب - محي الدين الحضري -
سناده - سعدالطيب - احمدحسن(اللبن)-الأمين ميرغني-

الناس الذين سقطوا هنا ما يزعلوا مني ،،، كلكم أهلي وجيران وحبان يعلم الله ،،

مارنجان اليوم ،،، حدث ولا حرج ،،، لم أرها ولكن كان وصفها كافيا ،، حزينة تبكي الأطلال ،،
الله يحفظ هذه الذاكرة الخصبة والوفاء الدفاق

[صلاح ودالطاهر]

ود الطاهر ،،، والله أحب أناكفك ،،، وأتونس معاك ،،، ما أصلوا انتو كلكم
يا أخواني الصغار يا أولادي ،،،
أهااااااااااا ،، نقوم نجي للبنيات ديل ،،،،

نحنا يا صلاح في صغرنا كان لعبنا بينحصر في بيوت صغيرة نصنعها لوحدنا ،،، كان كل واحدة مننا تعمل
ليها بيت بطريقتها وننضفوا ونعمل ليه سراير وعدة وبنات وأولاد ،،، يعني بنعمل تصوير لحياتنا العادية عن طريق
ايادينا وأفكارنا ،، وكان في ابداع ،، وبنطبخ ،، وعندنا حسن اختيار للملابس والأصحاب والنظام ،،،
تعلمنا نبني حياتنا لوحدنا ،،، كان جارنا هو والدنا ،،، وجارتنا هي أمنا ،،، وأصحابنا هم أخواننا ،،،
كنا نراعي لكل شيء ،،، ياخي أنا امتحنت الشهادة السودانية وأنا مسرحة شعري ضفيرتين بشرايط ،،،
ولابسة فسان مدرسة ماكس ،،، ولا مؤاخذة لابسة كبك باتــا أبيض ذي الفل ،،، الأستاذ كلمتو مسموعة
كل الناس الكبار كانوا مربييين ،،،، وكان الصغار كلهم ابناء يصغون ويعملون يالتوجيهات عن رضى .

اليوم جيل يعمل بناتوا بالكمبيوتر ويعمل ليهم اللبس والنظام ،،،،
ما عندهم روع الأبداع ،،، التجديد المنظم ،،، التعامل مع الأخرين ،، بنات في الجماعة ، لو قلت
ليها : السلام عليكم ،، تعاين ليك بعيونا ولا ترد عليك ،،، وكان ردت تقول ليك : Hi ،
بيدرسوا نعم ،، لكن عشان يشتغلوا ،،، ويطلعوا روحهم من البيوت دي لعوالم تاني مودياهم في
ستين الف داهية ،،،

نقصت اساليب التربية الأساسية وأصبحت معولمة ،،،
تمرق البت من قدام والديها لابسة بنطلون الا يسلخوهو منها سلخ ،،، وشعرها في الشارع ،،
لا بتعرف مسئوليه ولا عندها فكر ، الا الليله عرس ناس هناية ورقيص العروس ، والفنان
العلاني والأغنية العلانية ،،، والموضا كيف ؟ والجكس كيف ؟ الا من رحمها الله ،،،

يا سلام عليك اختي الحبيبه تعرفي كنت متوقع تكتبي هذا الكلام يكفي عندما يلعب اولاد وبنات الجيران دون تفكير سئ وكم يكون ابن الجيران حريص على بت الجيران كحرصه على اخته لكن الان دبت النظره الغير محموده واصبح الجار لايأمن جاره واصاب الناس الخوف اكثر واضحت فتاة اليوم منحصر تفكيرها كيف تبيض وجهها وكيف تتنفخ ومعذر لم اقصد كل البنات ولكن جلهن الله يديك العافيه ونسأل الله ان يحفظنا ويحفظ جميع بناتنا ويا حليل الماكس والشارستون والرحط والتنوره وميني جوب والقجه والتفه والفات الفات وشبر شد والرمه والحراس ودس دس وام الحفر وهووووووووووي يا لبلب وامانه عيلك تقطع اضنيك ويا حليل الجركي والكاروشه والكثير ياخي قلبتي علينا المواجع

[بت مارنجان]

معليش يا عنكوليبو بس الشمار ده حرقني شويه قلتي شنو يا مرنجانو جمعكم بمنو اها احمد سرو في بطنو مبروك...... عقبال الحبس

ههههههههههههههههههه
تصدق يااستاذ انا قلت الشمار بجيب زول في الزاوية دي
لكني ماااااااااااااااااااااااااختيتك منهم ;):o

يكفي انه المنتدي عرفني بيك ياود الطاهر ...
بالنسبة للاخير دة آآآآآآآآآآآآآآآآآآآآمين يارب العالمين :cool:

[بت مارنجان]

نفسى اعرف عونكوليب دى معناها شنو ... وما تقولى لى ذى القصب ....!!!

