لاقيني قبال الزوال

[ابراهيم]

ابراهيم عثمان/1996م

بي شوقى ليك انا بحتضر
لاقيني قبال الزوال
بعد المسافات والسفر
والغربة فوق الاحتمال
ما بين غيابك وشوقي ليك
وهجر طال
مليون سؤال
معقول نسي؟
كل السنين واجمل وصال
ولا البعيد من العيون
جوة القليب ما ليه مجال
ولا المسافات قطعن
اجمل حبال
وارجع واغالط نفسي بيك
لا وألف لاااااااااااااااا
ما اظن يكون باع السنين
واصرخ
محااااااااااااااااااااااال
كل البنيناه ينتهي؟
ويصبح خيال؟
يصبح قصور من الرمال
وانا حالي حال
يا غالي بغني عن السؤال
ما عندي غير اتوسلك ابداً خيار
راجيك انا
لاقيني قبال الزوال

[ياسر فقيري]

ولا البعيد من العيون
جوة القليب ما ليه مجال
ولا المسافات قطعن
اجمل حبال

حقيقي يا أخ إبراهيم بهذه الكلمات قدرت تعبر تماماً عن حالنا مع الكثير ممن كنا نحبهم ويحبونا ولكن أقول فعلاً .. ( البعيد من العيون جوة القليب ما ليه مجال )
مع الشكر لك أيها الرائع دوماً

[aborawan]

والله يا ابراهيم عيني باردة عليك كدي راجع اول سطر كتبتو
ابراهيم عثمان/1996م اكيد قاصد تكتب هاشم صديق :D:D

[الزمن المريح]

تسلم و ما شاء الله ، ، اولا قصيد بالجد رائعة فى كلماتها و معانيها و نظمها و قوافيها ،، و الله الواحد بقراء فيها و يتخيل انه بسمع فى اغنية ملحنة يتغنى بها الاستاذ هاشم ميرغنى بالعود ،، و اذا كان ما عندك مانع حاول اعطيها الاستاذ عصام محمد نور و بالتأكيد سوف نسمعها على اوتاره و لك الود و التهنئة على هذا الابداع ،، وياريت تخرج ما عندك اذا كان بهذه الروعة

[ابراهيم]

كاتب الرسالة الأصلية ياسر فقيري

حقيقي يا أخ إبراهيم بهذه الكلمات قدرت تعبر تماماً عن حالنا مع الكثير ممن كنا نحبهم ويحبونا ولكن أقول فعلاً .. ( البعيد من العيون جوة القليب ما ليه مجال )

اخي ياسر ... لك منى عاطر التحايا

* شكراً كثيراً على هذا الإطراء ووجود هنا أكثر الروعة

* الخواجات قالو

******** Out of Sight Out of Mind ********

* لا نغتدي بهم ولكن "فلسفة ومنتق"

[ابراهيم]

كاتب الرسالة الأصلية aborawan
والله يا ابراهيم عيني باردة عليك كدي راجع اول سطر كتبتو
ابراهيم عثمان/1996م اكيد قاصد تكتب هاشم صديق :D:D

ابوروان داير تجيب لي الهوا مالك

حسي الزول كان سمعك نقبل وين ..

اين نحن من:

* الوجع الخرافي

* وحروف اسمك

* وعيون الارخبيل

وبالمناسبة دي اهديك الابيات دي من الشاعر هاشم صديق

ثغرك.. علي ورد الحزن


مطبوع وضاحك.. ومنتشي


يا نكهة الزمن الرحل


يا بهجة الزمن الوصل


يا فرحة.. الزمن البجي


لك التحية ابوروان لتعطيرك البوست

**********قال هاشم قال**********

[ابراهيم]

كاتب الرسالة الأصلية الزمن المريح
تسلم و ما شاء الله ، ، اولا قصيد بالجد رائعة فى كلماتها و معانيها و نظمها و قوافيها ،، و الله الواحد بقراء فيها و يتخيل انه بسمع فى اغنية ملحنة يتغنى بها الاستاذ هاشم ميرغنى بالعود ،، و اذا كان ما عندك مانع حاول اعطيها الاستاذ عصام محمد نور و بالتأكيد سوف نسمعها على اوتاره و لك الود و التهنئة على هذا الابداع ،، وياريت تخرج ما عندك اذا كان بهذه الروعة

الزمن المريح
سلامات يا زول يا رايع

بشكرك جزيل الشكر على هذا التشجيع والكلمات الرقيقة

يا سلاااااام ياخ معقول في زول يرفض فكرة زي دي انا غايتو لو اتيحت لي الفرصة ولا بتلفت.

تسلم يا الزمن المريح

[أبوبكرحامد]

المميز إبراهيم .......................سلاماً وتحية

االقصيدة غاية فى الروعة والتماسك ، ومؤكد هى ليست قصيدتك الأولى

فنرجو مدنا ببقية القصائد .

معارضة :
__________


كيف الزوال

لى زول حنين

بيناتنا كم أبدع وجال

كيف الزوال

لى زول رقيق

داعب الروح والخيال

كيف الزوال

بعد ما اتوالفنا

واسكرنا بى خمرو الحلال

هى محاولة للحيلولة دون زوال مبدعنا ابراهيم

مع محبتى

ود الماذون

[نيازى كشك]

بي شوقى ليك انا بحتضر
لاقيني قبال الزوال
بعد المسافات والسفر
والغربة فوق الاحتمال
ما بين غيابك وشوقي ليك
وهجر طال
مليون سؤال
معقول نسي؟
كل السنين واجمل وصال
ولا البعيد من العيون
جوة القليب ما ليه مجال
ولا المسافات قطعن
اجمل حبال
وارجع واغالط نفسي بيك
لا وألف لاااااااااااااااا
ما اظن يكون باع السنين

انها روعة اتعبتنى اخزتنى معها بعيد وما ارجعتنى
انها السنين والقلب والوصال والمسافات
انها لمست فى داخلى شيئا
واللة يعطيك العافية

[ابراهيم]

كاتب الرسالة الأصلية أبوبكرحامد
معارضة :
__________

كيف الزوال

لى زول حنين

بيناتنا كم أبدع وجال

كيف الزوال

لى زول رقيق

داعب الروح والخيال

كيف الزوال

بعد ما اتوالفنا

واسكرنا بى خمرو الحلال



أخى المبدع دوماً ..... ابو بكر ...

استمتع لحضورك دوماً ..
شكراً لهذا الإطراء الرقيق ... والانيق..
اعجبتنى معارتضك .. بهذه الطريقة .. دلني الى حزبكم لأنتمى له

**لك مني كل الود**

[ابراهيم]

كاتب الرسالة الأصلية نيازى كشك
انها روعة اتعبتنى اخذتنى معها بعيد وما ارجعتنى
انها السنين والقلب والوصال والمسافات
انها لمست فى داخلى شيئا
واللة يعطيك العافية

يا طيب القلب ..... نيازي
لك أعذب التحايا ..
السنين والقلب والوصال والمسافات
اختيارك لهذه المفردات إنما يدل على
الشفافية والاحساس المرهف

****لك الود****