بنات داخلية ( الملكة ) [الأرشيف]

الملكة اسماء ( ام محمد )

03-03-2012, 03:37 AM

وبعد يوم دراسي جميل , رجعوا البنات لاوضتهم في الداخلية

وهناك دايما بتبتدي القصة الجميلة

غيداء : ماملاحظين حاجة يابنات ؟
سارة : شنو ؟
ندى : انا عرفت ... عبير لسه ماجات خاشة .. الظاهر الملكة عاملة ليها مجلس محاسبة على لبستها العجيبة بتاعت الليلة
غيداء : لا , ما دي ... ماملاحظين انو سمر من لحظة مرقنا من الكلية ماسكة التلفون وبتتكلم ؟؟ البت دي حبت من ورانا والا شنو ؟:D
ندى : هيهيهيهيهياااي .. والله كان عملتها تبقى بالغت ... حب شنو وكلام فارغ شنو ؟
سارة : ههه, لا لا سمر دي ما بتاعت حب , سمر دي تخصص شواكيش يا بنات ..متذكرين الود المسكين الحفى وراها السنة الفاتت واخرها ادتو شاكوش في نص راسو لمن طشا وتاني ماشفناه ؟
غيداء : ههههههههههه , والله صحي , طيب يا ربي تكون مالها , الله يستر مايكون زول في بتهم حاصلة ليهو حاجة ,... ووووب من الشمار البقتلنا يوم .... قوموا قوموا نجهز غدانا انا مصريني عاملة مظاهرات والله
ندى : نحن طالبين ديلفري من الكانتين الجمبنا ...
غيداء : نحن طالبين ديلفيري ...اااااااااخ من دلعك والعالم الخيالي الانتي عايشة فيهو يا ندى , يا بت ديلفري شنو وكلام فاضي منو ؟ انتي ابوك دا طلعتي عينو بالمصاريف .. وحاة الله الظاهر قروش الغربة اللماها في عمره كله بصفيها فيك .. يا بتي قومي تعالي معاي المطبخ شوفي الاكل الجبناه امس انا وسارة ..
سارة: جنييييييتي يا غيداء.. عايزة تاكلي ندى من الحاجات الجبناها امبارح ؟ معناتها نويتي تودينا عنبر النساء باقي اليوم دا :confused:
غيداء : عنبر شنو يا بت , ندى دي المفروض تكون اتعودت اكلنا خلاص . بس بسبب دفاعكم عن معتقداتها في الاكل ومجاراتكم ليها في الاكل المن بره ابت تتعود اكل هنا
ندى : بسسسس خلااااااااص , انا ناقصاكم , مصاريني تصوصو وانتو تكوركو ؟:mad: بلا اكل بلا بتاع حسي بحردوا ليكم والله :(
غيداء : لا لا خلاص حبيبتي ارح نشوف الفي المطبخ وكان ماعجبك بمشي معاك نستاذن الملكة ونطلب من بره :)

وجهزوا البنات صينية غداهم وقعدوا مستنيين سمر , وسمر لسسسسسسه بتتكلم في التلفون :confused: وعبير لسه عند الملكة :confused:

عبدالرحمن مدثر

03-03-2012, 03:38 AM

هههه ههههه ههههه

العتب علي النظر

الاحمر بخلي العيون تزغلل

الاحمر بخلى محمدو يتجدع

فى روايه اخرى هاهااااا

الملكة اسماء ( ام محمد )

03-03-2012, 03:39 AM

ملكة حبيبتي دا احمد علقم والله ;););););)

هههه ههههه ههههه

العتب علي النظر

الاحمر بخلي العيون تزغلل

ههههههههههههههه
والله بتبالغوا , بعدين احمد الجابو داخلية البنات دي شنو ... وش محمر بالخجل الملخبط بصرة وش ههههه

احمد علم ....
ياغالي
ياراقي
يا مبدع
يابهي الطلة ( لك العتبى حتى ترضى )

تغريد

03-03-2012, 03:40 AM

QUOTE=ahmed algam;671815]هههه ههههه ههههه

العتب علي النظر

الاحمر بخلي العيون تزغلل [/QUOTE]

:rolleyes::rolleyes::rolleyes::rolleyes:[

الملكة اسماء ( ام محمد )

03-03-2012, 03:41 AM

الملكة .....

زاهية الحرف دوماً

لا أملك إلا أن اتابع حرفك بصمت وشغف

علوني
اشواقي لحرفك لا تحدها حدود
وسعادتي بوجودك هنا .. تفوق كل الحدود
كن بمليون خير

الملكة اسماء ( ام محمد )

03-03-2012, 03:43 AM

وشكرا لحرفك الذي يذيب جليد العالم الأفتراضي حولنا

ويمدنا بنقاط من الضوء تزيل ظلمات ألتفت حولنا

وعزرا علي مقاطعة قلمك ولكن هي فرحة لا تقاوم غمرتني حين رأيت قلمك يخط أمام ناظري حروفه

فلم اتمكن من أطلاق أنفاسي و حبس قلمي

حينها أطلقت قلمي وحبست أنفاسي

في إنتظار المزيد

تحياتي العطرة يا غالية

من جديد , اكتب لانك هنا مع موكب افتقدته حقا

الملكة اسماء ( ام محمد )

03-03-2012, 03:44 AM

مشاهد عايشتها فى زمن كان اكتر من جميل ... كان جميل شديد ياملكه

داخليتك دى كم نجمه كدا ... 3 نجووم .. 5

عشان مانندفق ساى ..

جايييييين راجعين اكيد

10 نجوم ياغالي الطلة
دائما تبهجني بحضورك وحروفك المميزة

عبد الرحمن , ابو مزن ومنيب
بالله عليك في احلى من ذكريات زمان ؟

الملكة اسماء ( ام محمد )

03-03-2012, 03:46 AM

في الحلقة الجاية قريبا جدا
حانعرف شنو سر مكالمة سمر ..

وعبير عملت شنو مع الملكة

واكيد تفاصيل اجمل لداخلية ( الملكة )

عبدالرحمن مدثر

03-03-2012, 03:48 AM

طبعا لسسه بتذكر موعد مع القمره .. فى داخليه جامعه الخرطوم .. لما تكتر الطياراات .. وماتلقى ليك حته تنوم فيها

تلقى نفسك مجبور .. تنوووم فى راس البيت هاها ... فى مرتبه لو شافوها ناس حقوق الانسان (ببيدوها ) مرتبه مفروض تكون

لو مابيضاء بيجيه ... هاها .. لكن قدر مااوصف ليكم شكلها عااامل كيف .. مابقدر .. مابتتوصف

واجمل شىء انو يكون معانا عزو ... بصوته الطروووب .. لما يكون فى مزاجو العالى بغنى لينا .. امونه عقد الجلاااااد

ولما يكون رسول ازعاااج طالما .. لم يجد حتى المرتبه المبرقعه ديييييييييك

يغنى لابراهيم عوض

بحب الليل .. ياناس الليل .. اللللللليلللل ... اللليللللللللللللللللللللللللللللل

هاها

طبعن بطريقه اداءه بصحى حتى ناااااس برى

جميله ياخ الايام دى

بالجنبه

ياحنكشه .. عندكم .. احساس زى احساسنا دا .. موعد مع القمره .. تكون جنبك .. تحكى ليها .. وتشكى ليها

عبدالرحمن مدثر

03-03-2012, 03:55 AM

علونى ... كدى ورينا معنى كلمه (طيارااااات )

من خلال تجربتك الثره هاها

الملكة اسماء ( ام محمد )

03-03-2012, 04:03 AM

بالجنبه

ياحنكشه .. عندكم .. احساس زى احساسنا دا .. موعد مع القمره .. تكون جنبك .. تحكى ليها .. وتشكى ليها
ههههههههه
غااااايتو , انت مزاجك لما يصفى بتكون ( احلى زول )
عندي ايام بجوار القمر و هدير موج نيلنا العظيم , وخضرة اشجار شوارع بلادي الحبيبة ( شفت كيف )

بدر الدين محمد

03-03-2012, 04:05 AM

ومن جديد نقرأ مع الملكة عالم آخر جدير بالتأمل والمتابعة

الملكة اسماء ( ام محمد )

03-03-2012, 04:08 AM

ومن جديد نقرأ مع الملكة عالم آخر جدير بالتأمل والمتابعة

ومن جديد اكون ممتنة لانتمائي لهذا الصرح الذي يسعدني دائما بمتابعة كوكبة من اروع مرتاديه , كم اعشق هذا المكان

شكرا استاذي لحرفك الذي يسعدني دائما وابدا

محمد الواثق

03-03-2012, 04:10 AM

احنا موش قلنا ما عايزين تجمعات

خالد علونى

03-03-2012, 04:16 AM

علونى ... كدى ورينا معنى كلمه (طيارااااات )

من خلال تجربتك الثره هاها

يا سلااااااااااااااام يا خرباش

زكرتني أيام 19*2
رقم 19 دا حكاياتو معاي جميلة جدا

وبعزوا كده لله في لله

أجمل شي في الداخلية أنك تكون طيارة

أو في عز أحتياجك لي الهدوء تلقا الطيارات حايمة فوق لي غرفتكم

وتبقي مشتت ما بين الزعل واللمة الحلوة

والهروب في الغالب بكون لي المسجد لما تكون عايز تقرا

ولا السطوح لما تكون خلااااااااااااااااص بقيت زول نوم

وأجمل ما في الأمر (الخرقة البالية) والمسماة إعتباطاً بي (المرتبة)
ها ها ها ها

خالد علونى

03-03-2012, 04:18 AM

خرباش ياخ خلينا قاعدين مستمعين أحسن

عشان ما نخربش الغرفة المرتبة دي ياخ

ود المطامير

03-03-2012, 04:19 AM

عبدالرحمن مدثر

03-03-2012, 04:23 AM

هاهااااااااااااااااا

علونى .. قلت سموها اعتباطا مرتبه ...

طبعن كلامنا دا بيؤثر فى انسيابيه الاحساس هنا .. باعتبارو انو زمنا كان .. ودى شكلها داخليه .. (ش . ع )

طبعن ياملكه معليش .. نحن عندنا اندياح موااازى برضو ..

لكن دقداقو كتير ..

وبكدا الصوره بتكتمل .. وصراع الاجيال مابتجيهو الحبه .. طالما البوست لامينا بكل اختلافتنا الجميله

دعايه

تابعونا ..

- علاقه الفته .. بطشت التشطيف ... واشياء اخرى

- تجليات كمنجه لما يكسر جلد العتمه باصدار شريط غنائى هااابط جمااااعى فى عز الليل وفى السطوح الماسطوح

.. تتصدره اغنيه .. البنسلين ياتمرجى نادو الحكيم ياتمرجى ...

ahmed algam

03-03-2012, 04:25 AM

ههههههههههههههه
والله بتبالغوا , بعدين احمد الجابو داخلية البنات دي شنو ... وش محمر بالخجل الملخبط بصرة وش ههههه

احمد علم ....
ياغالي
ياراقي
يا مبدع
يابهي الطلة ( لك العتبى حتى ترضى )

هههه هههه ههههه

شكرا ياملكة

آلاء عبد الرحمن

03-03-2012, 04:47 AM

الف حمد الله علي السلامة
ودايما متابعين

الملكة اسماء ( ام محمد )

03-03-2012, 04:47 AM

احنا موش قلنا ما عايزين تجمعات

ياسلاااااااااااام
يامرحبا يامرحبا بسيد الذوق والحرف الجميل

منور اكيد

همسة: بالله شوف لينا حل في التجمعات دي

الملكة اسماء ( ام محمد )

03-03-2012, 04:51 AM

يا سلااااااام
والله حظ النفاج بهذا الألق
جد سعداء بروعة الحروف المغزوله فى الزمن الجميل
أيتها ( الملكه ) المتوجه فينا روعه
واصلى هذه الروعه فالكل حضور تغمرهم المتعه للسرد الجمييييل

ويا سلام على حضورك يا راقي
مسرورة جدا بعبق مروركم سيدي العزيز
وسعيدة لانك ممن يقروءن لي

الملكة اسماء ( ام محمد )

03-03-2012, 04:55 AM

وبكدا الصوره بتكتمل .. وصراع الاجيال مابتجيهو الحبه .. طالما البوست لامينا بكل اختلافتنا الجميله

هههههههه
تصدق جاتني فكرة , ليه مانعملها داخليه ( مقسومة نصين ) وانتوا ليكم النص الفيهو عايزنكم تحكوا لينا فيهو عن ايام داخلية الاولاد
وانا ومافي مانع من مشاركة النواعم هنا حانحكي ليكم عن قصص داخلية البنات ... قلت شنو ؟

صحيح حايتحول لمسلسل ( مكسيكي سابقا / تركي حاليا ) بس مافي مشكلة ابدا ;)

الملكة اسماء ( ام محمد )

03-03-2012, 04:56 AM

هههه هههه ههههه

شكرا ياملكة

احمد / .... وش خجلان مووووت وزعلان حايطرشق

بطل سقالة ياااااخ

الملكة اسماء ( ام محمد )

03-03-2012, 04:57 AM

الف حمد الله علي السلامة
ودايما متابعين

آلويه ياعسل , الله يسلمك ياغالية
منورانا والله

عبدالرحمن مدثر

03-03-2012, 05:12 AM

هاها

قلت على بركه الله .. نبدا الخربشات .. اساسا ياملكه البوست بحرك فيك شجن .. وتداعيات

فتجد نفسك منساقا للاندياح .. من دون كرت دعوه حتى .. الاستجابه كانت من الانطلاقه الاولى

على قولك

هذا زمان الفوضى اللذيذه

دعونا

نفرتق ضفائر الكلمه للرزااااااااااااز ... جيه الاندياحاااااااات قربت

isamzaki1978

03-03-2012, 05:24 AM

هههههههه
تصدق جاتني فكرة , ليه مانعملها داخليه ( مقسومة نصين ) وانتوا ليكم النص الفيهو عايزنكم تحكوا لينا فيهو عن ايام داخلية الاولاد
وانا ومافي مانع من مشاركة النواعم هنا حانحكي ليكم عن قصص داخلية البنات ... قلت شنو ؟

صحيح حايتحول لمسلسل ( مكسيكي سابقا / تركي حاليا ) بس مافي مشكلة ابدا ;)

تسلمى يا الملكة على هذه الروائع
متابعين بشقف ، ما تطولى الغيبة
بس حكاية الخربشات دى حاولى اسحبيها من البوست الثمح دا
خليهم يخربشو بهناك فى البوست داك

الملكة اسماء ( ام محمد )

03-03-2012, 05:42 AM

بعد شوية جات عبير من برا الغرفة , وباين من ملامح وشها انها زعلانه جدا

ندى : شنو يا عبوره ؟ مالك يا عسل ؟
سارة : سجمي المرة المفترية دي عملت فيك شنو ؟
غيداء : عبير ...في شنو ؟ قلقتينا .. لينا نص ساعة مستنينك والاكل قرب يبرد ؟ الملكة مالها معاك ؟

وعبير ماشغالة بيزول ولا ردت على وحدة في البنات , بصمت غريب جدا اخدت بجامة وقلعت جزمتها ورمت شنطتها في السرير وبدون ماتتلفت وراها مشت الحمام تبدل ملابسها ..
البنات قاعدين بعاينو لبعض بدهشة وحيرة , غيداء رفعت اكتافها ومدت شفتها السفلى وقالت :
غيداء : بررررررري يا بنات امي .. شكلها ماطايقة روحها , تكون الملكة طلعت عقدها النفسية فيها ..

