وارد جدا أكون بفكر فيك ( حوار الذات )

[الملكة اسماء ( ام محمد )]

بسم الله الرحمن الرحيم


هل ممكن تكون مرت عليك نفسك الافكار ؟


طيب نشوف الافكار

[الملكة اسماء ( ام محمد )]

الفكرة رقم واحد

كتير جدا اشوف راجل شكله مهذب وود ناس جدا واستكثره في مرته !!!!

ليه ؟


انا اقول ليكم

لانه ببساطة تعاين ليها هي تلقاها بتتلفت بلا( البارقيطة ) وتتلاصف بلا ( النجفة )
وهو يا مؤمن يا صديق مبشتن ومعولق وكان عاينت ضفور ايدينه تحلف تقول كان شغال في منجم فحم
ولحد لون جلابيته دي تعرف انه بغسولها ليهو مع هدوم الشفع
وتكون الكارثة الكبيرة لو مرته لابسة كعب عالي وغالبها المشي ومشيلاهو الشافع الصغيروني
يمشي متمايلا متهالكا حتى تبدو في عينيه لمحة حزن مجهول المنبع


اها انا في اللحظات دي بهز راسي بازدرا وبفكر في امكانية تسلل وحدة ( مفتحة ) و شاطرة جدا تلف ليهو راسو وتاخدو ليك من المرة المستهترة دي وتحسسو باهميته و بقيمته كونه رجل اختارها دون النساء

[الملكة اسماء ( ام محمد )]

الفكرة الثانية

فكرة مجنونة شوية


دي حالة كدا من الخيال الغريب

وحدة من البنات بتحكي لي عن فكرة غريبة



قالت : تعرفي ياخالتو زمان كنت معجبة جدا بواحد من رواد الفن السوداني


وكنت بتابع اغنياته بولع منقطع النظير

لما يجيبوه في التلفزيون بكون بفتش في حاجة جواهو ماف زول غيري بشوفها


بسرح بالخيال للحظة البقيف فيها قدام المرايا ويستعد للطلعة


شنو نوع البرفان بتاعو ؟


شنو نوع كريم الشعر البستخدمه ؟


وبمشي لامنية مجنونة وهي لو استطيع ملامسة وجهه وهو نائم بيدي

وبتنهد وبقول بختهم الناس المعاهو في البيت وكل يوم بشوفوه



المهم , انا راودتني نفس الفكرة المجنونة ..يوما ما

[الملكة اسماء ( ام محمد )]

الفكرة الثالثة

نفسي افهم بيخطر على بالك شنو يا بشر لما تمسك شلوفتك التحت وتمطها شبر قدام و تبصغ ليك ( سفة سعوط ) في نص شارع عام ؟


عموما بالنسبة لي انت بشر ما ايدلوجي

[الملكة اسماء ( ام محمد )]

الفكرة الرابعة

ياترى وياهل ترى الجماعة البكونو لافين في السوق سااااااااي ديل , وعدي ما تمشي بجمبهم بت سمحها و يشبكوها ليك مااشاء الله تباااارك الله , يا ارض احفظي ماعليك


هل حصل فكرو في ان النظرة الاولى ليهم والثانية عليهم وان كلمات زي مااااااااشاء الله , تباااارك الله دي ما تعفيهم من الذنب


بالمناسبة المفروض الرد عليهم يكون شنو ؟


هسي في ذمتك يا بشر انت كان ماعاطل ومفلس ومقطع كنت هسع بتكون واقف هني , ماكان لمت فيك بت حلال واقنعتك تعرس

يعني بالعربي البترد عليك دي وحدة فارغة زيك و ما حاسبة حساب انك غالبا حاتديها مسكول وهي تتصل

عشان هي بما انها جات السوق اكيد عندها قروش تشتري
وبما انك واقف زي عمود الجبس كدي فاكيد انت مفلس


