الشعر الحلمنتيشي ما رايك

[tahaa]

رايكم شنو لو فتحنا لينا باب آخر
الشعر الحلمنتيشي المهم تدوين لما كتب ونشر
وكل حسب ما في وسعه

نسأل الله التوفيق ...

قلبي صحن دش وعيونك عربسات

والبث حي مباشر من شفاتك

سلكي ولاسلكي وعبر المسافات

يسري اثيرك في فضاي وصفاتك

القلب مخرج والمشاعر مذيعات

والشوق مبعوث مراسل لذاتك

ارسال متواصل على خمس فترات

ينقل وقايع ما يصير بحياتك

صورتك في فكري على سبع شاشات

وافضل برامج سهرتي ذكرياتك

وارسال حسادك قطعتة عن السات

بدلت كيبلهم بكيبل غلاتك

والغيت يا ثريا الغلا الأشتراكات

ما عاد اشاهد غير ما بث ساتك

لو شوشت ع البث كل المحطات

يلقط رسيفر خاطري ذبذباتك

جرب على ريموت الأحساس ضغطات

تلقاه ما يختار الا قناتك

[tahaa]

سـِـــــــســتر

أنا العيان حرارتي الضاربة فوق ميتين
ولا بنفع بخور تيمان
ولا بتنزل بنوفالجين
رقدتّ سنين ... سريري تِعِب
مِركب في وريدي دِرب
جُحر عيني يدخل فارة أُم سيسي
أجر في نفسي السيسي .. تقول مخنوق
مصنقع فوق
وكل ما يوم يشيلوا الدم ... يزيدوا الهم
يقولوا مقامسو طالع كم وطالع كم
وأنا الساكت وغالبني ... محل ما اشوفِك أتكلم
وما بسلم ... وحاتي البلي والشمبر
أكان قمت .. بقع في السلم أتكسر
عشان تظهر .... تمر بسراير العنبر
وتأخد نبضي بت سستر
عيونها الزي عيونها براها
تطعِّن بالإبار مُرضاها
وإبره تريكو في منديل ... وما بتتعب
تكركب في البلاط كركب
قِليبي يــدق .. يِســــــو رب .. رب
وناره الليلة تتعلب
دا عنبر كم وشايل كم دكاترته كم .. وفد سستر
وحايمة براها في السنتر
تجهجه في خلايق الله
وأنا العيّان ... حرارتي المابية تتدلي
أدوش دوشــــــه
أهضرب هضـــربة زولاً
رقــد في برشـــو ... خت رِويســــو فُوق بنبر
ولما الناس تقول هســـتر
وتتغالــط ... أظن هســــتر
أظن دســـتر
أظن بامية وأظن كســـتر
أظن شــيزو وأظن أكتر
أدق الطاره واتحكــــــــر
أدوبي أشــكِّر الســــستر
أوصِّـــف في بنات آوى
كِـضب كان قالوا بتداوى
وآخر في المداوى الكيّ
وما أظن ذاتو ينفع في
أتوه كل ما العيون ترمش
وكل ما السِّلسلة تكشكش
أزوغ أتضّــــارى ف الكُــوريِــدور
وأخضر لابســـة بقت نور
وخاته الكاب على جنبــــه
وراشـــّه الريحــة فايحة زهور
تموت كُــرعي ... أقع وازحف وراك طرطـــور
عشـــــان أرتــاح .. عليك الله وعليك الله
تَفَجِّـــــخي راسي بي ســــــاطور .

[ابراهيم]

لك الود والتحية أخى طه لهذه الاضافة الجديدة
وهذا الجانب الاجتماعي الجدير بالاهتمام فأحيناً
حلمنتيشية المواضيع تخدم المجتمع أكثر من جديتها
أحييك على هذه اللافتة والفكرة الجهنمية ..

وهذه قصيدة حلمنتيشية (فرمالتي طبعاً) بعنوان بعشوم وصل حافظا من سنة رابعة:

بعشوم وصل

أمونة كان بتدورو من زمن الجهل

والليلة عاد .... أمونة ما طيفك وصل

قال السنين في الغربة مرة

عديتة والدمعة بتسيل

وعشان عيون ست البنات أمونة خضت المستحيل

كل يوم دمعة بتسيل

قال يا حماتي: المهر جاهز والله تب

والصناديق الهناك ... أكوام حليب جاهز معلب

والشيلة ماليها الهدوم

والعطور باريس ، ديور

والكريم عند اللزوم

وعيون حماتو عليه تطوف

قالت: بلاهي شوف !!

امونة طاريها الألوف

خطابا واقفين بالصفوف

بتدورو بي حبة قفوف؟

بلاهي قوم

شوف ليك مكاناً فيهو نوم

بعشومنا قام

قال يا حماتي كفاية عيب

قولي شن بتدوري

شان امونة تبقى على قريب

قامت حماتو من البرش

قالت مهر أمونة بت ما بتهبش

مهر أمونة دش

وات كان صعب أحسن تمش

بعشومنا قام

قال يا حماتي أكان نسيتي أذكرك

يوم عرسوكي بفد قرش؟

الشيلة دمورية سادة

والغرفة مخلاية وبرش

والحفلة لا فنان .. ولا ضلاً يلم

والكون يشع

دلوكة في عز الشمس

والليلة جيتي تقولي

عايزة مهر امونة دش

عل عالمنا الجديد

مليان خداع أوهام وغش

الناس أمورة معركشة

من الغنى الداير يزيد

والفقير الداير يضوق الحنكشة

يطلب مهر دشاً كبييييييييييير

وكمان عمارة مكندشة

بعشومنا قال:

أمونة كان ضحيتي بي حب السنين

وطريتي عهد النعنشة

ما تطري زولاً كان حبيب

خليهو للزمن الغريب

ينهش عواطفو يخربشة

[114]

أحب الشعر الحلمنتيشي يا طه، فكرتك حلوه، وحتبذ بقية المطارحات الشعرية والغنائية والدوبيتيه

[tahaa]

الأعــزاء

إبراهيــم ، والرقم المميز ( 114) عدد سور القرآن الكريم


لكم مني كل الشكر والتقدير وكل هذا من فيض مشاعركم
وإلهامكم وذلك حسب ما عرفت بفكر إني أكون فعلا مجتهد وبحاول إني أكون في زيل إبداعاتكم لأنكم ضليعين في هذا المجال وأتمنى أن أكون عند حسن ظنكم بي

ولكم مني كل التجلة والإحترام ،،،

[tahaa]

بتقولى شاغلتك؟
حصل شوفتينى اتكبكبت ولا مشيت فى دربك
ما بس ساكت قدر مكتوب وجابنى وقعدنى جنبك
ولمن كنت بعاين ليك وما عاجبنى لون عينيك
ما بس كان قصدى اتسلى وافكر فى خلايق الله
واتذكر بناتن لينا فى الحله
رقابن زى رقاب الريح وقت فجّى الغمام طله
وقادر انت يا الله
كيف خلقك وكيف رسمك وكيف سواكى غورييلا
كلك توب وباروكه
ويا ملوخيه مفروكه
يا مكرونه بالشوكه
ما خليتى ليك ريحه
فلودمور وباتريشا
كمان دلكه وكريم نيفيا
بتقولى شاغلتك
احب الله وازيدوا ملاذ
احبك أنا رامينى جمل


رقم ( 2 ) سبحان الكريم


سبحان الكريم مخلوقه انتي من التراب
محظوظ دوام دا البشوفك بستطاب
حلوه ..وظربفه وبسحروك من غير حجاب
الوش ملمع مافيهو طبعا حب شباب
والعيون بس رسمه بس
وقلبي الرهيف وقف انحبس
قام انفعل دفر الضلوع خلاها تدخل في الجبس
وانشلت الافكار معاك
غاب القليب سافر هناك
وما اظنو عائد يا ملاك
كيف يعود والبسمه راحت وانتهت
وكل الاماني الفي قلبي اتمحت
ما انتي ما زي فلانه ديك جابت
كريم اتمسحت
ولا زي ام الحسن قاعده في بنبر
قديم اتمشطت
لا شربتي ليك جبنه في سموم
ولا نهرتي ليك غنمايه يوم
وانتي الجنه والجنه براها كوم
انتي النظام
لبسك نظام
اكلك ظريف
كبسه وحمام
يومك كمان دائما غمام
ما اظنك قلتي .. يا ناس ..هوووي سلام
ولاقلتي (تب) ولا هداك زول
وما اكلتي كسره ملاحه كول
وما اكلتي فته معاها فول
وما شفتي احساسي الرهيف
يا ست البدور
وانا بحكي لي وليدا كان
جاني ضيف
نظراتك تخلي الزول بردان
خلااااص والدنيا صيف
وقلبي المشمع زي مساعد حريف
تعب بي وراك وضاق الوان العذاب
وعزاهو في صوره منك يا رحاب
ساعه لقاءنا يا جميله
كانت ساعه وداد
وسبحان الذي خلق
نوح وهود وعاد
وساعه وداعك ياجميله
البرد زاد والحر زاد
وانا من زمان عارف انه
حب الجمال مزكور في الكتاب
لكن ما كت قايل
حواء وضعت فيك كل الجمال يا رحاب

[tahaa]

جيناكم يا ناس عشة
ناكل ونتعشى
نشرب وندشى
وبالموية نترشة
كشونا جنس كشة
*****
سيد بشبش .. سيد بشبش
عامل حاج ونضيف وبيرقش
أمرو بيمشي وكفو بيطرش
وعينو الحارة في يوم ما بترمش

عند المكتب رسمي بيغضب
جوة البيت يرفس ويضرب
وسط أصحابه بيرقص ويلعب
راجل نكتة وصاحب مقلب
وآخر الليل يقابض بشبش

*****
وسيد بشبش راجل دين وراجل دولة
صاحب سطوة وصاحب وخطوة وصاحب صولة

وبيني وبينكم
سيد بشبش واعي وفاهم .. فاهم .. فاهم
وعارف إنه الواحد .. برضو .. ويعني .. ولازم
وبالمفتوح بس ده كلام سر مافيش واحد يمشي يسمع
سيد بشبش راجل دغري
لكن بالليل هجيجو يولع
زي ما تقول بيحب المنقة والحاجات النايس ونص نص

وقبل ما ندخل ديب آند ديب
أحسن نعرف صورة بشبش
أسمر .. أصلع
وشو بيلمع
بادية عليه علامة النعمة
عالي ومكرش
وعرجة خفيفة في حادث حركة
شكل سيادتو عموماً مدهش
ودايماً يحمل سبحة تسبح وحدها دون تسبيح
أتوماتيك .. حكمة ربك ونعمة صحيح

