إجتيـاح ..

[ود الضو]

ولاَّ يمكن ألقى حاجة تخفف الجرح الأليم
حاجة تشفع ..
..............................
وأنا أنصت بكامل قوّاي العقلية الي هذه الأغنية بصوت الراحل مصطفي سيد أحمد ,, أجتاحتني الذكريات من كل فـج تلك التي ما أن أعيد نبشها إلاَّ وتفعل بيَّ ماتفعل من وجع وإتقاد وَجْد .. أجدني أحنُّ الي كل شيئ ,, وتقف أما ناظري ( قريتي ) بكامل تفاصيلها الجميلة .. تلك التي تسكنني وأشتهيها عبر الأزمان ..
انظر الي تلك البيوتات المصطفة وهي في كامل إبتسامتها ..
ولها من الآمال كما نحن , وتلك آمالنا التي قد أصابها الرّهق والنعاس .. الطرقات مليئة بتلك الأجساد ( الضاحكة ) وهي تتلفـَّح ( العرّاقي والسِّروال , الجَّلاّبية والسديري , العِّمَة والمركوب ) .. والأطفال يتجارون وراء بعضهم وهُمْ في إستقبال عربة أتت تقِلْ ( غائب ) جادت له الدنيا ومنحته حق الرجوع الي تلك القرية .. ومن أتاها عائداً بعد طول غياب لايجد لها وصفاً غير أنّ هذه القرية ومن دون مبالغة ( قد خلقها الله في يـوم ربيـع ) .. أشجار تكسو أرضها من كل إتجاهـ .. مدرسة وماسورة وطاحونة وطابونة و ( عِدْ ) محفور من زمن الإنجليز تقصده النساء وقت الحاجة عندما تـُقطع الماء بقصد تام لأن بعض المواطنين لم يلتزموا بدفع ماعليهم من مستحقات لناس الهيئة .. أزيار مرصوصة سبيل نايمة في ضـُلْ نيمة حتي تغشاها برودة مياه الفريزرات ويَصِل أجرها الي روح ذلك الذي نام منذ سنين بعيدة .. وكل تلك الأزقة التي تفتقد الي وقع الخطي التي إختارت أن تبعد حتي حين .. آآآي بَدُور أتكلم في حلتنا .. ويانا نحن أهل الرِّيف الظريف .. يانا أهل النار المِيقودة حتي أنصاص الليالي في إنتظار أن يأتي ضيف .. يانا أهل الدّواوين المابتعرف ابوابها إلاّ أن تكون مفتوحة طوال اليوم .. يانا أهل الحارّة وكْت الجّد المافيهو لِعِبْ .. يانا البقولوا عليهم ( عَرَبْ ) بالعامية .. و ( أهل العَوَضْ ) بالحديث .. يانا أهل الزراعة ( البـِلاد , التـَّرَسْ , السَّرابة , الحُقنة , الشابورة , الحَدَبة , المَلـُود , الطُّورية , الكدنكة , التيراب , والجَّرّاية ) ويانا أهل ( العنكوليب , البَرُوس , والتـَّبَسة , الحُمِّيض والفقـُّوس ) .. ويانا أهل ( الرِّيحان وحنضل بقيع , الكرنشيبة وأم اصابع , البربراوية والجديلة وأم حبيبة وأم تـَكَشـو ) .. يانا أهل السَّعيّة والرَّعيَّة إن كان في ( البقر , الغنم , والضأن ) يانا البنلجِّي السَّخل بي شوية لبن من ضرع أمه ساعة الوِلادة ومليانين فخر .. يانا البنكون ماليين الصيوان إن كان فرح أو كرهـ وبنجيه وفي يدينا شايلين الصينية الكبيرة وفي نصّها قدَح الكسرة بي ملاح اللـَّبن او اللـُّوبة .. يانا البنكرم ضيف الهجْعة .. يانا البنحرس زرعنا بالليل من الطير والبهائم وأهل ( السَّرْبة ) .. ويانا البنموت فوق عَرِضنا وأرضنا .. وبنـُّوتنا لابسات الحشمة .. ماهِن البمُرقن متبرجات ومفكوكات وريحة عطرهن فايحة .. ماهِن البكوسَن بلا سبب .. هِنْ ياهِنْ البسِدَّن مكان الراجل إن كان ( خـَتـَرْ ) لمقضاة غرض في البعيد .. هِن ياهِنْ البقيفن مع البابور وكْت الزَّرِع وفي يديهن التيراب وجركانة الموية المخيَّشة .. وهِنْ ياهِنْ البقولن للمطر أقيف شوية خلينا نناوبك الهطول .. وهِنْ ياهِنْ البمسكن العصاية وبمرقن بالبهيمات لاقدّام عشان يرعَنْ وكْت العصر .. وجنـُّوينا ماهُم البكوسو للفارغة في شوارع المدن .. وماهم الكايسين للرفاهية وإن كان مرقوا من حلتهم مرقتهم الظروف والحال الفجيعة .. هم البستروا بت البلد وكتين الحال يصعب .. أنا وهُم وهنَّ وكلنا قد نهلنا من تلك الأرض البتول .. فينا قيم لن تموت .. لنا اصالة مقيمة فينا وستبقي إلي ان نفني ..
مشاققة :
يمكن ألقى وصفة تنفع
و لاَّ يمكن ألقى حاجة تخفف الجرح الأليم
حاجة تشفع ..

