ود الأصيل
06-10-2013, 09:42 PM
خرفان في الصيوان!!!
تنويه:(سبق لي نشر هذه البوست عبر أكثر من نافذة)
--------------------------------------------------------------------------------
منذ الآن وعلى مرمى بضعة أيام من العيد تفشت حمى الوادي المتصدع بين الناس تحت وطأة اشتعال أسعار الأضاحي.
.عشان كدا قمنا أمس بدري بدري ختفنا رجلنا نزلنا شبرة (سوق) الغنم بالكريبة ، قلنا نشوف لينا عضة للضحية؛
أي حاجة إن شاء راس نجيفة زول. ففوجئنا بلمة وهيصة سادة عين الشمش. شنو آآآآناس قالو الخرفان السنة معلنة حداد عام..
ضاربة سرادق عام لتلقي واجب العزاء في بعضها البعض. قال اتعهدومع مقاول فرشات يزودهم بعدد من الصيوانات ،
مع الأباريق و شحنة مناديل فاين لزوم المخاخيت و حاجات تانية متل سكاكين لشق الجيوب و وبراطيش للطم الخدود.
فعلاَ شفنا عجباً عجاباً.أول شيء أهل البكا ظاتم خشم بيوت: أجناس وأحجام و أشكال وألوان. بدءاً بال(vip),
البيجي الأنيق ستايل من النوع المفكر يدخل (سجل غينص) للأرقام القياسية.(ضحية أولاد المصارين البيض، زي ناس جمال الوالي ولا فوق)..
ثم هبوطاً إلى الأبرق البروليتاريا الهفتان بعيد عنك، من النوع البحرجك مع نسابتك. زي واحد بجغور صومالي كدا منزوع الضنب ،
ما يساوى خمسة قروش سمع سيدو يفاصل و يتمنى منى في سعره قام اتنحنح نحنيحة خبيثة كدا، كناية عن قوله:"
بيع يا منافق ليك الحق في كل ما تنافق" أنت عارف عندي أنيميا (وكمان مثقف بتابع عزيزي المشاهد على القناة القومية).
كذلك رأينا منها المصاب بحمى ما قبل الضبح، وآخر يقرأ بهستيريا في كتاب (كيف تصبح حيواناً آخر- لأسامة السيد).
لاحظنا بعضها عدواني جداً وشكلو مهووس بالسياسة شبه الكلب شارون (مرمي معفن ليه 6 سنين كل يوم يقطعوا حتة من مرارتو
(يستاهل دا حق جماعة صبرا و شاتيلا). لكن في المقابل بعضها مسالم تلقاه حايم بالكوش (يقرض) الدلاقين،
بينما آخر رومانسي ( يقرض)الشعر وهو يندب حظه: عيد بأية حال عدت ياعيد لنتشوي ثمنتلهط أم لأمر فيك تجديد؟ أو يغني:
(عدت ياعيدي بدون طقوس .. وين بقرنا وين التيوس .. غابو عني)
أثناء مرورنا ضحكنا خروف فشنك لقيناه واقف لسيدو ينفخ فيه بطرمبة كل شوية,
وآخرألعن منو يتفاوض مع واحد يدقس ليه في دحيش يشرح ليه:
إزاي يلبس الفروة في يوم العيد والأجرة 3 كلاليق برسيم، يستلم بعد أيام التشريق.
ثم آخر تفتيحة راح فاتح بلاغ في صاحبة ملفق لو تهمةالشروع في القتل العمد مع سبق الصرار والترصد.
وواحد تاني كما دا مافيا سحب السكين من سيدو وجرسو بيها.
و ثالث وصلت بيه حالة الاكتئاب أنو قعد يدعي على نفسه بأنفلوانزا الخنازير ولا أي نصيبة تاخدو بس تختيه الساطور.
ورابع شهادة عربية حنكوشة حنين كدا لجأ للدبلوماسية الشعبية فتوسل لصاحبه، يقول ليه: هانت عليك كالعشرة يا سيدي.
