حمدتو وكبدة الابل

[ضياء الدين احمد]

بالامس تشرفنا بزيارة الاخ الصديق نبيل حمدتو وبعض الاخوان من مدني على وجبة الغداء فكان نبيل هو الضيف والمضيف في انِ واحد إذ احضر معه كبدة الابل التي لم اتزوقها منذ قدمت الي بلد المهجر والتي تم اعدادها بصورة طيبه
الاهم من ذلك هو انهم حينما حضروا جلبوا معهم كتاب بعنوان ودمدني يسرد اسماء اللاعبين والاداريين اللذين مروا علي تاريخ مدني في خلال المئة عام الاخيره وأخذ الجميع يتناقش عن محتوي الكتاب ومنهم من يقرّظ ومنهم من ينتقد فكان الحديث حلوا وعرجنا ايضا للحديث عن المدرسه الاهليه وكان من ضمن المجموعه الاخوان ( نبيل حمدتو ‘ ايهاب حمتدو‘ معز ‘ محمد الشيخ(باسطه)‘ رياض يونس‘ واخي عبد العظيم الحوت وآخرون هم من احبائنا فكان حقا هو من اجمل الايام التي كسرت حاجز الروتين وازاحت الكثير من رهق الغربه
ونحن في انتظار كبدة ابل اخرى وكتاب جديد ونقاش حلو ياحمدتو الرائع

[خالد هاشم علي]

عليك الله ياضياء الكبدة عملتوها بالدكوة والشطة الخدرا والعتي؟؟؟؟؟؟ ( جهجهتنا وطلعت عيونا).
مافي أحسن من لمة الأصحاب في الغربة وأسأل الله إنو الغربة ماتغير نفوسكم وتخليكم دايما صافيين ونظيفين من جوووه.
بالمناسبة إنت مسافر متين وعرسك متين بالضبط كده.


ودمت.....

[أبوبكرحامد]

ربنا يديم المحبة والتواصل ، وبعدين ياأبوهاشم بالغت فى الوصفة دى :

عليك الله ياضياء الكبدة عملتوها بالدكوة والشطة الخدرا والعتي؟؟؟؟؟؟ ( جهجهتنا وطلعت عيونا).


والله انت ياخالد الجهجهتنا وخليت لسانى إجرى .

[الزمن المريح]

تسلم ضياء الدين و انشاء الله بالهناء ،، و اولاد حمدتو ديل ما ناس الكرم ذاتو ربنا يخليهم

و انشاء الله ربنا يدوم اللقاء

وللكل عاطر التحايا

[HAMADTO]

ضياء الدين
فعلا كان يوم جميل جداً وسعدنا به كثيراً وحتى قبل ساعه كنا نتحدث انا ورياض وعمار عن هذا اليوم وفكرنا فعلا المره الجايه يكون معنا باقي الشباب ناس المصفح وامير حفره واسعد وباقي شباب مدني .....
كان يوم يذكرنا بأيام مدني الجميله ولمة الشباب ... وانشاء الله يتكرر هذا اليوم دائماً .....
وفي هذا اليوم عرفت أن والد ضياء الدين " أحمد وداعه " كان امين مال نادي النيل العظيم ...... الذي يعتبر أول نادي سوداني يشيد داراً للرياضه في السودان عام 1945 (ميدان النيل ) وهو ثاني نادي يتم تاسيسه في مدينة ودمدني 1928م بعد نادي المدينة 1927م واخوه عبدالعظيم الحوت كان لاعب واداري في نادي التضامن الذي تأسس بحي الدرجه سنة 1974 ......
وفي هذا اليوم استمتعنا جدا بالونسه عن مدني وناس مدني واشتغلنا محمد باسطة ورياض لانهم ما مكتوبين في كتاب ودمدني (كرة القدم خلال مائة عام)
رغم انهم كانوا من نجوم ودمدني في كرة القدم

