مشاهدة النسخة كاملة : وسـرحت يامهـوّن تهــوّن !!!
ود الضو
16-06-2012, 08:17 AM
رحيل الفجــعة ..
نفاجات للحزن مشرعة !!
.....
ود الضو
16-06-2012, 08:22 AM
قطعة من تبروقة
سبحة لالوبة
ومخلاية فيها :
بواقي كتب وابريق نحاس , بقايا عطر
مركوب فاشري ,,
كان هذا ميراث جدي ,
قالوا انه رحل والناس نيام ,,
لم يريد ازعاجهم وهم هجود
فقرر ان يرحل بصمت , وقد كان
فجأة صدر قرار الرحيل
وفاااااااااااااااااااااات , حيث الطيبين هناك
,, آآه من ذكريات من رحلوا بلا عودة ..
ود الضو
16-06-2012, 08:27 AM
شدرة نيم ضلها رامي
ولسة قاعد اشوف فيها خطوات حبوبتي
الله يرحمها وهي قاعدة في عنقريبها الهباب
تتنتن في بنها عشان تتم كيفها
او تنفشلها في قطن في شان تقوقيهو
وتسويلا سَلَبة للعجول وامهاتهن
او تشفالها في طبَق او تبروقة او برِش
وفي نفس ذاك الظل وهي تمارس
في هذه الطقوس ( ماااتت )
لم تخبر احد او تلمح بانها راحلة من غير رجوع
فاااااات هناك حيث الطيبين ..
الله يرحمك
ود الضو
16-06-2012, 08:34 AM
وتلك هي اشجار السنط
التي كثيرا ما اتخذناها مقيلا
ذات سنون خصيبة ,
شدرة كبيرة احسب انها ام لكل تلك الاشجار
علي ساقها منحوت بالخط العنيد
( تذكار من ......... في يوم ...... سنة .......... )
كان صاحب ذاك التذكار صديق واخ عزيز
فارقناه ليلا بعد جلسة ونسة متوهطة جوة الجوة
اصبحنا علي اصوات بكاء ؟؟؟
ثم قالوا انّ فلاناً قد ماااااات
وهم لايعلمون كيف سنحتمل نحن مثل
هذه الفجائع التي تاتي من غير تمهيد
هم هكذا الاخيار والذين نحبهم حد الحب مايقيف
فجأة يرحلون ويتركون فينا حزناً عميماً
صعب بالحيل رحيل الاصدقاء بلا عودة ..
ود الضو
16-06-2012, 08:37 AM
رحلوا ومن بعدهم :
حتي الفصول صابها الجفاف لاغيمة لازفة هرع
السمبر البفرح صفيرو غشانا واتقاطر رجع
وشدرنا من نفح السموم غصنا رقص رويان وقع
لاشابي لي ريحة دعاش لاهش لي برقا لمع
....
ود الضو
16-06-2012, 08:39 AM
( عمي ) ,,
مازلت اذكره ذات قعدة عريس
بعد ان قرأ له مايُقرأ في تلك القعدات ,
امسك بيدي وقال :
ح يجي يوم وتقعد زي القعدة دي
واقرأ ليك فوق رأسك ,,
ولكنها قالت له انك تكذب ,,
ماااااات
قبل ان يحصل لي هذا ,,
ولحق بالاخيار الذين يرحلون دون وداع
ويتركون خطاااهم حيّة فوق تراب البيوت والحيشان ..
الله يرحمك ..
ود الضو
16-06-2012, 08:40 AM
رحيل الفجعة ,
احسب ان هذه شيمة الطيبين ,
يتحدثون اليك من غير ان يلمحون
بانهم راحلون الي الابد ,
كلامهم يكون لسة يرن في اضنيك ,
شوية غياب او مرقة لاعند طرف الحلة
تسمع البكاء و ( فلان مااااات ) لا حولا ,
كيف الكلام دا وانا هسي هسي هسي دي كنت بتكلم معاه ...
والله ماااات ,
فعلا تلقاهو مات ,
تذهب معهم لتجهيز بيته هناك
والارض تستجيب للطورية والعزمة وتجدها مبُوسبة
وتقرأ فيها ( مرحبا بك ) ..
