حمــيـــــد زول كـــــــــــــــــــده

[مولانا جلال]

اطلعت فى الايام الماضية على كثير من المراثى التى كتبت فى شاعر الغلابة محمد الحسن سالم حميد ورايت ان اقوم بتوثيق جزء من هذه المراثى فى المنتدى ويسعدنى ان تجد الاضافة من الاخوة بالمنتدى .
حميد زول كده
تحت هذا العنوان كتب بابكر سلك
× تانى زول جميل فى بلدنا مات
× قبال شوية وردى فات
× وقبل ما تجف الدميعات
× حميد مات
× حمبد ملك القوافى المتفرده
× حميد ملك القوافى المتمرده
× حميد ملك القوافى الماخده من رجع الصدى
× صدى انين عذابات البشر اللى همومها متوسدة
× حميد للبلد القصيده بينشده
× حميد ينعل يوم الامريكان
× حميد بين التمرة والبرتكان
×حميد اطول نخله فى السودان
× حميد احلى قصيده يقوله لسان
× حميد يازول
×جميد يا انسان
×حميد الكان
×وحميد الباقى فى الوجدان
×سيان
× حميدزول رائع
× حميد كده
× حميد ما بنبكيك
× ولا بتبكيك ست الدار
× نخاف الدمعه تمسح من دفتر الاحزان قافيه
×بنحتاج لقوافيك الدافيه
× قوافيك الفى بدن المظلوم عافيه
× لن نقول الامايرضى الله يا حميد
× انا لله وانا اليه راجعون ِ

[مولانا جلال]

يا عشم وطن الغلابة
تحت هذا العمود كتب ياسر عبدالله
(انا لله وانا اليه راجعون ) هذه المره لم تكن شائعة ورحل شاعر البسطاء محمد الحسن سالم حميد ، الرجل المسكوب بحب الوطن
املا قلبك
املا قلبك بالوطن .... بالصغار
قومة العمال دغش ... بالنضار
المزارعية الغبش ..بالجنود الوين تخش فى سبيلك كالنهار
بالمداد الما بيغش .. بى وتر جا منم الجحيم
رحل حميد جسدا عن دنيانا الفانية ولكنه ترك ارثا ادبيا ضخما ستتوارثه الاجيال جيلا بعد جيل
الوطن الذى يجرى فى عروقه مجرى الدم حاضرا معه فى كل لحظه عندما اخذته الغربه الجبرية عن ترابه انشد فى رائعته ( طيبه)
التى غناها رفيق دربه الراحل مصطفى سيداحمد
كل ما تباعد بينا عوارض .. كل ما هواك اااطيبة مكنى
تلد الغربه القرب الواحد .. وبيك اسمى الشوق واكنى
لما افوتك من دون خاتر .. او دون خاتر منى تفوتى
بلقى حبايب فى كل حته ... وكل بيوت الفقراء بيوتى
لاغيرت وراك الجته ......لابدلت ملامح صوتى
لاغافلنى وهادن فنى .....عامل المدن الماعرفتنى
وتبن الصبر الشوقو مصوبر .....فى الارياف الكم وفنى
وبالاحساس الجاك مستعجل ... جيت متانى
للاطفال الناشفه ضلوعا
ونازفه بغنى ...اهدى دموعا .....
واطمن روعا .......
اللهم ارحم عبدك الفقير محمد الحسن سالم حميد وتجاوز عن سيئاته وابدلها له حسنات .. اللهم ابدله دارا خيرا من داره .. واهلا خير من اهله ، ولاحول ولا قوة الا بالله العلى العظيم

[أم سماح]

تسلم مولانا جلال وفعلا حميد زول كدة
و إنا لله و إنا اليه راجعون
وحميد قال :

