الدسيس لسه خطاكا تسري فينا تقاسيم جميله

[مرتضى يوسف العركي]

شفتك وابتهجت وين يا غالي انت
نحن الزمن شقانا وانت زي ما انت
وين وين وين وين بالله انت؟
سيدي أين انت يا فاكهة هذا المنتدى اما آن الآوان بعد لتعود
فقد اشتقنا حقيقة لبوستاتك الرائعة الجميلة
وروحك الصفية اللذيذة
بعفويتك المعهودة وجراة ما منظور مثيلها
نكهة خاصة وطعم مميز ادمناه وعشقناه
والله شوقنا ليها طول ولسع معانا اكثر من الود والطيب عمر الدوش
رائعنا عباس الدسيس
لسه خطاكا تسري فينا تقاسيم جميله واعلم بانك
انت زي ما انت قبل سنين طويله
بخطاباتك المرسوم
فيها قلوب واسهم مخترقة حبيبة ومعطرة
معتقة بايام خوالي جميلة
قبل ان يقبقوك اخوان الحبيبة
ويقبضوك بالثابتة ووالله تقيلة
واحتمائك بسيد الدكان بلا حيلة
ارجع لينا وشيل مننا
مر الليالي خلي عيونا كحيله
مرحب بي ربيعنا الليهو زمن جفانا
واهلا نور عيونا السابنا بعد سبانا
اها وكيف ناوي تعمل في قلوبنا وحنانا؟
بعد ما جيت لقيتنا حافظين الأمانه
فهلا ؟؟؟؟؟

[ياسر عمر الامين]

تعرف حبيبنا عركى ومن الصدف الغريبة انى اتصلت امس باحد الكتاب المجيدين فى المنتدى وخطر على بالى هذا الدسيس...تعجبنى طريقته الساخره فى الكتابه حتى لو على نفسه...وملكته العالية فى التحليل خاصة فى الشأن السياسى...هو قلم كبير وكاتب عميق نفتقده بشدة...نتمنى أن يطل علينا ويفرح ليالينا...ولك وله كل الود استاذى الحبيب مرتضى.

[عباس الدسيس]

عركي يا صديق سلام وتحية
كما قال الدفعة حاتم فتحي انت زول اديب وكتاب وأنا ما بقدر اجاريك
شغلنا في المنابر ناس ضربو رما....
ذكرتني يا عركي بمناسبة ضربو رما امس مساهر مع كاس العالم لسن 20 نساء
شغال في الجزيرة الرياضية مبارة بين هولند ونجيريا انتهت بفوز نيجيري 1/4
البسمع بي النتيجة اقول فريق نجيريا للنساء لعابات
ياخ ديل جابو ليهم نسوان ولدي قاعد جمبي سألني يا بابا دا Match نسوان ورجال
بي حلاقتنا نمرة اتنين الواحد لو قارن مع النجيريات اكون خنفس
الواحده تعاين ليها عضلاتها زي البامبيه
الافريقيات لمن ليك في نسوان هولندا تطقش بالكتف ارمو الواحده علي خشمها
بداية المبارة واحده عايزة تتفولح انفرت بي القون طلعت ليها حارسة المرمي اصطدمت معاها بعد ما رمتها ادردقت عترت للحكمه رمتها وهي قامت تترب زي الكديسه ما اشوف ليك كان بتاعت Line woman تنادي في ناس الاسعاف.
الحكمه قامت كملت المبارة اما اللاعبه الهولنديه طلعت بي كرعينا وابت تستمر وقعدت تبكي
نجيريه انفردت بي المرمي من دائرة السنتر وسكتها ليك هولندية في نص المشوار وقفت ونفضت يديها لي فوق في تعبير زهجت وفترت.
في لقطه كابتنت الفريق الهولندي بتعاتب واحده ليه ما قلعت الكوره وهي قدامها لو في ترجمة علي الشريط كان تلقي الرد (( يا زوله انتي عويره ديل ما حريم مودياني للتهلكه مالك)) الهولنديات وقت الكوره انتهت قعدو انططو أنا قلته يا ربي النتيجه بالقلبه تاريهو بنططو اتفكو من شبكت ناس ضربو رما
عندهم واحده اسمها صن دي بالله رشيدي يكيني اول مرة اشوف لي نسوان بدون ملامح انسويه.
غيابنا يا عركي ضغوط الحياة هل تصدق سنة 2014 وقع لينا مع رمضان عيد رمضان والمدارس وايجار الشقه وكمان جاي معاهم عيد الضحية ... خليها علي الله يا حبيبنا
برجع ليك يا عركي
يا جماعه انتو رضا وين

[عباس الدسيس]

تعرف حبيبنا عركى ومن الصدف الغريبة انى اتصلت امس باحد الكتاب المجيدين فى المنتدى وخطر على بالى هذا الدسيس...تعجبنى طريقته الساخره فى الكتابه حتى لو على نفسه...وملكته العالية فى التحليل خاصة فى الشأن السياسى...هو قلم كبير وكاتب عميق نفتقده بشدة...نتمنى أن يطل علينا ويفرح ليالينا...ولك وله كل الود استاذى الحبيب مرتضى.

