يوميات سائق أمجاد .. [الأرشيف]

عبدالغني خلف الله

04-01-2013, 09:20 PM

بسم الله الرحمن الرحيم
يوميات سائق أمجاد ( 1)
عبدالغني خلف الله
مافي حتي رساله واحده من زبون يطلبني في مشوار.. وبيها أصّبر شويه .. ومنذ نصف ساعة وأنا أغدو وأروح جيئة وذهاباً بدون أن أحصل علي أي راكب من أي نوع إن شاء الله طلبه ابتدائي أو حتي تلاميذ روضة ..فقلت لنفسي لماذا لا تقتحم يا ولد مملكة الركشات حيث الطرق الترابية الجانبية مع احتمال العثور علي راكب ..وفعلاً لم يخب ظني فقد قدم نحوي شخص مهرولاً وهو يصيح في انزعاج واضح ..يا أوسطي .. يا أوسطي ..من فضلك عندنا حاجه طارئه ..خير إن شاء الله ..المدام جاها نزيف حاد ولازم ننقلها للحوادث فوراً ..ترددت برهة في القبول وتخيلت منظر الدماء علي الكراسي الخلفية والرجل يردد ..أرجوك يا أوسطي ما في زمن قدامنا ..هنا زجرت نفسي الأمارة بالسوء وتخيلت أن زوجتي في نفس الموقف ..هل أرضي أن يكترث أحدهم لمنظر الدم داخل العربة بينما زوجتي تموت ..لا ..لا ..يلاك بسرعه .. طبعاً حأنقلكم للحوادث ..وصف لي السكه ..شمال يمين ..شمال يمين ..أهو وصلنا ..نزل الرجل بسرعة لإحضار تلك المسكينة وسرحت ببصري بعيداً أتصور شكل الحياة لو أن كل شخص يضع نفسه في موقف من يلجأ إليه ..أكيد سوف تحل جميع مشاكلنا ..الحكومة مثلاً لو كل وزير أو والي أو معتمد يضع نفسه في مكان عامل بسيط لديه تسعة أطفال ..أكيد سيكون كريماً معه فلا يحيله للمعاش أو يطرده من المنزل الحكومي ..إذن مبدأ تبادل الأدوار والمواقع حتي في الخيال .. سيكون مفيداً لنا جميعاً ..عاد الرجل والزوجة تئن وتتأوه وهي تستند علي كتف والدتها فيما يبدو وشقيقة لها ..براحه ..واحده واحده ..أيواا ..كده تمام ومن ثمً انطلقنا لا نلوي علي شيء .. ولكن حدث ما لم يكن في الحسبان إذ عندما كنا بصدد عبور الكوبري وجدنا صفوفاً رهيبة من العربات بسبب تعطل شاحنة عملاقة في منتصف الكوبري ..ضربت بوري واستعملت الكونتاك دونما أي جدوي .. فقد الرجل صبره فنزل من العربة وهو يطلب من أصحاب العربات فتح ثغرة تمكننا من المرور وهو يركض ويردد ..يا جماعه عندنا حاله مريض مستعجله ..عندنا زول عندو نزيف حاد ..لم يقصر الأخوان باستثناء بعض المركبات التي كانت تقطع علينا الطريق الذي يوسعه الآخرون كعادتها معنا ..دائماً قاطعاها معانا ..أخيراً مر بقربنا عسكري مرور يمتطي دراجة ناريه ..فلم يتردد في تشغيل (السايرين )..وتشغيل الأنوار ففتح لنا الناس الطريق وانطلق أمامنا يسابق الريح وأنا بالكونتاك خلفه حتي لا يدخل بيننا سائق مستعجل وما أكثرهم ..شعرنا بشيء من الراحة ونحن نمضي في طريقنا قدماً وشعرت أنا بالتحديد بشيء من العظمة والغرور وتخيلت نفسي رئيساً أو والياً والموتركيت أمامي جاري ( فللي ) .. لا هماه إشارة مرور ولا خائف من لغم ..وبمناسبة الألغام أكاد أكون أحرف سائق أمجاد في تفادي مواضع الألغام وعندي أكثر من حيله ..ونادراً ما أقع في لغم بالرغم من أنني مركب لوحه بيضاء ..المهم وصلنا المستشفي وكانوا علي وشك إدخال شخص مصاب بحروق رهيبة في جميع أنحاء جسمه لغرفة العملية ونسبة لتحرج موقف تلك المرأة أدخلوها هي في الأول وقاموا بعمل جراحه سريعه داخل العنبر للشخص بتاع الحريق ..يعملوا شنو يعني ..؟ شيء أحسن من لا شيء ..حلفت من المشوار واكتفيت باحساس الترطيب الذي شعرت به وأنا خلف الموترجي بتاع الحركة ..مشيت لطرمبة البنزين وأدخلت العربيه للعفريتة فطلبوا مني تمنتاشر ألف جنيه ..الجنيه يحك الجنيه ..وكانت آخر ما أملك ..لكنني وبمجرد مغادرتي العفريته لقيت مشوار كارب للمطار اشتريت منو حاجات البيت وبطيخه للمدام ..سيد البطيخ قال لي أقطعها ليك ..قلت ليهو لا ..أصلي متعود أقطع البطيخه بحظوظ بناتي ..واحده خريجة إعلام والتانيه خريجة قانون وشريعه والتالته عندها دبلوم كمبيوتر ولا واحده شغاله ولا واحده جاها عريس ..قسمتهم كده ..حظهم الوحيد في البطيخ ..وحتي جديد اللقاء مع حلقة جديدة من يومياتي ..أترككم في رعاية الله وحفظه .

ايمن عبد الله

05-01-2013, 08:32 AM

تسلم يا عبد الغني ..
والله بتاعين الامجاد مشكلتهم مشكلة ..
وطبعا اكبر مشكلة زي ما بقولوا هم بأنفسهم
ان الواحد يصحى من نومه مديون خمسين جنيه ..
وقبل ما يطلع من البيت مديون ..
خمسين جنيه ..
الله كريم ..

mahagoub

05-01-2013, 08:32 AM

ابحارات متنوعه
شد وجذب مع الحكومه

والبعمل خير بلاقى خير
ومنتظرين باقى اليوميات

عبدالغني خلف الله

05-01-2013, 08:40 PM

أحبتي أيمن ومحجوب ..شكراً لتوقفكم هنا وأسعد بدعوتكم للمشوار الجاي ..هذا مع كل الود .

عبدالغني خلف الله

05-01-2013, 08:42 PM

يوميات سائق أمجاد (2)
عبدالغني خلف الله الربيع
أصبحنا وأصبح الملك لله ..أمبارح الجمعه ..صيانه وغيار زيت وزيارات ومناسبات ..يا دابك خلينا حاجه للبنزين ..ولكن ربك كريم فهذا هو شخص يحمل حقيبه سامسونايت ويرتدي نظارة شمس ومن شكله خمنت أنه يريد مشوار وليس طرحه ..ممكن مشوار يا معلم ..؟ ..ممكن طبعاً ..مره معلم ومره أوسطي وأحياناً ياخينا ..ويا عم ..ولا مره يا أستاذ ..وكأن سائقي الأمجادات أميين ..ولو قام زول عمل مقابلات صحفيه مع بقية الزملاء ..حيلقي ناس كلها مقامات ..شيء ضباط وشيء موظفين بالمعاش زي حالاتنا وشيء دكاتره في الجامعات ..وقله قليلة جداً من ( الجربنديه ) ..لكنه مجتمع لطيف ..لما شلتنا تجتمع للفطور تدور نقاشات عجيبه ..يعقوب المُخ راس القايده ..ما بصاقع في القرايه ..يا سايق يا بقرا في كتاب أو مجله أو جريده ..ولامن الناس تجيب موضوع يعقوب المُخ بكون حافظو حفظ ..في داعي نتفق علي المشوار ولاّ نخليهو علي النيه ..صاحبنا بتاع السامسونايت قبل ما يقعد سمح ..الأولو شرط آخرو نور ..الكلام ده سمعتو كتير من يعقوب المُخ ..علي النيه يا ابن العم ..مافي مشكله ..وفي الطريق علمت منه أنه تاجر شنطه وكرهان حاجه اسمها حافلات ..لماذا يا ابن العم ..الناس دي مجتهده وطيبين ..ما قلنا حاجه ..لكن خمسه سنين وأنا من حافله لحافله ..ربنا سهل لي سفرتين تلاته لأبوظبي وفرت لي قرشين تلاته ..قلت يا بوي وأنا تاعب نفسي مالي ..أركب الأمجادات لغاية ما اشتري عربيه ..تعرف يا ابن العم ..اسم الكريم منو ؟ ..نور الدين وأنا مصطفي ..اتشرفنا ..عالم الحافلات ده عالم عجيب ..كل كرسي داخل الحافله عندو اسم ..مثلاً الكرسي القريب من المدخل طوالي ..ده اسمو موظف الإستعلامات ..كل دقيقه والتانيه يجيك واحد يسألك ..يا استاذ الحافله دي ماشي الحته الفلانيه ؟ ..بالنص ولاّ بالظلط ..بتقيف في محطة سراج ؟ ..وهكذا يجننوك جن بالأسئله ..الكرسي القدام جنب السواق ده إسمو كرسي الشهيد ..لأنو أي حادث يقع للحافله لا قدر الله .. شايتك ..شايتك ..أما صف الكراسي العلي الشمال ديل اسمهم الوصله ..لأنو (البلف) ما بقدر يصلهم في كراسيهم مع وجود كراسي النص والبلف ده يطلع شنو ؟ ..البلف معناهو الكمساري ..وجماعة النص ديل اسمهم أولاد المرحوم ..لأنهم كلما يجي راكب قاصد الكنبه الأخيره يقوموا ليهو قومه واحده مع بعض ..وناس الكنبه الأخيره اسمهم ..ناس عليك الله خليها عليّ المره دي .. شكراً ما كان في داعي للتعب ..لأنو في الغالب يكون في زول دفع ليهم ..لكن أحسن حاجه في الحافلات أنها بتعرفك بالناس ..في راكب تلقاه من البدايه حدد موقفو ..يمشي يقعد في آخر الصف ..ده بكون في الغالب انطوائي وما عاوز كلام مع زول ..وفي من يحاول التعرف علي الآنسات من الركاب ..بقصد شريف وربما لا ..أنا القدامك ده يا نور الدين اتعرفت علي زوجتي داخل حافله ..يا زول من ما دخلت الحافله الناس دي كلها صنت ..حاولت تقعد في كرسي النص القريب مني حلفت عليها تقعد في الكرسي بتاعي ..عجبني تهذيبا وروقتا ..قالت لي شكراً بخجل شديد ..في اللحظه ديك أنا اتلخبت وما عرفت أعمل شنو ..لحسن الحظ نزلنا في محطه واحده وكانت شايله شنطه تقيله شويه ..حلفت عليها أشيل الشنطه وفي الطريق عرفت أنها من ناس كويسين وأنها بتقرا في الجامعه ..وزميله لأختي ..ما أحري ولا أدري إلا وأنا اتقدمت لخطوبتا وأهلها وافقوا ..قمت سافرت أبوظبي عشان أجيب الشنطه ..ومن ديك وأنا بسافر بانتظام خاصه في مواسم الأعياد أهو منها تجاره وفسحه ..والله يا عم نورالدين الناس دي عايشا ..تطلع من مطار أبوظبي تفتكر نفسك داخل علي لندن ..أما إذا مشيت دبي فده عالم قايم بذاتو ..المهم دردشنا لغاية ما وصل ..راجل وناس خلاص ..علي الله يكون( الستك ) في مستوي حلاوة الونسه ..الراجل طلع ضكران ..أداني ورقتين من العمله الصعبه فيها حاجات تشبه رسوم ( الكرتله ) قلت ليهو العمله دي شنو ؟ ..قال لي دي عشرين يورو ..تعادل حوالي ستين ألف جنيه ..لكن بتسير عندنا يا مصطفي ؟ ..طبعاً بتسير ..في حاجه في البلد دي ما بتسير ؟! ..شكرتو بحراره واشتغلت باقي اليوم داك بمزاج..ربك كريم .. ودمتم حتي جديد اللقاء إن شاء الله .

ود المطامير

05-01-2013, 10:22 PM

الحبيب
والله من أجمل ما قرأت
وحات الله قبلما أقرأ أول شئ
بعمل كباية شاى وبقرأ بمزاااج
جد والله .. عشت معاك الأحداث
كأنى أحد أبطالها وأتمنى أن يصل
الرقم المتسلسل للأحداث إلى ما لا نهايه

بالجد .. متعه ما بعدها متعه

أعجبنى شرطى المرور والدكتور والركشه وسيد الركشه ;)

أبو صديق

06-01-2013, 09:43 AM

وأنا أقوووووول الأمجاد دي مااا غريبة عليّ
يا ربي شفتها وين ؟؟؟ شفتها وييييييين
أتاريك لاااابد بي جاي يا عبد الغني
والله فعلا اسلاك عمك قوقل دي ضيييقة...
وفي إنتظار مشاويرك الجديدة

عبدالغني خلف الله

06-01-2013, 08:50 PM

أحبتي ود المطامير وود الشرفه ..أروع صباح لأصدقاء يومياتي ..وأسعد كثيراً لو تكونوا ضيوفي في المشوار الجاي ..علي الأقل تنجدوني لو المشوار جاب ليهو مضاربه ..مع كل الود .