*****
سيد بشبش راجل أرقد
ريتش إنتلجنت
إسموث آند إليقانت
بت سمتايمس آند دستدريندق
أبريس وييك آند دسلايكلي .. سيمكالت

في عصرية وكانت جمعة
سيد بشبش .. حكحك دقنو وهذب شنبو
ووشو بينضح نضرة ولمعة
خت عبايتو، وطق عصايتو
وخبت الباب من خلفه برزعة
خلى البيت يتراجف كله
حاجة نفيسة بناتها تلاتة
وبالأولاد بيكملوا سبعة

في المرسيدس أخد القعدة
كدوسو البني يهبهب نارو
مد صباعو .. وهز دماغو
يعني سيادتو بيحي في جارو
وعاد البينز قال يا ليل
وسط الشارع يلوي غبارو

وأثناء ما سايق وماش في السكة
كان بيدندن.. يعني بيمدح
دشكة .. دشكة .. أووو دشكا
دشكة .. دشكة .. أووو دشكا
نحن ما صعاليك .. أووو ديشكا
نتاوق بالشبابيك أووو ديشكا
دشكة .. دشكة .. أووو دشكا
وأثناء ما سايق يغني ويمدح
عينو الزايغة بتجمع وتطرح

وهناك على زاوية لمح المنقة
أووووووووه
سيد بشبش تمساح لو يلمح
قلبو ينطط جوة ضلوعو
يطق الروري يسكل ويردح
ولفه ودور حول المنقة
ودور ولفه
رسم الزاوية وكشف المسرح
وبسمة أنيقة صناعة بره
بسمة ثعلب حكمة وخبرة
ما نتفاهم يا خلق الله
وعاد خلق الله ما فهامة وناس واعيين
عارفين الحال والأمر الواقع
إشارة خفيفة وغمزة عين
كان الرد الفرح بشبش وخلى سيادتو يهدي يمين

وجات المنقة تشيل تتمخطر
مساء الخير .. آنسة مرمر

إسمك روعة
جسم روعة
بهجة وسكر
أما سيادتو: سيد بشبش
رائع مدهش
إسمك منعش
موسيقي ومطرب
بس خازوق الناس تتلخبط ومرة تقول لسيادتك.. شبشب
يا بت يا نكتة صنفك متعب

*****
وهناك في شارع كم مش عارف
والبيت الناصية أشجار وزخارف
عربات تتلامع لمبات ورفارف
كانت هيصة وربة تولول
ناس بتصفق
وناس بتزغرت
وناس بتهلل
وناس بتنادي شيلي وختي
وناس بتغازل أموت يا إنتي
وناس منبسطة غاسلة وكاوية
وناس ركاني بتعزف زاوية
وناس بتغني حني يا تتي

وسيد بشبش أمير الموقف وبطل الساعة
كان مشغول.. مع ناس مرمر بيصلي جماعة
لمن تم صلاتو وسلم
قام يسلم بالأحضان
قال مشتاق وكاتلو الشوق في الحبان
وزي ما قلنا قبيل عم بشبش راجل بهجة وجد فنان
جدع العمة هناك وعصايتو ولحق جزمتو بالقفطان
وهاك يا دانس

ودارت حلقة عجاج وغبار
وناس بتسوي الردحي الجد
وناس في الردحي رقيصها هظار
وناس إنبسطت فوق للحد
وناس بتدق كاروشة وظار
وناس بتقول يا رفاعي مدد

ناس إنبطحت
ناس إنمبرشت
ناس إندرشت
ناس إنكمشت شان تتمد

وفجأة في لحظة حصلت كبسة
وزي ما تقول البيت إنهد
الجو إتلغم
فار واتسمم
وصل الكومر شكله يخوف
نزل إمباشى معاهو الأورطى
عملوا السد وجاط الموقف

وسيد بشبش ضرب اللخمة
ربط الساعة مكان الجزمة
لبس الجزمة وفاكرها عمة
لفة العمة محل الساعة
لقى القفطان ورمى الشماعة
فكر ينط من فوق للحيطة
تلب تووف جوة البلاعة

وجوة الكومر وبالبوليس الناس شحنوها
البتباكى والبتوقع
البتعزر وبالبتشفع
والضحكات باهته وبتشجع

وناس تتجرس
وناس تتونس
وناس بتحنس شان يعفوها

وفي نص الكومر كان متمحن سيد بشبش
ماسك سبحتو
مرة يسبح
ومرة يقحقح
ومرة يسب
مشغول باولاده وحاجة نفيسة
وناس المكتب وكيف القصة هناك بحكوها
وكل ما مرمر تبسم ليهو
يسب للمنقة ويوم زرعوها

نحمدو وفي الجنة ننكمدو

[tahaa]

هاكم دي
ماني شبه عريسك انا الحفيد تربال غبش ومشققات ايدى
وحرم الكرم والجود
والطورية والواسوق ياها ورثتي من جدى
عريسك انتي دايرة حمار اردوي وتلب مردى
والياخدك حقيقة حمار وبي سرجا عضم شدي
ولا عري اركبيهو كمان ولا شوال ولا لبدى
واربطي برة من الحوش بي جنزير وبرمندي
ماني شبه عريسك انا والي بكرة ماعندي
عريسك انتي شبهو برة
عريسك يشبه القمرة
يشاركك انتي في التوليت والمكياج والخمرة
كمان عن حفرة الدخان يقولك ياختي زحي كدي
ملقطة كلك اسبيرات متل فضية العدي
ضفورك من صنع باريس
رموش عينيك هولندى
مساحق بدرة مصرية
بي صابونة بتهدي
كدي اسكني اقلعي الباروكة كان ما تشبهي الكودى
ولا تعالي بي شوال قصير ركبي كان ما احلف عليك سقدي
وماني شبه عريسك انا
وانا اللي بكرة ما عندي

[tahaa]

دريفونه

وصغيرُونه

وحليوُونه ،



تقول ليمونه ..

مَسْقِيه بدموع الناسْ ،



تقول حِنه

مشتته فوق إيدين حلوينْ

فى بهجة عرس سودانى ،



تقول نَمّه

يا دوب تِتْلمه

تِتْلَمه

شِوَىْ

فى شوَىْ

شويفعونه

لِذيذونه ،

تقول وَجَعَ الطِنيبراتْ

فى ذاتْ . . مِن ليلْ

بِتنقرشْ

على القِيزان . . غناوياتْ ،



-3-

دِقَيْقُونه

تقول رميه سُؤال . . يا دوبْ

ومن خَشْماً صَغَيرُون .. دوبْ

وما عِرف الكلامْ . . يا دوبْ ،



-4-

شويفعونه ،

تقول مويةَ المحاية . .

تقولْ ،

تداوى الزولْ ،

بِسيماتَه .. تقول نُقَاطْ

شِوىْ

فى شِوىْ

يِسَوِن طَاطْ ،

عِويناتَه

تقول هَمْبُولْ

وللبنوتْ . . وَجَعْ مسلولْ ،



-5-

طِعَيْمُونَه

تقول سُكرْ ،

وإن نضمتْ ..

نَضِم سُكرْ ،

وإنْ ضِحكتْ ..

ضِحِكْ سُكرْ ..

تعادى الزولْ

تخليه ..

يكون سُكرْ ،

دِريفونه

وصغيرونه

وحليوونه ،

ولسه يا دوبْ ...

ولكين ووبْ ..

من لشافعة . . . الشِويفعونه

[tahaa]

ألانا

حدباى
هى زى هبهانة وما هبهانة
وزى بنانة وما بنانة
غايتو نحن مجننانا
حتة حتة مكسرانا
لسة ما عرفتوها برضو
دى ما ألانا
ألانا خلتنا عاد ننضم برانا
غايتو لو سكنت حدانا
نحن ما الله معانا
ألانا ما بتاكل فتة اصلو
وما بتمشى الاجزجانة
فيها حاجات مغلغلانا
تلاتة شامات جنب خدودا وجنب اضانا
اضانا زاتا مطنشانا
تلاتة حاجات لاها وحدى ولا توأيز
وفيها أيز اى واحد شافا مرة
الجماعة رقدوا خردة
أولزا بيبل راقدين جنايز
اف انا مرة اغتربت
ولى امورى اورقانايز
لى ابوها جوة هاوسو بمشى ليهو وما بلاوز
اصلى حربى وفقرى ييشن
اقولوا امايستميشن انى يور دوتا
رهيبة وليها عايز اعرسيشن
اف هو قال لى رافضيشن
ولى عيونو حمريشن
بقولو ليشن وبالحجارة بجدعيشن
وابقى بيشن

ألانا جاتنا فى الخرطوم هنا
الجماعة جنس دفر وجنس عفص
وجنس كبع وحريمنا عاد فتحولو تب
من الزعل داير ينفقع
ألانا جاية من استراليا
جكسينا عاد امبدة والديم والربع
ألانا جاية من استراليا
لابسة جنز بلوزة غالية
جكسينا ناس جكس العباية
وفى العباية قماش ملاية
ألانا جاتنا بقوها زى ست الودع
جاها واحد قال ليها يا ألانا
جرى كبسولة الزمن دى شهرين لى قدام
شوفينى بعد الامتحانات بباصى ولا بتشلع
جاتا وحدى قالت ليها الرسول يا ألانا
تجرى كبسولة الزمن دى عشرين سنة
شوفينى بتزوج ولا شاكوش بتلبع
بعدين ألانا لا بتنخلط ولا بتقتنع
الا لى انا دة فقرى جدا مطلع
انا عاد بخاف
قلت ليها ارح نقعد فى سنة تلاتة الاف
وفو مشينا سنة تلاتة الاف
قلت ليها تعرفى ناس القرن العشرين
ناس متخلفين ... سفر بالطيارة
وكمبيوترات وجنس عوارة
اها قمنا راجعين كبسولة الزمن ضهبت
وقعت بينا فى امبدة جنب المزارع
نزلت منها ألانا شافت الناس بتاكل فى الكوارع
جرت للكمبيوتر قالت ليهو يااى
نحن فى ياتو زمن ؟
قال ليها نحن فى الزمن الضائع
ألانا معاها وحدى قالوا جانا
يعنى بس بالشايقى جينى
يالحلوى وظريفى
الكريشة ماها ظاهرى والرويس تب ماهو نيفى
جينى قمى وكونوا زاتا نشوفا نحنا
دى زاتا نعمى
والشايقى فيها اندهش داير
يقول دة الشغل قال دى الخدمى

يا وجع ساكن كلانا
الا جد جد وبامانة فى بناتنا بنلقى
مليون زى ألانا
فى السماحة عسل بدفق
ومسخن سكر كنانة
وفى العلم افكار دؤوبة
شان يطوروا مستوانا
فى بناتنا بنلقى حاجة ما بنلقاها فى ألانا
فيهن العفة الرزانة
وفيهن الامل البيضوى
فى مدنا وفى قرانا

[أبوبكرحامد]

والله ياطه الفكرة قمة فى الروعة وتمثل إضافة حقيقية للمنتدى ، مثلما كانت مشاركاتك اضافة رائعة للمنتدى سعدنا بها وكلى ثقة أن لديك الكثير من الإبداعات فإلى الأمام .

