عِشق الترحال ،،،،!!

[عاشق الترحال]

http://im13.gulfup.com/2012-02-21/1329782140531.gif (http://www.gulfup.com/show/X17lavzb2hlm)







التحيه لكل من يعشق الجمال والازهار والوديان والرمال ..والشمس حين تشرق وتغرب ،، التحيه لكل من يعشق ودمدني ،،جميع اسرة ودمدني ،،بما فيهم الزوار
،،،التحيه لأمي وأبي ،،وجميع اخوتي .. اصدقائي واحبابي .. اهلي وعشيرتي ..

عشق الترحال ..
انا من مواليد نيالا ،،، لكن الاصل الجزيره (الحاج عبدالله ،،،ريفي ابوسقره ) ،، ابوسقره جزء لا يتجزا من الحاج عبدالله فكانت تعتبر حي من احياء حاج عبدالله لكن الجماعه رفضو (اللجنه الشعبيه ) ..
نشأتة وترعرعتة في ابوسقره ،،،وفي اجازة العام الدراسي ،،كنت بسافر نيالا ،،وحاتكم بنتظر الاجازه تجي بي فارق الصبر والله .. عشان استمتع بي ركوب القطر ..واتفرج علي المناظر الجميله طوال الرحله ..واتعرف علي اماكن جديده.
وفي ذلك اجد لذه .
طبعاً زمني البدرس في الاساس مشي السوق كان ممنوع ،،،، ولو شافك استاذ ساي تاني يوم اطلعك في الطابور وتاخد ليك علقه نضيــــــــــــــــــفه ،،
اها يوم الجمعه انا اساسي في السوق لانو الاساتذه ما بسئلونا ،،،

[عاشق الترحال]

يوم الجمعه انا بصحا من النوم قبل ابوي ذاتو ،، وديك يا حميمه بعد الشاي ،،وانا وابوي الحجل بــ الرجل ..السوق جاك زول ... مشتاق ليك ليهو سبعه يوم ..
والله بحوم جنس حوامه اليومه ديك ،،،وحاتكم بخلس حق اسبوع كاااااااااااااااااااااااااااامل ,, بنفش جنس تفشي ،، الظريفه ابوي اقول لي : انتظرني هنا امش اجيب ليك كيس الخضار واجيك!! ،،طبعاً بعد ما احلقو لي راسي ..
والله فوتو بي جاي انا بتخارج بي قادي طوالي ،،، والله مرات ما بشوفني تاني إلا بعد ساعه ..ومرات ساعتين ..
يا ولد مشيت وين ؟ والله مشيت مع صاحبي سوق البهايم (المواشي).. بنمش نتفرج (طبعاً اولاد الحله يوم الجمعه كلهم تلقاهم في السوق )
مرتبين لي كباية عصير برتقال طوالي بمش اشربا ليك .. مع ابوي ..
ومن محل العصير ابوي بقول لي امش المحل هسي بجيك ... انتو قايلني ما بعمل للدرب كليوات .. والله ما بصدق ،،لقيت لي فرصه تانيه أتم فيها باقي حوامتي في السوق .. واخلي ليك ابوي مشلهت شلهتة افتش فيني ..بعد افتر حتان ارجع ليهو ..
المواصلات طواااااااااااااالي من دربي دا ...شايل القفه الماخمج ..الطعميه والتسالي والفطور وحاجات تاني نسيتة ... وعلي هذا الحال سنين من عمر الزمان .. والله كانت ايام حلوه بجد ..

[عاشق الترحال]

المصيبه الاكبر،،،،!!



