عشوشة على الكرسي الساخن

[aborawan]

ضيفتنا على الكرسي الساخن هذا الاسبوع عضوة صاحبة حس مرهف وزولة فزعة واكبر دليل على كلامي ده وقفتها مع العضوة الاخت شقراية فلك التحية اختي عشوشة ونتمني ليك كرسي ساخن بارد



يلا البداية التعريف بالبطاقة الشخصية


ودي الصورة معليش حاانزلا بالنيابة عنك

[عشوشه]

شكرا الاخ ابو روان
شكرا يا ناس مدنى
ان شاء الله كرسى يكون بارد على
وارجوا انى ما اخيب ظنكم

[عشوشه]

الاسم :- انوار الحبيب
تااريخ الميلاد 28/8/1982
العمر يعنى 23 سنه
وطبعا عارفين موضوع العمر ده سر بس انتوا ما بدس منكم
مكان الميلاد: كسلا
المراحل التعلميه: كسلا
الجامعه: الاحفاد
اتخرجت2003
اعمل حاليا بssl
الحاله الاجتماعيه single

[أبوريلان]

الأخت أنوار

سلام كتيييييييير ليك

أتمنى أن يكون الكرسى بردا وسلاما عليك وان تتحفينا بالردود الواضحة .

أحييك أولا على هذه الشجاعة التى لمن نعهدها فى بنات جنسك فى كتابة تاريخ الميلاد وهذا يدل على وعى وإدراك كبير . وألف مرحب بناس كسلا فى بلدهم الثانية مدنى وهم مكملين لبعض بدون شك ،

سؤالى الأول :
ماهو سر تسميتك بعشوشة مرت ود أبرق ؟
سؤالى الثانى :
كلمينا عن عملك فى مجالك SSI حتى يعرف الأعضاء طبيعة عملك وماهى المهام التى تقومين بها ؟

ولنا عودة !

[shashi]

مشكور اخي العزيز ابو روان على الفكرة حقت الكرسي الساخن
مشكورة اختي العزيزة عشوشة على الشجاعة .. الوضوح .. السطوع .. حكمة الجراءة
مشكور اخي ياسر على مبادرتك بافتتاح الكرسي الساخن بعد الماستر ابو روان
اولاً : انا كنت اشعر بانه ناس مدني يعانوا من بعض العنصرية الحركية ولكن اليوم ازيح هذه الصفة بيدي وأنفيها نفياً قاطعاً
ثانيا : سؤالي الأول للعزيزة عشوشة أيهما أفضل المرأة العاملة ولا ربة المنزل من ناحية الراحة النفسية .. والوضعية داخل المجتمع؟
ثالثاً : هل تعاني المرأة العاملة داخل المجتمع السوداني من مضايقات في العمل أو تمييز ؟
رابعاً : رأيك في انفتاح الفتاة السودانية على النت دون ضوابط من الأهل ؟
خامساً : ما مدى قبول المرأة السودانية للضرة؟
مع تحياتي أبو احمد

[بابكر]

الابنه الغاليه انوار ( عشوشه ) لك التحيه00 وارجو ان يكون الكرسى مريحا لك
وهاك الاسئله ارجو ان تكون مفيده

1- هل انت راضيه عن وضع المرأة الآن بالسودان؟؟؟

2-ماهو انطباعك عن الحياة الجامعيه؟؟؟

3-ماهو طموحك فى الحياة ؟؟؟؟

افتكر كفايه كده ولى عوده ان شاء الله

[خالد هاشم علي]

الغالية عشوشة...
شنو يافردة ماجاوبتي علي أسئلة الاخوان؟؟؟؟
الكرسي سخن بيك من هسة وشتتي ولا شنو؟؟؟؟
أول حاجة داير اسجل إعجابي بي كتاباتك ووقفتك مع شقراية وزي ماقال أبو روان الظاهر عليك زولة فزعة وأخت أخوان بي مليون راجل.
سؤالي :
لو كنت في مكان شقراية كنت إتصرفتي كيف؟؟؟؟ وبعد ماسمعتي أراء أخوانك في المنتدي ؟؟؟؟