ياسر سلام يا حبيبنا
أهو طلينا عليك ببركات شيخ عركي
ومناجايك الجميله
تعرف يا حبيبنا الامور اتلخبطتت علينا مع مشاغل الحياة والميديا الجديدة وتعدد وسائل الاتصال لخبتتنا
زمان البت لما تكون طالعه مشوار شعرها بكون ممشط وتخت ليها كحل في عيونها وتمشي
حسي ...
كريم شعر ...كريم وجه ...كريم ايد ... كريم رجلين ... كحل بي الالوان
ماسكارا ....رموش صناعيه ...بودره سائله ....كريم اساس ...روج و ملمع
و مثبت...و مقوي...ومكبر شفايف ......... وعييييييييييييك
أها بقت علينا إحنا شي واتساب وكمان فيس جارو تويتر اضافة لي فايبر ولاين والقائمة تتطول
غير ايميلات الشركة...
مشتاقين ليكم والله يا حبيبنا ياسر وشايف المنبر بدأ اذدهر تاني بالتوفيق

[أبوعمرو]

حباب الدسيس .. حباب عباس
بالله أردمنا بعاميتنا السمحة

[ahmed algam]

اهلا بالحبيب
عباس الدسيس

فارس فرسان هذا المنتدي

شكرا سعاتوا مرتضي العركي
ا

[mahagoub]

دائماً لذيذ وممتع
تانى ما تحرمنا منك
وشكراً مرتضى والمتداخلين

تخريمه
ما قلت لى بتجى الساعه كم
وفى اى قناة

[عبدالله محمد العقاد]

التحية لك ابويوسف ولكل الاحباب
قبل كم يوم ام العيال سالتني سؤال مباغت و قالت لي هل حصل اكلت ( نيفه ) هههههههههه ، في الاول اترعبت من السؤال و ظنيت انها بتتوحم و قلت دي هسع اجيبوا ليها نيفه من وين ... و في ذلكم السرحان تذكرت الوجيه الدسيس و حكاويه الظريفه عن النيافه و كيف انه كان عنده ماعون في شكل معلقة طويلة و هذه المعلقة الطويلة تمتد حتى اخر الحفرة اللي بيسوا فيها النيفه ...
تعرف يا ابويوسف الحكاوي ياها الحكاوي لكن تفرق ما بين طريقة القائها و ترتيبها و جمال التنقل في تفاصيلها فالوجيه الدسيس يمتلك هذه الملكات و بطريقة حكيه المتميزه ترسخ الحكاية و تبقى شريط ينعاد لاجمل اللحظات ...
يعطيكم العافية اجمعين ....

[عاطف عولي]

نظره يا أبو هاشم

[حاتم مرزوق]

تحية كبيرة للدفعة عباس الشريف

يعني لازم عركي يجيبك بقصيدة

منور الملعب الأخضر وسعداء بهذا الحضور الجميل

كتر لينا من الكسرات يا ركس

[عباس الدسيس]

حباب الدسيس .. حباب عباس
بالله أردمنا بعاميتنا السمحة

ابو عمرو سلام يا حبيبنا
مشتاقون
رغم انو الواحد ليهو اكثر من 14 سنة في البلد هنا حكاية اللهجة السعودية اصلو ما وقعت لي
لما اضطر للتعامل معهم اما اتحدث لغة عربية فصحي او انجليزي واللغة العربية تشوفا عواره عواره (( هل انت ذاهب الي البطحاء أم سوف تتنتظر هنا)) حاجة صعبه وخاصة كلمة ((هذا عندهم)).
مرة كنت مع رئيس مجلس ادارة شركتنا في موضوع ولقيت معاهو زول صاحبو من الراسماليه الظاهر كلمو عني وحكاوي السودانيين كان عايز ليهو بداية موضوع معاي الراجل انشغل مننا بالتلفون وصاحبو سألني عن موقع مكاتب صندوق النقد السعودي ؟؟؟
قلت ليهو تمشي بي هنا طوالي تلقي ليك طرمبة بنزين بعدها تخش يمين تلقاهو!!!
الراجل اندهش ....
رئيس مجلس الادارة سألو مالك مع الزول؟؟
الراجل رد : سألتو مافهمت شيء!!!
رئيس مجلس الادارة ضحك وقال ليهو كان عايز تتونس مع عباس لازم اترجم ليك أنا.. تصدق السعوديين المحتك بيهم بتكلمو معاي سوداني
ياخ عاميتنا حلوة
تحياتي وتقدير

[ساريه]

البوست دا انا بخش اقرأ وبس ولانو مافى ما يثبت انى دخلتا هنا بسجل حضور وبكتب اسمى
الدسيس قلم لاصحاب العقول الراقية ..
جد والله ..
قاعده ومتابعه ..

