مشاققات ..

[ود الضو]

فيفيان تضمّنا ناسا منسية ,,
النور الجيلاني يصدح ويأتيك صوته دافئاً , مشجوناً , وحنيناً ,
وحضنه مشرع للاخوة الجنوبيين , رحلوا هُم وحلمهم كان( وطن أجمل ) ,
ورحل معهم صوت الجيلاني , وتركوا لنا البكاء وبواقي وطن يئن ..

[ود الضو]

وأنا يا سُعاد
وكتين تصُبى سحابَهْ تَنْزِلي زي دُعاش
بفْرِش على روحى واجيكْ
زولاً هِلِك تعبان وطاش
وأنا يا سعاد وكتين أشوفِك ببقى زول
فَرَشولوا فَرْش الموت وعاش)
.....
هسّي كلام الدوش دا في زول قالو قبل كدا ؟
وكتين تصبّي سحابة , هطول عميم , زي الدعاش , الدوش هنا بيوصل مرحلة
موت , تعب طششان , ووكتين اشوفك , بعدما يوصل مرحلة الموت تب
والناس يحسبوه ضمن الراحلين ويفرشو عليه لكن هو لسة فيهو باقي روح
تاني يعيش وريدتك متوهطاه بلا نهايات او حدود ..

[ود الضو]

يا تلاميذى العُزاز
خلِّى بينك وبين زميلك
زى مسافَهْ
قَدْر أيه؟
قَدْر المسافَهْ البين عيونى وبين سُعاد
قَدْرِ آلاف الفواجع فى انهيارات الحصاد
قدْرِ مسحوق الأنين فى تواريخ البُعاد
.....
الشعراء الصادقين حروفهم بتوصلنا مكتملة ومرصوصة بعناية فائقة
يعني ح تلاقيها صالحة ( لكل زمان ) , لو عايشت الكلام دا في الماضي
( الفترة الطّلع فيها ) ح تلاقيهو فعلاً صاح وحاصل , وكذلك للجيل
الحالي لو اتأمّلوها ح يلاقوها بنفس صلاحيتها الزمان ..
..( قَدْرِ آلاف الفواجع فى انهيارات الحصاد
قدْرِ مسحوق الأنين فى تواريخ البُعاد ) !!!
وكفـي .. اها لو داير تتكلّم مثلاً في مابين القوسين دا ح تقول شنو ؟؟
واصلاً الواحد من البداية البخليهو يشاقق في كلام الدوش شنو ؟
هل ح نقدر نريد ( سُعاداتنا ) زي ما الدوش كان بريد سُعادو ؟
.. ( قَدْر أيه؟
قَدْر المسافَهْ البين عيونى وبين سُعاد ) !!
دي قدْر ايه فعلاً يادوش ؟
شعراء المديح احسب انهم لم يتركوا وصفاً في عددية الصلاة علي الحبيب
صلّ الله عليه وسلّم الاّ وأتوا به , عدد الرمال , عدد الشجر , عدد البحار
و ............. الخ , بس الدوش جاب ( مسافة ) او بُعد جديد وخاص
واكيد المسافات تُقاس , يكون داسّيها جوة عيونو حيث لامسافة هناك ؟
او تكون سعاد بتحجب كل المرئيات وتفضل هي البتقيف قدّام عيونو ؟
.....
قامت سُعاد من رقدتهْا
الكون جميع كان انحصر مابين
قيامَهْا ووقفتَهْا ..
.. إنا لله , اها دا كمان دا نوع تاني من ( الجّن ) الجميل
الزولة دي قامت دابها من رقدتها , في لحظة القومة والوقفة
الكون ( جت ) عليه إنحصر في اللحظة الصغيرونة ايّاها ..

[ود الضو]

ومشيت عليك أنا يا سُعاد
درويش نحيل
فى صُرَّهْ شال حزنو وسَرَح
سيلاً تقيل
وسَّع خطاويهو وكَسَح
....
ولسّة دوشنا ماشي تجاه البت سعاد , انتوا عارفين انّ الدوش
لسة بتكلم مع سعاد من بعيد لبعيد , كل الكلام الطّلع منه دا
حب بالنظرة ساي لكن هي اتحكّرت دواخله , قبيل قاليها
لمن ( اشوفك ) بس ببقي زول فرشولو فرش الموت وعاش
هنا وهو ماشي عليها , زي درويش نحيل أشعث أغبر
لفَح ( الصُرّة ) والصّرّة هي ممكن تكون المخلاية او قطعة
قماش من توب قديم لملم كل ممتلكاتو فيها( حزن )
واعلنها سرْحة , تسفار عبر الخيال , الريد جنون
او جنون الريدة البتخليك قاعد ومافي , قاعد بجسدك
لكن حواسك هناااااك حيث البت سعاد ..

