مستشفيات بالفوتوشوب

[آلاء عبد الرحمن]

الحقيقه :

الإستقبال إن وجد : تعال هنا ماشى وين داخل تووش كدا (الذى يتحدث شخص هلامى ينظر اليك شذرا )
- أنا طبيب
يعاين ليك من فوق ل تحت كدا وتجود قريحته ب : داخل ل شنو

- لا بس داخل أصلى الضحى فى مسجد المستشفى وأشرب لى مويه وبالمره عندى عيانين كدا فى العنبر ماش اشوفهم بقو كويسين ولا لا
_ خش
وانت داخل
حديد نقاله من العصر الحجرى فيهو بقايا سرير بلاستيك و كرتونة الثييتر والفايل والعيان شغال هزاز من الحفر وعجلات النقاله المصديه
تبلعها
تتلفت يمينك : مرافقين يلتحفون الأرض لسه الشمس ماجاتهم
كوبيشنت شايل فرشتو ومعجونو ماشى على ضهر عنبر العظام
تصل العنبر تستقبلك روائح تخليك تندم على شاى اللبن لو شربتو
تخش مكتب التمريض تكابسك الكديسه
تشيل ليك فايل كدا
الممرض :
والله يادكتور العيان دا ماعمل الاى سى جى الجهاز خسران
والايكو مشو لقوهو غالى هسى مستنينك تجى تشوف ليهم طريقه قالو !!!
الفايل التانى :
الكوبيشنت قال الفحص دا مافى داعى ليهو !!

التالت :
العيان رجع الروشته قال يشيلها ليه أصلا وحق البندول ماعندو

تخلص حاجاتك تلقى نفسك مافطرت
تفتش جيبك تلقاهو يادوب حق المواصلات
ترجع تشرب ليك كباية مويه من مكتب التمريض تنزل بيها عبرتك
تمشى على المسجد تتذكر انو المويه اساسا ماقعد تقطع الا وكت الصلاة

تطلع فى عز الهجيره
تقيف حدى مايجيك تصلب فى المفاصل
وزغلله فى العيون
وانشكاح فى البنكرياس
تصل البيت وانت ناسى إسمك زاتو
____________

[آلاء عبد الرحمن]

فوتوشوب :

مبنى جميل أزرق اللون فى واجهته كتب بالخط المذهب مستشفى: ياخى بعد الشر عليك التعليمى

تستقبلك إبتسامه قلبيه من وجه صبوح لابس كرفته
- صباح الخير يادكتور
- صباح النور
- ان شاء الله يوم هادى ^___^
- تسلم تسلم
تدلف الى داخل المستشفى (طبعا من تدلف دى أكيد البوابه دائريه ^___^)

تستقبلك مسطحات خضراء تتوسطها نافوره فى شكل قلب المويه طالعه من الأورطى لى فوق كدا وبى الجمبات المويه طالعه من البلموناريس فيسلس نقش عليها عبارة :
نحن نعتنى بك بقلوبنا أولاً ^_____^

خلفها مباشرتن يتوهط برج الباطنيه
( معمل متكامل + كل الايميجنق استديس ^__^ + ديابيتك سنتر +والعنابر وما أدراك ما العنابر
غرفه لكل مريض مجهزه بأحدث الوسائل وفيها ويرليس و الجزيره الرياضيه كمان)

يتيمنه برج الجراحه الذى يمسك بيده اليمنى عمارة مستشفى العظام ^__^

تبتسم بداخلك تأخذ نفساً عميقا تتخلله رائحة الزهور التى تأتيك من مدخل برج الأطباء
دقيقه قبل ماتدخل فى نافوره على شكل
لابكوت فى جيبه ورده حمراء
مكتوب فيها:
الدكاتره يا السته ^___^

وانت قريب لى بيتكم كدا تتذكر
- ياعلى (سواق الترحيل )
عليك الله بكره تعال لى بدرى شويه