[aborawan]

الغالية انوار الحبيب سلام عليكم واعفي لي عليك الله كان الاسئلة اتردمت عليك :):)

سؤالي ليك كيف سمعتي عن المنتدى وما هو انطباعك عن المنتدى كأسرة ؟؟

ما الذي اعجبك في المنتدى وما الذي لم يعجبك ؟؟

لو تسلمتي زمام الامور في المنتدى اول حاجة حا تقومي بيها شنو ؟؟

[عشوشه]

مشكرورين الاخوه على الاسئله
ابوروان
اول سر التسميه بى عشوشه عشوشه اسم من صميم المجتمع اسودانى والسائد انو عشوشه دايما مقهورة ومغلوبه على امرها وحقها مهضوم واظن مافى واحده فى جيلى ترضى انوا اسمها يكون عشوشه عشان الاسم ما يندثر حبيت انوا يكون دخل العلومه من خلالى
انا مرة ودبرق جات على المتاعرف عليه
اما بخصوص الشغل فى الخطوط البحريه السودانيه انا اعمل فى مجال الدراسات وقسم التخطيط والاستثمار وهو يختص بى دراسات الجدوى والاستثمارات داخل وخارج السودان
مشكور ابو روان

[عشوشه]

الاخ شاشاى
اظنك تسال عن هموم وارق الرجل السودانى فى مجال عمل المراه من الراحه النفسيه
فى بدايهحياة المراه زى حالتى العمل يوفر ليها استقلاليه وثقه بالنفس ويملا الفراع الشاسع البتعيشوا من دون عمل
اما عن اذا اتزوجت فانا افضل انها تتفرغ للبيت احسن عشان الراحه النفسيه والراحه الجسديه ايضا لانوا ما ممكن تتشتغل بره البيت وجوة البيت
انا عن نفسى شعارى لا عمل بعد الزواج واظن انو البيت محتاج لا اى دقيقه من وقتى
المراه لا تعانى من اى مضايقات من جانب الجنس الاخر فى العمل بل تجد كل تفهم لظروفها
اى حاجه ليها مضار وليها مساوئ والنت زى وزى اى شى فيه الكويس وفيه الكعب بعد داك بتجى الحاجات البتحكم تصرفى فيه كويس ولا كعب ده طبعا حسب التربيه والاخلاق والتعليم يعنى كل زول من جه اهتماموا
اما موضوع الضره انت ناوى دبل؟
زى ما قلت مافى قاعده ثابته يمكن البعض مننا ترضى تجى واحده تشاركها فى زوجها على مضض لكن اى واحده دايما تحب تكون هى الوحيده على عرش قلب زوجها واى واحده تقول غير كده كذاااااااااااااااااابه
شكرا ابو احمد

[عشوشه]

مشكور الاخ بابكر على الاسئله
هل انا راضيه عن وضع المراه فى السودان والله مقارنه مع الدول الاخره انا بشوف انوا المراه فى السودان منصفه بس لو بطلت انها تتطلب انها تتساوى بالرجل
الحياه الجامعيه فى الزمن الاسى احنا فيه اصبح ماسوف عليها يعنى ما راضيه وخلى الطابق مستور
طبعا الطموحات كتيره بعد رضا الله والوالده العزيزة اكيد اطمح انى احقق زاتى فى مجال .
مشكور بابكر المراقب

[عشوشه]

مشكور يا فرده
انا لوكنت مكان شقرايه كنت اول حاجه اكون عارفه انا عايزة شنوا فى الدنيا بعدين افكر فى العرس
كده فهمت ولا نعيد ليك يا فرده

[عشوشه]

صديقى ابوروان
راى فيكم واضح بدليل انى انضميت ليكم يعنى بلقى عندكم الدفء المفقود فى كل المنتديات الصراحه النخوه يعنى حاجات سودانيه طازجه بدون تجميد عرفت على عشان كده انا بينكم وفى كرسيكم

