عصمت البنفسجي

[ضياء الدين احمد]

في منتصف الثمانينات أطلّ علينا شاب وسيم أنيق يغني باحساس جميل ومرهف ‘ يغني غناء الشخص الهاوي وهو غناء من أجل الطرب الأصيل والمتعه لنفسه اولا ثم ينثرها لمن حوله اريجا يعبق به المكان وصوتا عذبا يشنّف به آذان المستمعين لشدوه الحلو ‘ لاننسى ونحن في تلك الفتره نتأرجح في الطاشرات من العمر نبحث عن الحفلات التي سوف يحيها وقد كنا نهيم عشقا ووجدا حينما يتغنى بأغنية ( مرضان باكي فاقد ) التي كان يؤديها بذلك الصوت الأبح الصوت المرتوي بالدفء والحزن معا الصوت الرزين المهذب الا وهو الفنان الانيق الطلعه والمهندم الفنان (أمير يونس) الذي كان في تلك الفتره رقم لايمكن تجاوزه ابدا والذي ظل لفترة في وجداننا القا وضياء يبهرنا عندما يغني ويأخذنا الي أمكنه جميله نتخيل فيها حبيباتنا حبيبات المراهقه في تلك الفتره فنتخيل ونتصنع الحزن والجروح وانكسار الخاطر ‘ ولكن للاسف الشديد لم نستمتع به طويلا اذ اصبح من الطيور المهاجره شأنه شأن الكثيرين من ابناء ومبدعي بلادي فهل ياترى سيعود مجددا الي وكره المهجور حتى نباهي به الاجيال التي تلينا ونقول لهم هذا هو برهاننا في تلكم الفتره فآتوا برهانكم .
هذا هو اقل مايمكن ان اكتبه عن الاستاذ امير يونس وهنالك شئ آخر دعاني لكتابة هذا الموضوع وهو عدم معرفة الاجيال الجديده عن بعض الفنانين في تلك الفترة واذكر انني وفي جلسة مع بعض ابناء ( الفريق) وغالبيتهم اصغر منا في السن بما يقارب السبع سنوات وتطرقنا لموضوعات عن الفن والفناين في مدني وسألتهم عن امير يونس فلم يعرفوه وسالتهم عن الحردلو فأنكروه ثم سالتهم عن عادل القوس فلم يسمعوا به من ذي قبل ثم اخيرا سالتهم عن عصمت اللبني فقال احدهم ( بس خلاص قرض لحدي هنا انت بديت تنجر من راسك اللبني وبعد شويه تقول لينا البنفسجي )
لذا كان لابد ان نكتب عنهم ونوثق لهم وهي مسؤليه عليكم كلكم فأي واحد عندو معرفه باي واحد من الفنانين بمختلف فنهم اكتب عنه حتى نعكس للاجيال الجديده بعض من ملامح الفن في تلك الفتره ( وودهاشم مابقصر )
ودمتم

[امير عبدالباقي]

الاخ ضياء
لك الف تحيه وانت تذكر هولاء الفنانين ولكن للاسف لم استمع الي اي واحد منهم
ولكن سمعت عنهم فقط من عمنا الحردلو وهو معي في مدينه الطائف ولقد حكي لي كثيرا عن تلك الفتره وعن تاريخ ود مدني الفني
وهل تعلم اخي ان معظم اغاني محمد منير الفنان المصري النوبي يتغني بمعظم اغاني الحردلو والحانه مع بعض الاضافات التي ادخلها عليها
ولقد قمنا بتسجيل بعض اغاني الحردلو في كاست في يوم الخميس الفات لقد كانت جلسه جميله وكانت تلك اول يوم اسمع فيها الحردلو في حياتي فعلا مدني فقدت الكثير من الفنانين العمالقه انه صاحب صوت حنون وقوي
وللمعلوميه الحردلو شاعر وملحن لبعض الفنانين العمالقه
لك مني كل الود

[امير عبدالباقي]