انا برضو كان نفسي اعرف العنكوليب دا والله
لو في صورة في قوقل نزلوها لينا

[بت مارنجان]

بوست بريحة جميييييييييييييييييييييلة ياعنكبة وواصلي

[عنكوليب]

بوست بريحة جميييييييييييييييييييييلة ياعنكبة وواصلي

لا ،، لا ،، أنا زعلانة منك ،،،

لأنني سألتك أسئلة أبيتي تردي عليها ،،،

عشان كدة حا أعمل نايمة منك ،،، بث ،،،

[عنكوليب]

انا برضو كان نفسي اعرف العنكوليب دا والله
لو في صورة في قوقل نزلوها لينا

هيااااااااااااااااا أخوانا ألحقونا حناكيش المنتدى ظهروا ،،،،

ورورووووووووووك ،،،،،، أجروا ،،، أجروا ،،،،

[عنكوليب]

أبي :

عبدالقادر حربي - من مواليد أمدرمان - حي الشهداء -

هذا الرجل كان نبراسا - حكيما - عميقا - محبا - نبيلا -

هذا الرجل أحبوه الناس ،،، كل من عرفتهم ، ومن يعرفهم ، ولا أعرفهم أنا ،

هذا الرجل مكافح - صبور - جلد - لا يعرف الأنهزام أبدا ،

لقب ب حربي على اسم الأسرة ، فكان اسمه على باب كل منزل سكناه " حربي "

كان فنانا ، ذو أنامل رقيقة ، صنعت الكثير من قطع الغيار للورش - وكانوا

يستوردونها آنذاك من انجلترا ،،،

له طقوس لكل شيء ، ذو بال طويل جدا ،،،

كان يعشق تربية الحمام ،،،

وله أساليبه الخاصة في تربية الحمام ،، نظافته ،، نظافة بيته - وكان بحجم الغرف -

وتبخير بيت الحمام ببخور التيمان بعد النظافة الأسبوعية ،،،

للحمام مسبح خاص به ،،، نعم يستحم الحمام ،،،،

كان معشره واسعا ،،، كان له صداقات من السودانيين والخواجات - ذي ما بقولوا -

كان يونسنا ويأنسنا ،،، بحكي لينا الأحاجي ،،، والقصص ،، واقعية وخيالية ،،،

ننوم عليه وهو يحكي ،،، يحملنا على كتفه ،،،،

اذا زعلنا يرضينا ،،، لم أسمع منه ما كسر خاطري ابدا ،،،

كان سندي ،،، وظهري ،،، واسمي ،،، وصاحبي ،،، ورفيقي ،،،

يعرفني دون أن أروي ،،،

كان كل أهلي يحبونه ويضعونه في مكانا عاليا يستحقه ،،،

كان صديقا وفيا ،،، وأخا صادقا ،،، وأبا لا يشق له غبار ،،،

أحبك أبي ،،

اللهم يا حنان يامنان أرحمه برحمة غير مقطوعة ،،، وزاد لا يبرحه ،،،

اللهم أعفر له حتى لا يبقى من المغفرة شيء ،،

اللهم انا نسألك له الدرجات العلى من الجنة ، ونسألك له خلاصا من النار ،،،

[بنت الرفاعي]

:):):)
:):)
:)


......
....
..
.
و
ما شاء الله.


:):):)

[بنت الرفاعي]

اللهم يا حنان يامنان أرحمه برحمة غير مقطوعة ،،، وزاد لا يبرحه ،،،

اللهم أعفر له حتى لا يبقى من المغفرة شيء ،،

اللهم انا نسألك له الدرجات العلى من الجنة ، ونسألك له خلاصا من النار ،،،



اللهمَّ آمين.

[الشمشار]

منووووووووووووووو؟؟؟؟؟؟؟؟؟؟؟؟؟؟
عنكولييييييييييييييب ذاتها ؟؟؟؟
امانه الليله ما اتفسحت
جااااااااااااااااااااااااااااااااااااي

[الشمشار]

عنكوليب بماذا تدندن من الاغانى فى الغالب ؟
رايك شنو في بنات الزمن دا؟


ماذا يعنى لك الفلس؟
الى أين يتجه قطار حياتك؟
مشوار (كداري ) في الخاطر .؟
احلى عيد مر فى حياتك..ويا ترى ليه؟
ما هي الصفة التي تحبي وجودها في نفسك ولا تجديها ؟ ولماذا؟
انا جااااااايك بس الشوال عترس معاي مربوط بي حبل جون قرنق وابي يتفك لي والاسئله دي طلعتها بي قده الشوال
هههههههههههههههههههههههه
بجي ماتخافي ههههههههههههه

[الشمشار]

عنكووليب الشوال بتاع الاسئله ابي يتفتح لكن جبت ليك الاجوبه دي وانتي اديني اسئله ليها
شفتي انا مريييييييييح كيف ؟:cool:;););)