[عاطف عولي]

نظره يا أبو هاشم


نظره يا أبو هاشم

[عباس الدسيس]

اهلا بالحبيب
عباس الدسيس

فارس فرسان هذا المنتدي

شكرا سعاتوا مرتضي العركي
ا


احمد سلام يا حبيبنا ...اخبارك
شكرا ليك كثير بحكاية فارس بس يا خوي مالك عايز تلحقني خدوري بعد شوية اقول ليك أنا رجلي قادر ارفعهم عشان اركب الحصان حكاية فارس والحصين بتذكرني قصة عركي:
وقت كانو يا دوبك متخرجين من الكلية ضباط من القصطيرة ((عركي ما تزعل مني براك هابشتني وجبتني )) ناس عركي وزعوهم في السواري معاهو واحد من اولاد مدني إركبو الحصين وإلفو بالليل إراقبو العساكر الضابط صاحبو معذوم بارتي ((حفلة )) في الدرجة مع الجكس النضيف قال لي عركي يا حبيبنا الحصين ديل نوديهم وين والكاكي نعمل ليهو شنو ؟؟؟
عركي ابو الافكار لقي ليهو الحل الحصين إمسكوهم لي الشحادين في جامعة الحكومة ((غايتو دي بالغت فيها يا عركي)) اغيرو الهدوم في حوش جامع الحكومة وامشو بي عربية النجدة.
عركي شايل ليهو فتيل ريحة معاهو نسيت اقول ((الحصان لما تكون راكبو عندو ريحة كريهه بتلصق فيك اسبوع ما تطلع منك)) جماعتنا قعدو مع الجكس النضيف للونسة بعد شوية كل واحدة مسكت نخرتها (( اجي وب علي يا فلانه الريحه دي شنو)) عركي اتقلب بي جيمع الونسات عشان إزوغ ونسة الريحه العفنه ما لقي طريقه غير الانسحاب التكتيكي.
زي واحد صاحبنا في بينشات جامعة الخرطوم رافع رجلو فوق ومتكل بي كوعو عليها إونس في البنات وهاك يا ضحك الجكس ميت من الضحك وصاحبنا مبسوط مليون قيراط بي ضحك البلوم لقي الجو.
فجأة جاء واحد ماري بيهو شاف المنظر وقف جمبو ودنقر علي اضانو قال ليهو يا فلان انت قايل الجكس بضحك من ونستك نزل رجلك وارفع بنطلونك ياخ انت قاعد عريان بي وراء البتاع دا ناصل.
تحياتي احمد

[عباس الدسيس]

دائماً لذيذ وممتع
تانى ما تحرمنا منك
وشكراً مرتضى والمتداخلين

تخريمه
ما قلت لى بتجى الساعه كم
وفى اى قناة

محجوب يا حبيبنا سلام وتحية
كاس العالم لتحت العشرين للبلوم شغال في beIN SPORTS القناة 9 الخميس المانيا وفرنسا بعد الساعة 11 ليلا
يا خوي ما تبقي عليك حكاية ادروب المشي اتفرج في منافسات السباحة للجنس الاخر بعد انتهت المنافسات ادروب مشي حوض السباح اشرب منو مويه الجماعه دا شنو يا ادروب؟؟؟
قال ليهم : شوربه ما نشرب

[عباس الدسيس]

التحية لك ابويوسف ولكل الاحباب
قبل كم يوم ام العيال سالتني سؤال مباغت و قالت لي هل حصل اكلت ( نيفه ) هههههههههه ، في الاول اترعبت من السؤال و ظنيت انها بتتوحم و قلت دي هسع اجيبوا ليها نيفه من وين ... و في ذلكم السرحان تذكرت الوجيه الدسيس و حكاويه الظريفه عن النيافه و كيف انه كان عنده ماعون في شكل معلقة طويلة و هذه المعلقة الطويلة تمتد حتى اخر الحفرة اللي بيسوا فيها النيفه ...
تعرف يا ابويوسف الحكاوي ياها الحكاوي لكن تفرق ما بين طريقة القائها و ترتيبها و جمال التنقل في تفاصيلها فالوجيه الدسيس يمتلك هذه الملكات و بطريقة حكيه المتميزه ترسخ الحكاية و تبقى شريط ينعاد لاجمل اللحظات ...
يعطيكم العافية اجمعين ....


