قصتي مع بت الكاســــح

[أبو صديق]

سلام يا أهلنا الطيبين
ناس الثقافي أهل الريدة والمهاسيس
ولمّا إلتقينا بسفحِ رامة
وعندنا شوية هترشات نتمني أن تجد القبول عندكم
وتوكلنا علي الحي الدائم نبدأ...
طبعا يا جماعة القصة دي كانت قبل 15 سنة تقريبا وها أنا مجددا وعشان خاطر زول هنااااااك أنكأُ أحزان قلبي وأجتر ذكريات الالم والضياع واكتب بقدر الإمكان بعض المتاح من مجريات أحداثها وكل ما عانيت آنذاك وآثارها علي تغيير مستقبل
ايامي،طبعا عندنا في البلد دي موسم بتاع سباق الخيل ببدأ سنويا من شهر 11 الي اوائل شهر خمسه وبه جوائز مغريه وطبعا العوائل السودانية تتسابق لمثل هذه التظاهرة بمزيد من النشوه والإنجذاب لما لها من محاسن عديده ومنها علي سبيل المثال لا الحصر ترفيه للعيال وتركهم يستمتعوا بحريه التحرك لقرابة الخمس ساعات بدون خوف أو كلل من الطرفين لما تحظي به ميادين السباق من إهتمام يفوق معظم الدواوين الحكوميه في بلادي، وثانيا لمقابلة الأهل والأصدقاء ( يعني لو رايح ليك زول بتلقاهو في سباق الخيل ) ولا ننسي الجوائز التشجيعيه والكسب المادي في حالة حالف أحدهم الفوز.
وزمااان وتحديدا في آخر سباق لموسم 1996 م بدأت حكايتي المتشعبه مع بت الكاسح .
ملاحظه : كثير من الأسماء الوارده بالقصه مستعاره
تم إخفاء الكثير من المشاهد والتفاصيل حفاظاً علي أرواحكم وممتلكاتكم ومشاعركم النبيلة.
أها اربطو الاحزمة !!!

[أبو صديق]

في آخر يوم لموسم سباق 1996بمضمار جبل علي بدبي واثناء الجولة الاعتيادية شفت الزوله دي غايتو سبحان الله حاجة لا توصف وما بتقدر تعاين ليها مرتين وكانت محاطة بين اهلها وتتهادي طربا وحبورا وتوزع إبتساماتها الكاتلاني يمينا ويسارا وانا استرق النظر واحاصرها احياناً
بلا منّه وكمان بطّلت كل حاجة وبقيت مقهّي فيها هي بس علّ وعسي ترمي لي واحدة من نظراتها وقد كان وفجاءة حسيت انو قلبي وقف وتاااني شعرت انو بقي اجري شديد وداير اطلع فت من مكانو ولكنها لمّا إتلفتت عليّ وشافت حالتي سحبت ابتسامتها سريعا وتغيرت معالمها360 درجة ولفّت الناحية التانية اها انا هنا قلبي رجع لي حالتو الطبيعية وقلت البت دي عامله فيها تقييييييله ويلأ خش يازول ورينا حنكك كيف وخبرتك ، المهم البنيّة الكاتلاني رجعت تاااااني عاينت لي
وبنفس الدهشة الأولي لكن المرة دي كانت أطول شوية زايد همسات وحركات بنات مع واحده كانت
واقفة معاها ...انا قلتّ في نفسي خلاص البت دي شكلها صغيرة والنفخة دي كلها بتكون نيدو وجيبس
وهسي حاتقوم تتعاوروتكلم لي أهلها ويابابا ويا ماما وبلاوي زي دي .. لكن لمّا شفتهم بضحكو ونظراتم زادت عليّ قلت يازول هووووووووي البت دي لازم تخش فيها وتديها نمرتك وتتخارج ولو عايزاك بتتصل ولو غير كده أفهم وشتت

[ود الضو]

امسك كباية الجبنة دي
وواصل طوالي ..

[أبو صديق]

امسك كباية الجبنة دي
وواصل طوالي ..
هلا الرائع ود الضو ومرحب بطلتك البهية
جبنتك مااا بناباها علا ده ما وقتا نوهاااائي
تشرب كازوزا حاقا ساعقه

[أبو صديق]

وإقتنعت بفكرة أديها رقمي دي وبقيت في الطريقة البتوصلني ليها وغايتو من هنا لي هنا لحدي ما انتهي السباق ما لقيت طريقه اصل ليها... والفار لعب في عبي وبقينا طالعين علي مواقف السيارات وانا وراهم من بعيد لبعيد وهي مع اهلها ام – اب – ولدين وبت ومحاطة بهم تماماً ولا مجال للمجازفه او اي تصرف طائش ، وركبو عربيتهم وانا دورت وراهم وكانت عربيتهم مرسيدس تحمل ارقام ابوظبي وده اول خيط ، ومن شفت رقم سيارتهم قلت للزول المعاي الناس ديل لو ماشين ابوظبي حا امشي وراهم ودبّر حالك يا صاحبي ،وفعلا الجماعة اول ما طلعو توجهو نحو شارع ابوظبي وطوااالي نزلت صاحبي رغم إنها عربيتو وانقشطت وراهم .... وبعد شويه اشوف ليك ناسي وقفو ونزلو السجادة وتقدم ابوهم لصلاة المغرب وصلي بولديه وده اداني يقين انو ناس زي ديل إستحقو المجازفات دي وارفعو الراس وبدون تفكير وقفت وراهم وتيممت شطرا طاهرا ودخلت معاهم في الصلاة والله أعلم غايتو تكون صلاتي ديك إتقبلت ولأ لا لأني كنت بفكّر في شعور البنيّة
حا إكون شنو وبعدين انا ظااااااااطو افكاري مشت بعييييييييد وإتخيلت نفسي بقيت واحد من اسرتهم وهكذا زيّن لي الشيطان حُسن صنيعي بهذه المطاردة المجنونه.
طبعا بعد الصلاة حاولت اشوفا بس ولو للحظة لكنها تمنّعت بغرورواتخذو سبيلهم سرباً نحو ابوظبي واقفلت عائدا اجرجر أذيال خيبتي و اخدت لي خط رجعة وكمان وانا راجع برااااااي وقفت مع نفسي شوية وقلت يا ود الناس ده شنو البتعمل فيهو وانت طالع من شاكوش قريييييييب ومافي داعي تتهور وتورط نفسك في شغله مجهولة العواقب وخصوصاً أنّك لا تعرف عن الناس دي سواء رقم عربيتهم وهنا شوشو وسوس لي رقم العربية بأن الحل والسعادة تكمن في رقم عربيتهم وهو الخيط الذي يقودك إلي النعيم وتلفونهم وطبعا سرييييييع مشيت قابلت ودعمي وحكيت ليهو القصة وبعد تحانيس
ومحاولات وموعداً غليظاً منّي بألا أفشي سره وكان مترددا وأخيرا إنفرجت أساريري بعد دخل علي الملف الخاص لصاحب السيارة ومنحني هدية العمر وهي نمرة تلفون بيت ناس .. ناس منو ياربي ناس حسين محمد ( الكاســـــــح )

[ياسر عمر الامين]

الحبيب أبا الصديق غايتو ما عارف اكان دخلتى هسه فى الوقت ده مناسبه ولا لا؟؟؟...المهم انا برضو شايل ملف متعتى ومنتظرك...

