ذكريات طفولتنا . المشاكسة

[الملكة اسماء ( ام محمد )]

خالدة فينا هي ذكريات الطفولة

خاصة تلك التي تتضح فيها معالم .. شقاوتنا ...ويزداد فيها معدل المشاكسة

عن نفسي ..اعترف ..
تعبت امي تعب ...ربنا يغفر لي بس

[الملكة اسماء ( ام محمد )]

لما كنت صغيرة








حتى وقت قريب وانا اعترض على هذه العبارة*
لمن كنت صغيرة








ويمكن السبب اننا نحن النسوان بنحب نصغر روحنا كل مانكبر شوية*








اها بعد ماحسيت اني فعلا عجزت وقربت اخش الخمسين
ابتديت اتراجع*








وقلت يازولة لازم تستسلمي للامر الواقع ولازمن ولابد كمان تعرفي انك بعد دا بقيتي حبوبة*
واحتمال كمان سنتين كدا وتبقي متخارجة من الدنيا دي*








وفي البرواز المصدي دا قرررت اني اتذكر ايام زماااااااااااان لمن كنت صغيرة*
وكنت (دلوعة البيت)*








الله يرحم ايام زمان*
*كبرنا وبقينا نسترجع شريط الذكريات

[الملكة اسماء ( ام محمد )]

ايام كنت فيها بنوووووووووووووم*
واصحى الصباح*
اكبر همومي*


حاالعب الليلة مع منو من شفع الفريق ؟

[مدناوية]

أنا غايتو لسسسسسسسة صغيرة ..

[الملكة اسماء ( ام محمد )]

ايام كنت فيها مابفكر لاكتر من ثواني في سؤال (مفاجئ)
يابت اخوك مشى وين ؟
يابت كتي وين ؟
يابت ادوكم شنو الليلة في المدرسة ؟
يابت وديتي شبطك وين ؟ حايمة حفيانة كدي زي المجنونة*
طرحه علي احد الكبار*
لاني بصراحة كنت لوسالني زول قدري او اصغر مني برد ليه بعبارة*


مافاضية*
ولحد يومي ويومكم دا ماعارفة شنو الكان شاغلني*

يمكن اكون كنت (طفلة اعمال ) وانا ماعارفة*

[الملكة اسماء ( ام محمد )]

ايام كنت فيها بدق اخوي الكبير دق الجن*
ولاااااايقدر يقول لي شي

طبعا ابوي مدلعني ومافي كلمة فوق كلمته*

خلوووووووها*
هووووو زاتو الود دا يستاهل الضرب*
ماااااااالو هابشها؟

واكيد الكلام دا بشعل جواي (حماس) الضرب المبرح للود اخوي*

[الملكة اسماء ( ام محمد )]

أنا غايتو لسسسسسسسة صغيرة ..


هههههههه... العمر كله ياعسل

خليك صغيرة كدا احسن ليك الحياة و همومها بتشيب بدري

[الملكة اسماء ( ام محمد )]

زمان لما كنت صغيرة طبعا*
كانت عندي هواية حوااااااامة


التقول دورية شرطة


اليوم كله تلقاني حايمة في الفريق*
واكتر حاجة ساعدتني وقتها*
حبوبة*
الله يرحمها ويحسن اليها*
وطبعا لان الوالد بريدني جدا ولانها هي بتريده لانه ولدها الغالي والمفضل فكانت هي كمان بتريدني
يعني كدا انا بقيت حاملة للجواز الدبلوماسي على مستوى العيلة*
ومن هنا بدت اسواء صفاتي تتضح
العناااااااااااااد


ومن يومها واليمين عندي*
يساااااااااار


فكان طلب الوالدة لي بالتزام اللعب مع اخواني وعدم اللواصة في الفريق*
آمر*
صعب التنفيذ*
لاني بصراحة مااتعودت اقعد زي البنات في البيت


لحد مااطلق علي عمي تسمية محمد ولد :d
وبرررررررررضو ماكنت بعتبرها حاجة مهمة
المهم انها هواية ورغبة ملحة يومية في الدوارة في شوارع الفريق
وكالعادة*
ابوي*
وحبوبة(الله يرحمها)
بحبو يشوفني*
مبسوووووووووطة

[الملكة اسماء ( ام محمد )]

شناة الطبع ..