عقاد سلام يا شبيهي ونديدي
غايتو الجماعه لو شافو المفترع دا اقولو عباس بلعب ون تو براهو
كنت بونس في البت الصغيره بي القدوقدو في البيت بوصفو ليها شكلو دائري فوق ((مدردم)) وبعملو فيهو دقيق ومصنوع من الدخن الكلام كلو ما دخل عقلها شلته ورقه ورسمت ليها شكل القدوقدو قالت لي يا بابا تاعب نفسك مالك ما تقول لي الشكل زي اسكريم كون زون.
ام العيال الله اخليها ليك تعرف اول ما النت بقي مشاع جبت ليك كمبيوتر في البيت واشتراك كان بالبطاقات توصل معاهو التلفون قبل عشرة سنوات اخوك بتاع تهبش بالصدفه لقيت لي اعلان في احدي الصحف الالكترونيه عن موقع زواج قلته نجرب ساكت اسجل فيهو عبيت بيانات كلها عباس الشريف والعمر والشغل وين والايميل وعملت ليها ارسال جاتني رسالة عشان نفعل اشتراكك ادفع لينا قروش بالدولار قلت يا خ انسي الناس ديل قروش شنو البدفعها ليهم ونسيت الموضوع.
لا حولاااااااااا لقيت ليك الناس ديل عبيطين بصورة شابكني ليك بي رسائل اتوماتيكيه من الموقع:
يا عباس في انتظارك لسداد الاشتراك العروس جاهزة سوف نمدك بي معلوماتها حال دفع الاشتراك.
في اليوم ما لا يقل عن عشرة رسائل واشيل وامسح لي التعترني نسيت يوم الايميل فاتح تقوم ام العيال تلقا ليك الرسائل.
ياخ لو ما الله ستر كان طلقوني... ما خليت كضبه في الدنيا ما جبتها الله انعل ابو النت غايتو انا اكثر زول عمل لي مشاكل
تحياتي يا عقاد

[عباس الدسيس]

نظره يا أبو هاشم



نظره يا أبو هاشم

عولي سلام يا حبيبنا
كرهتني لعب البلي قلته احصلك بي سرعة ما تنزل لي الثالث
يا خوي شنو لابت كده السماية متين؟؟؟
بيان بالعمل .. في جماعه قالو عولي عجز وجلكن الف مبروك مرة تانية الولد
مفترع حاتم عن العربات القديمة والكوامر كيفني في حناني
خلاني اضحك زي المجنون ومنتظر دخلتك
عولي يا صديق لو عملت لينا مفترع يوثق لي فترة كنت ضابط في البحرية والزمن داك عشان الاجيال الحسي معانا هنا تعرف كفاح ونضال عمهم عولي
شايفك لما خلاس زهجت من حاتم قلت ليهو انت يا زول دفعتي .... عولي انت الذ زول ياخ لو قصة عزالعرب صالحه للنشر كانت نشرتها
ما تزوغ من السماية اعمل لينا استراحه
تحياتي وتقديري

[عباس الدسيس]

تحية كبيرة للدفعة عباس الشريف

يعني لازم عركي يجيبك بقصيدة

منور الملعب الأخضر وسعداء بهذا الحضور الجميل

كتر لينا من الكسرات يا ركس
سلام يا دفعه اخبارك
كنت بحضر لي في مفترع حسب وعدي معاك والفكرة ما خمرت في راسي لقيت عركي فتح لي الباب
مجهوداتك اثمرت في حراك المنبر
اديك كسره تخص عم عولي:
عبدالرحمن السر لعب معانا في النيل مدني وبحكي لي عن عولي ايام الدراسة...
استاذ اللغة العربية ايام البلاغة والجناس والطباق وحاجات البلاغة الكثيرة ديك خت ليهم جملة وقال ليهم امشي واجي كملوها لي.
كان معاهم ولد وجيه من اولاد الجزيرة في الفصل عولي مصاحبو وانت عولي عارفو خليهو حمدو في بطنو.
الاستاذ لما جاء سال الجماعه عملو شنو قام عبدالرحمن السر شايل كراسو وقال:
كسي الله عزو بالاسم والجسم والشكل
وكسي عولي بالانف والعظم
هيهات شبيها بين عزو وعولي غير العين.
كسره تانية:
المدرسه كانت قديما مقابر والكراكات جات تعمل تسوية للارض طلعت عظام الميتين
عبدالرحمن السر شايل ليهو ساق ويد وجمجمة ميت الظاهر عايز ادفن العظام
استاذ ازهري قبضو شايل العظام في يدو سألو يا عبدالرحمن بتعمل في شنو ؟؟؟
قال ليهو بفتش في اسبيرات لي عاطف عولي.
ياخ عندو حكايات عند عصمت الدسيس عن جامعة الجزيرة الزول عايز ليها مجلد كامل عشان اكملها لو الوقت اداني طريقه برشك بيها.
تحياتي وتقديري

