الدافع يرفع ايدو

[عبدالرحمن مدثر]

حكاية انو الناس تربط انو الناس زائغة من المنتدي عشان فى اشتراك

دي ماواقعة لي

الحكاية ماحكاية دافع ومادافع

الحكاية حكاية (دافع ) يديك احساس انك جزء اصيل من هذا الكيان

الحكاية فى معرفة لماذا هذا الغياب

والبحث عن اسبابه

وانا اعلم تماما انو كل زول غائب عندو ماعندو (مايمنعوا )

مابين الشخصية

وبين الاشرافية السادية

وبين التمييزية وبعض العنصرية البغيضة

[تغريد]

لايك يا ود مدثر ياخ

[عنكوليب]

دفم المطلوب للمنتدى ،،

لكي لا يتوقف مكان نطرح فيه أراءنا ،

نناقش فيه مشكلاتنا ،،

نرسل عبره رسائلنا ،،

ونتسامر عنده ،،

ونتعافى به ،،

[ود المطامير]

كان على رأس الهرم يتحمل كل شئ
وهاجموه وأتى التأميم فترك لهم كل شئ
وعليه علينا أن نتحمل أى شئ ما دام أممنا المكان

[mahagoub]

القانون الذى اجازوه
هو الذى فرض رسوم عضويه
وليست لجيوب الاداره
لانها لانسان مدنى
وكل من دفع له الحق فى محاسبتنا

[عبدالرحمن مدثر]

هههههههه

والله انا لما تلبس رسمي بتطفش بعيييد

انا بتكلم عن الغياب الحاصل فى المنتدي

الغياااب وماادرااااك مالغياب

لييييه السمه الغالبة هنا الغياااب

ليييه الناس بتغييييب اساسا

اذا هي عارفه انها بتتنفس عشقا للمكان

ولبعض الحبان

اى نعم هناك اناس (لديحون )

يستمتعون بغياب الاخرين

***

عشان كدا سؤالي لسه فى محلو

تفتكروا الناس غابت عشان مفروض يدفعوا من جيوبهم

ولما جاء وكت الجد .. وكت الجد زاغو

[ود المطامير]

أنا غايتو خاطف لونين

قاعد فى الإمارات ودفعو لى فى السعوديه

ود المامون ياااااااااااا ;)

[ود المطامير]

القانون الذى اجازوه
هو الذى فرض رسوم عضويه
وليست لجيوب الاداره
لانها لانسان مدنى
وكل من دفع له الحق فى محاسبتنا
يا ريس

شويه شويه خوفتنى

عشان نافع بداها كدا

هع هع هع هع

[خالد الزين]

انت دافع اذا انت كامل الدسم
انت ما دافع الجابك شنو

خلي الناس الدافعين ارتاحوا في الفسحة دي شوية

منتدى الاربعين دافع

هههاههها ههها

[عبدالرحمن مدثر]

هههههههههههههههههههه

والله انا مادافع

لكن اصحابي دافعيييين

[ودالعمدة]

لن يكون الدفع هو تذكرة الدخول
لأن الاحساسيس بالانتماء هى الأصول

[انور النور محمد]

هههههههههههههههههههه

والله انا مادافع

لكن اصحابي دافعيييين


:D:D:D:D:D:D
:rolleyes::rolleyes::rolleyes:
;);)

[مايسة]

أقعد للمحن دي انت بث

[مايسة]

وانا اعلم تماما انو كل زول غائب عندو ماعندو (مايمنعوا )

مابين الشخصية

وبين الاشرافية السادية

وبين التمييزية وبعض العنصرية البغيضة


بإسهاب شوية يا عمو
عشان الواحد يقدر ينداح شوية معاك ثمح :cool:


قلته ليك زمان إحنا لواااييييق ودمنا بقري

كيلو اللحمة بقي بكم

وصحي قالو عايزين يحسنو النسل السوداني ويطعمونا بالصينين :eek:

[ابورجاء]

الغالي ود مدثر الحنون طيب المعشر سليل الفراديس
جميل الكلم شفيف الحرف عظيم المنطق ظريف اللسان
معسول الحديث قوي العبارات ...
لك التحية والتجلة والتقدير والاحترام وانت تسطر هذه الكلمات
الطيبات وهذا الموضوع المهم الشيق الجميل ...