خال الوالدة ربنا يديها العافية*
اها*
الزول دا كان بجي ماري بجمب مدرستنا يوميا راكب (حمارة) الله يكرمكم وغالبا بكون ماشي سوق الخدار*
فكنت وللاسف ماعندي ذوق نهائيا كدا*
وعلي شنااااااة طبع*
المهم كنت بوقف لي جدنا دا واقول ليه : عليك الله ياجدو لو لقيت بتاع الخدار عنده (تبش) او (عجور) جيب لي معاك بالله*
ولوووووو مافيها بياخة جيب لي معاهم (ليمونة ليمونتين كدا)
الزمن داك كان عملاي 8 سنوات بس*

والراجل رغم سوء ظروفه ماكان برد لي طلب ابدا طبعا*
وبرجع بيتنا اليوم داك للفطور (ملياااااااااانة)
الوالدة تقعد تحنس*
يابت اكلي ليك حاجة وارجعي مدرستك
يابت*
لو جاك فقر دم الناس بتشيل حالنا*
كيييييييييييييف وابوك مغترب يجيك فقر دم
وماعارفين اني ماكلة عجورة طولي وكمان راشة عليها حبة ملح ويوم الليمونة بيكون يوم (التمطق)*

غايتو ايام*
مستحيل انساها*

ومافي داعي طبعا اوريكم امي عملت لي شنو لما عرفت عن طريق الصدفة عن شناة طبعي اليومية*

[الملكة اسماء ( ام محمد )]

اماااااااااااانة مالعبنا بطين وتراب وحجارة كمان


اكتر موقف بتذكره ويمكن لانه الاغرب*
حصل لي وانا عمري 6 سنوات*
كان شفع الفريق بلعبه لعبة جديدة وخطرة جدا


وهي انهم كانوا بقعدوا في القوز ويقعدوا يحفروا لحد ما يعملوا حفرة بطول متر او اقل بقليل


الجزء الخطير في القصة انهم كانوا بخشوا جواء الحفرة دي بالدور*
والعليه الدور دا لازم يكون شجاع ويخش كله كدا وهم يدفنوه ومايظهر منه غير راسه


المهم جيت انا المدلعة والساعة ديك يادوبي مارقة من البيت بعد ساعة ونص حمام**
الوالدة يومتها حمتني عشرين مرة عشان شعري ينضف من التراب والمصايب البتواجه اثناء لواصتي في الشارع


اها قاموا الجماعة الحلوين لما شافوني نضيييييفة حقدوا علي واظنه حسدوني على الهدوم النضيفة والشعر المرتب داك*
قاموا اتحدوني اجي اخش جواء الحفرة ومااخاف ولا اطلب انهم يمرقوني منها*
ولاني عنيدة وللاسف كرهتي في الدنيا زول يتحداني*
قلت ليهم*
هااااااااا قايلني بخاااااااف*
والله اقعد للصباح
كدي زح ياجنا*
كدي زحوا لي*
خلال دقايق كنت مدفونة جوا الحفرة وغير راسي مافي شي برا*
وانا مبسوووووووطة لاني اثبت ليهم اني مااابخاف


وفجاءة*
الحصل شنوووووووووو؟


لينا ود عمنا كدا زول معروف الشفع بهرشوا منه*
جاء ماشي واول ماشافوه من بعيد ( فللي) كل واحد جراء على بيته
وانا وووووووين ؟


مافي ااااااااااااااي امل في انه زول منهم يقعد بعد الزول داك ظهر*
ولافي امل انه واحد فيهم يستنى يمرقني من الحفرة*

المهم ود عمي مشى في دربو ولا لاحظ لي وفضلت هناك برااااااي بعد الشفع (افرنقعوا)
اعاين لنسوان الفريق يفتشن لاولادهم عشان خلاص مواعيد الدش والنضافة لان الدنيا مغربت ومافي داعي للحوامة*
واكيد قبل النوم لازم حمام وكيد (علقة ساخنة) للناس اللعبت بعوارة ووسخت شعرها بالتراب



وانا اراقب من هناك
احبتي*
ولااحد من المخادعين الحشروني في الحفرة ديلاك جاء راجع


اخيرا*
جاتني فكرة*
يااااااااااااااااااااااااااا نااااااااااااااااااااااااس
الحقوووووووووووووني


اهيييييييييييي*
وهااااااااااااك يابكاء وكواريك


السمعني منوووووووووووو؟
ود عمي القبيييييييييييل جاء ماري بجمبي


اول ماشافني*
اقصد شاف الراس المارق من نص القوز*
قلع عيونه
وشوية فهم الفكرة*


جاء وقف فوق راسي وقال لي*
تعرفي ؟ حاااااااااااقتلك الليلة*
واجيب لي حمارة اربطها جمب راسك دا تكسرو ليك*


والا اقول ليك
خليك هنا


لحد بكرة


ومشى*
طبعا مجرد التفكير في حكاية اني حاابيت مدفونة جننتني جن


قعدت اتوسل ليه
علييييييييييييييك الله ياعمر امرقني*
علييييييييييك الله ياعمر ماتكلم امي
علييييييييييييييييك الرسول كان فت خليتني
بموووووووووووووووت*
انا بخااااااااااااااااااف*
الكلاااااااااب ياعمر*
ياعمر*
عمـــــــــــــــــر