كان بحق يـــــوم لــه إيقـــــــــاع

http://www.asmilies.com/smiliespic/FAWASEL/bloem_15.gif


خالد هاشم
بالمناسبة انت كنت حاضر معنا هذه الجلسة ومعك عدد من اعضاء المنتدى واول مرة اعرف الصداقة البينك وبين ضياء الدين ....
اما بالنسبة لكبدة الابل كانت حاجة عجيبة شطوط ودكوة ومظبطة تمام التمام .. تعرف ألذ ما في الموضوع بتاع الكبدة ده بعد ما ظبطتها الحاجة في البيت خليت منها للحاج وفي الوقت ده جاءه اصحابه الساكنين معنا في العماره وضربوا معاهو كبدة الابل واتكيفوا وقالوا لابوي لازم بكرة الجمعه تجيب لينا كبدة الابل... ابوي من الصباح مشى جابه ليهم واتجمعوا ناس العماره كلهم لكبدة الابل ...

http://www.asmilies.com/smiliespic/FAWASEL/bloem_15.gif

أبوبكر حامد
والله الكبده ده جهجهة ناس العماره كلهم موش خالد بس والله كانت حاجه ما تخلص .. لكن اجمل منها كان لمة الشباب والحديث عن الاصحاب في مدني ..

http://www.asmilies.com/smiliespic/FAWASEL/bloem_15.gif

الزمن المريح
والله اليوم ده كان ناقصك بجد لانه كان في الزمن المريح ... تسلم ياغالي ونتمنى لمتنا تكون بوجود كل ناس المنتدى


http://www.asmilies.com/smiliespic/FAWASEL/bloem_14.gif http://www.asmilies.com/smiliespic/FAWASEL/bloem_14.gif http://www.asmilies.com/smiliespic/FAWASEL/bloem_14.gif

[rasheed]

ضياء وخالد وود المأذون والزمن المريح وحمدتو ،، مرضوتنا مرض ، ورونا محلكم ده وين ،، ولا وقفوا كلامكم ده عشان ما تتعبونا يا ناس وتزيدوا أوجاعنا ،، بالمناسبة بتعرفوا أحسن محل في مدني بظبتوا فيها كبدة الأبل وين ،، يلا الناس العجائز ( ود المأذون وصالح أبو شوارب و114 وعمك تنقو) ورونا حاجة ،، ولا كيف يا أدمنستر .

[أبوبكرحامد]

بالمناسبة بتعرفوا أحسن محل في مدني بظبتوا فيها كبدة الأبل وين ،، يلا الناس العجائز ( ود المأذون وصالح أبو شوارب و114 وعمك تنقو) ورونا حاجة ،، ولا كيف يا أدمنستر .

الرشيد أخوى سلامة النطر ......... ياخوى مالك خاتينى مع مجلس الآباء ده !!!! قال الناس العجايز قال !! وانا الدخلنى شنو وانا يادوبك 20سنة و15 مباراة دولية.

[امير عبدالباقي]

الاخ ضياء
فعلا لعابنا سال الجميل مافي الكبده الجميل في اللمه والونسه مع الناس الحلوه هنيالكم
خالد هاشم انت عاوز تقتل الجماعه ولا شنو ماعارف كبده الابل مابعملو ليها العتي لانو بسمم مع كبده الابل

[ابو المهتــدي]

بسمك الله الرحمن الرحيم
الاخوة الكرام 00ما لنا الا ان نقول لكم بالهناء ةالشفاء 0 لاننا هنا محرومون من تلك 0وايضا ام فتفت خوفا من المالضية 0
مرو اخري نقول لكم تنفعكو 00 ويكفينا نحن الريحة التي تخيلناها مع مودتي للجميع 00
الحبيب ود الماذون صديقا لك (( شيكو حملني لك ارسالة سلام تلفونة ج 0501884024 من السسعودية ضبعا ))

[ضياء الدين احمد]

اولا الشكر الجزيل لكل الاخوان

** والله ياود هاشم كبده مظبوطه جنس ظبطه بس تسمع حس كروم كروم وريحة التوم والدكوه ما تديك الدرب ( ثبت الرياله ماتنزل ههههههههه )
اما العرس حاحدد ليك انشاء الله في رساله خاصه لكن غالبا ما انزل في سته

** زي ماقلت ياود المأذون ودهاشم بكون جهجك بوصفو وهو ذاتو ما حاجه قديمه

** والزول الرائع الزمن المريح زي ماقال ليك حمدتو القعده كانت ناقصاك والله

** حمدتو فعلا اليوم كان جميل ونتمنى ان يتكرر اما بخصوص الوالد فهو فعلا كان امين مال نادي النيل لسنوات طويله اما اخي الحوت فقد كان حارس مرمى نادي التضامن ثم بعد ذلك مدير كره