الحقيقة في شلة خرفان كدا معرفة قديمة من سنين طويلة لاحظلنا غيابهن فقدناهن قالو: مشن يعملن حفلة تنكرية
مع طيور البطريرق (قال ليك ضاربات الهم بالفرح) و بعضها كمان للغرابة سمعناه يتبادل عبارات الشماتة.
ــــــــــــــــــــــــــــــــــــــــــــــــــ ـــــ ــــــــــــ
أخوياً لينا سعودي شاف ليه خريفات كدي زي المهجنة ولا محورة وراثياً مش عارف فأتحفنا بتعليق ظريف قال:
اسمعني وأنا أخوك: حاجة من الاتنين:_هدولا يا إما جمال الله سخطهم ولا سخلات الله راضي عنهم
و ديل بشتروهم مشاركة ولا كيف .. عجايب ،موباااالغة
ــــــــــــــــــــــــــــــــــــــــ
فعلقت على تعليقه بهذه من عندي:
لا وأنت السادق يأ اللخو, حاجة من اتنين: ديل يا إما خرفان منملة و لا نملات مخرفة,,,
و ممكن تشتريهم يا إما( مسيار) أو (عرفي) ودي بصراحة مش عجايب ,
الضحية بقت رابعة المستحيلات إلى جوار ناس الغول والرخ والخل الوفي...
واحد مسطول قال: أنا نصيحتي للما قادر يفتح للموضوع من أساسه
ويكسب (الفجر وليال عشر) أحسن و بعدين تتموها شربوت بضلافين.
مع مودتي الشديدة
تثبيتة:-
للأمانة شكر خاس للرائع معروف أوشي على الصور التي أوحت لنا بها الخرابيط المرتجلة,
و قلنا لو: ماتخاف اللخو حق الملكية الفكرية ففتي ففتي نصو ح يكب في جزلانك,
بقول أحسن ليك من شغلة الرشايدة دي.... ولا شنو؟؟؟.
تنويه:(سبق لي نشر هذه البوست عبر أكثر من نافذة)
--------------------------------------------------------------------------------
منذ الآن وعلى مرمى بضعة أيام من العيد تفشت حمى الوادي المتصدع بين الناس تحت وطأة اشتعال أسعار الأضاحي.
.عشان كدا قمنا أمس بدري بدري ختفنا رجلنا نزلنا شبرة (سوق) الغنم بالكريبة ، قلنا نشوف لينا عضة للضحية؛
أي حاجة إن شاء راس نجيفة زول. ففوجئنا بلمة وهيصة سادة عين الشمش. شنو آآآآناس قالو الخرفان السنة معلنة حداد عام..
ضاربة سرادق عام لتلقي واجب العزاء في بعضها البعض. قال اتعهدومع مقاول فرشات يزودهم بعدد من الصيوانات ،
مع الأباريق و شحنة مناديل فاين لزوم المخاخيت و حاجات تانية متل سكاكين لشق الجيوب و وبراطيش للطم الخدود.
فعلاَ شفنا عجباً عجاباً.أول شيء أهل البكا ظاتم خشم بيوت: أجناس وأحجام و أشكال وألوان. بدءاً بال(vip),
البيجي الأنيق ستايل من النوع المفكر يدخل (سجل غينص) للأرقام القياسية.(ضحية أولاد المصارين البيض، زي ناس جمال الوالي ولا فوق)..
ثم هبوطاً إلى الأبرق البروليتاريا الهفتان بعيد عنك، من النوع البحرجك مع نسابتك. زي واحد بجغور صومالي كدا منزوع الضنب ،
ما يساوى خمسة قروش سمع سيدو يفاصل و يتمنى منى في سعره قام اتنحنح نحنيحة خبيثة كدا، كناية عن قوله:"
بيع يا منافق ليك الحق في كل ما تنافق" أنت عارف عندي أنيميا (وكمان مثقف بتابع عزيزي المشاهد على القناة القومية).