مع كل العذر للمتداخلين لكنهم حادو بالموضوع عن مساره الذي
ترمي اليه وعن مقصده النبيل وعن فحواه العفيف ولهم العذر فالموضوع
في اكثر الاماكن الهزلية وهو موضوع جاد لابعد الحدود وهذا دلوي فيه

في البدأ نعم غبنا وطالت غيبتنا كثيرا لكنها ليس بسبب الاشتراكات وما
ادراك ما الاشتراكات ولي فيها رأي يعلمه ال اخ العزيز جدا الى قلبي
والذي اعتبره الأب الروحي لنا في هذا المنتدى وفي مدينة ود مدني قاطبه
الا وهو العزيز الجميل الشفيف الراقي الرائع صاحب القلب الكبير والفكر
السديد والعقل الراجح اخونا وحبيبنا وتاج رأسنا أبوبكر المبارك صاحب هذا الفضل
علينا وصاحب هذا المكان الجميل الذي طالما ارتحنا في مرافئه وخصنا في أعماقه
ونهلنا من فيض عذب حروفه وتعلمنا منه الكثير ولا زلنا بفضلكم من المستنيرين من
ابناء هذه المدينة الوادعة وهذا ليس مجال الحديث عن الاشتراكات وما لها وما عليها
لكن ما اريد ان اصل اليه اننا غبنا عن هذا المنتدى لاسباب كثيرة جدا وقد ذكرت انت
بعضها من مشرفين وما كانو عليه من قبل وهذا ايضا ليس مجاله فقد ذهبوا وقلوبنا من ناحيتهم
بيضاء لا يشوبها شائب فلهم كل تقدير واحترام فبعضهم ونقول بعضهم كان يرى في الاشراف
تشريف وليس تكليف لذلك لم ينجحوا فلهم العذر وقد مضى ما مضي ..
وأيضا هنالك أشياء أخرى تجعلنا نتغيب عن المنتدى من فترة الى اخرى وهي أو نقول اعظمها وأكبرها
الشلليات التي تترأ على المنتدى من حين الى اخر فهي افة كل المنتديات في هذا الفضاء الاسفيري .
وأنا أقولها صراحة دون خجل ولا مواربة عندما نكتب موضوع نتشوق الى الردود لنرى ما كتبناه
وتأثيره على افراد المنتدى بالايجاب او السلب لكي نجود ما نكتب ونتعلم من ردود البعض لاننا نعلم
أن في هذا المنتدى عمالقة في الادب والشعر والرياضة والسياسة وكل مناحي الحياة فانسان ود مدني
متكامل وله من الثقافات ما أن تطفئ على كل المدائن لذلك يحدث لنا احباط شديد عندما تكتب موضوع
وفي لمح البصر عندما تأتي في اليوم الثاني تجده في قاع المنتدى دون حتى إشارة او بعض الاشارات
الخجولة وفي بعض الاحايين تجد رد من بعض اصدقاءك المقربين على سبيل (ده صاحبي لازم ارد ليهو )
لذلك الكثير من الأعضاء هجروا هذا الصرح العظيم وقد يكون هنالك أسباب اخرى لكن لضيق الوقت
وعدم أخذ الموضوع الى منحنى أخر نترك المجال لغيرنا ..



قلشة مع الهبوبا :ــ
اتمنى ان لا يؤخذ كلامي على محمل شخصي فوالله ما اردنا الى المصلحة والله على ما أقول شهيد ....





ودوما في رعاية الله وحفظه ...
مع كل الود باقة ورد.....