عموما شوف ليك شغلة وتاني حاتقعد تقول الحمد لله , اكتر من ماااااااشااااااء الله

[الملكة اسماء ( ام محمد )]

الفكرة المكررة



الجماعة من شرق أسيا خلال الاعياد بتلقاهم في كل ركن وقدام كل حوض ورد مترصين و بتصوروا

افتكر ان فكرة الغربة لسنوات عديدة خلقت لديهم فرصة مناسبة لالتقاط صور يصبروا بيها اهلهم على فكرة الغياب


اما نحن

وماادراك مانحن


برنامج ( ألو مرحبا ) كان كفيل بان نعرف بان فينا من لديهم ( الجفاء ) يتربع في صالون القلب و تسكن المحنة في مخزن صغير بمقاس نص متر في ربع متر

بخصوص الجماعة الهسي بيقروا في الكلام ده وليهم فوق الثلاث سنوات من اهلهم ( إنتوا جادين ؟؟؟)

[الملكة اسماء ( ام محمد )]

زمن مدهش ...

عدد كبير من شباب اليوم تظهر عليهم علامات ( مراهقة متاخرة ) بعد الزواج !!!!!
وعدد اكبر يختار ( أخلاء مسؤلياته التي تحملها باختياره ) في وقت فيه يظن الاهل انه أخيرا أصبح شخص سوي و متزن العاطفة والتفكير

ولكن ...

مايحدث هو انه يبدء في البحث عن (شبابه و مراهقته ) وهو ( رب اسرة ) !!!!


طيب ياخي ماكان عندك فرصة تعيش شبابك و تلف الكون وتباري اصحابك و تستكشف الكون ( على مهل ) قبل ان تقرر الزواج فقط لانك ( مقتدر أقتصاديا ) او لان أهلك شايفين أنك بعد كدا لازم ( تتلمى ليك على مرة و تعمل ليك بيت وتبقى أب لاطفال لا تفقه في شؤون تربيتهم شئً)



هي دعوة عزيزي الشاب لان تعيش ( عمر شبابك ) كاملا قبل ان تسجن نفسك في سجن مسؤوليات (انت مش قدرها)



وقبل كل شي ( تذكر أن دائرة حياة شبابك يجب ان تخلو تماما من الجنس اللطيف ) حيث انها سوف تصبح (رفيقتك في القفص الذهبي) ولباقي العمر الناضج


يعني , رايك شنو تطلع (رحلة) مع أصحابك , وتبرمج معاهم على أساس أنك ( تشغل نفسك ) من فكرة انك زهجاان وماقادر تدبر امورك لوحدك محتاج وحدة تقيف فيالمطبخ تجهز ليك فطورك والا تغسل ليك ملابس , ابعد فكرة الإرتباط لحد ماتحس انك أصبحت (ناضجا فكريا) وعلى أستعداد تااام لان تصبح ( زوج و أب )

[الملكة اسماء ( ام محمد )]

سيدة في الثلاثين من العمر تحكي لي في ذات مرة عن رغبتها في الإنفصال عن زوجها اب بناتها الثلاث ...

لم يثر الامر دهشتي فكثيرا ما وصل لمسامعي خبر عدم إتفاقهما

ما اثار دهشتي هو السبب ...
قالت لي : تصدقي , انا من قبل أتزوج كنت بلم القروش ومابحب ابعزقها عمال على بطال , حتى ان اخواني الكبار كانوا لما يتنزنقوا بيتدينوا مني , المهم , راجلي جاتو سفرية عمل برا البلد و أضطريت اديهو بطاقة الصراف بتاعتي لانه الفترة الهو مسافر فيها ماكان معاهو مبلغ كبير وكنت خاته في بالي يشتري لي انا والبنات حاجات ما بتتلقي هنا بسهولة

المهم , سافر وجاء راجع , و رجع لي بطاقتي ..

بعدها بيومين مشيت البنك أنزل لي وديعة , سالت ناس البنك اذا ممكن اعرف حسابي , كانت المفاجاءة , حسابي الكان فيهو الااف مالقيت فيهو غير كم من مية ...