طبعا المنتدى سمعت بيه عن طريق صحاب نادر ما اجد زيهم هم من المنتدى اعتذر عن زكر اسماءهم وليهم الفضل فى وجوده هنا من بعد الله


عاجبنى التواصل والحب البين افراد المنتدى يعنى بحس بان كل الناس تعرف بعض ويعرفوا معارف بعض يعنى ممكن انت هناك فى الغربه تلقى زول جاركم تعرف منوا اخبار البلد طازجه
حكايه الطرد ؟ ما اظن فى زول يرضى يطرد من دياروا سورى يا كنترول



والله ده سؤال صعب شويه وده البطفش من الكرسى
ما سالت نفسى ح ضيف شنوا بس افكر وارجع ارد ليك

[ابومرام]

عشوشة مرحب بيك على سطح الكرسي اكيد طبعا مادخلتي للعمق ربنا يستر دا ما تخويف 0
الااسئلة المرة الاولى نخليها خفييييييييييييييييييفة 00
1- انتي تتسلمين زمام الامر بالمنتدى ملاحظات تودين الادلا بها 0
2- 2- زكر اخونا زيكو في مقولته لوخيروني بين حبيبتي ومدني لاخترت 000الخ مابين مدني وكسلا اين تجدين نفسك0
3- كسلا بلد زات جماليات من كل النواحي وجه الشبة مابين تلك المدينتين ثقافيا واجتماعيا ً
باقي الاسئلة خليها للمرة الجاية 000

[shashi]

مشكورة اختي العزيزة عشوشة على ردودك الـ full انا جاهز علي الموية الباردة والثلج اذا الكرسي سخن بيكي
سؤال واحد على الطاير :
القاش ماذا يعني لك؟
توتيل اي وتر حساس في الوجدان تمس ..؟
السواقي ..!!
مع شكري وتقديري
مع تحياتي ابو احمد

[عشوشه]

هلا ابو مرام دة اسئله صعبه اذا استلمت زمام المنتدى ما عارفه اعمل شنوا انتوا سلمونى ليه ما ح تشوفوا الا النور هههه
برضوا سؤال صعب لكن استعنا على الشده بالله طبعا كسلا الم بالنسبه لى يعنى الحاجات ما تبقى زى ماهى لو ما كانت فى كسلا
اما مدنى بتكون زى الخاله يعنى هى برضها حضن دافى
التشابه يكاد يكون توامى يعنى كسلا ومدنى زى التوائم المتماثله بس مرات بتلقى شويه اختلاف مدنى والحق يقال اظنها تسبق كسلا ثقافيا لكن اجتماعيا مافى فرق

[عشوشه]

شاشاى صعبتها عديل كده قلت سؤال واحد طلعوا تلاته



القاش بعنى لى الخير لانوا لما تسمع اوقاش ايا يعنى القاش جا بتحس بى انوا الحاياه اتردت لى كسلا صوت السواقى واصوات الحيوانات بتديك احساس بى انوا فى حاجه جديده وزى ما عارف القاش موسمى يعنى مره فى السنه



اما السواقى هى الضل فى عز الهجير وبالجد صوت الساقيه ينفع اغنيه ما قبل النوم ؟ جربوه يا ناس مدنى


اما توتيل وللماعارف انو توتيل هى البير واتسمى الجبل على اسمها وتوتيل معناها بالرطانه نقطه نقطه لان المويه تنزل من الجبل نقطه نقطه لحدى ما حفرت البير معناها بالنسبه لى الالفه واللمه يعنى زمان قبل التتطور الناس سكنوا جمبها عشان المويه
اما اسم الجبل التاكا وهى تعنى الضل او الظل عرفت يا شاشاى

[مهيرة]

