نصائح مبدئيه للراغبين فى العمل بالسعوديه

[آلاء عبد الرحمن]

لل د. خالد عبدالكريم

عزيزي الطبيب .. هل وصلت مؤخراً للعمل بالسعودية وركبـت الموجـة ؟؟ أم أنك على وشك ؟؟
عموماً اصطحب معك لو تكرمت بعض هذه النصائح التي قد تفيدك يومـاً مـا
!!

أولاً .. عليك التقيد بأنظمة البلد المضيف المعلنة وغير المعلنة .. مثلاً
أوصيك ونفسي بتقوى الله ( ثـم ) عدم التحدث في السيـاسية
... لأنو هنـا في حـاجة اسمها ورى الشمـس
دي حتـة كدا ورى الشمـس جد جد .. والرحلة اليهـا كما الى الآي سي يو بتاعت مستشفى الخـرطـوم ..

one way trip .. 5ally balek !!

ثـانيـاً .. يوصى خبـراء علم النفس بالأكل قبل التوجه الى الهـايبر ماركـت !! ودا ما الموضوع
الموضوع الذي أريد أن أحذركم منه هو كرواسان يدعى السيفن دايز .. في نوع بالفراولة ونوع بالشكولاتة
وهذه ( الشطيرة ) مدعـاة الى السمنة والعياذ بالله .. لأنها ادمان زيها زي السجاير والصعوط في هذا البلد المبارك
!!

ثالثـاً .. مادام فتحنا الموضوع .. في البلد دي عااادي ممكن تزيد اتنين تلاتة كيلـو في اليـوم .. والسبب الرئيس هو محدودية الحركة
فعليك ياهداك الله مراعاة الله في نفسك وبدنك
واعلم علم اليقين انك لمن تبقى على الريجيم , التلاتة كيلو الكنت بتزيدهم في اليوم

الواحد فيهم ماااا حينقص ليك في أقل من شهر
!!!

رابعـاً .. عندما يخاطبك أحدهم بـ الله يهديك أو الله يصلـِـحك ( بكسر اللام وسكون الحاء ) .. ماتفرح وتتكشم وتشبكو الله يبارك فييك الله يخليك
ال بقول ليك الله يهديك لصق ليهو الله يصلحك قبل الجملة ال حـا ترد بيـها
والعكـس
!!

خـامسـاً .. اذا أوقعك حظك للعمل بالعـاصمة الرياض .. وحدثتك نفسك بقطع الشارع راجلاً
نصيحتي هـي .. أنسى الموضوع
لأنو صدقني احتمال تلم فيك هـوندا أكورد طايرة بعكس اتجاه السير والكابتن الطاير بيهـا يكون شافع
أكبر من احتمال انك تقطع بي هنـاك .. وبي طريقتك غايتو أنـا وريتك
!!

سـادسـاً .. اذا ربنا فتحها عليك كدا والامور مشت واشتريت عربيـة :
حذاري من القيـادة بالتقـاليد والارشادات التي تعلمتها في السـودان
يعني حكاية نازل من الكبري وشارعي وشارعك وأنا داخل الصينية وهو جاني بي شمالي والكلام دا تنساه بي هناك قبل ماتقطـع البحـر

والحـاجة الأهم : هنا لو واحد ( كنتك ) ليك دي يعني ماتخش !!
عكس في السودان يعني
لأنو ببساطة لو عربية من هناك كنتكت ليـك وخشيت ثق تمـاماً انك بعد ربع ساعة حاتلقى في اتنين فلبينيات ودكتور مصري واقفين علـى راسك
والفلبينيـات يعاينوا ليك ويسوو في : مسكيييييييييين
!!

سـابعـاً .. بالله ركزوا معـاي في سـابعاً دي :

فـي كائن حي يحوم بيـن النـاس ويمشي في الأسـواق اسمو الونيت
ياهو نفس البوكسي حقنا مع اختلاف المسميـات وال(هابيتس)
اها الـداهي دا بالله تعملوا حسـابكم منو
لأنو بيخش الشارع من بيديك ومن خلفك وعن يمينك وعن شمالك ومن حيث لاتحتسب
وبقيف فجأة أوعى بـالك
!!
واذا كان عملك بالمنطقة الغربية عليك أيضاً أن تتعوذ بالله من أن تغتال من تحتك
فاذا هممت بدخول الشـارع ( يا أهل المنطقة الغربية ) .. أنا شايف انك تنزل من العربية وتغزغز كيعانك عديييل وتتلفت عشان مايجيك واحد طاير
لأنو ازا اتلفت وتاوقت وانت جوة العربية صدقني قبل ماتفكر تخش ولا لأ حاتلقى الونيت وسيدو راكبين جنبـك

و ازا كمان خشيت الشارع وجاك واحد واقع من فوق أها بقى دا قدر
حاتعمـل شنـو يعني ؟؟
!!

ثـامنـاً .. يـا أختي الطبيبة المغتربة حديثـاً
باللهي ازا جاتك مشية مستعجلة كدا الدكـان عليك الله أنسي ليناً حكاية لفحي التوب دي

هنـا الشغلـة عبـايات
!!
تـاسعـاً وأخيـراً .. في كم ( نبزة ) كدا بالفلبيني حاينبزوكم ليها السيسترات
ولا أقول ليكم .. أحسن تعرفوها براكم مع الأيـام
!!
اهو برضو يضحكوا فيـك شوية

!!!!!!!!!!!!!!!!!!!!!!!!!!!
وفقكم الله فيـما ترموا اليه
وأنتم السابقون ونحن اللاحقـون ....... ولو بعـد حيـن