1- ود المطامير
2- نزار احمد محمد
3- خالد علوني
4- راجل فلانه
5- كااااااان زمااااااااان يا اخوي
6- بس دي ريمون ذااااااتها
7- غايتو بلاهو مابنقدر نخش المنتدي
8- والله ماعارفه
9- رأي انثي
10- سعاد سيطره

[ودالعمدة]

14115

أظرف موقف مر بك ؟

عنكوليب وكتابة الشعر ؟

[Isam Hussien H]

اللهم يا حنان يامنان أرحمه برحمة غير مقطوعة ،،، وزاد لا يبرحه ،،،

اللهم أغفر له حتى لا يبقى من المغفرة شيء ،،

اللهم انا نسألك له الدرجات العلى من الجنة ، ونسألك له خلاصا من النار ،،،

[عنكوليب]

وجودك يفرحني يا رفاعية ،،،

تسلمي ،،،

[عنكوليب]

منووووووووووووووو؟؟؟؟؟؟؟؟؟؟؟؟؟؟
عنكولييييييييييييييب ذاتها ؟؟؟؟
امانه الليله ما اتفسحت
جااااااااااااااااااااااااااااااااااااي






يــــــا أبــــــــو مـــــــروااااااااااااااااااااااااااااااااا !!!!!!!

[عنكوليب]

عنكوليب بماذا تدندن من الاغانى فى الغالب ؟

يا حبيبي كل شيء بقضاء

لا تقل شئنا فان الحظ شاء

الأطلال - أم كلثوم[/color


بكرة الريد يزورك من غير مواعيد ،، يا حياة عمري

بتتعلم من الأيام - محمد الأمين

[عنكوليب]

رايك شنو في بنات الزمن دا؟


في مقولة : عز الشعر دهن ،،،

عز الخيل لجام ،،

عز الرعد مطر ،،

عز الحريم وليان ،،

شفت الأخيرة دي ،،، فيها تقصير شديد خلاص ،،

اللهم أحمنا وبنياتنا ووليداتنا ،،، وبنيات ووليدات المسلمين والمسلمات ،،،

في يوم كدة كان في عرس بنت ، ابوها قالوا - الله يكفينا شر قالوا -
راجل صعب شدييييد ،، وهو مغترب ،،، والبنية بهنا ، خليه ساكت ،
وأمها اخير عدمها ،،،عايزة ترقص في العرس ،،، و4 لبسات
للرقيص ،، وهلم جرا ،،، يا زول ابو البت قرر يجي يحضر عرس
بتو الواحدة دي ، ماكلم أي زول ،، وجاء داخل ليك تووووش العرس
الصبحية والغناية تقول يا ليل ،،،
بس الساعة ديك العروس كانت بتغير لللبسة الثانية ،،، ووصل الخبر ،،
الجماعة كلهم قعدوا يتضايروا يمين وشمال ،،، وسلموا عليه وهو فرحاااااان ،

بس دخل ليك عليها ولقاها ليك ،،، أسكت شيء مو شيء ما بتوصف !!

وقعد يضحك ،،، هي يا أهلنا ،،، وقعد جنبها وقال ليها :

الليلة يا سوزي lbc سااااااااااااي؟

ولا ولا أي حاجة تاني ،،

وحياتك يا غالي طلع ليها في المسرح ،،، يرقص معاها ،،،


لكن هذا ليس حكما عاما ،،، ياما في بنات رجال جد ،،

أدب ،، علم ،، أخلاق ،، خلقة ،،

الـــــــــــــــبـيــــــــــــــــــــــــــــــ ــــــت !!!!!!!!

[نزار احمد كوارتي]

14115

أظرف موقف مر بك ؟

عنكوليب وكتابة الشعر ؟


الراقي ود العمده

كان ما أخاف الكِضِب الصوره دي في أمبده

نحن عاوزين عونكوليب مدني

الشي التاني العونكوليب ده ما فيه قناديل

لكن بيني وبينك كده والله النوع ده حسب خبرة أخوك بكون حلو حلا

بالزقاق:-

عليك الله دي نكتها من وين دي؟؟؟

[عنكوليب]

ماذا يعنى لك الفلس؟

يحد من طموحاتي ،،،،

[عنكوليب]

الى أين يتجه قطار حياتك؟

في يد سيدو ال مسيرو يا الشمشار ،،،

لكن قول لي خططك اللي انت متمنية تنفذيها شنو ؟

المايكرفون معاك يا معاوية :p

[عنكوليب]

هم مشاوير كتيـرة ، لكن بختار منهم :

الأول : من مدرسة عبدالستار الأكاديمية ، تقطع الظلط والسكة حديد
وتمشي طوالي ، ومن بعيد تشوف حي المطار - مافي مباني جامعة -
وماشي و انت مار ببيوت الأشلاق من بعيد والدرجة من الشمال هنــــــاك ،
ناحية الغرب ،،، ونأكل في التسالي ونتونس - مجموعة حلوة من بنيات مدني
آنذاك ، متجهين نحو مواصلات مارنجان بعد درس العصر ،،،