ود الضو
16-06-2012, 08:42 AM
وطفل دابو وصل مرحلة يضحك معاك
ويمد يديه لافوق عشان تشيلو ,
آثار حضنه لسة تكون قاعدة فوق جلابيتك ,
وصوت ضحكته يغطي كل اصوات الدنيا فوق اضنيك ,
ينعس ينوم في كتفك ,
تنوّمو وتمش ,
شوية غياب يقولوا ( ماااااات ) ,
تبا لتلك الامراض التي تغيبهم عنا باسرع مايكون ,
تبكي وتبكي وتذتذكر كل لحظة قعدت فيها معاه
ولاعبتو لامن نعس ونام
واخيرا تحمل جسده الميت ملفوف فوق برش ,
توصلو المحطة الاخيرة ,
ويترك اهو الدنيا من وراهـ بلا طعم ,
والبيت لسة فيهو بواقي ضحكاته وصرخاته ..
ود الضو
16-06-2012, 08:43 AM
اااااه من هذه ذكريات ,
ذكريات الرحيل الابدي ,,
ليتهم يعودون ,
ليتهم ,
ليتهم ..
استغفر الله العظيم واتوب اليه ..
mahagoub
16-06-2012, 07:57 PM
مالك يا ود الضو الليله
ماسكا سكة بكا وموت
فعلاً زمان الموت ليه شنه ورنه
ويحرسوه شهر شهرين
وكلما زادت المعاناة
زاد الاجر وغفر الذنب
لكن موت الفجأة الحاصل فينا ده
من علامات الساعه
ربك يلطف بينا ويحسن خاتمتنا
آلاء عبد الرحمن
16-06-2012, 11:17 PM
يرحلو عنا الاخيار والذين نحبهم دائما
آلاء عبد الرحمن
16-06-2012, 11:17 PM
ربنا يرحم كل عزيز علينا
ود الضو
06-07-2012, 05:42 AM
عم محجوب
آلاء
يسعد مساءاتكم
انه الفراق يا احبة
ولكن هي حال الدنيا
اقعدوا عافية
mahagoub
06-07-2012, 10:20 PM
قاعدين فى الانتظار
وبقى الواحد ما بنخلع زى زمان
تسمع الخبر كأنك متوقعه
الله يلطف بينا
ريم النقيح
07-07-2012, 03:35 AM
شدرة نيم ضلها رامي
ولسة قاعد اشوف فيها خطوات حبوبتي
الله يرحمها وهي قاعدة في عنقريبها الهباب
تتنتن في بنها عشان تتم كيفها
او تنفشلها في قطن في شان تقوقيهو
وتسويلا سَلَبة للعجول وامهاتهن
او تشفالها في طبَق او تبروقة او برِش
وفي نفس ذاك الظل وهي تمارس
في هذه الطقوس ( ماااتت )
لم تخبر احد او تلمح بانها راحلة من غير رجوع
فاااااات هناك حيث الطيبين ..
الله يرحمك
ربنا يرحم موتانا وموت المسلمين .
ويرحم حبوبتى فاطنة بت زينب بتذكر دعوتها بعد كل صلاة وحتى اخر صلاه صلتها قبل وفاتها( ياربى تفتح عويناتى وتفتح اضيناتى وتشدد كريعاتى وترجعنى لحالتى الزمان).
ود الضو
07-07-2012, 08:08 AM
ريم
مساءاتك كما تشتهين
هو الفراق يا اخية
لهم الرحمة اجمعين
ود الضو
07-07-2012, 08:09 AM
قاعدين فى الانتظار
وبقى الواحد ما بنخلع زى زمان
تسمع الخبر كأنك متوقعه
الله يلطف بينا
----------
آمين ياعم محجوب
وليتنا نتعظ من ميتة الفجعة
مشاققة :
كيفنك عساك طيب ؟؟
Powered by vBulletin® Version 4.2.5 Copyright © 2025 vBulletin Solutions, Inc. All rights reserved, TranZ by Almuhajir