المصيبه الكبيره يوم كترن القروش في صندوقي ،،، زمان اي زول بكون منكم عندو صندوق ..
اها حيبتة ليك القروش ،،، وحاتكم كتيرات كتره ،، جاتني فكره جهنميه .. انا اقوم اسافر مدني واتفسح فيها والبحصل احصل ..
اتو قاليكم ما مشيت ..
امي كانت في البيت ما فيشه مع جيرانا ناس عمتي ... ولقيت ليك الفرصه جهنميه .. ومشيت الزلط ... وركبتة الدفار ،،، ودي سلامه ما لقيت لي زول بعرفني عشان ما انزلني ،،،
يا سلااااااااااااااااااااااام مناظر جميله وقري كتيره ...وعربات في الزلط كبار وصغار ...وملكيــــــــــــــــــــــف .. الدفار وصل السوق المركزي .. نزلتة زي ما الناس نزلو من الدفار .
والله القبله علي وين ما عرفتها ،،، ما جاهل واصغير ..!!!
لفيت لامن فترتة من اللف ( في السوق المركزي ) وجم سوق البصل في دكاكاين كدا عاملين ليها مساطب ،، وقعدة ليك في مسطبة من المساطب ،، والراس شغاااااااااااااااااال اودي واجيب ... دي محنة شنو العملتها في رقبتي دي .. هسي انا في زول قال لي سافر .. انوم وين واكل شنو آآآآآآخ انا جعان ،،، هسي اقول للناس شنو ... في واحد من البصاله كان مراقبني من ما قعدة في المسطبه وكت شاف حالتي سائت ووشي اتغير لونو ..جاني سالني ..انت ود منو ,,وجاي من وين ،، وبتعرف منوهنا ،،، والجا معاك منو ،،، وانا ساكت ساي ما قادر اقول بقم .. في واحد معاهو الله يطول في عمرو .. قالي : الولد دا شارد من اهلو ..!!
المهم جابو لي سندوتش بتاع طعميه ،،، وكوز مويه قدر الهجمه ..
الاكل قلبني قعدتة ابلع في بوليع والله ،،
وكان ما الله ستر اتكلمتة قلتة ليهم انا من حاج عبدالله (ابوسقره) كانو سايقني التلفزيون ( هسي كان ودوني كان اكون مشهور كيف ).
صوره وصوت ،،خرج المعو فلان العلاني ..من منزل زويه ..لونه اسمر .. شعره قرقدي ..ينتعل سفنجه ابو حمامه بالون الاخضر ..ويرتدي قميص كبدي ( طبعاً القميص بكون ظاهر للمشاهدين بالون الرمادي ...التلفزيونات ما ساده ) وبنطلون بالون الاسود ...
فتشو لي العربيه الماشه الحاج عبدالله وسلموني لي زول بعرف ابوي
.. عشان ما ازوق في الشارع ..حصلتا البيت مع المغارب ،،، واختة لي سماحة علقة من ابوي ... وحاتكم بتذكره لي الليله .
ومن ديك مدني دي بقيت بسمع بيها ساي .
إلا بعد كبرتا حتان بقيت امش ليها تاني ،،،


في جميع اجازات الاعوام الدراسيه كنت بسافر نيالا... اخر رحله كانت اجازة سنه سادسه .
تاني ما دقيتة إلا شهر تلاتة الفات ،،،،سنه ما تميت ،،بعد غياب دام 12 عام .

[عاشق الترحال]

الرحول إلي مدني ،،،!!


قبل امتحان شهادة الاساس في فورمه ..الطالب بي ملاها ..
اكاديمي ..فني ..
انا اخترتا الفني والله من غير ما اشاور ابوي ،،، والحاج عبدالله مافيها فنيه طبعاً إلا مدني ،، وفي نفس الوكت كنتة ما ضامن لي سكن فيها ،،، تم اعلان فتح المدارس في التلفزيون والراديو ،،،انا بقيت اتضاير ...وبعد مجهودات ابوي لقيت سكن في عووضه وسط مع (شيخ اسعد الجيلي ) من اولاد حلة الشيخ السماني ...
بعد ما ابوي كلمو لي ،،،وافق اسكن معاهم ..
سافرنا سوا من الحاج عبدالله بي عربتو ... مع المغارب .
حصلنا صلاة العشا ،،،ونزلنا في حي كدا عرفتة في ما بعد انو دا حي عووضه .. سكنتة لي معاهو زي اسبوع كدا وبي دورو رحلني لي ناس عم ( صديق ابو قصه ) معاهم ساكن كم طالب كدا ،،انا ملحق معاهم ..
نعم الاخوان والاصدقاء ،،،في ذلك المنزل والله كانت ايام جميله بكل ما تحمل الكلمه من معني ...
عندي صاحبي معانا في نفس البيت ،،،يوم جايين من مشوار عصريه كدا .. كداري .. اتكلم عني وعن الصداقه الحلوه وحاجات كتيره ،،، والله انا بكيت واتحاضنا في نص الشارع ،، ومن اللحظه ديك صداقتنا بقت اقوي من الاول ...ياسلاااااااااااام .دنيا فراقه والله .
قضيت فتره جميله في مدني والله ... وعرفتة فيها كميه من الناس ،،، خاصه طلبة المدرسه الفنيه ،،، دا غير ناس الحي ..( عووضه وسط ،،محطة الجامع ،،، المنزل جوار دكان عبدالسلام ) .. آآآه ياليت يسوقني القدر في اقل من لمح البصر لتلك المدينه ،،والي ذلك الحي والمنزل بي الخصوص ...

