المساعد الشخصي الرقمي

مشاهدة النسخة كاملة : مدناوية بتقول ليكم



ابوالنور
10-05-2013, 01:29 AM
​_____________

• المأذون: هو ذلك الرجل الشايل دفتر يشربك اتنين في بعض بخمسين جنيها... و يزوغ.


• الزفة: أن يركب العريس والعروس في عربية معلقة فيها دلاقين.. والعريس أول ما يقعد جنب العروس يقول ليها(آآآآآآح...... اخيراً؟....والله أنا ما مصدق)..... العروس تلتفت عليهو وتقول ليهو بي نهرة(..هوي!..... وحات الله انا مصدددددقة).


• شهر العسل: هو أقصر شهر في السنة الشمسية( من تلاتة أيام إلى أسبوع)..


• رفيقة دربك: هي تلك الإنتاية التي تتزوجها.. ولما تكونوا ماشين في الدرب السنة الأولى تكون ماسكها من يديها..السنة التانية تكون ماشي معاها الكتف بالكتف.. السنة التالتة تكون ماشي قداما مسافة متر.. السنة الرابعة فما فوق، تكونوا دايرين تقطعو شارع الزلط....إنت تجري قداما برطع برطع برطع... وتخليها وراك وتقطع، وتتلفت عليها وتكورك ليها ( اقطعي..... تتقطعي نصين).....


• شريكة حياتك: هي امرأة منتدبة من ديوان المراجع العام مركبة مكنة زوجة.. تراجع موبايلك وهدومك... وجيبك... وربما ريحتك.


* العلاقة الزوجية: هي ( سيك سيك معلق فيك)... بعد مرات معلق فيك بدون سيك... شعارها ( يحلنا الحلا بله).


• التدبير المنزلي: انت وزوجتك أول الشهر تجيبو الماهية وتقسموها على الأقساط والصناديق وسيد الدكان.. وتصبحو خشومكم ملح ملح!!


• التعاون الزوجي: أن تتعاونو إنت وزوجتك في شيل العناقريب.. كل واحد بي راس... من ضل الضحى لي ضل العصر.. لي نص الحوش... وأن تجيب ليك الجردل عشان أنت تغرف البلاعة.. وتقول ليك (عليك الله في نص الشارع)...


• تربية الأطفال: تجيب ليهم اندومي.. وبلوم في عيد الميلاد... ولما يكبروا توريهم درب سوق الموبايلات.


• النسيبة: تلك المرا البتمشي زي الفرامة... وتتفقد عفش بنتها .. وتلوي خشما( اريتو دولاب اليابا.... أريتا تلاجة التابا.... أريتو متبخ التابا... غايتو يا بنتي شلناكي وجدعناكي للكرور دا)....


*الزوج :- هو ذلك الكرور القاصداهو النسيبة


*النسيب: هو ذلك الرجل عندما تشيكي لو من بنتو.. يقعد يشكي ليك من مرتو.. ويختمها (يا ولدي ديل نسوان ما يقدرن إلا الله دا..قدرنا كدي يا ولدي نسوي شنو؟ انت غايتو وقعت وما سميت)..


*الطلاق البائن بينونة كبرى: أن تقف المطلقة في خشم الباب شايلة شافع وقايدة شافع وهي ماشة بيت أبوها وتقول للراجل: (تشوفني لمحة وتشمني قدحة)... ثم تكورك (أمجاااااد)...‬

آلاء عبد الرحمن
10-05-2013, 01:37 AM
من الوتس اب وله شنو


:p

ابوالنور
10-05-2013, 01:58 AM
أقول ليك من مدنااااويه ياخ

عنكوليب
10-05-2013, 02:32 AM
وحات الله منتهى الروعة ،،، هذه هي الحياة ،،،

محمد عبد الله عبدالقادر
14-05-2013, 10:14 PM
من الوتس اب وله شنو


:p
وله شنو..............

mahagoub
15-05-2013, 03:46 AM
انت الماذون بيزوغ
بعد البيبسى والذى منه
ولا قبل ذلك

محب
23-05-2013, 03:55 AM
قالو الكديسة لمن ما تحصل اللبن بقوووووول شنوووووو............

عبدالمنعم الصديق(خدرا)
23-05-2013, 10:34 AM
يحلنا الحل بله ياابو النور

ابوالنور
23-05-2013, 11:32 AM
قالو الكديسة لمن ما تحصل اللبن بقوووووول شنوووووو............
ي محب ياخ ألبركه في مدناوية دي الجابتك لينا وان شاءالله م تنقطع ياخ

ابوالنور
23-05-2013, 11:34 AM
يحلنا الحل بله ياابو النور
اب شنب ياخ ليك وحشه وحاة ربنا تصدق

ابوالنور
23-05-2013, 11:35 AM
انت الماذون بيزوغ
بعد البيبسى والذى منه
ولا قبل ذلك قبل ي عم محجوب ياخ

ابوالنور
23-05-2013, 11:37 AM
وله شنو..............
ود عبد القادر وينك ياخ الجهاز نمرة واحد بسلم عليك

ابوالنور
23-05-2013, 11:38 AM
وحات الله منتهى الروعة ،،، هذه هي الحياة ،،،
بي حليفتا ي عنكوليب ياخ

عبدالمنعم الصديق(خدرا)
24-05-2013, 03:26 PM
اب شنب ياخ ليك وحشه وحاة ربنا تصدق
اخونا الغالى جدا جدا ابوالنور والله بالاكتر ياحبيب تسلم والله وانشالله ماتتفقد في شينه

ابوالنور
25-05-2013, 12:00 AM
اخونا الغالى جدا جدا ابوالنور والله بالاكتر ياحبيب تسلم والله وانشالله ماتتفقد في شينه

همسات قالت لي اب شنب ده جي ودق الباب لحدود م يدينو وجعنو ماف زول فتح ليه الباب شكلو نومي تقيل م سمعتك تصدق