الاخ ضياء
وانا بعد ماكتب رد للموضوعك بدقائق زارني الفنان الحردلو واخبرته عن مقالك ولكن تاثر كثير بالماضي واخبرني بان الفنان عصمت البني توفي قبل خمسه سنوات رحمه الله
وان الفنان عادل القوس ومحمد سلام في ليبيا وامير يونس بدوله الامارات
واخبرني بان الرشيد كسلا هو فنان ايضا من مدني وايضا من دفعتهم الفنان عثمان ازيرق والفنان الاستاذ عصام كباشي ومحمود ابو الكيلك والفنان محمد حمامه وعباس جزيزه وهو الان رئس اتحاد الفنانين بمدني
ووعدني بلقاء مطول عن زكريات مدني وايام الفن الجميله
تصدق في اسامي منهم اول مره اسمع بيها

[الزمن المريح]

تحياتى لك اخى ضياء الدين اولا الظاهر انك من القسم الاول و لى غلطان ،،
طباع فى مدنى كان اكتشاف الفنانين من الاشياء المسلم بها و كان مجموعة كبيرة من الواعدين و المبتدئين ،، و اضافة الى كم هائل من الناس الفى اللفة اعنى الجماعة العاملين فيها مغنيين و تلقاهم فى بعض حفلات الاعراس و ان كان بعضهم مبدع ،،
من الفانين الذين ظهرو واختفو فى مدنى ايضاً ابو زعبل ( ود ناس النو ، اخ قلة ) و ايضا محمد سلام ،، و ضياء الدين ود الحربياب ،، و فيصل الله يرحمه و يغفر له .
من الاشياء الطريفة ،، فى احد المغنيين كان يحييى حفلة عرس فى الدباغة ،، و كان الصوت نشاذ و فى الفاصل دخل بيت العرس علشان يشرب موية ( والله موية بس ) و طبعاً الناس كلها خارج البيت و بعد ما شرب جلس على عنقريب جنب حيطة و كان فيه اطفال نائمين و جمبهم حبوبتنا ،، اها الحاجة كانت مغبونة من الفنان و بكل صراحة قالت له الرسول فوقك يا ولدى عليك الله دا فنان يجيبوه يساهر بينا ،، فقال ليها و الله يا حاجة انا اسسع دى امش افرتق ليك الحفلة ،، وقد كان

[ضياء الدين احمد]

مشكور اخي امير وتحياتي للفنان الحردلو وقد امتعونا كثيرا
وحزني الشديد لوفاة الفنان عصمت ولاول مره اسمع خبر الوفاة ربنا ارحمو
ويا اخي امير مدام معاك الحردلو حقو تحاول تقعد معاهو وتكتب زكرياتو
وانا بدوري احاول ان التقي بالفناين امير يونس والرشيد كسلا والحمد لله اخوانهم الاتنين اصدقائنا رياض يونس وحسن كسلا وهم متواجدين معنا

[ضياء الدين احمد]

الاخ الحبوب الزمن المريح والله كلامك لذيذ ومريح
طبعا ابوزعبل انا ما سمعتو بصراحه لكن محمد سلام سمعتو وبالذات اغنية ( والله قام اتعزز الليمون)
وقلت لي الفنان كان عايز اشرب مويه بقي ليهو في فرتيق حفله ههههههههههه

[عزيز عيسى]

الاخ ضياء

تحياتي،

الفنانين اللى ذكرهم الاخ أمير حضرت حفلات لمعظمهم في مدني مثل محمود أبوالكيلك والرشيد كسلا وأبوزعبل ومحمد سلام والفنان عصام كباشي حيث تربطني به معرفة شخصية، والله كلهم فنانين مبدعين ويتمتعون بأصوات جميلة جدا ولكن نسبة لطول غيابي عن السودان لا أعرف أين هم الآن وهل لازالوا موجودين في مدني أم هاجروا.
بالاضافة الى الفنانين الذين ذكروا أحب أن أضف أيضا فناني الحقييبة، فكان هناك الثنائي توفيق ومرسال، ديل كانوا بيتمتعوا بأصوات جميلة ودافئة وأغاني حقيبة يتراقص معاها كل من حضر الحفلة وأنا شخصيا ما كنت بفوت ليهم حفلة أبدا، الفترة طالت لكن والله ما عارف الجماعه ديل اختفوا وين.

لكم منى كل الود.