[الملكة اسماء ( ام محمد )]

في منتدى ودمدني كتاب .. وأدباء .. وشعرا .. وناس بتشعل الساحة بروعة الحضور


تلك كانت شخصيات شدت انتباهي بروعة السرد



أستاذي .. الدسيس

سأخبرك سرآ ... لطالما كنت ولا أزال من معجبي حضورك وحروفك

فكن بخير .
وكن وطن لنا يرتسم عبر الحروف

[عاطف عولي]

عولي سلام يا حبيبنا

ما تزوغ من السماية اعمل لينا استراحه
تحياتي وتقديري

السماية كانت بي شنتا ورنتا في السودان في حوش ابوي الما خمج

ومن الحضور الجميل ليها وشرفنا هناك ابو الجيلي والخواض محمد احمد و حافظ شعبان وابنه محمد حافظ والمديح عصري من العركيه والمكاشفيه

[عاطف عولي]

سلام يا دفعه اخبارك
كنت بحضر لي في مفترع حسب وعدي معاك والفكرة ما خمرت في راسي لقيت عركي فتح لي الباب
مجهوداتك اثمرت في حراك المنبر
اديك كسره تخص عم عولي:
عبدالرحمن السر لعب معانا في النيل مدني وبحكي لي عن عولي ايام الدراسة...
استاذ اللغة العربية ايام البلاغة والجناس والطباق وحاجات البلاغة الكثيرة ديك خت ليهم جملة وقال ليهم امشي واجي كملوها لي.
كان معاهم ولد وجيه من اولاد الجزيرة في الفصل عولي مصاحبو وانت عولي عارفو خليهو حمدو في بطنو.
الاستاذ لما جاء سال الجماعه عملو شنو قام عبدالرحمن السر شايل كراسو وقال:
كسي الله عزو بالاسم والجسم والشكل
وكسي عولي بالانف والعظم
هيهات شبيها بين عزو وعولي غير العين.
كسره تانية:
المدرسه كانت قديما مقابر والكراكات جات تعمل تسوية للارض طلعت عظام الميتين
عبدالرحمن السر شايل ليهو ساق ويد وجمجمة ميت الظاهر عايز ادفن العظام
استاذ ازهري قبضو شايل العظام في يدو سألو يا عبدالرحمن بتعمل في شنو ؟؟؟
قال ليهو بفتش في اسبيرات لي عاطف عولي.
ياخ عندو حكايات عند عصمت الدسيس عن جامعة الجزيرة الزول عايز ليها مجلد كامل عشان اكملها لو الوقت اداني طريقه برشك بيها.
تحياتي وتقديري

وكل زول يتحمل نتيجة قناعاته يا دسيس مش كدي؟

هههههههههههههههههه

بجيك لي محن ود السر عبدالرحمن المسخوت

[عباس الدسيس]

البوست دا انا بخش اقرأ وبس ولانو مافى ما يثبت انى دخلتا هنا بسجل حضور وبكتب اسمى
الدسيس قلم لاصحاب العقول الراقية ..
جد والله ..
قاعده ومتابعه ..

سلام استاذة سارية
غاية السعادة بمتايعتك
كلماتك الجميلة تعبر عن روعتكم
نتمني ان نكون دائما عند حسن ظنكم
فائق التقدير والاحترام

[عباس الدسيس]

في منتدى ودمدني كتاب .. وأدباء .. وشعرا .. وناس بتشعل الساحة بروعة الحضور


تلك كانت شخصيات شدت انتباهي بروعة السرد



أستاذي .. الدسيس

سأخبرك سرآ ... لطالما كنت ولا أزال من معجبي حضورك وحروفك

فكن بخير .
وكن وطن لنا يرتسم عبر الحروف

مليون مراحب استاذة الملكة
حقيقه انتي وطن الكتابة بما يسطره قلمك في المفترعات (( جميلة المفترعات))
وتواجدك انعاش لروح المنبر ومواضيعكم الهادفه تستحق المتابعه
تحياتي وتقديري

[روبش]

هؤلاء هم ابناء هذه المدينة الجميلة
يتفقدون دوما عن بعض وتجدهم في الحال
شكرا عركي شكر الدسيس
نتعلم كل مره منكم معنى للانسانية والاخاء الصادق
نتعشم في تواجدكم فبكم يزيد المكان روعه على روعته

[مرتضى يوسف العركي]