[ود الجعلي]

ود الضو تحياتي

كلام يذكرنا بأشياء قد تكون في طريقها الاندثار من حيث ثقافة هذا الجيل زلكنها اصالتنا وعمقنا الذي يجب ان نتشبث به
كتابة متميز لكاتب رائع مجيد
اعجبتني الكلمات شكرا لك ود الضو

[ود الأصيل]

ولاَّ يمكن ألقى حاجة تخفف الجرح الأليم
حاجة تشفع ..

..



تربت يداي و سلمت يداك ود الضو
كت براي كايس ليك و جيتني الليلة
ترجع بي سنين ضوئية لمراتع الصبا
خليتني أنصت ليك بكل تكاوين مخيلتي
نعاين للقطاطي مصفوفة كأباريق الديوان
جيتني في الحتة الرامين فيها خيتي و كاطعين فيها صُرتي
و إت آآزول تاريك جنايا (العُقَّر ما بيلدنو و 200 جنيه من أمو ما بجيبنو).
تعاين لينا بعين رضا عن كل عيب كليلة و تغدق علينا بأشادات ما أراك إلا سابقنا إليها
بدليل انغماسي معاك للنخاع و بلا هوادة في سرد شيق و طرح متمكن عبر سياحة فكرية
هادئة و عبقرية خيال خصب يغري بالسبر عميقاً في أغوار الحروف لنستقى من رباب المعاني
فلا تحرمنا متعة تواصلك أيها الذواقة المبدع، يا مذهل الألق.تشكراتي لك مددأً بلا عدد وسعيد جداً
لإصغائك ثم لإطرائك. و لعمري هذا ما يجعلنا نصر و نواصل السير مشاةً حفاةً في ركابك لأقصى مدى.
كيف لا و مثلك يتنزل لنا فتُبيح لنا الإعتكاف في متصفحاتٍ ذائقةٍ رفيعة..هنا حيث الضوء يتخذ مساراً بيناً
ثاقياً لا ينعرج إلا.. ليعكس حزماً من ألق فائضة من بؤر الجمال و يستنطقنا الحكمة بالغةً بأحرفَ غراءَ ليلها
كنهارهالا يزيغ عنها إلاهالك.. نحن جلوس بانتظار المزيد من بوحك لينتشر الضياء أكثر.. و الحب أكثر فأكثر..
عموماً مشكور و يشرفني بالجد أن أكون من متابعيك. و إن كان لديك طول بال للسرد وقليب المواجع .، فإحنا
عليك أمان الله دي بقى ياها شغلتنا . إذاً إليك بواحدة من قصاصاتي القديمة. نفضطت عنها لتوي ، غبار الأنزواء
في خزانة النسيان و هي من بطولة حبوبةً لي بقولولا/بت ود التاي امرأة معروفة في بلودنا ديل بصفات فراسة من
أبرزها سعة الحيلة, لباقة متناهية في سجع رصين الكلام و إلقاء الحكم الصائبة و الأمثال النادرةة على غير عواهناها
و حلاوة النفس في الأكل(بفتح السين ، أي براعة و إجادة طهو الطعام).يعني شديدة خلاس في تباخة الملحات و سواة
الجبنة بالبن الحبشي كاطع مع دواشاتو كلها من جنزبيل ,عرق غرنجان, قرفة, هبهانومسمار القرنفل. كانت متخسسة في
ملحات البوشات في ولايم وليمة الأعراس. و هي فوق كل هذاو ذاك هي عاملة فيها (بصيرة) لهادراية بطبابة الجروح و تجبير
الكسور و مداواة فكك المفاصل و حجامة آلام الضهر من كطايع و فلايت وما شابه. و نحن في بيوتنا ديل ساعيين الرزق عندنا كرانك
ضهر تور (للبهم) و زاربين زرايبنا لمرحات البقر و الضأن، والماعز.. و كمان مشهورين باللبن واللبا و الروب والغباشة. يعني تقدر تقول كدي
عندنا زي اسطاف كامل من الرواعية من أخوانا البني عامر مخسسين ليهم خلوة قطية مجدوعة هنوووك و قادين نعاملهم كالأهل تماماً و
ليسوا كأُجراء و قد تعلمنا منهم لعبة الصقرية ننطلا فوق و رقصة السيف بالرقبة و اللعب بالشوتال.. ناس معروفين بالإباء و عزة النفس الشديدة