ياتو وطن في الكون الواسع
دون عينيك راح يبقي وطن
وياتو سكن في الدنيا الغنوة
دون عينيك راح يبقي سكن
ياتو شمس راح تشرق تطلع
لو عينيك بادمعة بكن
وقام منديلك.....غازل خدك
غطي عيونك....غصبا عنك
هاج منديلك..اغمي عليهو..وقع من ايدك
ومن الدهشة الفيهو رطن
ياتو وطن؟؟
تعرفي ناس عنتر حبو؟
وليلي وقيس ضاقوها محن ؟
اصل القصة عيونك انتي
كانت نجمة تضوي سماهم
وكانت كل كلمات الالفة مسطرة فيها
كان عاشقين السما والنجمة
عبدو النجمة لانك انتي وانو السما في ذاتا ملابسك
كيرت بيهم احلام حبك
وقام رسموك في كل قصيدة
عيون بتحدد نوع القصة
وقصة تعبر عن تحديدك
كرسي وكنبة ورحلة طلبة
يزورو النيل والموية العزبة
يلاقو النيل كان دمعك انتي
واصل الرحلة..........
دهشة وخلعة يوم عينيك بالدمعة بكن
وقام كنديلك.....غازل خدك
غطي عيونك.....غصبا عنك
هاج منديلك......اغمي عليهو
ومن الدهشة الفيهو رطن
قريش يوم عبدت الله حجار
كان فاقدين لي حنك وعطفك
عبدو اللات والعزة وغيرن
حج وطواف تقديس ووهن
انا سويتك نفس القصة
احلي يمين من احلي وثن
قلت اذوب في حبك راهب
واعبد الله الرسمك جوة
واقفل بعدك محراب حبك
واقعد جوة احبك واعبد..احبك واعبد..احبك واعبد..احبك واعبد..احبك واعبد..احبك واعبد..احبك واعبد..
وارسم دنيا تكون ترنيمك
واصنع دنيا تكون تحديدك
واكتب في عنوان دنيانا
مافي وطن في الكون الواسع
دون عينيك راح يبقي وطن
ومافي سكن في الدنيل الغنوة
دون عينيك راح يبقي سكن

[مولانا جلال]

حميد ... صحى الموت سلام ما يغشاك شر

وتحت هذا العنوان كتب هيثم صديق
يا عصفور محبتنا البسيط
لو مابتبيت فوق السبيط
طول مسافة ركتك
وبما سبق نعى حميد مصطفى سيداحمد

[خالد علونى]

مولانا جلال
مما لا شك فيه أن حميد رحمه الله كان له مكانه كبيرة وحضور متفرد في خارطة الأدب السوداني




تجابد... ها الخلايق...علو يسمعو صوتك
وينادوك تعااااال... صحي المنام في موتك
ياالصايت نباك....... عزة بهاك في فوتك
دور تاني ياخ.... في سوق عكاظ نبوتك



كمال الدين المرضي

[مولانا جلال]

شكرا علونى كتير

[مولانا جلال]

هـــــــى .. اقيفن ...
نورا فيكن ؟؟؟؟
نورا ... نقاحة الجروف
نورا..حلابة اللبينى
للصغيرين والضيوف
نورا ....
ساعة الحر يولع
تنقلب نسمة وتطوف
تدى للجيعان لقيمة
وتدى للعطشان جغيمه
والمخلى الحال مصنقر
فى تقاة الليل
تدنقر ..
تدى لباكر بسيمة
تكسى للماشين عرايا
وفوقا يتقطع هديما
.....................
ما عرفتن نورا انتن
قولن انتن شن عرفتن
نورا بت الواطة
اخيتى
نورا اخت كل الغلابة
نورا حاحاية الشقاوة
نورا هداية الضهابه
الاراضى الياما ادت
نورابقت من ترابه
وماشى فى الاعماق سحابه
مشتهنها والله جابا
للجنوب طبلا يهدهد
ليل مشاعر ناس تعابة
وللشمال طمبور يسكت
دمعة الميتين كابة
.....................
ما عرفتن نورا انتن
قولن انتن شن عرفتن
نورا عايزه تقرا
قالت فوقا حيطة الدنيا مالت
ختت الكراس وشالت
منجلا
صالت بو جالت
لامن انجرحت بو
شالت للتراب
فوق ايدا كالت
.................
مرة يوم فى الدونكا لدغت
جا الفقير بالليل حواها
ويوم ملاها الهم قطايع
جا البصير بالنار كواها

[مولانا جلال]