سارة : انتو صحي الملكة متزوجة وراجلها مغترب ؟
ندى : لا لا .. سمعت انها عانس
عائشة : عانس منو يا بت , والله دا الراجل التالت ليها
اميرة :لا لا ياخ اخوي صاحب واحد في الرجال الاتزوجوها , هي هسي على عصمة الرابع
شروق :الرااااااااابع , المفترية بت اللزينة , حاج متولي بسسسسسس
مي :غاااااااايتو مابسالكم نهائيا , شمشرة ماعادية , مالكم وملها انتو , استنو نشوف عبير مالها معاها
آلا : مافي داعي للكلام في المرة وهي مستحملانا ومامقصرة معانا والله

غيداء : تعرفوا يا بنات .. صدمتوني , كنت فاكرة اني الوحيدة الحاسة انو الملكة وراها قصص غريبة , لقيتكم ماشاء الله سي ان ان بس
سارة : الصراحة .. الملكة ماحلوة شديد , ولو صحي اتزوجوها اربعة بيكون عشان قروشها ...
ندى : الله يسالني عقدوتني انا زاتي بقصصكم دي .. يا عبييييييييييير , عبييييييييييير , انا حااموت بالجوع

عبير جات تجرجر كرعينها من الحمام وطلعت لسريرها الفوق سرير سارة ... عاينت للبنات وهي بتتثاءب وقالت ليهم :
عبير : اااااااااووووووه.. معليش يا بنات اخرتكم .. بس والله مالي نفس .. اتغدوا انا بقوم بعدين احشي لي سندوتش ..
سارة : نعممممممممممم ...ماعندك نفس؟؟ لا والله اكان تقومي انا زاااااتي مابقدر أكل الا اذا انتي جمبي , تعالي يا غالية

عبير وهي تعود ادراجها من سريرها ..
عبير : امري لله , بس عشانكم انتو , لكن والله ماعندي نفس
آلاء: اكيد الولية الشريرة دي سدت نفسك
عائشة : استني يا آلاء نسمع من عبير القصة
مي : احكي يا عبير , اتفضلوا يا بنات الغداء برد

أميرة : بس اوعك تقولي لينا علقت على لبستك الليلة ... تكون بالغت طبعا , لانك الصباح عديتي بجمبها , يعني لو نظرت ليك فيها هسي تكون قبيل كانت نايمة لسه ..
ندى : صح ... قبيل عاينت لينا كلا ونحن طالعين
شروق : يااااااااي , وليه معقدة , بليدة , دي الموضه اساسا
مي : استني يا شروق , عبير لسه ماحكت حاجة
ندى : استنوا استنوا .. الملكة الصباح كانت مشغولة , شفت لي وحدة لابسه عسكرية كانت واقفة جمبها ..
سارة: سجمي ... عسكرية....

عبير: خلصتو تخميناتكم؟؟

عاينو البنات لعبير بدهشة
عبير: الملكة كانت بتسالني عن واحد جاء متابعني لحد هنا اكتر من مرة!!

سكتو البنات ورفعوا ايديهم من الأكل ... عاينو لبعض , وبعديها قعدوا يعاينو لعبير بشي من الاستفسار ,قاطعتهم
عبير قائلة: مالكم بتعاينو لي كدا ... والله يا بنات مابعرف الولد ده ...انتوا بتعرفوني كويس

الملكة اسماء ( ام محمد )

03-03-2012, 05:49 AM

الملكة اسماء ( ام محمد )

03-03-2012, 05:50 AM

تسلمى يا الملكة على هذه الروائع
متابعين بشقف ، ما تطولى الغيبة
بس حكاية الخربشات دى حاولى اسحبيها من البوست الثمح دا
خليهم يخربشو بهناك فى البوست داك
هههههههههههه
اخي isamzaki
والله سعادتي بحضورك ضمن هذه الكوكبة ورغم الخربشات , تفوق الوصف
فهنيئا لي بكم اعزائي

ميادة

03-03-2012, 06:35 AM

ما تقولي اي حاجه بعد تنتهي من قصتك الجميله دي نتفاهم

جيت من اخر الدنيا عشان استمتع بيك قصتك .. :o

ومعاك ببقى الزمن حاااااااااااضر

الملكة اسماء ( ام محمد )

03-03-2012, 06:45 AM

ما تقولي اي حاجه بعد تنتهي من قصتك الجميله دي نتفاهم

جيت من اخر الدنيا عشان استمتع بيك قصتك .. :o

ومعاك ببقى الزمن حاااااااااااضر
مياااااادة العثل
ازيك ياراقية ....
والله ليك وحشة , اقول ليك شي ..
مابرد عليك عشان مانتشاكل هسي وتجي ست الداخلية تطردنا :o

ميادة

03-03-2012, 06:50 AM

مياااااادة العثل
ازيك ياراقية ....
والله ليك وحشة , اقول ليك شي ..
مابرد عليك عشان مانتشاكل هسي وتجي ست الداخلية تطردنا :o

تسلمي يا عثل ... وانتي كمان والله الشوق سحب ,,
اي اي ما تسمعنا الحمدلله جيت داخله بي عباية وسودا كمان :cool:

الملكة اسماء ( ام محمد )

03-03-2012, 06:50 AM

غيداء كانت اكتر وحدة بتثق في اخلاق عبير فعاينت للبنات وقالت ليهم :
غيداء : شنو يا بنات ... نحن بنعرف عبير لينا تلات سنوات ماحصل سلمت على اولاد الكليه خليكم من واحد صايع جاء ماشي بوراها لحد هنا , عبير .. سيبك من البنات المجانيين ديل وورينا القصة بالتفصيل الممل

عبير: والله يا غودا انا زاتي مافاهمة حاجة , الملكة اول ماشافتني جايا داخلة قبيل اشرت لي عشان امشي ليها , وانتو جيتو طالعين , اول ماعاينت لي بطريقة ماياها انا حسيت بانو في شي ماطبيعي فقلت ليها اااااكيد لبستي الليلة شاذة , قالت لي .."لو كانت شاذة ماكنت سمحت ليك تمشي الكلية اساسا" ..
وطلبت مني اقعد , بعديها سالتني سؤال غريب جدا وقالت لي ... انتي مش مخطوبة يا عبير ؟ فقلت ليها ابدا .. قالت لي طيب .. معناتها عندك خطيب في السكة .. استغربت واستفسرت منها وبصراحة يابنات ...قلبي قال شححححححح , قايلاها عايزة تخطبني لاخوها السمح داك البجي مرات زيارة ويصلح لينا الكمبيوترات

سارة: هههههههههههههههههااااي, غاااايتو مابسالك ...
غيداء: اهاكملي ...

عبير: المهم قمت قلت ليها ...مافهمتك ...قالت لي :"عشان شايفة لي واحد كدا بجي وراك كل يوم ".. الصراحة يابنات هي لما قالت لي كدا انا خفت , قلت في نفسي ياربي هو زي ماهي فاكرة ولا حرامي والعتب على النظر ؟
آلاء: مقدما , اااااايييييييووووي يوي يوي, زغرتو يا بنات احتمال يكون عندنا عرس قريب خخخخخ
مي : عرس شنو يا آلوية , الكلام دا هسي مامفهوم والخوف يطلع حرامي زي ماقالت عبير

غيداء : اها يا عبير , والملكة تقصد شنو بالضبط من كلامها ده كله , هل الود دا جاء داخل وسال منك والا هي لمحتها بعيونها العاملات زي الرادار ديلا ؟
عبير : والله يا غيداء انا زاتي اتمحنت , هي في كلامها انه بجي ليهو مدة ماشي وراي وبقدمني لحد مااخش الداخلية ...
شروق: تعرفي يا عبوره . الزول ده اكيد مدشدش فيك وماقادر يقاوم فكرة المشي وراك دي لحد مايلاقي ليهو فرصة ويخش فيك عرض ..
غيداء: شوشو ... كم مرة اقول ليك بلاش تحاكي لينا لقت الشماشا بالله ..
شروق : اوك , سوري اخر مرة يا غودا

عبير : تعرفوا يا بنات , الملكة عندها حق هي الظاهر خافت على سمعة الداخلية وكمان خافت يكون زول نيتو مانضيفة والا حرامي كمان ... اااااااااااه , يااااااااارب يارب تعدي الموضوع ده على خير والود المكسر فيني يطلع عريس خخخخخخ

هههههههههه
ههههههههه
ههههه

تصاعدت ضحكات البنات بعد لحظات خوف وترقب واستغراب .. اما سمر

فهي لسه بتتكلم في التلفون !!!

mahagoub

03-03-2012, 07:18 AM

الملكة اسماء ( ام محمد )

03-03-2012, 07:33 AM

غيداء: الحمد لله , يلا يا عبير ارح معاي نغسل العدة ونضاير المطبخ , سارة وندى رتبوا الاوضة , شروق انتي عائشة قوموا جيبوا الملابس المعلقة في حبل الغسيل من امبارح دي , مي و آلاء الليلة ماعندكم شغلة غير تمشوا تجيبوا لينا حليب و بسكويت لشاي المغرب , ياريت تشوفوا لينا علبتين تونة معاكم ...

شروق : اي بالله غيروا لينا من الفول دا شويا , آلوية ماتسي الحاجات الوصيتك عليها وبنتحاسب بكرة بعد اغشى الصرافة اشوف مصاريفي وصلت والا لسه ؟
عبير : انتو يابنات ... سمر لسه بترغي في الموبايل ؟؟
مي : اي والله , حيرتنا عديل كدا , ان شاء الله خير

بعد لحظات جات سمر تتقدل وبتغني في اغنية عبد الحليم حافظ :
سمر: أول مرة تحب يا ألبي واول يوم تتهنا , اووووووووووول مرة ... ترا تترا تتترررررررااااااااا ...

دهشة وحيرة سادت في الغرفة , قطعتها ضحكة شروق :
شروق : ههههههههههههههههههاااااااااااااي ,أمك الشرك قبض ليهو حمامة ...
غيداء : شرووووووووووق ...
شروق : اااااااسفه يا غودا , اخر مرة والله
مي : سجمنا يا سمر ... ده شنو ده ؟
سمر : شنو هو الشنو دا ؟ ولا حاجة بغني حرام اغني , وبعدين فين الاكل انا جوعااااااانة , انا مستعدة اكل المطبخ كله , ااااااااااااخ بس .
مي : غداك في المطبخ يا اختي ...
غيداء : باين القصة فيها( ذكر ) يا بنات

البنات : ههههههههههههههههههااااااااااااااي

سمر: بالله الحياة دي بلا ( ذكور ) قيمتها شنو بس , وروووووووني ؟؟ سيبو البري ووروني اكلي وين بالضبط عشان حمادة حايتصل بي بعد شوية ...

البنات : حماااااااااااااددددة !!!!! ههههههههههههههههههههههه , قرقرقرقر , ككككككككككككك , خخخخخخخخخ

سمر : اقول ليكم حاجة , غلطانة انا البوريكم اسراري ... اهاااا , المطبخ جاك نفر
شروق : تمام يافردة
غيداء : شروووووووووووووق ...
شروق : خلاص خلاص , توبة

الملكة اسماء ( ام محمد )

03-03-2012, 07:36 AM

ملكه وحرفك انيق
تدقدقين بطرفه كل الاحاسيس الدفينه
وتتغلغل الكلمة فينا تنعش ارواحنا
بعطر اخاذ يجعلنا نحلق فى انتظار المزيد
فلا تحرمينا عطرك ولا روعة حرفك
وفرحى خلق الله واتنى يا شبه القمرا

عمو محجوب
يا بشوش الطلة
سعيدة انا بان تنال اعجابك احرفي المتواضعة هنا
وسعيدة اكثر بان تكون واحد من اسباب تتابع النص

كن بالفين خير

isamzaki1978

03-03-2012, 09:35 AM

مافى اى مشاركات ولا خربشات
ما دايرين زول يجيى يعمل لينا حرمشات هنا
يعنى ما دايرين اى دعيات
المسلسل دا سخن وما بستحمل مقاطعة
الله يجيب الحلقة الجاية

mahagoub

03-03-2012, 09:40 AM

مافى اى مشاركات ولا خربشات
ما دايرين زول يجيى يعمل لينا حرمشات هنا
يعنى ما دايرين اى دعيات
المسلسل دا سخن وما بستحمل مقاطعة
الله يجيب الحلقة الجاية

طيب وين التسالى أو الفشار

بنت الرفاعي

03-03-2012, 10:05 AM

:):):)

و

أخيراً:rolleyes:;)

سعداء جداً جداً بعودتك وحروفك الرائعة (ما شاء الله)
وأيضاً بعودة
الأخ عبد الرحمن مدثر وكتاباته المليئة بالإدهاش والإبداع (ما شاء الله)،
و..............
........
.....
..
.
:):):)

الملكة اسماء ( ام محمد )

03-03-2012, 07:00 PM

الله يجيب الحلقة الجاية

والله يجيب العواقب سليمة

الملكة اسماء ( ام محمد )

03-03-2012, 07:05 PM

طيب وين التسالى أو الفشار
بالطريقة دي حانسمن , المسلسل طويل ياعمو

الملكة اسماء ( ام محمد )

03-03-2012, 07:06 PM

الملكة اسماء ( ام محمد )

03-03-2012, 07:50 PM

مساء جديد

عطر جميل يفوح من الاوضة ... في اللحظة ديك بالذات العطر الكان بفوح ...جميل

شاي مقنن :)

غيداء , قاعدة تسرح في شعراها وتلف الرول زي كل يوم , اهم شي في الموضوع الخصلة طبعا
سمر , على غير العادة تتونس في التلفون , اختلفت اليوم بسبب ( حماده ) زي ماقالت , رغم انها كانت كل يوم زي المواعيد دي بتكون في قمة لحظات الزهج وغير النقه والاعتراضات ماعندها شي ( البركة في حماده الخلاها رايقه )

مي, تكوي في هدومها ومحتجه بشدة عشان بت الغسيل بهدلت ليها طرحتها الشيفون
عبير, ساندة راسها في كراع السرير وقاعدة تقرض في اضافرينا بسنونها وسرحانه تفكر في موضوع الود البمشي وراها كل يوم, وسرح بيها الخيال لكل الاتجاهات وكلها بتصب في نفس المكان ( عريس ) طبعا

سارة , جاااااااااااايطة في التلفون مع اختها العامله شكلها مع حماتها وحالفة تتطلق وتسيب اولادها في بورتسودان وتجي راجعة الخرطوم
شروق عائشة : بتفرجو في مسلسل مكسيكي متابعنو ليهم تلات سنوات, وفي كل يوم بخلصو علبة مناديل بسبب الدموع والبكاء على البطلة الليها عشرين سنة بتحب ليها شاب وماقادرة تتلمى عليهو بسبب المشاكل والدراما التطويلية ...ومناهم وقمة سعادتهم لحظة البطلة تعرس الود الحبتو ... مافي شك انه كل وحده فيهم واهمه روحها ان الواقع بشبه القصص دي وبتتمنى انها تتحب بشكل مجنون وحبيبها يتعرض لكل انواع التعذيب والاضطهاد والحرمان والسجن والمرمطة والفراق والدموع لحد مايصل ليها

آلاء : مجتهدة جدا وعندها بحث مهم بتجهز فيهو , ليها ساعة بتفتش عن بيانات مناسبة في عمنا قوقل وفي كل مرة يفصل النت بتقوم تاخد ليها حاجة خفيفة من المطبخ وتجي تاكلها ( غالبا بعد كل بحث بتكون زادت تلاته كيلو ) يعني لما تتخرج حاتكون بقت ( فيل)
أميرة : بترتب في دولابها وبتفتش في بانداتها الملونيين عشان حاتلف شعرها بعد تخلص ترتيب الدولاب, وكالعادة المتهمة الاولى هي سارة عشان شعرها قصير وغالبا ما بتلمى ليها بدون باندات اميرة

اما ندى فكانت مندمجة في تجهيز الشاي المقنن الهي بتحب تعملو وبتعترض دايما على البعملوه البنات , عشان نظريتها في الموضوع بتقول , النفس في الشاي بالذات احسن يكون ( نفس شوايقه ) :) , وكل يوم بتكرر نفس الاغنية وهي بتعمل الشاي ( يارمال حلتنا زووووووووولا كان بأنسك يا حليلو , يااااا حليلوووووووو)

عنكوليب

03-03-2012, 08:45 PM

ندى : واهم شي فيها ان مقدمها الدكتور الوجيه الكاسر فيني ضلعة دكتور عبد الرحمن

علييييك الله بتكاوي في منو ؟

الملكة اسماء ( ام محمد )

03-03-2012, 10:28 PM

علييييك الله بتكاوي في منو ؟

ههههههههههه
اسكتي بس دي الموية البتنكت النمل من جحورو هههههههه

عنكوليب

03-03-2012, 10:31 PM

أحب النمل أنا !!!