[عاشق الترحال]

بحكم طبيعتي العمليه من صغري ،،،يومي كان مقسم كالاتي :_
من الصباح بنركب عربية الترحيل بتاعت موظفين الذكاة .... بعد ما تلفلف للموظفين بـ نزلونا في خشم باب الفنيه ..( من الباب لي الباب ) كانت بجي لي جارنا شغال معاهم .
بعد تناول الوجبات الدراسيه ،،،بطلع زي الساعه واحده ونص كدا ... طوالي من المدرسه بمش لفة مايو 40 في معمل بتاع باسطه ،،، في اللفه موقعو شرق البنشر الغرب الزلط جوار البقاله الناصيه ... كنت بشتغل معاهم من الساعه 2 ظهر ،،بتذكر كنته ماسك ليهم بلح الشام .. لحدي ما ياخد العسل بتاعو المغرب بكون قرب ،، بستلم قريشاتي (مصروفي اليومي ) وببقي مارق عووضه طوالي ..
برتاح شويه ،،، بعد ما اخد لي حمامه ،،، وبقوم علي كتبي .
وعلي هذا المنوال لمدة عام دراسي كااااااااااااااااااامل والله ..
سائت الاحوال الاقتصاديه ،،، بعد مشاورات ،ابوي رجعني مدرسة الحاج عبدالله الثانويه ..علي اساس اني انزل معاهم من الصف التاني .. وافقة و ما كنتة مقتنع لكن دي إرادة ربنا جات كدا ،،، المستوي في الداون عكس الفنيه .. المهم جلستة لي امتحان الشاهده 2006م / 2007م احرزتة نسبة 65% بدون شوائب .. وما مقتنع بيها ... حمار الشيخ وقف في العقبه ...

[عاشق الترحال]

نواصل ان كان في العمر بقيه





شركة النيل الكبري لعمليات البترول : _

[mahagoub]

زكريات
لكن انت ما عجوز
من زمن المدرسين البخوفوا الطلبه فى الشارع
واصل بدون فواصل

[بحيرى]

قمه فى الإمتاع والسرد الجميل ....
واصل يا حبيبنا بدون فواصل ...!!!!

[آلاء عبد الرحمن]

متابعين معاك الرحلة
:)

[ودالعمدة]

ذكريات جميلة وسرد رائع
وخليتنا نعشق معك الترحال
وعدت وأوفيت بسرد القصة
وربنا يديك الصحة والعافية

[سلمي ابوالكيلك]

واصل واصل كلام جميل خالص

[عنكوليب]

يا ولد انت وين ؟

نحنا ماااا راجينك !!!!

[mahagoub]

يا ولد انت وين ؟

نحنا ماااا راجينك !!!!

مدعوك وردية مسا

[عنكوليب]

مدعوك وردية مسا

يكون زيتو طالع حسه !!
ههههههههههههههههههههههههههههههههههههههها

[عاشق الترحال]

زكريات
لكن انت ما عجوز
من زمن المدرسين البخوفوا الطلبه فى الشارع
واصل بدون فواصل

عجوز وين يا حاج ،،دانا مولود في 18 /9/1988م
هسي عليك الله العجوز فينا منو .

[عاشق الترحال]

يكون زيتو طالع حسه !!
ههههههههههههههههههههههههههههههههههههههها

اي والله زيتي طالع ،،،عرفتي كيف ؟؟؟

كهربتنا قاطعه من النهار ... وهسي اتصرفتة علشان اطل عليكم وامش..

[عاشق الترحال]

يا ولد انت وين ؟

نحنا ماااا راجينك !!!!

كهربتنا ،،قااااااااااااااااااااااااااااطعه ،،، ولسه ما جات

[عاشق الترحال]

يا أخواني اعزروني الليله ،،، ما بقدر اواصل ،،،السرد..
لكن بوعدكم غداً انشاء الله لو الكهربا جات ..بواصل .