[tahaa]

الأخ الغالي أبو بكر حامد

والله كل ما لدي لا يساوى شئ بالنسبة لكم فأنت بحر زاخر بما تملك من كل المواهب وشكرا لك على هذا الإطراء وأتمنى أن أكون عند حسن ظنك

والي اللقاء

[naz_imam]

الاخ العزيز طه
المميزون فقط هم القادرون على صنع الابتسامة فى زمن الرتابة لك تحياتى الحارة وانت تثرى المنتدى بكل ماهو جيد وجديد وقد كنت انت دوما السباق لكل ماهو جميل لك منى اسمى ايات الشكر فحقا ارجعتنا الى زمن كنا نتمنى ألا يمر هكذا ، وكلنا على ثقة بان لديك المذيد فلا تبخل عليناوفقك الله وسدد خطاك وحفظك فى حلك وترحالك

اخوك دوما/ نزار الامام

[tahaa]

لك ألف شكر على هذا الإطراء يا أخ نذار وأنا الذي يقول لك إلى الأمام يا إبن الإمام


عايز اكون
------

قالو زهجانه واظنك ....ما عرفتي سؤالي عنك
يا اللزيزه الكلكي جنك
عايز اكون انا ابقي منك
اي حاجه قريبه منك
تبقي طربيزه ابقي كرسي
تبقي راكب ابقي تكسي
بيكي اسافر لام دقرسي
وتبقي حافله ابقي بوكسي
وياسلام لو ابقي ببسي
تشربيني
تقرطعيني
تدفقيني
وما مهم
هي قرطعيني
بس مهم شوفت عيونك ابقي منك ... اي حاجة قريبه منك
تبقي وردي ابقي ترباس
تبقي سانتو ابقي كدباس
تبقي بنكي ابقي حراس
تبقي برعي ابقي عباس
تبقي اوبرا ابقي ترباس
ابقي غرقان تبقي رفاس
رفسيني
وفتشيني
وغرقيني
وفنجطيني
وماهم
هي رفسيني
بس مهم شوفت عيونك وابقي منك ... اي حاجه قريبه منك
تبقي فالق ابقي مفلوق
تبقي كسره ابقي طايوق
تبقي منفوخ ابقي مطفوق
تبقي ويكه ابقي لايوق
تبقي شناق ابقي مشنوق
تبقي حراق ابقي محروق
وياسلام لو تبقي خازوق
مقلبيني
وزهجيني
وعكريني
ومامهم
هي مقلبيني
بس مهم شوفت عيونك وابقي نك ... اي حاجه قريبه منك
تبقي حيطه ابقي طوبه
تبقي روسيا ابقي كوبا
تبقي جمباظ ابقي هوبا
تبقي غنمايه ابقي لوبه
تبقي فاطمه ابقي زوبه
ابقي راس هي تبقي قوبه
ألميني
وعوريني
وبشتنيني
وزهجيني
ومامهم
هي عوريني
بس مهم شوفت عيونك وابقي منك ... اي حاجه قريبه منك
تبقي سكر ابقي ضبان
تبقي بوليس ابقي بمبان
تبقي كبده ابقي مصران
تبقي شيته ابقي طرزان
ابقي حفله وتبقي سكران
فرتقيني
وجهجهيني
وبهدليني
ومامهم
هي فرتقيني
بس مهم شوفت عيونك وابقي منك ... اي حاجه قريبه منك
قالو زعلانه واظنك
قالو قرفانه واظنك
ماكي عارفه سؤالي عنك
يااااااااااااا اللزيزه الكلكي جنك
عايز اكون انا ابقي منك اي حاجه قريبه منك
اي حاجه قريبه منك
اي حاجه قريبه منك
اي حاجه قريبه منك

[سنين]

لك الشكر اخي طه لاتاحة هذه المساحة وهذه مشاركة مني ارجو ان تجد القبول والاستحسان

<marquee><font size=5color=red>
<center>فلنتاين</marquee>

جابت ورده <p>
وختت شمعه <p>
"وقالت صحي ..النوم يازول<p>
عيد الريد والناس مبتهجه <p>
مالو البال لا زال مشغول" <p>

عيد الريد<p>
السنه كم عيد ؟ <p>
ماهم عيدين <p>
في تاني جديد <p>
يابت معقول <p>

ضحكت <p>
ونغمة صوته تغني <p>
وقالت <p>
"تُب
تاريك ما ناقش <p>
عيد الحب الليه وحاتك<p>
وكان ما ما شي <p>
برايه بقول"<p>

بتقولي شنو <p>

شالت عينه..ورفعت راسه <p>
وقاعده بتكتب في<p>
كراسه <p>

تكتبي شنو؟ <p>

هي يازوله دقيقه <p>
استني <p>
عيد الحب ده عديل محني <p>

<p>العيد الاول معروف شغلو
لفا طويله وحلويات <p>
والعيد التاني <p>
كمان بس لحمه<p>
مراره وشيه وشربوتات <p>

العيد التالت <p>
فيهو شنو؟ <p>

"قالت فيهو جنس حاجات<p>
اسكت ساكت <p>
امشي وشوفو<p>
وكان ما بتعرف <p>
قلد واعمل <p>
بس <p>
بنظام الخواجات <p>
"

الخواجات!!؟ <p>
ناس عوض ود احمد<p>

وقامت كيف<p>
والغضب اتوحد<p>
وقالت وصوته حاضر وبشهد <p>

انت مطرطش ولا شنو<p>
اه لو اعرف قبل القاك <p>
انك فاره <p>

فاره منو؟ <p>

اه لو تعرف قلبك صخره <p>
وانا نواره <p>
نوره منو؟ <p>

اه لو تعرف ؟ بس استني <p>
آآآه انا منك <p>
ياخ ما بتفهم <p>

هوووووووي <p>
يابت ما عندك شغلا <p>
قالت عيد والناس محتفلا <p>
وبتضبحو ايه انشالله الليله <p>

زعلت وقالت "حاوريك <p>
حضبك انت يامتخلف <p>
وما متعلم <p>
فلنتاين <p>
ما تتكلم
"هي ما تقولي بقولو شنو <p>

ضحكت وقالت <p>
"i love you" <p>

هي يا زوله <p>
<p>u love me
اي لفلي اشوفك<p>
دي براها كفايه <p>
can i see <p>
<p>عيونك مره
<p>
ابتسمت وقالت <p>
"ههههاااااااي <p>
yes u can" <p>

وطيب بس <p>
ما تقولي كده <p>
علا دقيقه عليك عينيك <p>
عيد الحب ده <p>
علينا عليكي <p>

وكل سنه وانتو طيبين <p>

[tahaa]

والله عقدتني عديل ما عارف أقول ليك شنو حتى الشكر بسيط عليك ربنا يديك ألف عافية وما تنقطع ( وما تسوي الدرب ساساقه ) هاهاهاهاههههههههههاي
بالله ما تزعل لزوم الضحك

بصــراحة والله يا سنين زولا لقطة وكل إحساس وزوق وألف شكر على هذه المشاركة الرائعة زي روعتك وأكيد عندك الكتير الكتير

لو الشجر أقلام جميع والنيل مداد
لو كتب أشواقي ليك ما عــددا

[ياسر فقيري]

طهههههههههههههههههههههه رائعة جداً فكرتك دي .. ونحن معاك ومن خلفك وبي جنبك يلا سوا

[aadarob]

[QUOTE]كاتب الرسالة الأصلية naz_imam
[B]الاخ العزيز طه
المميزون فقط هم القادرون على صنع الابتسامة فى زمن الرتابة لك تحياتى الحارة وانت تثرى المنتدى بكل ماهو جيد وجديد وقد كنت انت دوما السباق لكل ماهو جميل لك منى اسمى ايات الشكر فحقا ارجعتنا الى زمن كنا نتمنى ألا يمر هكذا ، وكلنا على ثقة بان لديك المذيد فلا تبخل عليناوفقك الله وسدد خطاك وحفظك فى حلك وترحالك


]الاخ طه الفكرة رائعة اتمنى ان لا تنقطع ......كل الشكر لك

[tahaa]

الأعـــزاء
يـاســـر فقيــري / aadarob

لكم مني كل الشكر والتقدير على هذا الإطراء

لحظة أستجمع فيها شتات أفكاري وأحرفي وكلماتي لأختار حرف من حروف تلك الظلال وأتركه يمتطي صهوة شعاع الدفء المسافر إلى حيث شخصكم الكريم عله يجدكم سابحين في بحور السعادة والهناء ... أو لعله يترك خيال شخصي بينكم ليشاطركم لحظات الأنس أو لعله ينهل من معين حديثكم العذب الشجي الذي يشرح الفؤاد ويسر الخاطر ويبعث في النفس راحة البال وهجعة زول بعد ترحال ... بل لأن هذا الإطراء لا يموت بل يترعرع وينمو كما تنمو الذكريات ...
أمسكت بالقلم الذي
يبكي أمامي في جنون
هيا إليّ ... فربما نجد الطريق . (( للتعبير عن شكري وتقديري لشخصكم ))
هيـا إليّ ... فربما نجد الرفــيق (( بل أنتــم الرفــاق ) كل المنتدى ))
مــاذا أقــول ؟
تــاهت خطاي عن الطريق (( لا بل وجد ضالتي في هذا المنتدى ))


وربنا ما يحرمنا منكم وأن يجعلني عند حسن ظنكم بي وأن لا أخيب أملكم فيّ

طه

[114]

على فكرة ، حدباي زميل دراسة في الماجستير (جامعة الجزيرة بجدة) وهو معانا هنا في جدة
وكم اتحفنا بانتاجه الجميل في أيام الدراسة ، وفي جلسات خاصة في منازلنا

التحية له من هنا , ولكم جميعا

[tahaa]