عبدالغني خلف الله

06-01-2013, 08:53 PM

يوميات سائق أمجاد ( 3 )
عبدالغني خلف الله الربيع
أصبحنا وأصبح الملك لله ..أمبارح اكتشفت حاجه جديده ..في الواقع ما أنا الإكتشفت وإنما يعقوب المخ ..قال لي يا عم نور الدين ما ملاحظ حاجه في عربيتك ؟ ..قلت ليهو حاجه زي شنو .. ؟ عربيتك الوحيده الفي الموقف ما ( مكشكشه ) ..قلت ليهو مكشكشه يعني شنو ؟ ..قال تعمل ليك شوية اكسسوارات وتكتب ليك جمل وعبارات وتلصق في الزجاج الخلفي صورة واحده من المطربات مع حبة أريل بالجنبه وتعلق معطر فوق المرايا الداخليه وتجدع ليك تلبيسه جديده بدل التلبيسه بتاعة الشركه ..عربيتك يا عم نورالين التقول مات ليها زول ..في حالة حداد معلن مما غيرتها بعربيتك بتاعة البنزين ..وما تنسي كمان تكتب ليك جمله جملتين ...بيت شعر ..حكمه ..أقوال ماثوره ..مطلع أغنيه ..قلت ليهو ولو أني شايف الحكايه دي كماليات وتسطيح .. لكن يا قولك في من الركاب واحدين بحبو الحاجات دي .. بس ما قلت لي .. اكشكش العربيه وين ..عندك محل معين ..؟ وصف لي دكان وقال لي أسأل من واحد إسمو ( شخبته ) .. خطاط وفنان وعندو كل مستلزمات الكشكشه ..غسلت إيدي من الكسره بالتقليه وملاح الروب وطيران علي صاحبنا ..وصلت سألت واحد عندو طبليه فيها مستلزمات العربات ..ومكتوب عليها خطاط لافتات وديكورات ..فارش ليهو مفكات ومفاتيح وصواميل اشكال وألوان ..وخطرات ورا وقدام .. قلت ليهو يا شاب لو سمحت عاوز الأستاذ ( شخبته ) ..قال لي وصلت ..أنا القدامك ده ( شخبته ) ..اي خدمه ؟ ..قلت ليهو والله يا أستاذ وصفك لي صديق عزيز وقال العربيه تطلع منك صوره وصوت كأنها في مهرجان ..نزل من كرسي طويل قاعد فيهو ..قال لي أول حاجه خليني ألقي نظره علي العربيه .. اللون الأخضر التركوازي ده عاوز اكسسوارات بنفسجيه وبيجيه .. طلع لي كذا حاجه ونصحني أختار منها البعجبني .. قلت ليهو إنت اتصرف وأنا استلم العربيه علي ذوقك ..اشرب لي شاي وأجيك راجع .. قال لي يعني اتحرك في حدود كم كده ؟ ..قلت ليهو لغاية مية ألف جنيه ..قال لي المبلغ ده ما بظبط ليك العربيه لكن ما في مشكله ما زاد يبقي لينا عندك ..رجعت من ست الشاي ما عرفت عربيتي من كترة الحاجات المركبه فيها .. قال لي في حاجتين لازم آخد رايك فيهم ..صور الفنانات ..والكلام المفروض يتكتب ..يلا ورينا .. دي صورة نانسي عجرم ..وعكرم دي تطلع شنو ؟ ..نانسي عجرم يا خال ..في زول ما بعرف نانسي عجرم ..قلت ليهو والله مش بطاله .. كدي نشوف حاجه تاني ..قال لي دي صورة هيفاء ودي شيرين ودي إلسا ..زولك لخمني لخمه ..قلت ليهو .. أنا زول كبرت علي الحاجات دي شوف لي صورة الكعبه .. او صورة الشيخ البرعي .. حاجه من النوع ده ..شنو البوديني لعكرم ولسه ..إسمها إلسا يا خال ..قلت ليهو ولو ..طيب نكتب ليك شنو ..زي شنو يعني ؟ ..دي عباره بتقول ( التش تش حلاوه لبن ) ..وتاني .. دي بتقول ( شذي وبس ) ..وشذي دي تطلع منو ؟ .. شذي إسم ساكت .. وتاني دي عباره بتقول ( علي كف القدر نمشي ولا ندري ما المكتوب ) وورانى كمان رسمة دائره وجنبها دايره..وعبارة (كان ما ) وجنبها دايره وعلامة ( فى) والعدد ستين ..طبعاً ما فهمت اي حاجة .زقال لى الرسمه بتقول دايره دايره كان ما دايره فى ستين ..لا .. لا ..قلت ليهو ..المهم وراني ليك كلامات عربي وافرنجي .. قلت ليهو يا استاذ خلصنا واكتب لي ( تحزير ..وقوف متكرر ) ..اصلي معجب بالجمله دي .. قال لي لكن دي للحافلات وبس .. طيب ..صلي علي النبي يا معلم ..ألف صلاه علي الحبيب .. اكتب لي ( هذا من فضل ربي ) ..انتهيت من الكشكشه وطلعت من المحل وأنا ما مصدق شكل الأمجاد بتاعتي .. مع أول لفه وقفوني تلاته أشخاص هيبه كده ..قالو لي عاوزنك في مشوار ..قلت خلي بالك الكشكشه أثبتت جدواها ..ما عندكم مشكله يا شباب اتفضلو ..واحد ركب قدام والإتنين التانين ركبو في المقعد الخلفي ..علي وين كان الله هون ؟ ..علي واد مدني ..نعم ؟! ..واد مدني وادمدني ؟ ولاّ إمكن في امتداد جديد سموه واد مدني .. اصلو الناس في العاصمه بحبو اسماء المدن .. يقول ليك أركويت والرياض والمنشيه وكده ..قال لي ااشاب الراكب قدام ..لا وادمدني الجزيره ..قلت ليهم لكن الأمجادات ممنوعه من شارع مدني ..قالو لي ما عندك مشكله ..أهو ده التصريح ناقص نمرة العربيه ..عندنا شركه لاستيراد الرقشات وعاوزين نعمل ( بروباقندا ) بيان بالعمل في مدني للأمجادات ..وحنديك تلتمية ألف جنيه ..أها قلت شنو ؟ ..قلت موافق طبعا ..ودوني ليك بطريق جانبي واتفادو التفتيش بتاع سوبا ..قلبي أكلني ..قلت يعني حيحصل شنو ؟ ..مشينا وبعد( بتري) بشويه واحد من الراكبين ورا ختا لي حاجه حاده في رقبتي اكتشفت أنها سكين .. قال لي بدون ما تعمل شوشره لف ناحية البحر .. لفيت .. مره أقع في حفره ومره أخش برسيم ..وفي كمينة طوب مهجوره كده نزلوني وكتفوني بسلك كهربا دبل وشالو مني الموبايل .. قالوا لي إحنا حناخد العربيه نعمل بيها عمليه صغيره كده وحنضرب ليك بكره نوريك تلقاها وين ..قلت ليهم كويس ..وأنا قلبي مقطوع عديل ..اتحركوا مني ولغاية قريب المغرب جا واحد سايق ليهو حمار داقش المويه ..كوركت ليهو جاني يجري جري ..فك مني سلك الكهربا وساقني لغاية الظلط ركبني في حافله مشيت دوغري علي قسم الشرطه لقيت ليك عربيتي الما بتغباني وعرفت من الشرطه أنو جماعتي سرقو العربيه عشان يكسرو بيها بنك لكن العمليه فشلت وقبضوهم .. يا ما إنت كريم يا رب ..يا ما إنت كريم يا رب .

mahagoub

06-01-2013, 10:37 PM

واتلحس حق المشوار
مره ليك ومره عليك
والجاتك فى رقشتك سامحتك

آلاء عبد الرحمن

07-01-2013, 01:16 AM

متابعين ومستمتعين معاك
وربنا يعين الجميع

ريمون

07-01-2013, 02:24 AM

بوست جميل ..
امجاااااااااااااااد ..
مشوار لحدي الثقافي والحساب عند مطاميرو ..

عبدالغني خلف الله

07-01-2013, 08:50 PM

أحبتي آلاء ومحجوب وريمون ..صباحات الجمال والإشراق ..وموافق علي المشوار حتي الثقافي بس المشكله الأمجادات ممنوعه في موسكو ..سلمتم من كل أذيً ويلا معاي في المشوار الجاي وحقكم محفوظ .

عبدالغني خلف الله

07-01-2013, 08:54 PM

أصبحنا وأصبح الملك لله ..جاري العزيز جابو ليهو بنيه حلف بالطلاق إلا أفطر حتي أمشي ..قدر ما حنستو يعفيني رفض ..حاولت أقنعو بأنو دي ساعة الذروه والمشاوير مضمونه ..قال لي حرّم تفطر باللول وبعدين رزقك بجيك ..يا ريتني سمعت كلامو وقعدت بعد الفطور لغاية الغدا وبعد الغدا لغاية العشا ..كان أحسن لي من المصائب الوقعت فيني ..يا ربي أكون صابحت منو ..أكيد ما واحد مبتسم علامة المقاله ..ضربنا الشواءات والذي منه واتوجهت علي السوق كايس الرزق ..قصاد واحده من البوتيكات وقفتني واحده كده ..أيوه شباب لكن شكلها بقول أنها متزوجه ..الحنه والبخور والعطور ..شايله ليها زي عشره حاجات ..نفسي انقطع لغاية ما دخلتهن العربيه ..حاولت أكون لطيف معاها وما جبت ليها سيرة المشوار بكم وكده ..لكن تفتكر واحده معنكشه دهب ومشتريا ليها حاجات بمليون جنيه حتفرق معاها شوية ملاليم ؟ ..أدتني العنوان ولما مشينا شويه كنت مركب في المسجل شريط ( بروفسور عبد الله الطيب البشرح فيهو القرآن الكريم ) زول ما شا الله كلاّم بلحيل ..أصرت أني أشغل ليها شريط طلعتو من حقيبتا لقيتو ليك شريط حفلة عرس كاربه ..الوليه ما عملت حساب لي ولا الناس الماشين تتمايح زي فريع البان البغنو فيها في الشريط ..أنا خلاص وصلت درجه من الاستياء قلت بتين بس نصل واتخارج من البنيه أم عيناً قويه دي ..أخيراً وصلنا ضربت الجرس فتحت لينا شابه كده تشبها التقول تومات..قبلت منها غادي ..يعني ..ما قبلت شديد شديد ..أمال عايزني أفرز ليهم حاجاتم كيف وأنا مغمض عيني ؟ ..ناولتها الحاجات واستغفرت الله من صعوبة الموقف..انتهينا من توصيل البضاعه لغاية باب الهول ..قلت ليها حق المشوار وكده يا شابه خليهو علي النيه ..قالت لي ستين يمين إلا تشرب حاجه ..قزازة بارد نفتحا ليك في دقيقتين وتتوكل تمشي .. قعدت في كرسي قدام باب القراش من الله خلقني ما شفت زيّو .. شويتين جا داخل واحد كده خمنت إنو يكون زوج الشابه ست المشوار .. سلم علي ببرود ومعاه هرشه طيرت جني عديل ..في الأثناء دي جات البت التانية شايله الكولا صاحبنا إتناولا منها وقال ليها خليكي من البارد .. عمنا ده حأعصر ليهو فواكه بنفسي ..شويتين كده اسمع ليك صوت الخلاط .. ور..ور ..بقلبي قلت الزول ده عايز يعصر لي دستة برتكان ؟ رجع شايل صينيه فيها كباية شب دبل ..وفيها عصير أخضر ..اتفضل أشرب ومعاها نهره ..مسكت منو الكبايه شربت لي جقمه لقيت ليك الشي حار بلحيل ..قلت ليهو وأنا أقحقح ..ده عصير شنو يا أستاذ ؟ ..قال لي ده عصير فلفليه خضرا كويس للصحه ..أشرب ..قمنا للنهير ..شربت نص الكبايه بصعوبه شديده وشعرت ليك زي البطني فيها سكاكين ..الله لا تريحك أكان سقيتني عصير شطه خضرا ..يلا اتخارج ..اتخارج.. يا زول طلعت ليك من البوابه ما مصدق البحصل لي..وقررت بيني وبي ننفسي تاني ما أتخطي عتبة بيت أي زبون ..مشيت علي عربيتي في بتاع بقاله مقاصده البيت أشر لي ..يا ابن العم ..يا ابن العم ..تعال تعال ..قلت إمكن داير ليهو مشوار ..مشيت عليهو مد لي وريقات أمات خمسين ألف حسبتهن لقيتن ميتين ألف جنيه ..قال لي ست البيت ده اتصلت قالت يسلموك المبلغ ده علي الحساب ..حق المشوار وكده..طبقت الأخضر الليموني وقلت أمشي دوغري علي البيت ..فكرت أشتري لي دوا من الصيدليه يوقف لي الحرقان بتاع عصير الشطه الخضرا ومعاه شوية حاجات للأولاد ..وأنا داخل علي الصيدليه وقفوني ليك نفرين .. واحد كبير شويه شايل ليهو عكاز مضبب والتاني أصغر منو بكذا سنه وشايل ليهو بسطونه التقول نحن في الخلا ..أكان أشوف ليك الزول الشايل العكاز نطط عويناتو وقبّل علي أخوه .. الطريفي .. دحين ده ما عثمان الزول الغريب البياع في بقاله حاج الرضي المسكناه صرفة الحواشه واختفي قبال ما يشتغل اسبوع؟..أيا بلحيل ياهو بذاتو وصفاتو ..تعال هنا يا حرامي الليله وقعتك سوده معانا ..قلت ليهم يا أخوانا أنا اسمي نورالدين وسواق أمجاد وعمري لا شفتكم لا رأيتكم تغشنا يا محتال نعمننا آمناك وقلنا إنت زول أمين وبصلي بينا المغرب والعشا .. وبدون ما أشعر واحد قبقبني والتاني محطني ببسطونه لغاية ما نزل إيد الجلابيه ..يا أخوانا إنتو غلطانين ..أنا لا بعرفكم ولا استلمت منكم أمانات..عان زولك يا الطريفي إتغابا فينا العرفا ..وتاني الجنا الرهيف قشطني ليك ببسطونه ..إتلموا علينا كذا واحد وربك رب الخير وقف جنبنا عربية نجده ..شنو يا ساده عاملين فوضي وسط السوق ..يا جنابو النفرين ديل اتهجمو علي وضربوني وأنا عاوز حقي منهم ..ما تصدق كلامو يا حضرة الصول ده واحد محتال شارد بقروشنا..طيب طيب ..نمشي القسم ..وواك ويك واك ويك نزلونا قدام الشاويش النبطشي وفرتقو..المتحري سألم قال ليهم عندكم شهود ..قالوا ليهو أيا عندنا ولداًَ لينا عندو كشك قريب بجاي كان ماضي اسمو في وصل الأمانه ..خلاص نجيب الزول ده ونسألو ..البوليس رسل جاب الشاهد وسألو .. يا خينا بتعرف العم ده ..شفتو قبل كده ؟ ..أخوانك ديل قالوا عمنا احتال عليهم وشرد بقروشم .. قصدكم عثمان الأونطجي ؟ .. ده ما قبضتو الشرطه أمبارح وهسع في حراسة القسم الشمالي .. لا يا خال ده ما زولكم ..المحتال مقبوض عليهو وأنا سجلت بلاغ باسمكم ..لا إله إلا الله .. معليش سامحنا يا إبن العم ..في الأول كمل الشهاده محمداً رسول الله ..عليه الصلاة والسلام ..أسامحكم كيف يعني ؟ ..يا شاويش أنا عاوز أورنيك طبي وبلاغ ضد الجماعه ديل وما حأتنازل عن حقي لو انطبقت الأرض علي السما ..شايف يا شاويش ..جرح في الإيد الشمال والتاني في الإيد اليمين ..الشاويش قال للعسكري المعاه طلع ليهو أورنيك تمانيه رسلو المستشفي واتحفظ علي الإتنين ديل ..الزول الشاهد قريب جماعتك أخدني علي جنب وقال لي حقك علينا يا ابن العم ..نعمل تسويه أنا عرفت أنك سايق أمجاد ويومك كلو ضاع ..أيه رأيك في مية ألف تتعالج بيها وتعوض بيها يومك الضاع منك ..فكرت وقدرت وقلت ليهو والله عشانك وبس ..أنا كان ممكن أرفع قضية تعويض بمليون جنيه ..كتبت التنازل وقبضت المية أهيف زايد ميتين ألف وطيران علي البيت ..ياما إنت كريم يا رب ..يا ما إنت كريم يا رب .

ود المطامير

08-01-2013, 05:24 AM

بوست جميل ..
امجاااااااااااااااد ..
مشوار لحدي الثقافي والحساب عند مطاميرو ..
والله لكن كلام

عاوزه تسوقى نجومنا وتوديهم حوشكم

وعلى حسابى كمان ؟

يا حبيبنا عبدالغنى بالله خلى الركشه تكسر ركبه هنى بس ;)

واصل يا مبدع

عبدالغني خلف الله

08-01-2013, 08:24 PM

صباح الخير ود المطامير ويا حليل زمن المطامير..ما في مشكله ..خلينا نعمل تكامل مع ناس الثقافي ونحول اليوميات للعربية الفصحي ..بس إنتا أديني الضو الأخدر ..مع كل الود ..ولو جاهز يلاك المشوار الجاي ..النص بالنص .