احمد سلام يا حبيبنا ...اخبارك
شكرا ليك كثير بحكاية فارس بس يا خوي مالك عايز تلحقني خدوري بعد شوية اقول ليك أنا رجلي قادر ارفعهم عشان اركب الحصان حكاية فارس والحصين بتذكرني قصة عركي:
وقت كانو يا دوبك متخرجين من الكلية ضباط من القصطيرة ((عركي ما تزعل مني براك هابشتني وجبتني )) ناس عركي وزعوهم في السواري معاهو واحد من اولاد مدني إركبو الحصين وإلفو بالليل إراقبو العساكر الضابط صاحبو معذوم بارتي ((حفلة )) في الدرجة مع الجكس النضيف قال لي عركي يا حبيبنا الحصين ديل نوديهم وين والكاكي نعمل ليهو شنو ؟؟؟
عركي ابو الافكار لقي ليهو الحل الحصين إمسكوهم لي الشحادين في جامعة الحكومة ((غايتو دي بالغت فيها يا عركي)) اغيرو الهدوم في حوش جامع الحكومة وامشو بي عربية النجدة.
عركي شايل ليهو فتيل ريحة معاهو نسيت اقول ((الحصان لما تكون راكبو عندو ريحة كريهه بتلصق فيك اسبوع ما تطلع منك)) جماعتنا قعدو مع الجكس النضيف للونسة بعد شوية كل واحدة مسكت نخرتها (( اجي وب علي يا فلانه الريحه دي شنو)) عركي اتقلب بي جيمع الونسات عشان إزوغ ونسة الريحه العفنه ما لقي طريقه غير الانسحاب التكتيكي.
زي واحد صاحبنا في بينشات جامعة الخرطوم رافع رجلو فوق ومتكل بي كوعو عليها إونس في البنات وهاك يا ضحك الجكس ميت من الضحك وصاحبنا مبسوط مليون قيراط بي ضحك البلوم لقي الجو.
فجأة جاء واحد ماري بيهو شاف المنظر وقف جمبو ودنقر علي اضانو قال ليهو يا فلان انت قايل الجكس بضحك من ونستك نزل رجلك وارفع بنطلونك ياخ انت قاعد عريان بي وراء البتاع دا ناصل.
تحياتي احمد

يا دسيس يا لذيذ المهابشة سمحة
بس ما تبقى فيني لوحدي
عليك الله الهندي عمل فيك شنو وانت عملت فيهو شنو قبل ما اجيب درديري كباشي افتو فت
دايرنها طوعا ورضا بدواخلك المرحة وحكايات كثيرة مرحة
تعال سريع بطل التفكير التفاكير الكثيرة بتجيب الجن على لسان تعلمجينا الملازم اول سلمة طيب الله ثراه

[عباس الدسيس]

هؤلاء هم ابناء هذه المدينة الجميلة
يتفقدون دوما عن بعض وتجدهم في الحال
شكرا عركي شكر الدسيس
نتعلم كل مره منكم معنى للانسانية والاخاء الصادق
نتعشم في تواجدكم فبكم يزيد المكان روعه على روعته

روبش سلام يا وجيه
مشتاقون والله
من الحفلة ديك وعيك
لو لقينا لينا ربه في السودان تفكفك وجع الضهر ما بطاله
تحياتي يا حبينا

[عباس الدسيس]

يا دسيس يا لذيذ المهابشة سمحة
بس ما تبقى فيني لوحدي
عليك الله الهندي عمل فيك شنو وانت عملت فيهو شنو قبل ما اجيب درديري كباشي افتو فت
دايرنها طوعا ورضا بدواخلك المرحة وحكايات كثيرة مرحة
تعال سريع بطل التفكير التفاكير الكثيرة بتجيب الجن على لسان تعلمجينا الملازم اول سلمة طيب الله ثراه

عركي انت بتمشي وين فجأة تضيع من المنبر وتظهر لحظات خليك مع الزمن يا ريس.
انسخها ليك كما حكاها الراوي الدرديري كباشي في سودانيز اون لاين

الاخ الصديق عباس الدسيس جمعتنا صداقة ارضية قبل الاسفيرية بعشرة سنوات

كنا قبل عشرة سنوات تقريبا نعمل في شركة مقاولات كان عباس يشغل منصب المدير الاداري وشئون الافراد
له نوادر ومواقف عملية تحير في هذا المنصب واسلوب للمعالجات انا شخصيا لم أالفه في مكان او عند شخص
ساتناول في هذه السهرة ان جازت التسمية بعضا من هذه المواقف

من ضمن تلك المواقف كان هنالك مهندس هندي هندوسي متلح عباس بالشكوى للمدير العام وصاحب الشركة

يعني مثلا يقابله المدير العام في المكاتب ويسأله ( ليش ياكومار ما رحت الموقع )

يرد ( عباس ما في يعطي سيارة )

وطبعا عباس يتلقى الدش اياه ( ايش لون ما تعطيه سيارة وانا ادفع رواتب مقابل اييه .. عباس يحاول الرد بان سيارته بالورشة .
ليش ما أجرت له سيارة ؟؟ ترى انت تخسرنا بالطريقة هادي ..