[عنكوليب]

احلى عيد مر فى حياتك..ويا ترى ليه؟


كل أعيادنا ونحن صغار كانت مميزة جدا ،،،
كنا كلنا - كل الأسرة - بنجتمع للعيد في دارنا
الكبيرة منزل المرحوم/ابراهيم حربي ،
ماشاء الله ، كانت حبوبة الله يرحمها ونحنا ملمومين
نقعد نعد في روحنا ،،، ونتغالط في العدد ،، احفادها
40 - لا - 50 - لا - 45- فرد ،،،

الخروف بننتهي ليك منو فطور بس ،،،
كلنا ومعانا ابائنا وامهاتنا بنلعب نط الحبل - والله جد -
وشد الحبل ،، من هنا ومن هنا ،، ناس يبكوا عشان
ال معاهم ضعاف ،، وناس يكوركوا بالنصر ،،،
ونغني الأناشيد الوطنيه وبتاعة المدارس ،، وكان يعزف
لينا اخونا الكبير / مقبول مساعد الأمين -

ويجونا أهلنا يهنونا بالعيد ،،،

والواحد لما يكون بكرة العيد ، ينوم
وجنبو كل الحاجات اللي حا يلبسها في الصباح ،،،،
والله العيد كدة ولا بلاش منو !!!!


اما العيد المميز ،،،
العيد في مكة ،،، الكعبة ،،، وهيبة الوقفة ،،
والدعاء ،، والفرح بالفطر ،، أو الأضحية ،،
مهــــــــــــــــــــــــاب جد ،،

[عنكوليب]

ما هي الصفة التي تحبي وجودها في نفسك ولا تجديها ؟ ولماذا؟

شريرة - ليه ؟

عشان أقدر أتماشى مع كتير مما حولي

[عنكوليب]

ياخي انت ساكيني كدة مالك ياخ ياالشمشار

قطعت نفس بالجري ،،،

[عنكوليب]

عنكووليب الشوال بتاع الاسئله ابي يتفتح لكن جبت ليك الاجوبه دي وانتي اديني اسئله ليها
شفتي انا مريييييييييح كيف ؟:cool:;););)



1- ود المطامير
2- نزار احمد محمد
3- خالد علوني
4- راجل فلانه
5- كااااااان زمااااااااان يا اخوي
6- بس دي ريمون ذااااااتها
7- غايتو بلاهو مابنقدر نخش المنتدي
8- والله ماعارفه
9- رأي انثي
10- سعاد سيطره

يا خي انت مريييييييع !!!
1/ ود المطامير : يجعلك تقرأ كل مساهاماته ومواضيعه ، من هو ؟

2/ خالد علوني : من هو الشخص الذي جننه الأشراف والفلك والوادي الأخضر ؟

3/ راجل فلانة : انا ما بعرف رجال فلانات والله .

4/ كان زماااان ده يا أخوي : الجكس كيف معااااك ؟

5/ بس دي ريمووووون ذاتها . شخص بيعرف يدخل في الموضوع تمام ويخرج منو تماااااااااام ، ده منو ؟ لكن والله يا الشمشار
تقدر لما تقول لي كيف ؟ الا ألحقك في سوق البصل ،،،،،،،، وأحل ليك عقدة حبل جون قرنق ،،،

6/ غايتو بلاهو ما بقدر نخش المنتدى . رأيك شنو في كلمة السر ؟

7/ والله ما عارفة . ما هو الأسم الحقيقي ل بت مارنجان ؟

8/ رأي أنثى . تحب الرجل أن يحبها كما هي ، تعتقدي ده رأي منو ؟

9/ نزار أحمد محمد ( للتخسيس) : من هو المشاغب الأول في المنتدى ؟

10/ سعاد سيطرة : ما هي المسرحية التي قام بتأليفها حرمشة ؟

[عنكوليب]

عنكوليب وكتابة الشعر ؟

أنا ارتجله فقط في بعض الأحايين ،،،
ولكنني لست بكاتبة شعر ،،،

أقرأه بتمتع ،،، بس العتيق منه ،،
المقفى ،،، السلس ،،،ال فيه كلمات تحيرك داك ،،،،

بحب قصائد الحب والغزل جدا ،،،

انا لست بشاعرة يا ود العمدة ،،،

بعدين تعال هنا ،،،، جبت الصورة دي من وين ؟

الللللللللله يا اخي ،،، شفت الرقاق ديل ،،، تلقاهم حلوات خلاص ،،،

[عنكوليب]

(عنكوليب كبنكسجي .. بوست موفق بإذن الله .. نتمنى أن يكون فيه بوح من الجنسين حتى نجد منك في الأخير توصيات قائمة على هذا البوح بعد مراجعتها فالموضوع مهم جداً وفيه أبعاد لعلاقة مقدسة بين الجنسين .. علنا نخرج من خلال الرغبات الشخصية بنموذج لنوع رغبات مثالية تجمع بين هذا وذاك .. والله معاك ..)