لدرجة الشموخ يعرزون الخلالفي تفف شعورهم( كأشطان بشر في لبان الأدهم).. لايتناولون طعامهم إلا من يد حبوبتي بت ود التاي شخسياً.
و لو مرة بالغلت عاست و لَّا فركت ليهم واحدة من امهاتنا التانيات القدح دا يمشي للخلوة و يجي راجع بصمتو ما يهبشو منو و لا (حرف كسرة)
القهوة لمان ترميهم عديل بالقريفة ما يشربوها علا من يد بت ود التاي شخسياً. من طرائف حبوبتي مع البصارة مرة عماً لينا بقولولو/ أُمحد نور
جاها يوم من صباح الرحمن قال أصبعو مفكوك يتراضع طول الليل حاميه النوم. كمان عمك من النوع الهتراش داك و زي عندو تمتمة كدي في كلامو
معاها لتغة في اللسان وبعدين معروف بالخوف وا لجرسة الشديدة من كي النار. والحبوبة فاهماه طيب مليح. عدت تبلبص ليه: كدي أقعد آمحدنور
أخوي ضوق جبنتنا المدنكلة دي , طبعاً عايزة تاخدو برواقة و تجرجرو ليك في الونسة لمان طب يغفل و تقول كدي عاد تاخدو ليك على حين غرة.
فطوالي عمك راح مصنقر اتحكر في الشناط و كسر كرونة و قعد يطربق جاي و يطربق جاي و هو مندمج قامت هي بالراحة غفلتو و حشرت حديدة
(المحور) في جمر الترتوس وسط اللدايات. عشان لما يحمر طوالي على أصبع عمك عديل ؛ ما فيش طريقة غير كدا.و بهناك البن لمن خلاس قلا
طااب وعطرابتو عبكت في السما شمموه القلوة العجيبة لمن قرب يدوخ . و بعد فارت الجبنة و أجريت ليها الطقوس و الذي منو.. كبو ليك ليه البكرية
و بعد شوية لحقوه البركة. وكت بقا على التني والتلت.و جات ساعة الصفر,عمك الظاهرعمك شغل قرون استشعار الحاسة الساتة,لا حظ إن أمراً غير
طبيعي يدور في خلد الحاجة بت ود التاي و هي عويناتا كل شوية يبرقن (متل الحدية) دايرة زولأن يثبت ليها عمك ما ينط من التشة . هنا تأكد للحاج
أن مؤامراً تحاك ضده بليل توشك أن تقع. لكن الظاهر عمك أمحد نور فطن للحيلة الماكرة في آخر ثانية لمن كحل ليك المحور بقعر عينو. فعمل تقدير
موقف بسرعة البرق و باغت ليك الحبوبة بدخلة شمال،أول شيء طرزن من محلو وانشحط متل هنووك وقال: كدي أصبري لي عاد آبت ود التاي, بدور
أسعلك سعال: دحين فلان الفلاني ود الفلتكاني داك ما قالو واحداً من جنياتو المطاميس ديل عرس جاب لو مريةً من خَدُّوم البنادر ديل؟ قالتلو: آآآي
بلحيل يا أمحد نور أخوي, لا كين بقول ليك شنو! علا كدي أصبر وقرب تعال لي جاي وما تبتعد يا يابا أنا البدور أحدثك! ثم سحبته من ثوبه فانتبه عمك
ليجد المحور مولع و مشهراً في و جهه قام تار لورا و قمز ليك كما لم يقمز من ذي قبل و من حيسو خرت ساااه و لى مدبراً و لم يعقب!!!قال: ليها أها
خلاس بمش هسه أواجب ليك الناس ديل و بجيك فسراع فسراع.. على بال ما تتني و تتلتي في جبنتك دي! جرى عمك شايل ليك سوج الراكوبة
مع سدادة الصريف في صفاقو فمرق نافداً بجلده و نجا بأصبعه. حالفاً بالتكتطعو بأنه قد شفي تماماً لا يغادر سقماً ،وموه محتاج كي نار لا شيتين؛
فكان يحدث نفسه متندراً: أصلو كان دماً عاقد و مما شاف نار بت و التاي دي عقدتو زاتا فكت. و من ديك و عييك طار طيرة أب ريش من الدريش..