عبلة


لها سفة لو انها دخلت
بها يوما على واحد عاش فى
السجن وانقفل

لاصبح مهووسا بها ولهاج
واغتاظ وانفعل

منشية الكرعين
و الحشا
تكاسية الالفاظ
من شافها جفل

ام بدية الكعال
وسطية الضفر
كمسارية الحوار مقطوعة الاهل

محدبة الفكين
ريحتها بصل

لاعبتها السيجة حجارى ترادفت
ودكتها لاننى البطل

فلبعتها تسع وتسعون لبعة
وبلنجة اخرى وكنت على عجل

ثم انى حرستها على بابها
اربع وعشرون ساعة
لم يهمنى الحر ولا السقط
ولا اولاد حيها اذاما الليل
جن او دخل

عصاتى مدببة مضببة
ودراعى بها سكينة تجقد من تطاول
او سأل

ولم تعر الباب مرة لتعرف ما بى
لا انا اكل ولا هدمى ينغسل

واباك اذا ما مر بى ادسس وجهى
او ادنقر راسى او اكب الفلل

ومرة اباك لقانى فى الشارع
فحيانى وظننته فصل

وكم من مرة تمنيت لو اننى
دخلت توشا
لكننى اتردد حين يتملكنى الخجل

الدنيا قست معاى حين نشأتى
وحالتى شلش ووالدى يبيع القلل

ولانه حين ولدونى وسمونى
كانت سمايتى على سخل

وانت رغم صدقى وصبرى
يستهويك من له كريسيدا او كرونة
او حتى من يمشى على عجل

انا من له الجسم غريب الى الان
لم ازل اصفر اللون باسم
وانا فى الكتشينة اول من
نزل

[tahaa]

خليناك وما خليتنا
--------

خليناك وما خليتنا
يا القصيت دربنا وجيتنا
من بين الشباب ناديتنا
قلت كتير خلاص حبيتنا
لما شبكنا فيك ابيتنا
يظهر ناوي تخرب بيتنا
قول باالله كيف باريتنا
بي مات العيون جريتنا
في حبل الغرام شريتنا
مااا تنزلنا ياااا الماطريتنا
ورانا كتير جريت سكيتنا
لي قاضي المحنه شكيتنا
لما شبكنا فيك فكيتنا
بدمع العيون بكيتنا
جيتنا وبالعيون باكيتنا
لمّن غلبك سكيتنا
زي لعب الورق شكيتنا
جيت حمبكته ليه دكيتنا
تاني بريس بريس لاقيتنا
لما رضينا بيك صافيتنا
وتاني بدون سبب جافيتنا
ليه يا جكسه يعني طفيتنا
وقمت وبالحنان وصيتنا
لمن للاهل عصيتنا
ولمن في الدرج رصيتنا
في الاوت بعيد باصيتنا
زي لعب العيال سويتنا
واتفششته زيييييين كاويتنا
ه ياالغسلتنا ولاويتنا
ما اتكرمشنه ليه ما كويتنا
اتشتت ما لميتنا
في قفه هواك خميتنا
في كانون هواك حميتنا
لمن زيتنا فاح شميتنا
لمن زيتنا فاح شميتنا

[tahaa]

يوم داك

كشكة

مشكلتى انى جكستك
وشلتك شمعة فى جواى وقدستك
وبعد الكلام القلتيه صدقتك
نسيت انى تربيت فى راكوبة
وكنت بدردق اللستك
مشيت حفيان وبت جيعان
وما صدقت شاكلتك

وونستك بقصة ابوى لمن هاج
وضرب العرقى وفرتق الجرتق
وألمتك بقصة ديكنا لمن مات
واحزنتك
وجيتك يوم داك بدرى
شاكى ومضيقة ولابس جزمتى السوداء
عفصتك بيها عوكتك
وضحكتك وكلكلتك وونستك
انا بريدك حتى ذراتك
وتصدقى انى قبالك بيدفرونى للحمام
واخش حمامى بالدفرة
ما اتسوكتا ما اتشطفتا ما اتمخطا
قبالك
وبعد ما جيتى لاقيتك
كان عيدى وميلادى تشرينى ؟
ان شا الله تموتى

يا كلبة

[مصباحيه]

سمعتوا دى
ريدى ليك يا ام شداق
يقلب اللورى فى الدقداق
وكت اغلط واقول مشتاق
عيونك جك تكركب جوه فى عيونى
تبهدلنى وتبشتنى
وتجعوص فوق مصارحنى
واتوكل والقول ليك بريدك ياسجم خشمى
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،،،،،
بريدك ساهى زنديه وبريدك يا القرنتيه
يام ايدا قدر جسمى ويام ريدا بعج بطنى ويم وشاً هرانى هراى
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،
اريدك كيف اوديك وين اطير بيك وين
ياكتلة لحم منشوره فى رجلين
ثلاثه شهور ابحلق فيك افتش لرقبتك وين
وحاتك ما بشوف غير هامة سواد الراس هناك منقزه بين كتفين
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،
تبلعوا ساكت تسفسفوا ساى
وعاملين فيها حبيبين ده حب دار وين
جبر ساكت تجبرونا على الريده
هيا ناس الله يا خلق الله ما تورونا كيف الزول يريد ليه حيطه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،
اريدك كيف براطيشك وكت تنخمى زى كتاحة ام درمان فى عز الصيف
شلاضيمك قرب تنخج
جوز اضنيك طرق عشراً ضربلوا خريف
شقوق كرعيك تدخل ضب تدخل فار دى قول سحليه راسها عديل
جفون عنيك مطاميراً تفك كتاحه نصف الليل
اريدك كيف وكيف ياناس اريد ليه فيل يحلنى الله يا البرميل

[ابراهيم]

(الوداعية) على وزن (قارئة الفنجان)

جلست في ظل النيمة
تتأمل في الودع المرصوص

قالت يا ولدي شيل شيلتك

وتسلح فالحرب ضروس

امامك مشوار طويل

الا ان تركب مخصوص

الموقف مكتظ مليان

ستدافر يا ولدي كثيرا

وستركب وسط النسوان

وستنشل كل نقودك

وستصبح دوما حزنان

الناس يا ولدي جيوش

مندفعة مثل الطوفان

فنصيحتي أن تذهب كداري

ولا تركب بص ام درمان

زواجك يا ولدي محال

أصبر يا ود الصًرة

حالياً وضعط بطال

وحتبقى حياتك مرة

فالمهر في كل الحلال

قد اصبح بالعملات الحرة

احببت فتاة مغرورة

لعبت بي قلبك كورة

أنساها وأبحث عن غيرها

ويا ريت لو شرطت الصورة

أنسى وتبسم

فالزوجة قسمة وتوتوكورة

[tahaa]

الأعزاء

الأخت / نهلــه حيــدر
والأخ / إبراهيم

حقيقة مشاركاتكم رائعة كروعتكم .
أشكركم على مشاركتكم الفعالة في هذه الإطلالة التي تسمى الشعر الحلمنتيشي
وعليكم الله ما تحرمونا من إبداعاتكم سمح ...


في رعاية الله وحفظة

[tahaa]

(( بعاين عكس وكِت أمشي
أشـوف السّمحة أتبكم .. وما أقول شي
وَسِط بلاعـة بنزل جــوّه زي محشــي ))


:o :D

القصيده دي بتاعت المتجكم العلفي

لهلوبه
----
يا ام ريداً شعل في جسمي لهلوبه

انا المعيوس دوام كسره وفارد ضلعي راكوبه

انا المفروم اكيد كفته وجنبك قالب الهوبه

اشيل احزاني واتوجع واعاين ليك بعينين دوام تدمع

اجيب الفانته

ما تنفع

اقدم كولا

ما تنفع

اعزمك سينما

ما تنفع

الف في القهوه واتمرصع وارقص جيركي واتوقع

والبس ليكي شارلستون وقمصان قوس قزح مليون

انا المخروط انا المغبون

انوم فالق اقوم مفلوق

انوم منفوخ اقوم مطفوق

انا المتروك بدون احباب وانا المشنوق في حلق الباب

وانا المارق من المولد بدون حمص

وانا الامسخ من الترمس

وانا الرامني في الكوشه وانا العفصتني نعنوشه

وانا الضاربني نوك اوت وكل اسناني مدشوشه

وحي لو حي تفيد ملكوم لو بترجع اللكوم ولو بتروح الدوشه

كنت اقوم واقول ا حي

هه كنت احوم واصول ا حي

كنت انوم واقول ا حي

كنت اعوم واقول ا حي

هه كنت اصوم واقول ا حي

كتلت الجضوم وآآآآآآآآآه ا حي

وحي وا حي وحي واحي

انا اللاعب وفاقد اتوه ودايماً وارمي في البوشه

انا الكاتلاني حنتوشه

وانا الشارني في الكوشه

انا الشارني في الكوشه

[tahaa]

الاستيكة
واحد قاعد في كفتتريا الجامعة جات واحدة قيافة استلفت منه اسيتيكة،، شوية لفتها ودخلتها في الشنطة
قال ليها

تسمح؟؟
وكيف يا السمحة ما بسمح
اصابعي العشرة يكتبوا ليك وقلبي استكية للغلط يمسح
يدوب بين اصبعين حلوين ويتوه وسط السطور ويسرح
ولما تنتهي الكلمات،، نخش في شنطة في منديل ونمشي القهوة نتفسح
وهناك عاشق يطيع سحرك
يجيب الفانتا شان امرك
وتتحكر الشنطة في حجرك
أعاين ليك تغمضي انت
تعاينيلي اغمض انا
ونعيد الكرة من اول
اعاين ليك ،، تغمضي انتي
تعاينيلي اغمض انا
أعاين ليك تفري البسمة لي اضنيك
احك راسي
وابلع ريقي
واقول السمحة لو تسمح
احسن نمشي في زاوية وركن ضلمة
تقول بسمح
وتتلملم وتتخمخم
وانا اتكركب واخم نفسي
واقع في الكرسي،، أوووب سوري
اخبط الجنبي ،، اوووب سوري
هناك في زاوية نتقعد
واقول ليك
والحاصل
وفي الواقع
وحقو الزول
تقول لي
هي ياده
ما تخجل وتتعقد
كون واضح
اخم نفسي
واقول ليك
بي صوتا ندي ورويان
يفيض رقة ومزيكة
لوتسمحي
يا السمحة
ترجعي لي الاستيكة

[tahaa]