عبدالغني خلف الله

08-01-2013, 08:27 PM

يوميات سائق أمجاد 5 ))

أصبحنا وأصبح الملك لله .. يا فتاح يا عليم يا رزاق يا كريم ..الليله من دون الأيام طلعت متأخر شويه أصلي غيرت التلفزيون القديم بواحد جديد ..دفعت فرق بسيط وقلت كدي النشوف الحكايه بتستحق التعب لغاية سوق ليبيا وشيلك ونزلك ..لقيت ليك الصوره تجنن عديل والشاشه اسمها شنو يا رب ..إسمها شنو ..والله نسيت الاسم المهم كانت في سهره معاده وفنان عربي شاب كده وراه عازفين لابسين بدل وكرفتات طول بعرض ..أبسط واحد بتاع الطارمتقيف ولا سناتور أمريكي والمايسترو ولا وزير الخارجيه وعازفين الكمنجات كلهم شيبه يطلعو وينزلو سوا ولا بروفسيرات في الجامعه ..والجمهور نهائي الدوري الممتاز..هلال مريخ ..في الحقيقه رثيت لحال فنانينا الشباب ..الواحد جادعين ليهو زول واحد معاه أورقان وبدون كورس ..حتي كورس الجماعه ديلك شنباتم ترك فيها الحديه ..غايتو ونسونا بكذا أغنيه ..استعدلت العربيه طلعت الشارع ..بسم الله ما شاء الله وحسبنا الله ونعم الوكيل ..لقيت قدامي لوري هينو باين عليهو جاي من مشوار بعيد..شايل بضاعه وجركانات فاضيه وبراميل وكذا قربه مويه بالجنبه..خلاني لغاية ما بقيت قصادو قال لي يا أوسطي من فضلك وصل الجماعه ديل مستشفي الخرطوم ..وقفنا جماعتك نزلوا ..واحد شباب والتاني كبير في السن ..قالو لي لو سمحت تودينا مستشفي الخرطوم..قلت ليهم كفاره نعل ما عندكم عوجه ؟ نط الوليد قال لي أبداّ ..أخونا الأصغر مني شغال في بقاله قريبه من المستشفي ..قلت ليهم ما تضربو ليهو تلفون يجيكم بدال ما تتعبو ..نمرة موبايلو كم أنا بضرب ليهو ..الشاب طلع موبايلو وقال لي ماشين في الخلا لينا يومين والنمره مسجله لكن التلفون مقفول عشان البطاريه نازله ..قلت ليهم ما في مشكله حالاً نصل إن شاء الله ..قطعنا كوبري أمدرمان القديم وماشين كويس لغاية ما وصلنا صينية الحركه ثبتني ليك بوليس حركه ..يا عم ..يا حاج ..ماشي وين بالأمجاد دي ..قلت ليهو مستشفي الخرطوم ..وأهي دي رخصتي ورخصة العربيه الاتنين مجددات ..قال لي يعني ما سمعت بأنو الأمجاد ممنوعه من دخول وسط الخرطوم ..قلت ليهو أبداً والله ..الحقيقه أمبارح ناس شلتي كانو بتكلمو في موضوع زي ده لكن أنا ما انتظرت أعرف الحاصل شنو بالضبط ..قال لي خلاص جنب العربيه ونزل الجماعه المعاك ديل يواصلو بتكسي وإنت أرجع بدربك ..قلت ليهو بس لو سمحت لي أصل المحطه الوسطي عندي لستك اسبير مع بتاع بنشر أجيبو وأجيك هوي ..قال لي كلام زي ده مافي ..أمشي كداري اتناولو ..وعربيتي ..عربيتك في الحفظ والصون نحنا مسئولين منها لغاية ما ترجع ..اعتذرت للركاب المعاي وكمان هم أصرو يوصلوني بالتاكسي لغاية البنشر ..شكرتهم وحلفت من حق المشوار ..الأوسطي بتاع البنشر قال لي والله اشتغلت لستكك وواحد تاني بس ..حالنا واقف من يوم ما منعوكم تجو السوق ..عرفت منو الموضوع من طق طق للسلام عليكم وأديتو القدرت عليها ودحرجت اللستك قدامي في التلتوار وكل ما تمر عربيه بجنبي الناس الفيها يعاينو لي باستغراب شديد ..شويتين واحد صاحبي رسل لي رساله ..موسيقي الرساله عباره عن مديح نبوي ومعاه نوبه صاح ..وقفت اللستك وفتحت الرساله أقراها وأنا اتمايل طرباً مع الموسيقي ..الرساله فيها نكته ضحكتني شديد ..في اللحظه دي مرت جنبي عربية نجده وقفت قصادي واسمع ليك عبارة ( حركات غريبه .. حول ) صوت العسكري من الجانب التاني سامعو قال ليهو ..الناس دي كلها جنت ؟ ..حول ..قلت إمكن الجماعه ديل فهموني غلط وافتكروني مجنون ..عجله ترتار ورقيص في المحطه الوسطي وضحك براي ..والله معاهم حق ..قفلت الموبايل مشيت شويه اللستك جلا مني صدم ليك شافعه صغيره وأمها ..من الخلعه اتكوموا كلهم في التلتوار قامو علي أدوني ليك شكله لرب السما وقدر ما حاولت أعتذر الحاجه شرسه شديد ..اتلموا علينا نفرين تلانه في شكل جوديه ..ما أحري ولا أدري إلا أشوف ليك جماعتي بتاعين النجده القبيل عكموني ليك ورفعوني بعجلتي وويك ويك طيران علي مستشفي المجانين نزلوني ليك بالغصب وقالوا للدكتور النبطشي عمنا ده عامل فوضي ونحنا شاكين في قواه العقليه يستحسن تخلو معاكم لغاية ما نتصل بأسرتو ..وزي اتكلم معاه في أضانو براحه .. أسمع ليك ترتار ورقيص وضحك برا سبب ..شويتين جوني تلاته ممرضين علي جنبه وأنا أحاول أناقش فيهم وأقنعهم بالتي هي أحسن لكن بدون فايده واحد فيهم غفلني وترزني بحقنه زعلتني شديد ..حاولت أقاوم اتلموا علي زي خمسه ممرضين ..بعد داك شعرت بتعب ونعاس ونمت في مكاني ..وبعد ساعه كده صحيت لقيت فوق راسي دكتور هيبه كده سألني أسئله تقليديه ..اسمك وعمرك وعنوانك وأشياء من هذا القبيل ..قمت حكيت ليهو القصه من أولها لآخرها ..قال لي يعني لو أنا هسه اتحركت معاك بعربيتي ومشينا صينية الحركه نلقا عندك أمجاد واقفه ..قلت ليهو بلحيل وطلعت ليهو رخصتي ووريتو نمرة العربيه ..أخد معاه اتنين من الممرضين وطوالي علي صينية الحركه ..لحسن الحظ لقيت العسكري الوقفني لسه شغال ..قال لي إتأخرت كده مالك ما قلت حتجيب اللستك الاسبير وترجع ؟ ..في اللحظه دي الدكتور اعتذر لي بشده عن سوء الفهم الحصل وعصر لي شوية مبلغ وهو مدور راجع ..إيدي حرقتني تبنتهن لقيتن ميتين ألف جنيه وطوالي جري علي البيت ..يا ما إنت كريم يا رب ..يا ما إنت كريم يا رب .

ياسر عمر الامين

09-01-2013, 02:12 PM

والله لكن كلام

عاوزه تسوقى نجومنا وتوديهم حوشكم

وعلى حسابى كمان ؟

هههههههههههههههههههههههههههههههههههههههههههه
نان مالو؟؟؟؟؟؟؟؟؟

عبدالغني خلف الله

09-01-2013, 08:18 PM

أستاذ ياسر ..صباحات الروعه والإشراق لك ولمن حولك ..وجدت في الصفحة الرئيسة تنويه برساله ..لكنني لم أتمكن من الوصول إليها لعدم حصولي علي نافذه بمنتدانا العامر بأهله ..هذا مع كل الود وسأحاول البحث عن مشوار لأهل الثقافه عشانكم يا ناس الثقافي ودمتم في رعاية الله وحفظه .

عبدالغني خلف الله

09-01-2013, 08:22 PM

يوميات سائق أمجاد 6
أصبحنا وأصبح الملك لله .. يا فتاح يا عليم يا رزاق يا كريم ..ومن أول الشارع أشرت لي حاجه شايله ليها قفه ..في الحقيقه أنا استغربت قلت إمكن قايلاني شغال طرحه لكنها قالت لي عايزه مشوار لسوق ليبيا ..توديني ؟..قلت ليها بلحيل ..خشمك فيهو اللبن ..أها المشوار بكم ..قلت ليها خمستاشر ألف ..جايه معاك ؟ قالت لي اتناشر بس ..قلت ليها خلاص نتقاسم الفرق باربعتاشر ألف قالت لي الألفين ديل يجيبن لي وقية شيح ومر حجازي ..يعني إنتي دلاليه من النوع القديم ..اتفضلي اركبي ..عاينت للقفه لقيتن تلاته قفاف دي في بطن دي زي طقم الطقاطيق الماليزي ..كيف يعني دلاليه من الصنف القديم ؟ ..قلت ليها الدلاليات اليومين ديل شابات سمحات اتراصفن زي نار القصب .. شايلات هاندباق فيهو كريمات وشامبوهات ..شي ديانا وشي دوب و شاور جل وشي جرجنز ونتروجينا ..ناس رضينا ؟! ..إنت بتعرف ناس خالتي رضينا ؟! ..قلت ليك نتروجينا ..ينصح بها أطباء الجلد ..قالت لي نحن ما بنخلي زيت السمسم والكركار والمجموع لأمور الغش والسلفقه دي ..غايتو اتونسنا ما خلينا حاجه بتمسحو بيها ما طريناها ..خاصه اليومين ديل السقط كرمشنا ..دخلنا شارع سوق ليبيا وبعد خطوتين الأمجاد اتعطلت .. حلفت ستين يمين ما تدور ..هبشت البنزين لقيتو قاطع ..الله يقطع البنزين ..قلت للخاله يا حاجه معليش العربيه قطعت بنزين ..أديني الفيها النصيب وواصلي ليك برقشه .. مرقت ليها خمسه ألف وفرتقت .. يا حاجه يا حاجه ..عليك أمان الله ما اشتغلت بي شغله..انقشطت ليها في رقشه وعيك ..هسع اتصرف كيف ..تتصرف كيف كيف يا أوسطي نور الدين ؟ ..لحسن الحظ وقف لي واحد من الزملا ..قلت ليهوعمك في ورطه ..حنستو أكلت ليهو الظلط حتي رضي إديني شوية بنزين .. دفرنا العربيه ودخلناها في زقاق وسحبنا شوية بنزين واتحلت المشكله وخمسة الدلاليه زي ما دخلت زي ما مرقت ..قلبي قال لي حصل الوليه المكاره دي وشيل منها حقك ..نعلت ابليس وقلت أكيد ربنا بعوضني .. مشيت شويه أشرو لي خواجه وخواجيه لابسين ليهم جينز مقطع وسفنجات وكل واحد لابس ليهو نظاره سودا ..ممكن مشوار هلتون يا ( أستا )..الخواجيه عاوزه توريني إنها بتعرف عربي قلت ليها أوف كورس ..كم إن بليز ..انجليزيه من زمن ريدر تو ما خمج ..اتحركنا بسم الله وحسبنا الله ونعم الوكيل ..وفي أول صينيه قربت من جهة الخواجيه مره شحاده ..كرامه لله ..الخواجيه دخلت إيدا في شنطتتا مرقت ليها ورقه أم خمسين ألف ..الوليه ما صدقت ..دعت ليها بالخير وجري علي التلتوار ..أنا قلت الحساده ليك شنو يا نور الدين ..شايف الخمسين ألف كتيره علي الشحاده ..ما تصبر نصيبك بجيك ..مشينا شويه في التقاطع التاني اتقدم شحاد لابس نظاره وسايقو شافع صغير ..كرامه لله يا محسنين ..أنا في الحقيقه احترمت نفسي وقلت ليهو الله يديك أصلي عادم الهلله ..الخمسه ألف بتاعة الدلاليه راحت في البنزين ..الخواجه قال لصاحبتو ..نو ..نو .. الدور علي المره دي ..قال الكلام ده بالإنجليزي طبعاً ..ما أنا بفهم زي الكلمات دي ..ما حاجه دايره ليها فهامه ..زولك برضو طلع ليهو ورقه أم خمسين ألف أداها ليهو ..الراجل طلع لا عميان ولا حاجه ..رفع إيديهو يدعو للخواجه ..ربنا يزيدك .. ربنا يسلمك ..الخواجه افتكر عمنا محتج علي الخمسين ألف ..تاني سرت ليهو خمسين ألف أداها ليهو ..في اللحظه دي قلبي قرب يقيف ..قمنا للحساده يا نورالدين ..رحمة ربنا كان نزلت علي العباد ما ترضوها ليهم ..وصلنا الهلتون وقفوني ناس الهدف قدام البوابه علي الشارع الرئيسي ..الخواجه قال لصاحبتو حاسبيه وخليك كريمه معاه ..بالإنجليزي طبعاً ..ودي صعبه علي زول دخل الوسطي وحافظ جين إير .. (بي جانراس وز هيم ) ..قلت يارب ما تلقي فكه غير الخمسينات .. طلعت ليها ربطه خضرا ومرقت واحده قلت تمام مرقت التانيه قلت ما شاء الله مرقت التالته قلت اللهم أحسن وبارك ..لما مرقت الرابعه ووراها الخامسه أنا اتجمدت عديل ..وباي ..باي .. ومعاها بوسه في الهوا طبعاً أنا في الساعه ديك كنت عاوز زول يوديني الانعاش ..ميتين وخمسين ألف جنيه ..!! يا ما إنت كريم يا رب .. ياما إنت كريم يا رب .

mahagoub

12-01-2013, 02:59 AM

يا خلف الله ما جننتنا
اكمل يوم اقول اعلق عليه
القاك دخلت فى تانى يوم
لكن ما متعتنا عديل
رزقك ما شاء الله مانسحرك
لكن بطلع بى خراج الروح
لازم قدامه دقه كاربه
واصل

الامام يوسف

12-01-2013, 08:35 AM

قمة الابداع والثرد الجميل

واصل

عبدالغني خلف الله

12-01-2013, 09:05 PM

أحبتي الإمام ومحجوب ..صباحات الأنوار والجمال والإشراق ..
نعمل شنو يا أستاذ ..كلما تحصل علي زنقه أتلفت وما ألقاكم ..لكن ما في قروش بتجب بالساهل ..دمتما بألق .