هذه كلمات تلقيتها من ريسنا وأخي عصام حسين ،،، من خلال مداخلاته الثرة في بوست
رأي أنثى 2 ،،،

سوف أتقدم في اليوم الأخير لهذا البوست بما توصلت اليه من خلال المداخلات التي
كانت معي في هذا البوست بواسطة كل الأحباء والمشاركين ان شاء الله ،،،،

[أم سماح]

عنكوليب بالصف الأول ثانوى عام وانت الاولى على الدفعة .. والطالبة لمثالية
حدثينا عن هذه الفترة من عمرك .. وأحلى ذكرياتك عنها ..و من الاستاذة و الطالبات من تذكرين ؟

[عنكوليب]

الراقية كما تعني هذه المفردة .. آمنة أو عنكوليب كما يحلو لنا ولأهل النفاج ..

وعزت الذي دسى فيك كل هذا الجمال .. أنني قرأت كامل هذا البوست بمتعة لا تضاهي ..

وتفاصيل لها طعم الخصوص ..

وزمن تفوح منه روائح الأصالة والمحبة والطيبة الجد جد .. ليس معي الآن سوى طعوم متعة

متداخلة لاجترارك لذكريات زمن كان أجمل بناسه .. ليست بحوزتي أية استفهامات وإن كان ثمة

طلب حدثينا عن وعي وتطلعات بنات جيلك وعن وعي وتطلعات بنات هذا الجيل ..

مؤكد تحياتي يا سيدتي وكوني ناضرة الدهر ضاحكة سنينك،،،




سوباوي ،،،بداية بهذا الأسم من أين أتيت به ،، وما معناه ؟
اشكر رقيق حروفك ،،،، وزيارتك الكريمة جد والله ،،
عرفت اسمك من بين اسماء اعضاء المنتدى ،، لكنني لم أصادفك ،،
يالحظي الأن ،،،

هناك فارق كبير ما بين الحياة والمجتمع في الستينات و السبعينات واليوم ،،،
هناك من قرأ ردي على تساؤلات بعض الأعضاء ،، ووصفني بالمتخلفة في الرأي
لأنني كنت واضحة في ردودي ،، ولم تعجب كثيرين ،، بل وكثيرات ،،
لا يهمني ما يقولون ،،، أسمع فقط ،،، ورأي لم ولن أغيره البته ،،
وطالما وصولوني فهذا يعني أنني أصبت موقع لا يريدونني أن أمسه ،،،

أتمنى أن يدوم بيننا الود ،،، وأتمنى أن يعود الوئام لمنتدانا ،،،

وعشت سوباوي ،،،،

[عنكوليب]

عنكوليب بالصف الأول ثانوى عام وانت الاولى على الدفعة .. والطالبة لمثالية
حدثينا عن هذه الفترة من عمرك .. وأحلى ذكرياتك عنها ..و من الاستاذة و الطالبات من تذكرين ؟




أم سماح العزيزة ،،، رفيقة الصبا ،،،،

جليل تقديري ،،، فلقد نسيت كثير مما كان في تلك السنوات ،،
ولكنك ما زلت بذاكرة خصبة - ماشاء الله -
وياريت الواحد لو كان طوالي الأول والمثالي ،،،،

كانت مرحلة انتقاليه لسن الشباب ،،،
كانت علاقاتي محصورة نوعا ما لأني لسه جديدة عهد بالثانوي العام
ووجوه جديدة ومختلفة أكيد ،،، حتي نوع الدراسة كان مختلف وصعب

اساتذتي ال لسه في مخيلتي - غبوش - سلوى - حمدو -

الحاجات الحلوة ،، البنات في السن دي بيتدئوا مرحلة المراهقة والشباب
فكنا نحنا مجموعة عندنا سخرية من التعليقات بتاعة البنات على الصور ال
في مجلات القصص القديمة - افلام برازيليه ومكسيكية مصورة بالمجلات
ومترجمة بالعربي - وبعضهن أحب الأستاذ ،،، ونحنا نضحك ،،،

وبذكر من البنات ال كانوا في نفس الفصل :

احلام الخواض - اخلاص عبدالعزيز - - سهام - منى الركبي -
يا أم سماح الذاكرة خربة فأعذريني غايتو ،،،

[عاشق الترحال]

[center][color="#ff0000"][i]

هناك من قرأ ردي على تساؤلات بعض الأعضاء ،، ووصفني بالمتخلفة في الرأي
لأنني كنت واضحة في ردودي ،، ولم تعجب كثيرين ،، بل وكثيرات ،،
لا يهمني ما يقولون ،،، أسمع فقط ،،، ورأي لم ولن أغيره البته ،،
وطالما وصولوني فهذا يعني أنني أصبت موقع لا يريدونني أن أمسه ،،،