عزيز

[خالد هاشم علي]

تسلم ياضياء وأنت تعيدنا للزمن المريح....
الفنان امير يونس واغنيته المشهورة ( حقيبة ) مرضان باكي فاقد، كانت لنا سلوي وكنا نطلبها منه في كل حفلة.
الفنان أبو زعبل ياشباب هو الذي تغني في الحفل الذي أقيم بمناسبة صعود نادي الإتحاد للمتاز وتغني برائعة الكاشف( حياتي ومعاها العطف النبيل بإسم الحب أقدم ليك حياتي ).
الفنان الحردلو وكما ذكر الاخ أمير متواجد بالطائف وقد حضرت له فاصل بحفل بجدة ورجعنا للأيام الحلوة.
لا ننسي الرائع فتاح السقيد صاحب أغية الشعار ( مدني ياأجمل خبر) وكذلك أخوه المبدع ( الأستاذ علي السقيد).
كما لا ننسي الرائع عبد العظيم مازدا ، والرائع عادل هارون ، وعلمت أن الفنان محمد حمامة رجع لمدني وإستقر بها.
ياجماعة الفنانين والحركة الفنية في مدني عايزة واحد يؤرخ ليها لانها وفي كل الفترات كانت زاخرة بالمبدعين.
كما لا يفوتني ان أذكر المبدع الرشيد كسلا وللذين لا يعرفونه فهو صاحب الرائعة ( لما تبقي بعيدة عني شن بدور أنا بعدك إنت ) وهي تبدأ بالرمية المشهورة ( لا يلاقينا لا نلاقيهو لا نتلاقي لا نتلم ).
وهو أيضاً صاحب الرائعة ( فرقتنا الدنيا صدفة زي ماإتلاقينا أول. وناس بتمشي سنين طويلة وناس بدون ماتمشي توصل ) بالله عليكم الله شوفوا الكلام الرهيب ده.
كما لا يفوتني الفنان المبدع ( د / عبد الإله) ولو سمعتو د / عبد الإله بغني في أغنية بخاف أسأل عليك الناس ( تبكو بس).
وبالمناسبة ياضياء وبمناسبة إنك قلت إنو حسن كسلا معاكم في الأمارات فأنا عندي شمار حااااااااار داير احكيهو للشباب في المنتدي وياريت تكلم حسن كسلا بالموضوع ده وتقول ليهو خالد هاشم حكي لينا بي حكايتك.
طبعأ ياشباب حسن كسلا أخو الرشيد وبكري وهم كلهم فنانين ، فبكري من كبار عازفي الكمان بمدني وحسن يعزف علي الأورغ والأكورديون.
المهم في الموضوع الايام ديك مدني جايطة وناس الإلزامية ماخلوا زول ماساقوهو. يعني قبض من طرف وكشات صاح. ومرة كان كل الشباب موجودين بنادي الفنانين وآخر ضحك وقرقرابة وفجأة لوري الإلزامية وقف ليك قدام النادي وهجمو علي الشباب. طبعا الجماعة فكو البيرك وجري صاح . وطبعا حسن شتت مع الجماعة وبالمناسبة حسن بستعمل نظارة نظر. فحسن نط من الحيطه ومعاهو العازف ( شريف القصير ) وجروا بي شارع المحطة ولمن وصلوا مركز الشباب وقفوا ياخدوا شوية نفس. فقام حسن بتكلم مع شريف ( الجماعة الحاقدين ديل الجابهم شنو الليلة، تلقي في واحد بلغ عننا) وهو في عز إنفعاله شريف لاحظ إنو نظارته بدون عدسات ( وقعت مع الجري) فقال ليهو : ياحسن عدساتك وين؟؟؟
حسن طلع نظارتو لقاها فريم بدون عدسات فقال لشريف : والله ياشريف الحكمة إني شايف جنس شوف.


ونلتقي.