عشوشة أختي العزيزة
كم تمنيت أن أقابلك من قبل
ولكن فليكن هذا اللقاء
أهديك عبق كل زهرة في كسلا الحبيبة


http://ar.chinabroadcast.cn/mmsource/images/2004/03/05/20040305.jpg


وسؤالي يا غالية :

مدرسة الأحفاد الجامعية في كلمات
ماذا ينقص منتديات ود مدني ؟

الفرح والحزن متلازمين 00 متي تكون اقامتهما عندك ؟

أشكرك مقدما علي الاجابة وأتمني أن نتقابل في ساحة هذا المنتدي الرائع ؟


أختك 00 مهيرة

[عشوشه]

الاخت مهيره تحياتى
الاحفاد صرح اتاح لى ولى غيرى منهل للعلم
الحزن والفرح متلازمان كالتؤام السياميه الفرق فى من ياتى اولا فلا فرح بلا حزن ولا حزن بلا فرح

[أبوريلان]

الأخت عشوشه

سلام كتييييييير

1/ إغتراب البنت من أجل العمل داخليا أم خارجيا يتنافى مع عاداتنا وتقاليدنا السمحه وديننا الحنيف ، هل عشوشه مع إغتراب المرأة للعمل ؟ إذا كان الإجابة بلا ، لماذا إنتى فى الخرطوم من أجل العمل ؟ وإذا كانت الإجابة بنعم عللى ؟

2/ معظم البنات فى النت لايفصحون عن أسمائهم الحقيقية ويميلون لتبديل جلدهم ، هل عشوشه منهم ولماذا ؟

3/ ماهو إنطباعك عن الفيديو كليب العارى والذى دخل بيوتنا عبر الفضائيات ؟

4/ القهوة الكسلاوية لها صيت وشهرة ، حيث الطقوس والجلسات ، ماهو الفرق بين القهوة فى كسلا والخرطوم من وجهة نظرك ، وهل عشوشه كييفه ؟

شكرا مقدما على الإجابة .

[الزمن المريح]

كسلا اشرقت بها شمس وجدى فهى بالحق جنة الاشراقى

لنا الشرف ان تكونين بيننا و بين اهلك فى مدنى ،،
اسالتى شوية فيها عنصرية فما تتحسسى ،، شايفك بترطنى
هدندوية ولى شنو ؟
الشرق به الكثير من الابداع الخلاب و اهله ناس طيبين شديد
لم المح فى مجمل كتاباتك و مشاركاتك طابع اهل الشرق لماذا ؟
هل تعلمين رطانة القبائل الاخرى..
بردا و سلاما .......

[أبوبكرحامد]

اهلاً وسهلاً بالغالية عشوشة فى ضيافة كرسى مدنى ، وممتنين لك ولوجودك غاية الإمتنان ، سؤالى ماهو سر الروعة فى ناس كسلا ، تقبلى تحياتى ولى عودة

[نيازى كشك]

الاختى العزيزة
لكى التحية والاحترام
هل ممكن من وجهة نظرك الشخصية ان تكون هناك علاقة
صداقة بين الرجل والمراة

[ابراهيم]

الأخت عشوشة ............. أحييك وأنتي تصمدين في هذا الكرسي الذي حتى الآن يبدو بارداً أكثر منه ساخناً

كسلا تلك الواحة الخضراء بكل ما وهبها الله سبحانه وتعالى من جمال وروعة وطبيعة ساحرة والتي تتشكل في السواقي بشقيها والتلال (توتيل ومكرام والتاكا) في العصريات الأنيقة وهي تعانق أشعة الشمس .. وريحة البن .. والقاش الذي تغنى به زيدان ...