ونورا ما قدرت تمانع
تقنع الناس المعاها
مرة شافت فى رؤاها
طيره تاكل فى جناها
حيطه تتمغى
وتفلع
فى قفا الزول
البناها
فى جنينة سيدى
سمعت
شتله تصقع
لى الوراها
دى الارض
ولابد ترجع
للتعب فوقا
ورعاها ..
غيمة ..
والنيل موجو
لاها
والعطش شقق شفاعا
الشمش
طبقت ضحاها
الخليقة لاقت الاها
نار عاب انسان مكسر
فوق تلكيات متاهة
وضو من الله
رهاب
مكتف فى وتيد الليل معاها
بين ربوع حضرة وخلاها
فشقت للناس
رؤاها وقالوا جنت
مو براها
ونورا زادت فوق شقاها وصدت الايام تحش
تبنى لى عصفورة عش
فى السواقى تشوف عزاها
لما شوقة يسوى
اش
تملا تزرع ترع تقرع
للنهار فى الليل
تخش
عرفت الشقا والشقاوة
الا ما عرفت تغش
....................
شايلة طولت البال من الله
ومن اراضينا الاثارة وماشى
تكدح
طول نهاره
وترجى لما الليل يفلل
تسرق المى عشان خداره
عشان صغارة
ولما ترجع لى دياره
تنزف احلام الفقاره
من عويناته الفقارى
الحيارى
.................
لى غبار الحال
تقش
فوقوا للامال ترش
نورا تقعد
صاحى تحلم
بى بيوت بى نور ودش
وبالمحبة تشق دروبا ولى قلوب الكل
تخش
نورا ...
تحلم بى وجود
ما مشت بينو القيود
افضل ..افضل
بى الكتير
بى وطن
من غير حدود
...................
نورا تحلم
بى عوالم
زى رؤى الاطفال حوالم
لادرادر
لاعسا

[مولانا جلال]

لاعساكر
لامظاليم
لامظالم
نورا تحلم
ولما تحلم
نورا ترجف
ولما ترجف
نورا تحلم
ولما ريح الواقع المر
لى عشيش احلاما ينسف
نورا
تنزف
وفى الوجود
وجدانه يهتف
حاله تقرف
حاله تكسف
وتبدا
تقضف
ولما تقضف
حاله يهتف
وتملا باله احلام
بتلصف
يوم
حتنصف
نورا لسه
بعيد هناك
صاحى تحلم
ولما تحلم نورا ترجف
ولما ترجف نورا تحلم
صاحى تحلم
وصاح بتحلم

[مولانا جلال]

اه .........ياغبش

اه ياغبش
ماعندى ليكم
غير نغيم
برجوه ينفض
لى غبار زمن القسا
الكتاح يهز
عرجون نخل صبر الغلابة
الطال
يحت
يخرت
تباريح الاسى الممدود
فوق نور الدغش
يانورا اه....

[mahagoub]

يديك العافيه مولانا
على هذا التوثيق الرائع الذى لم نستطع قرآته
لصغر الخط
ارجع واعمل تعديل وكبر حجم الخط
بالمناسبه بلاش
خلينا نستمتع معاك

[ياسر عمر الامين]

منتظرين المزيد حبيبنا جلال...

[مصطفى هاتريك]

, وخليت وراك يا (( حميد )) ألفماية حيطه تتمطى و تفلع في قفا الزول البناها


رحمك الله يا متنبئ هذا الحال المر

رحمك الله يا إستثناء في ده الزمن الكعب

شن لينا بعدك إلا النواحات و المناحات و التعب

[مولانا جلال]

يانورا اه
يحرد كنائسنا
المسيح
يعرش مدارسنا
الصدا
ييبس ...يباس
حلق العصافيرالوديعة
من البكاء
يندردر الصوت
للبعيد
اسيان يصد
من دون صدى
ينكفرن الفجر الصبوح
يحمى الزهيرات
الندى
تختا الدراويش
الضريح
تسكن خلاوينا
الجنون
يهجر جوامعنا
الاله
يانورا اه
تطرح غيوم الشوق
تئن
تشرق
تموت
خيل كلمة الحق
التناهد فى الشفاه
تعقر
بسيمة الصح
مع لوبى الجروف
تغرز
ضريعات الحروف
ينشف مراح الامسيات
تتمطق الارضه
المروق
والاغنيات
اللى الشروق
والارض
والحب
والمطر
تضهب تتوه
وكتين يضيع
عرق الجباه
الشم
شمار فى مرقة
اه
اه
يانورا
اهِ

[مولانا جلال]