[ضياء الدين احمد]

اولا مشكووووووور يا اعز عزيز
وطبعا الاستاذ عصام كباشي درسنا في الثانوي العالي وهو ابن الشاعر المعروف كباشي حسونه من دار ام بلال
ويا سلام ياعزيز علي ايام مدني وبهجاتها الزمان
انشاء الله ربنا ارد غربتنا ونلقي مدني احسن من اول

[ضياء الدين احمد]

ما اكضب عليك ياودهاشم د / عبد الاله ده اول مره اسمع بيهو

******** لكن لقيت شمارك حاااااااااااااااااار ده شمار بالنت والليله اول حاجه بعملها بتصل عليهو ههههههههههههه لكن احلى شئ اتخيلت منظر شريف وهو جاري

[عزيز عيسى]

الاخ ضياء

كما ذكرت لك بأنني أعرف الاستاذ الفنان عصام كباشي ووالده الشاعر المبدع كباشي حسونه الذي كان يمد الفنانين بأشعاره وخاصة الفنان زيدان ابراهيم. أنا والاخ الاستاذ عصام كباشي نشأنا معا في منطقة مارنجان وبجانب اجادته للعزف على العود والغناء كان ايضا حريف كوره حيث كنا نلعب التمارين مع بعض في ميدان واحد. الا أن الزمان شتتنا ولا أدري أين هو الأن..

الاخ خالد

النكتة اللى حكيتها عن الاخ شريف والنظاره مع ناس الالزامية كانت جميلة جدا جدا بمعنى الكلمة والله خلتني اضحك ضحك زمن ماضحكت زيه لمان دموعي جرن وما عارف ليه مانزلتها في باب النكات وأنا بديك عليها عشره من عشره. معاى خواجات في المكتب لما سمعوني بضحك افتكروني جنيت. سأحاول أفهمهم النكتة. والله ذكرتني بأيام مدني زمان. اتحفونا كمان وكمان وخلونا نضحك وننسى كل شيء.

دمتم وربنا يخليكم لينا.

عزيز

[الزمن المريح]

لك التحية استاذ ضياء
و اسمح لى ان احى الاخ خالد هاشم من خلال هذا البوست

رايع و الله يا خالد و الرغم اننى لا اعرف الاستاذ حسن لكن سالت دموعى من الضحك و لذة الموقف ،، الله يصرف الكواجات الله يصرف الكواجات ،،

و بالمناسبة عائلة السقيد كلها فنانين و اعتقد يا خالد انك نسيت الاستاذالخير السقيد

التحية موصولة للجميع من القلب الى القلب مع الامانى الطيبة

[خالد هاشم علي]

تسلموا ياشباب...
ياضياء د / عبد الغله هو طبيب بيطري وساكن بداية الحلة أو المزاد وهو فنان بتاع مزاجات ( ماعدادات ) يعني بغني بي مزاجو وهو متواجد بالسعودية لكن طبعاً الغربة بتودر المزاج.
تسلم ياعزيز ومشكور علي ذوقك ، واللذيذ في الموضوع ياعزيز إنو حسن وهو بتكلم مع شريف كان بيصلح في النظارة ويعدل فيها والحركة دي عنده عادة لمن يكون بتكلم تلقاهو بصلح في النظارة.
مشكووووووور يازمن يامريح والاستاذ الخير السقيد علم كبير وله إسهامات خاصة في الدورات المدرسية .
كمان ياجماعة لو سمعتوا كمال مطر ( صاحب بقالة مطر بالدرجة ) لو سمعتوهو بغني لي وردي يالطيييييييييييف.
وكمان ماننسي حيدر الرفاعي ( صاحب الكوافير المشهور ) وخليك جاهز ياضياء لانك حتمشي عنده وتدفع دم قلبك يوم العرس ( يلمها النمل ويطاها الفيل ).
تكونت فرقة جميلة جدا

[ضياء الدين احمد]

مشكور للمره التانيه اخي عزيز واكيد عصام كباشي ح يكون خارج السودان
ويا سلام ياعزيز علي مارنجان وناس مارنجان وهو من اكثر الاحياء التي احبها واداوم علي زيارتها فلي فيها اصدقاء كثر ويا سلام علي الموقف وكباية شاي هناك بالدنيا
وصدق اللقال مارنجان السودان ‘ كفر ووتر ‘ وتسعه لغات والعاشره ابتسامه
ودمت يا عزيز

[ضياء الدين احمد]

ومشكور يازمن علي المداخله والمعلومه وتسلم


*** وياود هاشم عبد الاله بعرفو كويس بس حكاية دكتور دي لخمتني لانو حسب علمي انو خريج زراعه جامعة الخرطوم وكيف لا نذكر عبد الاله وبالذات بعد اغني الذكريات صادقه وجميله