مما تقدم ماذا تمثل لكي هذه المعالم وما هو وقع ذكراها في دواخلك؟

أشياء في الذاكرة من كسلا؟

بحكم دراستك في الأحفاد ما هي سلبيات وايجابيات الدراسة المنفصلة (غير المختلطة)؟


ما هو الجو الملائم لشرب الجبنة وما هي متطلبات قعدة الجبنة في كسلا؟


برأيك ما هي الآثار البيلوجية المنبثقة من تراكم الصراعات الايدلوجية في ظل سادية العولمة لزمام الأمور قياساً بإنحطاط الأغنية السودانية اليوم؟


لماذا تقول الكديسة ناااااااااااااو؟


ولكى اختى عشوشة خالص تحياتي

أتمنى أن تكون أسئلتي خفيفة:D

وكل أمنياتي بقضاء اسعد الأوقات في رحاب الكرسي
وفقك الله

[عشوشه]

الاخ ياسر شايف الكرسى بدا يسخن
حكايه اغتراب البت للعمل انا معاها فى حاله انوا انو فى ضرورة سواء كانت خارجيه ولا داخليه وتقريبا كل الناس بتهاجر من راى العمل هجره حتى لو كانت فى نفس المدينه لانوا الشى البخلى الواحده تطلع من بيتها لازم يكون مقنع وانا مهاجره عشان انا محتاجه اهاجر لو الظروف اتلقت اكيد ما ح ارضى انى اصل باب الشارع بس.
والله النت فيه الصالح والطالح واظن انو السائد فى النت يكون دايما فى لقب.
وانا فى مواقف تخلينى ما اقول اسمى واظهر باللقب لكن اذا اقتضت الظروف انى اقول اسمى لناس انا بثق فيهم ما اظن فيها غضاضه
يعنى انا منهم وما منهم فهمت ياحبه
الفديوا كليب اصبح يثير اشمازازى لدرجه انى اغير اى اغنيه غير محترمه وانا اشوف انو الاسره لازم تراعى فى دوخوله الى البيت
انا اصلا كيفه لدرجه انى اسى ونا ارد عليك احتسى القهوه السوداء بس ما ليها طعم ولا ريحه قهوه كسلا اما الطقوس فدى الاساس فى القهوة.القهوه هنا ليس لها طعم ولا رائحه بس لون اسود قاتم.

[عشوشه]

الزمن المريح
انا اتشرفت بى وجودى بينكم
ما ح اتحسس انا لما رطنت يادوب كلمتين واظنهم كانوا فى موقع يستاهلوا يكونو فيه عشان اوضح معانى كلمتين يمكن كل الناس ما بتعرفه زى توتيل والتاكا
اكيد ح يجى يوم اكتب فيه .
والله ما بعرف كتير حتى الهدندويه لا اجيدها خطابه بس بقدر افهم فى
رطانه الهوسا شويه
شويه بنى عامر
شويه حلنقه
وما اقدر اتخاطب بس لو زول قال قدامى بفهم .

[عشوشه]

انا المتن بى وجودى بينكم الاخ ابو بكر


سر الروعه فى ناس كسلا دى حاجه من ربنا اولا
وتانى يمكن الطبيعه هى البتفرض على الناس يتشبهوا بيها يعن ما اظن فى زول يصحى على صوت السواقى الحنين وحفيف الاشجار وشققشه الطيور يقدر يكون غير انوا رايع

[عشوشه]

هلا نيازى


الصداقه بين الرجل والمراه ممكن تكون فى بس كل حسب مفهومه للصداق يمكن المجتمع السودانى فى السنين الاخيره بدات تظهر الصداقات من النوع بسبب التعليم المختلط وبعدين الشغل ..

[عشوشه]

ابراهيم اهو سحرتنى لما الكرسى سخن كل ده هو لسه ما سخن حس شويه


هيجت جواى الزكره احى من ريحه البن وقهوه العصارى الحاجات دى بتمثل لى عمر بى حالوا وكل الحاجات التانيه تتبنى عليها عشان تعرف لازم تقارن بين النسكافيه وبين الجبنه وقعدتها
واللهالايجابيات انوا الجو فى الحفاد يديك احساس مدرسه اكتر من انو جامعه وتقدر تملى العايزاهوا بى راحتك من كل النواحى
اما السلبيات انا عن نفسى وبعد العمل حسيت بالصعوبه فى انى اتعامل مع الجنس الاخر .