[ود الضو]

اعجبتني الكلمات شكرا لك ود الضو

....

وانا سعدت واعجبني مرورك اخونا ود الجعلي
دمت بخير آآآالحبيب ..

[ود الضو]

عابر سبيل
سِنْ كيبوردك وأعبر بنا حيث هناااااك
قطاطي , كرانِك , صرايف اللّات قش وقصب , زرايب من شوك السنط
وأناس كـ الحمائم في بياض قلوبهم وصفاء نيّاتهم ..
( بت ود التاي ) , حيث التطبيب بي الفطرة
نار او اعشاب طبيعية مية المية
ويتبع الوصفة ( الكمدة بالرّمدة ) ..
فــ ياعابر ياحبيب زي ماقلت ليك
شاقق هنا وبي مزاااااااااج ..
ولاتنسي انّ الحنين لم يزل يؤزّنا ازّاً عنيفاً
الي تلك السنين الخدراء , ايام كنّا مصابين
فيها بالحياة ..
تحياتي ..

[ود الضو]

http://tatar7.com/ts3/register.php?ref=17

....

حباب طارق
رابطك ابي يفتح عندي
تحياتي ..

[عاشق الترحال]

ودالضو ااتيت لأعلمك بأني مررت من هنا وايضا اردت ان أقل لك دع المساء يأتي لأرتشف القهوة معك ..

[ود الضو]

ودالضو ااتيت لأعلمك بأني مررت من هنا وايضا اردت ان أقل لك دع المساء يأتي لأرتشف القهوة معك ..

......

مليون حباب عاشق الترحال والجمال
سيكون مساءاً جميلاً وانت حضور ياوريف
منتظرك اكيد ..

[ود الأصيل]

عابر سبيل
سِنْ كيبوردك وأعبر بنا حيث هناااااك
قطاطي , كرانِك , صرايف اللّات قش وقصب , زرايب من شوك السنط
وأناس كـ الحمائم في بياض قلوبهم وصفاء نيّاتهم ..
( بت ود التاي ) , حيث التطبيب بي الفطرة
نار او اعشاب طبيعية مية المية
ويتبع الوصفة ( الكمدة بالرّمدة ) ..
فــ ياعابر ياحبيب زي ماقلت ليك
شاقق هنا وبي مزاااااااااج ..
ولاتنسي انّ الحنين لم يزل يؤزّنا ازّاً عنيفاً
الي تلك السنين الخدراء , ايام كنّا مصابين
فيها بالحياة ..
تحياتي ..