طبعا هو ماقصر وجاب لينا الحاجات النحن عايزنها , لكن مستحييييييييييل تكون بالمبالغ الاتصرفت واتسحبت من حسابي , اضطريت اعمل كشف حساب , طبعا بيظهر لي وين سحب قروش , ما بتصدقي ( تلات ارباع القروش اتسحبت في محلات عطروات , ساعات و إكسسوارات نسائية !!!! )

الانا عارفاهو انه ولا شي من المذكور في الحساب جاني او جاء لبناتي ...

( الفار لعب في عبي ) و اضطريت اواجهو ( نكر الموضوع تماما ) , وانا لما واجهتو اتهمته انه اتزوج علي ...

اشتكيت لواحد من قرايبنا بيعرف الزول ده من قبل مااتزوجه , فاجاني بان راجلي ده مجنون هدايا نسوان ومافي بت في الدنيا تعجبه الا يحاول يتعرف عليها ويقدم ليها هدية ...

ختمت السيدة حديثها معي بسؤال ( ياخي بما انه ده محيطك انتي , ليه الاطباء بيقضوا عمر شبابهم قراية وتحضير ماجستير وغيره ويجوا بعد (يشيبوا) يعيشوا فترة المراهقة وعدم المسؤولية ؟؟؟؟:confused:


لم أجبها رغم علمي بالإجابة , فقط دعوة الله ان يهدي زوجها وان تتمكن من انقاذ زواجها القابل للإنهيار

[ود الضو]

زمن مدهش ...

عدد كبير من شباب اليوم تظهر عليهم علامات ( مراهقة متاخرة ) بعد الزواج !!!!!
وعدد اكبر يختار ( أخلاء مسؤلياته التي تحملها باختياره ) في وقت فيه يظن الاهل انه أخيرا أصبح شخص سوي و متزن العاطفة والتفكير

ولكن ...

مايحدث هو انه يبدء في البحث عن (شبابه و مراهقته ) وهو ( رب اسرة ) !!!!


طيب ياخي ماكان عندك فرصة تعيش شبابك و تلف الكون وتباري اصحابك و تستكشف الكون ( على مهل ) قبل ان تقرر الزواج فقط لانك ( مقتدر أقتصاديا ) او لان أهلك شايفين أنك بعد كدا لازم ( تتلمى ليك على مرة و تعمل ليك بيت وتبقى أب لاطفال لا تفقه في شؤون تربيتهم شئً)



هي دعوة عزيزي الشاب لان تعيش ( عمر شبابك ) كاملا قبل ان تسجن نفسك في سجن مسؤوليات (انت مش قدرها)



وقبل كل شي ( تذكر أن دائرة حياة شبابك يجب ان تخلو تماما من الجنس اللطيف ) حيث انها سوف تصبح (رفيقتك في القفص الذهبي) ولباقي العمر الناضج


يعني , رايك شنو تطلع (رحلة) مع أصحابك , وتبرمج معاهم على أساس أنك ( تشغل نفسك ) من فكرة انك زهجاان وماقادر تدبر امورك لوحدك محتاج وحدة تقيف فيالمطبخ تجهز ليك فطورك والا تغسل ليك ملابس , ابعد فكرة الإرتباط لحد ماتحس انك أصبحت (ناضجا فكريا) وعلى أستعداد تااام لان تصبح ( زوج و أب )

...........
أعجبني

[عاشق الترحال]

بوست يعلم الله تحفه
تسلمي كتير ياغالية وفي انتظار المزيد..

[طارق حنينه]

والله نقااااط جميله وكلام موزون وصراحه اعجبني شديد وفي انتظار الجديد....

[الملكة اسماء ( ام محمد )]

...........
أعجبني
اعجبني مرورك اكثر ود الضو

تحياتي

[الملكة اسماء ( ام محمد )]

بوست يعلم الله تحفه
تسلمي كتير ياغالية وفي انتظار المزيد..

