لمتين ياشـوارع الحــزن ؟؟؟؟

[ود الضو]

وكأنها تقول : هل من مزيد ؟؟
تلك الشوارع او بالاخص ذلك الشارع الذي أخذ يغيّب
عنا من نحب ,,
هو عام للفجائع وفتح كل نفاجات الحزن العميم
ولكن لانقول الا مايرضي الله ( إنا لله وإنا اليه راجعون )
اللهم ارحم نادر خضر ورفاقه ..
استغفر الله العظيم ..

[ود الضو]

قبل اشهر قلائل غيّب الموت الشاعر الانسان ( حميد )
حميد الذي حمل همنا وهم وطن باكمله
( عقب يبرد حشاك يمي من التعب البلا صالح )
زراعة الاحلام عند حميد كانت هي العزاء لنا
حميد علمنا ان نحلم ( ب مزااااااااج )
( تفيقي تروقي تنجمي تسوي مكانسك المطرة
تضوي البيت وتنحمي تمرقي صبوحة للجيران
فرح في ايد وفوق ايد ألمي )
ااااه ياشوارع الجن ,,
ألم تشبعي بعد ؟؟
فالي متي هذا التغييب المر ؟؟
( اطفال القري وعمال الحضر ادوهو الطيور
ودنو البحر )
مافي حاجة آآناس عمنا عصر شوية لتالا اليسار
ماقاصد شيئ غير انه يتفادي عربية ل ( الكجر )
اها الحمار قام جفل وعمنا طااااار زي حجر
و ( ماااات ) الغريب شنو يعني هنا ؟؟
عادي العربية بتاعة الكجر تمشي في الطريق زي ماعايزة
في النص , اقصي اليمين او حتي اقصي اليسار
هو الشوارع دي بتاعة منو ؟؟؟؟
بتاعة منو ؟؟ ردوا ماتسكتوا ساااي وتتبكموا ؟؟
الشوارع بتاعة ( اهلها ) ,, بس ياعمنا ممكن تورينا اهلها
ديل منو ؟؟
بالله دا سؤال ليك ؟؟
اهلها هم ( المنقذين ) كما اسموا انفسهم ذات
( سكْرة عسكرية ) هيلا هوب فركشوا نظام السابقين لهم
وصنقروا فوق الكرسي ( الحلم ) ,,
ايوة الشوارع حقتهم هم ( مش برضو هم السفلتوها )
وبرضو هم القاموا ( بتوسعتها ) حتي يتفادي ( الرعية )
الحوااااااااااااااااااااااااااااااااااااااااااادث ؟؟؟

[ود الضو]

وبرضو هم ( اللتقو ) الحفر الكانت فوقها
ودا كله لمنو آآآآسجم ؟ لينا نحن الرعية
يعني لو مسكت عندك :
الجماعه المنقذين ديل هم العملوا لينا طريق
( مدني - الحوش ) ااااي الطريق دا ياخ كان ترااااب
ودقدااااق مايديك الدرب لكن تعال شوف اليوم
بقينا اهل قري يمر بها طريق مسفلت ؟؟؟؟
قال قوله اعلاه وهو يضرب يده باختها ويملأ
يديه بالترااااب ويكتح تجاههم ( المنقذين ) ..
حاج الطاهر ( سائق في ذلك الخط ) كان اكثرنا فرحا
حينما تمّ افتتاح ذاك الطريق ولولا قصر اليد
لكان اول الذابحين تعبيرا عن فرحته ,,
ومن قبل ان تصيب ذلك الطريق الحفر والعالي واطي
كان حاج الطاهر ( احد الشهداء ) لذلك الطريق
يمكن برضو يكون عصر لتالا اليسار عشان يتفادالو شيئ
( هو المافي شنو ؟؟ )
قال احدهم سابقاً :
الشعب دا عدده كبير ياخ فاااشنو لازم نشوف لينا حلول
هههه الحلول دي كيف يا ( مسئول ) ؟
الحلول بسيطة يا( رعية ) :
واحدين نوديهم الغابات ( من اجل الشهادة )
والي الجنة مباشرة ( حور عين ووووووو الخ )
يعني باقيلكم توريت ويرول والميل اربعين وهلمجرا
ماحتقدر تخفف لينا التعداد دا شوية كدا ؟؟
اها ك وواحدين نخليهم يتداوسو ( جوة الجامعات )
باقي دواس الجامعات دا برضو حيخفض من الشغلانية شوية
اما المستعصيين الذين لايريدون لاهذا ولا ذاك
اهو من اجل التنمية للبلد وكدا حنقوم بتشييد وترميم طرق
تربط الاقاليم بالعاصمة , وتربط القري بالاقاليم الاتربطت بالعاصمة
بس الطرق دي حنشيدها ( بمزااااجنا ) وبالمساحة المترية
الانحنا عاوزنها ( نشوفهم ح يسافروا عبرها ولا لا )
غايتو عنهم افكار ( ابليسية ) , ولهم ماكانوا يريدونه
ظلت طرقهم تغتال الابرياء البسطاء من بني شعبي
دون رأفه الي يومنا هذا ..

[ود الضو]

طبعا الشارع بتطلع ليهو ( كذا ) ميزانية
ياداااابك يكون وصل نص المسافة والباقي
( ردمية ) وبعدين ياخ الردمية زاتها تكلفتها كتيره
يعني قريشاتكم الانحنا قاعدين ( نقلعها ) منكم
قايلنها بتعمل حاااجة ؟؟ هااا ولا شيئ حيال
تلك الطرق , يعني الحكومة لما تعمل ليكم يارعية
لما تعمل ليكم طريق يسمح بمرور ( كارو حمار و بوكسي )
في آن وااحد تكون قصرت في حاجة ؟؟ ماقصرت لاشيئ
ماقلنا ليكم اي حاجة علي قدر ( الجباية ) الواقفين ليها
موظفين بياخدوا منها راتب , ومديرهم في المكتب
بياخد راتب , وماتنسوا ناس المعتمدية ثم الولاية ثم
( الوالي زاتو ) يعني مايضوق قريشاتكم دي ؟
دا كلام برضك ؟؟
اها لو دايرين شواارع واسعة جد جد ذات مسارات رباعية
وخماسية ( زيدوا الشرتيت كمان ) ..

[mahagoub]

ناس الشوارع الرباعية المسارات
برضو عندهم حوادث
انا ما بدافع عنهم
لكن من حق المواطن على الدوله
انها تحافظ عليه ده ثروه
لكن نقول شنو لناس اللهطى