علالاكين يا ود الضو
المشاققة ما بتجيب لينا
مداقشة التُّباس البسو(الدانكسيت)
غايتو رغم ما بلغني من شكوى بعضهم من طول السرد،
و ربما عسر الهضم، و لكن لكل من أضنته حوادث زماننا هذا،
فلعل هنا منتجعاً هادئاً تعبق جنباته بريح الماضي. نكتها ليك عشان نحقق
المتعة و نكسر حاجز الرتابة و الملل؛ فضلاً عن طرد رائحة الفم جراء الوجوم.
فلنتابع رؤانا التوثيقية شاكرين ليك حرصك على إنعاش عاداتنا شبه المندثرة حيث
كاد النعاس يدب إليه من تحت أجفانه ؛ فنتمنى عليك ألا تنقطع. المهم أن الوصل
الجاية دي تابعة لنوادر حبوبتنا بت ود تاي الله؛ طبعاً هي امرأة سليطة اللسان مهيبة
الجانب؛ الرجال يعملو لها حساب، بمن فيهم شيخ الحلة ظاطو/ العمدة أُمحمد ود التاي
شنة و رنة. في شان كونها باقية ليه عمة في الحسبة.آها مرة قاعدة مع (حريم الجبنة)
و الساعة ديك كانت رايقة مع الفنجان الأولاني قامت تحكي ليهن كطع أخدر سااااه، قالت:البارح
من عصيراً بدري كدي وكت راعي اللقوط دا رجع بالغنم قمنا حلبنا وصررنا بعد ما شاركنا البهم أول
شئ شاركناه في أمهاتو و بعيدين كمدناهو دخلناه الكرنك و أمهاتو بعد الليل طب عتم و بردن نسايمو
عقلن في الزريبة يجرن في الجرة والحمير بهناك كروم كروم يرُضْمَن في سُوَّاس(اللعوت اليابس) و الكلاب
ديل عاد يعوصن ينبحن يقولن ههههو. أظن آآ بنية زي الشامات ليهن ريحة مرافعين.و لا حركة همباتة و لَّا
عرباً دَخَاخينْ.علا لاكين وين العشا ، شن قدرن يقربن من السعية !!عندنا جرقاس دا متل الأسد و بريبة دي
عاد وكت تجْمُر ليك كدي تقول : الله ما رماني فيها, الأرنب دي في القنيص تتدردق قدامها زي مُترار الخيت
تحت القمرا.أها الشويفع ود بنيتي دا كان راقد في صفاقي؛ أها و كت يا بنات أمي جاتني ليكن صحية كدي
سمعت لي حاجة توشوش وشششش. رفعت رأسي سامعة ليكن الكديسة تنتر ليك متل الكدي بتكاتل
ليها في ضلها أها انعدلت صنقرت ليكن على حيلي، لقيتو ما ياهو الدابي أب درق و السوميت سوميتو دا
فوق ضهروي تلاصف مع القمرا تقول قرمصيص العروس.. لكن يا يمة مكطع حتة حتة لمن مدلدل من شناط
العنقريب جنب رويس الشويفع.. تاريها دي عاد الكديسة بت الحلال , كان ما كتلتو كان و دَّر الجنا وليد
وجويهل لا ضاق ربطولو الحريرة لا ترترولو الضريرة و بعد داك عاد تقابتنا دي خليناها موقدة لا الدغيش
تاني ما هجسنا نمنا. و بعد شويتين كدي عينا ما لصقت سمعنا البياح. كمان عارف آ ود الضو الغريبة
أنا حبوبتي بعد الريدة الجنونية دي كنت مكرها ليك العيشة و أخوك طبعاً شفت جداً و حريف في
فنون التخفي و والزوغان و المناورة بحركات بهلوانية أكروباتية.. مرة عارف ناس عمة ً لينا جونا
ليك ضيوف معاهم بنية نديدتي . فأنا على العين الزايدة قمت أتخمج ليك فمرقنا برة تحت
المطرة ننطط و نهتف نقول: عية عية بلاد أبوي القدامية لحدت ما عكرنا ليك مزاج الحاجة
في جلسة الجبنة فقامت نيشت بعكازة ليها قرينات تتوكؤ عليها وتهش بها على غنمها)
نسميها (الحنكول) و ليها فيها مآرب أخرى. و لكن أهم وظيفتين أنها تجبد و تخبت
(حنكلوت جبدوت).. فالعبد لله رامي ليك بالي موقت للجدعة ومعاها تماماً
انبطحت أرضاً لتصاب بنت العمة الضيقة المسكينة كانت واقفة
وراي أردتها ناشفة بلا حراك. فكان منظراً يبعث اليتيم
على الضحك رغم مأساويتة.

[ياسر عمر الامين]

ود الضو يا اصيل...شكرا لرائعة التجانى حاج موسى "تباريح الهوى" التى اججت فيك كل هذه الذكريات من الشوق والوله والحنين الى الوطن وخضرة الوادى العطوف فأخرجت لنا هذا الازدحام الرائع من العرض والوصف لوطن نغادره جسما وتبقى ارواحنا معلقة فيه...لك كل الود الحبيب ود الضو...

[مصطفى هاتريك]

الجاني منك و من تباريح الهوى

وصفه بصعب

ود الضو يا جميل

[سوباوي]

الرحيب كما ربوع بلادي .. ود الضو ..

وصفة تنفع .. ياو دالضو .. حاجة تشفع ..

الذكريات قيلولة الماضي يا صاحبي والغناي يصعد بنا أعلى شجيرة الروح ولا يشفع لك من تالانا يا ود الضو

سوى جمال حضورك الزاهي هنا وأنت مستف حنين لا حدك .. القرية والبيوتات .. والقيام الدغش ..

والأصوات الهجين ما بين من يتراوحن نحو الدكة لتجميع السعية وسربة نواحي السرحة والذاهبون نواحي

الأرض البكر والطورية شفرة العلاقة بينهم وسحاب وتيراب ويشلخ براد عبادي وقبلي يشق قبة السماء ..

