عــذبتونا

[عاشق الترحال]

عـــــذبتونا


اربعه سنين زياده
خافو الله
ولدتونا ولاده
ونشفتونا نشاف
عصرتونا لامن
جبنا الزيت
وقلنا.. ياريت
عزبتونا ونجضتونا
ومافاضل ليكم
إلا تعبونا في
علب التونة
وتبيعونا
بأقل من سعر
الصابونة
في عرض السوق
اربعه سنين
من تاني خراب
ودمار
الناس طفشت بره
البلد من كل فئة
الاعمار
انعدم الضمير فيكم
وعدم الضمير
خلي الناس تضبح حمير
لا رقيب لا عتيد
ونحن ناكل سااااي
زي الزول ... العوير
دمرتو مشروعنا الأوينا
سبناها الجزيره
و الخرطوم تلاوينا
مافاضل هناك غير
جدي العوض
حواشتو بور منها وليها
العوض
والزين
زرع التقاوي الفاسده
وحصد الندم
والنتيجة أهو داك
مرمي في غور السجن
ومريم ترمي في
زلابيتة
عشان تربي شافعتة
تكبر تتم دراستة
تبقي دكتورة
تبقي أميرة تبقي
وزيرة ما شغلتة
المهم تشتغل
تجيب القريشات
تربي باقي الوليدات
وتخلص دفتر
عباس الإتملا
إتملينا غبن
وبقيتو تزرعو فينا الفتن
وكل يوم نسمع قبيلة فلان قاتلت قبيلة علان
وعلان قرأ الإعلان
لملم شهاداتو
قدم للوظيفه الماهيتة ما جايبة غير كم رغيفة
ماجايبة حق الملاح
لا السكر ولا التفاح
ما جايبة حق المدارس والملابس والبقالة
وسيد اللبن
الخدرجي والجزار الحيطة دايره تقع
وعلان وقع من الزعل
وكتين سمع
تم الإختيار للوظائف الجديده
بس انا اول زول اجيكم من الدغش
شايل شهاداتي وكل طموحاتي
يازول ما قلنا ليك خلاص انتهاء
المسكين ما عندو واسطة
وسيد الضهر ايامو باسطة
بعد ايام قنع
من خيرا فيها
باع الارض
وغواشات امو الدهب
حزم حقايبو
وستف امانيهو تب
ودع الناس العزاز
وسافر بره البلد
اربعة سنين
لشنو
كفاية كده
ناس بتضبح
روحه عز الضهر
ما لاقية حق
الذكاة
وناس وناس
إييييييييك
ما بتسأل من أي حاجه
وتقول لي تاني
اربعة سنة ...


(عـــاشق الترحال )

15/12/2012