[عثمان دغيس]

شباب سلام عليكم ...
أول حاجة دي محاولتي الثالثة والأخيرة عشان أكتب رد أو تعليق في الموضوع ده أو أي موضوع ....!
كلما أكتب المداخلة برجع ما ألقاها ...!!!

تاني حاجة وده لو ثبتت ... لأنو التالتة ثابتة ...! يا كاتب الموضوع جهجهت باكاتنا ..
كنت فاكرك قاصد منتزه الكاسح حقنا بتاع مدني داك ..
وقلت الزول ده لم في واحدة هناك أيام العيد ولا حاجة وجكسها وأدتو شاكوش ولا أي حاجة كده ..
يطلع إنو كاسح تاني وأبوظبي وسيارتي وسيارتهم و و و و!!!

عموماً سرد في غاية الروعة ... بس ما تشحتفنا كتير ..
واصل

[أبو صديق]

الحبيب أبا الصديق غايتو ما عارف اكان دخلتى هسه فى الوقت ده مناسبه ولا لا؟؟؟...المهم انا برضو شايل ملف متعتى ومنتظرك...
يااا الله يا ياسر كان تخبّط الباب ياخي
هسي طيّرتي مننا الحنك السنِيييين ده وتاني الله يعلم نلم فيها بالساهل
لكن خليك قريب البُنية حا تدّور بعد شوية

[أبو صديق]

شباب سلام عليكم ...
أول حاجة دي محاولتي الثالثة والأخيرة عشان أكتب رد أو تعليق في الموضوع ده أو أي موضوع ....!
كلما أكتب المداخلة برجع ما ألقاها ...!!!

تاني حاجة وده لو ثبتت ... لأنو التالتة ثابتة ...! يا كاتب الموضوع جهجهت باكاتنا ..
كنت فاكرك قاصد منتزه الكاسح حقنا بتاع مدني داك ..
وقلت الزول ده لم في واحدة هناك أيام العيد ولا حاجة وجكسها وأدتو شاكوش ولا أي حاجة كده ..
يطلع إنو كاسح تاني وأبوظبي وسيارتي وسيارتهم و و و و!!!

عموماً سرد في غاية الروعة ... بس ما تشحتفنا كتير ..
واصل

عثمان دغيس قالو الخير علي قدوم الواردين وإنت شكلك لمّا جين داخل قلت بسم الله ( أسان تدا ) وتييب
ونمبر ون الاولي الكاسح ده عملو هنا وفي مدني ؟؟؟ كان كده حا نروح في ستومية داهية زااتو
يقوم واحد من المكسحين ديل اطلع قريبهم وما نعرف محل نقبل لكن صدقني لو حصلت كعة الموضوع ملطووووش
من أيمن عبدالله الشهير بكتاحة وهواء ( طبعا ده كان زمان)
وسعيد بكلماتك وإطراءك والغريق قدام
ما تحرمنا شوفتك يا غاالي

[أبو صديق]

معليش يا شباب علي الإنقطاعة ( نت بنغالي هع هع هع ) وحا نعوضكم بحلقتين دسمتين
وطبعا زي ما عرفتو حنكت قريبي واداني نمرتم بس المشكلة التلفون ماطلع في ابوظبي طلع في حتة تانية وده الحيرني وخلاني طيران لأقرب كابينة تلفون شارع وترن ترن من أول جرس أسمع ليك الصويت الماااخمج ومصحوب بي بحّة يا سبحان الله صورة وصوت كمان الله لينا الماقرينا...
أنا – مرحبا
هي – اهلين
انا - كيف الاحوال واخباركم تمام
هي – تمامين والله منو ؟؟
( ياخي مابلاش منو دي هسي ده وقتها )
انا – لو سمحتي ...
هي – ايوه عايز منو
انا – ياخي اسمعي جبتي كم في السباق
وتعالو شوفو الضحك كيف وردت عليّ طبيعي وكأنها عرفتني
وقالت لي بابا جاب 3 وناس ماما 1
انا – وانتي جبتي كم ؟
صوت من بعييد بنادي يابت حنااان
هي – ايوه ياماما.. عُلا باي بكلمك بعدين وقفلت علي كده..
وحاتكم ياجماعة بعد ما مولّع سيجارة طلعت التانية وتشششششششش وماحسيت بيها إلا بعد النفس التاني وصدحت منتشياً بفوزي السريع ونجاح كل التكتيكات علي حسب ماهو مرسوم لها وبدقة متناهية...