والتحيات الطيبات بين البسطاء وكيف أصبحتوا .. وقلوب تريانة محبة .. ثم البنيات المحتشمات الملفحات

ومقناعن جاهز متى ما باغتهم غريب بالتفاته .. وهن بتمامهن اللائي وصفهن شيخنا "حميد" في مصابيح

السما التامن طشيش وما أروعه وأروعهن ( إيدين بنيات الفريق .. قادرات على .. صد الحِدَيْ ..

جاسرات على .. صقر النكد .. إيدين بنيات الفريق .. بتهدهد الطفل الرضيع .. بتعدي شيخ ..

دومة الحفير .. تشلخ لبق .. .تسقي الخدير .. بتعوس وتفرك للملاح .. بتورِّق اللوبي وتحش تمسك مراح ..

تحلب ، تخُش .. تغسل هموم أيامه في طشت الحلم .. تنفض تشر الشوق هِدِم ..

تنشل من البير أم تلاتين باع تعتِّل .. تفزع الطيّانة لو ما تجدع التبّانة بتجيّه بيوت ..تغزل خيوت ..

بتطرز المنديل تخيِّت لي طواقي العيد ..صبر .. بتَتَبِبْ السجاج مع الفجاج تقوم .. إيدين بنيات الفريق بتحش تمر ..

تخرت سبيط بتعتِّق الدكّاي ..وتخبز للصفاح بتكفّي عيزومة وضيوف .. بتغني قيدومة وتطوف بتهني ..

بتودي وتجيب بتحني .. بتدلك حبيب بتولِّد الأمات .. تربِّي على الصلاح ..زي ماب تضمِّد للجراح ..

إيدين بنيات الفريق إن داهم الحلاّل خطر قادرات على شيل السلاح .. )

الله حي .. شفته كيف يا ود الضو .. البنوت ولعن طفن الرتاين .. وهنا عوالم سأفتحها عليك وعليا ولا قبل لنا سوى

أن نتسبحن ونتحوقل .. ونتقرفص على ناصية هذا الجمال ..

تباريح الهوى ومصطفى ود سيد أحمد تغشاه ألف رحمة صوت وحنجور كنز ومقامات صوت ماتع ..

والتجاني حاج موسى رجل مرهف .. بالرغم من أني شايل منه شوية كده هو و عبد الوهاب هلاوي

وعبدالرحمن مكاوي والصادق الياس حيث قاموا بمقاطعة مصطفي سيد أحمد و تم سحب اغانيهم من

مصطفي ومنها جمعنا قدر-والله ايام يازمان-الملام وكف مصطفى عن ترديد هذه الأغاني .. وذلك على

أثر التصرف الغريب الذي أتى به حمد الريح والشاعر يوسف السماني ، 500 جنيه يا يوسف السماني

وحمد الريح وما أسوأ العلاقات حين تنتنها روائح المادة .. ولو كانوا يعلمون لما فعلوا ..

أغنية "شقى الايام" غناها مصطفى لعامين متتالين وسمعها حمد الريح وأعجب بها فعرض على

يوسف السماني 500 جنيه وجاء الأخير لمصطفى قال ليه يا مصطفى حمد الريح دفع 500 ج أنت بتدفع كم؟

شكره مصطفى وقال له أن المسالة لم تصل حد الابتزال بعد .. وكف عن ترديد الأغنية ..

آها يا حمد الريح إنشاء الله تكون الغنية دي نفعتك ويا يوسف السماني إن شاء الله تكون الـ 500ج غنتك ..

غايتو عالم عجيبة خلاص ..

أنه مصطفى يا ود الضو حين وضعوا كل المتاريس أمامه وأرادوا إيصاد الأبواب أمام صوته الرخيم ..

وتزايدت المضايقات من كل الاتجاهات بدأً من لجنة التحكيم في مهرجان الثقافة الثاني التى فضلت عليه

فنانين لم يقدموا ما قدمه مصطفى بحجة عدم حركته في المسرح وبحجة ميوله الاشتراكية مروراً بشعراء

منتدى الحروف بامبده الذين أصدروا بياناً بمنع مصطفى من ترديد أغنياتهم ناس التجاني حاج موسى وهلاوي ..

ولم تقصر وزارة التربية والتعليم فأصدرت قراراً بنقل مصطفى نواحي مدارس باقاصي منطقة الجزيرة

فترك لهم العمل والجمل بما حمل وعمل مصمماً بمصنع النسيج بالخرطوم بحري مساء ألتحق بمعهد الموسيقى

والمسرح ليتحكر في كل قلوب عاشقيه .. ويذهب بك يا ود الضوء نواحي عوالم عجيبات ..