بص البنات
-------

الليله شوف باص البنات
عجلاته كيف متحننات
الكي قبل والكيس حرن
يمشن تقول متوحلات
لمباته خلقه مكحلات
من غير دلال كنباته من داخل عدااال
شايلات بلومات الكلالي الحبهم في عروقنا سال
بنزينو من ازكي العطور
عادمه الكبير يطلق بخور
سواقو ديمه صباحو نور و مساهو نور
ورفاه من قدام خفاف
مضروبه بأحمر شفاه
وانا بس بخاف
وخوفي شديد لايدك شداد
دايرين وصولك بالسلامه
وتجينا يا برج الحمام
نتلمه في الكافتيريا كوووم
ويتلاقو احباباً قداام
نعمل تمام الكل حضور مافيش غياب
وكل التياب اتجمعو تسمع ضحكك
تسمع سلام
وتحت التحت تسمع كلام
اه يا حريم نوعكم عجيب
مرات كلامكم لينا طيب
لي روحنا انتو بترفعو
مرات علينا بتتزرو وتتأندلو وتتدلعو
ولآمن تحين ساعه الدفع نحلف يمين ما تتدفعو
ونفضل نجيب الشاي باللبن الحليب
وكمان نجيب وكمان نجيب
ليمون ملخبط في القريت وتبلعو
وتقدو جيبنا ونرقعو
ولم ينتهي الليل سارمشن
وتقولو دايرين ترجعو
من نوعنا خالص تقنعو
تاخدونا طرحه بدون ايجار
تاخدونا ويتفك الحصار
وتروحو غير ما تودعو
راكبين علي باص البنات
خطراته باقه حلا وحمار
يا ناس خلاص انا قلبي فار
نطرح بلاش من دون ايجار
وجوفنا من باص البنات
جوه الخشم فتحت غبار
نطرح بلاش لستكنا طار
نتعب نلقطهااا في الظلام
تلقوها ميتات بالنهار يا ناس نزار
تلقوها ميتات بالنهار يااا ناس نزار

[tahaa]

السمبوسة

السمحة قالت فى حديثة
لا لا ما باكل سمبوسة
ولا ايدى بتعرف تدوسة
بس جيب لى حبة جكناية جوسة
احى.... يالوسة
نحن هنا زى الكديسة
اى حاجة قادين ندوسة
مرة كسره ومرة ويكة
ومرة سمبر ومرة دوسة
بنركب مواتر روسينا كاشفة
والناس فى دلهى عاملة خوذة
كل وقتنا سنمات فى قهاوى
والناس قاعدة تذاكر فى دروسه
دى ما اكلة ظريفة ياحليوه
انحنا ما قاعدين نكوسة
نحن لو لها ما بنعيش
ونحن بنموت فى السمبوسة
انت ما اكلتيها بالدهى- زبادى-
وانت ما ذقتها ياكنجوسة-بخيلة-
الزمن مشى والشيكات انقطعت
من ناس ابوها واخوها موسى
السمحة مرة لقيتها قاعدة
فى المكتبة عاملة هيصة
قالت لى انا من زمان راجياك
جبت ليك هدية جابتها لى معاها نوسة
تلقاها فى سودانا الحبيب
فى الابيض ..وبابنوسة
انا اتخيلت فولنا داك
او تسالى خالى سوسه
فتحت شنطتها الظريفة
العاملة زى شنطة رئيسة
وطلعت لى من بين الكتب
قطعة سمبوسة

[بابكر]

هجاء


رقبتك مارقه منسله ورأسك ذى غطا الحله

[tahaa]

كومبيوتر

اى حاجة كومبيوتر

الساعة كومبيوتر

والنضارة كومبيوتر

والجزمة كومبيوتر

ياحليل زمن النقر

كانت الدنيا طايرة راكة

مرة كفر ومرة وتر

بس الليلة كلامن كل بقى

كومبيوتر

الزواج بالكومبيوتر

والطلاق بالكومبيوتر

والحب بالكومبيوتر

والموت بالكومبيوتر

انا مالى والكوبيوتر

انا مالى وعيشة الضر

كنت عايش مرتاح وفى السوق

عامل سيوبر

ديك بضاعة رابحة

وديك خاسرة

مرة تركيا ومرة مصر

بس ابوى اصر وقال لازم

ادرس كومبيوتر

عشان بيتنا فيه كومبيوتر

وامى صاجة بكومبيوتر

وعندها حلة perjure

حتى حواشتنا فيها كومبيوتر

الزراعة بكومبيوتر

والسقاية بكومبيوتر

والحصاد بالكومبيوتر

عشان مافى حاجة فى بيتنا تخسر

انا لازم ادرس كومبيوتر

جيت لقيت (ناغبيور) ظريفة

ما فيها عيون حاملة شر

لكن القلوب عليمها الله

هى تراها دافنة سر

بس لما جيت اتصعد

العواجيز صارت تنظر

مرة قالو عنى كوز

ومرة قالو شيوعى حر

ومرة قالو وقالو قالو

انى بسكر

ودا كله عشان انى قاعد بدرس

كومبيوتر

مافى ناس عاملين فيه ادميشن

من سنة حفرو البحر

لا دايرين امشو ابوظبى

ولا دايرين يسافرو قطر

بس قاعدين لشغل التنظر

انا ذاتى حاقعد انظر

النشوف مين الفينا يخسر

ما اى حاجة كرهت احمد

حتى حركات الprinter

ولما اكتب برامج

The output equal error

حتى اللونا منى زهجت

وفى النهاية عملت موتر

وعلقت ليه شعار سودانير

بس الموتر بمشى خطوة خطوة

واللستك جديد قاعد يبنشر

ولو الواحد عايز يحب

برضو هنالك من ينظر

ولو دخلت معاههم معاينة

بطلعونى واحد صَغير

بس هى قالت لى عشان

تبقى قيس وابقى ليلى

وتبقى روميو وابقى جولييت

وابقى عبلة وتبقى عنتر

انا لازم تدخل معسكر

انا مالى والمعسكر

ومال وبلدى وحكومة عسكر

عشان كلامك كومبيوتر

وانت ذاتك cpu

وانت ذاتك كومبيوتر

فى مشيك لاكى رايحة ولاكى جاية

ولاكى ماشة ولا كى راجعة

متل حركات الprinter

عشان عيونك يامزرزر

انا اتعلمت الكومبيوتر

كومبيوتر

كومبيوتر

كومبيوتر

[tahaa]

دقلش ومدقلش دة انا زاتى

يوم التخريج فى رابطتنا

جننونا جامعات ويست فرانكفورت

باريس اثينا ... جامعات زى الدلالة

انا الوحيد فى الجامعات الزى الدلالة

كنت خريج معهد الة

معهد الالة زاتو اتخرجت

منو بيلا وجلالة

دكاترتنا بتاعين قانون

ما يشوفو اسمى الكريه دة

شيل خمسة مواد شيل ستة

كرهتونا اصلو دة قانون ولا

عتالة

شغالين فى التخريج كدة

جاء دور الخريجة هالة

هالة لكن ماااا هبالة

شديدة شدة الحرامى السرق

الساون والحفلة شغالة

واحد من الحضور شاف هالة

ما استحمل المنظر

طوالى جرى عليها قام شالة

دة شنو يا راجل اهه ؟

قام قال خالة

وجينا انا وهالة للمعاينة

اول حاجة عملوها

طيروا هالة

وعينو الراجل الشالة

التقول دايرين عتالة

الباقين الشغلوهم كلهم

ناس حالتهم بطالة

راجلا رجولة تجى بالجلالة

شنب صغيرون ما متل حقى دة

قايم بالقطارة

سألوهو ما هى عاصمة فرنسا

انقروا ما قال

كمبالا

[tahaa]

متين يا الله ألم الفكه

أجيب الشيلة واسوي الشبكه

وأمي تزغرد بي طول صوتها

وأنا مبسوط وظابط الشكة

هدومي معطنة بالأرياح

ريحة الخمرة وريحة الدلكة

واطبع للعيزومة كروت

حاشاها الما زي كرت البنزين

جميله زاهية في ورق التوت

وتحت الإمضاء مشكورين

لأنها لحظة ما بتفوت

وإلا تكونوا مبسوطين

ويجوا الأولاد بوجوهاً نادية

يقشوا الفسحة الواسعة وهادية

نرًكب فيها الصيونات

ونعمل حفلة بود البادية

ولازمن حفلة تكون صباحي

أشفي غليلي وأداوي جراحي

من زمن العذابة الأغبر

السًود عيشتي وزاد لنواحي

أفك القيد من قلبي وأغني

حبيب الروح وغني يا صاحي

وفي العصرية نمرق سيرة

خلوق منتظمة ماشة مسيرة

زي صف دكانأً ناصية

فيه سجاير بالتسعيرة

بناتنا يغنن مبسوطات

دور بينا البلد ده

يلفن يدورن العربات

ولمن أصل بالسيف اتقدم

زي الفارس ماشي ملجم

وشي بينضح لمعه ونضرة

قميصي نضيف وماه مجلبط

بملاح خدره

أهز في البنوت بي سيفي

وابخبخ فيهن لبن البدرة

وفجأة يدق صوت الدلوكة

وتبقى الناس بالجد مربوكة

واحدة تصفق واحدة تزغرد

وواحدةتلوك في لبان بازوكة

جابوا عروسي وبدت الوقفة

سرحت بعيد في حق القفة

جابت قون بي رقة وخفة

ما اتجرست كلا وحاشا

الا هناك واقفين شماشة

قالوا اكيد شارب حرباشة

زعلت شديد وغلبني اللعب

لانو كلامن كلو كضب

قاموا اصحابي بصوت عالي

يا عبد الله اطلع بره إشاعة إشاعة

وحتماً يوم لي أمك عايد

قونها حقيقي ما اوف صايد

صوت أصحابي أثر فوقي

بحركة ذكية جبت القون

وانا والحلوة بقينا درون

وفجأة أضفت الهدف الثاني

وغمر الساحة فرح رباني

مرقوا اصحابي يكوركوا ويهتفوا

فاتوا الفسحة وسدوا الشارع

صوتهم طاغي ظاهر وطالع

يا عبد الله هايل ورايع

جبت القون في الزمن الضايع

[waheeb]

الاخ العزيز طه..

والله ابداع عدييييييييل, نشكرك علي الفكره الرائعه وعلي هذا الكم الهائل من الشعر الحلمنتيشي

الجميل..