[أبوبكرحامد]

تشكر ياضياء على موضوعاتك التى تهدهد الروح وتحملنا بجناحٍ أغر لربوع مدنى وذكرياتها .على ذكر أمير يونس أذكر حينما يتغنى بأغنية " لحظك الجراح " ياسلااام ياضياء لم تكن الدنيا تسعنا طرباً وتهياماً .
وعلى ذكر المطربين هنالك محمد الهادى وهو صاحب تطريب عالى وصوت قوى ، وهنالك أيضاً مطرب من الحلة الجديدة هو مدنى ، وهنالك عبد الله ود الحسن الذى يحترف تصنيع الأدوات من الصفيح كالأباريق ، ويحكى أنه ذات ليلةٍ وهو يعتلى خشبة المسرح فى أحد الأعراس باغتته امرأة متسائلة " وين الشرقرق بتاعى ياود الحسن " فرد عليها قائلاً " ده وكت شرقرق ياحاجة "
ولى عودة لموضوع حسن كسلا الذى تربطنى به وبشقيقه بكرى صداقة قديمة بحكم علاقة الزمالة الدراسية التى جمعتنى بإبن خالهم زكى صديق مساعد ، فأرجو أن تبلغه تحياتى .

[عزيز عيسى]

الاخ ابوبكر

حلوه جدا بتاعة الشرقرق دى.

وفي بركات كان هنالك الاستاذ الفنان والشاعر المرحوم حسن الباشا شقيق الاستاذ صلاح الباشا ، الذي كان له صوتا رقيقا رائعا شبيها بالفنان صلاح ابن البادية ويتغنى بأغانيه.

ومن الطرائف الظريفة في منطقة مارنجان كان هنالك الاخ عبدالجليل الملقب بـ "الدب" لم يكن بفنان ولكنه كان مجتهد. أذكر انه تخلف الفنان عن الحفلة لظروف لايعلمها أهل الفرح وقام أخينا عبدالجليل وقال ليهم مايهمكم أنا بغني ليكم. و وقف أمام المايكرفون وكان وراه الكورس وابتدأ يغني في اغنية –

رشقتني عيونه
وبقيت مجنونه
من أول نظره

والكورس وراه بيردد في الاغنية. بعد شويه عبدالجليل نسى باقي الاغنية وشبك ليك الجماعه:

ورشقت، ورشقت، ورشقت، ورشقت، ورشقت، ورشقت

وطبعا الكورس برضو كان بيردد وراه وكل واحد بعاين للتاني مستغربين افتكروا الاغنية فيها تجديد:

وفي اثناء ما الجماعه بيرددوا في رشقت، ورشقـت ظهر الاخ حسن خيرالله لاعب نادي الاتحاد الاسبق وقام قال ألحقوا يا جماعه الاسطوانه علقت.

عزيز

[ضياء الدين احمد]

تسلم كتير يا ود المأذون وفعلا الاستاذ محمد الهادي وعبد الله الحسن الشهير بالسمكري ( اللبن ابو لي بي) وايضا لا ننسي الفنان محمد بخيت قبل ان يتحول الي بوق

ومشكور ايضا عزيز العزيز علي المداخله والطرفه واديكم العافيه

[خالد هاشم علي]

تسلموا ياحلوييين بس نحن نسينا أهم ظاهرة في فترة الثمانينات وهو فنان رقم لا يمكن تجاوزه ( لم يكن جديدا علينا ولكن نجدد دائما لدينا ، غني لمدني وغني للحب وغني للسيرة ) الفنان المبدع الرائع ( صديق متولي ).
فمن منا لم يتابع حفلاته حتي لو كانت بالتذاكر ، ومن منا لم يشتري شريطه الرائع الذي إحتوي علي أغاني في غاية الروعة مثل ( ديمة في العشاق القلوب مرتاحة وإنت ياقلبي مالقيتلك راحة ) للمبدع العطبرواي وأغنية ( أوتذكرين صغيرتي) لأبوداؤد وأغنية ( نعيش عيشة البساطة) وأغنيته الرائعة ( في مدني ياأخواني لي محبوب جفاني، وأنا لي حب وطول في قسمها الأول).
صديق متولي كان نجم الثمانينات وبدون منازع فأين هو الآن ؟؟؟؟؟.
كما لا يمكننا تجاوز الرقم والرائع صديق سرحان ولم أذكره مع بقية المبدعين لأنه سلطانهم ولأنه لا زال يتربع علي قمم الغناء الخالد وخصوصاً روائع الكاشف.
فهنيئاً لمدني بهم وهنيئاً لهم بمدني .