تقبلو تحياتي

[عاشق الترحال]

شركة النيل الكبري لعمليات البترول : _

بعد ما قضيت فترة التدريب العسكري ،،،سافرتة الخرطوم ،،، وبعد اشهر قليله ختيت مصظرينتي الببني بيها ،، والجنوب جاك زول ،،شايل احلامو وكل امانيهو ووعدو بي تحقيق كل الممكن وبعض المستحيل ،،
بعد مشاورات بيني وبين نفسي قررت قرار نهائي اني اسافر منطقة هجليج بالجنوب ... عندنا قريبنا فيها يسيطر علي مملكة النيل بالجنوب ،،، وزمان في زياره ليهو بالبت اوعدني اشغلني معاهم في الشركه .. والكلام دا الوكت داك انا كنتة في سنة تامنه والله ..
هسي انا امتحنتا الشهاده السودانيه وبقيت كبير .. ما اقوم امش ...لميت كل التلفونات ... ومعاي جواب من قريبي لي صاحبو في هجليج ... ومعاي وصايه كتييييييييييييييره ... كلها حفرتا ليها ودفنتها في قلبي ...
البشاير سمحه ،، قبل ما اسافر ،، وانا نايم ،،حلمتة بي نفسي انا في هجليج وشغااااااااااااااال في مان الله .
تاني يوم لملمة قريشاتي ...من الاسطه الشغال معاهو بنيان في الصالحه ...حزمتة ليك شنطتي ...واقرب سياحي ماش ربك ... حدي عدد ايام ضيافة الشريعه مع جدي خال امي ... والابيض علي طول .. وصلت الابيض عصيراً بدري ..
مكتب سفريات الولايات الجنوبيه ... سفرتة كانت رائعه جداً جداً ،،تعرفت علي الكثير من الاماكن والاشياء علي الطريق ...
لكن من ديك تاني ما سافرتة هجليج بي البر ،،،،وحاتكم طيران بس .. الشارع طويل كرهني ليك السفر زاتو ...
وصلتة بي سلام الحمدلله هجليج ...
بعد ما بيتنا في الشارع ،، والبلد زي ما بقولو رحبت بي شديد والله ،،
وكانت دي اول لي غربه في حياتي ..وعمري كان 18 سنه إلأ كم شهر كدا والله ..
وانا كنت اصغر زول في اسطاف الشركه ،،، تميت نص سنه حتان رجعتة البلد ،،، اجازه شهر واااااااااااحد بس ...
المره دي ما عندي الحق اركب طيارة الشركة ،،،وحاتكم وصلتة اول زول المطار ،، غيرتة الوظيفه ،، وكمان خشيت البلد لي جوه ( اتنقلتة ولاية الوحده ...حقل يونتي ..) .
عديت فتره جميله والله في الجنوب سادها المرح والهدوء التام ،، وذادت صلتي بـ الخالق عزوجل ،،، لان الحركه محدوده والروتين ثابت يومي ..

[عاشق الترحال]

اصبرو بجيكم صادي

[عاشق الترحال]

وتعرفتة علي اكبر قدر من الاصدقاء من داخل وخارج السودان ،، ماليزيا ، فنزويلا ،،بريطانيا ،، لبنان،، ناهيك عن الصينين الذين تعلمو نطق اللغه العربيه علي يدي بحقل يونتي .
مناطق البترول عالم بكامله ،،الطيبه والسماحه ،، العفويه ،،الرقه والذوق ،،حسن المعشر ،، هي صفات الذين يعملون به .
اجمل فتراتي في الجنوب لمن كنتة شغال في حقل يونتي (شمال بانتيو ) قضيت به فتره حلوه شديد ،، حيث طلعت منه مؤموريات كتيره ،،الي بانتيو ،، الخيرات ،،تور ابيض ،،تمر ،،جزيرة مانكن ،،ميوم،،روث يامو ،، صلاً الي واو .
اصعب المواقف في حياتي حصلت لي في يونتي لما هجمو علينا عساكر من الحركه الشعبيه ،،ولو لا حسن التعامل معهم لكنا اليوم في خبر كانا ... كنا محاصرين داخل غرفة الكنترول ومعي 4 اشخاص اخرين من ضمنهم السنير ،، وكادو ان يخطفو احدنا ،،لكن تعامل مع الموقف بشجاعه ،، والله العظيم ،،السلامح كان معمر وجاهز للضرب وموجه علينا ،، اقرب واحد لي كان السنير ،،، والله الكلام دا جد ،،الزول دا نطق بالشهادتين ،، وجسمه كله يرتجف ،،،وانا ولا هماني اقسم بالله لا خفتة لا اتشهدتة ،، مافكرتة للحكايه دي إلا وكت مشيت غرفتي بعد نهاية الدوام للراحه ،،وانا راقد علي ظهري مرا علي اسي الحادث كلو والله واستقربت شديد من نفسي .