ههههههههههههههههههها

الملكة اسماء ( ام محمد )

03-03-2012, 10:34 PM

أحب النمل أنا !!!

ههههههههههههههههههها

هوووي يازولة , انتي عايزانا ننطرد ؟خخخخخ

الملكة اسماء ( ام محمد )

03-03-2012, 11:43 PM

لحظة شراب الشاي باللقيمات والبسكويت او الكيك , بتكون من اجمل لحظات البنات في الداخلية مع بعض
ندى دائما بتتعب من توزيع الشاي على البنات وهم كل وحدة بتعمل ليها في شغلة
البتسرح والبتتونس في التلفون والبتبكي مع المسلسل واللسه بترتب في حاجات بكرة وخصوصا لبسة بكرة الماتشنق مع الشنطة والشوز ...

ندى: يلا ورح يا بنات ,اللية ما بوزع ليكم الشاي , عايزين نتلمى كلنا سوى ونتونس حبه
سارة: اي والله يابنات , يلا يا غيداء قومي نشرب شاي ندويه , يلا يابنات
سمر: هوووووي اندويه سيبي لي شايي , اخلص تلفوني واجيك
ندى: تلفونك ده الليلة فتر منك , خلي الرشاقة يا بتي اتقلي شوية

شروق: يا بنات الحقو يابنات , البطلة لقت حبيبها بخونها , الليلة ووووب , كر عليك يا العشمانه, مابسالكم يا الرجال
عائشة : والله مايستاهلها , المعفن , بالله وهي المابتعاين لراجل غيره, صحيح عينهم ماتملاها الا التراب ط
سارة : غااااااااايتو مابسالكم , انتو عايشين مع القصة دي لسه , يا بنات , الواقع غييييييييير ... الله يديكم البستاهلوكم

سمر : ع باللللللللللللللي حبيبي , ليلة الالبس لك الابيض وصير ملكك والدنيا تشهد ...
اميرة : بسم الله الرحمن الرحيم , انتي يابت كل ماتخلصي مكالمتك تجينا تغني ؟
سمر : الحب يا ميرو الحب حبيبتي , بخليك ماقادرة تقاومي الموسيقى الجواك , اااااااااااااااخ انا منك يا حماده , فضحكتني وجرستني قدام صاحباتي
ندى : هههههههههههه , وحاة الله جننك عديل كدا الود ده
مي : انا المهم عندي شكله طبعا اوعك يكون بشبه الككو .
سمر : كككككوووووووووو ؟؟؟؟ انتي بتهظري يابت ؟ والله تشوفيه تراجعي نفسك ... وتكتشفي انك قردة جمبو ... الله يا ميمي ...محمد ده من النوع البتتمني لو عرفتيه من زمان , وجيه ومهذب وحساس ورومنسي ومتفهم وواعي و ..
مي : اقيفي اقيفي بس ... عرفة من متييييييييين يا اختي ..

ندى : بالله عليكم بطلوا نقه خلونا نستمتع بكباية شاينا دي ... بلا حب بلا لمة
اميرة : طبعا ياندى ليك حق , مخطوبة وعينك ملانه
ندى : يا بتي الحياة قسمة والبنات البحبو ديل بكرة الوحدة تعرس واحد عمرها ماشافتو , زي حلاتي كده
اميرة : بس اكيد اتعرفتي عليهو وكونتي قناعة بانه يستاهل تكملي العمر جمبو ؟
ندى : بيني وبينك ... تقريبا
اميرة : ربنا يتمم ليك على خير ياقمر , وعقبالنا كلنا ان شاء الله

البنات : هههههههههه ....آآآآآآآآآآآآآآآآآآآآآآآآآآآآآآمين

wad alballal

04-03-2012, 12:51 AM

وين باقي الحلقات يا ملكة ...
كرباوي : ازيك والله شوق كميات .

عبدالرحمن مدثر

04-03-2012, 02:24 AM

سارة: اي والله يابنات , يلا يا غيداء قومي نشرب شاي ندويه , يلا يابنات

هاها

ذكرتينى .. عواسه ندويه فى النيل الازرق ... هى لااااكن ماعواااسه ...

isamzaki1978

04-03-2012, 04:13 AM

الملكة اسماء ( ام محمد )

04-03-2012, 08:20 AM

وين باقي الحلقات يا ملكة ...
كرباوي : ازيك والله شوق كميات .
جاية يا راقي , اخبارك وامورك يا ذوق

باللفة : الشوق البجيبكم كل خمسين سنة دا زااتو شكله مضروب

همسة : بالاكتر والله العظيم

الملكة اسماء ( ام محمد )

04-03-2012, 08:31 AM

سارة: اي والله يابنات , يلا يا غيداء قومي نشرب شاي ندويه , يلا يابنات

هاها

ذكرتينى .. عواسه ندويه فى النيل الازرق ... هى لااااكن ماعواااسه ...

هههههههه
تصدق بعد قريت كلامك ده سالت امي عن الموضوع لانها من عشاق ندى القلعة اكتشفت انه كلامك صحي

هههههههههه
الله يستر من الجاي كان كده

الملكة اسماء ( ام محمد )

04-03-2012, 08:35 AM

متابعييييييييييين يا ملكة
تخريمة : اها الآء ما بقت فيل لسه من كترة البحوث والشبكة البتقطع كل دقيقة تخليها تمشى المطبخ " كلميها تتعلم سوات الشاى المقنن "

هاهاهاهاهاها

سؤال : ما فى خدمة الواحد يعملها تجيب ليهو باقى كل الحلقات نظام مستعجل ومتحمس وكدا
هاااااااي خلى القطيعه انا سامعك " قالت جنو شمارات "
في خدمة
اضغط *12*122# واضغط اوكي

عرض حصري ( لارقام المتصلين ) ههههههه

همسة : تصدق مشكلة الشبكة والاكل البدون مواعيد دي احيانا كتيرة بتكون مرتبطة ارتباط وثيق , الله يعين العندهم النت زي العند بنات الداخلية بتاعتي ههه

عبدالمنعم الصديق(خدرا)

04-03-2012, 10:36 AM

تسلمى والله ياملكه وربنا يخلى بنات داخليتك باين عليهم ظراف وانا عايش المسلسل من حلقتو الاولى
وعجبنى شاى ندويه شديدواصلى ياملكه السرد جميل ومشوق

الملكة اسماء ( ام محمد )

04-03-2012, 11:14 AM

تسلمى والله ياملكه وربنا يخلى بنات داخليتك باين عليهم ظراف وانا عايش المسلسل من حلقتو الاولى
وعجبنى شاى ندويه شديدواصلى ياملكه السرد جميل ومشوق

عمو عبد المنعم
حبابك يارراقي , اسعدني جدا ان تكون احد متابعيي , ويشرفني ان تكون حاضرا لكل هذه السلسلة

همسة: شاي ندوية انا زاااااتي عجبني هههه
كن بمليون خير ياغالي

الملكة اسماء ( ام محمد )

05-03-2012, 01:38 AM

اجمل شي في الداخلية لحظات اختلاف الراي والنقاش بسبب حاجة تافهه جدا

تمام الساعة 8.30 مساء

سمر وشروق قاعدات يتونسوا في سرير عبير وست السرير ماسكه ليها مرجع بتفتش ليها في موضوع

شروق: سموره , حبيبتي , صاحبتي , الغالية , القريبة ,ال ....
سمر : ايوا ايوا ... خلصي عايزه شنو ؟
شروق: طرحتك اللبنية , لبسة بكرة ناقصه طرحة وماعندي لون مناسب
سمر: مابديك طبعا , اخر مرة اخدتي مني الشوز بتاعي البني ولحد الان ماقادرة انضف الطين الفيهو , انا ماقادة افهم انتي بتمشي كيف بالضبط , بالله الشوز ليهو معاي شهرين رجعتيهو لي زي الليهو خمسين سنة
شروق : والله يا سموره ماقصدت , انتي مافاهمه الحصل ؟ يا بتي بتاع الرقشة الفالح وقفني في موية بلاعة والا موية غسيل ماعارفه.
سمر : موية بلااااااااعه , شنووووووووو ؟ وكماااااااااااااان ؟
شروق : والله يا سموره اخر مره , لو خربتها ليك تاني ما تديني حاجة من عندك
سمر : حاضر يا ستي , بس بالله رجعيها لي اول ماترجعي عشان انا بنسى حاجاتي دايما عند البنات

وفي الجيهه المقابله كانت اميره في حاله حيره وبحث...

أميره : ندى , ساره ..حد فيكم شاف المق بتاعي ؟
ندى: لا , ابدا ماشفتو
ساره: ماعارفه بس متهيئ لي شفتو في يد مي قبيل ساعة شراب الشاي
أميره : اااااااخ انا من مي دي... لازم تعذبني بالتفتيش

اميره مشت تسال ميمي عن المق بتاعها, بينما ندى قعدت تضحك وقالت لساره
ندى: هههههههههه, تعرفي ياسرويه حكاية اميره مع المق بتاعها دي ذكرتني حكاية لذيذة جدا , قبل اجي عندكم كنت ساكنه في داخلية فيها بنات ظريفات جدا وكانوا دايما في حالة شكل بسبب كبايات الشاي
اتذكرت وحدة شهادة عربية اسمها شهد , شهوده دي كانت بتعاني من حكاية الكبايه المافيشه دي , فقامت فياخر سفره ليها لاهلها في الأمارات اشترت ليها مق غريب جدا ومن شده ماهو غريب كانت بتسيبو في الطربيزه ومافي حد بقرب منو ...
ندى: ليه, جايباه من كوكب تاني مثلا ...
أميره : لا. مش كده , تعرفي ياندى المق عادي جدا من بره بس من جواه , في القعر كده , بتلاقي ليك مجسم بتاع ( حشرة ) والمغزز في الحشرة انها مجسمه يعني بارزة لبره , فبمجرد ماتكبي ليك حليب وتختي فيهو الموية وتبتدي تصوتي بتحسي بانه في حاجه جواه بتكركب كرو كرو كرو , فما بتتخيلي منظر البنات في الغرفه بيكون كيف لما يعاينو للحشرة الفي كعر الكباية ...غايتو عندنا وحده اسمها منال دي بمجرد ماشافتو استفرغت ومن يومها ماف زول بهبش كبايه شهوده ههههههههه
ندى: هههههههههههه والله حريفه

آلاء عبد الرحمن

05-03-2012, 02:28 AM

يديك العافية
ومتابعين

آلاء عبد الرحمن

05-03-2012, 02:29 AM

يديك العافية
ومتابعين

بث ماتشرينا

isamzaki1978

05-03-2012, 02:41 AM

يا يوم بكرة ما تسرع تقلل لى نار وجدى " عليك الله الحلقة الجاية سريع، بعدين خدمتك دى جابت لى الاستعلامات "
نظام غنية كدا بعد التلفون
هاهاهاهاهاه

الملكة اسماء ( ام محمد )

05-03-2012, 06:06 PM

ألاء و isamzaki صباحاتكم ورد وعنبر

اعذروني على التاخير وجاياكم بالجديد باذن الله

الملكة اسماء ( ام محمد )

05-03-2012, 08:49 PM

ساعة النوم بتكون جايطة جدا في بدايتها لكن فجاءة بيعم هدوء ماعادي , بس ليلة البنات في الداخلية في اليوم داك تحديدا كانت استثنائية

كل وحدة طلعت في سريرها , البتمسح في كريم تفتيح البشرة و البتفتش في كريم تنعيم الكرعين بتاعها و الماقدره تخت راسها في المخدة عشان الرولات او الباندات عاملين مطبات في الراس
والبتتونس مع صاحبتها القصادها في السرير المقابل ( الدور التاني ) واكيد البتتونس في التلفون لسه !!!

غيداء : ااااااااااوه يا سموره وحياة ربنا الولد ده بكون زهج من اول يوم , يا بتي كترة الطلة بتمسخ القلة
ندى : غودا , غودا حبيبتي , سيبيها ... دي اصلها كدا اول ماتعرف الشاب بتطلع عينو بالاسئلة والونسة ومن اول يوم بتحفظوا حفظ وبتعرف كل شي عنو , بكره الصباح حاتلاقيها قاعدة سرحانه وبتفكر العصر بالكتير حانكتشف انه عندها راي والود ده من كلامو واضح انو وانو وانو ...وانتي عارفه الباقي
غيداء : بس يا ندوية الكلام ده غلط البت دي كده حاتدي الشباب فكره غلط عن نفسها , بعدين لو كل المرو عليها ديل غلط اكيد في مشكلة , ولازم يجي يوم تحب بالجد شاب وهو اليطلع فيها عيوب الدنيا بعدما تتعلق بيهو يفكها عكس الهواء
ندى: ودي الحاجة الانا خايفه لسموره منها . ربنا يستر

اما ساره فمشكلتها مشكلة , شبكة تلفونها طاشة وامها بتحاول تتصل بيها ليها مدة ..وعشان تلم في الشبكة لفت في الاوضه عشرين مرة , واخر ما توصلت ليهو وقفت في السرير بتاع شروق الفوق لسريرها ...رافعه التلفون قريب السقف وبتحاول تلقط خط شبكة

ساره : عاااااااااد ده كلام يا بنات امي , موبايلي ابا كلو كلو يلقط شبكة وماما بتتصل , يا سموره ماتدينا خط , عاااااااااااد الاداك الشبكة يدينا خط واحد ان شاء الله
شروق: هههههههه , سروية حبيبتي تعالي اتصلي من تلفوني , تلاقي امك هسي بالها انشغل عليك
سرويه : تسلمي لي انتي يا غالية , جيبي جيبي اشوف الحاصل شنو ؟ ربنا يجيب العواقب سليمه

ساره شالت تلفون شروق ولقت الشبكة فل , اتصلت بامها ...ومن شدة فرحتها ..مكالمتها كانت مسموعه ...وماف حد شغال بالفكره غير ....