طبعا تحليلي للكم دقيقه ديل انها بت ماا هينه بدليل عُلا باي دي ولأ إمكن ماعايزه ولأ إمكن ماا عارف وانا غايتو راسي بقي إودّي وإجيب وبعد ده داير اظبّط المواعيد الممكن ترد علي حناان وبث وبقيت احسب ليها بتطلع من المدرسة الساعة كدا وغدا وبرنامج زي ده وبعد داك ناس البيت كلهم بنومو ولو البيت وقع مابتلقي واحد حايم من الساعة 2 لحدي 4 تمشياً مع القاعدة تغدي تمدّي وقيلوله بعد نهار عمل شاق وبتلقي الشفّع بس الصاحيين واجبات وتلفزيون وهكذا صوّر لي خيالي أن أنسب مواعيد هي وقت القيلوله وصبّرت نفسي لليوم التاني وانا احسب الثواني وجري علي التلفون
انا – الو
صوت أجش – الو مرحبا منو؟؟؟؟
انا – عبد الله ومواصلا وين هشام
هو- الرقم غلط وطاااااخ قفل
اها بعد ده أقبّل وين وأطير وين واقول يا منو يامنو يااااا الله أنا هسي اسوي شنو؟؟
وأصل ليها كييييف ؟؟
وبعد شوية بقيت اضحك برااااااااي لفكرة جنونية جاتني وقلت انفذها ورجعت للتلفون تاااني
انا – الو
الصوت الاجش تاااااااني – الو مرحبا
انا – مقلداً صوت بت بحذر نادي حنان وين حنان هههههه
هو – لحظظظه ..... - منو؟؟
انا – ببصوت اكثر نعومة عُلا هههه ماعرفتني
هو –ايوااا ومواصلا يا حناان تلفون
حنان – يابت ماالك
انا – انا مااا عُلا
حنان – هههههههه بعدين بعدين الساعة 4 وطخ تراااخ قفلت
اربعه اربعه ورانا حاجه غير التلفون ده تااني ، وبقيت قاعد جنب الكابينه في الحر والرطوبه دييييك والعرق إكُب مطره بس وانا متنشن والسجارة ورا التانية والراس شغّااال ياربي البت دي مابتعرفني وانا لسسسه ماقلت ليها حاجة وما وريتا انا منو ... ياربي تكون عرفتني من سؤالي ليها بتاع السباق جبتي كم دااااااااك ؟؟ غايتو شطبت راسي عديييييييييييل كده وقلت يا إمّا البت دي فوق حلاوتها وصوتا السمح دي زكية لدرجة او أنها وربنا إكضّب الشينة متعودة علي التلفونات الضهب دي ...وووو..
غايتو حيرتني في هنااني زااتو حنان دي والشئ الخلّاني اضرب اخماس في اسداس انها لسسسه صغنووونه وبتتهرب بغنج مبااالغ وكمان هل عرفتني انا ياهو زاااتو الزول اللاقها في السباق وصلي مع ابوها ولأ لا، وبيني وبينكم هرشت منها عديييل كده وقلت حا اكلمها علي اساس اني لا شفتها ولا بعرفا ونبدأ معاها صفحة جديده لحدي ما اعرف آخرا...
الساعة 4 شاااااارب شديت ليها سلك
هي والله – ايوه يا عُلا
انا – ياخي انا ما عُلا كلمتك مية مرة
هي – عارفه – عارفه ....
انا – عارفه شنو
هي – عارفه انك ما عُلا .. هو صوتك ده ممكن اكون عُلا
انا - يعني شنو انتي عارفه انا منو
هي – يعني .. ممكن اكون شفتك والا ما اتصلت علي وسالت مني وعرفت نمرتنا واسمي من وين؟؟
انا – ( يابت الايييه ) ايوه صاح ومتداركا ياخي اسمعيني مافي داعي للاسئله التقليديه دي
وبعدين ياخي انا مش معجب انا مكسّر عديييييل كده وماتفتكري داير العب او اتسلي بيك.
هي – انا ما ياخي .. طيّب وبعدين لو ماعرفتك انت منو وجبت نمرتنا من وين ماحا اكلمك ماعايزه غش وحركات من اولها
انا – ( الحمدلله – يعني الموضوع حا إعدّي علي خير والسبكة ماشة تمام ) اسمعي انا وعدت الزول الاداني نمرتك انو ما اقول ليكي عليه وخلي الموضوع طبيعي، وقدّام حا تعرفي كل شئ.
هي – ماعشان انا افهم واعرف حاجة عنك
انا – طيّب ياا عثل الموضوع ومافيه انا شفتك واعجبت بيك وفتشت اي طريقه اصل ليك وعملت المستحيل وممكن وتجي في الآخر تفتحي لي تحقيق .
هي – طيّب انا مابعرفك وماشفتك اكلمك ليييه وبصفة شنو
انا - ماضروري تكوني بتعرفيني والمعرفة بتجي قدام لمّا نتقابل
هي – كمااان نتقابل مااا اظن
انا – لا مش نتقابل براانا (هههههه عشان ما تطير ) قصدي لما اشوفك حا اقول ليكي انا اهو ياستي وماا تستعجلي للشوفه كدا وخلينا نعرف بعض اكتر بالتلفون وبعدين الله كريم ..
هي – يعني حانتكلم كتير .. لا انا ما حا اقدر ولو ماعرفتك تاني ما تتصل لو سمحت
انا – ما اتصل كيييييف ؟؟ ومافي طريقة تانية ولو بتطلعو مكان قولي لي عشان اجيكم وتشوفيني من بعييييد ..لبعييييد
هي – ايوه بنطلع بس اوعه تجي تقرّب مني
انا – اكيييييد هو انا اقدر اقرب من كهارب عيونك دي
هي بدلع وإنتشاء عيوني انا .. لا عيوني عادية
انا – لو عادية ماكان هسي انا ملطووع في الرطوبه والسخانه دي بلاش تواضع
هي – بتتكلم من الشارع
انا – ايوه وحياتك من الشارع
هي – لييه ماعندكم تلفون في البيت
انا- لا مقطوع
هي – اكيد بكون مقطوع ههههههه
انا – مُغيرا الموضوع . قلتي لي بتطلعو وين
هي – سباق الخيل
ماعارف ليه حسيت ان البت دي خبيثه وبتضحك من جواها لمّا قالت لي سباق الزفت ده
هي – الو
انا – بخبث حا تمشو متين
هي – يعني حانمشي يوم السبت ما الخميس والجمعه بس السباق
انا – ايوااا ومردفا امعانا في الانتقام من خبثها وتضليلها اذا كانت شاكّة فيني . السباق وين في ابوظبي ؟؟
هي – لأ في ام القوين عندنا هنا
انا – يااا ريت والله
هي – ليه
انا- عشان اكون قريب واجي بسرعه
هي – ليه انت ساكن وين
انا – (هههههه وقعت ) هنا في ام القوين
هي- يعني ود منو وعندك اخوات قدري ولأ لا؟؟؟
انا – لالالالالا انا هنا عذّااابي ومابعرف ناس كتير( البت دايرة تجيب لي الهواء)
هي- ياحراااام ومضيفة طيب بتعرف بابا او بتمشي النادي ؟؟
انا – لا مابعرفو وبمشي النادي يوم الجمعه بس..
هي- يلأ يا عُلا اشوفك بكره في المدرسه..
انا – يعني امووت انا لحدي بكره
هي – ياشقية وتااخ ترااخ قفلت
وشويتين ونشوف آخرتا مع القرنبوز ده

[mahagoub]

يا ولد طلعته ما هين
انا فى انتظارك ترجع نطرا الزمان الاول

[مايسة]

أبو صديق تحياتي ليك
اها يا أخوي - انت مفتاح أبو ظبي وأم القوين واحد
بعدين انت ليه ما ضربته بالموبايل
---------------------
من المتابعين أكيد :)

[أبو صديق]

يا ولد طلعته ما هين
انا فى انتظارك ترجع نطرا الزمان الاول

كل واحد ليهو في تاريخو ماضي
اي ماضي يا عم محجوب
عاين وراك ما يكونو الجماعة سامعنك وإنت بتكتب
بعدين لا أبو صديق لا كتاحة ما بحلوك

[أبو صديق]

أبو صديق تحياتي ليك
اها يا أخوي - انت مفتاح أبو ظبي وأم القوين واحد
بعدين انت ليه ما ضربته بالموبايل
---------------------
من المتابعين أكيد :)

هلا والله وشكرا لإستقطاع وقتك الغالي مع مغامرات الشباب
وانا عارف وكت الحيكومة غااااااالي
وللأسف الزمن داك كان الموبايلات لسسسه ما ظهرت
لكن في الحلقة السته وستين حا نصل لحتّة الموبايل دي
وخليك قريبة..

[ياسر عمر الامين]

لسه منتظرين يا أبو صديق عملت شنو فى المرسة...

[أبو صديق]

لسه منتظرين يا أبو صديق عملت شنو فى المرسة...