[tahaa]

الأخ العزيز وهيب لك ألف شكر على مرورك على هذه القصائد الحلمنتيشية التي تعبر عن الكثير الكثير لك شكري وتقديري

[tahaa]

إنتي برية :

أنا كان جنّيت .. إنتي بريه
وكــان طشيت عليك ما شـــويه
وكان زازيت ضربت خلا
جدعت هدومي في السهله
ومتبروكِ في ضل شدره
إنتي بريه
وكان صنقرت في البلدية
عليك ما شويه
وكان سكيت قطر كسلا
وكان سردبت للمطره
وكان تلبت من نخله
إنتي بريه
وكان قبضوني في الزبطيه
عليك ما شويه
وكان هضربت نص الليل
وكان ركلست في برميل
وكان شالني بكره السيل
إنتي بريه
وكان عتّرت للعربيه
عليك ما شويه
وكان في الشوك مشيت حفيان
وكان بلشت لحم الضان
وكان عضيت كلب سعران
إنتي بريه
وكان نشلوني في الماهية
عليك ما شويه
وكان لابعت ناس السوق
وكان قالولي زول صعلوق
وكان قفلوني في صندوق .. إنتي بريه
وكان دروشت في الحوليه .. عليك ما شويه
وكان شربكت في خازوق
وكان بايعت في الطايوق
وكان جريت حبال واسوق
إنتي بريه
وكان لزوني في الناريه
عليك ما شويه
وكان جدعوني فوق الكوشه
وكان جاتني طمه ودوشه
وكان كرتي دايما بوشه
إنتي بريه
وكان خبتوني بي طوريه
عليك ما شويه
وكان ربطوني بي حبال تيل
وكان ضربوني بي إزميل
وكان عفصوني بي كراع فيل
إنتي بريه
وكان طقشوني بي روسيه
عليك ما شويه
وكان لفوني في الفروه
وكان زقلوني في الخلوه
وكان ناس قالوا لا حوله
إنتي بريه
وكان شرطت جلابيه
عليك ما شويه
وكان داسوني بي كراكه
وكان عركوني بي معراكه
وكان جلدوني بي مفراكه
إنتي بريه
وكان قرصوني بي زرديه
عليك ما شويه
وكان فرملت ي الكبري
وكان جاتني الخلوق تجري
وكان قالولي زول فقري
إنتي بريه
وكان رصعوني رصعه قويه
عليك ما شويه
وكان بالليل مشيت أهمى
وكان تاوقت في السنما
وكان نهروني زي بهمه
إنتي بريه
وكان ساقوني في الدوريه
عليك ماشويه

[tahaa]

mohammed abdelh



هي زي هبهانه
وماهبهانه
وزي بنانة
ومابنانة
غايتو نحن مجننانا
حتة حتة مكسرانا
لسة ماعرفتوها برضو؟
دي ماااااااااااااااااااااااااااا ألاااانة........
ألااااااااااانة....... خلتنا عاد ننضم برانا
غايتو لو سكنت حدانا
نحن ماااااااااااا الله معانا
ألانة مابتاكل فتة أصلو
ومابتمشي الإجزخانة
فيها حاجة مغلغلانا
تلاته شامات فوق خدودها وجممممممممممممممممممب أضانا
أضانا: أضانا زاااااااااااااااااااتا مطنشانا
تلاته شامات لاهي واحده ولا too eyes
وفيها eyes أي واحد شافا مرة الجماعة رقدو خردة
all the peaple راقدين جنايز
if أنا مرة إغتربت
ولي أموري أورقنايز
لي أبوها جوه هاوسو بمشي ليهو ومابلاوز
أصلي حربي وفقري ييشن
أقولو إن ماي إستنيشن
إنو يووووووور دوته رهيبة وليها عاوز أعرسيشن
if هو قال لي رافضيشن. أقولو ليشن وبالحجارة أجدعيشن
ألانة جاتنا في النيلين هنا
الزمان كانت فرع
الجماعة جنس دفر...وجنس عفص ...وجنس كبع. وحريمنا عاد فتحولو تب من الزعل داير إنفقع
ألانة جاية من أستراليا
جكسينا عاد أمبده والديم والربع
وألانة جاية من أستراليا
لابسة جينز بلوزه غالية
جكسينا عاد جكس العباية وفي العباية قماااش ملاية
ألانة جاتنا في الفرع بقوها زي ست الودع
جاها واحد قال ليها جري كبسولة الزمن دي باللهِ شوفيني بعد الإمتحتنات بباصي ولا بتشلع
جاتها واحدة قالت ليها الرسول ياألانة تجري كبسولة الزمن دي عشرين سنة شوفيني بتزوج ولا شاكوش بتلبع
بعدين ألانة لا بتقتنع ولا بتنخلط.......
إلا لي أنا دا
فقري جدا متطلع
أنا عاد بخاف؟
قلت ليها أرح نمشي نقعد في سنة تلات آلاف
أفووووووووووووو مشينا سنة 3 آلاف
قلت ليها تعرفي؟ ناس القرن العشرين مازي ناس سنة 3 آلاف
ديل ناس متخلفين
سفر بالطيارة وكومبيوترات وجنس عوااااااااااره......
أها قمنا راجعين
كبسولة الزمن ضهبت بينا
وقعت بينا في أمبده بي جمممممممممممب المزارع
نزلت منا ألانة
شافت الناس بتاكل في الكوارع
جرت للكومبيوتر قالت ليهة ياي نحن في ياتو زمن؟
قال ليها نحن في الزمن الضايع............
ألانة: معاها وحده قالو إسمها جانا
يعني بس بالشايقي جينئ
جينئ يالحلو وظريفئ مابتاكل تب رغيفئ
الكريشة ماها ظاهرئ
والرويس تب ماهو جيفئ
جينئ قمة
وكونو زاتو نشوفا نحن؟
دي زااااااااتا نعمة
والشايقي فيها إندهش وداير إقول دا الشغل قام قال: دى الخدمئ.
ياوجع ساكن كلانا
إلا جا الجد وبي أمانة:
في بلدنا بنلقي مليون زي ألانة
لسة ما ها عسل بنقط
ومسخن سكر كنانة
وفي العلم أفكار دؤوبة
عشان إطورو مستوانا
إلا جا الجد وبي أمان:
فوق بناتنا بنلقي حاجة.... مابنلقاها في ألانة
فيهن العفة الرزانة
فيهن الأمل البضوي في مدنا وفي قرانا



--------------------------------------------
محمد مبارك عبد الحافظ

[tahaa]

عن الحب وفنونه وشواكيشه ومشاكله

اتلموا ناس طه ونضال
ونسات دقاقه ونقنقه
نظرات وداعة موثقه
والجو عجيييييب .. تنظير شديد
باب النقاش اختلفوا كونو الحب حلال

أحمد بقول الحب حلال
والريده مفتاح القلوب
والحب عشان يثمر يدوب
لازم تكون قعدات هنا
مرقات هناك
ونسات حنينه ودندنه .. وحاجات كده
رايكم شنو يا ناس ندى ؟
واحد بقول الحب حرام
وبدايتو أقرب للوهم
وفي نصو يبنقطع الطريق
ونهايتو شاكوش محترم
********
ما بين تطرف وإنحلال
بنوته أقرب للملاك
وشيشه زي بدر التمام
قدلاته دايما بإنتظام
والصوت أحن من الحنان
اتنحنحت ...
اتململت ...
واتقندفت ...
واتصلحت ... يا أخوانا لا !!!
يا أخوانا عيب !!!
أدوني فصه
أنا زي بفكر أنو .. لا
زي عايز أقوليا أخوانا .. ده
لا .. ما كده
فاهمني يا روحي الجميل
فاهمني يا حمزه النبيل
يا سيد حياتي ومالكه
**********
واحد رصين حسه بخطر
حاول يلملم القوب
يا حمزه اتحلت خلاص
أنا عندي ليك وجهة نظر
رايكم شنو في شيخ وليد ؟؟؟
مولانا مولانا البطل
************
يا شيخنا عندنا كلمتين
ما تنبهر يمكن نزوده حبتين
رايك شنو ؟؟؟
في عبدو صاحب الدمعتين
لو مره قدم وردتين
لي بت بتقدل قدلتين
مولانا .. يا باختصار
رايك شنو ... الحب حلال ؟؟؟
مولانا شاب
شاب في نهاية الأربعين
يوم عرسو داك
شالوهو شيييييل ... ختوهو خت
راجل بدين
من وشو ظاهر زول وسيم
في الحلة قالو عليهو كعب
مولانا أصعب من صعب
وتحت تحت حيب قديييييييييييم
***************
مولانا تمتم مرتين
من سبحتو
مولانا بجدع جدعتين
مولانا دنقر في الأرض
مولانا صنقع في السما
شاف لي منى
وركز كتيييييرفي وش مها
همهم كتير بي تمتمه
من بعد ما حن و دنا
قال ليهم الحب يا شباب
مفتاح قلوبنا وشاهدا
والحب كلم ناعم جميل
بشبه كلام مروه وشذى
والله والله العظيم
لو ما العمر سافر خلاااااااص
أنا زاااااااتي كان حبيت ندى
وبعد كده
مولانا اتنحنح رجع
قال بي وقار بي صوت رصين
الحب حلااااااااااال
بالله شوفوا الفتوه دي
مولانا ال الحب حلال
مبروك كتير حمزه وندى
بيت مال وفرحه وزغرده
لي عبدو ود المورده
وأبشر عديله وجردقه
لي وجدي مرضان البنات
أصلو المجكس خت شذى

[tahaa]

مـــولانــــا .. !

مولانا قال أسد الخلا الجرجر
وفار شنباتو زي عنتر
مطرقس وشه ما بنفر
ولاصق لصقه في مصلايتو بي كراكه ما بنجر
وكت شروه قال والله ما منشر
وواقف ساكت أتمنظر
حريف مولانا .. ألعب غيرها
واقف ساعة ياهو الشر
أكان هامان أكان عرمان .. أكان عنتر
تضوق الشر
أكنت زمان وكت بتشوفها ماشه تعوم
تمش بالبر
وكان قعدت حِداك تنتر
وكان حدرت بعد طولك تمش منصر
تمرق السبحه لي مولاك تستغفر
وتتحصن من الجن المغطي التوب
وما فاضل غير تقول حي ووب
ويوم تنزر .. وفي اللكشر
تقول أحيّ كفاي يا ناس .. أمرقوني
فســخني الحر
وما بقدر
أكنت زمان بتدسدس
وجيت الليلة تتهندس
وتتلبس .. وتتملس
وتقعد في النشاط تركين
وتشرب شاهي للتسخين
تشوف السمحة بي فد عين
تغض الطرف بي التانية وتتمتم زين
تقول والله أصلو زمان
دروايش ساي وما عارفين
وفي خلط النشاط زاهدين
ولو بالغلط قالت
لا يا مولانا بالغت
بيتنحنح
يبرِّم شنبو في قعداتو يتصلح
يروح خالف كراع في كراع
يخلي التانية تتمرجح
وفي سرو
يقول توفيق من المولى وعلينا يدوم
ومما جينا في الخرطوم
جنيهات كوم
شربنا المنقة خليناه كد الدوم
وشاهي الحلبة والكمون
وقرش البصلة بالليمون
ويوماً شوم على السمحة الكساها الهم
وكيف تنجم
ويا مولانا حِن وأرحم
وأمضي الشيك
وأصرف للبنية بريك
ولو رمشه
بقيت تخلط بعد فرادي بالكمشه
وتتفنجر
أكنت زمان أكان شافنك السمحات .. يقولن جر
وكان شافنك الشينات .. يقولن كر
أريت يا يابه تتدغور
أكنت زمان بتتعجن
من السايقين بنات آوى .. وواقعين صب
أكنت تزوغ وتتهرب
وجيت الليلة تتكبكب
وعايز خلطه تتدرب
عشان تبدا الطرح بالتكس
تجقلب في محاور صاح
وتلعب في محاور عكس
وما بهمك حرارة الطقس
وما مِرتاح .. وعرقك يصب
تشوتك واحدة ضفاري وتقع أرروب
تقول زاحمنا يا مولانا
والمولانا .....
طرشق كيسو .. فضى الخانة ...