وللحديث بقية....
ودمتم..

[أبوبكرحامد]

مشكور يا أبوهاشم على تذكيرنا بعض من سقطوا سهواً من ذاكرتنا فلهم العتبى ، ولايفوتنى أن أذكركم بالمبدع " مكى شقى " فأين هو الآن ؟؟

[ضياء الدين احمد]

شكرا للاخوان خالد هاشم وود المأذون
اما عن متولي فهو في الامارات واما مكي شقي فقد كان في سنار وذلك قبل سبع سنوات يعمل في اعمال البناء
وايضا هنالك الفنان مدني

[الزمن المريح]

بدون مجاملة
آسف اخى خالد هاشم ،،،

و لكن لم يسقط مثل سرحان سهوا و لم يسقط مثل صديق متولى و لكن هم مازالو فى مدنى يصدحون و الذين ذكرهم ضياء الدين هم من نسأل عنهم اختفوا و الفنانين الكبار ود الامين ابو عركى عبد العزيز المبارك عصام محمد نور (كبير) صديق سرحان الخ هذا العقد الفريد ليست موضوعنا هنا

[ضياء الدين احمد]

تسلم يازمن يا مريح وفعلا زي ماقلت انا موضوعي عن الفنانين الاختفو
عشان كده في كتيرين انا ماذكرتهم امثال مازدا وحيدر الرفاعي وعباس جزيره وعادل هارون لانهم معروفين للجيل الحالي ومتواجدين ايضا الثنائي

[خالد هاشم علي]

ولا يهمك يازمن يامريح ، بس لا صديق سرحان ولا صديق متولي متواجدين بمدني، وعرفت إنو صديق متولي متواجد بالأمارات . وصديق سرحان مقيم بالسعودية، إحتمال تكون في مشاركات لسرحان من فترة لأخري خلال فترة إجازته لكن ولمدة تزيد عن عشرة أعوام لم اشاهد صديق متولي في مدني من خلال أي حفل ( خاص أو عام ). وشكراً مرة تانية علي التنبيه.



ودمتم...

[معتصم عيدروس]

العزيز ضياء للعلم فان سرحان موجود فعلاً في مدني وفي الشهر الماضي شهدته يغني في زفاف صديقنا محمد ميرغني ابوقدوم بالدار الزراعي ويا ريت يا ضياء لو تجيبوا للعرس لانو بالجد متع كل الناس الموجودين في المناسبة بروائع الكاشف وباغانيه الخاصة

[rasheed]

والله يا أخوان أبهجتونا

[rasheed]

والله يا أخوان أبهجتونا وكل المصائب دي تطلع منكم والواحد ما قادر يمسك نفسوا من الضحك كان حسن كسلا ولا كان ود الحسن والشرقرق بتبالغوا عديل ما خليتوا لينا حاجة ،، الله يفرج كربكم ، وصحي يا ها دي مدني ، حيثما تحل تطرب وتضحك وتنسجم وتنسى همومك ، الله يفرج همكم وكربكم وما لنا إلا أن نقول زيدونا من جمالكم يا حلوين ، بعدين يا جماعة عبد الإله ده وين في السعودية إن شاء الله في الرياض وزي ما قال الأخ خالد هاشم ،، د/ عبد الإله ما زول عداد وكان هو الضلع الثالث في الساحة في زمن عصام وياسر سيد خليفة وكانوا يشكلون ثلاثي تجده في المناسبات المجاملاتية ، وربنا يجمعنا بيهم تاني وتعود أيام مدني الجميلة ،، وأذكركم بالفنان الجيلي عبد الماجد (أبوداوؤد ) وقد بدأ مشواره من مدني حي البان والجدير بالذكر أن الأستاذ محي الدين خوجلي كان معلمه في الموسيقي وقواعدها ،، والفنان محي الدين خوجلي من الأبناء الموهبين في مدينة ودمدني فهو معلم بالمرحلة الثانوية العامة وكذلك عازف ماهر للعود والجيتار ، وكذلك ميكانيكي ماهر ويعيب عليه أنه خجول وهو من المنسيين أيضاً وكان يغني أغاني الجاز لشرحبيل أحمد وأيضاً كان رائعاً حينما يتغنى للمعلم الأستاذ أبو عركي ولا يفوتني في هذا أن أذكر أيضاً الفنان عصام من أم سنط فهؤلاء هم الوحيدون الذين تغنوا بأغاني الجاز في مدني وفي السودان عامة على ما أظن ولا أنسى الفنان التوم توته ،،