هلا بالحبيب ياسر وان شاء الله انتظارك ما حا يطول سبعة حصص بث
خليك قريييب

[أبو صديق]

طبعاً بعدما قفلت انتبهت لنفسي والله ياجماعة الواحد زي الإستحمّ بي هدومو وده كلو وانا مااا جايب خبر ولا حاسي بشئ والمشكله بعد قفلت علّقت في كلمة ياشقية دي وطيّرت باقي الصواميل الفي راسي ده لو اساسا في راس، اها وحياتكم من هناك وجكّه رياضة لحدي ماوصلت البيت..
الله إقطع حُب الشُفّع ظااااااااااطو
طبعا وعلي حسب فهمي انو تاني ما إتصل الا بكره يعني 24 ساعه من العذاب والتفكير ويا يوم بكره ما تسرع .. طبعا الشغله دي عملت لي هوس واصريت لازم اجيب آخرا مهما كلف الامر وبعد بديت افهم مدي تفكير الهنانات الفي عمرها جهزت نفسي احتياطيا بكم زوغه وكلمات مودرن تتماشي مع بنات جيلا والساعه 3 بالظبط انا تحت حمام الشمس
جرس طويييييل ومافي رد وشويه كمان خمس دقائق تاني جرس اطول ولا حياة لمن تنادي... ياجماعة الحاصل شنو الناس ديل مافي .. طلعو .. سافرو .. رحلو وتاااني الفار نقز في عبئ وقلت ياجماعة هسي لو الناس ديل بس رحلو انا تاني البت اشوفا وين وكيف وخصوصا موسم السباق انتهي وتاني الا شهر حداشر السنه الجاية وقررت لو لقيتا او لميت فيها اديها رقم بيتنا والبحصل احصل وياجماعة والله الوقفه في الحر والرطوبه حااااره بشكل لكن الواحد لمّا اكون خالط ما بحس بيها وهسي انا في العشره دقايق المنتظر فيها دي اتسجمت تاااني مع تنشنت عدم الرد واحتمال انوما الاقيها تاني ده وقلت اجرب آخر مره لو مافي رد اشتت وامري لله..
جرس برضو طوييل ومافي شئ وانا بقفل السماعة وسوس لي شوشو انو في صوت ردّ عليّ واتصلت تاااااااااااني ومن اول جرس
المعلم ظاااااطو( ابوها) – مرحب
انا –احترت بين ارد ومااا ارد تااااااخ قفل
وبي قفلتو دي قفل لي كل امل بان اكلم الزوله دي الليله
رجعت البيت وحالتي حاله ورجعت شريط المكالمات كلمه كلمه وبتمعن شديد حتي اقدّر الوضع وارسم عليه خططي الجايه وغايتو مالقيت الا بريق خيط رفييييييع وهو ابوها بالمساء بكون في النادي السوداني وقلت اجرب حظي واتصل بالمساء وموعد صلاة العشاء تحديداً ( شفتو الشيطان شاطر كيف ) يعني ابوها لو مافي النادي بكون بصلّي في المسجد او البيت علي اسوأ تقدير وشوية غايتو ارتحت للفكرة دي وانا موسوس ويارباً تجيب صلاة العشاء

[mahagoub]

الله يجيب العشاء
اها الليله بنتأخر عن الصلاة منتظرنك

[ود المطامير]

هلا والله وشكرا لإستقطاع وقتك الغالي مع مغامرات الشباب
وانا عارف وكت الحيكومة غااااااالي
وللأسف الزمن داك كان الموبايلات لسسسه ما ظهرت
لكن في الحلقة السته وستين حا نصل لحتّة الموبايل دي
وخليك قريبة..
]الكتللللللل
الشئ مكسيكى ؟ ;)

تم حفظ القصه كملف مضغوط لحين الحوجه[/font]

[أبو صديق]

الله يجيب العشاء
اها الليله بنتأخر عن الصلاة منتظرنك

دقائق وراجعين ليكم يا عم محجوب
نشوف آخر الفلم ده شنو
http://sudanelite.com/vb/uploaded/2237_01325921145.gif

[أبو صديق]

]الكتللللللل
الشئ مكسيكى ؟ ;)

تم حفظ القصه كملف مضغوط لحين الحوجه[/font]
إنت إضغطوك ناس الإلزامية شاحد ربي عليك http://sudanelite.com/vb/uploaded/2237_01357022202.gifhttp://sudanelite.com/vb/uploaded/2237_01357022202.gif

[عكاشة]

موضوع حلو شديد


متابعين من بعيد

[أبو صديق]

موضوع حلو شديد

متابعين من بعيد
هلا ومرحب بيك يا عكاشة في منتديات ست المدائن وإتشرف انال تاني مشاركة منك
وبعدين تعال من بعيد ليييه؟؟؟ خايف من الحصان ولأ الهاهاااااااااي
خليك قريب

[أبو صديق]

الحلقة دي بالذاات عشان خاطر زول هناااك قول السلام تبقالو روح
وزي ما عرفنا انو انا منتظر آذان العشاء بفاارغ الصبر عشان ابوها يطلع وألقي راحتي واحنك بمزاااج مع الهنان ده
نواصــل....
بعد الآذان بعشره دقائق جري علي الكابينة والناس ماشة علي المسجد الله إلعنك آ إبليس وضغطت علي اعصابي واوهمت نفسي اني سوف اتصل والحق كم ركعة او هكذا صوّر لي ابليس اللعين..
وترن تررن رن
هي – الو
انا – السلام عليكم
هي- وعليكم السلام ياولدي منو
انا – ( ده شنو ده ) لوسمحتي عمو حسين في
هي – لا اقول ليهو منو
انا – محمد من النادي
هي- خلاص بكلمو وتاااخ قفلنا في وقت واااااااااحد
واليوم داك قفلت معاي قفلة اسكتو بس
وخلونا لحدي بكره نشوف آخر البت دي شنو ..

طبعا يا جماعه ماتتخيلو شعوري هسي كيف وانا بسترجع في الذكريات دي وايام الشباب والحماقات والمجازفات الكنّا بنعملها والواحد إستغرب في نفسو كييييف سمحت ليهو اعمل كده وغايتو كانت ايام وذهبت بي اسيادا الله إهنيهم وين ماكانو وربنا إغفر لينا ذنوبنا وذنوبكم أجمعين قولوا آمييييييين
غايتو انا بقيت مبرمج نفسي علي الساعه 3 الضهر دي وببني أي حاجه علي هذا الاساس لحدي ما القي لي حل مع الزوله دي وتلاته تماما ترنننن ترن
هي – ايوه
انا – ايوه الله عليييييييك وعلي الجابوك يا ........
هي – تضحك بس وبنغمات مختلفه وصوتا يعلو وينخفض وانا ميتيني طالع
انا – آآآي اضحكي – مبسووطه ما قاعده في مكيّف وعارفاني يومين لافي زي كلب الحر رطوبه وعرق وايمان صليبي طلع واتصلت خمسمئة مره ولا فكرتي تقولي اقول للزول ده الله إجيرك ياخي ده عمليه منك ماحلوة وخصوصا نحنا في اول مشوارنا وماعرفت راسي من رجليّ..
هي – مواصله ضحكها طبعا ام بارح ماما حكت لبابا عنك
انا – عنّي انا خير في شنو ومااالا بتسأل منّي وبتعرفني من وين هوووي يابت بطلي حركات
هي – مااا إنت إنت بتقول ليهو عن محمد الاتصل ام بارح مش برضو ده إنت
انا – الحمُو ........
هي – ضاحكة اكتر والله لكن بالغت وانت اسمك منو محمد
انا – لا اسمي الكاســـــــــح ههههههههه
هي- هههههههههه لا جد
انا – يعني الاسم بفرق عندك كتير
هي – يعني انا اكلم واحد ولا حتي ما بعرف اسمو
انا – يا ستي اسمي من يوم الليله مجنونك خلاس
هي - هههههه انا ما بحب المجانين لكن والله انت شكلك فعلا مجنون .... وبتجنني معاك
انا – الجنون فنون ياخي
هي – تااني ياخي انا آنسه
انا- خلاس يامودام اسفيييين ولاحسين الطين
هي – فطست من الضحك ( والله البت دي التقول مسكونه ) لو إتنرفست تضحك ولو قلت نكته تضحك وانا غايتو ما عارفا بتضحك علي شنو غايتو الله إستر ما إكون بتضحك عليّ وانا ماجايب خبر وغايتو اتوكلت علي الله ورميت ليها اخطر سلاح عندي وهو رقم بيتنا وقلت ليها ده طبعا شغال 24 ساعة صيدلية مناوبه بس وتعالو شوفو الضحك وقلت ليها انا ساكن مع عذّابه وفي دبي مش ام القوين واهم حاجه تضربي الساعة 3 عشان ارتاح شوية من حمّام السجم ده وهي تضحك وانا متكّيف انها خلاص اكلت الطُعُم ، اها الشافعة طلعت تفتيحة وقالت لي لالالالا بيت عذابه ما حا اتصل عليهو واقولو عليّ شنو ، قلت ليها ياستي ولا يهمك اتصلي قولو ليهم اي حاجه وانا عندي بنات اهلنا واعمامنا و اخواتي وبناتهم بتصلو علي ومافيها حاجه ..
اها قالت لي طيّب لو رد عليّ وحد تاني اقول ليهو شنو ،، قلت ليها قولو ليهم عايزه خالو
خالو علي او علي خلاص اسمي علي ارتحتي..
هي – طيّب خلاص ياخالو
انا- يلأ عشان ألحق ادخل الغسّاله
هي – هههههههه هههههههه ههههههه خلاص تاني دراي كلين باي
انا- كلين ولأ سيقنال 2 يلأ مستنيييك من هسي وهدي قعده وحرسه للتلفون

