حجوات للكبار .... [الأرشيف]

مصطفى هاتريك

23-07-2012, 02:01 AM

حكاية السرة زولة أحمد

أكان معروف في الحله كلها إنو أحمد بريد السره ريده جد , قبل ما يعرسها و بعد
علا !! لكن هي السرة سرة نصاح ؟؟ السره كل الشافها صاح .. السرة صاح , من
فوق لي تحت والله صاح , طول وغلد , لون قمح و وجيها سمح ,, إن جات عليك
ووووب!! و إن قبلت وووبين !!!..... و جنس الكلام ده أياهو كان كلام ناس الحله
جت و كتين يجيبو سيرة (( السرة ))...
وهو أحمد زاااتو هين ؟؟؟ من ما قام معروف شهم , لحاق قريب وبعيد , فااارع
صحابي عديل خلقه و طبع, , ومن قوته كان برفع (( اللستر )) برااااو ,, طلق صحي .
وشان أحمد كان بريد السره جد ما هماهو (( عدم الجنا )) ولا كان عندو بال للسرة
لما تحنسو ,, راضياك عريس لضرتي
: انتي آ السرة بقيتي ما بتريديني و لا شنو ؟؟
: سجم خشمي يا جملي .. ده كلام شنو ؟؟؟؟
: نان بتدوريني أعرس فوقك كيييييف !!!!!
: شان بريدك و دايرالاك الجنا
: والله الجنا بدورو !!! بس شرطا يكون منك
وتبكي ( السره ) تجري عليهو تتنهد و تندس في سدرو , ويمشو سوا على
الدرب البجيبلو جنا إلا القسمه حكامه .

مصطفى هاتريك

23-07-2012, 02:02 AM

(( 2 ))

(( كدايس )) السره معروفات , نضاف و بييييض صوفاتن تقول قطن طبي
, ما أصلو كانت معتنيه بيهن عناية جد ,, لبن تمام , أكل تمام , نضافه جد
حلفت ( خديجه المشاطه ) قالت شافت ( السره ) شايله الضفارة و بتضفر
ليهن .
النصيحه ليك يا الله " السرة معروووفه مرأه نضيفه خلاص , الجداد الببشتن
البيت ده عند ( السره ) نضيف و مهذب ,,, حلفت (( خديجه المشاطه ))
قالت شوف عيني و سمع أضاني الجداد كان بسمع كلام ( السره ) .. خش القفص
يخش ,, ما تخرى في الحوش ما يخرى .. وحات الله _ والكلام لخديجه_ يترص في
قدامها طابور بالصباح و ما فاضل ليهو إلا يقرا نشيد العلم
حنينه والله إنتي يا (( السره ))

مصطفى هاتريك

23-07-2012, 02:03 AM

(( 3 ))

آآآآي والله حنينه كانت السرة وفي شان كدي بكت بكاء شديد خلاص يوم ( أحمد ) كتل جنا ( أبو الرقيع ) .....
: يا أحمد خليهو ,,, يا أحمد خليهو
إلا مركوب أحمد كان أسرع من كواريك السرة
جنا أبو الرقيع البخوف ده ,,, حضنتو السره عليها و قعدت تبكي و توصف .. كر
: أفوو آآآآ السرة الداهي ده قالو شوم !!!
: الشومو منو !؟ تب عليهم ما بفهمو , ده بيرضع زي ابن ادم , تب عليهن تب !!
: السرة هوووووي أبعدي منك الداهي الشوم ده
: وحات الله يا أحمد أكان صاحي كنت رضعتو من شطري ده !!
إنبهت أحمد يعاين مندهش في النهيد التابي لامين عرتو
يا يا السرة ياخ سدرك عجيييب
و .... و ... رجع طفل ....

مصطفى هاتريك

23-07-2012, 02:05 AM

( 4 )
قام أحمد من الفراش مليان عرق و إنبساط و ( السرة ) أيضا مبسوطه جد
, دنقر يفتش للنعال ,, ما إتلخبتو النعلات سوا ,, فردة المركوب يمين و نعال السرة
قاعد بالشمال ,, دنقر لبس نعالو شيتا غريب في ملمسو جوه النعال أحمد يمين إتحسسو ....
: يا السره نيتك لازمتك وفي النعال جوز وطاويط قسمتك
السرة ذادت إنبساط و حضنت عليها الجوز سواا.. أبو الرقيع صغير و فردتو حلااااتن
تيمان بعض
ما تمشو يا الحبان بعيد تقولو انتهت ,, الحجوة يا دوووب إبتدات

مصطفى هاتريك

23-07-2012, 02:08 AM

( 5 )

و مرت الأيام كبرو الخفافيش زي بعض ,

جلد ناعم زي حرير و في نفس الوقت

ملمس مخيف

, و شكل مخيف ,

شيطان عدييييل ,

فارا بطير و كمان خبيث عض

عض جداد السرة جت لامين طفش

وسط اندهاش السرة من حالو القلب
,, يا حليل

زمن الجداد لازم الأدب

مصطفى هاتريك

23-07-2012, 02:09 AM

( 6 )

و إستالد الخفاش ولد
مرات بنات مرات ولد
و أحمد يعاين و يندهش
للسرة ترضع في الولد
يا السرة زحي الداهي شوم
يا السره زحي الداهي شوم
و البيت إتملا
خفاش كتير
رقيع كبير
يا (( السره )) بيتك ضاق عليك
أطردي الملعون وشوم
بالإختصار
أحمد هجً خلى السرة ل هذا اللعين
و السرة لا زالت تفتش في الدرب
صابها العمى و الإنكسار
و نصيبها من البيت صبح
قفص الجداد الهجً فات
و كديستين بيض بدون ضفر
يا السره حالك ما بسر

ريمون

23-07-2012, 09:30 AM

هاترك سلام ٠٠والسره وخفافيشه سلام ٠٠

عباس الدسيس

25-07-2012, 01:32 AM

مصطفى هاتريك

28-07-2012, 12:37 AM

هاترك سلام ٠٠والسره وخفافيشه سلام ٠٠

سلامي (( معقول )) إلا سلام السرة و خفافيشها (( مستحيل ))

مصطفى هاتريك

28-07-2012, 12:40 AM

هاتريك يا وجيه
رمضان كريم
بوست دسم وملفت للنظر من العنوان جوه كلامو حلو مع صعوبة المتابعه في رمضان البوست يجبرك إسوقك وراهو افتكر الانسان المبدع هو من يكتب في رمضان والقاريء المهتم زينا من يقراء في رمضان تابع يا حبيبنا ((إننا لمنصتون)).
مع خالص تقديري

أقول ليك حاجه يا (( الشريف )) ,, مرات كده و إنت بتكتب بتتمنى زول معين يقيف عند كتابتك دي

ملحوظة :

إتمنيتك بيجاي و منتظرك ب (( المنقلة و البرجل ))

مصطفى هاتريك

13-06-2013, 07:34 AM

و أعيد سرد الحكاية علها تفسر الحال

ود سعدابى

14-06-2013, 10:54 AM

و أعيد سرد الحكاية علها تفسر الحال

وانحنا منتظرنك زى هلال تفج الضلمه وتستر الحال

هل من عودة
عميق الود + كلاليق المحبه