** يارشيد طعمها لحدي الان في خشمي ومكانا ابو ظبي شارع الدفاع ابقى مارق ساي اما عن سؤالك نحنا اولاد صغار لسه يارشيد كدي شوف ناس ودهاشم وودالمأذون

** يا امير ما تزعل والله لو فاضي بنعزمك الخميس الجاي

** ويا ابو المهتدى والله كنا نتمنى لمة الجميع معنا
وانشاء الله بالجد تنفعنا بعد ماودهاشم ورشيد قزوا عينهم فيها

[خالد هاشم علي]

شوف ياأمير نحن والله حريفين عضة والعتي مابسمم الكبدة ولا حاجة بس إحتمال تكون إنت حنكوش ساي ونحن والحمد لله مافي حاجة بتسممنا إلا سم الفار.
طبعا يابكري أنا أعصابي باظت شديد وبقيت أسأل الشباب في جدة عن مكان كبدة الإبل وأخيراً عرفت محلها وجبتها وختيتها في التلاجة وبيني وبينكم زوجتي حنكوشة شويتين وهي شغالة دكتورة وكانت عايزة تعمل للكبدة تعقيم لو مالحقتها في آخر لحظة وقالت لي ( ده شنو ده ) وشكلوا كده أخوكم حيقوم يظبط الكبد براهو بس لازم اتصل بي حمدتو يوم الجمعة عشان ينجدني بالوصفة ( وإتفضلوا معاي).
ودمتم...

[ضياء الدين احمد]

والله لو عارف في ناس دنيين كده ما كنت كلمتكم
شنو يا ابوهاشم ماتروق المنقه شويه ‘ والله جنس دناوه غايتو
وقلت لي الدكتوره عاوزه تعقمها ؟
اسمع المره الجايه غسلها بالسفن اب عشان بقطع ريحة الزفر ( اخوك ما حريف )

[امير عبدالباقي]

الاخ العزيز خالد هاشم
انشاءالله ماتكون اكلته كبده الابل بالعتي لسه ياحبيب العتي بعملو مع كبده الضان وام فتفت واذا عملته مع كبده الابل صدقني بجيك تسمم ياود حنكوش شنو انا من فريق الحلبه ولاماسمعتبيه
امشي بطريقه ضياء وغسله بالسفن اواحسن بالبيره ماتكون بيره فواكه يعني لاتفاح ولاتوت لانهم طعمهم حلو تكون بيره عاديه وتخليها فيها لمده دقايق بتخليها هشه وماتنسي اهم شي البصل الابيض والشطه الخضرا واليمون والتوم والدكوه واهم شي تقطيع الكبده مايكون كبير وصغير وسط تاني عاوز شنو دي الوصفه ياحبيب

[الزمن المريح]

سلامات يا شباب
و الله اتحفتونا بونسة نفتقدها و تحل محلها الاهات و الانات ،،

امير و الله ود جزاريييييييييييييين و يا خالد هاشم اعمل حسابك من الاتى و اللحوم النية و الدكتورة كان شفتك بتاكل لحمة نية بتعملها سبب و بترجع للمواضيع الفتحتها مع الرميساء ،، و بعدين كبدة الابل الفى الثلاجة دى انساها

[ابراهيم]

بسم الله ماشاء الله

دا ياهو الرباط الاجتماعي

هكذا أهل مدني دوماً جسارة وحبال الوصل والود بينهم

متماسكة ومتألقة

لكن ليه يا استاذ ضياء مع عزمتونا

غياتو بالهنا والشفا وانشاء الله تسمنو


عليك الله ياضياء الكبدة عملتوها بالدكوة والشطة الخدرا والعتي؟؟؟؟؟؟ ( جهجهتنا وطلعت عيونا).

حسي عليك الله يا خالد الجهجه الناس منو؟؟؟


لكم جميعاً التحية والود

[ضياء الدين احمد]

والله يا امير خطير وبتاع قعدات وكلامك مظبوط خلي بالك ودهاشم راحت ليهو الحاجات دي بعد العرس!!!!