[ودالعمدة]

البلوم في فرعو غنا
طرانا يا الحبان أهلنا
طرينا تلفون العصاري
ورعشة الواد البراري
البريد داير يداري
والقلوب كاسحة المحنا
يا دموع لمتين تفارقي
يا علا لمتين تلاقي
أبكي يا حصين السباقِ
حظنا العاثر ظلمنا
.....
أبوصديق ازيك يااااخ

[أبو صديق]

البلوم في فرعو غنا
طرانا يا الحبان أهلنا
طرينا تلفون العصاري
ورعشة الواد البراري
البريد داير يداري
والقلوب كاسحة المحنا
يا دموع لمتين تفارقي
يا علا لمتين تلاقي
أبكي يا حصين السباقِ
حظنا العاثر ظلمنا
.....
أبوصديق ازيك يااااخ

تسلم الحبيب ود العمدة علي السجع الملهلب ده
وما أحلي القطِع الأخضااااار ( الخُدرة الناااعمة)
وكان جنيت أنا ما مُلام من البلوم ده
وشكرا عميقا يا قلب

[أبو صديق]

طبعا اليوم داك متكيّف والحاله الف ومن رجعت من الشغل مافي لا طلعه ولا مرقه منتظر الساعه 3 دي متيييين تجي وحاتكم لحدي نشرة اخبار تسعه البت دي لا حس ولا خبر، وغايتو اليوم داك سبيت لليوم الوقعني في الشُفّع ظااطو وقلت ما مشكله بكره قريبه ونفس الموال حصل معاي اليوم التاني بس بي ياتو قلب ومنو البنتظر تااااااني وفللي علي كابينة الرماد الفي الشارع وحلفت كان ما سمعت صوتا الليله ما ارجع البيت .. وترن ترن جرس طوييييل ولا حس ولا خبر لكن كان عندي احساس انو البت دي قاااعده وسامعه التلفون وعارفاه مني و بس غتاته منها ماعايزه ترد وحلفت بالتكسرني الليله يا انا يا التلفون ، وتاااني وحياتكم ترن ترن ترن لحدي مارفع لي شافع الو ( وانا في سري بالتلوي خشيمك ههههه) وتاني قمت علي الحنكشه وقلدت صوت بت
انا- يا شطوري نادي حنان بسرعه
الشافع – حنان في الحمام
انا – امشي كلمها قول ليها عُلا عايزاكي سرعه
صوت من بعيد ( منو يا حمودي )
حمودي – دي عُلا عايزه حنان بسرعه
الصوت البعيد بقي لي قريب و( بمبي كمان )إنتي عُلا منو
انا – ماقدرت أرد وبقيت اقول ألو ألو يا خالتو ما سامعاني وطاااخ قفلت الخط وجري علي البيت
غايتو بعد الزرّه دي قلت تاني إلا اصبر كم يوم وبعد داك أتصل عليهم واقنعت نفسي بكده وقلت يلأ خليني اراجع حساباتي تاااني من جديد واشوف اذا ممكن اتابع ولأ اقتنع بالفشل المُبكر ده وبيني وبينكم حكاية افشل دي عامله لي هاجس لأنو ده بكون شاكوش عينه ووووووووو
غايتو دخلت البيت لا بسمع ولا بشوف وعلي الحمام تووووش وبعد شوية الجماعة شبكوني ليك يا علي تعال تلفون تعال تلفون قلت ليهم من منو قالو لي واحده من بناتكم ديل واطلع ليهم ونصي صابون والقاها هي زاااتا واا حلاتا
انا - الو ونفسي قايم
هي - كنت وين في المطبخ
انا - لا لا آآآي الليله الميز عليّ
هي – بضحك وطابخ ليهم شنو ان شاء الله
انا - هو في غيرو
هي – هههههههههه عدس
انا – ايوه ابو السريع ياخي ومواصلا أسمعيني وييين انتي ياخي
وده شنو البتعملي فيهو ده عذبتيني وشوشوتي عيني
هي – طيب الحق عليّ الريحتك من وقفة الشارع والرطوبه والحمام المجاني
انا – ماقصرتي والله لكن عندي يومين لازم تعوضيني ليهم وبعد داك نتفاهم
هي – ما مشكله وانتو ما عندكم صفر في تلفونكم ده
انا – صفر شنو ياخي ده تلفون عذابه وكان فتحنا الصفر بسفرونا كلنا ههههههههه
هي – هههههههههه ليه كلكم بتاعين هههههه
انا – عشان بنتصل السودان ولا بتاعين ولا حاجه تانية انا بس والباقين كلهم متزوجين ههههه طبعا ده عشان اطمنها
يلأ خلاص اخليك تشوف عدسك ده وحا اتصل بيك بعدين
انا – عدس شنو ياخي ان شاء الله احرق زاااتو
هي – اسمعني اول امبارح برضو قلت ليهم عُلا
انا – آآآآي يعني كنت بعرف واحده تانيه غيرها
هي – انت بتعرف عُلا
انا – يامثبت العقل والدين انا متيييييييين لحقت اعرفك انتي عشان اعرف عُلا
هي – افتكرت
انا – ولا تفتكري ولاتبتكري انا عايزك انتي وبس وما بعرف لا علا لامني وما عايز اعرف حد غيرك انتي وبس
هي – وقبلي كنت بتكلم كم واحده
انا – مقاطعا يابت الناس القبلك ده انسيهو بخيرو شرو وخلينا نبدأ من جديد انا هسي سالتك
هي – عاادي اسال
انا – اها اشوفك متين
هي – لا ما سؤال غبي زي ده
انا – ضاحكا يعني ما اغبي منك
هي- انا
انا -لالالا انا ... يا اختي مافي طريقه نشوفك يعني اجيكم المدرسه ولأ كيف ؟؟
هي – ههههه مدرسة بنات هههههه جرّب تعال
انا – والله تقولي لي تعال حا اجي
هي – يعني كيف تجي؟؟؟ وتفتكران شاء الله حا تشوفني
انا – وانا جائي اديكم امتحان ماجائي اشوفك
هي – شكلك حاتعملها وبعدين لعلمك الباصات بتأخدنا من جوه المدرسه.
انا – ياستي توصلي بالسلامه بس شوفي لي طريقه ولو خمس دقائق.
هي – حا اشوف بس مش وعد
انا – وعد ولأ رعد المهم خليني علي بالك وانو شوفتك بتعني لي الكتير
هي – بعد مسافه طيّب اوكي مع السلامه.
انا – إسل ... سليتي روحي زاااتا ومنتظرك وماطالع من البيت ....
ومسااااااافه ماسك السماعه ماقادر اقفل ياربي اكون ده ياهو زاااتو الهوب الله إقطعو وإقطع سنينو