الله يسلمك من كل شر ابني العزيز عاشق
تحياتي

[الملكة اسماء ( ام محمد )]

والله نقااااط جميله وكلام موزون وصراحه اعجبني شديد وفي انتظار الجديد....

تسلم كتييير اخي طارق
وانا في انتظار عودتك دائما

تحياتي

[عاطف عولي]

جيت أشوف الجنون جنييييييييييييييييييييييييييييييييييت

[ahmed algam]

رائعة وتاتينا بماهو رائع

ياملكة

[الملكة اسماء ( ام محمد )]

جيت أشوف الجنون جنييييييييييييييييييييييييييييييييييت

مرحب حباب جيتك عمو عاطف

يديك الف عافية

[الملكة اسماء ( ام محمد )]

رائعة وتاتينا بماهو رائع

ياملكة

الاروع مرورك اخي احمد

[mahagoub]

افكار فى الصميم
وتساعد من اراد ان يتغير
لكن عولى بخلى التمباك

[الملكة اسماء ( ام محمد )]

افكار فى الصميم
وتساعد من اراد ان يتغير
لكن عولى بخلى التمباك
ههههههههه
ماااااظن ياعم محجوب

[ابورجاء]

وارد جدا كل الحصل يرجع يعود ويتكرر
لكن ماااااااااااااااااااا مبالغة يا أم محمد

تصدقي افكارك دي في الصميم

تصدقي انا بفكر أقعد افكر طولته من التفكير والله
مافي زمن نفكر جري ومساككه زمن تفكير ببح نهي تم

تصبح عشان تكوس لمن تمسى ولمن تمسي تكوس
عشان تصبح وهكذا وهلمجرا يعن ساقية مدورة
لكن صدقني فقفكرة جميلة الواحد يقعد يفكر شويه
مع انو ما لافي زمن لكن اهو نحاول ..............



ودوما في رعاية الله وحفظه ..
مع كل الود باقة ورد ..

[mahagoub]

وارد جدا كل الحصل يرجع يعود ويتكرر
لكن ماااااااااااااااااااا مبالغة يا أم محمد

تصدقي افكارك دي في الصميم

تصدقي انا بفكر أقعد افكر طولته من التفكير والله
مافي زمن نفكر جري ومساككه زمن تفكير ببح نهي تم

تصبح عشان تكوس لمن تمسى ولمن تمسي تكوس
عشان تصبح وهكذا وهلمجرا يعن ساقية مدورة
لكن صدقني فقفكرة جميلة الواحد يقعد يفكر شويه
مع انو ما لافي زمن لكن اهو نحاول ..............



ودوما في رعاية الله وحفظه ..
مع كل الود باقة ورد ..

بوست رائع
بدأ فى لملمه الحلوين

[ابوالنور]

بوست رائع
بدأ فى لملمه الحلوين

مش كدا بالله يا عمو

[الملكة اسماء ( ام محمد )]

وارد جدا كل الحصل يرجع يعود ويتكرر
لكن ماااااااااااااااااااا مبالغة يا أم محمد

تصدقي افكارك دي في الصميم

تصدقي انا بفكر أقعد افكر طولته من التفكير والله
مافي زمن نفكر جري ومساككه زمن تفكير ببح نهي تم

تصبح عشان تكوس لمن تمسى ولمن تمسي تكوس
عشان تصبح وهكذا وهلمجرا يعن ساقية مدورة
لكن صدقني فقفكرة جميلة الواحد يقعد يفكر شويه
مع انو ما لافي زمن لكن اهو نحاول ..............



ودوما في رعاية الله وحفظه ..
مع كل الود باقة ورد ..

