المساعد الشخصي الرقمي

مشاهدة النسخة كاملة : سفينة تايتنك



نزار حسن محمد
24-04-2012, 08:39 PM
سفينة تايتنك
تم تشيد سفينة تايتنك بالقرب من طرمبة الشاطئ بودمدنى ثم أبحرت وهى تحمل عدد محدود للتجربة أبهرت سكان ست المدائن فانضموا لركابها وسفينة تايتنك كانت تتحرك في مدار محدود تصل لقايتحنتوب و رفاعه ومصنع سكر الجنيد ثم تعود ادراجها ومع مرور السنين تم عمل اضافات لغرف سفينه تايتنك واصبح ركابها فى تزايد مستمر لذلك قرر ما لكها بتكوين مجلس اداره ليشرف على اقسام السفينه وتم تفصيل الذى الرسمي لكل العاملين بالأقسام المختلفة من ادارين لمشرفين ومضت الأيام والشهور وتايتنك تبحر ...ركاب يواصلون وركان ينزلون وركاب ينضمون والسفينة لا تتوقف ...جلست الناجية الوحيدة وهى تعود بذاكرتها لتلك الأيام الخوالي وتحكى لأحفادها عن تلك السفينة...وقالت لهم حليل زمااااان وايام زمااااان كانت تقام احتفالات فى الاقسام الجديده والراكب اصنقر فــد صنقره اتعرف الكبير على الصغير والناس كانوا متحبين ذى العنب والتين جماعات جماعات تلقاهم قاعدين فى قسم كشكول ودمدنى وجماعات جماعات تلقاهم مصنقرين فى دكان ود الصول وجماعات جماعات تلقاهم منتظرين الجرايد طازه فى ودمدنى هذا الصباح ..ويوم يقفل العام الاحتفالات لمدة اسبوع ذى عرس زماااان .. اها والسفينه ماشه وكل فتره يتم تبديل طاقم السفينه لكن فى طاقم ثابت لقايت ما جاء اليوم المشؤم والسفينه من ما اتحركت العمال القدااام قالوا للريس المالك الجو معكر والبحر هائج كده انتظر شويه ندخل السفينه دى الورشه وبعدين نتحرك اها رفض بالتقطعوا وقال لا السفينه تتحرك اها والعمال قالوا خلاص يارئيس مجبور خدم الفكى على الصلاه اتحركت السفينه وهى فى عرض البحر قامت الكتاحه وارتفعت الامواج وكان البحر دميره اها طاقم الاداره والمشرفين والعمال قاموا جارين ده اربط من هنا وده يحل من هنا والمالك قافل عليه جناحه ولا هميه البناء ولا البناول الطين والنصيحه لى الله حاولو العاملين المستحيل عشان اشوفووو اقرب مرسي يوقفه السفينه لكن الرئيس بعد ما الكتاحه دخلت ليه فى جناحه صحى من النوم وقال ياجماعه فى شنوا ..وهو شاف الحصل اها بعد مشاورات اصر والحه بان السفينه تواصل فجاء ضهرت لك جزيره فى نص البحر اها فى جماعه قاموا نطه فى الجزيره دى والسفينه بقت ماشى من غير قبطان والموج اصرع الموج لقايت من ظهر لنا جبل والركاب طقو الكواريك ونزلوا على غرفة القياده وبقينا فى حاو وتر وخلاص دايرين نتجاوز الجبل جاء المالك والرئيس ولف الدفه للاتجاه المعاكس بس سمعنا تك تك تك طااااخ طااااخ والسفينه بقت تحتل والسكاليب وقعت هبطرش والجماعه القبيل نطه فى الجزيره ديك بقوا هم الشاهدين على غرق السفينه ...اها انا قمت مسكت فى علم الساريه لمن جمبلق نزلت المويه بس ربك رب الخير لقت لى طروره عائمه واتشعقلت فيها ...بس ياعيالى رجعتوا لى المواجع ... وسالت دمعات من خد الناجيه ...

مايسة
24-04-2012, 10:49 PM
هههههههههههههه
ليه يا أبوسفروووق كدا ياخ
هسي وانا بقرا اشوف ليك الفلم قداااام عيني
خيالك واااسع شديد
دحين هسي كان عندي قلادة في السفينة
الناجية دي لو سالتها ما بتعرفه لي

تخريمة :الرسالة من تايتنك وصلت تب
لكن خليك متفائل ياخ
لو انت بتقول كدا الباقين يعملو شنو طيب

مايسة
24-04-2012, 10:51 PM
سلفة التلحيقة بتاعتك يا ود مدثر

اها يا ابوسفروق ما شفته الكان بعزفو ديلك
لحد آخر نفس بعزفو وما فقدو الأمل
خليك زيهم ياخ
يمكن تجي طيارات إنقاذ :p

نزار حسن محمد
25-04-2012, 01:11 AM
هههههههههههههه
ليه يا أبوسفروووق كدا ياخ
هسي وانا بقرا اشوف ليك الفلم قداااام عيني
خيالك واااسع شديد
دحين هسي كان عندي قلادة في السفينة
الناجية دي لو سالتها ما بتعرفه لي