[عاشق الترحال]

واصل يا علي
بس وقت نحصل النهاية
مانلقي جزء من النص مفقود

[عبدالغني خلف الله]

ياااا ..ده كلو يطلع منك يا أبوصديق ..والله ضحكت ..ضحكت ..ضحكت بصوره ما حصلت قبل مده طويله ..ومفرداتك جديده لنج ..لكن عشان تعبك ما يروح ساكت وإذا فكرت في الطباعه لازم تحول النص للفصحي زي ما عارف والحوار طبعاً ممكن بالدارجي ..مواصلين .

[أبو صديق]

واصل يا علي
بس وقت نحصل النهاية
مانلقي جزء من النص مفقود
إنت جيت يا عاشق الطِرح
غايتو لو عرفت الدرب ده تاني إحلنا الحلّ بله
والنص ليس بمفقود وإنما خشِينا مقص الرقيب
خليك قريب يا حبيب إحتمال تلقي عدلك

[أبو صديق]

ياااا ..ده كلو يطلع منك يا أبوصديق ..والله ضحكت ..ضحكت ..ضحكت بصوره ما حصلت قبل مده طويله ..ومفرداتك جديده لنج ..لكن عشان تعبك ما يروح ساكت وإذا فكرت في الطباعه لازم تحول النص للفصحي زي ما عارف والحوار طبعاً ممكن بالدارجي ..مواصلين .

أخجلتني والله يا أديبنا الحبيب وضحكتك دي براااها بالدنيا علينا وشكرا علي الإشادة والوسام الذي ألجمتني به
وشاكر تحفيزك يا غاااااااالي

[أبو صديق]

طبعا بعد التلفونات المكيفه والتكيه الحلوة دي الواحد رخّم وبقي إزوق من الشغل بدري وانتظر الهنان ده وما اخفي عليكم انا استحليت الشغلانية وبيني وبينكم قلبي اكلني علي ابوها المسكين ده ،، مش اخلاقيا زي ما بتفتكرو ولكن عشان الفاتوره طبعا ، واول ما جات ذكري الفاتوره في راسي وقفت تترب وقلت الليله كُر من غير شعور وتعال شوف الجماعه في البيت فقعوها ضحكه لمّن إنخلعت وتعالو شوفو التريقه والمكاواه بتاعت العذابه .. كُر يا كبير ماقلتو نوبه واحد تاني بهناك كُر مالك ادوك شاكوش ههههههه والتالت يازول مالك الليله إنقلبت 360 درجه شفت شنو وانا بين مندهش ومذهول كنت بفكر اتخارج من الورطه دي كيف ‘ وقلت الجماعه ديل ناسي وانا عارفم صعبيييييين ومااا بفوتوها لي بالساهل إلا أجيب ليهم حكايه اكبر منها وحياتكم في لحظه خليتهم إتحسبنو كلهم وقلت ليهم ياجماعه انا طقوني عين وداير اولاد ماما هسسسسسسسي ودقّو لي الزار وقمت علي حيلي ابرطع الزاااار الزار يا اب فرار وجورسي والملك فرج الله وغايتو كبيت ليهم كل الخزعبلات البعرفا عن ناس الزار وجماعتك قامو اتجارو الولع بخور والرش لي ريحه والجاب السجاير وغايتو اليوم داك قلبوها مولد عدييييييل وانا من جوه الضحك شارطني وماقادر وكان معانا واحد من اخوانا المتشدّدين ديل الله إطراه بالخير قال ليهم دي حركات ساي ومافي كلام زي ده والزول ده كويس وقام جاب سمّاعتو وكشف عليّ وقاس لي الضغط والنبض ولقي الشغله جايطه ، المهم في الآخر الحيله إنطلت عليهم وبطلو الكوتشينه وقفلو التلفزيون وبقو حارسني ولمّا الدنيا بقت بالليل قالو يا جماعه شوفو لينا موضوع العشاء وانا لقيتا فرصه اتخارج بيها من الموقف ده وخشيت ليكم فيهم شمال آآآآآي العضّه دي أهم زول وكتّرو لينا الكوارع والمراره والشطوط بالله واريتني كان ماقلت كدي لمّو ليك فيني وهجروني علي السرير وجابو لي البطانية التانية وادوني بندول بلعتوبالقوة وقالو لي ارتاح شويه وبدأو إتشاورو إودوني المستشفي قسم الطوارئ ولأ أجاركم الله مستشفي الأمل ( طبعا دي التجاني الماحي بتاعتنا ) وغايتو ربكم رب الخير سلط علي ود حلال الله إديهو العافيه قال ليهم ياجماعه الزول ده حالتو ماحرجه للدرجه دي وادوهو فرصه لحدي بكره لو ما اتحسن بعدين نقرر نوديهو وين وهسي خلوه إرتاح وانوم شويه ..
وقامو وظبطو عشاهم وانا مصاريني تكركب من الجوع وكرهان نفسي من الحته البايخه الختيت روحي فيها وبقيت في المخارجه ومافي شويه إلا والتلفون ترن ترن ترن وكنت عايز اقوم ارد وقلت امكن تكون هي لكن سبقني واحد واختصر سريييييع الو منو لا نايم والله وطاخ تراااااااخ قفل وتسمعوني انا يا الامين اخوي انا مانايم
الامين – يازول نوم نومك ديل ناس هواء ومامن وراهم فايده اسالني انا
انا- ياخي ديل بنات اهلي وعايز اكلمهم
هو- خلاص لمّا تبقي كويّس اتصل عليهم ومابخليك تتصل بحالتك دي تشفقم عليك
انا - خلاص ياخي وامري لله
غايتو كلامو مقنع لكن بالنسبه لي انا زي البخرّف او مُخرّف فعلا واكلتو غايتو في حناني وقلت ليهو خلاص يا اللمين حا انوم بس عليك الله اعمل لي ساندوتش قال لي هي فتّه إعملو ليك منها ساندوتش هههههه خلاص بجيب ليك ومشي كلم الجماعه قال ليهم الزول نصيييح وسال من العشاء اها اتكبو ليك فوقي يازول كفارة وحمدالله علي السلامه والله لحدي ما انا زاااتو اتوهمت وقرّبت اصدق حكايه اني عيّان وعندي زار وقالو لي خلاص قوم اخد ليك دش كااارب وصلي المغرب والعشاء وتعال اتعشي ومنتظرنك بالكوتشينه وغايتو كان يوم هيلمانه وبعدما اتنفضت وقمت وانا بتعشي قلت ليهم يا جماعه لو بتصدقو او ما بتصدقو الفلم الشفتو ده كلو تأليف وانا ولا عيّان ولا في اولاد ماما ولا بابا اكان تسمع واحد اقول اممممممممك والله ياهو زااااتو انا ماقلت ليكم الزول ده ماتصبحو ليهو الواطه هنا واحسن تودوهو الامل وبعدين ياجماعه المؤمن مصاب ياخي وكلنا بنمرض ،، انا غايتو في الحته دي بالذااات عرفت جديّة الجماعه ديل وكان مالحقت حليت الموضوع خلاص ياني الركبت التونسية والله اعوض فيني وبالله الحق الناس تجنن النصييييييح وبحليفتا كمان ..
قلت ليهم ياجماعه كدي استهدو بالله وختو الرحمن في قلوبكم وقولو بسم الله هسي انا حا احكي ليكم الحصل كلووو من كُر و وووووووووووب علي ذاتو اهدو شويه ياخي ماتخمونا سااي.
اها زولنا بتاع الدين داك قال ليهم ياجماعه الزول ده جنّو مسلم وما شرّاني ماشايفنو ماسك في اسم الله الزول ده اعملو حسابكم منو اها الزول السجمان ده رمي كلامو ده و طلع للشغل .. قلت ليهو حالتك ده انت العاقل يافاروق قال لي النصيحه اصلها حاااااره والمؤمن مصاب ياخي .. قلت ليهو اها انا زاااتو مامؤمن شوف ليك شغله غيري ولأ جيب ليك فتوي تانية ، وبكلامي ده الناس اتصدمت والله وحسيت بالوجوم ملأ البيت وقلت ياربي انا قلت كدا ليييه والناس دي هسي بتفكر في شنو وهل اقتنعو فعلا انا جاني مس وزار والخزعبلات دي وبديت اعاين ليهم واحد واحد بالدور واشوف رد فعلهم شنوــ غايتو اللمين قام مسكني من يدي وهو ماشاء الله زول جهامة وانا بالنسبه ليهو قزم وقال لي يازول تعال بهناك كمّل نومك وانسي الجماعه ديل دايرين إوهموك ساي. غايتو كان صادق او كاذب عليمو الله لكن ماعندي خيار او حل او طريقه أقاوم لسببين الاول الزول زي ماقلت ليكم قوي ومعضّل والتاني وده المهم لو قمت عافرتهم ياااهو الجن زاااتو والله وكان طوّااالي مستشفي الأمل بس ومشيت معاه وقلت ليهو يا اللمين اخوي عليك الله إنت صدقت كلام الناس ديل ، قال لي أصدق شنو ياخي ديل مواهيم وإنت زاتك أوهم منهم وانا كان شفت الجماعه البتقول عليهم بعيني كده ما بصدقم .قلت ليهو جماعة منو ، قام قال لي ياعلي ياخي نوم والصباح رباح وطفا النور ومرق
الله يصبح لينا الواطة ونشوف البحصل علي شنو

