بحسك ديمه في جواي [الأرشيف]

جوليا الشاعر

30-08-2012, 06:09 AM

بحسك ديمه في جواي امل موعود بيوم بكره
فرح ممزوج بعافية خير رضا الوالدين دعاء الصالحين
غمام رويان بعانق الريح
بيهطل في ارض بور
ارض محروتا بالتيراب
لزول رضيان بـ اقسامُ
بسبعة بنات
بدورو السترة فوق الحال
يشيل يدهم امالُ
يسوقن للارض ضحوات
يحجيهم بيوم بكره وكيف البزرة لما تقوم
يحشوها ويرجوها بطولة بال تكون محصول
وخيرو كتير ..
يحصدوها يبعوها يزيد الخير
يكسوهم هدم هدمين نعال واتنين
وتزيد الفرحة جواهم مبسوطين ومتفائلين
ولا شائلين هموم للكون ولا يوم بكرة كيف حـ يكون
(2)

بحسك ديمة في جواي
عطر نفاح بعرفو الكل
عطر صندل بعانق الفاس
يحرقوه يسيب اثرو عبير واريج يردو الروح
بحسك ديمة في جواي
زوق وجمال .. جمال منظر تشوفو العين
وتحلف رمشة ماترمش
جمال لحظة شروق الشمس
بتشرق خطوة بـ خطوة تمدك بشعاعاتا
بحسك ديمة في جواي
لحظة غروب
تكون انت في نص النيل
وفي مركب شراعو كبير
تشيلو الريح مع التيار
تودع في الشمس مبسوط
وتتامل جمال الكون
تذيدا قناعة في جواك
بان الكون دا ربو كبير وما بنساك
تودع هم مع الشمس البتغرب ديك
(3)

بحسك ديمة في جواي
كتاب وقصيد
كلام مليان مزخرف بالدهب موزون
بحسك ديمة في جواي
موهط في قلب فرحان سعيد طربان لانك فيه ولانو معاك
بحسك ديمة في جواي
زوق وجمال ورود وعطور شموع وبخور فرح دفاق
وحس عصفور بنادي جناو
وصوت قمرية في طلحة تغازل في النسيم الجاي
بحسك ديمه في جواي
صوت الريح تداعب في الشجر بود ويتراقص الشجر طربان
بحسك ديمة في جواي
امل باكر بيوم احلى بصوت جواي بحسك فيو
بحسك ديمة في جواي امل موعود بيوم بكرة