[الزمن المريح]

بردا و سلام عليك الكرسى يا اخت عشوشة ،،
اختى تميزت اجاباتك بصراحة و بساطة ،، و ذوق عالى فلك الشكر الكثير عليها و انا بطبعى لا اعرف اجامل ،، فدي حقيقة بدون مجاملة ،، مع وافر التقدير و الاحترام ،،

كسلا تحدونى ذكريات جميلة ،، و خصوصا السواقى و غرب القاش و المرغنية
ما هو سر، الطيبة فى كل اهل كسلا ،، وماهو سر المحبة و الوداد بين كسلا و مدنى ،، ما ذكرت كسلا الا وذكر الاستاذ الشاعر اسحاق الحلنقى و الفنان التاج مكى فماذا تعرفى عنهما؟

لك الشكر مقدما على الرد ..

[عشوشه]

سورى للقطع يا ابراهيم بس شكلى دقست
بكمل ليك هنا


الذاكره كلها كسلا يعنى ما اظن صحيه المنبه زى صحيه امى لما تفتح القران من الصباح .
الجوا الملائم انت عارف فى كسلا مافى وقت محدد لشرب الجبنه بس انا بحب بعد المطر والارض مرشوشه بى المطر وريحة البن فى النار هنا بالجد لو جربتها ما اظنك ح تنساها ومن اسى عازماك الخريف الجاى جبنه

ما اظن فى متطلبات غير الحاجات المعروفه من عده الجبنه والبن بس اظن مطلوب اللمه والمحنه فى الزول البسوى الجبنه

سؤالك ده عجيب فهمت بس انحطاط الاغنيه السودانيه



بتقول ناواااااا لانها جعانه وعايزة اللبن اسى نااااااااو



لا خفيفه وزن الريشه كمان

[عشوشه]

شكرا الزمن المريح ده من زوقك بس

الطيبه دى بتتاخد من الجمال المحيط بى ناس مدنى وناس كسلا


ما اعرف عنهم كتير زى وزى اى زول بسمع وبنطرب ليهم

[rasheed]

لك التحية والتجلة الأخت عشوشة وأقدر كثيراً جهودك على الرد لأسئلة الأخوة الما عندهم حنان ديل ،، ياجماعة ما كفاية عليها والله هريتوها هري أنا ما عاوز أسأل لأنو الجماعة ديل زي ما قلت هروك هري لكن عجاباني حربيتك يعني حربية للأخر وما في سؤال وقفك وما شاء الله عليك يعني أنتي درست في الأحفاد كان أتخرجت من الفاشر ولا من الخرطوم كان تكوني كيف ، كنت أعتقد أنك تكون حنكوشة شوية ،، وتحياتي لك من علي البعد ،،

[عشوشه]

هههههه
رشيد شكرا ليك


والله مافى اسئله صعبه تخيل وياريت تكون فى اسئله تانى


برضوا عازماك سؤال


تقدر تسال

[مزوني]

أحيك أختي وصديقني عشوشة على هذا الصمود
و أتمنى من المولى ان يوفقك لكل ما تحبين وترضين
ما عندي ليك سؤال صعب
هو المفروض كان تجاوبي عليه ضمن البطاقة الشخصية
شرقنا الحبيب عامر بقبائل حبيبه وصديقة..........
لأي هذه القبائل تنتمين؟
السؤال التاني حصل جيتي مدني؟
ولو كان نعم يا ريت تحكي لينا موقف حصل ليك ما بتنسيه في مدني
ولك الشكر أجزله

[عشوشه]

هلا مزونى

وجل من لا ينسى تخيل نسيت حكايه القبائل سورى للتاخير فى الرد



انا يعنى خليط هدندوه وجعلين وحلنقه بس ابوى جعلى



اتمنى زيارة مدنى بس لى اسى ما زرتها

[shashi]