**** بنسمن يا ابراهيم بس كان عيونكم دي ما نجهتنا
وكيتا كدي لبتاعين العضه الاسبوع الجاي ياحمدتو ام فتفت وكوارع

[خالد هاشم علي]

طبعاً فريق الحلبة معروووووف وأنا قريت في الاميرية يعني كل يوم بي فريق الحلبة. وعلي العموم أنا ح اعمل بي وصفتكم دي وربنا يستر .
وتعرف يازمن يامريح أوعك تقع ليك في دكتورة لأنها حتورم فشفاشك بالمحظورات وتأكل كده وماتاكل كده. يعني لو هفت ليك تعضي أظافرك ساكت تديك محاضرة في الصحة وإحتمال الأظافر تكون فيها ميكروبات وكده . لكن أخوك متمرد كبير علي القوانين الصحية ويوم الجمعة ح أكل الكبد يعني ح آكل الكبد .( حتي لو أدي ذلك للمجازفة بحياتي ) وطبعا يوم الجمعة المدام حتكون في الإجازة وحتكون نايمة وانا ح اصحي بدري واعذب الكبد وأعضي قبل ماهي تصحي .

[ضياء الدين احمد]

قال متمرد يازمن يامريح والله تلقاهو ضافرنو ضفر والله عجبني ليك ياودهاشم

[HAMADTO]

خالد هاشم يوم الجمعه دخل خلاص .....
نشوفك بتاكل كبده الابل والا الدكتوره لها رأي آخر
نحن في انتظارك تورينا الحصل شنو ...
وابعد من العتي زي ما قال ليك امير ....
بالهنا والشفا ....

[خالد هاشم علي]

حمدتو..
ماقلت ليكم أنا صعب ....
سمعتو ياشباب بالخواجة الجابوهو يعلم ( العوض ) الإنجليزي وفي النهاية العوض بقاهو عربي صر؟؟؟؟؟
أها أنا ظبطت الكبدة وعذبتها وأقنعت الدكتورة ( بعد حب وتحانيس) إنها تغمس معاي في الدكوة والليمون.
والله لو شفتوا منظرها وهي بتعاين لي وأنا بمضغ في الكبدة ( التقول بأكل لي في فار).
المهم إنتصرت للإرادة الرجالية وأكلت الكبدة والحمد لله ( لكن مابضمن تاني إني أنتصر ) إلا امشي بيت العزابة وآكل معاهم.
ملحوظة :
الغالي ضياء مليوووووووون مبروك الترقية وانت أهل لذلك وإلي الأمام مع أمنياتي لك بالتوفيق..



ودمتم..

[ضياء الدين احمد]

اها ياود هاشم اكان ما اكلت الكبده روحك مابردت بس انشاءالله تنفعك
ومشكور علي التهنئه

[امير عبدالباقي]

الاخ ودهاشم
تهانينا لانتصار ارادتك التهامك الكبده ...........هل تصدق يوم الخميس اخوك ظبط الكبده كيلو كبده ابل حاجه ماتخلص وقطعت جزء منها لاستمتع بها يوم الجمعه لكن لم اجدها لقد اكلتها المدام
لكن عاوزين نعرف كيف عملتها هل بنفس الطريقه التي شرحتها لك لان جماعتي الاكلو الكبده كلهم اعجبتهم وقالو حاجه ماتخلص
انت عارف الدكتوره لوبس كان اقنعتها بقطعه واحده لكانت اكلت الصحن كلو بس حاول معاها المره القادمه

[الزمن المريح]

مبرووووووووووووووووك ابو هاشم

و الله تلقاك شغلت شريط الملحمة و وردى السنبلاية و مصطفى سيد احمد حتى اكلت الكبدة

ضياء الدين قريبا سوف اسجل لك زيارة و ياريت ود هاشم تكون ظروفه مناسبة علشان نمتعه من بيت الكلاوى و العتى،،،

[ضياء الدين احمد]

علي الرحب والسعه حبيبنا الزمن المريح بس انت تشرّف

[HAMADTO]

والله يا خالد هاشم رفعت راسنا ....
اها عليك الله كانت كيف موش حاجة ما تخلص ....
زي ما قال ليك امير كان تدي الدكتورة واحده منها كان كل اسبوع تقول ليك جيبه لينا .....

امير قلت لي التصبينه الخليته ليوم الجمعه ما لميت فيها ... والله جماعتك صعبين عديل كده ....

الزمن المريح نحن في انتظارك يا عزيزي بالكبده وحلة الدمعه بتاعت محمد باسطة

[خطاب العبيد]

والله سال لاعبى من ذكر كبدة الابل وبالمناسبة هنا نحنا فى قطر على طول يوم الخميس نظبط الكبدة دى معلم بالشطة والليمون والبصل الابيض ونختها بالصحن الكبير نقشها لمن العرق بتاعنا يجرى ونقوم .