لا زالت نفسك الأمارة بالجمال تحدثنا بها .. شفته كيف يا صديقي هذا ما جنته يداك .. آها كده كويس ..

مرحق تحياتي يا صاحبي ولك الحقول بتمام نضارها ولك مودة بحجم الشمس..

[ود الضو]

[QUOTE=aabersabeel;731248][center][color="#0066cc"][CENTER]علالاكين يا ود الضو
المشاققة ما بتجيب لينا
مداقشة التُّباس البسو(الدانكسيت)
غايتو رغم ما بلغني من شكوى بعضهم من طول السرد،
و ربما عسر الهضم، و لكن لكل من أضنته حوادث زماننا هذا،
فلعل هنا منتجعاً هادئاً تعبق جنباته بريح الماضي.

.....

حباب عابر
وبتنا لانملك غير ان نتكلم عن الماضي آآآالحبيب
لاحاضراً يسُر ولا مستقبل معالمو واضحة
دعنا نتكئ علي ذكريات وحياة زماااان
.. انا وانت والدنيا الامان
زمن الغناوي الطالعة من قلباً رضِي وحسّاً ندي وزوقاً رهيف
قلت لك أعبر بنا ..

[ود الضو]

ود الضو يا اصيل...شكرا لرائعة التجانى حاج موسى "تباريح الهوى" التى اججت فيك كل هذه الذكريات من الشوق والوله والحنين الى الوطن وخضرة الوادى العطوف فأخرجت لنا هذا الازدحام الرائع من العرض والوصف لوطن نغادره جسما وتبقى ارواحنا معلقة فيه...لك كل الود الحبيب ود الضو...

....
يسعد نهاراتك يا ياسر
التفاصيل السمحة يا ياسر
بتظل متوهطانا ومباريانا محل نمش
ياخ حياة الريف ( الحلاّل ) سمحة بالحيل
ولانملك غير ان نكتب لحظة ان يوزّنا الحنين
تحياتي ..

[ود الضو]

الجاني منك و من تباريح الهوى

وصفه بصعب

ود الضو يا جميل

......

حبيبنا مصطفي هاتريك
حبابك وسعيد انا بأن اجدك هنا ياخ
و ( لمّا طال بي النوّي بقي لي اسيبك مستحيل ) ..
تحياتي ياحبيب ..

[ود الضو]

الرحيب كما ربوع بلادي .. ود الضو ..

وصفة تنفع .. ياو دالضو .. حاجة تشفع ..

الذكريات قيلولة الماضي يا صاحبي والغناي يصعد بنا أعلى شجيرة الروح ولا يشفع لك من تالانا يا ود الضو

سوى جمال حضورك الزاهي هنا وأنت مستف حنين لا حدك .. القرية والبيوتات .. والقيام الدغش ..

والأصوات الهجين ما بين من يتراوحن نحو الدكة لتجميع السعية وسربة نواحي السرحة والذاهبون نواحي

الأرض البكر والطورية شفرة العلاقة بينهم وسحاب وتيراب ويشلخ براد عبادي وقبلي يشق قبة السماء ..

والتحيات الطيبات بين البسطاء وكيف أصبحتوا .. وقلوب تريانة محبة .. ثم البنيات المحتشمات الملفحات

ومقناعن جاهز متى ما باغتهم غريب بالتفاته .. وهن بتمامهن اللائي وصفهن شيخنا "حميد" في مصابيح

السما التامن طشيش وما أروعه وأروعهن ( إيدين بنيات الفريق .. قادرات على .. صد الحِدَيْ ..

جاسرات على .. صقر النكد .. إيدين بنيات الفريق .. بتهدهد الطفل الرضيع .. بتعدي شيخ ..

دومة الحفير .. تشلخ لبق .. .تسقي الخدير .. بتعوس وتفرك للملاح .. بتورِّق اللوبي وتحش تمسك مراح ..

تحلب ، تخُش .. تغسل هموم أيامه في طشت الحلم .. تنفض تشر الشوق هِدِم ..

تنشل من البير أم تلاتين باع تعتِّل .. تفزع الطيّانة لو ما تجدع التبّانة بتجيّه بيوت ..تغزل خيوت ..

بتطرز المنديل تخيِّت لي طواقي العيد ..صبر .. بتَتَبِبْ السجاج مع الفجاج تقوم .. إيدين بنيات الفريق بتحش تمر ..