أتمنى أن يدوم بيننا الود ،،، وأتمنى أن يعود الوئام لمنتدانا ،،،

،،،،



القمه دائماً مستهدفه

[ريمون]

أم سماح العزيزة ،،، رفيقة الصبا ،،،،

جليل تقديري ،،، فلقد نسيت كثير مما كان في تلك السنوات ،،
ولكنك ما زلت بذاكرة خصبة - ماشاء الله -
وياريت الواحد لو كان طوالي الأول والمثالي ،،،،

كانت مرحلة انتقاليه لسن الشباب ،،،
كانت علاقاتي محصورة نوعا ما لأني لسه جديدة عهد بالثانوي العام
ووجوه جديدة ومختلفة أكيد ،،، حتي نوع الدراسة كان مختلف وصعب

اساتذتي ال لسه في مخيلتي - غبوش - سلوى - حمدو -

الحاجات الحلوة ،، البنات في السن دي بيتدئوا مرحلة المراهقة والشباب
فكنا نحنا مجموعة عندنا سخرية من التعليقات بتاعة البنات على الصور ال
في مجلات القصص القديمة - افلام برازيليه ومكسيكية مصورة بالمجلات
ومترجمة بالعربي - وبعضهن أحب الأستاذ ،،، ونحنا نضحك ،،،

وبذكر من البنات ال كانوا في نفس الفصل :

احلام الخواض - اخلاص عبدالعزيز - - سهام - منى الركبي -
يا أم سماح الذاكرة خربة فأعذريني غايتو ،،،


يعني نفهم انكم دفعة وبنات فصل واحد يا ام سماح وعنكوليبة ؟؟
وهل كنتوا علي علم ولا اتلميتوا في المنتدي صدفة ؟؟

[عاشق الترحال]

عدنــــــــا


اللون المفضل ؟
الفريق الرياضي ؟
الهواية ؟
اكلة مفضلة ؟
الفنان ؟
الكاتب ؟
كتاب ؟
الصحيفة ؟
الشاعر ؟
بيت شعر؟


الليله عزاب شديد


بي اختصار


1 / الحياة الاجتماعيه بين الخرطوم والجزيرة ؟
2 / عزوف الشباب عن الزواج الاسباب والمبررات ؟
3 / الحب ،،، الصداقة ،،، وموقعك من العبارتان ؟
4/ التسجيل باسماء مستعاره ...ماهوالسبب لو امكن ؟


وتقبلي تحياتي اختي عنكوليب

[سوباوي]

[center][color="#ff0000"][i]
سوباوي ،،،بداية بهذا الأسم من أين أتيت به ،، وما معناه ؟
اشكر رقيق حروفك ،،،، وزيارتك الكريمة جد والله ،،
عرفت اسمك من بين اسماء اعضاء المنتدى ،، لكنني لم أصادفك ،،
يالحظي الأن ،،،

هناك فارق كبير ما بين الحياة والمجتمع في الستينات و السبعينات واليوم ،،،
هناك من قرأ ردي على تساؤلات بعض الأعضاء ،، ووصفني بالمتخلفة في الرأي
لأنني كنت واضحة في ردودي ،، ولم تعجب كثيرين ،، بل وكثيرات ،،
لا يهمني ما يقولون ،،، أسمع فقط ،،، ورأي لم ولن أغيره البته ،،
وطالما وصولوني فهذا يعني أنني أصبت موقع لا يريدونني أن أمسه ،،،

أتمنى أن يدوم بيننا الود ،،، وأتمنى أن يعود الوئام لمنتدانا ،،،

وعشت سوباوي ،،،،

الموقرة .. آمنة (عنكوليب)

هذا الاسم يا سيدتي (السوباوي) أورثنا إياه الوالد له ألف رحمة مع كمين فدان إلفة وفراسخ

ود ليصبح الاسم المعروف للأسرة يعني يا ستي كانوا ثلاث مهندسين معماريين وجميتهم

يشتركون في أسم الأمين فلقب أحدهم بالأمين الأحمر نسبة لبياض بشرته ولقب الثاني بالأمين

اللخدر نسبة لسمار بشرته ولقب والدي بالسوباوي نسبة لأن أول عمل له كان بمباني مستشفى

سوبا،فشملنا اللقب وصرنا نعرف نحن أبنائه به ويشار لنا بسوباوي الكبير وسوباوي الصغير

وأخواتنا بسوباوية الكبير سوباوية الصغيرة وهكذا.

لا زلت أمارس متعتي بالقراءة عبر صفحات هذا البوست وربنا يحفظك يا آمنة لأولادك وبيتك

وزوجك وأتمنى من أخواتي بالمكان الاستفادة من عمق تجربة الجميلة عنكوليب أقصى

ما أمكنهم ذلك.