كذلك رأينا منها المصاب بحمى ما قبل الضبح، وآخر يقرأ بهستيريا في كتاب (كيف تصبح حيواناً آخر- لأسامة السيد).
لاحظنا بعضها عدواني جداً وشكلو مهووس بالسياسة شبه الكلب شارون (مرمي معفن ليه 6 سنين كل يوم يقطعوا حتة من مرارتو
(يستاهل دا حق جماعة صبرا و شاتيلا). لكن في المقابل بعضها مسالم تلقاه حايم بالكوش (يقرض) الدلاقين،
بينما آخر رومانسي ( يقرض)الشعر وهو يندب حظه: عيد بأية حال عدت ياعيد لنتشوي ثمنتلهط أم لأمر فيك تجديد؟ أو يغني:
(عدت ياعيدي بدون طقوس .. وين بقرنا وين التيوس .. غابو عني)
أثناء مرورنا ضحكنا خروف فشنك لقيناه واقف لسيدو ينفخ فيه بطرمبة كل شوية,
وآخرألعن منو يتفاوض مع واحد يدقس ليه في دحيش يشرح ليه:
إزاي يلبس الفروة في يوم العيد والأجرة 3 كلاليق برسيم، يستلم بعد أيام التشريق.
ثم آخر تفتيحة راح فاتح بلاغ في صاحبة ملفق لو تهمةالشروع في القتل العمد مع سبق الصرار والترصد.
وواحد تاني كما دا مافيا سحب السكين من سيدو وجرسو بيها.
و ثالث وصلت بيه حالة الاكتئاب أنو قعد يدعي على نفسه بأنفلوانزا الخنازير ولا أي نصيبة تاخدو بس تختيه الساطور.
ورابع شهادة عربية حنكوشة حنين كدا لجأ للدبلوماسية الشعبية فتوسل لصاحبه، يقول ليه: هانت عليك كالعشرة يا سيدي.
الحقيقة في شلة خرفان كدا معرفة قديمة من سنين طويلة لاحظلنا غيابهن فقدناهن قالو: مشن يعملن حفلة تنكرية
مع طيور البطريرق (قال ليك ضاربات الهم بالفرح) و بعضها كمان للغرابة سمعناه يتبادل عبارات الشماتة.
ــــــــــــــــــــــــــــــــــــــــــــــــــ ـــــ ــــــــــــ
أخوياً لينا سعودي شاف ليه خريفات كدي زي المهجنة ولا محورة وراثياً مش عارف فأتحفنا بتعليق ظريف قال:
اسمعني وأنا أخوك: حاجة من الاتنين:_هدولا يا إما جمال الله سخطهم ولا سخلات الله راضي عنهم
و ديل بشتروهم مشاركة ولا كيف .. عجايب ،موباااالغة
ــــــــــــــــــــــــــــــــــــــــ
فعلقت على تعليقه بهذه من عندي:
لا وأنت السادق يأ اللخو, حاجة من اتنين: ديل يا إما خرفان منملة و لا نملات مخرفة,,,
و ممكن تشتريهم يا إما( مسيار) أو (عرفي) ودي بصراحة مش عجايب ,
الضحية بقت رابعة المستحيلات إلى جوار ناس الغول والرخ والخل الوفي...
واحد مسطول قال: أنا نصيحتي للما قادر يفتح للموضوع من أساسه
ويكسب (الفجر وليال عشر) أحسن و بعدين تتموها شربوت بضلافين.
مع مودتي الشديدة
تثبيتة:-
للأمانة شكر خاس للرائع معروف أوشي على الصور التي أوحت لنا بها الخرابيط المرتجلة,
و قلنا لو: ماتخاف اللخو حق الملكية الفكرية ففتي ففتي نصو ح يكب في جزلانك,
بقول أحسن ليك من شغلة الرشايدة دي.... ولا شنو؟؟؟.