[ضياء الدين احمد]

تسلم ايها الرياضي المطبوع والصحفي القدير عيدروس طبعا متولي وطوال سنوات اقامتي في ابوظبي كنت اراه في النادي السوداني وفعلا لي فتره طويله ماشفتو يحتمل عودته لمدني وانشاءالله نلقاهو في مدني ونبتهج بيهو يا معتصم

[ضياء الدين احمد]

والله بصراحه يا رشيد التوم توته اطرشني فيهو حقو تدينا نبذه عنو
وذلك ليس تقليلا من شأن الرجل انما جهل بي ولك الشكر رشيد

[ابو المهتــدي]

بسم الله الرحمن الرحيم
الاحبة الكرام لم اهتم بالبوست اول الامر لاني لم اتمكن من معرفة ذاك الفنان عنوان الموضوع 0 ولكن عند الاطلاع 0احب ان اضف لكم بعض الش 0 لان لي معرفة ببعضهم 0 واستمعت لكثير منهم 0 الجديد الذي اقوله 0بان الاخ سرحان بداة انطلاقتة 0من السوريبة 0ثم مارنجان 0 وقتها كان يتربع في عرش تلك المنطقة فنان جاب كل ربوع الجزيرة السر عبدالرحمن وكان شهير بالسر سوريبة
ترك الغناء منذ زمن 0 وهناك فرقة الدباغة يوسف التهامي 0 وثنائي الابحاث
وبعض منهم لا اعرف اسمه بالكامل مثل الشيخ 0 واخرين انشاء الله نزكرهم

[ضياء الدين احمد]

تشكر يا ابو المهتدى وفعلا انا في فنانين من الذكرتهم اول مره اسمع بيهم

[الزمن المريح]

و الله يا اخونا فى فنا نين (فنن) يعنى إحتمال ما يكون فى اى و احد منكم سمع بيهم احتمال الاخ حمدتو يعرفهم ،،

1 حيدر جوهرة
2 عبد الرحمن سوسو
3 لواء (الاسم راح لى )
بس ما تقول لى كمان نقيب و رقيب لأنهم بالجد كانو يغنو فى مدنى ،،،، فى يوم ما !!!!!!!!!!!!!!!!!!!!!


و الله يسهل

[HAMADTO]

الزمن المريح

الناس ديل جيراني كانوا ( جوهرة و سوسو ) .....
وفعلا الشباب هنا في المنتدى ما اظن يكونوا سمعوا بيهم .... اللهم ناس حي المدنيين والاحياء المجاورة ....

ابوالمهتدي

الفنان امير يونس التقيته هنا في الامارات وعملت معه لقاء انشاء الله خلال هذه الايام بنزله ....

[HAMADTO]

الفنان أمير يونس

أسم لمع في سماء الفن السوداني عامة ومدينة ودمدني خاصة ، ذاع صيته وأنتشر صوته يغني للجمال طالت غيبته عن مسرح الغناء السوداني خلناه أعتزل الغناء ولكن ……وجدناه في دولة الإمارات – مدينة العين " وتحديدا في ولاية البريمي العمانية ". ووجدناه مهموماً بالفن السوداني وقضاياه ويكاد منزله يكون ملتقاً فنياً .