[mahagoub]

انا لو كنت محلهم كان بيتك بدون عشا

[أبو صديق]

انا لو كنت محلهم كان بيتك بدون عشا

يبقو علي الإتنين يا بوس
مِيتة وخراب ديار

[أبو صديق]

والله ياجماعه انا غايتو اليوم داك لو في طريقه الارض تبلعني كان دخلت فيها وفعلا الإحساس بتاع انك ( حمانا الله ) ده خطييير وممكن اقل حاجه تروح فيها وانت تكون نصيييح وهناك مابعرفو ليك كان كوركتا كان فنجضت ياكا مجنون مجنون ، مافي نفسيات او اي مجاملات وبعتبروك خطر علي نفسك والحواليك واول حاجه بدوك شئ كده زي تهدئة نفوس وجس نبض إبرة صغيره كده وبخلوك تنوم لحدي ما تشبع وبعدين بتفاهمو معاك...
غايتو اليوم داك نومي كان طشاش والبدخل الغرفه كلو إجي إعاين لي وإلمسني عندي حمّي ولأ لا وانا عامل فيها نائم وغايتو بيا لطيف نمت وماصحيت إلا بكركبة الجماعة قايمين صلاة الصبح ،، في اللحظة دي قمت وكان الله إعزكم الحمام مشغول وبالصف كمان وقلت مافي طريقه غير أجازف ليكم الجماعه ديل بي باقي هترشة أم بارح واول ماشافوني شبكوني يازول كيف اصبحت وان شاء الله ماشعرت بشئ تاني والمقومك شنو ( طبعا زمان كان بصلي الصبح بعد الشمس تطلع ) قلت ليهم داير الحمام وسريع هنا ناسك استعجلو الزول الجوه وبي جاي انا همست لكامل قلت ليهو الجماعه ديل مواهيم ولأ شنو ؟؟ قام فقع ليكم ضحكة من الصباح قالو ليهو مااالك قال ليهم ياخي الزول ده جد عيّان وقال لي الليله العيد ههههههههههههه المهم اتوضيت وطلعت وعلي المسجد مع الجماعه ونحنا طالعين من المسجد قابلنا زولنا بتاع الدين داك فاروق ومن بعييييد إتكشم زي نار القصب قال لينا ماقلت ليكم الزول ده جنّو مسـلم هههههههه والله البركه فيهم القوموك صلاة الصبح ودخلوك المسجد الليله داير ليك كرامه ،، قلت ليهو كرامه شنو والله انا الحبه دي ماعندي وموضوع امبارح كان تمثيل في تمثيل وغايتو انت بالذات شيل شيلتك لو جاتني حاجه اول زول ببّين فيك انت وضحكنا ومشينا كافتيريا بتاعت هنود شاي وحركات وحاولت أقنعهم بالحصل امبارح لكن شكلهم ليوم الليله ما مصدقين انها تمثيليه وكمان ورطه دخّلت فيها روحي من غير ما احس وغايتو من ديك الواحد إتعلم حاجات كتيره والله ، ورجعنا البيت واتفرقنا في الزايله كل واحد علي شغلو والنام والعليه الميز وهكذا احوال العزابه المعذبون في الأرض

[أبو صديق]

ياجماعه لو سألناكم هسي وبصراحه منو البقدر إعترف أنو اخد شاكوش او شواكيش ومدي تاثيرها عليه ،، أكيد في ناس كده زي ناس هناي ومتاميرو بقولو ليك هييييع انا .. انا اتشوكش والعجب هناي داك ياخ ماتخليكم زي هناية دي واضحه وصرييييحه وانا كمان اهو راسي والحفر الفيهو واها هنا بتم ليكم الناقصه وبالتفصيل للناس الماشافو ولا سمعو وسعيلي الله الشئ ده لمّا تتذكرو قلبك إعمل شحّ كانو كان امبارح طبعا ده للزول الاتكسر جد،، وده طبعا كان زمااان يعني بإعتبار ما كان والماضي إسمو الكان هههههههه وانا ما خايف إلا علي زول وااحد وطبعا زول بكّاي زيّو مالاقاني ومااااا اظنّو إتحمّل صدمة الشاكوش وخاصه لو قالو ليهو البت دايره تكمل قرايتا وتقعد تغنّي :