ساره : الوووووووو . ماما ازيك يا غالية .. اخبارك , بابا كيف .. وسنوية وطلال ...خالو ماجاء من السفر لسه ؟؟ واحشني موت والله ... و ..
سمر : هييييييييييييييي انتي , سروية ..وطي صوتك ياخي ... حماده قال لي انتي قاعدة وين الكواريك ده ؟
ساره : دقيقة يا سموره ياخي دي ماما
سمر :طيب ماما , ماما ..كلميها بشويش ... حماده معاي ع الخط , سوري يا حماده ..دي سروية صاحبتي الظاهر الشبكة عندها مالهناك فعشان كده بتكورك .. استائذنك واقول ليك تصبح على خير ..

سمر خلصت مكالمتها , وساره كمان ...

مي : ههههههههههههه, والله حسستوني اني في كبينه , ده شنو يا بنات , وطوا صوتكم , انتوا عارفين الملكة لو جات هسي حاتدينا لفت نظر ..
اميره : اااااي والله
عائشة : الملكة بتكون صاحيه كمان زي الساعات دي , تلقيها هسي لافه في الطابق الاول بتمم على البنات التحت
اميره : انتوا صحي يابنات في ولد جاء لابس عباية وخشى الداخلية الجمبنا الاسبوع الفات ؟
عائشة : اي سمعت , قال ليك رجال الامن بهدلوا بحالوا بهدلة ..
مي : اااااااي , تقريبا هو عمل نفسه انصارية سنة و جاء داخل في وقت انشغال الحراس , ولاحظت ليهو وحده من البنات , ويلا تعالي شوفي الصريخ والقيامه القامت , الود المسكين ساعتها يااادوووووووبك خت رجله في الطابق الاول وحده من الشمشارات سابت كل شي وركزت في كرعينو لقت ليك القدم مقاس 45 وهاااااك يا فرد صرخة لمت ليك الداخليه كلها ..ومن يومها الملكة عامله حساب الليت عندنا والدخلة والمرقه بحساب.

ساره : يا بنات ماما بتسلم عليكم كلكم
سمر : الله يسلمها , بس عملتي لي فضيحة الود قال لي دي منو البت المزعجة دي ؟ هههههه
ساره : بالجد يا سموره بتبالغي عارفه انتي ليك قريب ساعتين بتنقي في التلفون ده . فلستي الود والله
سمر: خليهو يفلس عشان مايلقى فرصه يكلم غيري
ساره :ومايلقى فرصه يلم ليهو شي يعرسك بيهو في الاخر,ههههه
سمر: يابتي كان اصلو بفلس من الكم ساعة ديل يشوف ليهو وحده غيري
ساره: غااااااااااايتو مابسالك , وشنو اول مرة تحب ياقلبي وبتاع ... يعني القصة ونسه بس
سمر: طبعا , حب شنو يا بتي وكلام فاضي شنو ؟ انا زول جيبو مامليان زااااتو مابخارج معاي, هسي انا في مرحلة دراسه الوضع النفسي بعدها المالي
ساره: بالله بعد الغناء ده , بالله الليلة من غطستك مع التلفون لما اشتقنا ليك ...

شروق : يا بنااااااااات , خلاااص نوموا ورانا محاضرات بدري

البنات : يلا تصبحوا على خير

بنت الرفاعي

05-03-2012, 09:23 PM

:):):)

ما شاء الله،
بس أهم شيء لو سمحت تخلي الفواصل قصيرة.

:):):)

ahmed algam

05-03-2012, 09:59 PM

:):):)

ما شاء الله،
بس أهم شيء لو سمحت تخلي الفواصل قصيرة.

:):):)

اي عليك الله وريها يابت الرفاعي

ياملكة نحن متابعين بس ماتشحتفي لينا روحنا

احمد علقم
للضمان وكدة

الملكة اسماء ( ام محمد )

05-03-2012, 10:12 PM

هههههههههههه
غااااااايتو يا مرام جبتي لي اللوم

احمد علقم

شنو يعني , زعلان لسه ؟

ahmed algam

05-03-2012, 10:27 PM

هههههههههههه
غااااااايتو يا مرام جبتي لي اللوم

احمد علقم

شنو يعني , زعلان لسه ؟

هههههه انتي بزعلو منك ياام محمد

بس كان بطلتي الشحتفة دي

الملكة اسماء ( ام محمد )

05-03-2012, 10:42 PM

هههههه انتي بزعلو منك ياام محمد

بس كان بطلتي الشحتفة دي
تسلم يا ذوق

لو على الشحتفه فاطمن خالص ( ده مسلسل مكسيكي / سوداني ) هههههههههه

isamzaki1978

05-03-2012, 11:04 PM

سبحان الله
حتى شبكة التلفون عندها ناسات " تجافى بلاد وتسقى بلاد "

متابــــــــــــــــــــــــــــــــــــــــــــــ ـــــع

الملكة اسماء ( ام محمد )

05-03-2012, 11:24 PM

سبحان الله
حتى شبكة التلفون عندها ناسات " تجافى بلاد وتسقى بلاد "

متابــــــــــــــــــــــــــــــــــــــــــــــ ـــــع
هههههههههههه
المشكلة في تلفون البنية ياحليلها

همسة : سعيده بمتابعتك

الملكة اسماء ( ام محمد )

06-03-2012, 09:23 PM

صباح اليوم كانت استعدادات البنات للخروج عادية جدا ولا تخلو من الاسئلة المعتادة
ندى : يابنات وحدة تديني ( دمعة ) دبوس عشان اشاربي بتزحلق
شروق: انا غايتو ماعندي , ندوية سلفيني نظارتك الشمسية البنية عشان بتاعتي السوداء خاربة لي التطقيمة
سارة : يابنااااااات , الشوز بتاعي مغبر , العندها لماع تديني بسرعة
عائشة : غايتو مابسالكم , امبارح الليل كله تنقو غلبكم تجهزوا حاجاتكم ؟

بس سمر , كان صباحها غير

مي : انتي يا سموره قاشرة كده الليلة ماشيا وين ؟
سمر: ماشيا معاكم الجامعه طبعا .
مي : الجامعة ؟؟ ومن متيييييييييين بتقشري ليها كده ؟
سمر : حبيبتي انا اكتشفت اني دافنه نفسي ومامهتمه بمظهري. مع انو دولابي مليان حاجات , فقلت الليلة اغير شوية وانكت الحاجات القاعدة ساي دي

ندى خلصت لبس وقعدت تشرب في شاييها , حاجة وحدة عكرت مزاج كباية الشاي بتاعتها

ندى : الله يقلعك يا بتاع البقالة . بالله الراجل من بقى يجيب لينا حب الشاي الجديد ده وانا ماقادرة افهم حاجة لكباية الشاي
أميره : مااااااااالك ياختي على الراجل قالعاه , هو ذنبو شنو بس؟ تلقيهم منعو الشاي الكنا بنجيبو من السوق حسادة بس
ندى : خلاص الله يقلع المنعو الشاي البعدل مزاجي

غيداء متضايقة جدا واتاخرت في اللبس... عشان

غيداء : سروية الحقيني , الجيبة بتاعتي بقت ضيقة علي ... سجمي , معقول سمنت ؟
سارة : غودا انتي لسه ماخلصتي لبس ؟ احنا اتاخرنا يا بت
غيداء : والله قمت قبليكم , بس ماخليت جيبة عندي ماجربتها , حسيت بيهم كلهم شاذين وضيقات علي
سارة : خلاص خدي جربي من دولابي .. بس بسرعة الله يرضى عليكي ... اتاخرنا

آلاء : الليلة سجمنا الساعة 7 الا خمسة ...عارفين الليلة محاضرتنا مع منو ؟
البنات : مع منو
آلاء : دكتورة الهام ... بتاعت علم النفس
البنات : الليلة ووووووب سجمنا...
آلاء: اظنكم عارفين الباقي .. امرقوا عشان ماتبهدل بحالنا قدام الدفعه كلها ..والعجب كان الاولاد كلهم حاضرين
غيداء : طبعا , ماهي كالعادة حاتحاول تمسخر بينا قدام الشباب عشان نفسيتها الغريبة

وقدام بوابة الداخلية كانت الملكة حاضرة خروج الطالبات , ومع وحدة من الماساعدات كانت بتتفحص لبس البنات من بعيد لبعيد واكيد اي وحدة مخالفة او لبستها شاذة حاتسمع محاضرة وترجع جوا تغير ملابسها
الكانت في ورطة حقيقية سمر ...

الملكة : سمر , تعالي هنا
سمر : حاضر يا ملكة
الملكة : ماشاء الله لبستك حلوة , لكن
سمر : شاذة ..صح ؟
الملكة : بصراحة .. بلوزتك ضيقة شوية .. وانا ماعايزة افرض عليك رآي بس , اكون شاكرة لو بدلتيها او لبستي طرحة اكبر من الاشارب الانتي خاتاه في طرف راسك ده
سمر : ملابسي ماجاهزة .. وماعندي طرحة اكبر من كده
الملكة : ولا يهمك , انا عندي طرحة بتجي مع لبستك دي وساترة اكتر
سمر : مابلبس حاجات حد

اشتد النقاش بين سمر والملكة ... ندى الرزينة في الرائي حبت تتدخل بشكل لطيف

ندى : صباح الخير ملكة , شنو يا سموره اخرتينا
الملكة : صباح النور , ندى اتكلمي مع صاحبتك دي , انتي رايك في بلوزتها شنو ؟
ندى : والله من رائي هي كويسة بس ..
الملكة : شفتي البسسسسسس دي هي بالذات الانا قاصداها
ندى : طيب انا بحل ليكم المشكلة ... سموره خدي طرحتي .. بتجي مع لبستك , وهاتي بتاعتك دي انا بمشي اغيرها لنفسي بسرعة

ادت ندى طرحتها سمر , واخدت طرحة سمر عشان تبدلها وترجع
الملكة : شايفااااااك اخدتي طرحة ندى يا سمر ...انا بتاعتي ماكانت اقرب ؟ والا بتعيفني , والا يمكن عندي قمل
سمر : تقدري تقولي... انا كده

كلام سمر كان مستفذ جدا للملكة , ومع كده الملكة تغاضت عن تطويل الحوار , وسمحت للبنات يطلعوا بعد سلة روح

في الشارع كانت سمر في قمة لحظات الزعل

سمر : تعرفوا انا لو كانت ندى مااتدخلت احتمال كبير كنت اتضاربت مع المرة العبيطة دي
ندى : سموره خلاص يااااخ الموضوع انتهى .. وبعدين بيني وبينك الملكة عندها حق
سمر : اوك عندها حق ... بس ماف داعي للتنظير
ندى : الصراحة هي مانظرت ولا شي , انتي بس زعلانه عشان خربت ليك القشرة بتاعتك
سمر: الملكة دي حاسدة ...طبعا لازم تحسدني عشان احلى منها واصغر منها
شروق: ههههههههه, وحاة الله انتي مانصيحة .. الملكة تحدسك في شنو ؟
مي : عارفة يا ميمي , سمر لما تكون زعلانه بتطربق كده ...

وفي الامجاد الماجرنها البنات مخصوص , بيكون الوضع مختلف تماما , عشان بتكون في حالة صمت غريبة جدا وكل وحدة تلقاها سرحانه في الشارع وبسبب تسارع المشاهد فيه بتكون كل وحده فيهم بالمعنى الاصح ( سرحانه ) ولسان الحال يقول ... متين نرجع لاهلنا ؟؟

آلاء عبد الرحمن

06-03-2012, 09:52 PM

انا ماقاعدة احضر مسلسلات طويلة لكن قعدتينا
هههههه
متااااااااااااااابعين

عنكوليب

06-03-2012, 09:53 PM

عارفة يا الملكة ،، الداخليات دي فيها حياة كاملة تماما ،،،
وأنا في اعتقادي ، اِنو أي انسان عاش في داخليه وطلع منها سوي ،
بيكون انسان رائع ،،، وتجربته كاملة ،،،

لي من القصص الكثير في داخليات معهد الكليات التكنولوجية ،،، تسلمي مليكتي ،،،

الملكة اسماء ( ام محمد )

06-03-2012, 10:12 PM

انا ماقاعدة احضر مسلسلات طويلة لكن قعدتينا
هههههه
متااااااااااااااابعين
هههههههههه
انتي عارفه انا برضو مابحب احضر مسلسلات طويلة
الايامات دي شدت انتباهي قصة مسلسل تركي اسمه ( فاطمة ) بيجي على mbc 4 الساعة 9 م
مااااااابتتخيلي انا مستغربة اني بحضروا كيف ... عشان مابكره الا المسلسلات الطويلة ولسوء حظي المسلسل مش نازل كله ع اليوتيوب
تعرفي لو كان نازل كنت حضرتو وخلصت في يومين بالكتير ..

همسة : ماتخافي ماحااطول ...
متابعة ممتعه ان شاء الله

الملكة اسماء ( ام محمد )

06-03-2012, 10:15 PM

عارفة يا الملكة ،، الداخليات دي فيها حياة كاملة تماما ،،،
وأنا في اعتقادي ، اِنو أي انسان عاش في داخليه وطلع منها سوي ،
بيكون انسان رائع ،،، وتجربته كاملة ،،،

عنكوليبة . صباحك ورد
انا طبعا قعدت في الداخلية حوالي شهر ( فقط ) من عمري كله
بس كان اجمل شهر في حياتي
حياة الداخلية , عبارة عن عالم يستحق الوقوف عنده كثيرا
الكثير من الطرائف تقابلها الكثير من القصص الغريبة واكيد النجاحات العديدة

لي من القصص الكثير في داخليات معهد الكليات التكنولوجية ،،، تسلمي مليكتي ،،،

اتمنى ان تحكي لينا ولو جزء قليل من تلك القصص يارااقية

في انتظارك دائما

isamzaki1978

07-03-2012, 12:07 PM

وفى انتظار الحلقة القادمة

الملكة اسماء ( ام محمد )

07-03-2012, 09:18 PM

وفى انتظار الحلقة القادمة

جاية باذن الله

بنت الرفاعي

07-03-2012, 10:04 PM

جاية باذن الله

:):):)

.........
......
...
..
.
؟؟؟؟

:):):)

الملكة اسماء ( ام محمد )

07-03-2012, 10:39 PM

:):):)

.........
......
...
..
.
؟؟؟؟

:):):)

غايتو عصمت عاداكم بالوشوش وفات

الملكة اسماء ( ام محمد )

08-03-2012, 12:06 AM

بعد يوم دراسي جميل رجعوا البنات للداخلية

بس في وحدة كانت مفقودة ....

