المك عمر - مسرحية شعرية قصيرة

[أحمد عباس المحامي]

http://www.youtube.com/watch?v=ed9P65O_Kmg&list=HL1344247643&feature=mh_l olz

المك عمر
مسرحية شعرية قصيرة
بقلم: أحمد عباس المحامي

"أصحاب الشجرة" عقدوا اجتماع ضم بعض قياداتهم، لإيجاد حلول للإحتجاجات، نافع قال:

يا اخواني المعاي عاوزين حلول عملية
للحال الصعيب شرطاً تكون جذرية
الشارع خلاص قام ينشد الحرية
وإن كان غضبو زاد إلا النشوف سفرية

كلّمت الشيوخ وأدوني وعداً قاطع
وبالفتوى الأكيدة يختوا راياً خادع
البمبان حرام والصوم عبادة خاشع
والواعي الحصيف بختاهو طعمو اللازع

بشة قال: "إنتوا عاملين للموضوع ده راس وقعر مالكم؟ شوية الكرور الطلعوا ديل حلهم عندي أنا ده، ودق سدرو، واتنحنح ومسك عصايتو وقال:

أنا المك عمر عندي العذاب ألوان
بلفخ من طرف رجّالة كان نسوان
ربّاطتي بتجوط وتنطط الحيشان
ولي شعب الشواذ السيخة والبمبان

في عهدي انقسم واتعولق السودان
مَلوال والفحل كاذب البقول اخوان
أشعلت الحريق في فاشر السلطان
وآلاف الخلوق اتدفنوا دون اكفان

اللمبي قال:
يا مك المكوك ال لشواذ عفّاص
الدود المربعن وللدِموم مصاص
إياك الرئيس القاتل الرقاص
وللشعب اللئيم الجزمة والرصاص

عمر أخد ليه ضحكة وقال للمبي:

انت الدخري يا أبو ريالة ات بلباص
ريالتك ديمة سايلة وفي العيون عُمّاص
يا يدي اليمين صاحب الوفا واخلاص
حامي حمانا ياك كلب الخلا القنّاص

في الأثناء دي دخل ربيع عبد العاطي على الجماعة وهم قاعدين وطوالي صنقر جنبهم. عمر عاين ليهو بي غيظ وزعل وقال:
لكن يا ربيع سويتا شينة
ضحكت الخلوق بالجد علينا

ربيع بي صوت مكسور قال:
القرّاي فَقُر صابني بغبينة
علماني وفصيح سواها فينا

عمر:
من جنبي غور كجنتو وشك
طير اطلع قوام قبال أرشك

ربيع قام أخد ليهو جكة خفيفة وأدى الجماعة ضهرو، والمسكين اتعتر وقع وهو طالع.

نافع ضحك ضحكة كتامية وقال:

ربيع الديمة حايم بي حدا التلفاز
تملّي عجول يفلّت في كلامو الشاذ
اب راساً مطاول زي سرندل غاز
أريتوا يقابل السيف السنين جزاز

عمر أساساً مغيوظ من نافع بسبب تصريحاته المستفزة للشارع، فرد عليه:

أحسن ليك تسدو خشيمك النبّاز
هيّجت الجموع بكلامك الوخّاز
المؤمن حفيظ للسانو ما لمّاز
يخت مليون حساب لو بيتو كلو قزاز

الشارع طلع وعن قصدو مافي رجوع
مديتو اللسان وعملتَ لحس الكوع
شجرتنا البقت من غير جذور وفروع
حتيتوا اللحى وأضحت ملانة صُدوع

نافع زعل وقام على حيلو وبي صوت عالي قال:
منو القال وشتّم شعبو يا شماسة؟
والناس الكبار سفّهتَ لي شيب راسا

علي عثمان ادخل لفض الاشتباك وقال:
حيّرتوا الفكر أصبح شريد محتار
والمجلس صبح حلبة شكل وشِجار
البرجاكم غشيماً يستجير بالنار
ما خليتوا شي لي عزّو ولا عقار

عمر قال ليهو:
علي طه أسكت انت متلو حمار
الشعب الجعان شبّعتو باستغفار؟
الحال العليهو رميتو في الأقدار
وعشيتو بمواعظ دون لحم وخدار

والأفضل كان تقول قاصدننا الكفار
وأوباما الحقود حاربنا شان ابرار
أخطاءنا البقت بنختا في الدولار
والشعب العنيد بروح مرق وشمار

علي عثمان شال نفس طويل، وميّل على نافع ووسوس ليهو في أضانو وقال:

البسمع بشة يفهم إنو آمر وناهي
يفجِّخ في الكلام والنضمي كلو فُكاهي
قديم قال المثل تحت السواهي دواهي
والواعي بيشوف كرسي الرئاسة الواهي

وانفقعوا الاتنين بالضحك. البشير عاين ليهم وهو وزعلااان ومتلش، لأنو عارفن بقطعوا فيهو، عمر قال:
أنا المك عمر أصحابي دايماً قربي
وفي حوبة الرجال الجيش أكيد بي جنبي
اب زرد الهميم وكتين أداوس حربي
انطق يا صديقي سكتَّ ليه يا اللمبي؟

اللمبي قشّ ريالتو بي شالو وقال:

الفاروق عمر أدوكَ إسمو هدية
حقّاني وعظيم في العدلِ ايدّو قوية
يا دابي الخشش اب لدغةً نارية
نجضت الخلوق سويت مرارة وشية

أوكامبو الخسيس يعملك ألف حساب
ولو بقدر يطول تبقى الثريا قراب
"بنسودا" المريّه التلفح القرقاب
تسويلنا العصيدة السمحة بالويكاب

عمر رد قال:
يا اللمبي العزيز شايفك قفلت الباب
سليت الضنيب وكمان طلعلك ناب
فِ السرج الوهيط حتماً معاي ركّاااب
لاهاي التعيسة يصيبا هم وخراب

كوزاً مطرقع من القاعدين قال:

الشارع طلع لدواسنا كشّر نابو
والبلد الأمين الغرب ناوي خرابو
خلونا النجيب شاذاً يوري عقابو
والفهم العقيم لازمن نعرف أسبابو

وبالفعل في أقل من ساعة جابوا واحد شاذ شذوذ أفقي ورأسي إسمو "محمد أحمد"، نجيّض وما بطاقع، من أسود جامعة الخرطوم. المهم قدموهو للاجتماع على إنو ممثل للمنتفضين.

أول ما دخل محمد أحمد قال:

الويل والعذاب يوم الحساب ألوان
تقتصّ الخلوق حين يوضع الميزان
الدم العزيز في نيالا سال وديان
كتّلتوا الشباب الزاهي زي ريحان

عمر قال:
الشي الحصل في نيالا في كل حتة
والموت حق أكيد يغشى الرويح والجتة
العملوا الخراب واصلاني بيهم لِستة
جايطين البلد في خمسة أو في ستة؟
محمد أحمد رد قال:
حرية التعبير مطلب نبيل مشروع
سودانا انتفض رافض الظلم والجوع
جلادك حلف يشرب دموم ودموع
وللشعب بيذيق سماً زعاف منقوع

إزهاق النفوس في الشرع خطاً أحمر
وبي إسم الإله الظلم أدهى وأخطر
ود جدو وتهاني الشعب ليهم بثأر
ولي نار السعير إن شا الله دربك أخدر

عمر بدأ يتكلم بي نوع من اللين، في محاولة لتهدئة "محمد أحمد" الغاضب، وتبريراً للأحداث الحصلت، وقال:

يا محمد وليدي تراكَ شايف الحال
والحشر اللئيم جفف منابع المال
ود "كير" الحقود الجوّع الأطفال
ما ظنيتو يفهم دون عصا وأغلال

محمد أحمد قال:
مقدار الرجال فِ النضمي والأفعال
والريّس ضروري يقيسا بالمثقال
لاخوانا بتسيئ زي خالك الخبّال؟
أخلاق الجنوبي كريمة في الإجمال

نافع قال:
لي حكم الإله الما بيخضع يؤثم
وإن كان نحن رحنا منو حيقدر يحكم
البلد الحبيب للأمن والخير تعدم
يا ولد الأسود بورانا خايفك تندم

محمد أحمد قال:
سودانا العظيم عمران يمين برجالو
والشعب الجسور حَيفِك جميع أغلالو
سودان العلوم خابر الحرام وحلالو
الدين الحنيف خلوهو مالكم ومالو

عمر قال:
ناقصكم شنو عايشين تبات ونبات
وفرنا العمل في الكارو والركشات
الحاصل حصل واصلو المقدر آت
سيبوهو العناد وأرجع قطاركم فات


والوعد الأكيد بكرة بنزيد الغلة
والركشة القديمة يجيك بدالا كورلا
الراتب يزيد وتكون أموركم فُلة
وإن كان قلتو لا عندي العذاب والذلة

محمد أحمد رد قال:
زي قوم يهود دايماً عهودكم زيف
وبالكضب الكبار مركبنا خاتية القيف
أذّيتوا الخلوق في حاضرة أو في ريف
والموج الدفر ما أظنو تاني يقيف

الكوز الظلوم كل يوم يزيد في تيهو
بالليل والنهار تلقاهو صارّي وشيهو
أبواتنا القبيل القالوا دُر نحكيهو
الأبلم سعيد وشقي البفهِّم فيهو

في وداعة العزيز بس التبلّوا رؤوسكم
والكرسي الكريم طوّلتوا فيهو جلوسكم
جرّعتوا الغبش حنضل وذل بكؤوسكم
الشارع طلع حالف يمين حيدوسكم

محمد أحمد طلع وانضم لي أخوانو في الشارع، وبدأوا يهتفوا:

حرية سلام وعدالة
الثورة خيار الشعبْ
الثورة أنحن رجالا
وشبابنا الزِّند الصُلبْ
العم والخال والخالة
الأم والجد والأبْ
نتحمّل نار اهوالا
ونضوقو رحيقا العذبْ
حرّية وريفة ظلالا
حنطوف ففضاها الرحبْ

أكتوبر أنحن ولادكْ
ذكراك بتشد الحيلْ
في الخاطر مجد آسادكْ
الفجّروا غضب أبريلْ
يا شعب التاريخ زادكْ
لجدودنا الشكر جزيلْ
تركولك سفر امجادكْ
يا القدْرك عالي جليلْ
بالثورة تزيل أصفادكْ
فجر الحرية جميلْ