عباس ياكل الدش بينما كومار يتبسم مستمتعا بغليان عباس غيظا ..وعباس يسرها في نفسه بل قل يصرها في بقجة .
مرة ثانية كومار ليش ما رحت الموقع ..

تعبان انا شوية ..

طيب ليش ما رحت المستشفى

عباس ما في يعطي تأمين ..

ويتكرر الدش اياه

ويتراكم غيظ عباس مع ترصد الهندي والذي يهز رأسه الهزة اياها طربا وسرورا
في العادة ان مهندسي المواقع الذين تحصل لهم ظروف تمنعهم من الذهاب للموقع لايظهرون في المكاتب امام صاحب العمل .. اما يتصرف الواحد بالذهاب بليموزين في حال عطل سيارته او يركب مع زميل آخر الا ان يحل اشكاله الا انه كومار يبدو انه استمرأ الحكاية واستمتع بالدشوش التي يسببها لعباس ... كما ان صاحب العمل اصبح يعتبر شكوة عباس ضد كومار في اي شئ هي شكوى كيدية انتقامية ..
الا انه احد المهندسين الفسطيين قدم لعباس مشورة بنت لذين ... انا خمنتها منهم لانه نحن طبيعتنا كسودانيين ليس فيها نوع هذا التفكير من الكيديات ..
اذ نصح عباس بأن يعد له ملفا يجمع بها كل اخطائه وخسائره التي يسببها للشركة وتعاون معه مدير المشاريع واعدوا له ملفا اسودا كفيل بقيادة الهندي الى لاهاي فضلا عن الهند ..
جمع الحوادث المرورية فواتير الصيانة فواتير المستشفيات .. الغلطات الفنية في المواقع ..تضخم الفايل وتم رفعه للمدير العام والذي اقتنع تماما انه الهندي كومار لا جدوى من بقائه في الشركة ويجب تسفيره فورا ..
كان يمكن ان تنتهي القصة هنا لولا ان السكرتارية الهنود الذين يعملون مع عباس سربوا الخير لكومار والذي تصرف بسرعة وانقذ الموقف ..
عندما علم كومار بأن كرته قد تم حرقه تماما وانه عباش انتصر فكر في طريقة يحيي بها فرصه في البقاء ويبدوا انها نصيحة من خبير اسيوي .. لانه جرى مسرعا لصاحب العمل وقال له انه اقتنع بالاسلام وقرر ان يسلم ... وهذه الجملة كفيلة بتغيير راي اي سعودي او اي مسلم مائة وثمانين درجة ... سعد صاحب العمل بهذا الخبر واتصل بعباس وطلب منه ان يلغي الخروج النهائي لكومار بل طلب منه ان يعد له خطابات للجهات الرسمية ليشرعوا في اجراءات تغيير الديانة ..
عباس تحجج بأن كومار مستهبل وان الهندوس متعصبين بل يكرهوا الاسلام والمسلمين الفلبينيبين يمكن يسلموا لكن يستحيل ان يسلم هندوسي ... فقال رب العمل نحن علينا بالظاهر وتعامل عباس مكرها مرة اخرى بل اجبر ان يعمل لصالح كوما بأن يعد له الخطابات .. ولكن اسرها عباس في نفسه وقرر ان يزرع لقما لكومار يؤدبه به ..
كومار كان يمشي خلف عباس طربا يتراقص ويهز في راسه ويحكي لاصدقائه كيف استطاع بذكائه ان ينتصر ويجعل عباس يعمل في خدمته مرة ثانية غصبا عنه .
اعد عباس الخطاب لهيئة الامر بالمعروف .. بأن مكفولانا كومار الفلاني قد نوى الدخول في الاسلام نرجو اجراء اللازم حتى يتم تغيير اقامته الى مسلم .

ولكن عباس لم ينسى اللقم اذا اضاف من عنده في آخر الخطاب عبارة من عنده وهي ..

( كما نرجو ختانه)
أخذ كومار الخطاب مزهوا فخورا بنصره ولانه بالطبع لا يعرف يقرا عربي ولا يعرف احد يعرف يقرأ عربي اخذ الخطاب كما هو وذهب به الى الجهة المعنية بالامر والذين امروه بالحضور يوم الثلاثاء لتكملة الاجراءات .. عاد كومار والابتسامة لا تفارق محياه يشرح لاقرانه كيف جرت اجراءات اسلمته بسلاسة وهو لا يدري انها بثلاثة ..
تغيير الاسم وتغيير الاقامة وحاجات اخرى غنية عن التعريف .
في يوم الثلاثاء استعد كومار وتعطر ولم ينسى ان يغشى اصدقائه بمكتب عباس ويقول لهم انه اليوم ذاهب لليوم الموعود ضحك وهز رأسه كثيرا وهو يكاد يقول اياك اعني يا جاره ...
وفي المقر الرسمي شاهد حافلة تقف امام المبنى وبها عدد من الفلبينيين لم يكترث لهم الا ان المسؤل امره ان يركب في الحافلة مع الراكبين ..