في الامجاد قعدوا البنات في اماكنهم المفضلة ووقفوا يستنوا سمر , الماجات لحد هسي

غيداء: انتوا يا بنات سمر دي ماقالت ليكم ماشيا وين ؟
سارة :ابدا والله , خلال المحاضرة كانت قاعدة جمبي , بس اول ماخلصنا المحاضرة موبايلها رن واخدته وطلعت , من لحظتها ماشفتها
ندى : تعرفي يا غودا , سموره دي اكيد ماقشرت الليلة ساي, واضح انها على موعد مع طائر الحب ( حماده ) هههههههه

البنات : ههههههههه

في اخر كرسي في الامجاد كانت شروق واميره بفرجوا بعض على صور في الموبايلات وبتبادلوا نغمات بالبلوتوث وفجاءة رن تلوفون شروق

شروق: آلووووووو ,هاي سموره

البنات : دي سمر ؟
شروق: اي,وقالت حاتتاخر شوية .
ندى: طيب ماكانت تقول من الاول, سايبانا في الشمس دي
غيداء: حصل خير , يلا ياعم محمد نحن ماشين خلاص
أميرة : واضح انو حماده قدر يلحس مخها
ندى: ههههههه , وحاة الله يكون عمل الماقدروا يعملوه القبليهو

الملكة اسماء ( ام محمد )

08-03-2012, 06:57 AM

وغابت شمس اليوم وسمر لسه ماجات !!!
انشغل بال البنات وقلق بيهم اكتر تلفونها الكان بدي خارج الشبكة كل مرة !!!
ندى فضلت تمشي وتجي على طول الاوضة وحتى شاي المغرب ماكان عندها نفس تعمله , الشي الجميل في بنات الاوضة دي انهم من سنة اولى في الكلية مع بعض وماحصل اتفارقوا الا في العطلات الرسمية وحتى لما وحده يكون عندها مشوار بعد الدوام كانوا بمشوه مع بعض لانه غالبا مابكون مشوار خاص جدا ومابستحمل الرفقة

ندى : والله بالي انشغل عليها
سارة : ان شاء الله خير , بس لو تلفونها رن مرة وحدة بالي بطمن عليها
شروق: معقوله تكون غشت بيت حد في قرايبها هنا ؟, بس مااظن , عشان هي بتدينا خبر قبيلها
غيداء: تعرفوا يا بنات , سمر لما تجي الليلة انا حااتشاكل معاها رسمي ... عشان مامعقوله تعمل معانا كده وعارفانا بنحب ناخد لينا نومه بعد الكلية , وحاة الله جسمي مكسر عديل بالارهاق
مي : وانا كمان والله , بتبالاااااااالغي يا سموره .. ياترى انتي وين ؟

كانت الساعات بتمر زي الخنجر على البنات , بتضبح في الصبر وهم بحاولوا يختوا في بالهم انها بخير ويمكن تجي في اي لحظة
مواعيد الليت قربت , والخوف الاكبر ان موعد الليت يجي وسمر لسه بره وما اتصلت بلغت الملكة بانها حاتبيت بره

شروق: لا لا لا , الكلام ده يخوف , احنا لازم نبلغ الملكة يمكن تتصرف
اميرة: صح, ارحكم نكلم الملكة يا بنات

وقبل مايوصلوا للملكة كانت سمر جاية داخلة , فرحوا البنات بشوفتها وجروا عليها

مي : سموره , وينك يا عسل شفقتينا والله
شروق: والله عمليتك دي ماجميلة
عائشة : بالجد بتبالغي , كنتي وين يا سمر؟
اميرة : بالجد يا سمر كنتي وين , و ليه تلفونك كان بره الشبكة ؟
سمر: شنو شنو هو ؟ مالكم , حسستوني اني طفلة سغيره ؟

كانت ملامح سمر بتدل على غضب وجدية في استنكار خوف البنات , اتنهدت وواصلت كلامها
سمر: اااااوووف ...عموما شكرا لخوفك يا بنات , بس انا ماطفلة , واعتقد اني مسؤلة عن تصرفاتي فمافي داعي للهليلة الانتوا عاملنها دي , والا عايزين ملكتكم تديني لفت نظر؟؟ وبعدين يعني شنو لو تلفوني بره الشبكة ؟ يعني هو شي غريب والا جديد على شبكتنا يعني ؟

كان كلام سمر يشبه الحلم للبنات , ومعظمهم اصابتوا حالة دهشة ووقفوا يعاينو لبعض بحيره ...

سارة : ااااها , كده فهمنا , الحق علينا يا ستي , نوعدك تاني بالنا ما ينشغل عليك

دقايق وكانوا البنات في الاوضة , وعلى غير العادة في تلك المواعيد , كان الصمت سيد الموقف , والحيرة والدهشة احساس يسود كل الوجوه
واسئلة كتيرة بتدور في بال معظم البنات منها :

وين كانت سمر؟
وليه اتضايقت من سؤالهم عنها ؟
وليه تلفونها بدي خارج نطاق الخدمة ؟

isamzaki1978

08-03-2012, 11:23 AM

فى الانتظار

ابراهيم عطية بابكر

08-03-2012, 09:17 PM

mahagoub

09-03-2012, 05:58 AM

والله صحى مسلسل مكسيكى
جيبوا فرشاتكم وتعالوا
عايزين نشوف البت دى مشت وين

الملكة اسماء ( ام محمد )

10-03-2012, 06:25 PM

فى الانتظار

جايين باذن الله

الملكة اسماء ( ام محمد )

10-03-2012, 06:27 PM

كم أشكر لك أمتاعنا بهذا المتكأ الوريف الاخت الكريمة الملكة وانت بحق ملكة وانت تجعليننا في سياحة مع ادب الرواية التصورية بالسهل الممتنع ندعو لك بموفور الصحة والعافية وفي انتظار المواصلة

كل الشكر والامتنان لاطلالتك هنا سيدي التي تزيدني رغبة في متابعة القصة
سعيدة انا بحضورك وسعادتي تكتمل بان تكون دائما ..هنا
كن بخير

الملكة اسماء ( ام محمد )

10-03-2012, 06:28 PM

والله صحى مسلسل مكسيكى
جيبوا فرشاتكم وتعالوا
عايزين نشوف البت دى مشت وين

عمو محجوب . منور دائما

جيب كل احاسيسك وتعال , في انتظارك دائما حاضرا بكل تفاصيلك

الملكة اسماء ( ام محمد )

10-03-2012, 07:45 PM

كانت ليلة طويلة جدا وكئيبة لحد بعيد
فالبنات الاتعودوا يتونسوا شوية قبل ماينوموا قضوا الليل في صمت غريب , و لسان حالهم يقول : ليه حاسين انو سمر مخبية عنهم شي غامض جدا

في صباح اليوم التالي , بدت التجهيزات لليوم الدراسي بشكل عادي وروتيني جدا بالنسبة للجميع ماعدا , سمر
فهي لليوم التاني على التوالي تختار احلى ماعندها وتلبس مخالف رغم علمها باعتراضات الملكة , لكنها عرفت كيف تتفادى المشكلة ولبست عباية على لبستها المخالفة لقوانين الداخلية , كل البنات اختاروا الصمت ومراقبة الامر دون تدخل لحد مااتجاوزوا تفتيش الملكة بسلام
لكن في الامجاد حصل شي غريب جدا

ندى : سموره , ماشاء الله عليك العبايا حاتاكل منك حته , بس ماعواديك يعني
سمر : كويس انك ذكرتيني اقلعها انا كنت مستنية امر من تحت عيون الملكة
ندى : بس .!!!
سمر : اااااااي عارفة لبستي ما محتشمة , وعارفة باقي اسطوانتكم الصباحية يا ستي , بس افتكر كل وحدة حرة نفسها , وعن نفسي ماحصل اتدخلت في لبس وحدة فيكم

سكتت ندى محتارة في رد سمر وماقدرت تقول ولا كلمة بعديها , وكمان باقي البنات الحسوا بانهم بتعاملوا مع وحدة غير سمر البعرفوها من سنين

عائشة حست بانها في كابوس وقررت تطلع من صمتها

عائشة : سمورة حبيتي , الملكة وعديتي منها , الامن بتاع الكلية تفتكري حايسمحوا ليك تدخلي الكلية باللبسة دي؟
سمر : انا اصلا مانازلة في الكلية, بالله ياعمو محمد نزلني في المحطة الجاية دي
شروق: شنو يعني مانازلة في الكلية ؟ ماشيا وين يا سمر؟ انتي مسافرة لاهلك والا شي ؟
سمر : ااااااوووووف على كلامكم الكتير , يا ستي انا مامسافرة ولا شي , انا بس عندي مشوار شخصي , عشان كده حا ادك المحاضرات الليلة , فهمتوا ؟؟ يلا سلام انا نازلة

نزلت سمر وسابت البنات في حيرة ودهشة وعلامة استفهام كبيرة تحوم في راس الجميع

شروق حست بان الوضع ما مطمئن اطلاقا

شروق : لااااااااااااااااا ... كده اكون كنت فاهمة سمر غلط .. حد يقول لي اني بحلم
أميرة : لا بتحلمي ولا شي , واضح انو حماده غير سمر و الظاهر انو تغيير غير مقبول اطلاقا
شروق : لا مستحيل طبعا تكون وصلت للمستوى الفي بالي , عارفين انا الليلة حااتكلم معاها , حتى لو رفضت كلامي ...ده شي غلط نسكت عليهو , لبس غير محتشم , وتاخير , وتسيب عن المحاضرات , لا لا , خالتو ام سمر لو عرفت الحاصل ده حاتنجلط

mahagoub

10-03-2012, 08:16 PM

بى مويه وقربت تكمل

ميادة

11-03-2012, 12:32 AM

متابعين على نار يا عثل

وبالهه طمنينا على سمر دي ياخ

isamzaki1978

11-03-2012, 02:02 AM

نزلت سمر وسابتنا "البنات" في حيرة ودهشة وعلامة استفهام كبيرة تحوم في راس الجميع

ahmed algam

11-03-2012, 07:32 AM

متابعين ياملكة

**** **** ****
المسلسل التركي دا كم حلقة عشان نجي ونجيب

كل احاسيسنا وشعورنا معانا ياملكة

الملكة اسماء ( ام محمد )

11-03-2012, 11:08 AM

الحضور الكريم جدا
سعيدة جدا بتواصلكم ومتابعتكم

كونوا بالفين خير

الملكة اسماء ( ام محمد )

20-03-2012, 08:45 AM

عذرا احبائي ( مشغولة شوية بس جايااااااااكم )باذن الله
كونوا كما اود دائما احبائي في الله

isamzaki1978

20-03-2012, 09:00 AM

عذرا احبائي ( مشغولة شوية بس جايااااااااكم )باذن الله
كونوا كما اود دائما احبائي في الله

وانت كما تحبي دائماً وتنعمى بالصحة والعافية
آآآآآآآآآمين يا رب العالمين

ahmed algam

21-03-2012, 10:05 PM

.... .... .... ....

آلاء عبد الرحمن

21-03-2012, 11:14 PM

.... .... .... ....

بث ياهو زاتو

الملكة اسماء ( ام محمد )

21-03-2012, 11:40 PM

هوووووووي انتوا

مالكم بتوسوسوا ؟:mad:

آلاء عبد الرحمن

21-03-2012, 11:58 PM

مامنتظرنك ياخ
وانتي رافعة القزاز

الملكة اسماء ( ام محمد )

22-03-2012, 08:31 AM

مامنتظرنك ياخ
وانتي رافعة القزاز
ربنا بعلم مابيدي
بس اوعدك باذن الله خلال اليوم او بكرة تكون الحلقة الجديدة نزلت

الملكة اسماء ( ام محمد )

24-03-2012, 06:28 PM

ماكان من طبع سمر الطيش ابدا رغم انها مشهورة جدا بين صاحباتها بانها مابعجبها العجب وكل شاب حاول يتعرف عليها درستو لمدة معينه وفي الاخر سابتو وشافت غيرو
لكن المرة دي كانت مختلفة جدا والظاهر ان ( حماده ) غير فيها الكتير لدرجة خلاها تسيب محاضراتها وتحوم معاه في وقت دوامها الدراسي

القصة دي كانت عاملة توتر للبنات وخصوصا ندى البت الدغرية المابتحب اللف والدوران

انتهى اليوم الدراسي ورجعوا البنات للداخلية بدون حتى مايستنوا او يتوقعوا ان سمر تظهر فجاءة من بين بنات الكلية وتقول انها جات وما ناوية تعيد قصة تاخيرها بتاعت امبارح

في الداخلية كانت الملكة على غير عادتها ماواقفة قدام الباب مع الحراس لما البنات دخلوا وفي اللحظة ديك بالتحديد فقدتها آلاء

آلاء: يااااااه على اليوم الغريب ده , اها والملكة دي كمان مشت وين الليلة ماواقفه لينا زي حرس المرور؟
مي: اااي والله , الملكة مافيشة ؟ تكون جوا السكشن بتاعها نايمة والا شي
شروق: لا مااتوقع الملكة مابتنوم زي الساعات دي
أميرة: واحنا مالنا , بالله عليكم هسي عندكم مزاج تفكروا في البتعملو الملكة كمان بعد عمايل صاحبتكم المجنونة دي
غيداء: ااي والله يا أميرة , موضوع سمر يحير اكتر بكتير من غياب الملكة في اللحظة دي, الله يستر سموره ماتتاخر عن الليت وتعمل لروحها مصيبة مع الملكة ...

اما ندى فكان حوار البنات اثناء دخولهم للداخليه كانه وشوشة عقل باطني برفض الواقع البيقول انو سمر بتعمل في حاجة مافي مصلحتها ابدا

ندى : تعرفوا يا بنات انا خايفة على سمر شديد
غيداء : وانا كمان والله , الله يستر عليها من حماده ده كمان الماعرفين طلع ليها من وين ؟
سارة : انتو صحي سمر اتعرفت عليهو وين ومتين واحنا كنا وين ساعتها ؟
عائشة : علمي علمك يا سروية , البت دي بتحوم اليوم كله في الكليات الجمبنا , ومااظن حماده من كليتنا اصلا ...
ندى : الله يجيب العواقب سليمة
غيداء : تفتكروا هسي هم وين وبيقولوا في شنو الوقت ده كله ؟
ندى : ولا شي , اكيد بيعبي ليها في مخها بكلام كله كذب عشان يحقق شي جواه
ساره : اللـــــــــــــــــــــه يستر , اااااخ لو كلامك يطلع صح يا ندى .. معقوله سمر بالسذاجة دي؟
عائشة : اتفائلوا خير وماتوترونا اكتر , يمكن عريس ياجماعة ...