[عاشق الترحال]

تاني يوم للحادث الدنيا قامت وقعدت وجونا وفود كبااااااااار من الرئاسة في الخرطوم ،، وقفو علي الحادث ،، وتلقينا التهاني والتبريكات لعدم تعرض المحطة للضرر ،، وحفزنا علي ذلك .
مديري في حقل يونتي ( هيثم حجوج ) يوم طالعين من الكتشن سوا ومعاي زميلي اخدنا لينا شوية دردشه كدا ،،، وعمري كان يومين في يونتي ،قال لي : انتا جيت صغير كدا مالك ،، الحقها بـ ، انت اصغر زول في اصطاف الشركه ،، وبالفعل اصغر زول وعمري كان لا يتجاوز الــ 18 عام .
شفتو الشقاوه دي كيف .
بعد عقدي مع الشركه انتهاء وجهت بالرفض للتجديد من جديد ،، نسبة للحادث الذي نجيت منه بقدرة قادر ،، ومدينا في القسم قال لي ،، انا ما بقدر اتحمل مسؤوليتك تاني ،، لما بحثتة في الموضوع لقيتو محرشو قريبي المدير بـ هجليج سابقاً ( الان في التور) انو ما اجدد لي العقد بتاعي ،ومن ديك بقينا انا والجنوب خطين متوازيين ولليله تاني كراعي ما عتبت الشركه ،،لملمتة قريشاتي كلها وعملتة بيها مشاريع زراعيه ،،والمشاريع كانت ناجحه جداً جداً ،، وبقيت تاجر في السوق ( جلابي وكدا) لكن كل هذا قوبل بي الحقد والحسد والضرر ،، لمجرد خروجي من الفقر وانا في مقبل عمري حتي صار يضرب بي المثل في البلد ،، ووالله عندنا واحده كدا ( والضفر ما بتلطع من اللحم زي ما بقولو ) عايرت ولده بي ( شوف اشرف وين وانتا وين ) وولدا دا نديدي .

[عاشق الترحال]

خسرت المشاريع وفشلت التجاره رغم ربحها ،، حتي صرت لا ارغب في العمل بالسوق ولا مواصلة دراستي ،، وحليمه رجعت لي قديمه ،، وفضلت في مرحلة الصفر .
لكن الحمدلله الان انا في احسن حال ،، وبعدة بعيد عن البلد (ابوسقرة) وفي فترة عامين زرتها( اقل من اربعين يوم) واحسست باني في الغربه بكون مرتاح شديد ،،ما عارف لي . لكن دا الحاصل والله .
اها هسي الان انا اتوظفتة في الشرطة القضائيه والامور وضحت ،، وشاعر بي نفسي وقفتة علي رجلي من الوقعه الزمان ديك ،، وهسي بفكر انزل طوب وابني بيتي في البلد وابدا رحلة البحث عن السمحه ام عجن . هع هع هع هع هع هع .

[عاشق الترحال]

ابعد المسافات واطول الطرق

الخرطوم ،،،نيالا

طبعاً في عيد الاضحي نزلتة البلد اجازه سنويه ،،، وعد ما قضيت فترة الاجازه بخير ،،، رجعتة الخرطوم لترتيب السفر عن طريق طيران( الجيش ) .
ما اتوفقتة في السفر معاهم ( ركبتة ماسوره)،،، قررت في المطار وباقي لي يومين بس من متبقي الاجازه ان اسافر عن طريق البر عبر الابيض ،
ومن المطار اها مشيت الميناء البري ،، الابيض جاك زول عابر طريق ،، شايل شنيطو وعقاب زكريات لما شافه اول مره في تاريخو . من اجمل ميزات الشرطة القضائيه ،،جمع منسوبيها في معسكر واحد يضم كل ابناء الولايات بالخرطوم للتدريب .
ومن هنا توسعت رقعة المعرفه ،، وانا في الميناء اجريت اتصال بدفعتي ،، يا دفعه ،،انا في الميناء البري ،،وقاطع تزكره الابيض ،، وماش نيالا اجازتي انتهت خلاص ،، وحاتكم كل راس ساعه بضرب لي ،، اها حصلتو وين ..؟
بعد حرارة الترحيب ، في الموقف ،،، مشينا البيت .
دون ان اشعر تبقيت بالابيض فترة يومين كاملين ،، سحرني جمال طبيعتها ،، وصفاء رملها ،، وحسن معشر ساكنيها ..
والله تعرفتة علي صاحب صاحبي فيها ،،الي الان صاحبو البقي صاحبي بضرب لي .
وحاتكم اليومين ديلك معظمهم قيناهم في سوق الصالحين ...جبنا وشاي ساااااااااااااي .