اه
يانورا
اه
من دربك التور
نفس خيل الصبر
فتر خطاوى الشوق
وراه
يانورا
اه
يساعة الشموس الغر
تهضلم
تلحق الصح
فى المغارب
تذفر الضو
الكهارب
فى وشيك
تدفرالمدن
الضبابيه
السرابيه
الكابة
وحائط التيه
والطشاشات
فوق قفيك
يا ام عوارض
مودعاشه
ماها شبورة
وتقيف
جاى ليك
يانورا
غيمه
تملا ماعونك
خريف
يملا عينيكى
ويفضل
نروى جواكى
العطاشى
مو
...دعاشة
ِ

[مولانا جلال]

يامطر عز الحريق
يامصابيح الطريق
يا المراكبية
البتجبد
من فك
الموج
الغريق
جينا ليك
والشوق دفرنا
ياالمراسى النتحويبا
لما ينشعوت بحرنا
ياجزرنا
وقيف عمرنا
يانشوغ روحنا
ودمرنا
ياالمحطات الحنينة
القصرت
مشوار سفرنا
وياما شايلك
بينى
حايم
ايوة شايلك
بينى حايم
فى الارض
تكوين
قضية
فى السما الاحمر
غمايم
بى برد نغما
السلامى
رطبت حلق الحمائم
طنبر النخل
التبلدى
راقص الابنوس
وصفق
سوت الصقرية
موجة
خلت النيل هاجلو
هوجة
بشرت بالخير بلدنا
شالت الشبال
نسائم
جددت زلفى
القديم
امشى بالماشيبو
اقاوم
لابتكبر راسى
فورة
لاب تصغرنى
الهزائم
جنسى يانورا
ابن ادم
حلمو فى عالم
مسالم
لاالليالى
الماها ليا
لاالشماتات
العليا
لاالبنوك المخملية
لاتفاهات الحضارة
لاعفاريت المدينة
لاالعمارات السوامق
فوق ضهر
ناسا فقارى
لا الهتاف الفاوة
ضارى
غطى بالى
من الفوارق
لا الالوهه الطوطمية
لا البرندات الوسيمة
ولا الاسامى الاجنبية

[مولانا جلال]

ولا الاسامى الاجنبية
بتمحى من عينى
ملامحك
وانتى جاية المغربية
دايشى داقشى
المغربية
وشك المقبول
مكندك
سامسونايتك
زمزمية
كون شبر
مرزبة
مقطع
ريشة
فانوسا مدردح
قلت بيهن
لى زمانك
يازمان الحاجة
عندك
يازمان الافة
حدك
لاتطا الورده الصبية
يا نفس فجر القصائد
يابلادى
القطع قلب الروادى
باللواجة الجاى
وغادى
ده ماهو صوتك
لاها صورتك
دى البترقش
نادى فوق صدر
الجرائد
ماها صورتك
لاهو صوتك
لاها صورتك
انتى
يا الفطن الصحارى
شفع العرب
الفتارى
البفنو الشايلة ايدن
ويجروا كابسين
القطارة
يجروا بارين
القطارة
ولاسراب الصحراء موية
لاحجارة سلوم
موائد

[مولانا جلال]

انتى فى الغابة
اليصارع ..
جوفو للاهات
تلكى
ياما دفق غيم رجاهو
لكن الايام
كركى
فى خلا حالنا
اليمحن
ويملا بالسهد
الوسايد
انتى غيمة
شديرة
خيمة
انتى جاهنا
والتقا الطلقت وشينا
فرقت غمة جباهنا
فرجت فى الحارة ضيقنا
فرحت شفع فريقنا
والمواعين الحزينة
يا اتجاهنا
يا النغيم البقه فينا
وشد لى وتر انتباهنا
يا تباشير
يابشاره
انتى ياضرعا
يكرمش
شان يرضعنى الجسارة
انتى فى منفاى
رفيقة
وفى حشا الاشواق
حرارة
يا هدى الناس الحيارى
يا ندى الفجر اليبلل
صور عوينات
الفقارى
اى جاى ليك
يا نورا افة
افه للسوس
الجا ينقر
عود عشيما
داخروا فيكى
واصلى لمن
ادور اجيكى
بجيكى
لابتعجزنى المسافة
لابيقيف بيناتنا
عارض
لاالظروف تمسك
فى ايدى
ولامن الايام مخافة
يانفس فجر
القصائد
ما ضهب
فى بعدى عنك
واصلى متغرب
عشانك
راضى بالبجينى منك
مابكيت
شح الليالى
لاشكيت نح
شلتوحالى
رغم انو الحال
بيفسخ
ورغم انو الحال
بيفسخ
الا كت فى الحاره
بصرخ
ياوطن
عند الشدائد
ياوطن عز الشدائد