البنات : ان شاء الله يكون كده ...

الملكة اسماء ( ام محمد )

24-03-2012, 11:36 PM

بعد قيلولة قصيرة صحوا البنات واتفاجئوا بان سمر لسه ماوصلت
كانت ساعات الحيرة والقلق بتزيد مع كل ساعة , رغم ان ندى حاولت تجاهل الموضوع لكن حرارة قلبها خلتها تنق الوقت كله
ندى : اااااااااخ بس لو اشوفك يا سمر , بقتلها ياجماعة ...
عائشة : والله يا ندى انا كل همي انها تكون بخير , والباقي هين
ندى : الله يستر , بالجد مااتوقعتها تعمل كده

ومن شدة توتر الجو ندى ماقدرت تجهز شاي المغرب لان سمر لسه ماوصلت ....

وعدت لحظات الدراسة الجماعية المسائية ولسه سمر ماوصلت !!!

ندى ابتدت تفقد اعصابها ووصلت لمرحلة ماعادية من الزعل
ندى: لااااااااااااااااا , بزيادة يا جماعة , نحن لازم نتصرف , البت دي بالطريقة دي حاتشوه سمعتها , خصوصا ان خبرتها في شباب الحتة دي قليلة
أميرة: ندى , بيني وبينك , لو هي ماختت بالها من سمعتها وحسبت تحركاتها , ماف زول بقدر يقنعها بغير كده .
شروق: كلامك صح يا عائشة , انا رائي تريحونا من الجوطة دي ونخلص قرايتنا ومالنا دخل في تصرفات حد.
ندى : لا طبعا ماممكن سمر مهما عملت تفضل صاحبتنا وسمعتها بتهمنا ولازم نصححها لو غلطت .
مي: عين العقل , بس الكلام ده سيبوه لما هي تجي بالسلامه وبعدين نتفاهم

قربت ساعة الليت والملكة لافة بتعمل تشييك على الموجودات قبل تعلن لحظة قفل البوابة
ندى لمحت الملكة وهي لافة على الاقسام , حاولت تخلق معاها موضوع عشان تعطلها من قفل الابواب لكن الملكة فاجأتها بسؤال
الملكة : البنات كلهم هنا ياندى ؟
ندى : لا , اااااااه قصدي ااااااااي , اقصد كلـــــ... عايزة اقول انو ..........
الملكة : مالك بتاتئي , البنات كلهم هنا؟

صدمت ندى لسؤال الملكة الجادي في المرة الاخيرة ومن شدة مابان التوتر عليها غلبها ترد على الملكة وقبل ماتلملم ندى اطراف الكلام عشان تجاوب
سمر : ااااااااي كلنا هنا يا ملكة ... مساء الخير

وقفت ندى مصدومة لظهور سمر المفاجئ وحمدت ربنا لان الاجابة حاتكون اكيدة ... ان كل البنات موجودات

مشت الملكة وسابت البنات واقفين بتفرجوا في دخول سمر المفاجئ في اللحظة المناسبة

ندى فضلت تمشي وتجي جوا الاوضة مستنية سمر تطلع من الحمام عشان تسالها كانت وين

ولما جات سمر كانوا البنات كلهم بعاينوا ليها بحيرة وزعل واضح , واكتر وحدة كانت مضايقة هي ندى

ندى : سمر ... كنتي وين لحد هسي؟
سمر : كنت موجودة , قاااااااعدة في البلد دي
ندى : عايني انا اعصابي مامتحملة هظار ...
سمر : هظار شنو يابتي , انا فعلا كنت في البلد دي مع حماده حبيب قلبي كمان .مشينا شارع النيل,وزرنا مشتل الورود,واتغدينا في مطعم, وبعديها....
ندى: ايوا....كملي , انا عايزه بعديها دي بالذات ...مشيتي وين تاني ياسمر
سمر : ايوووووووه , وانتي مالك يا ستي؟ ولية امري والا مسؤولة مني وانا ماعارفة؟

ندى وقفت من غير كلام وكانها وقعت من سابع سماء , وفي لحظة جمعت قوتها وقالت
ندى : كده يعني ياسمر ؟؟ اوكي ياستي , انا غلطانة , بوعدك تاني مااتدخل
سمر : ااااي بالله , وبطلي تمثلي لي دور المربية الفاضلة...

بعد كلام سمر سكتت ندى وماعرفت ترد لسمر بولا حرف , ورغم الخوف الكان ساكن قلبها على سمر سكتت

عدى الليل ممل تقيل والحزن بداخل ندى زي جبل لانها مااتوقعت في عمرها ان سمر تتغير كده وتقول ليها الكلام الحار القالتو ليها وهي الاتكلمت بدافع غيرتها على سمعت سمر مااكتر

آلاء عبد الرحمن

25-03-2012, 12:04 AM

حمد الله علي السلامة
انتو ماف طريقة الزول يجر المسلسل ده شوية
:cool:

الملكة اسماء ( ام محمد )

25-03-2012, 09:46 AM

صباح يوم اجازة اسبوعية , مافي دوام دراسي ...ورغم كده حصل شي على غير العادة
سمر صحت من بدري وجهزت نفسها وطلعت بدون حتى ماتحاول توري البنات هي ماشيا وين ؟
ومن موقف امبارح البنات ماخدين موقف من سمر فمافي وحدة فيهم اتدخلت في الموضوع

ندى : سبحااااااان الله , سمر الكانت بتنوم لحد صلاة الظهر الليلة قامت من بدري وقشرت وطلعت بدون كلام كمان ...
مي : ندوية حبيبتي ... المفروض ماتشغلي بالك بالموضوع ده كتير , عشان الحصل امبارح كافي لانك تعايني بعينك بس ...
سارة : تصدقوا يابنات ...انا كنت متوقعة انو سمر الليلة تطلع لانها امس نامت بعد لفت شعرها بالرول ومسحت كريماتها وكمان جهزت لبستها اللبستها هسي وطلعت ..
شروق : والله البت دي جنت وقعدت , معقولة حتى يوم الاجازة الكانت فيهو بتجهز حاجات الاسبوع ومابتفارق الاوضة , طلعت فيهو ؟؟

عدى اليوم عادي جدا بالنسبة للبنات من تجهيزات وغسيل وكواية و لف شعر و اااكيد مراجعة لدروس الاسبوع الفات , و بعد العصر كان وقت مشوار السوق عشان حاجات الميز ولوازم بعض البنات الناقصاهم...
مي و سارة اعتذروا من مشوار الليلة , عشان ماعندهم مصاريف زيادة يقضوا بيها حاجاتهم الناقصة ...

وبعد ساعة من مشوار قصير رجعوا البنات وبدت لحظات التجهيز لمساء هادئ واكيد مليان ونسة ولمات حلوة
وطبعا سمر ماجات لسه

رن تلفون مي وكان اتصال من....
مي : آالوووو , اهلين خالتو ... تعرفي ياخالتو سموره عند وحده صاحبتنا عندها عرس اختها , واظن الحتة مافيها شبكة...

وبعد ماخلصت مي المكالمة كانت ندى واقفة قدامها وهي في قمة الزعل ...

ندى : دي خالتو ام سمر ؟ مش كده ؟؟
مي : اااي هي ..
ندى : وليه كذبتي عليها ؟ كان لازم تقولي الحقيقية
مي : لا لا ماممكن طبعا , المرة في غربة وبتها طايشة فمافي داعي نتصرف بزعل
ندى : اقول ليك شي , تاني مرة لو خالتو اتصلت اديني ليها , لازم حد يوقف المهزلة دي

الملكة اسماء ( ام محمد )

25-03-2012, 09:49 AM

حمد الله علي السلامة
انتو ماف طريقة الزول يجر المسلسل ده شوية
:cool:
في , فتشيهو ع اليوتيوب هههههه

آلاء عبد الرحمن

25-03-2012, 10:02 AM

في , فتشيهو ع اليوتيوب هههههه

مالقيتو ياخ
خلاص اديني ليو في الخاث وكده
هههه

الملكة اسماء ( ام محمد )

25-03-2012, 10:05 AM

مالقيتو ياخ
خلاص اديني ليو في الخاث وكده
هههه

ههههههههه
يا بتي الله يورينا ونوصل مرحلة العرض ع اليوتيوب كمان

آلاء عبد الرحمن

25-03-2012, 10:11 AM

ههههههههه
يا بتي الله يورينا ونوصل مرحلة العرض ع اليوتيوب كمان

ان شاء الله ياحبيبة

الملكة اسماء ( ام محمد )

27-03-2012, 08:54 PM

وصلت سمر بعد يوم واضح تماما انه كان حافل جدا والدليل ابتسامه مرسومة على وشها من لحظة وصلت رغم حزن وغضب اعترى بعض بنات الداخلية
ندى بطلت تشغل بالها بعمايل سمر وشغلت نفسها بدراستها وبقى الموضوع عندها شي مابخصها زي ما قالت سمر, ندى سكتت لانها قررت تعاين بعينها بس لكنها ناوية كمان توري اهل سمر بعمايل بنتهم في اقرب وقت ممكن
سمر حست انها فاقدة حاجة مهمة وهي حكاوي الليل عن احداث النهار والسبب انها حست لاول مرة انو البحصل معاها لازم يكون سر عشان تفكير بعض البنات ساعات بيكون ضيق جدا
شروق الشمار حارقها ورغم اعتراضها على الحاصل حست انها لازم تسال سمر عن علاقتها الجديدة الغيرت حياتها, وماكذبت خبر اول ماشافت البنات ناموا جرت قعدت جمب سمر الكانت اكيد بتتونس في التلفون , وسمر اول ماقعدت جمبها شروق استاذنت حماده و رحبت بضيفتها الليلية

سمر: اها يا شوشو ااااااااكيد الشمار حارقك
شروق : ااااااااااكيد يا سموره انتي فاكراني بفوت شمار زي ده , يلا احكي لي من طق طق للسلامة عليكم
سمر: طيب يا ستي انا بحكي ليك بشرط واحد الكلام بيناتنا عشان بالجد انا بؤمن بالمثل البقول ( داري شمعتك تقيد )
شروق :ولد ده ياشمعة انتي , عييييووووني ليك يا سموره , خلاااااص ياخي حرقتي لي روحي احكي
سمر:اول شي بطلي كلام شماشة , وارح نقعد بره الاوضه عشان الصيوانات المدقوقة دي ...
شروق: هههههههههه, ارح يا ستي , مشينا

طلعوا سمر وشروق للصالة المفتوحة على اوضتهم , وقعدت سمر تحكي وشروق طبعا خير منصت في الحالات دي , وبعد حكاية سمر جاء دور رائي شروق في الموضوع

شروق: بصراحة يا سموره وبدون زعل
سمر: قولي يا شروق , بالجد رايك شنو ؟
شروق: بالصراحة يا سموره , انتي صاحبتي وزي اختي , وبتهمني مصلحتك شديد , سموره انتي زولة اهلك في غربة يعني انتي هنا المفروض تكوني مسؤولة من نفسك وبدون توجيه من حد

شروق بتتكلم مع سمر وهي مترددة تكمل كلامه , فسمر حست باكده فقاطعتها
سمر: شروق, احكي , قولي العندك مابزعل والله
شروق: بختصار الزول ده واضح من كلامك انه بتاع لعب يا سموره , وما بنفع كده , خصوصا اني حسيت من كلامك انك حبيتيهو , وحساسي بيقول بسبب حبك ليهو ورشاقتك الحاصلة دي هو ممكن يذلك وانتي عارفة الباقي
سمر: هو من ناحية حبيتو يا شوشو فانا عشقتو جد , وما اكذب عليك انا برضو ساعات بحس انو ماواضح , بس والله حبيتو يا شوشو

شروق اتنهدت ومسحت بيدها على راس سمر وقالت ليها بجدية واضحة
شروق: عايني يا سموره , انتي قلتيها هو ماواضح , يبقى الموضوع محسوم, دي علاقة فاشلة وانتي قريبا حاتحسي بالفرق بينك وبينو لانه واضح انه هموا يعلقك بيهو اكتر , واكيد عنده هدف من حركاتو دي
فانا شايفة انك تختصريهو احسن , وتخلي بالك من دراستك احسن
سمر: كلامك عين العقل يا شروق , وانا اوعدك احسم الود ده عشان بالجد كلامك فيهو حاجات من الانا حسيتها من تعاملي معاه
شروق: اااااي بالله احسميهو وصالحي ندوية دي قبل تتهور وتحكي لامك لما تتصل تاني

سمر اتخلعت وقلعت عيونها وعاينت لشروق بدهشة
سمر: ماما متين اتصلت يا شوشو؟.
شروق: اتصلت قبيل بعد صلاة العشاء وانتي مافيشة
سمر: يااااااااالله , وندوية عملت شنو ؟
شروق: ندوية مااتكلمت معاها , بس حلفت تحكي ليهم كل شي لو اتصلوا تاني وانتي مافيشة ...
سمر: قالت كده ؟ طيييييييييب انا اوريكي في لقافة ندى دي رواشوف اخرتها معاها

قامت سمر من مكانه زعلانه وجري على الاوضة , صحت ندى وقالت ليها
سمر: قومي قومي يا الشريف الرضي , شنو دخلك انتي بطلعاتي ناوية تشتكيني لاهلي كمان ؟

صحت ندى مخلوعة وعاينت لسمر بنص عين وقالت
ندى : بسم الله الرحمن الرحيم , مالك يا زولة ؟
سمر : شنو المالي , معقولة توصل بيك لدرجة تشتكيني لاهلي وهم في غربة عشان ابيت اسمع كلامك ونصيحتك في لحظة انتي فيها اتكلمتي معاي قدام البنات كلهم ...
ندى : اذا كان الزعلك كلامي قدام البنات فانا اسفة يا ستي , بس الاعوج اعوج والعديل عديل , ولفك النهار كله مع الود الاسمه حماد ده غلط واكبر غلط , وبشوه صورتك وانا مابرضى صورتك تتشوه لانك زي اختي واكتر ...
سمر : طيب يا ستي اوعدك الكلام ده مايتكرر مرة تانية, بس اوعديني ايشم صار مني ماتتهوري وتحكي لماما وبابا عشان ديل ناس مراضا سكري وضغط وغربة كمان , فمافي داعي كل شي يوصل ليهم , والا شنو ؟
ندى : كلامك صح , عاقلة يا سموره , ربنا يديك البستاهلك ويبعد عنك اولاد الحرام, يلا طيري من قادمي عشان انوم يا مرض ...

mahagoub

27-03-2012, 09:28 PM

ابتدى الميزان يعتدل
الله يستر من الجاى
تسلمى يا ملكه

الملكة اسماء ( ام محمد )

27-03-2012, 09:42 PM

ابتدى الميزان يعتدل
الله يستر من الجاى
تسلمى يا ملكه
الله يسلمك يارعمو محجوب

آلاء عبد الرحمن

28-03-2012, 10:08 AM

نقول ليك زيهم ماتحرقي روحنا وله شنو
هههههه
منتظريــــــــــــــــــــــــــــن
:)