عبدالغني خلف الله

12-01-2013, 09:11 PM

يوميات سائق أمجاد ( 7 )
أصبحنا وأصبح الملك لله ..يوم كامل وأنا أساسق ما لقيت غير مشوار واحد للثورات من قدام الفيحاء ..قلت ليعقوب المخ ما تعمل حاجه ..مش إنت أبو الفهم ..ورينا نعمل شنو مع الحاله الواقفه دي .. قال لي خليك قاعد عادي وسط الجماعه وأنا حأقوم أقول ليك يا نور الدين يلاك لست الشاي ..تقوم تلحقني ..ولما وصلنا لست الشاي قال لي أنا حأوريك حته ما يعرف بيها زول من الزملاء عشان ما يضايقونا وكده ..تمشي تتسكع في العصريات بشارع المطار ..بتجي طيارات ملانه ناس جايين من الأقاليم ما بركبو تاكسي المطار ..بس تلبد ليهم هناك أكيد حتلقي ليك منهم صيده تصطادا ..شربت الشاي بالقرفه والجنزبيل ويا مطار جاك بلي ..جنبت قصاد البوابه الغربيه ..قلت أصلي العصر وربك كريم لكن وين ألقي مويه للوضوء ..اتذكرت قزازة موية الصحه الكبيره النساها الراكب بتاع الثورات ..قلت أتوضأ بيها ..معقول أفقع مشوار لغاية الثوره عشان أقول للزول يا حاج إنت نسيت ليك قزازة مويه ..أكيد حيقول الزول ده يا أهبل يا مجنون ..يعني في حاجات ما بتفرق وفي حاجات ملزمين نرجعا لأصحابا عشان ما ناكل حرام ..الجريده مثلاً.. زول نسي ليهو جريده ..أرجع ليهو مكان ما نزلتو وأقول ليهو نسيت جريدتك ..المهم إتوضيت بموية الصحه وعندي مصلايه نزلتها صليت الفرض وبقيت أراقب في البوابه وأتفرج علي العربات ..طيران عديل وكلهم يا أمم متحده يا صينين ..نادر ما تمر عربيه فيها ود بلد ..التقول نحنا في نيويورك وبكين ..أخيراً اسمع ليك صوت طياره رهيبه ..قلت الحمد لله فرجت ..بعد شويتين طلعوا جماعه جارين ليهم شنط أشرو لي عكست الشارع قربت أعمل حادث مع خواجه ..اتفقنا علي المشوار وطيران علي أم بدات ..نزلتهم وقبضت ( الستك ) عاوز استعدل أشوف ليك واحد لابس أخضر في أخضر والطاقيه خضرا جاي جاري يكورك يا أسطي وقف يا أسطي ..قلت ليهو خير إن شاء الله ..قال لي سيدنا عاوزك في مشوار ..ركب معاي وشمال يمين شمال يمين والشوارع ما مخططا ..أخيراً وقفت جنب بيت في وسطو راكوبه كبيره من القش وانتظرت الفكي وانتظرت ما طلع لي ..سل روحي لغاية ما جا مارق ..والجماعه سيدنا سيدنا ..ركب معاي في الكنبه الورا ..واحد شقيان من الحوارين قال ليهو أختا كرسي الشهيد يا سيدنا ..اتحركت وقلت أدردش معاهو شويه ..كان شاب في التلاتينات وكده ..قلت إنت يا سيدنا طريقتك شنو ..فاجأني بكلام غريب .. قال أنا طريقتي إسمها ( أوانطه ) يعني أنا فكي أوانطه ..قلت ليهو كيف يعني ؟ ..قال لي لي أنا لا فكي لا حاجه ..اتخرجت من الجامعه قبل كذا سنه فتشت الخرطوم دي كلها عشان وظيفه حتي ولو هامشيه ما لقيت ..وين ما قبلت لقيت واحد من الزملا الخريجين سادين المحلات .. باعه متجولين يبيعوا بشاكير ومناديل ورق ..في من عمل ليهو تانكر حمار ..وفي من حايم بكفتيرة شاي .. قلت يا ولد ليه ماتجرب الشعوذه .. لقيت ليك الناس في الأطراف بسيطين ومسالمين..أول ما تجي المره أقول ليها في واحده كاتبه زوجك عشان يتزوجا يقوم الجن يركبا ..أقوم ألقي منها كان خاتم كان عتود ..يجيك زول معذباه الرطوبه ..أقوم أوصف ليهو خلطات وأقرا ليهو فيها ..يلا وده يكلم ده بقيت فكي مشهور .. يوم داك اسمي طلع في الجرايد في إعلانات لجنة الاختيار ..قلت يا بوي سيبك ..مدخل الخدمه حيجيب لي شنو ؟ ولا حاجه ..غايتو اتونسنا وحكي لي صاحبي حكاوي ظريفه ..ولما وصلنا قلب الخرطوم قال لي ما عارف ليك محل سمك كارب وكده ..قلت ليهو بلحيل..ضربنا السمك ورجعتو للخلوه وعصر لي مبلغ قلت ما احسبو لغاية ما أصل البيت..إيدي حرقتني تبنتو لقيتو مية ألف جنيه .. يا ما انت كريم يا رب ..يا ما انت كريم يا رب .

mahagoub

12-01-2013, 09:23 PM

المره دى زبونك كارب
ما كان تخليه يعمل حجاب
تعلقه فى الامجاد
يا صابت يا خابت

أبو صديق

13-01-2013, 12:34 AM

مية الف وسمك كاارب والله بختك يا أوسطي
اها والدفع حق السمك منو ؟؟
برضو سيدنا
قد لامست الواقع المسكوت عنه بمشاويرك الفسيحة
إنتظار في محطات يراعك المبدع ..

عبدالغني خلف الله

13-01-2013, 08:34 PM

أحبتي محجوب وأبو صديق ..شكلي كترت عليكم اليوميات ..أصبرو علي شويه أصلها عشرين حلقه بعد داك بعت الأمجاد واشتريت قطعة أرض ..هذا مع كل الود .

عبدالغني خلف الله

13-01-2013, 08:37 PM

يوميات سائق أمجاد ( 8 )
أصبحنا وأصبح الملك لله ..وقفت مع سيد البنشر عشان أوزن الهواء بتاع الإطارات لأني سمعت الزملا بتكلموا أمبارح عن أهمية الإطار بالنسبة للعربات وأنو المسأله ما ( روكا ) ساكت..تقوم تقيف لأي شافع بتاع بنشر يملا ليك اللساتك هوا علي مزاجو يوديك في داهيه ..أسمع يا أوسطي ممكن تودينا كوبر ..إتنين من الأساتذه سألوني بأدب شديد ..كوبر ,,أعوذ بالله مره بيتوني فيهو عشان شيك طائر ومن ديك وأنا بشارعوا ما بمشي ..طبعاً يا شباب ..المشوار وكده ..؟ ..ما في مشكله ما بنختلف ..بس لو سمحت اسنعجل شويه عشان محصلين لينا ندوه مهمه ..حاضر علي عيني وراسي ..خف إيدك شويه يا ولد .. قلت في نفسي الندوه دي قطع شك سياسيه ..وأنا من زمان مرضان بالسياسه ..في الواقع الناس كلها مرضانه بيها ..تحركنا والحركه والسكون بيد الله ..ما في زحمه ولا مضايقات ..وندوتكم دي يا أساتذه بتتكلم عن شنو ؟! ..إمكن نحضر معاكم .. الندوه بعنوان ( التحولات المجتمعية وجدلية الثقافه ) .. أفو ..أفو .. يا نور الدين ..؟! أمانه ما رحت فيها..في الحقيقه ده موضوع مهم ويجب أن يناقش في المجلس الوطني كمان بالإضافه للمراكز الثقافية ..قلت الكلام ده حتي لا أظهر جهلي بمثل هذه المواضيع ..نحن الآن نقترب من كوبري أم درمان القديم قصاد قصر الشباب والأطفال ..أحسن تمشي بينا طويل يا عم ..لا يا خي أحسن يمشي بينا بشارع المورده ومنو لكوبري شمبات علي الأقل نتنسم عبق التاريخ ..البرلمان والتشريعات التي تؤثر علي حياة المواطن وخور أبوعنجه وفيهو تتجسد بطولات المهدي والأنصار ..ثم بوابة عبد القيوم وما تمثل من تراث وإرث تاريخي ثم الطابيه التي تعيدنا لمقاومة الشرفاء من الآباء والأجداد للحملة البريطانية الاستعمارية ثم المسرح القومي الذي قال عنه ( جوته ) ..أعطني مسرحاً أعطيك أمة عظيمه ..والأذاعة والتلفزيون وما تمثله من ذائقة ابداعيه مروراً بكوبري شمبات الذي لا يزال يحتفظ في أثيره بصوت القائد الفذ عثمان دقنه والشعبية التي بناها الجنرال عبود الديكتاتور الوطني الوحيد في تاريخ الديكتاتوريات بالعالم الثالث ..وصاحبنا يتكلم وأنا موقف العربية قصاد السلاح الطبي لا عارف أمشي بكوبري أم درمان ولا كوبري شمبات ..حيرتونا معاكم ..الحمد لله ما قطعنا قوالة المشوار لأنو التعطيل ده كلو بفلوس ..مش ؟! ..أخيراً انتهي الزول الأخيدر من كلامو وجا الدور علي الزول الأصيفر ..يا صديقي ..يا عزيزي الفاضل ..صحيح سنجد عبق التاريخ فيما لو سلكنا شارع المورده إلي كوبر ولكننا سنتقابل مع التاريخ وجهاً لوجه عبر شارع النيل وحتي كوبري بحري القديم ..لاحظ معاي ..مقرن النيلين حيث يلتقي النيل الأبيض والأزرق ثم يمتزجان في نهر واحد هو أطول أنهار العالم ..وحدائق مارس أبريل حيث الانتفضة الثانيه ضد الأنظمه الشمولية ومتحف السودان القومي ذاكرة السودان ومنبع الأصالة والحضارة من لدن بعانخي وترهاقا ..وحديقة الحيوان وما تمثله من ذاكرة جمالية للطفولة ..وفندق القراند أوتيل الذي استضاف عبد الناصر والقمه الافريقية والقصر الجمهوري الذي شهد ذبح غردون باشا علي أيدي المهدويين ..وجامعة الخرطوم وثورة اكتوبر والشهيد القرشي وبابكر عبد الحفيظ ..ومعركة مستشفي العيون وثورة أربعه وعشرين ..عبد اللطيف ألماظ وصحبه الأبرار ..وليس ببعيد عن شارع النيل قبة البرلمان القديم واعلان السودان من داخله ..هذا هو التاريخ الحقيق يا أستاذ وهذه هي الخرطوم عاصمة السودان الأولي ..ولكن لعلك لن تجرؤ علي المقارنة بين الخرطوم وأم درمان ..لا ريب إذ أن أم درمان هي العاصمة الوطنية للسودان بل هي السودان المصغر .. والنقاش وصل درجه وأنا واقف منتظر القرار الأخير ..هل أقطع كوبري أمدرمان أم شمبات ومواعيد ترحيل الطلبه قرّب ..أخيراً قال الزول الأخيدر لزميلو الأصيفر .. خلاص ياخي ندي الأوسطي الخيار ليختار ..أنا ؟ ..والله ..وكترت ليك من والله ..وأنا في الواقع أقلب في الموضوع بيني وبين نفسي ..طيب ..تتصرف كيف يا نور الدين ؟ تستمصرف كيف ..؟ .. شارع المورده وريحة السمك ..وكوبري شمبات بعد الصيانه مكّتف بالحديد زي المجنون ..وصينية الملتقي ( العميكه ) ديك ..وشارع الزعيم الأزهري وقلابات الأسمنت والسكه حديد بحري ما تخلي ليك صاموله واحده ..ثم .. يا جماعه بصراحه أنا قررت أوديكم عن طريق الخرطوم بشارع النيل ..وهو كذلك ..وصلتهم ليك والونسه كلها ذائقه وتشظي لغاية ما وصلنا كوبر ..أها لغاية هنا أخليكم في رعاية الله وحفظه.

mahagoub

14-01-2013, 02:50 AM

يوم يحمل عبق التاريخ
وهو ممزوج بعطر الثقافة

ابن المدينة

14-01-2013, 08:07 AM

يا عمنا مشاويرك فيها من الروعه والجمال
ما يجعلنا في انتظار مشوارك القادم بلهفه

ود الضو

14-01-2013, 08:59 AM

معندي غير اقوليك : هل من مزيد
ومن قبل لك التحية
حقيقة سردك المنظم وحكيك الطاعم
اجبرني ان اقرأ كل البوست
في الانتظار
متعك الله بالصحة والعافية

عبدالغني خلف الله

14-01-2013, 08:42 PM

أحبتي محجوب وابن المدينة وود الضو ..والله صحبتكم رائعة وحلوة بالجد ..وأتمني أن أجدكم حضوراً وكل الرائعين والرائعات بهذا المنتدي ..ودمتم بخير.