[مولانا جلال]

شوك الشوق
لى الشوفة
ضارب فطن النسج
الحى
يامنقاشو
احزانى انشرت
وادى الفرح
اتمدد صى
ياراحلين
عن دغش الليل
ما لاقيتو جنايا
زى
تكية نخل الفجر الجاسر
فوق فى المترة
عراجين ضى
يارعاوة
ا... العرب الرحل
ما لاقاكم
فى المطرانى
فى كاويق الجرف
الامحل
بين اسراب الرهو الراحل
ساند اكتاف الليل الميل
عند ساساق
الغيمة
عليكم
بين رقراق الخيمة
معاكم
ما اديتوه
شوى
بى حرجل
ا... رطانة الليل
الليل ان ليل
ما لاقاكم
فى ونساتكم
بين الشادى
وبين كاساتكم
فى صلواتكم
عند دعواتكم
او دقساتكم
عز خلواتكم
زول زول الله
ان محن
ابسال
الهباد
لى غلب اخواتو
الفراح
عوان الحلى
الفدار
لليل
ظلماتو
ا... نجمات
شقيش
قولنلى
ما لاقاكم
طالع مندلى
المطعوم من طيبة اماتو
كالفجاج
الند نباتو
موج البحر الاحمر
هوجتو
وعرق العرق
اللاوى ثباتو
جانا الشدر الاخدر
منو
ونار الشدر الاخدر
جاتو
راح شقيش
اب قولا واحد
وليش مايرجع
من غرباتو
طول
طول
ماطل علينا
وقاطع مننا
جواباتو

[مصطفى هاتريك]

واصل يا مولانا

وكان تعب منك جناح في السرعه زيد

[مولانا جلال]

واصل يا مولانا

وكان تعب منك جناح في السرعه زيد
شكرا هاتريك ومنك استمد القوة

[مولانا جلال]

الغابات جات
تنشد منو
العربان راجين
جياتو
اديناهم علقو
وعرقو
وصورتو
يقلب فى كتباتو
ضل رشاشو
ركيزة زولو
ساعات سلمو
ويوم حوباتو
سن طورتو
ولون ابرولو
وحس طمبورو
البى نغماتو
لهلب عشق الناس
الفقرا
وبرد جوفن
بى غنواتو
وياغنواتو
الدخلت فينا
تمرق
جينا على جلاتو
وجيدا جينا
طلقنا وشينا
ووش اطفالنا
الليلة
حلاتو
غنى معانا
غنى غنانا
هويتو
غنى العالم
غنى حياتو
لاساومنا عليها قضيتو
ولافكينا
من ايدينا وصاتو
الف شليل
يانورا
يفوتو
شان مايجيكى شليلك
ذاتو
ولما يجيكى
شليلك ذاتو

[مولانا جلال]

نوراى
الشوق من حاطف
لى قاطف
يتلم يهز
ليك يانوراى
يادرقة وسيف
ياحضنا كيف
من شر الصيف
والشتا ضاراى
ياشعلة عز
بقت جواى
عدت بى
ضلام
بحرا
عاصف
قاعد
بك
قايم
بك
شايلك
مورودة
ومتوكل
يانورا
على الله
علينا
والفرج قرب
وحايم بك
يابت العرب
النوبية
يابت النوبة
العربية

[مولانا جلال]

بى فردة نخوة
بجاوية
اوشدرالصحوة
الزنجية
دسينى
من الزمن الفارغ
من ريح المتع
الوكتية
من
شر
الساحق
والماحق
بين دبش المدن
المدعية
والليل اتحكر
بيناته
كحل بى دبشو
عويناته
ياشمس الله
المسبيه
روحت
اتنسم اخبارك
لاتشفق
قالوا لى
نصيحى
وانا عارفك
ممكونة
وصابره
لكن لى ناس
الا
تصيحى
جواى ماساتك
مضروسه
ياطفله تفتش
فى باكر
ما بينات
نخلة
و
ابنوسة
الجوع
العطش
الفد واحد
الفقر
الضارب زى
سوسة
الخوف
والحاله المنحوسه
ويابحر الحاصل