تخريمة :الرسالة من تايتنك وصلت تب
لكن خليك متفائل ياخ
لو انت بتقول كدا الباقين يعملو شنو طيب
اهم حاجه تحتفظى يامايسه بالقلاده
عشان لازم نرميها يوم مكان غرق السفينه

عمروو
25-04-2012, 03:24 AM
يا ربي دي تايتنك التي حملت الموت لركابها ام سفينة نوح التي حملت لنا الحياة

نتفاءل ونقول سفينة نوح

نزار حسن محمد
25-04-2012, 11:36 AM
يا ربي دي تايتنك التي حملت الموت لركابها ام سفينة نوح التي حملت لنا الحياة

نتفاءل ونقول سفينة نوح

كان الله مده فى الآجال ياعمرووو
نحى ونشوف

بنت الرفاعي
25-04-2012, 11:35 PM
كان الله مده فى الآجال ياعمرووو
نحى ونشوف



:):):)

آمين،
نتفاءل بالخير إن شاء الله.:rolleyes::)

:):):)

نزار احمد كوارتي
26-04-2012, 03:17 AM
غِرقت غِرقت ما تدوها بُغاث الطير

بالزقاق :-

يا الحبيب غايتو نحن لسه قاعدين نجلبِق وعشمنا يكون يوم بكره جميل

نزار حسن محمد
28-04-2012, 03:07 AM
غِرقت غِرقت ما تدوها بُغاث الطير

بالزقاق :-

يا الحبيب غايتو نحن لسه قاعدين نجلبِق وعشمنا يكون يوم بكره جميل

ود الفتــلى ومــات

صلاح ودالطاهر
28-04-2012, 05:15 AM
حبيبنا نزار مادام نحن متحابين في الله لايمكن ان تغرق السفينه .......ومادام خوتنا من غير زيف اونفاق لايمكن ان تحتل هذه السفينه......... اجتمعنا فيها بكل حسناتها وعيوبها لايمكن ان نترك اليأس ليجرف هذه السفينه........متابع السفينه منذ ان ابحرت بقليل من العام فلما نتركها تغرق ونحن بيدنا ان نتعاون ونتكاتف حتى تخرج لبر الامان ولما لا نضع طوق النجاة لكل من يريد ان يبقى في ظهر السفينه لان ترسي في مرسى احن ام وهي مدني .......... اعجبتني مشاركة اختنا العزيزه مايسه
ها يا ابوسفروق ما شفته الكان بعزفو ديلك
لحد آخر نفس بعزفو وما فقدو الأمل
خليك زيهم ياخ
يمكن تجي طيارات إنقاذ

ام رغد
28-04-2012, 12:39 PM
اول شى السلام عليكم......... نزار يا أخوى الكانت حدها حنتوب وترجع دى تايتنك ولا اب رفاس ؟؟؟؟؟؟

بوتشى
28-04-2012, 11:11 PM
خالو نزار صبحك الله بالف خير والف صلاه على سيدنا محمد عليه افضل الصلاة والتسليم كيف تغرق السفينه وفيها ابناء مدني يسدون قرص الشمس كيف تغرق السفينه وفيها مثلكم كيف تغرق السفينه ونحن نبحث عن الامل لابد نقاوم ونقاوم من اجلها روحي ليك مشتهيه ودمدني وفي ربوعها المدني والسني وانت من وين يا بنيه ناويه على ةين السفر انت من مدني الجميله مدني ياجمل خبر ومستحيل نسيبه مدني

محمد المأمون
09-05-2012, 01:30 PM
http://www.youtube.com/watch?v=Ijyk-zuIfpw

نزار حسن محمد
16-05-2012, 12:14 AM
هههههههههههههه
ليه يا أبوسفروووق كدا ياخ
هسي وانا بقرا اشوف ليك الفلم قداااام عيني
خيالك واااسع شديد
دحين هسي كان عندي قلادة في السفينة
الناجية دي لو سالتها ما بتعرفه لي



يا مايسه جيبى القلاده خلاص حصلنا السفينه

صلاح ودالطاهر
16-05-2012, 01:18 AM
حبيبنا نزار مادام نحن متحابين في الله لايمكن ان تغرق السفينه .......ومادام خوتنا من غير زيف اونفاق لايمكن ان تحتل هذه السفينه......... اجتمعنا فيها بكل حسناتها وعيوبها لايمكن ان نترك اليأس ليجرف هذه السفينه........متابع السفينه منذ ان ابحرت بقليل من العام فلما نتركها تغرق ونحن بيدنا ان نتعاون ونتكاتف حتى تخرج لبر الامان ولما لا نضع طوق النجاة لكل من يريد ان يبقى في ظهر السفينه لان ترسي في مرسى احن ام وهي مدني .......... اعجبتني مشاركة اختنا العزيزه مايسه

رجعت ليك ردي ماشفتو يا بتاع البخور