عبدالغني خلف الله

14-01-2013, 08:47 PM

يوميات سائق أمجاد ( 9 )
أصبحنا وأصبح الملك لله ..بتين أصبحت وهؤلاء السادة أصحاب الحافلات والهايسات قاطعنها معانا ..الواحد فيهم بدون ما يضع ليك أي اعتبار يشيل العربيه يختها قدامك في مسافة نص بوصه يجهجهك ..أحسن الواحد يبيع أمجادو دي ويبيع قطعة الأرض ويشتري هايس ويجدّع في الشارع زي ما عايز أو يبيع الأمجاد وينزل لرقشه وبالفرق يبني ليهو إن شا الله أوضه واحده والقال حقي غلب زي ما قالوا العرب ..فالحين في القوالات وبس أهلنا العروب ..لكنني وجدت صعوبه كبيره في إقناع المدام والبنيات ..قالت لي يا نور الدين قطعة الأرض دي ضمان للمستقبل ..خلاص زهجنا من سيد البيت كل أول شهر عامل لينا وجع وش ..أحسن تدردق بأمجادك دي وربنا كريم ..لكن يا بت الحلال ..قطعتنا دي في ( سقط لقط ) ..بتين تجيها المويه وبتين تجيها الكهربا ..الله يقطع بيوت الحكومه ..نستنا روحنا ومسئوليتنا تجاه أسرتنا ..بيوت بجناين ومساطب والكهربا مجان والمويه مجان ..ونور الدين أفندي جا وسيد نور طلع لغاية ما مرقنا من ( الجنه وسقطا ) ..كنت سايق بدون تركيز وهذه الهموم تشغل بالي ..أشروا لي إتنين من البنات ..واحده بتتكلم بالموبايل من دغش الرحمن ..لو تلاحظو معاي أي بت منتظره المواصلات في الصباح تلقاها بتتكلم في الموبايل ..متين أصبحت للموبايلات ..ممكن تودينا سعد قشره ..ممكن طبعاً.. يالا ..يالا حافي كده بدون اتفاق علي حق المشوار يا بناتي ..ماشي ..وفي الطريق واحده فيهن موبايلا ضرب ..النغمه بتاعتا حلوه خلاص ..سألتها قلت ليها النغمه دي حقت شنو ..ضحكت وقالت لي دي نغمه شبابيه اسمها ( رقصة القرد ..) ما بتنفع معاك يا عمو ( رقصة القرد ؟! ) ..متين القرد اتعلم الرقيص ؟!.. وصلنا كوبري شمبات وجنب الصينيه لمحت شاب زي معوق وكده ..قالن لي ..أخد الأجر في الشاب ده ..وقفت ليهو ..طريقة سلامو بعد ما ركب معانا ونظراتو بتقول أنو بعرفن معرفه جيده ..يا رب تكون دي صدفه ..؟! ..وصلنا سوق سعد قشره ..نزلت البنتين والزول قاعد في العربيه ..قال لي بالمناسبه يا حاج إنت أخدت حسابك من البنات ديل ..قلت ليهو لا طبعاً مش إنت الحتدفع ؟! ..قال لي وأنا علاقتي شنو بالموضوع ..معقول الكلام ده ؟! ..يا بنات ..يا بنات ..نزلت من العربيه ولسه هن ما اتوغلن في السوق كويس ..يا مواطن وقف البنات ديلاك ..ياتو بنات يا زول ؟! ..إنت جنيت ولاّ الحكايه شنو .. شوف في كم بت هنا ..يا بنات ..أخيراً وصلتهن ليك ..الظاهر إنكن نسيتن الحساب ..أي والله ..معليش يا عمو حقك علينا ..هدي يا سيدي خمس وعشرين ألف جنيه ..كتر خيركن وآسف علي إزعاجكن ..رجعت للعربيه ..لا لقيت عربيه ولا يحزنون ..العربيه ؟! ..العربيه ؟ ..يا شرطه ..عربيتي اتسرقت ..عربيتي ..أهو داك الحرامي لافي من الناحيه الشماليه ..أركب بسرعه ..أركب يا زول ..وعربية النجده تعجبك شغلت الأنوار ..وواك ويك .. واك ويك ..والحرامي ماشي بسرعه رهيبه ..علي الله ما يصدم بيها ..عامل معوق وهو شديد زي الحجر ..صاحبنا شعر بالمطارده لف بشارع ترابي ونحن وراه ..ومن شارع لشارع ..العربيه وقفت .. أصلي كابي فيها بنزين بخمسه ألف جنيه لاوراهن لا قدامن ..زولك نزل من العربيه وقام جاري طاردناه لغاية ما قبضناه ..وفي مركز الشرطه حكيت ليهم الحكايه قالوا لي أكيد البنتين مشتركات في الجريمه ..تمام والله .. ياهو الكلام بالموبايل كان معاهو هو وليس مع أي شخص آخر .. وطوالي رسلوا معاي عساكر لسوق سعد قشره ..فتشنا كداا لغاية ما لقيناهن وفي المركز اعترفن بأنهن ضحيه للزول المقبوض عليه ..كلهم ساكنين في حته واحده وكلهم عطاله .. اتفق معاهن علي التمثيليه البايخه دي عشان يسرق العربيه حقتي ..الوغد ..لكن ربنا موجود ..أخيراً الشرطه سلمتني العربيه بعد ما جروها لغاية النقطه وكتر خيرهن سحبوا لي جالون بنزين وصلني لغاية الطرمبه ..الجماعه في الموقف شتتوا التمر ..وأنا عملت كرامه لقيمات وشاي بلبن وديتا للجامع في صلاة المغرب ..لكن يعقوب المخ وبقية الشله ..شبكوني ليك ..قلت لي النغمه إسمها شنو ..رقصة القرد ..يا قرد ..وهاك يا ضحك ..لكن أنا زول موظف قديم عمري ما سمعت بنوع الاحتيالات دي ..يا مؤمن يا مصدق ..ماسكين سكتنا وربنا يدينا زي ما أدا غيرنا ..نعمنو أدانا وزياده ..والحمدلله ..أها ..أخليكم لغاية هنا ..ونشوفكم المره الجايه ..فقط ( إبقوا معنا ..) .

أبو صديق

14-01-2013, 09:23 PM

إبداع وإمتاع يا عبد الغني أخوي
والشغلة دخلت في التشويق والآكشن
بركة الجمعت بالعربية آآ زول وما تملحنا من الكرامة

عبدالغني خلف الله

24-01-2013, 11:27 PM

الأعزاء أبو صديق ومطاميرو
جمعه مباركه لكما ولكل أصدقاء النفاج ومعذرة لهذا التوقف القسري فقد حلف الملف بالتقطعوا ما يفتح إلا بعد الصيانة المكثفه
يلاكم للمشوار الجاي مع كل الود

عبدالغني خلف الله

24-01-2013, 11:34 PM

يوميات سائق أمجاد(10 )
أصبحنا وأصبح الملك لله ..قسط الجامعه بتاع ولدي الكبير قرب ..لذلك لا بد من العمل بالليل والنهار عشان المبلغ يكون جاهز ..في الأيام العاديه لما ألقي لي مية ألف جنيه أعمل خلف دور وطيران علي البيت ..مية ألف تعدل المزاج ..أكتر منها بعمل لي أم هلا هلا ..لكن مع ألوفات الأقساط النازله زي مطر اليومين ديل مية ألف ما بتعمل حاجه لكن نقول الحمد لله ..في ناس ما لاقيه حق الكسره ..طلعت الشارع أشروا لي تلاته شبان ..صباح الخير يا معلم ..أهلاً وسهلاً ..ممكن تودينا مشوار ..طبعاً يا شباب اتفضلوا ..وين كان الله أراد الخير ..؟ والله نحن ذاتنا ما عارفين بالتحديد .. ضرب لينا أخوياً لينا وقال حبوبتنا ماتت وشالو الجنازة ماشين علي المقابر.. نسينا ما نسألو ياتو مقابر ..لكن هم في أم درمان ..بس يا شباب حكاية المعلومه الناقصه دي وصلت لغاية عندكم كمان ..مالكم ما إنتو لسه صغار الشاغل بالكم شنو ..؟ واحد منهم قال لي قول لينا شنو الما شاغل بالكم ..لكن الموضوع بسيط نبدأ بمقابر حمد النيل ونلف علي شرفي ومن مقابر لمقابر لغاية ما نلقاهم ..لكن ده بتطلب الاتفاق علي المشوار ..وخلينا نقول أنا حأكون تحت تصرفكم لغاية الساعة اتناشر ..ماشي ..؟ ماشي ونص ..يالله علي حس كده حتدوني كم ؟ ..مية ألف كويسه ؟ ..نعمه من كريم ..بسم الله وحسبنا الله ونعم الوكيل ..مشينا من مكان لمكان لغاية ما لقينا الجماعه علي وشك الانتهاء من الدفن ..ظنيتو في مقابر جاهزه ..وحكاية المقابر الجاهزه دي فيها مشاكل بالرغم من حسن النوايا ..قالو ناس الشرطه اكتشفو أنو بعض الحراميه بخزنو فيها المسروقات وممكن يدفنو فيها زول عديل وتضيع معالم الجريمه ..نزلنا رفعنا الفاتحه أكان اشوف ليك واحد من جماعتي هاك يا بكا .. (جعّير) عديل زي ما كان بسووا أهلنا الزمان زمن المحنه ..الواحد هسع يقولو ليهو حبوبتك ماتت يقول ..بالله !! ..الله يرحما ..ومن المقابر علي محل الفراش ولغاية هنا المشوار انتهي .. قبضت المية ألف ..وقلنا اللهم لقد أنعمت فزد ..اتجهت ناحية السوق وكانت الحركه مزدحمه نوعاً ما ..واحد بتاع ملاكي ماشي وراي جنني جن .. يولع لي اللمبات الأماميه ويضرب لي بوري ..وأنا ما لاقي طريقه اتخطي لوري سفنجه من سنة دو ..ماشي قدامي بالسيسي ..أخيراً قلت الزول الشفيقان متلقي الحجج ده أحسن أخلي ليهو الشارع عديل .. ركنت العربيه ومررتو ..رفع لي إيدو باحتجاج شديد ما فضل ليهو إلا يقيف يضاربني ..رجعت تاني للشارع ..وعند التقاطع لقيت ليك زولي الما بغباني داخل ليهو في عربيه من الخلف وعامل شمطه عجيبه والناس متلمين حولهم ..سيد المارسيدس المصدوم من الخلف كان زول رايق ومهذب حاول يفهمو القانون ..قال ليهو أي زول يصدم الخطرات من الخلف غلطان ..ده كلام قانون المرور ما كلامي ..بعدين الخطرات دي سموها خطرات ليه ؟ ما عشان هي بتنبهك للخطر في حالة يقيف الزول القدامك فجأه وإنت سايق .. و بدل ما تتلفت شمال ويمين دي شينه ودي سمحه خليك معاين علي طول في الخطرات ..علول ما تولع أحمر إنت هدي السرعه وأضغط علي ( الهازارد ) .. زولك المتشوطن اتهيج وشتم الراجل وكلمه من هنا وكلمه من هناك جري علي الضهريه وخرت مفتاح العجل وجانا عديل عاوز يضرب سيد المرسيدس ..قمت أنا اصديت ليهو وقلت ليهو يا ابن العم أخزي الشيطان ..البلد فيها بوليس وفيها قانون ..قبل علي قال لي وإنت الحشرك شنو في الموضوع يا تافه يا حقير ..وما أحري ولا أدري إلا وخبتني ليك خبته بمفتاح العجل في نص راسي .. وقعت والدم زي النافوره وبعد داك ما شعرت بشي لغاية ما صحيت من البنج ..لقيت سيد المارسيدس قاعد جنبي في السرير ..قال لي حمداً لله علي السلامه ..الحمد لله جات سليمه .. الدكتور قال الجرح سطحي وكلها يوم أو يومين وتطلع من المستوصف ..وما تشيل هم الرسوم لأنو المستوصف ده يتاعي أنا وعربيتك في مركز الشرطه وده المفتاح وعندك أمانه عندي مبلغ حوالي مية ألف جنيه تقريباً أنا شلتو من جيبك مع الموبايل عشان ما يضيعو منك أثناء نقلك للمستوصف .. شكرني قال لي إنت راجل عندك مروه ..إتخيل الضربه دي لو وقعت فيني وأنا عندي سكري مستفحل كان عملت فيني عمايل ..أديتو نمرة الولد الكبير عشان يكلم الأولاد بالحصل لي ويطمنم ..بعد شويه دخل علي راجل وزوجتو عرفت أنهم أبو وأم الشاب الضربني وقالو لي نحن متأسفين علي الحصل ..مبارك ده أصلو متهور وحمقي ..غايتو أمسح الحصل ليك ده في وشنا ..قلت ليهم حصل خير وكل حاجه مسطره ومقدره ..قلت ليهم أنا عافي منو تماماً ولو جبتو لي التنازل أوقعو ليكم طوالي ..شكروني وهم طالعين ختو لي ظرف تحت المخده ..إيدي حرقتني تبنتو لقيتو مليون جنيه ..يا ما إنت كريم يا رب ..ياما إنت كريم يا رب .

أبو صديق

25-01-2013, 02:13 AM

يوميات سائق أمجاد(10 )
..قلت ليهم أنا عافي منو تماماً ولو جبتو لي التنازل أوقعو ليكم طوالي ..شكروني وهم طالعين ختو لي ظرف تحت المخده ..إيدي حرقتني تبنتو لقيتو مليون جنيه ..يا ما إنت كريم يا رب ..ياما إنت كريم يا رب .
والله سلامة ليك يا زول والالم بزول
بس مليون ومية الف وصاحب المرسيدس طلع بتاع المستوصف شكلها حا تمشي معاك باسطة
والحمدلله فوق القسط جاتك اقساط

mahagoub

26-01-2013, 08:55 PM

ماشه معاك حلاوه
وعينى بارده
ما تجى تطقنى بالمفتاح

مايسة

27-01-2013, 07:11 AM

صراحة بوست عجييييييييب
وحللللوووووووو

تسلم عبد الغني

انت مبدع جد في السرد

ربنا يحفظ ليك بناتك

عبدالغني خلف الله

28-01-2013, 07:33 AM

أحبتي أبو صديق ومحجوب ومايسه ..سلامات وألف تحيه مقرونة بالشوق لكم ..وربنا ما يضوقك ضربه زي دي يا ريس وشكراً علي الدعوات الصالحات يا مايسه..في الواقع لدي إبنه واحده وتعمل طبيبه ودرست لبعض الوقت بالمدرسة الشرقية بواد مدني وكانت وقتها المدام مديرة المدرسة واليوم لدي أكثر من إبنه والحمد لله ..مايسه وساريه وتغريد وبقية العقد الفريد دمتم بألق وإن شا الله المشوار الجاي يكون رايق ويدون مشاكل لأنكم مدعوون له .

عبدالغني خلف الله

28-01-2013, 07:38 AM

يوميات سائق أمجاد ( 11 )
أصبحنا وأصبح الملك لله ..ضربنا البوش وشربنا الشاي المظبط من ( أم جمعه ) ست الشاي .. إنسانه مكافحه ربنا يديها العافيه وفي تقاطع بانت ركبوا لينا ناس الحكومه مكنة فيها عداد باللون الأحمر يبدا ليك من تسعين وما فوق وساعة يديك أخضر ..ما بزيد في التلاتين ولغاية ما تقرب تصل يغير ليك أحمر ويرقعك بتسعين تانيه ..المهم لقيت نفسي ( في مفرق الطرق ) زي ما بقولو ناس الجزيره ..الجزيره القناه يا خي ..كُسح كُسح يقولوا ليك البلد دي في ( مفرق طرق ) ..قصدك مفترق الطرق ..ما كلو عند العرب صابون ..ما عرفت أمشي بشارع الأربعين ولاّ أدقش الخرطوم ..بعد تردد لفيت ليك لفه غلط باتجاه شارع الأربعين قربت أروح فيها ..واحد سائق تانكر بنزين التقول أعمي وأطرش ..لا خصاه بإشاره ولا كونتاك ..مشيت شويه لقيت ليك شكله قاجه قرش ونص ..بتاع رقشه صادم بتاع موتر ..والاتنين آخر ملاواه وما راضين اسمعوا كلام أي زول ..حلفوا ستين يمين لازم ينتظرو ناس الحركة يشوفو منو الغلطان فيهم ..لكن يا شباب وقفتو الحركه والناس دي وراها مصالح وصف العربات وصل أبوسعد بغادي ..عليكم الله طلعوا حاجاتكم دي من وسط الشارع واتفاهمو بالتي هي أحسن ..نط واحد فيهم قال ليهو .. نطلع حاجاتنا كيفن يعني ..مش مرخصين وعندنا حق زينا زيكم في الشارع ده ..هسع كان ( برادو) صدم ليهو ( كورولا 2007) كنتو قلتو زي كلامكم ده ..أنا فكرت وقدرت وقلت يا بوي ما تعكس الشارع وترجع تاني لصينية بانت ..التلتوار عالي شويه لكن بشوية مباصره قدرت اتخطاه بالله مجرد ما استعدلت طلع لي بوليس حركه من وين ما عارف .. ثبتني ليك طوالي ورصعني ليك بتلاتين ألف جنيه ..ياها ما عندي لا قبلها لا بعدها ..كنت ناوي اشتري بيها كهربا ..بوليس الحركه كتر خيرو رجع لي كرت الجمره الخبيثه كان جوه الوريقات ..واصلت طريقي وفي الناصيه وقفوني بتين ..واحده شايله شنطه والتانيه كاميرا ..أنا قلت يمكن ديل ناس التلفزيون عاوزين يعملو معاي مقابله ..أتجدع في الشاشه أغيظ ليك الشله بتاعتنا ..لكن واحده فيهم قالت لي ممكن يا عمو تودينا السوق الأفرنجي ؟ ..السوق الأفرنجي ؟! وإنت الخبرك شنو بالسوق العربي والأفرنجي ..شايفك يا بتي لسه صغيره ..أبداً المعلومه دي أدونا الليله بس في محاضرة ( تنمية المجتمع ) ..ماشي ..نتفق علي حق المشوار ولاً نخليهو بالنيه ؟ .. كيف يعني بالنيه ما فاهماك ..؟ يعني البتدوني ليهو مقبول منكن ..شبت التانيه قالت لي والله يا عمو إنت إنسان ( أوريجنال خالص ) ..آز يو لايك ..وفي السكه واحده فيهم كانت بتتكلم بالموبايل البطعنوه بالمرواد داك .. سألتها قلت ليها ده موبايل ده ؟ ..قالت لي طبعاً إسمو آيميت ..بشتغل بال ( بن ) ..قلت ليها لسه شرحك ده ما وقع لي سمح ..قالت لي بدل ما تدوس الأرقام تقوم تضغط بالقلم الضوئي ده ..يعني شنو ضوئي ؟!..مصنوع من الضو ولاّ الحكايه شنو ..معليش يا عمو ما حأقدر أفهمك ناو ..أعمل كذا مكالمه وأرجع ليك ..قامت نقدت ليك الشاشه بالمرواد الما بغباني وبعد شويه اسمع ليك ( كيفك ندي ..هابي فالنتاين ..وحياة ربونا إنت أول واحده أعيد عليها ..) في الحقيقه أنا اتربشت ربشه شديده خلاص ..قلت يا ربي عيد الضحيه السنه دي قدموه شهر ولاّ شنو ؟! مين عارف ..ناس الدنيا دي البقدرو عليهو ما شويه ..قلت ليها معليش يا بنيتي عاوز أسألك سؤال .. ياتو عيد ده الإحنا فيهو ؟ ..قالت لي أبداً يا عمو دي حاجه ما بتخص الناس الكبار ..أصلو الليله عيد الحب ..الحب الواحد ده ..ريدة البنوت وكدا ؟! هو ذاتو بس بشكل تاني وفالنتينو ده يطلع منو ..؟! ده شهيد الحب يا عمو ..وكان وين فاولينو ده من زمان ..اسمو فالنتاين ..كان وين مقطوع الطاري .. سمعنا بعنتر وعبله وقيس وليلي ..لكن زولكن ده لا سمعنا بيهو لا قريناه ..عموماً وصلنا السوق الأفرنجي ..أوكي أقيف لينا قدام الشوب ده ..أيوا بتاع الهدايا ده ..دقايق ونرجع ليك عشان ترجعنا ..ماشي يا بناتي ..المهم انتظرت وانتظرت ..أخيراً طلعن كل واحده شايله ليها باكتات ملولوه بورق ملون أشكال وألوان وكل باكته عندها قمبور ..اتحركنا والتلفونات تتخابت لغاية ما وصلتهن .. اعتذرن لي وقالن لي معليش يا عمو ..اتعبناك معانا ..أصلو عربيتي في (المينتنانس ) ..عشان كده أقبل مننا المبلغ ده بالهويه زي ما طلبت ..بالنيه ..النيه .. آز يو لايك .. طبقت الوريقات ودخلتهن في الجيب الأمامي وقبل ما أصل الإستوب تبنتهن لقيت مية ألف جنيه وطوالي علي ناس الكهربا ومن هناك للبيت ..ياما إنت كريم يا رب ..يا ما إنت كريم يا رب