الأجمل من الافكار هنا مرورك الرائع استاذي ابو رجاء

من ناحية الزول بفتش وقت يفكر فيهو دي حاصلة عشان كدا بقيت لما تجي فكرة متاوقة في راسي بتلقى نفسها بقت تحت الاضواء وللمشاورات والبحث كمان

اتمنى عودتك دائما بافكار ائعة ليزدهر المنتدى بك ولاجل أمثالك سيدي

[الملكة اسماء ( ام محمد )]

بوست رائع
بدأ فى لملمه الحلوين

وانت اولهم عمو محجوب

[الملكة اسماء ( ام محمد )]

مش كدا بالله يا عمو
واكيد انت منهم اخي ابو النور

[ام رغد]

لاااااااااايك كبير جدا ام محمد وللاسف دة كلو واقع بنحاول نتعايش معاه بس في النهاية لا يصح الا الصحيح

[الملكة اسماء ( ام محمد )]

لاااااااااايك كبير جدا ام محمد وللاسف دة كلو واقع بنحاول نتعايش معاه بس في النهاية لا يصح الا الصحيح
والاجمل مرورك ياراقية
وماااكثر المشاهد التي تتكرر بذات الكيفية باختلاف الشخوص في كل مكان

[ابورجاء]

الأجمل من الافكار هنا مرورك الرائع استاذي ابو رجاء

من ناحية الزول بفتش وقت يفكر فيهو دي حاصلة عشان كدا بقيت لما تجي فكرة متاوقة في راسي بتلقى نفسها بقت تحت الاضواء وللمشاورات والبحث كمان

اتمنى عودتك دائما بافكار ائعة ليزدهر المنتدى بك ولاجل أمثالك سيدي


23-08-2014 06:04 pm

والله الواحد فكر انو يخجل وما يرد شوفي ردك يوم كم وانا
رادي يوم كم عليك الله ما دعوة للخجل والتفكير الضمني
المستحق انو الواحد يموت من الخجل ويدخل في اضافرينو
ولمن اضافرينو تحرقو يطلع منهم ويدخل في نص هدومي وافتكر
انو دي برضو ما فكرة جميلة لكن نقول شنو اهو محاولة
تفكر وكده يعني وكده ...


تلويشة حبة ككده :
اسفين على التأخي لكن كنا بنفكر ندخل المنتدى تاني والا ما ندخل
لكن قطعنا حبل افكارنا ذاتو ووقفنا التفكير نهائي كده تاني الا الجليل
الكريم يحرمنا من دخول المنتدى لكن لا كهرباء لا موية ما بتمنعنا
حتى لو جيت وكتبت براي وقريت براي برضو ما بغيب تاني عل فكرة
انا ما غايب لكن كنت بعاين بالقى الدار خلا بتخارج لكن تاني نهي تم زندقي
متحكرين هنا لحدي ما نشوف نهايتكم شنو انتو يا ناس مدني تخلوا المنتدى خرابة كده ..



ودوما في رعاية الله وحفظه ..
مع كل الود باقة ورد ...

[وداد محمد]

الفكرة الثانية

فكرة مجنونة شوية


دي حالة كدا من الخيال الغريب

وحدة من البنات بتحكي لي عن فكرة غريبة



قالت : تعرفي ياخالتو زمان كنت معجبة جدا بواحد من رواد الفن السوداني


وكنت بتابع اغنياته بولع منقطع النظير

لما يجيبوه في التلفزيون بكون بفتش في حاجة جواهو ماف زول غيري بشوفها


بسرح بالخيال للحظة البقيف فيها قدام المرايا ويستعد للطلعة


شنو نوع البرفان بتاعو ؟


شنو نوع كريم الشعر البستخدمه ؟


وبمشي لامنية مجنونة وهي لو استطيع ملامسة وجهه وهو نائم بيدي

وبتنهد وبقول بختهم الناس المعاهو في البيت وكل يوم بشوفوه



المهم , انا راودتني نفس الفكرة المجنونة ..يوما ما



والله الفكره دي جاتني كتير كنت بتمني شريك عمر