هى حقيقة ممتعة مع غنى من الذين تأذيهم الشطة بس نعمل شنو فى ملأ البطون كل شيء يهون .

شكرا الاخ ضياء وان شاء الله حارسل ليك صورة من الحبيبة ؟؟؟؟

"



"



"


"


"


"


ط


"


"


"
من الحبيبة كبدة الابل , من قطر


الزول الشين

[ضياء الدين احمد]

وانا في انتظار حبيبتك ياود العبيد

[admin]

كيفكم ياشباب ريحتكم توم سااااااااكت
مع اني مولود في فريق الحلبة وجيران ناس ودالرملي(الكبير) الله يرحمه مباشرة وترعرعت بين شموم والتوري وعبداللطيف حلاوة .. لكن اصلوا ما بتذكر اني اكلتا كبدة ابل.. غايتو الا اكون اكلتها وما قالوا لي دي كبدة ابل هههههههه .. السؤال حسه بعد ونستكم المخلوطة بالدكوة والليمون دي .. هي بياكلوها نية ولا شنو؟ ولا بعملوها كيف؟ لانو اخر شئ قالوا امير بيتعلق بمرحلة التنظيف.. وبعدين فرقها شنو من كبدة الضان او البقر؟

[خالد هاشم علي]

أها سألتنا يالآدمن عن كبدة الإبل، طبعا أخوك بقي حريييف وحاجة كبيرة في موضوع الكبد وكده.
كبدة الإبل تؤكل نية وطازجة، يعني ماينفع تقعد فترة طويلة.
أواصل ليك من حيث ما إنتهي أمير...
تقطع البصل الأبيض وتعمل الخلطة ( توم ، فلفل ، دكوة ، ليمون ، شطوط وأحسن تكون شطة خدرة ).
وتمزج الكنته دي كلها مع الكبدة ، يعني هي أقرب لي عمل أم فتفت ( كمان قول لي مابتعرف أم فتفت وما أكلتها ... لو كقلت كده حتفضحنا فضيحة السنين ويقولوا علينا ( آدمنكم حنكوش ، وكفاية علينا حنكشة عزيز عيسي ). الفرق بينها وكبدة البقر والضان هي إنو مذاقها أجمل، وقوية حبتين في المضغ.

ملحوظة هامة:

أوعك من العتي .... ولا شنو ياأمير... عليك الله لقيتني كيف ؟؟؟ ماخطير..

[صالح ابوشوارب]

الاخوان الاعزاء
ضياء / حمدتو / خالد / الزمن المريح / ورشيد / وامير / وابو المهتدى
ابو بكر ( يا مفتري مجلس اباء حتة واحدة لك يوم ياظالم )

لكم التحية والله ذكرتونا اكلة كانت حتوديني في 60 داهية

عندما كنت مريض بالفشل الكلوي ربنا مايوريكم مكروه
-------------------------------------------------------
اولا ارجو اعادة هذه الاكلة لانها ناقصة اهم حاجه

وانتو طلعتو حناكيش ، كبدة الابل عشان تكون 10 من 10

لازم يكون معاها سنكيت وفلفل اسود والخلطة التي ذكرت

من غير العتي كما ذكر الخبير امير ، فارجو الاعادة

فريق الحلبة ليست لها علاقة بكبدة الابل فيكفيها شرفا

الربيت / العفشة / وام فتفت / والممبار / يالطيف علي الممبار

ولذلك الآدمن ما بيعرف كبدة الابل ولكن بيعرف السطر الفوق

والي اللقاء

---------------------
ابو شوارب

[admin]

فعلا يا ابوشوارب السطر الفوق دا انا حافظو حفظ .. والصراحة بحب الربيت اكثر من الممبار .. ولمفتفت عشق خاص .. وكبدة الابل دي من وصف الجماعة ديل ما اظنها احسن من ام فتفت .. وكمان كون انو امير حظر علينا الاتي مع كبدة الابل بتكون فقدت الكثير .. عشان كدا انا الليله بعد نفسي دي مانفتحت بمشي افتش ليك ام فتفت كاربة كدا وجنا تعرفوا احسن من الى ماتعرفوش

[HAMADTO]

تعرف يا ريس لو ما اكلت كبدة الابل نص عمرك ضايع .......
عشان كده مفروض ابوهاشم او امير يوم يظبطوها تمام ويعزموك عليها ....
وبعد كده ورينا رأيك كبدة الأبل والا ام فتفت .....