مــولانــــا ..

[tahaa]

الكاتب / محمد المبارك عبدالحافظ


أفتونا ياأهل العقول
شوفولنا حل للمشكلة
العيشة جد صعبة علي
وأنا حالتي صبحت مخجلة
ياما إنقشطت في صف رغيف
دافرت ضقت البهدلة
ورجعت بي فردة نعال
من بنية عيني متنبلة
مفتول حنك مشروط قميص
كرعيني زاتا مكلوجة
العيش دا مامجهجهنا جد
دخلنا نحن في غلغلة
كل ماإزيد العيش ضمور
أسعارو تقفز في العلا
الخمسه عيشات للصغير
تصبيرة ساي مابقبلا
عيشتين تروح بين السنون وكريشتو تب مابتوصلا
واللحمة بس كيتا عليك جزارا عنية مدلدلة
جنبك قريب وأسعارو فوق لو إنت شاطر حصلا
صبح البصل تفاح عديل
والكسرة زي باسطة سلا
والسكر العامل تقيل نضف جوبنا وغسلها
ياحليلا ماهية السرور الفول براهو مكملا
نعمل شنو؟
ونشكي لمنو؟
ننسي المعيشة ..نبطلة؟

[tahaa]

منقـــــــــــــــــــــــــــــــــــول

أفتونا ياأهل العقول
شوفولنا حل للمشكلة
العيشة جد صعبة علي
وأنا حالتي صبحت مخجلة
ياما إنقشطت في صف رغيف
دافرت ضقت البهدلة
ورجعت بي فردة نعال
من بنية عيني متنبلة
مفتول حنك مشروط قميص
كرعيني زاتا مكلوجة
العيش دا مامجهجهنا جد
دخلنا نحن في غلغلة
كل ماإزيد العيش ضمور
أسعارو تقفز في العلا
الخمسه عيشات للصغير
تصبيرة ساي مابقبلا
عيشتين تروح بين السنون وكريشتو تب مابتوصلا
واللحمة بس كيتا عليك جزارا عنية مدلدلة
جنبك قريب وأسعارو فوق لو إنت شاطر حصلا
صبح البصل تفاح عديل
والكسرة زي باسطة سلا
والسكر العامل تقيل نضف جوبنا وغسلها
ياحليلا ماهية السرور الفول براهو مكملا
نعمل شنو؟
ونشكي لمنو؟
ننسي المعيشة ..نبطلة؟

[القناص فوزي]

في رحلة من الرحلات وأنا مار ببلاد القاش تعرفت على أحد الهدندوة وقام بتحفظي هذه الأبيات أرجو قبولها من أخوكم المشتاق للعودة لمدني وأنا سعودي عشقتها :
شيشك ياجمل ماتكسر الدراب *** صاحبك مابيخاف ويحب مشي التاتاب
صاحبك مابيخاف وإن كشكلو حراب *** صاحبك مابيخاف من موت ووراه تراب
رد عليه صاحبه وقال :
شيشك ياجمل ماتكسر الدانقيل *** صاحبك مابيخاف ويحب مشي الليل
صاحبك مابيخاف وإن كشكشلو الخيل *** صاحبك مابيخاف من موت وراه شيل
أظن أنها هكذا وأرجو المعذرة إذا لم أجيد حفظها ,,,

[أبوبكرحامد]

ألف أهلاً وسهلاً بالقناص فوزى بين أهلك وأحبابك ، أنت قناص بارع والدليل حفظك لهذه الأبيات التى لانعلمها نحن بنو السودان وفى انتظار عودتك مجدداً بالغنائم والصيد الوفير ، تقبل محبتى.

[tahaa]

حمـار الشيخ
رقيص تُم ثُم
ضرب دلوكه تاخ خ بُم بُم
وناس بتجوط وناس تنضم
وناس تتجارى زي فانتوم
عجيبة الناس دي ما بتصدم
وحس اللوري ماشي كتم
وبطن التنكِ فيهو خرم
يدفق جاز ويشتت عيش
يقوم العيش يتور عيش
تودر شربته الكرميش
وريحة الجاز معاهو العيش
وكت بتفوح تشق الراس
تكتل جيش
وشيخنا عُليش يسبح ساي يعد طق طق
حمارو رمى السِّريج ومرق
وقف تسبيحو .. خت السبحة قام نقــنق
وعار فنجط سرح بره الحمار هنق
يقولوا شنو ؟ .. حمار الشيخ دا قصدو شنو
وكت ربطوه ووكت لموه .. شرد ما داير يتلم
اريت كان جا القطر خماه
ودعوة غليده مقبولة .. أريت عينيهو تعمى عمى
وشيخنا زعل .. نعل يوم الحمار ولدوه .. ويوم فطموه
أبوه الوالدو والربوهو والسمو
ركب راسه وحفيان ساي .. وحت مركوبه ما كاسه
عصايته نساها جم برشو .. جدع طاقيته من راسه
ملص توبه النضيف ورماه .. وسك حمارو زازى وراه
يقلوا شنو ؟ بعد دقنو وبعد تسبيحو
والراجيهو والسواه
بعد مو شيخ عِلِم مطره
كلامه رزين ويمشي تقيل وبي مهله
يبرطع زي حماره وجري
يقولا شنو ؟ منو الساكي الحمار دا منو ؟
وأيه بس أصله حاصل لي دا شيخ بلداً تغني علي
مِطعّنه شوك ومتبهدل توج كُرعى
ويلف لامن يلف راسو
يطشش يدوش .. وحالا شين
حمارو الكان حمار واحد .. بقى حمارين
درب عربات أكان واحد .. بقن دربين
سماهو الكان نضيف صافي .. صبح ملخوخ
وشيخنا يدوخ
وقبل يقع .. يجيهو اللوري زي صاروخ
يطق لحمارو في النافوخ
يقع نشافان تفارقو الروح
وذاته الشيخ تصيبه جروح
نزل سواقه ريحته تفوح .. ويتترتح
كِلاب الحلة جات تنبح
وناس إتلمو زي الطير .. تكورك عييــــك
تخم وتشتِّت الحصحاص
أبونا الشيخ كتل يا ناس
وليد حمور جا شايل فاس
وود أبو ختف مجداع
وود شاشينا بالعكاز
وما أظن زول يقيف حجاز
وناس بكدنكه ناس طوريه ناس كوريق
قصاد اللوري جاري فريق
وبت يعقوب تضرب الروري ساعة الضيق
قدر يا يمه .. جاب اللمة ولع فيقلوبنا حريق
سجم حلتنا .. شيخها الهادي حد البَرَكه ما لي طبيق
بحر مــدّادي حــدّه غريق
حِجا الملهوف شفا المرضان .. يداوي اريق
ووين بنقبل الليلة .. منو الفي السكه لينا رفيق
أريت الضربو بي القدر اليدردقو في الجمر درديق
تقول غير الطريق الماشي بي حلتنا مافي طريق
غبار تحته ناس يسن تضيق وتفيق
ووصلوا كبر .. ولحقوا صغار
ولما العين تمام شافت وعدّا غُبار
بصيح جبريل .. أمسكوا الزول أمانه الول دا ما حقار
وشيف ككيف عيونو حمر وطايره شرار
وسايق ساي تقول درويش
أتفه أخى .. وبتاً كان يجى الشاويش
تقول عميانلمن كتفوه وشديد حزموه
فتح خشمه .. ولغلغ زولنا قال ختيان
وسافي الرمله فكوني .. وسامحوا الزول أكان غلطان
نفكك كيف .. لمن بنشيف
أبونا الشيخ أكان حيان أكان ميتان
وليد التوم يشم الدم .. يِسِل شكينه وتحزم
ويربط تكة السِّـروال
يقول الخاتي كتلا حلال
يدافر الناس يحجزوه ويسوّي علال
به\ نجميس يهدّوهو
يقيف الشيخ على طوله ويساعدوه
يقول الفاتحة في حماري .. وسامحوا الزول وفوهو
زغاريد عاكنه ملت الجو .. ووقالت جو
سلامة شيخنا إيدو اللاحقة ما اتجوجو
وهاك يا جــو
وناس رضيانه زي ما قال أبونا الشيخ
سلامة المات حمار الشيخ وسلم الشيخ
وناس زعلانة حارقاها المديدة تسوي في التحريش
دا سايق ساي سواقة طيش
نرسل بُكس للشاويش
يقوم شيخ البلد بي شيش
يحزم الراي
يقول يا زول نمسكك حت يجي البوليس
صحا المخلوع .. عرف غلطه وبدا التحنيس
أبونا الشيخ دا ما قصدي .. ووحات ربي
وقايل الروب .. عيالي صغار
ضِحك كرار .. ها ما بتحلك الأعذار
يسامحك كيف أبونا عُليش وريحتك عيش
قليل غلا .. أخير تسكت
وشيلك وخت . وختك وشيل
لغاية ما جا ص الليل
بعد رجه وبعد تحليل
مرق جزلانه من جيبه ودفع للقيمة بالتدبيل
وبرَّز راس معـاهو الشــيخ
عصــر ليهــو القروش باكــشيش
سم شيخــنا
وقال عـذرك تمام أنا ليهو متصور
معاك سلامة قوم دور
وتاني أعشانا يا المبروك وما تطول
وأوعك كان تضوق العيش
يقوم سواقنا بي تحبيش
يسلم فوق أيادي عليش
يقول يا شيخنا بحر الخير .. وشي الليل
وفار ضُلعك على الأحوالو منكوبه
وشيل الفاتحة أشحد ربك الغفار
أكان ينعم على البشبهنا بالتوبه
وفي العافية .. يدور يفوت يِخلّيهم
عَلال اللوري غطى الناس وبى شيخهم
وفي الحلة
بيحكوا الحكوه والحاصل
وكيف الزول وكت قبضوه .. أكان جافل
وكيف الشيخ سلم من موته لمن سهى كان غافل
ومافيش زول بقول القالو ود حمراي
بقول الشيخ غِلط والله
أبونا عُليش قبض با كـشيش
حمارو الكان تقول ترتار .. يبيته نهار
عشان أدّوه القروش قنطار
أظن داير يكون قارون
وعارف الشيخ برا الباكشيش قروشو كتار
صحيح الدنيا بالدينار
وناس تنسى .. تقول حاجات
تخلي القول .. تسو حاجات
وقالوا زمان
كتير جايات أكان فاتنك الرايحات
أخير الزول يكون ساكت
وكت يسمع كلام ساكت
يسد إضنينو
عجيب يا حسين
تقول كيفن كلام ساكت .. كلام مليان
دا كل الناس أكان غِلطوا .. بريه عُليش من الغلطان
كلام دا أخير خلي .. وما تديهو زول غيري
وما تحكيه لي إنسان
علي بي جملة الإيمان
سمعت كلام تحت وسوس
أبونا الشيخ نوى يهجج وينادي الناس
وقال الحفلة لازم تبقى لازم تبقى
يجـن بنوت حلاتن منقه
صوتن يرن .. يشيلن صفقة
بترقص فيها بت مرحوم
غُنــا الطمـباري ود دلدوم
يخلي الشيخ يهوش وينط .. يتلب يلعب المردوم
يسو يا حي ويا قيوم
عبايتو تطير تسو فر فر
سبح لالوب حليل زولها .. نساها الليلة ما جرجر
نزل في الساحة بالتـّم تـُم
ضرب دلوكه تاخ خ بم بم
وناس بتجوط وناس تنضم
وناس تتجاري زي فانتوم
عجيبة الناس دي ما بتصدم
وحس اللوري ماشي كُتم
وبطن التنك فيهو خُرم
يدفق جاز ويشتت عيش
يقوم العيش يتور عيش
تودر شربتـو الكرميش
وكل الناس تعرف الجاز .. وكت ينبل فيه العيش
وريحتو تفوح تطق الراس .. بتكـــتل جيش ...