تخرت سبيط بتعتِّق الدكّاي ..وتخبز للصفاح بتكفّي عيزومة وضيوف .. بتغني قيدومة وتطوف بتهني ..

بتودي وتجيب بتحني .. بتدلك حبيب بتولِّد الأمات .. تربِّي على الصلاح ..زي ماب تضمِّد للجراح ..

إيدين بنيات الفريق إن داهم الحلاّل خطر قادرات على شيل السلاح .. )

الله حي .. شفته كيف يا ود الضو .. البنوت ولعن طفن الرتاين .. وهنا عوالم سأفتحها عليك وعليا ولا قبل لنا سوى

أن نتسبحن ونتحوقل .. ونتقرفص على ناصية هذا الجمال ..

تباريح الهوى ومصطفى ود سيد أحمد تغشاه ألف رحمة صوت وحنجور كنز ومقامات صوت ماتع ..

والتجاني حاج موسى رجل مرهف .. بالرغم من أني شايل منه شوية كده هو و عبد الوهاب هلاوي

وعبدالرحمن مكاوي والصادق الياس حيث قاموا بمقاطعة مصطفي سيد أحمد و تم سحب اغانيهم من

مصطفي ومنها جمعنا قدر-والله ايام يازمان-الملام وكف مصطفى عن ترديد هذه الأغاني .. وذلك على

أثر التصرف الغريب الذي أتى به حمد الريح والشاعر يوسف السماني ، 500 جنيه يا يوسف السماني

وحمد الريح وما أسوأ العلاقات حين تنتنها روائح المادة .. ولو كانوا يعلمون لما فعلوا ..

أغنية "شقى الايام" غناها مصطفى لعامين متتالين وسمعها حمد الريح وأعجب بها فعرض على

يوسف السماني 500 جنيه وجاء الأخير لمصطفى قال ليه يا مصطفى حمد الريح دفع 500 ج أنت بتدفع كم؟

شكره مصطفى وقال له أن المسالة لم تصل حد الابتزال بعد .. وكف عن ترديد الأغنية ..

آها يا حمد الريح إنشاء الله تكون الغنية دي نفعتك ويا يوسف السماني إن شاء الله تكون الـ 500ج غنتك ..

غايتو عالم عجيبة خلاص ..

أنه مصطفى يا ود الضو حين وضعوا كل المتاريس أمامه وأرادوا إيصاد الأبواب أمام صوته الرخيم ..

وتزايدت المضايقات من كل الاتجاهات بدأً من لجنة التحكيم في مهرجان الثقافة الثاني التى فضلت عليه

فنانين لم يقدموا ما قدمه مصطفى بحجة عدم حركته في المسرح وبحجة ميوله الاشتراكية مروراً بشعراء

منتدى الحروف بامبده الذين أصدروا بياناً بمنع مصطفى من ترديد أغنياتهم ناس التجاني حاج موسى وهلاوي ..

ولم تقصر وزارة التربية والتعليم فأصدرت قراراً بنقل مصطفى نواحي مدارس باقاصي منطقة الجزيرة

فترك لهم العمل والجمل بما حمل وعمل مصمماً بمصنع النسيج بالخرطوم بحري مساء ألتحق بمعهد الموسيقى

والمسرح ليتحكر في كل قلوب عاشقيه .. ويذهب بك يا ود الضوء نواحي عوالم عجيبات ..

لا زالت نفسك الأمارة بالجمال تحدثنا بها .. شفته كيف يا صديقي هذا ما جنته يداك .. آها كده كويس ..

مرحق تحياتي يا صاحبي ولك الحقول بتمام نضارها ولك مودة بحجم الشمس..

....

سوباي الجميل
وحات الله مشتاقين ليك ولي جميل حرفك
انا لله ياخ
هسي الواحد يرد عليك بشنو ؟
وانت تطوف بنا هنا ( جوة حلتنا ) وهناااااااااك ( ودسلفاب )
التي تحتضن قبره ( مصطفي ) , ايييييه دنيا
قطعاً من تحدثت عنهم ياسوباوي وهم يريدون المقابل المادي للاغنيات
هم لايعرفون مصطفي , مصطفي زي مابنقول ( زول آخرة )
ويكفينا اننا نجد انفسنا جوة اغانيه ونرتااااااح حد الغمدة
شكراً ياخ وانت كـ عادتك تلوّن كل اللوحات الباهتة
بجميل حرفك وحضورك ..
تحياتي وتقديري ..