الملكة اسماء ( ام محمد )

30-03-2012, 02:07 AM

نقول ليك زيهم ماتحرقي روحنا وله شنو
هههههه
منتظريــــــــــــــــــــــــــــن
:)

يكفينا الله شر حراق الروح
جاياكم ياعسل

بنت الرفاعي

30-03-2012, 02:12 AM

:):):)

أحسن شيء البوست نفتحو كل آخرأسبوع،
على الأقل نلقى لينا حلقتين أو3 مع بعض!!:cool:

:):):)

الملكة اسماء ( ام محمد )

30-03-2012, 02:39 AM

:):):)

أحسن شيء البوست نفتحو كل آخرأسبوع،
على الأقل نلقى لينا حلقتين أو3 مع بعض!!:cool:

:):):)

والله يا عسل حيرتوني

خلاص نعملوا مسلسل اسبوعي احسن :)

الملكة اسماء ( ام محمد )

30-03-2012, 03:15 AM

صباح اليوم التالي احتفلوا البنات من صباح الرحمن بعودة سمر لوعييها وكانوا فرحانيين بيها جدا

وفجاء جاء لسمر اتصال صباحي متوقع من السيد حماده
وطبعا حسب انتقفاقها مع البنات انها حاتنساه وتبعد عنه وتشوف قرايتها احسن

سمر : الو , اهلين محمد , كويس انك اتصلت , عندي كلام مهم عايزه اقوله ليك , ماينفع على التلفون , ياريت اشوفك اليوم , اوك اتفقنا مع السلامة
ندى: ايوا كده , ارجعي لينا سمر البنعرفها من زمان , بالله فكينا من الموهوم ده
سمر : الله يجيب العواقب سليمة
ندى : سمر , كلامك مامطمن , حاسة انه في شي انتي ماقلتيهو لينا
سمر: اااااخ يا ندى , اول مرة عواطفي تذلني, حبيتو يا ندى , حبيتو
ندى : ايوا حبيتيهو , عارفنها , شنو الجديد ؟ بقصد انك بتقدري تنسيهو بسرعة زي ماعرفتيهو بسرعة
سمر: ما دي المشكلة يا ندى
ندى : سجمي يا سمر, عايني لي هنا . وين المشكلة
سمر: خليها في القلب تجرح ولا تطلع بره وتفضح يا ندى...

سكتت سمر مسافة وفجاءة رقرقة عيونها وابتدت تبكي , ندى خافت من كلام سمر جدا وقلبها اتقبض , وسالت سمر

ندى: سمر, حبيبه الله يرضى عليك , وريني شنو الحصل وخلاك تبكي كده ..طمنيني الله يرضى عليك , سمر انتي ....
سمر: لا لا ماتكملي , طبعا لا ...بس انا سبت الود الحباني بجد وبعتو بسبب محمد , تفتكري بقدر ارجعوا تاني لي؟
ندى : الله يسامحك يا سمر, قلعتي قلبي بالخوف , بالله عليك البكاء ده كله عشان خايفة تقعدي بلا حبيب؟ يا ستي بلا حب بلا رجال بلا وجع قلب
سمر: وجع قلب شنو ياندوية ياخي ؟ يعني هسي خطيبك وجع قلب؟
ندى : ااااااااااااي وجع قلب ونص وتلات اربع كمان , مع انه حاليا قاديني حب وغزل بس استني بعد العرس وانتي تشوفي العجب
سمر: ههههههه, الله يجازيك يا ندوية ضحكتيني
ندى : اااي كده بالله اضحكي وفرفشي , وامشي باقي اليوم ده اتخلصي لينا من قصة الود حماده ده خخخخخ

مشت سمر لمقابلة محمد , واخدت معاها شروق , ولما وصلوا لمكان اللقاء حصلوا محمد منتظر , بس مامتوقع سمر تجي معاها وحدة تانية

محمد : اهلا سمر , اتفضلي , اهلا ...
سمر : شروق , اقدم ليك شروق صاحبتي يا محمد
محمد : اهلا شروق , تشرفنا
شروق : مرحبتين
سمر : معليش يامحمد , بس انا وشروق عندنا مشوار سوا بعدين , عشان ...
محمد : لا عادي يا ستي ماتعتذري , انا برضو عندي مشوار بعد شوية

بعد صمت دام لدقايق , طلب محمد عصير لسمر وشروق
محمد : معليش يا شروق , لو سمر كانت ورتني انك جاية كنت عزمتكم في حتة احلى من دي
سمر: كلك ذوق يا سيدي , بس انا و شروق ماجاين عشان نشرب عصير
شروق: كلك ذوق , مابتقصر
محمد : معقولة ؟ طيب انا اسف يا ستي , اتفضلي احكي , قلت لي عندك موضوع مهم والظاهر انكم مستعجلين
سمر : تقدر تقول كده , المهم يا سيدي انا جاية اقول ليك ربنا يوفقك , الصراحة مابقدر اواصل معاك , اقصد مابننفع مع بعض
محمد : نعم ؟؟؟؟؟؟؟؟
شروق: افتكر انك سمعت كلام سمر يا اخ محمد
محمد: لحظة يا اخت , الكلام ده بخصني انا وسمر , مافي داعي تتدخلي , بعدين يا سمر ... مابسهولة دي , ولا انا زي اللعشرين الانتي سفيتيهم ورميتيهم زي الكلاب, خلي بالك ... انتي المرة دي اخترتي غلط

ووسط دهشة اسمر وشروق قام محمد وسابهم فاتحين خشومهم بدون كلام, وركب عربيتو وفات بدون وداع

عاينت شروق لسمر وفي عيونها الف سؤال اولهم
شروق: سمر ... صحي الكلام القالوا الود ده؟

آلاء عبد الرحمن

30-03-2012, 09:12 AM

بلاي عليك الله سريع
:(

آلاء عبد الرحمن

31-03-2012, 08:50 AM

الليلة الكهرباء قاطعة وله شنو؟؟؟

الملكة اسماء ( ام محمد )

31-03-2012, 09:18 AM

الليلة الكهرباء قاطعة وله شنو؟؟؟

هههههههه
ابدا والله ياغالية

بس كنت شوية مشغولة
استني علي شوية

mahagoub

31-03-2012, 10:08 AM

ادمنت ريدك
بقيتى مدمنه سمر يا الاء
بينى وبينك
انا بفتح البوست اكتر من تلاته مرات فى اليوم

الملكة اسماء ( ام محمد )

02-04-2012, 04:51 AM

ادمنت ريدك
بقيتى مدمنه سمر يا الاء
بينى وبينك
انا بفتح البوست اكتر من تلاته مرات فى اليوم

عمو محجوب
دائما نورك ساطع وحاجب عننا نور الشمس

والله سعادتي بمتابعتك لاتوصف
خليك دايما ...قريب

ahmed algam

02-04-2012, 05:20 AM

ادمنت ريدك
بقيتى مدمنه سمر يا الاء
بينى وبينك
انا بفتح البوست اكتر من تلاته مرات فى اليوم

......2......

آلاء عبد الرحمن

02-04-2012, 10:17 PM

......2......

انت اساسا مجنون
يلا مابيناتنا
:p

الملكة اسماء ( ام محمد )

07-04-2012, 03:00 AM

......2......

انت اساسا مجنون
يلا مابيناتنا
:p

مساءكم خيرات وعذرا للتاخير

الملكة اسماء ( ام محمد )

07-04-2012, 03:31 AM

اتعقد لسان سمر وفضلت تبحلق في شروق الكان في عيونها الف سؤال كلهم شك واتهام لسمر

جمعت سمر احساساها المبعثر وقالت :
سمر : اااحم , عايني يا شوشو . انا بحكي ليك بشرط , ماف حد في الاوضة يعرف وخصوصا ندى ..
شروق : جدا يا ستي , بس احكي عشان خلاص اعصابي بقت مامتحملة
سمر : اوكي , شوفي .. مصاريفي اتاخرت الشهر الفات , ومحمد هو بنفسو العرض علي يديني لحد مابابا يرسل .. و ..
شروق: قبل تخلصي كلامك ...اخدتي منو كم يا سمر ؟
سمر : ااااامم . الصراحة اخدت منو مبلغ كبير شوية ؟
شروقك يعني ؟؟ اكتر من المحتاجاه مصاريف ؟
سمر : الصراحة , ااي ؟ الود طلع كريم وانتي بتعرفيني بحب الفخامة هههه

كان الكلام بالنسبة لشروق نوع من انواع الفشخرة البتدعيها سمر دايما , لانها مامحتاجة حاجة كتيرة للمصاريف

شروق : طيب , والحاج رسل ليك ؟ ليه مااديتي الود قروشو؟
سمر : شروق خلاص ياخي ماتزرزيني اكتر من كده ؟ المهم وريني اتصرف كيف؟
شروق: مش لما اعرف المبلغ مشى وين يا سمر , والقروش الجاتك من اهلك كمان مشت وين ؟
سمر : والله يا شروق .. صرفتها كلها ؟ وماعارفة كيف ومتين زاتو ؟
شروق : ده استهتار . وتبزير وفشخرة في الفاضي
سمر:يا شوشو ياخي خلاص ماتذليني اكتر ووريني اعمل شنو عشان اخلص من الود العبيط ده ؟ انا مستغربة .. والله انا ماقلت ليهو سلفني ولاكنت متوقعة يجي يذلني بالاداني ليهو كده ..
شروق: لانه ما كان متوقع انك اعجبتي بيهو بس وعلاقتك بيهو غير ناضجة واخرتها ..كالعادة يعني
سمر : شروق انتي عارفة اني ماكنت ناوية اسيبو بس انتي وبنات الاوضة قلتو لازم اسيبو
شروق : لاننا عارفين انك عميانة وعلاقاتك كلها متهورة وفاشلة

وبنهاية النقاش كانت شروق وسمر في الداخلية بعد مااتفقوا انهم حايلموا المبلغ في اسرع وقت ويدوه محمد , واكيد بدخولهم للاوضة تبداء الاسئلة عن الحصل ,, وطبعا عشان الموضوع طلع اكبر من الكانوا متوقعنوا البنات في الاوضة جاوبت شروق الكانت وعدت سمر انها ماتجيب سيرة
شروق : حصل الاتفقنا عليهو يابنات ...ربكم قدر ولطف

همست سمر في اضان شروق : شكرا شوشو , ربنا يقدرني على جزاتك

الملكة اسماء ( ام محمد )

07-04-2012, 08:14 PM

مرت الايام وقدروا سمر وشروق يلموا المبلغ المطلوب وسلموه لمحمد وخلصوا من حكايتو لامن شاف ولامن درى
وكانت التجربة عظة و عبرة لسمر واكيد شروق المتخوفة دايما من التجارب استفادت من تجارب صاحباتها وخاصة سمر

وزي اي داخلية بتمر كل فصول الحياة على البنات في كل سنة , فرح , حزن , وترقب , و اكيد أمل في مجهول ومستقبل مشرق

اكتر مشوار بكون مهم لكل بنات الداخلية هو مشوار او خلونا نقول السفرية بتاعة تجديد الاقامات
بتكون حاجة احساسها متلخبط شوية بين فرح عشان حايشوفوا اهلهم وحزن عشان حايفارقوا صاحباتهم
والشهر ده جاء دور مي عشان تمشي تجدد الاقامة وتجي تحصل الامتحانات

من صباح الرحمن كانت الاوضة في حالة صمت وهدوء غير معهود فالعادة بتكون في ضجة وتجهيزات للكلية
بس يومتها كانت الاوضة في حالة تجهيز لوداع مي

مي : يا بنات والله العظيم دموعكم دي حامياني اجهز شنطتي
أميرة : ماقادرين يا ميمي والله العظيم
غيداء : تعرفي يا ميمي والله لو ما عارفين الموضوع ده مهم ولازم تسافري تجددي الاقامة ماكنا خليناك تسافري
عبير : تعرفي يا ميمي الاوضة دي حاتتحول لميتم لحد ماانتي تجي راجعة بالسلامة

سمر : عاينو عاينو عشان نطلع من جو الحزن ده , تعالي ياميمي اوصيك على حاجات مهمة تجيبيها لي معاك من بيتنا , انا وصيت ماما عليها
مي : اااااي كده , ابدوا لينا في موضوع الوصايا ده عشان ننسى الحزن الحاصل ده
شروق : طبعا اتوقعتك يا سمر , دي حاجة مابتفوتيها ابدا
سمر : طبعاااااااااا , ااااااااكيد ولازمن وحتما , كريماتي يابت خلصانة والشامبو بتاعي نوعيتو هنا مافيشة و في جهاز بتاع حمام زيت جديد طالع شفتو في دعاية عايزاه برضو , وعايزة جيبة جينز وبلايز غير العندي دي وشنطة يد بيجية و ...
شروق : غااااااااييتو ما بسالك , حاتفتحي صالون انتي , بس كفاك والله عمو حايفلس لحد ماانتي تكوني اتخرجتي
سمر : لااااازم , امال عايزاني اقعد مبشتنة وابوي مغترب , و بابا زااااتو المفروض يجيب لي من غير مااقول عشان بدون ميك أب ولوازمو ما اظني اتخارج ليهم بسهولة .ههههههه
البنات :/ هههههههههه

وخلصت الوصايا ولحظة الوداع كانت صعبة اكيد , اتجهزوا البنات للكلية واتفقوا يوصلوا مي للمطار
مشوا البنات للمطار معاها , عشان طيارتها بدري شوية

وهناك ....
من لحظة دخلوا المطار كان في شاب يشيل ويعاين ليهم , وطبعا ندى اكتر وحدة اضايقت من الموضوع وابتدت تتململ في حتتها وفي الاخير قررت تودع مي وتمشي تستنى باقي البنات في الامجاد بره

أميرة : ميمي خلي بالك الود الوجيه ده بعاين ليك سااااااااااي
مي : وليه مايكون بعاين ليك انتي او اي وحدة من البنات ديل
غيداء : هو غالبا بعاين ليك يا ميمي
مي : بلا بعاين بلا بطين , يلا موعد الاقلاع قرب , اشوفكم على خير
شروق : بالجد حااشتاق ليك يا ميمي , امانة عليك سلمي لي على ناس خالتو و ابقي طمنينا اول ما توصلي بالسلامة
سمر : اااااي بالله يا ميمي , و ضروري تمشي تزوري ناس ماما
مي : اكيد ياغالية , خلي بالك من نفسك يا سموره

البنات ودعوا مي و رجعوا الكلية بعد لحظات بتتكرر عليهم كل كم شهر بسبب تجديد الاقامات

وفي الطيارة صادف ان الود الكان بعاين للبنات في المطار فعلا في طيارة مي
بس مي مااعارتو اهتمام رغم محاولاتو الواضحة لفتح باب الكلام ,لانها كل تفكيرها كان في شكل لقائها لاهلها واكيد اختلطت اللحظات بدموع فراقها لصاحباتها ووطننا الحبيب

آلاء عبد الرحمن

07-04-2012, 11:17 PM

حمد الله علي السلامة
نزلي لينا كم حلقة كده
:cool:

الملكة اسماء ( ام محمد )

07-04-2012, 11:35 PM

حمد الله علي السلامة
نزلي لينا كم حلقة كده
:cool:
بس كده , حاااااااااضر ياغالية من عيوني

همسة : انتي عارفة اكتر حاجة ممكن تشجعني شنو , ( النقد الهادف ) والتعقيب على القضايا المطروحة في القصة
بتديني حافز كبير جدا

طبعا ده مابعني انو مرورك وتعليقك ماعنده عندي مكانه ,بالعكس هو دافع حقيقي للمواصلتي

كوني بخير غاليتي

آلاء عبد الرحمن

08-04-2012, 12:14 AM

منتظرين الحكاية تكمل
:)

ahmed algam

08-04-2012, 12:46 AM

منتظرين الحكاية تكمل
:)

.....2......