حمار الشيخ
حمـــــار الشـــــــيخ !!!

[tahaa]

كلنا شاهدنا مسلسل الانا الفتاه القادمه من المستقبل بى كبسولة الزمن
قام شاعرنا الحلمنتشيى حدباى عجبتوا القصه والانا قام كاتب القصيده دى وانا كنت بفتش ليها لحدى ما لقيتها فى احد المنتديات قلت اجيبها ليكم يارب تعجبكم اهى شى من الشعر الحلمنتيشى الجميل



هى زى هبهانة وما هبهانة
وزى بنانة وما بنانة

غايتو نحن مجننانا

حتة حتة مكسرانا

لسة ما عرفتوها برضو

دى ما ألانا

ألانا خلتنا عاد ننضم برانا

غايتو لو سكنت حدانا

نحن ما الله معانا

ألانا ما بتاكل فتة اصلو

وما بتمشى الاجزجانة

فيها حاجات مغلغلانا

تلاتة شامات جنب خدودا وجنب اضانا

اضانا زاتا مطنشانا

تلاتة حاجات لاها وحدى ولا توأيز

وفيها أيز اى واحد شافا مرة

الجماعة رقدوا خردة

أولزا بيبل راقدين جنايز

اف انا مرة اغتربت

ولى امورى اورقانايز

لى ابوها جوة هاوسو بمشى ليهو وما بلاوز

اصلى حربى وفقرى ييشن

اقولوا امايستميشن انى يور دوتا

رهيبة وليها عايز اعرسيشن

اف هو قال لى رافضيشن

ولى عيونو حمريشن

بقولو ليشن وبالحجارة بجدعيشن

وابقى بيشن


ألانا جاتنا فى الخرطوم هنا

الجماعة جنس دفر وجنس عفص

وجنس كبع وحريمنا عاد فتحولو تب

من الزعل داير ينفقع

ألانا جاية من استراليا

جكسينا عاد امبدة والديم والربع

ألانا جاية من استراليا

لابسة جنز بلوزة غالية

جكسينا ناس جكس العباية

وفى العباية قماش ملاية

ألانا جاتنا بقوها زى ست الودع

جاها واحد قال ليها يا ألانا

جرى كبسولة الزمن دى شهرين لى قدام

شوفينى بعد الامتحانات بباصى ولا بتشلع

جاتا وحدى قالت ليها الرسول يا ألانا

تجرى كبسولة الزمن دى عشرين سنة

شوفينى بتزوج ولا شاكوش بتلبع

بعدين ألانا لا بتنخلط ولا بتقتنع

الا لى انا دة فقرى جدا مطلع

انا عاد بخاف

قلت ليها ارح نقعد فى سنة تلاتة الاف

وفو مشينا سنة تلاتة الاف

قلت ليها تعرفى ناس القرن العشرين

ناس متخلفين ··· سفر بالطيارة

وكمبيوترات وجنس عوارة

اها قمنا راجعين كبسولة الزمن ضهبت

وقعت بينا فى امبدة جنب المزارع

نزلت منها ألانا شافت الناس بتاكل فى الكوارع

جرت للكمبيوتر قالت ليهو يااى

نحن فى ياتو زمن ؟

قال ليها نحن فى الزمن الضائع

ألانا معاها وحدى قالوا جانا

يعنى بس بالشايقى جينى

يالحلوى وظريفى

الكريشة ماها ظاهرى والرويس تب ماهو نيفى

جينى قمى وكونوا زاتا نشوفا نحنا

دى زاتا نعمى

والشايقى فيها اندهش داير

يقول دة الشغل قال دى الخدمى


يا وجع ساكن كلانا

الا جد جد وبامانة فى بناتنا بنلقى

مليون زى ألانا

فى السماحة عسل بدفق

ومسخن سكر كنانة

وفى العلم افكار دؤوبة

شان يطوروا مستوانا

فى بناتنا بنلقى حاجة ما بنلقاها فى ألانا

فيهن العفة الرزانة

وفيهن الامل البيضوى

فى مدنا وفى قرانا



--------------------------------------------
ليتنى طفلاً واكبر همومى لعبتى

[tahaa]

حســــنك شـــمولي


حُسنك شُمولي ... وخِلقتك صُنع الإله زادت جِنوني

ومن زمان فيك ســافرتَ تاهت عُيوني

وعمري ما فكّرت مره أكون وصولي

أبرمج الخِطّة وأحسّـب يوم وصولي

وأعمل إيه .. ما نار دِي بِتكوي فيّ

أنا كان أفيق يوم مِـن ذُهُولي

عشان أشوف إنّك في عالي

وإنِّي حًيفس ... ما قِدِرت أزيدو طولي

وما قِدِرت أقيف معاك موقِف بُطولي

وبيك أهضرب يومي كله .. أقول تمام إيّاك زولي

أقول تمام ياك الوحيد حشنك شمولي

أستميت .. كان قِسمتك مكتوبه هولي

أمشي ليك سفرا طويل .. أتعب رجولي

كايس عقود ياقوت ولولي

تزيد من الحسن الشمولي

البيهو مما دق في قليبي

دقت للحرب أصوات طبولي

وشاحد الفقراء التخان كان ينجدوني

يصبروا الزول المبهدل .. يكونوا عوني

ويِقدروا ؟ .. الله يعلم يقدروا

يسوقوا القمر لي بيت أبو الدّرداق ..

ويملوا البُرمة فيها يغَرِّقوني

أشــوف نُجــوم نُـص النهــار وأســهِّي في الحسن الشمولي

وفي رَجَاك تَحِن علىّ .. شــان ما ورَاك يِكتر فُضــولي ...

[tahaa]

دنيـــــــا غريبـــــــــه


دنيا غريبه

ناس ضايقاها ماكنتوش

وناس دافساها صحنين بوش

ناس نادوها ناريمان .. نهى .. وإيمان

نزار .. هيثم .. أسامي رشوش

وناس نادوها .. يا كلتوم .. ويا فطوم

وود بعشوم أبو طربوش أسامي بروش

ناس في الحب بتدخل توش

بدونتقديم بدون تلميح معاها قروش

شبح موديل سنة ألفين بيملى الحوش

وناس بتريد بكاها يزيد وما بتوصل

دوام يدوها بالشاكوش

عشان تعبان مفلس تب ما عندو ماكنتوش

وتسمع لب .. لب .. لب

وراسو يدوش ويبقى عموش

يقولوا عليهو شهيد في الحب ومات مغشوش

وحالي البي اصبح كيف

ده من شفتك غشاني خريف

مطر من جسمي نازل شو

ويم سيرتك يجيبوها

أبقى أخاف أكون رجاف

بدل رفدور أرش بف باف

قميصي الساوي لي غلبه

مسكتو لبستو بالقلبه

أور أنضم أتمتم زين

أمرق الكلمة من علبه وأتلخبط

كراع جزمه .. وأعاين التانية ألقى شبط

وأكون ملخوم ....

أشوف سِنير .. أقول برلوم

أمش شمبات .. أقول أم دوم

أشوف شندي .. أقول خرطوم

أقلب الحال !!!

ليلي سهر .. صباحي أنوم 0

وأحلم يوم

تكوني معاي

ونطلع في مكاناً هاي

تشربي كولا وأقعد ساي

أتوه واسرح وانم دوباي

وا أسفاي ...... وا أسفاي

علي قليبي الصبح بكاي

وشن بنسوي لما نشوف قمر ضواي

يطلق النار يشع جواي

ويبقى مناي .. أعاين ليك صباح ومسا

وأجر السبحة أقول مدحة

ســراي .......... سراي

مناي ألقاك يا السمحة

مناي تجودي بي عينيك قد لمحه

ولمن تلبسي الطرحة ..

تصاب معدتنا بالقرحة

ويجربوا فينا كل علاج

هساتمين .. كلوركوين

ده لا ينفعنا إنتستين

ولا يشفينا دِرب كينين

وما عارفين إنو علاجنا كافلجين

وكافلجين علاج لكل مرض خطري

علاج للبشري والبطري

وأشوف قدري

أكان حبيت وشاع خبري

أكان كفت الهموم كفري

وقبل أموت .. أقول كلمات

أوصي بدفني في الأحفاد

ويبقى فراشي في شمبات




علها تعجبكم

بمناسبة العيد السعيد



وإلى اللقاء