اللقاء كامل قريباً انشاء الله

http://www.wadmadani.com/up/pic/dr.amiryou.jpg
الفنان أمير يونس

[ضياء الدين احمد]

نحن في انتظار اللقاء حمتدو فانت دائما ما تأتي بالاشياء الرائعه

[عزيز عيسى]

ضياء العزيز،

يا سلام عليك يا ضياء.. ذكرتنا بالاخ الفنان الرائع محمد بخيت.. الزول ده وين اختفى؟؟
والله لى زمن طويل جدا ما سمعت عنه .. هل موجود في مدني ولا هاجر.. وبيني وبينكم كده أي فنان
تسألوا عنه تلقوه هاجر ترك البلد!!

بتذكر زمان لما كنا في مدرسة شدو كان معانا الاخ حسن الملقب بـ (حسن ودالداية)..
الراجل ده كان عنده صوت جميل جدا.. لما تشوفه وتسمع صوته وكيف بينفعل لما يغني الملحمة لود اللامين.. تفتكره ود اللامين بذاته.. ما عارف ليه ما استمر في الغناء..

ويا أخ حمدتو نحن في انتظار اللقاء مع أمير يونس.. ولو نزلت لينا اغنية علشان نستمع ليه يكون كثر
خيرك.. وعارفك ما بتقصر يا ملك.

عزيز

[HAMADTO]

طلباتك اوامر الاخ العزيز عزيز .... الحوار اكتمل وحسي بطبع فيه وانشاء الله انزل ليك اغنية له .... مع خالص التحايا

[خالد هاشم علي]

ياسلااااااااااااااااااااااام علي ضياء وكتابات ضياء!!!!!!!!!!!!!!!!!!!
لكن ياود المأذون الزول ده مرته حمتوا المنتديات ولا شنو؟؟؟؟؟؟؟؟؟؟؟؟؟؟؟؟
شكلنا كده حنقوم نوجه ليها نداء زي نداءنا لأم منار حرم عمنا صالح أبو شوارب عندما قامت بإعتقاله.

[HAMADTO]

بس يكون عشان كده يا ابوهاشم لانو الزول ده قبل العرس برامج وكبده ابل وتلفونات ...
تعرف والله يا ابوهاشم احنا المعاهو في البلد ما شايفنه ولا حتى بنسمع صوته ...
شنو الحكاية يا ضياء الدين ... احنا في انتظار روائعك ...


http://www.asmilies.com/smiliespic/smiliestxt/1_asmilies-com.gif (http://www.asmilies.com) http://www.asmilies.com/smiliespic/smiliestxt/1_asmilies-com.gif (http://www.asmilies.com)http://www.asmilies.com/smiliespic/smiliestxt/1_asmilies-com.gif (http://www.asmilies.com)

[نزار حسن محمد]

الحبان الاعزاء .... من اين ابداء .... فهذا حديث يطول عن قبيلة اهل الفن والفنانين فقد عايشتهم عن قرب حتى عام 82 ثم هاجرت ولازالت اعيد الذكريات مع من تجمعنى به الغربه التى طالت ومازالت ... طيب يااهلنا .. ابداء ليكم باخوكم نزار بركات وكان هذا اسمى وانا طالب وممثل ولاية الجزيره بالدوره المدرسيه ودفعتى فى هذه الدوره كانوا صديق متولى وعماد محمد احمد الطيب وحنان النيل ..وشخصى والحمد الله مازال كاس الدوره فى المجال الثقافى موجود باسمى بمدرسة مدنى الثانويه
فى هذه الفتره لاانسى الدور الكبير الذى اعبه معى المرحوم الصول ود المليجى عليه رحمة الله فقد كان له الدور الكبير بان احرز كاس الدوره فى مجال الغناء والانشاد الدينى اذكر من الاخوان فى هذه الفتر ه الاخ ابو العاص عازف الكمان ثم الاورغ واخى عصام محمد نور وكان يعزف معنا ايام البروفات على الطبل والاخ شيكو العازف الاول على الطبل واولاد ميلجى بعد انتهاء الدوره المدرسيه بالابيض كان هناك برنامج يقدمه الاذاعى المخضرم الفنان صلاح طــــــــه وفى اول برنامج وكان اسم البرنامج من خارج الاسنديو وكان يقدم كل خميس ... للحديث بقيه مع تحياتى اخوكم نزار ود حسن