[ضياء الدين احمد]

هوي يا ابوشوارب وادمين خليكم في كبدة الابل دي وخلو الممبار والربيت والعمر ماشي والله الربيت ده الحقكم الزينين الفاتو يعني من الصحن للمقابر هههههههههههههههههههههه الكلام ده خلوه للاولاد الصغار زينا نحنا وناس مزوني وابوبكر حامد وخالد هاشم عشان مايزعل

[امير عبدالباقي]

الاخ admin
بس معقوله مااكلت كبده ابل مااعتقد اصلو ماقعدته يوم مع حبوبتك وجدك عباس الله يرحمهم 100% بتكون اكلته
لكن ياشباب كبده الابل اجمل من امفتفت مليون مره انا باكله لكن بحبز الكبده يابوي الكبده دي لماتظبط صاح ومعاها البصل الابيض زي ماقال خطاب العبيد وجميع انواع الشطوط بمختلف الالوان (جريتو لعابنا ياجماعه يعني شنو اقوم اجيب الكبده ولاشنو)
لكن admin الربيت برضو حاجه حلوه بس يكون ناشف وتسمع كروم كروم دي في خشمك متعه وبعدين رايكم شنو في العكاوي ولا برضو مابتعرفوها ياحناكيش
ودهاشم الدكتوره لسه ماضوقتها الكبده والله حقو تجونا زياره عشان مدامنا تعلمه ليك

[خالد هاشم علي]

والله ياأمير كنت جاييك في الطائف عشان أحضر السماية لكن الآدمن دقسني وقال السماية يوم الثلاثاء.
لكن بعد ما حرمكم تقوم بالسلامة حنسجل ليكم زيارة أنا والدكتورة عشان تأخد كورس في العفشة والذي منه ، بس خوفي إنها تعلم زوجتك الحنكشة وتاني زوجتك تحلف ماتعمل ليك ( لغاويس زي دي ).
وزي ماقلت كبدة الإبل لو كانت مكربة فهي أجمل من أم فتفت ، ولازم نعزم أبو بكر عشان يجرب ولا رايك شنو ؟؟؟؟

بعدين ضياء الدين ده قايل نفسه صغير ، عليكم الله عاينو لي كضومو دي ، في ذمتكم دي كضوم زول صغير.

[عزيز عيسى]

بسم الله ما شاء الله.. أنا شايف كبدة الابل اشتغلت شغل شديد..
والله يجازيك يا نبيل اللى طلقت الشرارة وخليت الناس كلها لعابها يسيل..
أنا من طبعى ما باكل لحوم نية وما جربت كبدة الابل قبل كده.. وبيني وبينكم ما عايز اجربها!!
ويا خالد انا وأبو بكر احسن لينا نكون حناكيش وما ناكل كبدة الابل بتاعتكم الكلها شطه دى..
ويا صالح ابوشوارب - حمد الله على السلامة بس اوعك تاكل كبده ابل ثاني..
وياشباب جده.. انتو بتجيبوا كبدة الابل دي من وين؟
أنا بعرف لي محل في جده قريب من باب مكة ومش بعيد من مقابر امنا حواء..
دايما تلقى فيه كبدة الابل طازه..
مش كبدة الابل وبس.. المكان ده فيه مجموعة من الجزارات ومحلات الخضار
يعني لو عايز ليك لحمة وخضار طازه بس امشوا المحل ده.. حيعجبكم كثير..
لما كنت زمان عايش في جده كنت بمشي مع جماعة اصحابي
من اولاد مدني.. بعد ما نصلي صلاة الصبح خاصة يوم الجمعة
ونخرج من المسجد الجماعة عاملنها برنامج.. يقولوا ايه رايكم نروح باب مكة نجيب كبدة الابل..
اثنين من الاخوان واحد اسمه عباس الهادي والثاني اسمه محمد رحمة الله ملقب بالنعير..
الجماعة ديل بيظبطوا الكبدة بطريقة فنانه جدا.. الظاهر عاجباهم شديد.. وممكن يقضوا اطول وقت علشان يطلعوا كبدة ابل مدنكله تمام..
وطريقة السودانين في كبدة الابل تكاد تكون واحده.. طبعا الدكوة والليمون والثوم والبصل
اهم حاجة في العملية الجراحية - حاسبوا لعابكم ما يسيل - وبعد داك تعال شوف ليك جنس قرقشه..
الجماعة يقرقشوا في الكبده ويكاوا فيني لانهم عارفني ما باكلها.. بس عايزين يمغصوني..
أنا المغصه كاتلاني ولعابي بسيل من ريحة الليمون والثوم والبصل مع الدكوة..

