ams2000
13-09-2015, 02:27 AM
بعد غياب سنين عددا عدت الي مدني وكلي شوق الي كل شبر فيها عدت وشوقي الي حواريها ومدارسها وطرقها واسواقها رغم ان الطرق تغير والملامح تبدلت الا انني استطعت ان استعيد كل ذكرياتي الجميله في مدني مابين مدرسه العشير الابتدائيه والنهر الابتدائيه مرورا بالموتمر المتوسطه ثم بالاميريه المتوسطه ومنهما الي السني الثانويه اجمل الايام قضيتها بين السوق الجديد والمنطقه الصناعيه وبين السوق الكبير بكل شوارعه من شارع الدكاتره الي شارع اتجاه واحد الي موقف السوق الكبير الي مستشفي اللواء عشرين الي مركز شرطه الولايه حيث استخرجت اول رخصه قياده وانا ابلغ من العمر ثمانيه عشر شهرا ويوم فضحك الضابط وقال لي مستعجل مالك تئكرت كيف كنا بنتفرج في النيل لما يفيض في خور البحر في امسويقا في رحلتنا الجميله سيرا علي الاقدام من منزلنا في حي العشير الي مدرسه النهر وكيف كنا نبدل الطريق خوفا من ان يخرج علينا ثعبان حيدر قطامه رحمه الله وكيف كنا بناجر العجلات من ام سويقا ومن بانت الساعه بطراده وكنا لما نتاخر نكون خايفين يشيل الامنيه اتذكرت النيافه والكوارع والنيفه اتذكرت استاد وادمدني لما نحضر كوره الاهلي والاتحاد والطابور الطويل في الاستاد لما يجي الهلال ولا المريخ وتكون الكوره الساعه 7 ونمس من الساعه 2 عشان الصف طويل وندخل مع اي زول كبير نقول ليه قول انا اخوك ونخش بعد محاولات كتيره فاشله اتذكرت عجلتي الدبل الحمرا الجابها لي عمي لما نجحت من الابتدائي للمتوسط وفرحتي بيها وكواستي اليوم كلو لزول يربطها لي اتذكرت دافوري العصر من اولاد الفريق اللي ما لقيت فيهم ولا واحد وكلهم خلو البلد وسافرو اتذكرت اول كوره لعبتها في الروابط مع فريق الجهاد في ملعب التلفزيون والناس اكبر مني اتذكرت لما نمش الميدان نلعب ورا القون لاننا اصغر من اننا نلعب مع الكبار اتذكرت حاجات كتيره جدا واستعدت ذكريات جميله مرت سريعا كانها كانت بالامس القريب وليس قبل سنين عددا ايام مضت بحلوها ومرها .