[ود الضو]

وأنا بيكى ببقى الكون ندى
كل المواسم همبريب
لا ريدة تتحترب صدأ لا ظن
حبيب فى حبيب يخيب
العمر بالبسمة إبتدأ والصرخة
ما صرخة نحيب
صرخة اريحية ورضا
وأنا راضى بي ذكراك نصيب
....

الدرب ساقنا لاعند ( حمّيد ) , فــ ياحمّيد صحّي الموت سلام مايغشاك شر ..
انا بس متشعلق في ( البساطة ) بتاعة حمّيد الله يرحمو , كلام عادي
لكن في الميزان ماهو عادي ..
وأنا بيكى ببقى الكون ندى كل المواسم همبريب ,
لاقاكم زول مابيعرف الهمبريب ؟ حتي الحناكيش
بيعرفوا الهمبريب , والخطاب دا ماشرطاً يكون بخاطب بيهو
بت البادية مثلاً او القرية , عادي ببساطتو دي يخاطب بيهو
كل الحضَر , ياخ دي ح تكون مواسم رائعة ..
.. أمّا باقي الكلام دا :
(( لا ريدة تتحترب صدأ لا ظن
حبيب فى حبيب يخيب
العمر بالبسمة إبتدأ والصرخة
ما صرخة نحيب
صرخة اريحية ورضا
وأنا راضى بي ذكراك نصيب ))
الواحد يتلفّحو تعويذة ويخليها مبارياهـ ..

[عاشق الترحال]

ودالضو يا راقي لك كثير سلامي وامنياتي بان تكون بخير ..
واصل فأنا اتابعك بكل حواسي ياجميل الحرف والمشاققات ..

[أبا إيثار]

السوق المركزى ,فراشة الخضار شارع الدرداقات..!

بعضنا ينظر الى باعة الفواكه والخضر وعلى حسب الشكل
ودرجات النظافة يشترى ما يريد وبعضنا ينظر الى البضاعة
فى روحها نظيفة ولا ما نظيفة ,,ويشترى ,وبعضنا بفتش
للرخيصه وان كانت طماطم مفجخه
(حينها سوف يستخدمها طماطم ملاح بدل ان تكون طماطم سلطه,,)

ود الضو ....

ياااااخ أنا بحبك لله في لله كدة

نفّاااااااج :

والله وقيع الكلام ومتعة الإنتباهة
دوماً أجدها عندك وفيها كمان شفافية
حرفك الماتع ....

يااااااخ ربي يديك الصحة والعافية
وقامتنا الدوش ربي يرحمو
وربي يشفي نور الجيلاني .

[الملكة اسماء ( ام محمد )]

وأنا يا سُعاد
وكتين تصُبى سحابَهْ تَنْزِلي زي دُعاش
بفْرِش على روحى واجيكْ
زولاً هِلِك تعبان وطاش
وأنا يا سعاد وكتين أشوفِك ببقى زول
فَرَشولوا فَرْش الموت وعاش)
.....
هسّي كلام الدوش دا في زول قالو قبل كدا ؟
.

لا ... ولن يتكرر الا على سبيل التقليد


اخي ود الضو ... دائما رائع فيما تختار


فكن بمليون خير وكن دائما هنا

[ود الضو]

[quote=أبا إيثار;729466]

[color="#0000cd"]ود الضو ....

ياااااخ أنا بحبك لله في لله كدة

.....
[size=5][color="#4b0082"]ايييييك ياحبيب
هو نفسه الذي عندي لك ( حب ) خالص
مشاققة :
في الحوّاشات في حاجة اسمها ( الشّلابي ) يا ابا ايثار
بعد ما الوابور ينتهي من حرث الارض ( طولياً )
لازم يعمل عدد 4 أو 8 سرابات ( عرضياً ) ودي اسمها الشّلابي
اها مشاركتك انت طوالي بلاقيها ( شلابي ) حرفية
جوة بوستاتي ..
دمت بالف خير ياصاحب ..

[ود الضو]

ودالضو يا راقي لك كثير سلامي وامنياتي بان تكون بخير ..
واصل فأنا اتابعك بكل حواسي ياجميل الحرف والمشاققات ..

....
عاشق الترحال الجميل
يسعد مساك
دون شك منتظر توقيعك هنا
دمت بخير ..

[ود الضو]

لا ... ولن يتكرر الا على سبيل التقليد
اخي ود الضو ... دائما رائع فيما تختار
فكن بمليون خير وكن دائما هنا
....

والاروع هو مرورك من هنا ياملكة
رحم الله الدوش ..

[mahagoub]

ود الضو
دائماً حياتك ضى
ابداعات متواصله

[ود الضو]

ود الضو
دائماً حياتك ضى
ابداعات متواصله

....

يسعد نهاراتك عمنا الجميل محجوب
مرورك يزين صفحاتي
دمت بخير ..