الملكة اسماء ( ام محمد )

14-04-2012, 10:42 PM

ألوية واحمد
انا زاتي عايزاها تكمل
والله العظيم ماقاصدة اتاخر عليكم بس ظروف

الملكة اسماء ( ام محمد )

14-04-2012, 11:11 PM

عدت الايام بسرعة وجاء موعد استقبال البنات لمي في المطار

اتفقوا البنات ان سمر و شروق وغيداء وعائشة يمشوا يستقبلوها في المطار
وفعلا مشوا البنات للمطار وكانت مواعيد الطيارة بعد اذان العصر مباشرة

في الطريق كان كلام البنات عن الحاجات الطالباها سمر من امها .
سمر: ياترى ماما حصلت لي الفاونديشن الطلبتو , افتكر اخر مرة كانت معاي لما اشتريتو .. ياربي تكون متذكرة النوعية
شروق: غايتو يا سموره وزن مي كلو حايكون حاجاتك انتي ..
عائشة : بصراحة ماكان في داعي يا سمورة عشان ميمي برضها عايزة تجيب لروحها حاجات والا شنو ؟
سمر: ووووووب منكم لازم تحسوني بالذنب, اهو الايام مرت وميمي جاية وماما قالت انها رسلت لي حاجاتي , فمافي داعي لتانيب الضمير هسي...

ولما وصلوا البنات للمطار كانت في مفاجئة غير متوقعة

وقفوا البنات في طابور الانتظار ( اظنكم عارفنوا ) قدام صالة الوصول مستنين مي تجيهم طالعة

وفجاءة ... ظهرت مي
ووراها مباشرة الود الكان بعاين ليهم يوم سفرها !!!

جات مي بسرعة وسلمت على البنات
الود ( الوجيه ) بتاع يوم السفر جاء وقف جمبها

والدهشة مرسومة في وجوه البنات

مي: وحشتوني يا بنات , اعرفكم على أيهاب , خطيبي

ورفعت ليهم يدها توريهم دبلة الخطوبة

للحظات كانوا البنات في حالة دهشة وحيرة ومقلعين عيونهم ...لحد ماقاطعتهم مي

مي: شنو يابنات ؟ ماف مبرووووك , ولا حتى تحية راقية لايهاب
عائشة: عاااااااد جنيييييييتي يا ميمي , دي اخبار تدسى يا بت امي, مبرووووووووووووووك الف مبرووووووك والله فرحانة ومامصدقة
مي: مامصدقة اني اتخطبت قبكم يا بايركس هههههههه

البنات : ههههههههههههه

وبدوا في تهنئة مي على الخطوبة , الخلت سمر الكانت متلهفة لحاجاتها ماتسال مي عن شي

وفي طريق العودة للداخلية كان الاتفاق انهم مايوروا الشمار ده لباقي البنات لحد مايوصلوا ليهم ويفاجئوهم

وفعلا وصلوا البنات للداخلية وكانت احلى مفاجئة
بعدها توالت افراح الداخلية بخطوبة شروق , وأميرة لاولاد اهلهم

انتهى العام الدراسي اخيرا وحان موعد التخرج

يتبع

آلاء عبد الرحمن

22-04-2012, 10:48 PM

ازيكم يالهنا

^_^

ahmed algam

23-04-2012, 03:17 AM

ازيكم يالهنا

^_^

طال غيابكم

ahmed algam

23-04-2012, 03:17 AM

ازيكم يالهنا

^_^

طال غيابكم

الملكة اسماء ( ام محمد )

03-05-2012, 07:38 AM

اقترب اليوم الموعود
وبدت كل وحدة في البنات تجهز حالها لليوم المنتظر

يوم التخرج

يوما ينتظره الجميع
اباء وامهات وطلاب وطالبات وكل الاهل و الاصدقاء والجيران
ومعلمين بلا شك

كل وحدة من البنات اختارت لتفسها فستان وحزاء مناسب واكسسوارت ( ماتشنق ) مع الطقم
طبعا بنات الداخلية دي معظمهم مغتربات واهلهم مروقين واكيد لكل مقام مقال

فكان التجهيز برنامج شغال قبل يوم الحفلة بشهر
وفي مشهد جميل كان الحوار التالي

شروق : انا عن نفسي يابنات ماما جاية وجايبة لي حاجات التخرج معاها
مي : انا والحمد لله ايام الخطوبة اشتريت حاجات التخريج وارتحت منها
غيداء : دادي حايجي من كندا مخصوص على الامارات ويجيب معاه ماما واختي رميسا وناويين يجيبوا لي معاه حاجات للتخرج
اميرة : ماما جابت لي فستان بس حاسه انو عاري شديد فناوية اوديهو للخياط يعدلو لي , بس وين احصل لي شيفون مناسب وماتشنق للون دي يا عائشة ؟
عائشة : والله ياغودا ماعارفة بالضبط وين بس فاكرة انو ماما مرة جات لعرس بنت قرايبنا فكانت عندها نفس المشكلة ومشت لمحل اقمشة راقي جدا هنا واشترت منو العايزاه , فرايك شنو اضرب ليها تلفون واشوف ليك اسم المحل ؟
اميرة : اوكي حبيبة , تكوني ماقصرتي معاي , وانتي حاتلبسي شنو ؟

عائشة : يا ستي انا برضو ماما حاتجيب لي فستان على زوقها هسي لما تجي الاسبوع الجاي ورتني اللون بالفيس بوك ولقيتو مناسب فالمهم قولي ان شاء الله القياس يظبط مااكون زايدة كم باوند يخرب لي الموضوع
اميرة : ان شاء الله يطلع على قياسك ياقمر ...

اما سمر فكان الموضوع بالنسبة ليها ( هيلمانة )
ماخلت شي مااشترتو غير الحاجات الرسلتهم ليها امها
ولانها بتحب تظهر فجهزت تلات لبسات غير لبست يوم التخرج , كل لبسة ليها يوم وحتى حفلات تخريج الكليات المجاورة هي جهزت حالها ليهم ومابقى ليها غير ( الميك أب والتسريحة )

سمر : ألوية حبيبتي , عارفة شكلي حااستعير منك طقم الكرستال بتاعك الكحلي عشان اللون الرسلتو لي ماما ماجاي مع الفستان ده
ألاء: عيوني ليك يا غالية , انتي تآمري أمر لكن لو ضيعتيهو لي بقتلك عشان كان هدية بابا يوم ميلادي الفات
سمر: اضيعو ده شنو يا بت ؟ شايفاني بحبي والا بلعب بالتراب , ماتخافي , في الحفظ والصون ان شاء الله

ندى قصة خاصة جدا , فنشاتها وسط عائلة محافظة جعلتها تنظر لكل مايحصل على انه ( ترف ) لا داعي له

ندى : هسي بالله عليكم يابنات , البشوف الهيلمانة العاملنها دي مابقول جايين الاوائل في الكلية , ههههههههه , صحي ياما تحت السواهي دواهي هههههه

استفذ كلام ندى سمر بالذات ...
سمر: والله الناس الحاكمنهم رجالهم وغالبهم يلبسوا زينا ماعرفوا البقولوه قالو احسن نتكلم كلام يسم البدن ..لازم تذكرينا الجانب الاكاديمي هسي؟
ندى: هي ياانتي انا نسيتك , طرف السوط هبشك والا شنو ؟
سمر: ااااااي هبشني . ندوية بالله بطلي سقالة وخلينا نتبسط , المراتب الاولى خلينا ليك
غيداء : سموره ماتحرقي دمك بهناية دي , مرززززززقة , مخطوبة وجاية الاولى واخر انبساطة , بعد التخرج مباشرة العرس وبدل لبسة تخرج تلبس فستان زفاف ... عقباااااااااااااااالنا يارب
سمر : اي والله , عقبالنا , ربنا يتمم ليك على خير ياندوية ومي كمان ربنا يتمم ليها على خير

البنات : ااااامين يارب

mahagoub

15-05-2012, 09:11 PM

كتلنا الشوق لحكاوى بنات الداخليه
نستميحك عزراً بالدخول والمتابعه

الملكة اسماء ( ام محمد )

17-05-2012, 07:28 AM

ترقبوا الحلقة الاخيرة

mahagoub

17-05-2012, 07:43 AM

قاعدين مربعين ومؤدبين
يا ابله

ahmed algam

17-05-2012, 10:23 PM

ترقبوا الحلقة الاخيرة

قاعدين ومنتظرين

كدي ياعم محجوب النجيب بنبري دا ونقهد جمبك

ننتظر الحلقة الاخير

ونجيب لينا تسالي

آلاء عبد الرحمن

20-05-2012, 11:06 AM

ملكة القلوب وين ياجماعة؟؟؟

الملكة اسماء ( ام محمد )

10-06-2012, 10:35 PM

انا جيت

انتوا لو عارفين العلي بتعذروني

عذرا احبائي ان طال الغياب

الملكة اسماء ( ام محمد )

10-06-2012, 11:24 PM

انه اليوم المنتظر

الجميع يترقب

مطار الخرطوم اكتظ باهالي بنات داخلية الملكة

والمدرج اكتظ بجمهور تنوع من معلمين و زملاء وجيران واصدقاء

الكل مستعد والبنات بغاية التانق والجمال

حانت لحظة التخرج
تتوق الانظار لمشاهدة ( الزفة ) وتسترق الاسماع صوت وشوشة المايكروفونات لتعلن بداية حفلهم الساهر تتويجا لبنات وبنين دفعة انتظرت تلك اللحظة سنوات

اهالي بنات الداخلية يترقبون هذه اللحظة اكثر من بناتهم
جلسوا في الصفوف الامامية ينتظرون حضور بناتهم بابهى الحلل
وفي عقولهم تدور تصورات اجمل ليوم زفافهن لازواجهن ايضا

اعلنت البداية
وخرجت طالبة ترتدي فستان انيق تعلن عن بداية الحفل
شخصت الابصار صوب المسرح ليتهادئ مدير الكلية ويلقي كلمته تليها كلمة رئسية رابطة الطلاب

ألاء : بسم الله الرحمن الرحيم
والصلاة والسلام على اشرف خلق الله وسيد المرسلين , محمد وعلى اله وصحبه ومن اتبع هداه ليوم الدين
اما بعد
مديرنا الفاضل اساتذتنا الاجلاء, زملائنا الطلاب وزميلاتنا الطالبات , انه اليوم الذي ارتقبناه كثيرا , وارتقبتموه
حلمنا به وتعبنا من اجله وانتم شاركتمونا هذا الحلم وحمل تحقيقه حملتموه
سعداء انتم بناء اليوم ونحن اشد سعادة اذ كنتم خير معلمين وافضل مرشدين لنا

فعذرا ان قصرنا او تطاولنا وشكرا لكل لحظة افنيتم فيها صحتكم واوقاتم من اجلنا
نعم شكرا , لوجودكم بيننا دائما حتى ونحن نختار ابحاث تخرجنا
شكرا لكل افراد كليتنا بداء من مديرها وحتى غفيرها

واخيرا ليس أخرا, لن نقول وداعا , بل نقول الى اللقاء ....ان لم يكن فوق الثراء فبجنة رب السماء

واخيرا حانت لحظة الفرح الكبير , اعلنت الاسماء الخريجة وتعالت صفقات الاهالي
وتصفير الزملاء وزغاريد الزميلات

يوم جميل وفرح كبير , بهدوء دخل خريجوا الدفعة , فرحة اختلطت بدموع وزغاريد خنقتها عبرة تملئها الامنيات , تفوقت فتيات الدفعة على فتيانها فقد كن الازهى ملبس والاجمل طلة , وليس بالشي الغريب عليهن

في كل مرة كانت تخرج فتاة تصحبها اغنية اختارتها هي او وجدها اعضاء الرابطة ملائمة لها

تمايلت الفتيات طربا وفرحا وعلت اصوات اهاليهن تهنئة وبهجة ...

عدت اللحظات مسرعة وحان موعد الوداع ...

عادت الفتيات للداخلية لاخذ اغراضهن والمغادرة , اما لبيوات اهاليهن في الوطن الحبيب او لبلاد الغربة بعيدا عن مواسم الافراح التي مضت

الملكة اسماء ( ام محمد )

10-06-2012, 11:59 PM

اكره لحظات الوداع كثيرا
وتستثيرني تداعيات الاحساس فيها , فاجد نفسي ابكي وانا اكتب عنها

تخيلت لحظات وداعي لزملائي في كلية المختبرات الطبية بجامعة الجزيرة اتذكر لحظة وداعي لغفير الكلية وحتى اشجار ذلك المبنى العتيق
:(

نرجع لقصتنا :)

يوم الوداع
وقفة ندى على شرفة الغرفة التي شهدت لحظات كثيرة وافراح كثيرة ودموع كثيرة ايضا
خنقتها العبرة وهي تودع جدران تلك الحجرة وتهرب بنظرها خارج الشرفة لتشاهد الداخلية من منظور أكبر اشجار الداخلية بدت حزينة فلم تفلح نسمات الهواء في مداعبة اوراقها ولا اجبارها على الغناء كما في سابق عهدها

تنهدت ندى بحرقة فسقطت على جبينها دمعة حارقة , تلقفتا يد تميزت بالعطف والحنان في الداخلية لقد كانت , مي

مي : تعالي ياغالية , مابتبكي

واحتضنت ندى لتبكيا معا وكأن هناك متوفي لهم في تلك اللحظة
وماهي الا لحظات حتى انتشرت عدوى الدموع في الغرفة فكانت كل واحدة من بنات الداخلية بحاجة لمن يمسح دموعها ويعدها بان تلك الذكريات لن تزول ابدا وانهن سيكن على اتصال مابقين على قيد الحياة

وفي اليوم التالي اقيمت حفلة صغيرة بالداخلية على شرف خريجات الداخلية وكانت اجوائها لا تقل بهجة عن ليلة التخرج
كان الفرح هو سيد الموقف

انتهى الحفل وغادر الجميع بعد وداع طال
وخلت الداخلية من الجميع حتى الغير خريجات فتلك نهاية العام الدراسي

اصبح المكان خاليا من الجميع فيما عداء / الملكة

التي مسحت دموعها وهي تجول بنظرها بارجاء المكان قبل ان تغلق البوابة وتذهب هي الاخرى لقضاء اجازتها برفقة اهلها , بمكان ما