[عاشق الترحال]

المهم تحركت بي عربيه خط ( كروزر بافلو ) عصر يوم جمعه ،، الطريق الجميل ،، ومناظر جميله في الشارع ،، قري صغيره ترقد علي حافة الشوارع ، يترحلون بـ حميرهم ،، ومنهم يسير علي قدميه ما بين قرية واخري ،، حرفتهم الرعيه والزراعه المطريه .
النهود ،، مدينه جميله لا تقل قامتها عن الابيض ،، لم اطل الجلوس بها (فترة وجبة العشاء فقط ) عندي برضو دفعتي فيها ،، لكن رقم تلفونو موجود داخل الشنطة ,, والشنطة فوق سبت العربيه مربطه .
بها حركه دائبه بالليل ،،نسبةً للطريق الذي يتوسطها قدوماً من الغرب ، في الطريق قري كثيفه جداً لها مسميات لا يقدر احد لحفظها سوي السواق ،،، في معظم اطراف القري توجد رواكيب للاستراحه ،، وتجد معلقين في شعبة الراكوبه ،، رتينه لتضيء وتعلم القادم من بعيد بان هنا توجد قريه ،، يعني المعالم بتظهر من بعيد بــ اضواء الرتائن ،، وماصابيح البوابير ( المولد الكهربائي) .
الجو بارد والطريق رملي وانا مستمتع شديد بالرحله ،، والليل ما بنومو بقت علينا نحنا وحاتكم العربيه شالت الليل كلو ردحي ،،، والام بي ثري شغااااااااااااااااال .
من النهود ما وقفنا إلا لشاي الصباح في الضعين ،، كباية الشاي خلصت بي جاي طوالي اتحركنا ،،، نيالا .
وحاتكم فطرنا في نيالا ،،، تصدقو وصلنا نيالا في 22 او 21 ساعه فقط .

[عاشق الترحال]

تحسرت علي نفسي لعدم حملي معي كاميرا ،،لاصور المناظر والمشاهد والمناظر الخلابه .



خلاص ما مشكلة معاي صور لمنطقة فوجا في الحدود ما بين دارفور وغرب كردفان باذن الله بنزله ليكم في بوست لوحده.

اتمني ان لا اكون قد اطلت عليكم الرحله كما اتمني ان تنال اعجابكم والي لقاء في سفرةٍ اخري ورحلة ممتعه .

ودمتم في امان الله .

[عبدالمنعم الصديق(خدرا)]

والله يااشرف رحله جميله عشناها معاك واتخيلت نفسى فى البافلو قاعد جمب السواق
تسلم ياغالى
والرحله الجايه سوا انشاالله

[عاشق الترحال]

والله يااشرف رحله جميله عشناها معاك واتخيلت نفسى فى البافلو قاعد جمب السواق
تسلم ياغالى
والرحله الجايه سوا انشاالله

هع هع هع هع
خيالك وااااااااااااااااااااسع

تسلم كتير والله
وانشاء الله الرحله الجايه سواء ،،،في بيت الله

[ود المطامير]

والله اليومين ديل كترة رحلات

رائع يا رائع

نزل الصور

[mahagoub]

هو صاح كتر الترحال
باقى ليه رحله واحده
لغوتوناما

[عاشق الترحال]

والله اليومين ديل كترة رحلات

رائع يا رائع

نزل الصور

يا الحبيب ازيك



هسي انا ماسك لي شغل جوه البلد ،،،داير اخلصو سريع ومسافر في الايام الجايه دي انشاء الله
بره السودان ،،،،،

[عاشق الترحال]

هو صاح كتر الترحال
باقى ليه رحله واحده
لغوتوناما


هع هع هع هع هع

عندي حصاااااااااااااااااااااااااااااااانه يا عمك