المساعد الشخصي الرقمي

مشاهدة النسخة كاملة : ما براى



osman alsmmani
09-03-2004, 04:01 AM
رد لاختنا الشاعره انتصار محمد الحاج (مسكين براك)
ونقول:
ما براى
ما براي
وحاة عويناتا البضون في سماي
الدنيا ما بترحم رحيم
إلا الصبر زاد المسافر للهلاك
خلق الله مخلوق ما إله
حيناً يكون ألم الحداك
أكبر من المكبوت جواك
والصبر زاد المسافر للهلاك

إلا عاد نورا البيقدل
يشع جواي
وطيف خيالا المبتسم
دايماً معاي
صوتا الملازم لى نسيماتي وهواي
وحديثا ينسيني الوجود وأعيش معاهو
أروع سويعات في العمر

أكتبلك ؟
لو كتبت أنا شن بقول
أحكي حالي مع الظروف
ولا حالي مع القمر
اتنين ملازمين للبشر
واحد بيخلق فينا زول
جرب وعاش الحلوة مر
وواحد يسامر للنجوم
وتغسل شفافيتو الهموم
ولا أكتب عن ........آه

أنا لى وراي أنا ما بشوف
بحلم أكون زي الزمن
ما عايز أقيف
دايماً بعاين في المدى الممتد
ولى قدام يشير
راحل وسط عينيك وحاير فيها
شن فيها ؟
فيها عالم من عوالم
عالم بديع زاهر وحالم
فيها خوف
فيها ريبة وهاربة من قسوة ظروف
وبرضو فيها العفة والريد النضيف
فوقا جنة من السماح
مزدانة بى أحلى الحروف
عرفت ليه راحل براي
شان أشيل الريد براي
وما أشارك زول عيونك
وفوق سجونك قلمي حاير
شجني منك ومن هواك
حاولت أدسو
إلا فوق عيني بان
وقبل عيونك

والعمر واحد ومو عمرين
والحيرة ما بتعرف متين
تزور العالمين
في الصبا ولا في كتر السنين
ولو الدنيا شالت ... برضو أدّت
والصبر شيم الرجال
وما في زول وصل الكمال

لو كنت شاعر شعري نابع من عيونك
والمصب كان في جواي ... ما براي
رب القدرة رب الخير معاي
داعيهو يحفظ لى هواها
ولى هواي .. ما براي .. مابراي
مابراي

114
09-03-2004, 11:11 PM
شكرا يا عثمان السماني على القصيدة
ونرحب بيك عضو جديد في المنتدى، فألف أهلا وسهلا

admin
10-03-2004, 01:38 AM
الاخ عثمان
لقد وافق الاخ 114 المشرف على صفحة محراب الاداب والفنون بالموقع علي نشر القصيدة بالموقع لذا نرجو مدنا بصورة لشخصكم وبعض المعلومات مثل الاسم والايميل ومكان التواجد حتى نقوم باضافتها لصفحة المحراب.
وشكرا

ركشة
21-03-2004, 04:21 AM
قصيدة جميلة يا ود السمانى..........
انت فيك عرق من مدنى..بدون زعل