اختي العزيزة انوار مشكورة على ردودك على اسئلة الكرسي بكل سعة صدر وتفهم .. واسئلتي كما يلي :
* الشهادة تعتبر سلاح في يد البنت واهو انتي الله وفقك لاستخدام السلاح ده في الوقت المناسب وبطريقة مثالية للغاية هل لديك نية أن تحضري دكتوراه في مجالك .. هل لديك طموح ان تكوني محاضرة في كلية تدرسي فيها الرجال .. واذا كان كيف ستكون نظرتك للرجل بعد أن تشعري انك اصبحت في وضع أعلى وظيفياً منه؟.
* اذا تقدم لك رجل ( ذو دين وخلق ) ولكنه غير متعلم وعاطل عن العمل ( والحمد لله أنا ما بتكلم عن نفسي لاني جامعي ومتزوج ) هل توافقي بالزواج منه ؟اذا كانت الاجابة بنعم محتاجين شرح وكيف تكون نظرتك لهذا الرجل ..
مشكورة مقدما ... واذا رأيتي اي سؤال محرج يمكنك عدم الاجابة عليه

مع تحياتي ابو احمد

[عشوشه]

شاشاى
اكيد فى الخاطر الدراسات العليا لانها اصبحت ضرورة ليس من اجل العمل بل من اجل النفس وتحقيق غاياتها

اما حكايه انى ادرس الرجال انا اصلا ما عامله نديه مع الرجل يمكن تجى الظروف التخلينى ادرس الرجال واسى انا فى مجالى فى العمل بشرح للرجال اشياء تكون خافيه عليهم وده يعتبر تدريس



ما ح اوافق بيه مش عشان ما متعلم لانو عاطل عن العمل لانوا العمل فى حد زاتوا عباده

[اللمسة الساحرة]

الاخت الغالية عشوشة:
بعد التحية والسلام ،،،
طبعا انا ما حااسئلك لكن بتمنى ربنا يقدرك تجاوبي على الاسئلة والكرسي مايسخن بيك,,,
والى الاخ ابو روان بهنيك جدا على فكرة الكرسي الساخن وانا حاجزة بعدة صاحبتي عشوشة وشكرا ليك
سؤالي المتواضع:
اسرة منتدى ودمدني في كلمات؟؟
ايجابيات المنتدى وسلبياته؟
موضوع اعجبك جدا في المنتدى وكاتبه؟؟
كاتب شدتك جدا كتاباته ؟؟؟
وشكرا صاحبتي عشوشة
تقبلي تحياتي ،،،،
اختك: اللمســـــــــــــــــــــــــــــــــــــــــــــ ــــــــــــــــــــــة الساحرة

[عشوشه]

اللمسه الساحره ازيك احيك

انت قلت يا فرده ما عايزه تسالى
وسالتى اسئله كل سؤال محتاج صفحة رد

لكن ولا يهمك ح ارد عليك بس اصبرى فى دورك لو ما فهمتك حاجه

اتفقنا يا حبه؟

الحب, الرحمه, الاخوه, التوادد، النخوه

كده اظن كفايه

ايجابيات المنتدى لمه الناس وعرفهم بالحاصل فى البلد واخبار الاهل خفف مراره الغربه عمل تواصل اجيال وما اظن عمل حاجات بالروعه دى يكون عندو سلبيات

ولا رايك شنوا؟

كل المواضيع فى المنتدى متميزة وجميله وبتخليك تندهش من تفكرى اين تاتى كل الكلمات دى انا بقرا لى اى زول بنزل موضوع يعنى ما متعصبه لى زول معين
والله كاتب شدتنى كتاباتوا هم كتار لكن بعجبنى قابريل غارسيا ماركيز فى الحب فى زمن الكوليرا ومئة عام من العزله وعجبنى همتقواى فى الرجل والبحر

وعجبنى هجوا فى البوساء واحدب نوتردام وتلستوى فى انا كارنينيا ده غير الكتاب العرب الاظن كل الناس بنحبهم
وديل للمثال ما للحصر يعنى يمكن يكونى فى تانين سقطوا سهوا عموما بتقدرى تميزى انا احب اى نوع من الكتابات .


