قصيدة ( جايي تاني تقول مسامح ) شعر محمد ابوالسعود يوسف سوريبه

[ابوالسعود سوريبه]

جاى تانى تقول مسامح
جاى تانى تقول مسامح
وتبدأ بى نفس الملامح
يوم تخاصم
يوم تسالم
ويوم تقول
أصلوا ما بيناتنا عِرفه
جاى تانى تقول مسامح
حتى لو جيت مارى صُدفه
بتنسى ما تسلم علىّ
ولو عيونك صادفونى برضو تتغاباني عِرفه
جاى تانى تقول مسامح
إنت ما راعيت
شعوري000
في غيابك00
في حضوري00
وبرضو جُرت
وما رحمت
ولما بنت
جيت تقول إنك مسامح
ونبدأ قصة ريد جديده
وتبقى بدل الريده إلفه
ما أظنك ...
ما أظنك مّره تصفا
بكره حا تغير كلامك
والمحنه تكون عذاب
ما كفايه سنينى راحت
بين غرورك " والعتاب"
والمشاعر الحلوه صِبحت
ذى دفاق مويه في رهاب
وبرضو جاى تقول مسامح
ياخى أرحم
خلى ربنا ليك يرحم
وحاول أفهم
إنى سيبتك بى إرادتى
وشلت صورتك
فى دواخلى
أقسى ذكره
وماضى عايش
فينى حاضر
ومانى ناسى
برضو فاكر
إنك إنت
بعت ريدى
وما بيدى
عشان أسامحك
تانى مَره
أو أصدق
إنت جيت قصدك تسامح


محمد ابوالسعود يوسف

[ياسر عمر الامين]

يا سلااااام عليك ياابوالسعود..وغاية السعادة بطلتك فى المنتدى واريج مقدمك عطر قصيدة يعطر المكان...لك الود والتحايا وا?منيات الطيبة باقامة مليئة بالعطاء فى هذا المنتدى...

[ابوالسعود سوريبه]

يديك العافيه الصديق الحبيب ياسر مع المني لكل اهل المنتدي بعام سعيد ومفرح ومنفرج علي كل الشعب السوداني وتحيه خاصه لكل
الاهل والاصدقاء بمدني

[ahmed algam]

الله عليك استاذ ابو السعود
ياللروعة وياللجمال

اهلا بقدومك من جديد الي منتديات ودمدني
اتمني ان يطيب لك المقام بيننا
وان تتحفنا باابداعات قلمك

[ابوالسعود سوريبه]

تسلم استاذ احمد علي هذا الاطراء الأنيق الرقيق
مع الأماني أن ينال حرفي اعجابكم وأهل المنتدي
وكل الود والاحترام والمحبه الصادقه لكم جميعاً
مع فائق شكري وتقديري ودمتم ...