أها يا شباب انتو انشاء الله نظمتوا ليكم برنامج ومواصلين في قعدة كبدة الابل..
وزودوا الحكاية شوية كمان اعملوا ام فتفت.. وبدل ما تشتغلوا جبجبه براكم في كبدة الابل
بس علشان خاطر الناس اللى ما بتاكل كبدة الابل اعملوا لينا كمونية وكبده وكلاوي محمره (طبعا خروف)
علشان نمزمز معاكم.. وبعدين كده تكونوا حافظتوا على شعورنا..
وطبعا اهم شيء في الحكاية انكم تلتقوا وتقضوا وقت جميل في الونسة والضحك.. وتعيدوا الذكريات..
وصدقوني مافيش احلى من كده.. وأنا لو كنت لازال اعيش في جده.. والله كنت اجيبها
ليكم كل اسبوع تظبطوها براكم بس عشان المكم.. لاني بصراحة بحب لمة الاخوان..
وربنا يجمعكم كلكم على حب وموده.

وتسلموا،

عزيز

[سحابة صيف]

اخونا / ضياء .... تحياتي لك ولكل المجموعة في عزومة كبدة الأبل ( طبعاً انا ما عندي معاها علاقة خالص .. لدرجة الخوف منها)..... بس كان معاك في القعدة شخص بنفتش عليهو .. والحمدلله لقينا ليهو درب ... (امير حفرة) .. بالله .. تحياتي الحارة .. ومن (زنقو ، ودانقوريا ، وود الخليفه .... مع رجاء المراسله.. وبالجد فاقدينك ............







كل الود

[rasheed]

أولاً تحياتي للعزيز (سحابة صيف) وقد سعدت حقيقي بالإتصال وإن شاء الله نواصل حتى يتلم الشمل من جديد ،، وبعدين يا حاتم متفقين الجماعة أولاد مدني ماعندنا أسماء مستعارة عشان كده أظهر وبان وعليك الأمان ،، وطبعاً يا أخوان أنا قائل موضوع الكبدة ده إنتهى طول عشان كده ما مريت على البوست تاني لكن لقيت الموضوع سخن وظهر فيه أنو الآدمن حنكوش من فريق الحلبة يا لهوووووووووي !!!!!! وظهر أنو في ناس بياكلوا بالدس من وراء وزارة الداخلية وناس ظهرت بمعالجات جديدة لظبط الكبدة وكدة وعزومات والله ياجماعة حيرتونا في كبدتكم البقت حجوة أم ضبيبينا اللي ليها شهرين ما أنتهت وفعلاً مراعاة للعزيز عزيز عيسى مفروض الناس تشوف أم فتفت والعكاوي والحاجات التانية دي عشان الفائدة تعم وخاصة أنو نحنا عزابة الأيام دي وعندي حبة نفس ممكن ندوح بيه من الظبطة الكانت حاصلة ولا كيف يا ود هاشم كدة جرب العزوبية شهرين كده ،، وتحياتي الرشيد ركس ،، مع ملاحظة أنو الفلفل الأسود للكبدة مفروض يكون دراش شوية يعني ما مطحون بالخلاطة يا حناكيش ،،،

[ضياء الدين احمد]

شكرا يا اخونا سحابة صيف وانشاءالله نبلغ تحياتك والاخوان للاخ حفره

قلت لي الفلفل دراش يارشيد والله انت بتاع قعدات

[rasheed]