لما القطر صفر,,, والتاكسى اتاخر
حبيبتى قالت بااااااى,,,والله مابقدر
لما قلت ليك مابرجاك,,,قايلنى انا بهظر
وحاااااااااااااااااتك مابهظر
انا رجيتك كتيير وانت زول مستهتر
قلت ليها :يازولة روقى المنقة وانا ليك بعتذر
وماقايلك عووويرة وعارفانى انا بهظر
قالت ليهو :اوعاااااك تانى للتلج تكسّر
وكمان عايزاك قدامى ماتسجر
وتانى ماتخلينى للماشى والغاشى يتمنظر
قال ليها حاضر وركب الدفار مكشّر

اها اخير الحاله دي يا جماعه

[أبو صديق]

طيّب يا جماعه مافي داعي للتفاصيل الممله وحا أحاول أختصر بقدر الإمكان وأديكم من الآخر عشان تشوفو النهاية سرييع ، طبعا المدارس قفلت والبت عملت للعذابه صرعه وكل شويه تررن ترن وين خالو وتررن ترن خالو علي في وجماعتي إضّايقو بالحييييل واكثرهم كان أخونا فاروق لأن شغلو مناوبه والشئ التاني سريرو جنب التلفون ، وعادة في وقت الغداء بنتناقش في جميع امور البيت الميز – الإيجار – الكهرباء – الكوتشينه – إزعاج الليل تلفزيون – تلفون وكانت تلفونات حنان تاخد نصيب الاسد في النقاش والجلسات وماعارف ليه لمّا تجي سيرة الجكس والعرس الناس دي بتقعد تضّرب اسداس في اخماس واطشو شبكه، المهم عمكم فاروق ده قال لينا يا جماعه بصراحة لمّا اكون عايز انوم بشيل سلك التلفون ولكنه وجد معارضه لأن التلفون شئ لايمكن الإستغناء عنه وخصوصا تقنية المحمول لم تصلنا بعد ، وإقترحو عليه أن يرحل في الغرفة التانية وقال لينا بهناك اللمين بشخّر ما بمشي وغايتو علي مضض رضا إتحول بهناك بشرط اللمين إجي مكانو وتمت الصفقه من غير أي تدخل منّي وأثناء نقل دولابه فقعها ضحكه وقال لي انت متكيّف وساكت ساااااااااي رحلت ليك في جرح واكلتها في هناني ودسيتا ليهو وقلت في نفسي والله عمكم ده إلا إرحل ولأ إقول الرووب وقد كان وبعد إنفرادي بتلفون من الهنان أن عرفتها بكل ناس البيت ( العذابه ) وبشتغلو شنو وكمان وصيتا لمّا تتصل تسأل أول حاجه عن فاروق ومديتا بمعلومات كويسه عنه وماقصرت والله واول إتصال الزول ده التقول جاهو ملك الموت ونحنا بناكل حكي لينا انو واحده اتصلت عليه وماعندها اي موضوع وبالله شوفوا بنات البلد ده وتربيه مافي وفراغ ومسلسلات وانا ميّت بالضحك من جوه وقلت ليهو تستاهل والجائي اكتر، ولكن سرعان ما انقلبت الآية وقرّب السحر إطير لي في راسي والزول بقي كل يوم إجيهو تلفون إقعد إتكشم زي نار المنقد ومابقول لي زول تلت التلاته كم وعيييييك وبيني وبينكم انا قلبي اكلني ياجماعة البت دي قالت ليهو شنو الزول ده مبسوط منها كدا، وفي اول اتصال خشيت ليك فيها شمال طواالي يازوله انتي بتتكلمي مع فاروق ده بتقولي ليهو شنو
هي- ههههههههههه
انا – ولاول مره اناديها بزعل وجديه حنان
هي – نعم – الله بالله قولا تاني
وحاتكم نسيت الموضوع زاتو كان شنو ونسيت فاروق وهنانو وتمينا باقي هترشتنا ديك وباي باااي علي امل اتصال آخر ولكن انتظاري طال وطاااال لحدي ما رجعت تاااااااني لكابينة الشارع والافلام الهندية بتاعت الشُفّع دييكي وللاسف كان تلفونهم مقطوع تييييييييت تييييت تيييييييييييت وقطع معاهو قلبي وآمالي وبقيت أودي وأجيب ياربي البت دي كشفوها بتكلمني ولأ يااا الله الحاصل شنو ، أو إكون الفاتوره جاتم إييييييييك وابوها شاف الارقام ومالقي غير رقمنا المتصلين عليهو ديشليون مره واكيييييييد ناوي علي شر ،، طيّب منتظر شنو يومين تلاته ومافي أي رد فعل منهم ولا حس ولا خبر وعلي الأقل لو المدارس فاتحه الواحد كان مشي إتضهّب بهناك والبحصل إحصل بس المهم اشوفا وتااني إتذكرت فكرة حلوة لكن طارت سريييع ولعنت جد عُلا زااتو، أنا ليييه ما اخدت تلفون عُلا دي إحتياطياً كده لليوم الأسود ده وغايتو رجعت البيت وما لي نفس في أي حاجه حتي الحمام كسلت منه ودخلت في دبريشن بطّال ونمت بصلاة العشاء وماصحيت إلا بالجماعه قايمين لصلاة الصبح ، غايتو إستغفرت وإتشهدت .. قمت إستحميت ومشيت صليت ونحنا راجعين بقيت اجرجر عمكم فاروق وقام طواالي قافلني ليك قال لي يازول أطرأ ربك الدنيا صباح وقول يافتّاح ياعليم وطبعاً شميتو رغم إني بعرفو من السودان لكن وحاتكم الهنانات دي الواحد اخوه مابعرفو وفعلا النسوان ديل مسكونات وكاتباتننا هههههههه الله لا جاب عقابكم يافاروق وقعدت أقول براااااي سويتا في نفسي

[ريمون]

ليه الانقطاع .. ؟؟؟
بتتسده فينا العملتو حنان فيك يعني ؟؟؟

[mahagoub]

ابو صديق
سلام
شنو من ديك وعيك

[أبو صديق]

ليه الانقطاع .. ؟؟؟
بتتسده فينا العملتو حنان فيك يعني ؟؟؟

لا والله يا ريمون
الشرّة حاااااارة وظروف وعدّت والحمدلله
وأهو رجعنا لواحتنا الغنّاء
خليك قريبة وحا نعوضكم بكم حلقة غن شاء الله

[أبو صديق]

ابو صديق
سلام
شنو من ديك وعيك
تسلم يا بوس ع السؤال
وأكيد وحتما عودتنا طوعية

[عبدالغني خلف الله]

عزيزي أبو صديق ..أثبت يا راجل ولا يهمك ..ضربت ضربت ما ضربت استحمل ..العلاقات الأثيريه والإسفيريه دي ما بجي وراها غير الشواكيش ..سلمت من كل سوء .