أبو صديق

28-01-2013, 09:03 AM

مرواد وفلنتاين ومينتنانس وأورجينال كمان يا عمو
بختنا بيك وبمشاويرك الجميلة دي
وكل يوم بنشوف معاك بلوة جديدة وتقاليع وتقليد أعمي وهابي بيرث دي يا عبد الغني أخوي

mahagoub

28-01-2013, 11:31 PM

هى بقت كترت تقاليع واعياد
ما سمعنا بيها
وبقت عامه
حتى الكبار بساعدوهم فى عمل الكيك
والشاى والمرقات بره البيت
والسهر لى نص الليالى

عبدالغني خلف الله

29-01-2013, 09:39 PM

أحبتي أبو صديق والريس محجوب ..صباحات الروعة والجمال والتوفيق بإذنه تعالي ..كثير من الأخوة أخذوا اليوميات علي أنها ونسه ساكت وها أنتما تتلقفان الرسالة التي قصدت توجيهها للمجتمع العريض عبركم .. شكراً وألف ألف تحيه .

عبدالغني خلف الله

29-01-2013, 09:43 PM

يوميات سائق أمجاد ( 12 )
أصبحنا وأصبح الملك لله ..ما صدقت إني استلمت عربيتي من الميكانيكي ..أصلها قدت مكنه والسبب الاستعجال والشفقه ..والله صدق من قال شفقتكم قدت مكنتم ..لكن من القائل وما المناسبه ؟ ..حقيقة ما عارف ..مشيت مشوار شرق النيل ونسيت ما أتم المويه وكتين رجعت اشوف ليك الدخاخين مارقه من الكبوت التقول محطه حراريه ..ود حلال قطرني وصلني المنطقه الصناعيه ..المعلم فحص المكنه قال لي قاطعه وش وخلطت المويه مع الزيت ..لا حول ولا قوة إلا بالله ..ناس بتخلط وهي مرتاحه ونحن نخلط الزيت بالمويه ..قطعت وش ؟! ..اشمعني العربات بس البتقطع وش ..حاجات كتيره يا ريت تقطع وش وتريحنا ؟ ..زي شنو يا عمو نور ؟ ..يا زول ما تتكلم في السياسه ..عاوز تودينا في داهيه ..أنا قاصد الفلس ..الفلس كان قطع وش بنبحبح شويه ..لكن الأرزاق مقسومه وكان جريت جري الوحوش غير رزقك ما بتحوش ..طلعت الظلط أشروا لي إتنين آخر قيافه ..معقول ما عندكم عربات ؟ ..مرحبا ..أهلاً بيك ..لو سمحت يا معلم تودينا الخطوط في شارع الجمهوريه ..عندنا حجز وكده ..بس يا نور الدين الأمجادات ما بتمشي هناك ..جماعتك شافوني إترددت واحد نط قال لي ما حنختلف ..أمسك المية ألف دي وحناخدك في كذا مشوار ..مية ألف من قولة تيت ..؟ معقول أرفض .. يا زول سيبك ..سجن سجن ..غرامه غرامه ..ما في مشكله اتفضلو ..اتفضلو ..لون عربيتك يجنن ..الأخضر التركوازي ده لوني المفضل ..شكراً ليك ..ده من زوقك ..في الحقيقه أنا جيت بعربيتي من الخليج قلت أقضي بيها الإجازه وأرجع بيها لكن مع الزحمه الشديده في شوارع الخرطوم قرشتها من تاني يوم وبترحل بالتاكسي أو الأمجادات وأحياناً ركشات ..السواقه في الخرطوم بتنشن بي ..ما عارف يا معلم بتستحملوها كيف ..والله تقدر تقول اتعودنا ..مشينا شويه والونسه احلوت ..والجيب مليان ..الحمد لله والشكر لله ..الحاجه الما عملت ليها حسابي أنو ترخيصي ما مجدد ليهو يومين ..عمرة المكنه شالت الوراي والقدامي ..لكن القدرت عليهو التأمين ..أصلي ما بلعب في التأمين ..وصلنا صينية بانت رصعتني ليك ب99 ثانيه ..الصينيه دي من وين ما جيتا ترصعك بتسعه وتسعين وتفتح ليك خمستاشر ثانيه بس ..معقول مبرمجه علي الوقوف أكتر من انسياب الحركه ..بس أكان أشوف ليك عسكري حركه ليهو شنبات ..أكيد إيصال ولا كلمه ..ما مرخص ..عذرك شنو ..ما في عذر ..الزول قرب لينا وقال لينا صباح الخير يا شباب ومد لي ورقه في شكل منشور ما قدرت أقراها عشان النضاره ما معاي وقال لي لو سمحت يا معلم ما تقيف بعد الإشاره عشان تقدر تتابع الثواني ..يقومو الوراك يزعجوك بالبوري وتكون أخدت كذا ثانيه من زمن الآخرين ..في الوقت ده النور أدانا أخضر وفعلاً البواري اشتغلت ..مشينا شويه لقيت ليك كميه من شرطة المرور في صينية الحركه ..دي حمله عديل ..حمله شنو ؟ ..دي ميته وخراب ديار ..وكمان جايبين معاهم أطفالم الصغار ملبسنهم لبس الحركه ..وقفنا ليك نقيب وأدانا محاضره مفيده حول ضرورة إحترام العلامات المرورية واحترام حق الغير في المرور لا سيما في الصواني والتراص في صفين عند المداخل بدل الفوضي البتحصل كل مره وأنو الواحد يركز في السواقه بس وما يتكلم بالمويايل أثناء السواقه وأن حوادث المرور عندها عواقب وخيمه ونتائج كارثيه وما تسوق وإنت مريض أو مرهق ..وما ندي مفتاح العربيه للأولاد إلا إذا كان بحملو رخصة قياده ساريه المفعول وضروري نعمل صيانه دوريه للعربيه خاصة الفرامل وما ننسي التعامل بزوق وتهذيب مع مستعملي الطريق ونصحح أخطاء بعضنا البعض بدل العناد والتحدي والمعاكسات مع بقية السواقين ..غايتو يا زول شاب ما شاء الله عليهو ..وبعد داك قال لينا اتفضلو وآسف إذا أخدت من وقتكم الكثير وبالنهايه إحنا هدفنا سلامتكم ..الله يسلمك يا ابني ..فرتقت وأنا ما مصدق البحصل ده ..واحد من جماعتي قال لأخوه ..برضو عندنا في الخليج احتفال باسبوع المرو ..تقريباً في نفس الوقت مش كده يا بوب ..أخوه قال ليهو طبعاً اسمو اسبوع المرور العربي ..بقي كده ؟! ..تارينا في اسبوع المرور .. يعني ما في غرامات ..بختك يا عم نور قدامك اسبوع كامل لغاية ما ترخص ..اسبوع بس ؟ ما كنتوا تعملوه شهر المرور العربي ..أو بالمره خلوها سنة المرور العربي عشان نبرطع يمين وشمال ..انتهيت من مشاويري ورجعت للبيت جري ..يا ما إنت كريم يا رب ..يا ما إنت كريم يا رب

أبو صديق

30-01-2013, 05:31 AM

المؤسف يا معلم نور أن تجاوز الإشارة الحمراء أصبح أهون من رمي المخلفات بشباك العربية وإنت ماااشي
وحقيقي هنالك من لا يلتزم بالقوانين واللوائح المرورية ليس تحدياً وخروجا علي القانون ولكنها ثقافة مُعلمين كُباااااار
فإعطاء الأولية للمشاة ضياع وقت ومعاها شتيمة(الله لا جاب عقابكم ) ( ومليتو البلد) وعلي ذلك قِسْ ما تبقّي ولنا في إشارات
المروروالصواني خيرُ مثال لبروز العضلات وسماع ما يندِي له الجبين غير مكترثين بمن يسمع ( نساء - بنات - عوين - عوائل )
بالجد الشغلة جايطة شديد وتحتاج لإعادة تأهيل وصياغة برؤي مُغايرة لنرفع درجة الوعي لدي هذه الشريحة من المجتمع..
ننتظر مشاويرك بشوق وترقب فلا تطيل الغيبة يا صديق

ياسر عمر الامين

30-01-2013, 12:33 PM

حبيبنا عبد الغنى جيتك الكتيرة بيجاى دى على النفاج ما عاااااااااااااااجبانى..."ود المطامير نحن البينا عامره وزى ما كنا اول"...;);););)

متعك الله بالصة والعافية استاذنا عبد الغنى صاحب السرد الرائع والأسلوب الأنيق...

عبدالغني خلف الله

03-02-2013, 07:49 AM

شكراً ياسر علي التهنئه بوسام التميز وما يميز هذا الوسام هو الأول الذي أُحظي به علي مدي أعوام طويله ..ومنذ اليوم سيتم إخضاع مشواري الإبداعي للنقويم عبرإدارة المنتدي بطريقة علمية ومبتكره ..ولا أعني منحي أكثر مما أستحق ..ولكن عندما يجيء النقد والتصويب من داخل الأسرة يكون دائما في مصلحة المشروع الثقافي المعين ..فهيا يد بيد وربنا يحقق الآمال ويمد في الأيام لكم جميعاً ..سلمتم من كل أذي .