وأدعو معك أن يدوم الوئام بين الجميع،،،،

مرحق تحياتي وناضر مودتي،،،،

[عنكوليب]

يعني نفهم انكم دفعة وبنات فصل واحد يا ام سماح وعنكوليبة ؟؟
وهل كنتوا علي علم ولا اتلميتوا في المنتدي صدفة ؟؟

نحنا دفعة واحدة ،،،، نعم ،،،
ولكنني لم أعرف أم سماح أكيد يعني ،،

لكن هي بعد أن قرأت السيرة الذاتية حقتي

عرفتني ،، وعرفتني بيها ،،، وفرحت بيها جد والله ،،،

جزاها الله خيرا ،،، وذكرتني بحاجات كتيرة والله ،،،،
وأم سماح شخص ما هين نهائي والله ،،،

وكانت علاقتنا حلوة آنذاك ،،، وأنا فارقت ودمدني بدري

ولكنني آتيها زيارات دائمة والحمدلله ،،،

[عنكوليب]

اللون المفضل ؟
الفريق الرياضي ؟

يا عاشق الترحال اشكرك كتير والله ،،، وبقيت لي ذي صاحبك الشمشار ،،،

وانا عيانة من الخميس والله ،،، عشان كدة بع اذنك حا أجيب على بعض الأسئلة

* اللون المفضل : أنا أحب اللون الوردي ،، الزهري ،، وكذلك البنفسجي ،،،، والبني المحروق ،،

* الفريق المفضل : المــــــريــــــــــــــــــخ

[عاشق الترحال]

يا عاشق الترحال اشكرك كتير والله ،،، وبقيت لي ذي صاحبك الشمشار ،،،

وانا عيانة من الخميس والله ،،، عشان كدة بع اذنك حا أجيب على بعض الأسئلة

* اللون المفضل : أنا أحب اللون الوردي ،، الزهري ،، وكذلك البنفسجي ،،،، والبني المحروق ،،

* الفريق المفضل : المــــــريــــــــــــــــــخ

سلامتك وعاشق الترحال كرامتك ...اتمني لك الشفاء العاجل
من صميم قلبي .
وما مشكله حلي البقلبك والما بقلبك خليهو .
ومره تانيه
اتمني لك الشفاء العاجل

[أم سماح]

نحنا دفعة واحدة ،،،، نعم ،،،
ولكنني لم أعرف أم سماح أكيد يعني ،،

لكن هي بعد أن قرأت السيرة الذاتية حقتي

عرفتني ،، وعرفتني بيها ،،، وفرحت بيها جد والله ،،،

جزاها الله خيرا ،،، وذكرتني بحاجات كتيرة والله ،،،،
وأم سماح شخص ما هين نهائي والله ،،،

وكانت علاقتنا حلوة آنذاك ،،، وأنا فارقت ودمدني بدري

ولكنني آتيها زيارات دائمة والحمدلله ،،،

تسلمى الغالية آمنة حربى
ربنا يعزك ويكرمكك
وهلا وغلا ومرحب بيك فى أى وقت .. بس شكلى أنا حأفاجئك بالزيارة إن شاء الله الكريم .

[عنكوليب]

تسلمى الغالية آمنة حربى
ربنا يعزك ويكرمكك
وهلا وغلا ومرحب بيك فى أى وقت .. بس شكلى أنا حأفاجئك بالزيارة إن شاء الله الكريم .

من دواعي سروري وغبطتي والله ،،،،

ومرحب بيك حبابك ،،، والبيت بيتك ،، تشرفينا

في أي وقت ،،،، وأدينا من عندك شوية للنفاج بالله ؟

[عنكوليب]

الهواية : أهوى صناعة كل جديد ومبتكر من أنواع الأكلات العالمية ، وألح عليها عشان تظبط ،،


اكلة مفضلة ؟ أنا أحب أكل الفرن جدا ،،،


الفنان ؟ محمد الأمين (بدون منازع ) - منذ صغري ،،،

[عنكوليب]

الصحيفة ؟ ألوان - الأنتباهة .

الشاعر ؟ الشعر العربي : ابن زيدون . الشعر الحديث : بروفيسور : المعز عمر بخيت .