بس بقت على الفلفل الدراش يا ضياء الدين ؟؟؟؟ ما في ناس قاعدة تعمل وصفات وبالسفن اب وغيرو !!!!!! برضو تقول لي أن بتاع كده ، الله يا يسامحك ، وكان في وصفة تانية لكن ما بقولها ليك أحسن تتطلعني في الحكومة كمان ومن الــ 51 المطلوبين 00 هاهاهاهاهاه مع تحياتي لكل الحبايب المعاكم ،، الرشيد ركس ،،
سؤال الــ 51 ديل ما تموهم 52 ليه ؟؟ يعني كان مع ناس العراق المطلوبين عملنا منهم جوز للحريق ،، والسؤال محول لناس الأحاجي والغلوطيات ،، ناس أبو شوارب والسفير وماي ريلان والعقد الفريد ؟؟؟ بالله حلوه وأدوني الجائزة ،،

[ضياء الدين احمد]

هههههههههه
والله بهزر بس يارشيد بعدين القعدات خشم بيوت انت متحسس مالك

[الجندي المجهول]

بالامس تشرفنا بزيارة الاخ الصديق نبيل حمدتو وبعض الاخوان من مدني على وجبة الغداء فكان نبيل هو الضيف والمضيف في انِ واحد إذ احضر معه كبدة الابل التي لم اتزوقها منذ قدمت الي بلد المهجر والتي تم اعدادها بصورة طيبه
الاهم من ذلك هو انهم حينما حضروا جلبوا معهم كتاب بعنوان ودمدني يسرد اسماء اللاعبين والاداريين اللذين مروا علي تاريخ مدني في خلال المئة عام الاخيره وأخذ الجميع يتناقش عن محتوي الكتاب ومنهم من يقرّظ ومنهم من ينتقد فكان الحديث حلوا وعرجنا ايضا للحديث عن المدرسه الاهليه وكان من ضمن المجموعه الاخوان ( نبيل حمدتو ‘ ايهاب حمتدو‘ معز ‘ محمد الشيخ(باسطه)‘ رياض يونس‘ واخي عبد العظيم الحوت وآخرون هم من احبائنا فكان حقا هو من اجمل الايام التي كسرت حاجز الروتين وازاحت الكثير من رهق الغربه
ونحن في انتظار كبدة ابل اخرى وكتاب جديد ونقاش حلو ياحمدتو الرائع

والان ضياء بالمملكة العربية السعودية بجدة ،،،
وباذن الله ماشين نجيب (كبدة ابل) وكل الاخوان معزومين معانا (بدون فرز)

فوووووووووووق

[ريمون]

غايتو بوست رهييييب ..
لو ما كان داخل علي الناس عيد الضحية كان تبقي عوجه ..
نحن طبعا ناس الحاجات دي ما معانا ..
لكن مستمتعين بي متعتكم ..

[abomazeen]

شووووف ياضياء الدين ... بعد ما انكشفت على حقيقتـك
ما بنرضى بأي حاجة إلاّ تعزمنا على كبدة ابل بالطريقة
الصاااح وشطوط وبصل وتوم وليمون للليفة
وما تعمل لي حجة زمن مافي وقت مافي
والزمة على الجندي والمميز ده
معتز الريح والباقين على أنا
وما تنسى حلة الدمعة
الكااااااااربة ديك
بتاعت أبوظبي
ولاّ بفضحك
ده تهديـــد
عددديل
سلام

[روبش]

اقول ::: يجازي محنكم جميعا في داعي للجهجه ده .. عسع ده يفكوها كيف
اقول :: اهم حاجة فيها يكون جنبك (مناديل ورق) اسف اسف (حاره اشيلها مش)

[روبش]

يا نبيل حمدتو في امكانية ترسلها عبر dhl

[ضياء الدين احمد]

الاعزاء جدا الجندي المجهول طلع ليهو بوست عمرو ستة سنه لكن مافي مشكلة العزومة عندي انشاء الله ياريمون وربش ويا ابومازن مافي داعي للتهديد اخوك بكربها ليك وبالشطة اها في كلام

[ابوالنور]

بالمناسبة دي يا ود هاشم اخوي اها وديت الحنة

[ضياء الدين احمد]

حنة شنو ياود النور؟؟؟؟؟؟

[Isam Hussien H]

يا سلام على هذه الكوكبة التي لمتها كبدة إبل في بيت الوالد المرحوم أحمد وداعة وبحضور عبدالعظيم الحوت .. والله تمنيت دخول كل واحد من الأخوان فكلهم لهم معزة خاصة ..

[ضياء الدين احمد]

تسلم حبيبنا واخونا الاستاذ عصام حسين بس جيب معاك الدكوة