عبدالغني خلف الله

03-02-2013, 07:53 AM

الحلقة ( 13 )
أصبحنا وأصبح الملك لله ..الليله يوم تاريخي في حياة الأسرة .. فقد قررنا إنهاء مقاطعة اللحوم ..تلاته شهور ونحن سعرانينين عديل من عدم اللحم واللبن وما فضل لينا إلا نقول ( كاك ) من أكل الجداد ..قلنا ننتظر عيد الأضحي ونشوف شيل التمساح في أخوانا .. لكن الحمد لله حكاية الحمي النزفية طلعت أي كلام ..لا مش أي كلام لكن يعني بس مش بالصوره القطعت قلبنا خلتنا نقرم لحتة كستليته إن شا الله عضمه ساكت ..وبقلب قوي جداً ركنت الأمجاد حقتي حبيبة قلبي الأخضر التركوازي ..علي جنب وقلت لبتاع الكافتيريا أعمل لي تلاته سندوتشات شاورما لحمه ..لا بدون شطه ..تلاته يا مفتري ؟ وحتقدر تاكلن كيف ؟ ..أقدر ونص ..جريت لي كرسي وهرست ليك السندوتشات تحت دهشة وإعجاب رواد الكافتيريا والعاملين بها ..واحد عجبو المنظر جاب لي مشروب موبايل قال لي إتفضل يا أستاذ والله عجبتني بجرأتك وعدم خوفك من حمي الوادي المتصدع ..وده الصدعو شنو يا شاب ؟ ..ضربو زلزال لا سمح الله ؟ ..قال لي هو أنا عارف ..ما تري بسمع في التلفزيون حاجه زي كده ..مره يسموها النزفيه ومره المتصدع ..يالله ..وداعاً للحصار والإغلاق يا مزارع الدواجن ..جننتونا جن ..الله يسامحكم ..طلعت من الكافتيريا بمعنويات عاليه جداً كما ولدتني أمي .. إنت كمان ما تبالغ ..لما ولدتك أمك كواريكك تجيب الضهبان ..طيب يا عم نور الساعه كم دلوقت ..؟ الحمد لله لسه بدري علي الترحيل ..أوب ..ما تعاين قدامك يا إبني ..واحد خاشي علي بكتف غير قانوني قرب يرميني في الشارع ..اتلفت علي قال لي إنت عميان يا حاج ..ما بتشوف ..قلت ليهو يا إبني إنت الضربتني كتف ما أنا ..قال لي لا إنت الضربتني ..شويه شويتين أشوف ليك الزول هجم علي قبقبني من كرشليق الجلابيه ونطط لي عويناتو ..يا إبني أنا متأسف إذا كان أنا الضربتك ..تتأسف ما تتأسف المفروض تحترم شيبك ..قلت ليهو مقبوله منك تاني مره بقول ليك أنا آسف ..في اللحظه دي اتدخل واحد إبن حلال من دون الواقفين اتفرجوا علي عمك وهو بتهزأ ومن مين واحد في سن إبنو ..معليش يا أخوانا أقصروا الشر ..زولك هدن حبتين وفكاني ..والمعاه ساقو وانقشطو في حافله ..مشيت علي عربيتي وأنا ما مصدق البحصل ده ..معقول شبان الزمن ده يضاربو الناس الفي سن أبوهم ..استغفر الله العظيم وأتوب إليه ..والمشكله الكبيره الناس القاعدين في الكافتيريا ..أكثر من خمستاشر نفر كل واحد خاتي ليهو (حبكوكان ) جنبو يمزمزو في العصاير وكأنو البحصل قدامم ده ما هاميهم بحاجه .. يعقوب المخ قال المجتمع حصل ليهو تآكل من الداخل ..سألتو قلت ليهو يعني شنو تآكل من الداخل .. قال لي في ذاتيه مفرطه في التعامل مع الآخرين ..قلت ليهو عليك الله يا يعقوب بطل الفلسفه واتكلم عربي .. قال لي هنالك زيادة مطرده في ظاهرة الانكفاء والتقوقع وما عارف شنو .. كلمه كدي ما قادر أتذكرا ..تمشي وتجيني ..أيو حاجه زي عزله مجيده وكلام من النوع ده ..اتخيلو الكلام ده كلو وقع لي اليله بس .. بصراحه لو حصلت ليك مشكله إلا يلحقك البوليس لأنو مافي زول عندو استعداد للتصرف بإيجابيه ..وكان المفروض كل الشباب الفي الكافتيريا يختو نفسهم في مكاني ..ويقفوا الزول ده في حدو ..غايتو ربك سلم ..الحمد لله ما طعني بسكين وداني التوج ..فتحت باب العربيه هبشت جيبي لقيت القريشات الكنت عاوز أشتري بيهم لحمه بمناسبة إنهاء الإضراب عن اللحمه والموبايل ما في ..يا أولاد الأيه ..تارينهم كانو نشالين خاشين علي بحكاية ضربتني كتف وما عارف شنو ..وصلت الموقف حكيت القصه للزملا .. يعقوب المخ قال لي نفس السيناريو ده حصل لي واحد صاحبي .. قلت ليهو سيناريو يعنو شنو ؟ ..قال لي نفس التمثيليه البايخه دي شغاله تش اليومين ديل..قلت أشرب لي كباية شاي أعدل بيها دماغي وأبلع لي حبة بندول بعد الحصل لي ..صداع مخيف ..وبعدين أمشي أبلغ الشرطه ..جريت لي علبه جنب ست الشاي قعدت فيها وقلت للحاجه القاعده من فضلك أعمل لي شاي بنعناع وسكر عادي ..وصلت القسم شرحت الحاصل للشاويش النوبتجي الحصل معاي ..وبدا يسجل لي في البلاغ ..وقبل ما أكمل كلامي سمعنا دوشه وكميه من الناس معاهم عسكري جارين ليهم نفرين يلكزو فيهم شمال ويمين وعبارة ( ياهو ..ياهو ) ما تديك الدرب ..العسكري قال للشاويش الجماعه الاتنين ديل مقبوضين متلبسين بالنشل والتهجم ..عاينت فيهم أكان أشوف ليك جماعتي الهزأوني ونشلوني ..مبهدلين ومعفصين زي الكانو في عيتنوبه .. قلت للشاويش بس ديل ياهم ناسي المشتكيهم ..الشاويش أمر بتفتيشم أكان موبايلي يقع من جيب زولك ومعاه ربطة قروش ووراهم كذا موبايل وألوفات الجنيهات ..قلت للشاويش ده موبايلي ودي قروشي ..خمسه وخمسين ألف بالتمام والكمال ..المتحري عداهم وسلمني ليهم مع الموبايل بتعهد أني أحضر للشهاده متي ما طلب مني ذلك ..استلمت حاجاتي وطوالي جري علي البيت ..يا ما إنت كريم يا رب .. ياما إنت كريم يا رب .

mahagoub

03-02-2013, 10:37 PM

الرزق الحلال ما بضيع
وانت كل ما تتحل من زنقه
بتجرى البيت كايس الحمام ولا شنو ؟؟؟

عبدالغني خلف الله

04-02-2013, 10:44 AM

مساء الخير أستاذ محجوب ..عليك الله تعال الخرطوم إذا كنت خارجها وشوف الزحمه الفي الشوارع ..البقعدني شنو بعد ما ألقي لي ميه وميتن ألف ..وبالمناسبه دي المشوار بقا بخمسين ألف ..لذلك البيت أرحم ..وأنا أصلاً كائن بيتي ..دمت بألف ألف سلامه .ونخلي المشوار الجديد لبكره إن شا الله .. شايف الوقت إتوخر شديد .

عبدالغني خلف الله

20-10-2013, 11:21 PM

كل عام والجميع تامين ولامين ويحلو التواصل مع ناس النفاج مع يوميات جديده :
يوميات سائق أمجاد 14 أصبحنا وأصبح الملك لله .. يا فتاح يا عليم يا رزاق ياكريم ..الليله وبعد ما طلعت العربيه من الحوش صابحوني نفرين ..واحد بتفاءل بيهو شديد .. مدرويش وجنو ضحك .. يضحكك سبه برا سبب غصباً عنك وما يخليك لو ما ضحكت جد جد .. ما بنكت ليك ولا حاجه لكن يقول ليك أي كلام خارم بارم ويضحك من أعماقو يعاديك بالضحك التقول ما عندو أي هم في الدنيا دي والتاني متجهم ومتقرضم وعامل أهميات وكده ..زمان وكتين مفلس محل ما تقبل تلقاه قدامك و هسع بعد ما ركب ليهو عربيه ولبس ليهو بدله مضيقه علينا .. يسلم عليك بكلمه واحده بس ..كيفك ؟ ويعاين قدام .. صباحو يقطع الملح من البيت .. قلنا زي بعضو كسر ده في جبر ده ..وصلت الشارع أشرو لي تلاته أنفار يتشابهو زي التعاريف ظنيتم أخوان ..واحد فيهم منطط عويناتو زي الراميهو جمل ..ممكن مشوار يا أوسطي .. بلحيل اتفضلو ونحن برا المشاوير المارقنا في السقط ده شنو .. أها وين كان الله أراد الخير .. نط الزول الكبير فيهم قال لي مستشفي التجاني الماحي .. زولك المنطط عينيهو من ما سمع كلمة التجاني الماحي حلف إلا ينزل .. لكن جماعتك عصروه بيناتم وطمنوه .. مستشفي نضيف يا خي يدوك حقنه مهدئه ونرجع .. أفو ياخال الساره .. كمان بتخاف من الحقن .. أنا أخاف ؟! علي بالطلاق أرجل مني في البلد دي مافي .. لكن دنيا ما بتدي حريف .. أنا يشمعو دكاني أنا ؟! وبعد شويه قلب ليك الموجه .. شي دوبيت وشي هضربه ..أنا في الحقيقه لاوزت ودخلتني خوفه ..قلت هسه الزولده كان هبر من أخوانو ديل وعمتني وأنا سايق ما بدخل بينا كلنا في حافله تسقّط حجرنا .. قلت ليهم كفاره لأخوكم يا جماعه ..قالو لي كفر الله سيئاتك .. زولنا شديد ماعندو حاجه بس شوية نفسيات ..إن شا الله ما عوجة كبيره ..قالوا لي أبداً أخونا ده تاجر في السوق وبعدين فاجئوه ناس الضرائب بتقدير كبير شويه .. تقدير شنو ما قالو كل تاجر يّقدر ضريتبو براه ؟ .. بعد شويه الدوبيت بقي بأعلي صوت التقول بالع ليهو مايكرفون ..وقفنا في أستوب ناس هايس قصادنا استغربو من منظر أخونا ده مدوا رقابم يتشمشموا الخبر.. اتلفت ليك عليهم بالشباك شتمن شتيمة الأرازل ..بتعاينو لشنو يامتخلفين ..متين إتعلمتو ركوب العربات .. نسيتو إنو جدودكم وآباكم كانو بركبو الحميروالبغال يا غجر ..أخوانو قفلوا القزاز بتاع شباك الأمجاد بسرعه واتحركنا ..غايتو ياالله ويا مين وصلتهم مستشفي التجاني الماحي نزلو يكركروا في صاحبنا ولا اشتغلوا بي الشغله .. يا أخوانا حق المشوار ..يا أخوانا ..جماعتك انقشطوا جوه المستشفي وخلوني متحير ..قلت ربنا يعوضنا .. الحمد لله جات علي كده ..عاوز اتحرك وقفوني تاني تلاته طالعين من باب المستشفي سايقين ليهم زول قيافه ولابس بدله .. لكنو ما بختا الهباشه .. قلت اللهم أجعلوا خير .. عليك الله يا أوسطي تودينا مشوار ..بي كم ؟ ..خلوها علي النيه ..كتر خيرك ..قلت ليهم واحد فيكم يركب قدام .. قالو لي معليش خلينا ورا .. أخونا ده كان عندو شوية نفسيات لكن الحمد لله بقي كويس ..قلت ليهم إن شا الله ماعوجة كبيره ..قالوا لي أبداً ما حاجه مهمه ..أصلو معيد في الجامعه وكان بحّضر في الدكتوراه عن السياسه الخارجيه لأمريكا .. مسكا ليك من روجرز وكيسنجر لغاية كونداليزا رايس ..ظنيتو اتبحر شويه في الموضوع لغاية ما فكت منو الله ساكت شفاه ..قلتليهم الدكتور ده ما لقا حاجه غير السياسه الخارجيه لأمريكا ..كان يكتفي بالسودان يمسكا من المحجوب لغاية مصطفي عثمان .. واحد فيهم قال لي عاوز تقرض لينا أخوناالصغير ولاّ قصدك شنو يعني ؟! ..قلت ليهم يعني .. سياستنا الخارجيه لا فيها العراق ولا أفغانستان ولا إيران ..قال لي كدي خت نفسك في مكان وزير خارجيتنا وقول لينا حتعمل شنو مع العقوبات الاقتصاديه النازله علينا زي المطر ..ومنظمات حقوق الإنسان والقوات الهجين والتدخل الإثيوبي في الصومال وقوات النيتو في الحدود مع شاد ووساطة لبنان ..غايتو اتونسنا ما خلينا موضوع وزولك ساكت ساهي .. الحقيقه أنا لاوزت ودخلتني خوفه .. أخير التاجر بتاع الضرائب بفضفض الفي قلبو بالهضربه ..لكن الزول المهود ده ..ظنيتو لابد ليهو فوق راي ..ومره مره يجبد نفسوا ومعاه أف زي التقول مليان غباين .. ومرات يتفس بضلوعو زي الجمل ..غايتو ربك رب الخير وصلنا للعنوان الأدوني ليهو وانقشطوا جوه وزولك المهود دخلوه بالقوه ..تسمع كلمة الجامعه ..ياأخوانا الجامعه ..وبس عليك أمان الله زاغو لا قرش لا تعريفه .. مشيت علي البحر قلت أغسل العربيه أحسن لي من المشاوير المطرشقه دي ..أصلها بايظه بايظه ..نزلت الوطايه اليمين عشان أنفضا من الغبار أكان ألقي ليك جزلان مرمي تحتها .. فتحتو لقيت فيهو فيهو بطاقات أشكال ألوان وحوالي مليون جنيه .. عملت خلف دور وطيران علي مركز الشرطه .. قالو لي أعمل عريضه عشان تضمن حقك ..وشكروني علي البلاغ وقالو لي يا ريت لو كل سواق يلقي ليهو أوراق أو مبالغ يجيبا الشرطه عشان يمكن تكون مهمه بالنسبه لصاحبا ومع كده ياكل حلال ..سألت عن الضابط المسئول قالو لي المكتب نمره تلاته علي يمينك .. قدم بلاغك لجناب الرائد هدي ..مشيت لقيت لي شابه قيافه كده لابسه رسمي .. قيافه شنو ؟ .. دي ترمي في الشوك عديل .. سجلت البلاغ واتصلت الشرطه بصاحب البطاقه وطلعت لي بمية ألف جنيه حلال بلال وجري علي البيت .. يا ما إنت كريم يا رب ..يا ما إنتكريم يا رب .

عبدالغني خلف الله

22-10-2013, 12:10 AM

يوميات سائق أمجاد ( 15 )
أصبحنا وأصبح الملك لله .. يوم جديد وهموم متجدده ..هم المعيشة وهم ترخيص العربية ..وهم تجديد رخصة القيادة ..وهم صيانة العربية قبل الترخيص ..أمبارح ماشي قدامي قلاب شايل خرصانه ..فكاني بحصحاصه خرمت القزاز القدامي وعملت خط من اليميم للشمال ما مخليني أشوف كويس ..واليوم أمامي عربة صحه عملاقه في شكل شاحنه توزع شحنتها علي الغاشي والماشي ..شي مناديل ورق وشي كراتين فاضيه وشي أكياس نايلون تتطاير يمين وشمال ..أكيد لما يصل الكوشه الرئيسية حيلقي البضاعه ضاعت في نص السكه ..ضغطت علي الأبنص عشان أتخطاه .. لكن العربية ماشه بسرعة مية في الساعه ..غيرت رأيي لأني لمحت ليك واحد شايل شنطه سامسونايت ..أشر لي وقفت ..الناس البتشيل شنط سامسونايت ده نوع الركاب الفيهم فايده ..السلام عليكم .. مشوار يا حاج ممكن ..طبعاً ..اتفضل ..وفي الطريق عرفت منو أنو مغترب في إجازه وهو ماشي سوق السمك في المورده لأن السيده حرمه بتتوحم ومشتهيه سمك جمبري ..جمبري ؟! ..جمبري ده يطلع شنو ؟! ..قرموط يعني ..بلطي ..خرشه ..كبروس ..عجل ..يكون سمك بلطي ..لا يا عم ده نوع من حيوانات البحر ..حاجه كده زي عقرب الجمال ..أصلي يا عمي سقت المدام شهر عسل السنه الفاتت في اسكندريه ..ومما جيت في الأجازه توصيني كل يوم علي جمبري ..قالت إيه ..قالت بتتوحم عليهو .. وصلنا سوق السمك وكلما زولنا يسأل واحد يطلع ما عارف حاجه ..أخيراً واحد مصحصح كده سايق مرسيدس وصف ليهو سوبرماركت في الرياض ..وأكد ليهو أنو الصنف ده موجود هناك ..استعدلنا وعلي طول مسكنا الشارع لغاية الرياض ..قلت ليهو اسم الكريم منو قال لي حنفي ..وأنا عمك نور الدين اتشرفنا وفي السكه عرفت منو أنو جاب معاهو( سيديهات) مسرحيات مصريه ..وبعد ما مدامتو شافت مسرحية المتزوجون بتاعة سمير غانم ..شبكتو ليك عبارات من المسلسل ..( شفت يا سي حنفي ..تروح وتجيلنا بالسلامه يا سي حنفي ..إن شا الله في كل خطوه سلامه يا سي حنفي ..وأعمللك أهوه يا سي حنفي تعدل دماغك ..) ..وفي الآخر طلعت ليهو بحكاية الجمبري دي ..يعقوب المخ قال ده ..ده انسلاخ ثقافي ..قصدك استلاب ثقافي يا حاج ..ايوا حاجه زي كده ..عليك الله ما ملاحظ أنو في تغيير في طريقة الكلام والتصرفات اليومين ديل ..بتي البتقرا كمبيوتر شابكاني ليك كلما ترجع من الجامعه ( هاي داد وهاي دادي )..تخليني أنا وتقبل علي أمها ( هاي ماميتا وهاي مامي ) سألت أختها بتاعة القانون والشريعه قالت لي .. (كنو) بتسلم عليكم وكده ..وتسلم علينا بهاي داد ؟! والله آخر زمن ..وين سلام زمان ..السلام عليكم ورحمة الله تعالي وبركاته ..أو علي الأقل سلام الحبوبات ..إزيك يما وإزيك يابا ..ما تقول حاجه يا حنفي يا ولدي ..أقول شنو وأخلي شنو يا عم نور الدين ..الدنيا اتغيرت ..صدق يا عم نور الدين لو المسأله وقفت لحد ( هاي داد وهاي دادي ) ما في مشكله ..لكن أنا شفت بعيني بنات بتدخن سجاير ..سجاير عديل كده ؟! ..وكمان شيشه ..نان ما بالغت عديل يا حنفي ..بنات يدخنن ..لا ..لآ ..دي مبالغه منك ..الدنيا اتغيرت والزمن ما زي زمنكم ..هسع في حاجه إسمها ( قو تو قيزر ) ..شنو شنو ؟ ..( قو تو قيزر ..) حاجه زي التعارف بين الشباب ..تعارف بس ؟! ..يا خي قطعت قلبنا قطعه ..تعارف في حدود الجامعه ..ممكن ولدواعي التحصيل والمذاكره والبحوث وما أدراك ما البحوث ..لكن خارج الجامعه ؟! ..ما بتفق معاك ..مش يمكن يكون في الحدائق العامه يا عم نور الدين ؟! ..عاوز تقول لي إنكم زمان ما قاعدين تطلعوا رحلات وكده ..رحلات ؟! ..زمان البت تشوفا من العرس للعرس ..وبيناتكم مسافه من هنا لغاية التلتوار داك ..إقعدن في السباته ..يعاينن لينا ونعاين ليهن ..والمحظوظ حبيبتو تقوم ترقص وتديهو شبال ..والله يا عم نور الدين كنتو ناس ضايعين ساكت .. ما شفتو للدنيا حاجه ..وليه ما تقول إحنا ناس عندنا عادات وتقاليد متمسكين بيها ..علي العموم أها وصلنا السوبرماركت علي الله تلقي ..الإسمو شنو ؟! ..الجمبري ..انتظرتو شويه وجاني شايل ليهو كيس فيهو المصيبه ديك ..ريحتا ما بتتقابل ..جاب لي معاهو علبة بيبسي ولبان أبيض زي المخده ..قال لي ده لبان ( ريلاكس ) ..لما تكون متوتر بهدي أعصابك شويه ..أي والله ..متوتر ساكت وبس ..أنا أبو التوتر ذاتو ..ولغاية هنا أخليكم حتي المره الجايه إن شاء الله .