وهو فاااااااااااااااايت ولا معبرني


صوتي اتقرش
وعمر مااااااااااااشي


لحد مااختفى ومافضل غير ضله جاري لاحقه قبال يفوت


فجاءة وقف*
وجاني راجع



قعد قدامي وقال لي*
والله*
والله
والله*
العظيم سلاسة


تااااااااااااني القاك في القوز دا*
والا ساااااااااااكت يقولوا لي بتلعبي بعيد من البيت الا ادقك بسوط عنج لامن تقولي بس


سامعة والا ماسامعة


وانا بلملم باقي دميعاتي هزيت راسي وقلت ليه
اااااااااخر مرة*
وتاني مابعيدة


هسي امرقني ياخي السخانة سلختني


مرقني ويومتها لما وصلني لامي اتمنيت لو كنت وافقت على المبيت مدفونة*

[الملكة اسماء ( ام محمد )]

هذا ونود إفادتكم أني .. لن أكبر أبدا*


نعم*

لن أكبر على كوني طفلة مدللة هنا*
لن يصغر حنيني لهذا المكان*


أشتاقكم حد الوله

دي ليكم ياخي*

[ياسر عمر الامين]

أنا غايتو لسسسسسسسة صغيرة ..

دوووووووووووووووووول...

[حاتم مرزوق]

ليس أجمل من الذكريات إلا الذكريات ، ولا يمكن للإنسان أن يعيش بلا ذاكرة ، ولا يمكن للإنسان أن يكون مجرد لحظة عابرة ، تنتهي قبل أن تنمو .
لا يمكن للمستقبل أن يتكون إلا على أساس الذاكره ، ولا يمكن للحياة أن تتأسس إلا عن طريق الذكريات ، لأن الذاكرة هي التاريخ وهي المبادئ التي إستنبطت عبر السنين ، و من أجمل الحكم ، من ليس له تاريخ فلن يكون له مستقبل .

نحن نعيش الذكرى في كل ايامنا ، وقّلْ أن تجد إنساناً لا يرجع للذاكرة الشخصية والعامة . أما غذا جاء الحديث عن ذكريات الطفولة ومشاكساتها فهذا عذب الحديث.

سنعود بمشيئة الله لهذا الموضوع الجميل ..

[الملكة اسماء ( ام محمد )]

دوووووووووووووووووول...


هههههههههه
هههههه

وظهر بعض الحاقدين

[الملكة اسماء ( ام محمد )]

ليس أجمل من الذكريات إلا الذكريات ، ولا يمكن للإنسان أن يعيش بلا ذاكرة ، ولا يمكن للإنسان أن يكون مجرد لحظة عابرة ، تنتهي قبل أن تنمو .
لا يمكن للمستقبل أن يتكون إلا على أساس الذاكره ، ولا يمكن للحياة أن تتأسس إلا عن طريق الذكريات ، لأن الذاكرة هي التاريخ وهي المبادئ التي إستنبطت عبر السنين ، و من أجمل الحكم ، من ليس له تاريخ فلن يكون له مستقبل .

نحن نعيش الذكرى في كل ايامنا ، وقّلْ أن تجد إنساناً لا يرجع للذاكرة الشخصية والعامة .

سنعود بمشيئة الله لهذا الموضوع الجميل ..

استاذنا القدير حاتم مرزوق
سعيدة باطلالتك جدا
وستتضاعف سعادتي بمشتركتك لنا اجمل مواقف طفولتك ... ماتخاف حانقول ماشاء الله على ذاكرتك .. هههههه

عارف ... في غمرة ازدحام الحياة اقف احيانا على اطلال ذكريات ايام كنت اعيش فيها بتلقاءية مفرطة وراحة بال مدهشة فاتحسر على غربة وعمر مضى بنا لمنطقة من الذاكرة يصعب عبرها التقاط صورا لمشاهد حياتية تستحق الحفظ ...

لذلك اعود بقصد لاجترار ذكريات طفولة اتمنى عودة شي من تفاصيلها الي لاعود نقية من كل هموم الحياة ..


في انتظار عودتك استاذي

[ام رغد]

كنتى معذبة الحلة عذاب..
انا كنت معذبة ابوى السنة كلها يوصل فينى محل ماشة ويرجعنى مابحب اخواني يوصلوني عشان بقطعو لحمى بالقريص

[ام رغد]

أنا غايتو لسسسسسسسة صغيرة ..


سجمى ;) سجمى سجمى

[ام رغد]

أنا غايتو لسسسسسسسة صغيرة ..


سجمى ;) سجمى سجمى