المره الجايه ما تقولى ما ح اسال اسالى طوالى
بالجد اسالتك حلوة

[ابومرام]

عشوشة انا شايف ماشاءالله في صمود اناقلت ليك انتي لسى على السطح وربنا يستر عليك - والدبلوماسية اساس في اجاباتك
عندما يبدى الحديث عن كسلا تتجمع كل الكلمات والعبارات حتى نحتويها بمعانيها ولكن اذا اردنا فتح تلك البوتقة فماذا تقولين عن الاتي :-
1- المدارسة العامة في مدينة كسلا والجامعات والمعاهد
2- الوزارات وبصورة عامة الموافق الحكومية بالمدينة
قد لا يعرف البعض عن جوانب تلك المدينة اود ان تعطينا الخلفية الكا ملة عنها
ولكي التحية لمان نشفك والاسئلة جاية لكن ما حاهريك بيها000000
ومشكورة كتير على الاجابات مقدما ً - بس ماتشردي 00

[عشوشه]

ابومرام معليش للتاخير فى الرد

فى كسلا كميه من المدارس الاساس والثانوى مقسمه شرق القاش وغرب القاش وفى مدارس رحل للهدندوه والرشايده لانهم ما مستقرين
اما التعليم العالى فى جامعه كسلا لها 15 سنه وفى جامعه الشرق الاهليه وتانى فى جامعه اهليه
بالاضافه الى المعاهد العليا يعنى البنيه التحتيه فى كسلا متينه

اما الوزارات فهى كامله بس انا ما بعرف اقسمها

فى تلفزيون الولايه واذاعة كسلا توجد شبكه تلفونات ارضيه واخرى نقاله

اظن كده ما شردت صاح

[sugraya]

الاخت عشوشه

اخبارك والله طولت ما دخلت وكده بس اسى نفسى اساللك انتى بتعرفى تحبى؟

ده واحد اتنين ديل ناس مدنى يعنى ما ناس كسلا قاعده لى وسطهم ليه؟


انا اجاوب بدلك؟

احتمال بتحبى واحد من مدنى ؟ وعشان كده انت معاهم انا شفت المنتدى بتاع كسلا جميل ممكن تمشى تشتركى معاهم احسن ليك


صاحبتك

[اولاد المدارس]

السلام عليكم ورحمة الله وبركاته

في البداية نحيي الاخت عشوشة ونحي كل اعضاء ودمدني ونقول اسفين على الغيبة الطويلة دي

وشكرا......

[بابكر]

أحيك أختي وصديقني عشوشة على هذا الصمود

[عشوشه]

مشكوره يا شقرايه على مروورك
سؤالك عن هل انا اعرف احب اكيد اعرف احب بس كل زول بحب حسب مفهومه للحب يعنى انا احب الصفات الجميله فى البشر زى الصدق الوفاء
بس ممكن اسالك انت مفهموك للحب شنوا؟
اما سؤالك التانى اكيد انت جاوبت عليه
منتدى كسلا جميل بس ود مدنى اجمل اظن انك من بورسودان فيبقى المفروض اسالك نفس السؤال انت هنا ليه؟؟؟

ده شى الشى التانى ناس مدنى ما قالوا شرط انك تكون من مدنى عشان تكون معاهم وده راى ناس مدنى اولا واخيراً

انا بسال ناس المنتدى هلى توجد غضاضه فى وجودى بينكم؟


مشكورة يا حبه

[عشوشه]

شكرا يا اولاد المدارس احيك بس

[عشوشه]

الاخ / بابكر
الله يخليك الموضوع ما صعب تخيل

المطلوب فقط الصراحه والثقه بالنفس


ومشكور على الوقفه معاى والتحيه تترد ليك ملاين التحايا