حرب من الجراد والفئران والضببه لا قبل لكم بها

[عباس الدسيس]

مدخل للحكي:
http://www.wadmadani.co/vb/uploaded/3_1362919149.jpg

[عباس الدسيس]

الحق يا زول الجراد جااااكم يا ناس الشمالية !!!!!!!
ناس الجزيرة عوك عوك عووووووك الفار خلاس لحقكم امات طه !!!!
يا ناس الخرطوم ماشين وين اتتكم كلاب لا قبل لكم بها شدو حيلكم ......
برضو اطلع مساعد الياي نافع يصرح الإنقاذ ما زالت قادرة على تقديم الكثير للمواطن لصبره عليها ........ بالله صحي صدقناك.
قبل فترة كانت هنالك موضة للمسؤلين في الذهاب الي البادية للصيد كما طالعتنا الصحف الاكترونيه بان هنالك والي ذهب بطائرة هيلكوبتر لياكل كبدة ابل ..... مقدره والله.
يقال والعهد علي الراوي:
جماعة من ناس الحكومة مشو رحلة صيد كل ما اخبتو ليهم ارنب و ل غزال الك لاب تجري تجيبها ما عدا كل ب واحد بخاف من صوت الرصاص.
قالو للوزير صاحبو لازم تمشي بيهو حفلات الاعراس عشان اتعود علي صوت الرصاص.
بعد فترة وحسب الوصية طلع للصيد والك لب حضر ليهو كم حفلة.
اول رصاصة طلعت الك لب قعد ارقص.

لسع الحكوة ما أنتهت ....................
بعد رجعو الخرطوم قالو ربطو ليهو بطاقة المؤتمر الوطني في رقبتو... الحكاية رابه من فوق.
زمن كنا موظفين بالبنك الزراعي ومشتريات الذرة كان هناك امين مستودع من جماعة ناس جزاكم الله خير الراجل ماسك ليهو مستودعات قدر الليلة وبكره وحريص جدا عليها لدرجة عندو مكاتبات مع الادارة بخصوص الفار فايل كامل يوم بعد يوم ارص ليك خطاب للادارة: السيد/ مدير الادارة الزراعية المحترم
إن الفيران اعدادها كبيرة وهي دائما تتواجد بالمستودعات طيلة الفترة ونخشي علي المحصول منها...... الخ
صورة للسيد/ مدير الاقليم الاوسط
صورة للسيد/ مدير ادارة التخزين
وهكذا خطابات لما ادراة المراجعة من الخرطوم حضرت للمراجعه وجدت الموظف معه لوحة خشبيه معلق فيها فيران ميته الفار قدر الكديسه كعينة لتلك الفيران ثم سلمهم الفايل قبل زيارة المستودعات .
مشو للمستودعات فتحو الابواب ........
يا الله المستودعات فاضية ما فيها ولا حبة عيشة !!!!!!
يا زول الحاصل شنو وينو العيش ؟؟؟؟؟
قال ليهم الفايل الشايلنو ولوحة الخشب الفيها الفيران الميته اديتكم ليها عشان تودوها متحف السودان .
دليلي علي ان الفار اكل كل العيش انا السنة كلها انبح زول جاب خبري مافي.
قالو ليهو : طيب العيش اكلتو الفيران وين الجوالت الفاضية المقطعه !!!!!!!
كل زول بعرف امهد لي جريمتو كيف الحكومة مقبلة علي نهاية موسم زراعي ربنا رسل ليها رزق من السما الجراد عشان اكون سبب والفيران اكلت مشروع الجزيرة مع انو لا توجد زراعة من اساسو .
اما حكاية الكلاب في الخرطوم منتظرين الحكومة استفادت من تواجدها في شنو !!!!!
المتعافي امس في التافزيون في برنامج احمد البلال الطيب صرح بان الوزارة ابادت مليار جرادة....
طيب صدقناك بس عليك الله ورونا عرفتو عددها كيف مليار.

[عباس الدسيس]

http://www.wadmadani.co/vb/uploaded/3_1362924761.jpg

[mahagoub]

الدسيس الرجل الساخر
مع العلم انها حقائق
هم ما فاضين لينا ولا سائلين فينا
البنا فى ماليزيا والمدكن فى اوربا
كل المشاريع الناجحه فشلوها
تقول جراد وفيران
حيقولو ليك دى وجبات مجانيه

[بدر الدين احمد الطائف]

غايتو يا دسيس الكيزان ديل مافضل ليهم الا يجيبوا لينا ود امبعلو ياكلنا

[ودالعمدة]

الشعب بقى هيكل ( عظمى )
عشان كدا بفضل الحكومة بقينا دولة ( عظمى )

زمناً سجم ..
زمناً سجم ..
حتى الظــلم فيهو إنظــــلم ..
سنوات عجاف يبسن ضروع
حـلـــــبن مـــــــواعينن ألم ..

شـــعباً عضم من غير لحم ..
حزناً بكـــــابس في الضلوع
نفس الضياع للـــــــروح كتم ..

[بنت الرفاعي]

:):):)

لكَ التحية أخي عباس.:)

أثناء مشروع .......
كان في (بعوض) شكله عجيب،
بعد ما حصدوه كان حصاد المناطق القريبة منه:
فئران
و
ثعابين (دوابي)!!!!:eek::
وعادي جداً يلقوها في أي مكان في المنطقة والبيوت!!
أما الشارع الرئيسي كما وصفه أحدهم عبارة عن (لحم)
كناية عن الفئران والتي قُتل الكثير منها فأصبحت
في كل مكان (تغطي الشارع)!!!!:confused:.

اللهُ المستعان به.

مع كل التقدير والإحترام لك.:)

:):):)