بيت شعر؟ بنتم وبنا ، فما ابتلت جوارحنا شوقا اليكم ولا جفت مآقينا

[عنكوليب]

1 / الحياة الاجتماعيه بين الخرطوم والجزيرة ؟


أنا لا أشعر بفرق واضح بين الحياة في مدني والحياة في الخرطوم من
ناحية عامة ، أما من ناحية خاصة ، فمدني هي مرتع صباي وأهلي وعجني ،،

[عنكوليب]

2 / عزوف الشباب عن الزواج الاسباب والمبررات ؟

شوف بقول ليك الأتي : ال عايز يعرس بعرس ،،،
سبب واحد يمنعك مافي ،،، الا يكون اختيارك خاطيء ،،،

وبالمناسبة خت خط تحت : الا يكون اختيارك خاطيء هذه ،،

ففيه كل المعاني ،،، وكل المألات ،،،

[عنكوليب]

3 / الحب ،،، الصداقة ،،، وموقعك من العبارتان ؟


كلمتين لمعنى واحد ،،

الحب كلمة كبيرة تشمل جواها الصداقة والقرابة (الرحم)

الحب لشخص واحد ذو معنى محدد يختص به الشخص المعني لتحديد النوع ،،
الحب لجماعة وأفراد يختص به الأفراد والشخص غير ذي القربى لتحديد نوع الحب ،،

لذلك هو حب واحد له وجوه مجازة لتحديد وجه الحب للشخص أو الجمع .

عرفت الحب وأنا صيبة ،،، وعشته بمعناه المجاز به دون تشويه ،،،

وأتمنى من الله الا يحرمني هذه النعمة ،،، التي أعيشها ولا اريد الخروج منها ،،،


وعرفت الصداقة وأزاولها يوميا حتى أن ألقى الله ،،،

[عنكوليب]

4/ التسجيل باسماء مستعاره ...ماهوالسبب لو امكن ؟
قد يهاب الشخص المسجل الجديد من الولوج الى عالم المنتديات
باسمه الحقيقي، لأنه لا يعرف من هم الذين داخل هذا المنتدى ، كيف يتعاملون ؟
كيفية تقبلهم له ؟ من هم ؟ طرق الرد منهم ؟ وأشياء كثيرة جد ،،،،
وأخرون حتى لو عرفوا اجابة الأسئلة المذكورة ، لا يذكرون اسمهم الحقيقي لما قد
يترتب عليه من الأخرين - حسب رأيه -

[عنكوليب]

كتاب ؟ : عالقة في ذهني كتب منذ الثانوية ،،، جميله من ذاك الزمان :


1- King Solomon mines 2- Arms and the man3- A tale of two cities 4- Jane eyre 5-Tresue island 6-The black tulip 7- Flowers for Ms> Harris1

كتاب : لغز الموت

كاتب؟ : مصطفى محمود

[عنكوليب]

لقد كان كنا صغارا لا يكتمل يومنا أو أسبوعنا ، الا

بعد أن نقرأ كل ما يتوفر لنا من كامل كيلاني ، القاص

المصري والروائي الأشهر ،،،

فمن كتبه عرفنا حسن التصرف ، والتهذيب في التعامل

الأنساني ، واحترام الكبير والصغير ، والرفق بالحيوان ،

[عنكوليب]

من جحا السوداني ، الله يرحمه ميتا أو حيا ،،

والسنينا ،،أتمنى لها الصحة والعافية ،،، تعلمنا

الكثير ،،، ومن الجد الصباغ ،،، وماما عشه ،،

و-لا ياعزوز - وكتير ،،،

[بت أم درمان]

التحية للرائعة دوماً أُم الروائع
عنكوليب
أمنة الحربي
علي جلوسك في هذا الكرسي
وكل الشكر علي ردودك الاروع
وكل الشكر لكل من مر وشارك وقرأ ولم يشارك

وإلى هنا نصل مع اختنا وحبيبتنا
الى نهاية كرسي النجوم
التحية لها
التحية للجميع

وانتظونا مع نجم جديد
ان شاء الله

مشرفي المنتدى العام

http://i40.tinypic.com/s2wr2w.jpg

[عنكوليب]

بت أم درمان العزيزة ،،،

أحبائي بالمنتدى كافة ،،،

لكل من حاورني ،،، وأسهب معي ،،،

لكل من جعلني أذهب للماضي الحلو ،،،

لكل من اهتم بحرف من حروفي ،،،

تحية علها تطول قامتكم السامقة ،،،

فقط هناك رجاء ، بت أمدرمان فقد وعدت الريس بأن أسطر

نتائج ما توصلنا له جميعا في رأي أنثى ،،،


كلمة أخيرة :
لكل من في المنتدى أقول : من يتق الله ، يجعل له مخرجا ،،،
احترموا بعضكم ، حبوا بعضكم ،، خافوا الله في بعض ،،

[بت أم درمان]

فقط هناك رجاء ، بت أمدرمان فقد وعدت الريس بأن أسطر

نتائج ما توصلنا له جميعا في رأي أنثى ،،،


كلمة أخيرة :
لكل من في المنتدى أقول : من يتق الله ، يجعل له مخرجا ،،،
احترموا بعضكم ، حبوا بعضكم ،، خافوا الله في بعض ،،

عزيزتي عنكوليب
اخدي راحتك
البوست مفتوح
وفي اي وقت تقدري تكتبي هنا
سواء سألوك أو جيتي وكتبتي انتي

وشكرا كتير على النصيحة الغالية
تسلمي لينا يا غالية
نكون سعيدين بوجودك في اي وقت