توجهت بهم الحافلة الى احد المستوصفات وهو تبع الركب حتى الان لا يدري الاما يساق وفي المستوصف طلبوا منهم الجلوس في كنبة وانتظار نداء الاسم واحدا تلو الآخر ..
وهو لم يكترث لكن فجأة لاحظ ان من سبقه من الفلبيين يدخل ويخرج بمشية مختلفة قتله الفضول وسأل من يجاوره ماذا يجري هنا ..
رد له الفلبيني :
- صديق انت مافي معلوم انت ليش يجي هنا .. هنا في : كذا كذا كذا على طوووووول ..
كومار وقف مزهلالا وخرج من المستوصف يجري حتى وصل الشركة بنفس لاهث وصعد الى الدور الثاني حيث يوجد مكتب المدير العام ..
كان يجلس مع المدير العام شقيقه الاكبر وشريكه وعندما حكى لهم مقلب عباس وهو يكاد يزبد من الغضب لم يملك الاخوين انفسهم من الانفجار في ضحك هستيري ..
بعدما هدأ الاخوين من ضحكهما تصنع المدير العام الجدية واتصل بعباس في مكتبه ..
عباس تعال لعندي فوق لو سمحت ..
عندما دخل عباس عندهما ووجد كومار واقف عرف ان المقلب انكشف قبل تفجير اللغم ..
لكن لاحظ ان الاخوين كل واحد فيها يعضي طرف الشماغ باسنانه حتى لا يضحك وتروح هيبتهما وهما يتظاهران بانهما بصدد توبيخ عباس ..
فقال له المدير العام : يا عباس الرجال نقول لك يبي يدخل الاسلام اتبع الاجراءات الرسمية .. تكتب لهم انت كما نرجو ختانه .. ايش دخلك انت بختانه ..
يرد عباس : يا شيخ ما قلنا عشان ينضف مرة واحدة ..

لم يتمالك الاثنان انفسهما من الضحك بصوت هذه المره ..

رح يا شيخ والله انك ملعون ..

[ود الجعلي]

نتابع هذه المحاورات والذكريات بين الاخلاء بشغف وحضور

ودعواتنا ان يكون هذا الود والوصل دوما وابدا"

[ياسر عمر الامين]

متابعة بشغف وابتسامات عريضات...ربنا يديك العافية اساذنا عباس الدسيس...

[النور محمد يوسف]

ابو يوسف كتر خيرك قلعت لينا هذا الكنز الدسيس ...اعجبت والله بالمدخل للبوست وبالمتداخلين وبرد الاخ عباس الجميل على المداخلات فيزيد البوست القا بعد الق وضحكت من الاعماك وسررت لهذه العامية العميقة المتحكرة في قلب مدينتنا مدني فتدخل المعلومة بكل سهولة وزي ما بنقول طااااازجة ما فيها اي "عواااارة" يعني "هذا وتلك ....الخ" بارك الله فيك اخي عباس الدسيس وعاوزنك تفتو عن ابي يوسف زي ما فتاهو عنك ...تحياتي دسيس تحياتي عركي والمتداخلين

[عباس الدسيس]

نتابع هذه المحاورات والذكريات بين الاخلاء بشغف وحضور

ودعواتنا ان يكون هذا الود والوصل دوما وابدا"

ود الجعلي سلام يا حبيبنا
سعيد جدا بالمتابعة
تحياتي وتقديري

[عباس الدسيس]

متابعة بشغف وابتسامات عريضات...ربنا يديك العافية اساذنا عباس الدسيس...

حبيبنا ياسر
سلام وتحية
العافية والصحة انشاءالله ما تفارقك
تحياتي وتقديري

[عباس الدسيس]

ابو يوسف كتر خيرك قلعت لينا هذا الكنز الدسيس ...اعجبت والله بالمدخل للبوست وبالمتداخلين وبرد الاخ عباس الجميل على المداخلات فيزيد البوست القا بعد الق وضحكت من الاعماك وسررت لهذه العامية العميقة المتحكرة في قلب مدينتنا مدني فتدخل المعلومة بكل سهولة وزي ما بنقول طااااازجة ما فيها اي "عواااارة" يعني "هذا وتلك ....الخ" بارك الله فيك اخي عباس الدسيس وعاوزنك تفتو عن ابي يوسف زي ما فتاهو عنك ...تحياتي دسيس تحياتي عركي والمتداخلين
حبيبنا النور
سلام وتحية
وجودك في حد ذاتو الق
ومتابعة للمفترع من ناس زيكم بتدي دفعة للتواصل الاسفيري
تحياتي وتقديري