ابوالنور

22-10-2013, 02:07 AM

ي سلاااام ي عبد الغني كل سنة وانت طيب بالله كيف مع ارتفاع البنزين ؟

عبدالغني خلف الله

22-10-2013, 10:31 PM

عزيزي أبو النور ..كل عام وأنتم بخير ..والله بعد هذا الغياب غير المقصود لكثرة المشغوليات ..اشتقنا ليكم ولمدني الحبيبة التي أمضيت بها سبعة أعوام بالتمام والكمال ..كانت بحق من أجمل أيام حياتي ..أما بخصوص البنزين الحمد لله الداماس ما بتصرف كتير ..والمشوار بقي بسعر خرافي ..عيييك ..خليها في سرك ..ونأسف لتكرار الحلقه 15 ..نرجو التصويب وإلي الحلقة 16 مع كل الود .

عبدالغني خلف الله

22-10-2013, 10:37 PM

الحلقه 16
أصبحنا وأصبح الملك لله ..شربت الشاي والقهوة وتوجهت في طريقي نحو السوق العربي باكراً علي غير العادة حتي أعوض خسارة فقداني للجوال الذي سرقه مني زبون علي طريقة السينما ..جاء حاملاً حقيبة ثقيلة وطلب مني أن أنقله مشوار ..وبعد الإتفاق علي الأجرة ..فتحت الباب الخلفي لأدخل حقيبته تلك وعندما عدت له وجدته قد اختفي ومعه الجوال خاصتنا والذي كنت أضعه علي ( الطبلون ) ..وما أحزنني أنه ضحك عليّ وحرمني من وسيلة التواصل مع زبائني ..وكلفني مشوار لتسليم الحقيبة للشرطة وعندما فتحوها وجدناها وهي تنوء بالحجارة ..الشاويش قال لي ربنا يعوضك .. بعد أن علم بالقصه ..عدت أدراجي للموقف وما أن توقفت حتي تقدم نحوي إثنان من الشباب ..مرحبا .. ممكن تودينا مشوار( الكلاكله ؟) ..ممكن طبعاً ..بكم المشوار ؟ ..مائة ألف جنيه ..كم ؟!! ..مائة ألف جنيه ..يازول إنت ماك براك ؟ ..يا شباب بين سيد البضاعه والمشتري ..يفتح الله ويستر الله .. ماقلنا حاجه لكن نحن ماشين الكلاكله وليس كلكول ..والله يا شباب أنا كلمتي واحده ..سيبك منو ده واحد جبان هكذا وصفني أحدهم لرفيقه ..ومن ثمّ إنصرفا ..تقدم نحوي بعد حوالي نصف ساعة انتظار شخص وزوجته فيما يبدو ..يا أسطي ممكن تودينا ( سوبا ؟ ) ..ممكن طبعاً.. بكم المشوار ؟ ..مائة ألف جنيه ..يازول إنت بتهظر ؟ ..لا بهظر ولاحاجه ..التفت نحو زوجته وهمس في وجهها ..سيبك منو ..ده واحد جبان ..فكرت في تناول شيء من الكافتيريا القريبة من الموقف ..فتقدم نحوي رجل في العقد السادس من العمر ..يحمل ربطة كبيرة من الكتب ..يا إبني ..يا إبني ..ممكن توديني معرض الكتاب في بري ..؟ ..ممكن طبعاً بس في الأول أفطر وأجيك ..والمشوار بكم؟ ..خليهو علي النيه ..خلاص أنا ذاتي عاوز أفطر ..يلاك ..لكن ما تدخل الكتب في الأول ..يا أستاذ ما تخاف عليها ..عمرك شفت ليك زول سرق كتاب أو كسر مكتبه ؟ ..تعال ..تعال ..أؤكد ليك أنها لو قعدت سنه ما في زول يهبشها ..وفي الكافتيريا دردشنا أثناء تناول الساندوتشات ..سألته عن سبب ذهابه لمعرض الكتاب ..والله يا إبني طبعت الكتاب ده قبل خمسه سنين ما بعت منو غير خمسه نسخ بس ..كتابك ده بتحدث عن شنو يا عم؟ ..الكتاب عنوانو ( هموم العصر الحديث ) ..وبتحدث عن الصراع بين الإنسان والحضاره في إطار المنظومة الجديدة للقيم المجتمعية السائدة بعد ظهور العولمه والحداثه ..طبعاً ما فهمت أي حاجه وقلت ليهو والله ده كلام كويس ..ربنا يوفقك ..وعندما عدنا للعربة وجدنا ربطة الكتب سليمة لم يلمسها أحد ..قلت ليهو ..جاك كلامي ..الكتب زي ماهي ..ما في زول شال منها حاجه ..هسع لو ربطة أحذيه كان اتسرقت ..غضب من كلامي هذاوقال لي في انفعال ظاهر ..كيف تتجرأ وتقارن الكتب بالأحذيه ..هذه إهانه للمعرفة ..طيبت خاطرو وحملته حتي المعرض ..منحني خمسة ألف جنيه وهو يعتذر ..شكرته ..وأمام بوابة المعرض ركب معي شخصان طلبا مني أن آخذهم مشوار لغاية الحتانه ..الشخص الأكبرسناً تبدو عليه سيماء الأهمية ..والشخص الثاني أصغر سناً ما أن تحركنا حتي ( شبكوليك) سعادتك .. سعادتك ..بدون ذكر الإسم وهو يرد عيهو يا جنابو عمر ..الموضوع في منتهي البساطه ..ديوان الحسبه والمظالم وضع الأمور في نصابها الصحيح ..ما سمعت لأستاذ عباس النور المحامي قال شنو ..؟ ..أبداً ما سمعت قال شنو سعادتكك ..قال ياسيدي ..ناس الخدمه المدنية ستصدر قرارات بالنسبه ليهم بداية العام الجديد عباره عن معالجات لكل الضرر الذي لحق بهم ..أما ناس القوات النظامية فدول ..مسئولية وزارةالدفاع والداخليه لأنو موقفهم حساس شويه ووزاراتهم أدري بما يتوجب عمله ..المهم وصلتهم حتي الحتانة ..وسعادتك وجنابك نازله ( هبطرش ) ..وبعد حليفه استمرت لربع ساعه حسم الزول الكبير سعادتو الموضوع بعبارة .. يا نقيب خليك منضبط ومن ثمّ نقدني مبلغاً لا بأس به من المال عوضني خسارة مشوار صاحبنا بتاع الكتب .وحتي جديد اللقاء مع يوميات جديده أترككم في رعاية الله وحفظه .

ابوالنور

23-10-2013, 10:02 AM

ياخ ربنا يعوضك والله الزمن العلينا دا الشريحة بقت صعب استبدالاها ف مالك بي تلفون كامل
واصل ي حبيب نحن في انتظارك

عبدالغني خلف الله

25-10-2013, 11:00 PM

صباح الخير يا أبالنور ومعاً ندلف للحلقة ( 17 ) أصبحنا وأصبح الملك لله ..بقيت مضطر أقوم من دغش الرحمن بعد ما اتنقلت ومعاي أولادي للحي العشوائي ..والسبب ناس التخطيط والأراضي .. الله يديهم العافيه .. لأني اشتريت لي قطعه قبل سنتين في منطقه غير مخططه وما عندي غير إيصال وشهاده مواطنه من شيخ الفريق ..لكن قبل مده جاني الشيخ في بيتي وقال لي يا أسطي نورالدين كان ما جبت عيالك وجيت سكنت معانا في الحي العشواوي .. ناس التخطيط كان جو خلاص راحت عليك ..البلقوه قاعد كيفنو بسجلواليه القطعه ..في البدايه ما عرفت أتصرف كيف .. القطعه ما عندي فيها غير أوضه واحده من الجالوص وراكوبه ومديها لجماعه مساكين بدون إيجار ..شيخ الفريق قال لي جماعتك سربوا .. خلو الحله وعنو الجزيره يلقطو القطن ..طرحت الموضوع للنقاش ..هل نقعد في بيت الإيجار والزول المتجهم ده كلو أول شهر ناطي علينا ؟ ولمتين ..المدام وافقت علي طول علي الرحيل .. وولدي الكبير والوحيد زول صحراوي متل أبوه قال لي يابا كان سكنت في الغابه أنا بمشي معاك ..المهم تكون في مواصلات تجيبني الجامعه وترجعني عشان ما أقيدك في المشيه والجيه .. بتي بتاعة الكمبيوتر اتهيجت وقالت ما بتمشي الحي العشوائي لوتسيب الخرطوم تمشي تعيش مع جدها في البلد ..أما بتي بتاعة الجغرافيا قالت لينا أنا معاكم معاكم .. كان قعدتو بقعد وكان مشيتو بمشي ..أصلها زوله مسكينه الغنمايه تاكل عشاها ..غايتو بعد نقاشات استمرت كذا ساعه اتفقنا نخلي البيت لسيدو قبل أول الشهر ونمشي نعيش زي ما الناس عايشه ..صاحبك سيد البيت ما عارف القرار ده ..من صبح الرحمن أول يوم في الشهر جاني صاري وشيشو وبهراشه طالبني بالإيجار ..قلت لنفسي يا معلم نور ..دي فرصتك تفش غبينتك في الزول الشفيقان ده ..نهرتو ليك نهره واحده طيرت جنو وشتمتو ليك بالعربي والانقليزي ..قلت ليهو ..إنت زول مسطح ..وبائس وانتهازي رجعي ( بلادي فول ..إديات ) ..اتفضل ده الإيجار ومن بكره ما حتشوف خلقتي ولا حاشوفك ..وشوف ليك زول يأجر بيتك الكوشه ده ..زولك قبض المبلغ وفرتق ومره مره يتلفت وراه زي الما مصدق ..وصلت الخرطوم وكانت قدامي عربيه فجأه لاجت جاي وجاي و ( تل) اللستك ضرب ..جنبت عشان اشوف أقدر اساعد سيدا كيف ..طلعت من العربيه شابه واضح أنها من الناس المرطبين ومرتاحين .. قالت لي يا عمو لو سمحت تغير لي الدوار ده وماحأقصر معاك ..بس إنت حدد المبلغ لأني مستعجله شديد ..قلت ليها ده كلام شنو يا بتي ؟ ..خلاص المروه انتهت في البلد دي ؟ بعد شويه لو لزيت ليك عربيه تقول داير حقك ..أناحأغير ليك اللستك ده لا قرش ولا تعريفه ويلا سريع سريع طلعت اللستك الضارب ولامن فقدت الاسبير لقيتو نايم نوم العوافي .. قالت لي خلاص افتكر ما عندك حجه بعد كدا حآخدك مشوار نسيب الدوارين لأي بنشر وتواصل معاي اشتري شوية لحمه وخضار لأننا متوقعين ضيوف مهمين .. ماما سايقه العربيه الباسات وقافله الموبايل وبابا مع السواق في ماموريه خارج الخرطوم سايق برادو وأنا زي ما شايف عندي بورا ..انتي عندك بورا ؟بعد الشر عليكي ..لا مش بورا بورااا ..أنا قاصده بورا ماركة العربيه ما شايف ..نزلنا اللساتك لي بتاع بنشر بعرفو وعندي ود عماً لينا فارش خضار في السوق المركزي قلت أفيدو ولا أفيد غيرو ..زولك لما شاف البنيه نطط عينيه ..قال لي البت ( الملاله ) الجات معاك دي من وين ؟! .. قلت ليهو أحفظ شرفك وخليك منضبط وشوف طلبات الآنسه ..سألتو من الباميه قالت ليهو الدسته بتاعة الليدز فنقرز دي بكم يا عمو ؟ .. قال ليها تقصدي الباميه ؟ قالت ليهو تمام ..لكن يا بتي دي ما ببيعوها بالدسته ..يا بالكوم يا بالكيلو ..قالت ليهو هو أنا عارفه حاجه.. دي أول مره في حياتي اشتري خضار .. طيب القدامك دي شنو ؟ ..قال ليها دي فلفليه خضرا ..قالت ليهو عندك منها ألوان تانيه ؟ ..غايتو ما عرفنا نضحك ولاّ نزعل ..انتهينا من الخضار مشينا لبتاع ملحمه اشترت ليها خروف كامل .. بٍج .. وزن زي عشره كيلو شلناهو لقينا اللساتك اتبنشرت أخدناها ركبت ليها واحد وختيت التاني في الضهريه ..شكرتني وعصرت لي مبلغ قلت أصلي ما أشوفو ..خليهو يكون مفاجأه إيدي حرقتني وفي أول ستوب حسبتو لقيتو مية ألف جنيه ..طوالي عملت خلف دور وطيران علي البيت في الحي العشواوي ..أشكرك يا رب ..يا كريم يا حنان يا منان

ابوالنور

22-11-2013, 11:07 AM